អង្គការសុខភាពពិភពលោក (WHO) បានរាយការណ៍ថា តួលេខនៃករណីឆ្លងថ្មីនៅទូទាំងពិភពលោកក្នុងសប្ដាហ៍កន្លង បានថយចុះរហូតដល់ 16% ដែលប្រហាក់ប្រហែលនឹងកន្លះលាននាក់ ខណៈតួលេខអ្នកស្លាប់ក៏បានថយចុះនៅគ្រប់តំបន់ក្នុងពិភពលោក។
សារព័ត៌មាន CNN បានដកស្រង់របាយការណ៍របស់អង្គការសុខភាពពិភពលោក បង្ហាញថា តួលេខសរុបនៃអ្នកឆ្លង Covid-19 ក្នុងពិភពលោក បានថយចុះ 16% ក្នុងសប្ដាហ៍កន្លងដែលបញ្ចប់នៅថ្ងៃទី 14 កុម្ភៈ ធៀបនឹងមួយសប្ដាហ៍មុននោះ។
ជារួម នៅក្នុងសប្ដាហ៍កន្លងទៅ មានករណីស្លាប់ចំនួន 81,000 នាក់ និងករណីឆ្លងថ្មីចំនួន 2.7 លាននាក់ ទាបជាងប្រហែល 500,000 ករណី បើធៀបនឹងមួយសប្ដាហ៍មុននោះ ដែលបញ្ចប់នៅថ្ងៃទី 7 កុម្ភៈ។
WHO បានឱ្យដឹងថា តួលេខអ្នកឆ្លងថ្មី ថយចុះពីរខ្ទង់ នៅក្នុងតំបន់ទាំងអស់លើពិភពលោក លើកលែងតែតំបន់ មេឌីទែរ៉ាណេភាគខាងកើត ចំណែកតួលេខអ្នកស្លាប់ថ្មីក៏ថយចុះនៅគ្រប់តំបន់ក្នុងពិភពលោក។
សហរដ្ឋអាមេរិក បច្ចុប្បន្ន រកឃើញករណីឆ្លងថ្មីខ្ពស់ជាងគេបង្អស់ក្នុងពិភពលោក បន្ទាប់មកគឺប្រទេសប្រេស៊ីល បារាំង រុស្ស៊ី អង់គ្លេស និងតំបន់អៀរឡង់ខាងជើង (Northern Ireland) របស់អង់គ្លេស។
WHO ក៏បានសង្កត់ធ្ងន់ថា វីរុសក្លាយពូជថ្មីនៅប្រទេសអង់គ្លេស បច្ចុប្បន្នត្រូវបានរកឃើញនៅក្នុងប្រទេសចំនួន 94 ចំណែកវីរុសក្លាយពូជនៅប្រទេសអាហ្វ្រិកខាងត្បូង បានបង្ហាញខ្លួននៅក្នុងប្រទេសចំនួន 46 ខណៈដែលវីរុសក្លាយពូជនៅប្រេស៊ីល បានឆ្លងទៅប្រទេសចំនួន 21 ក្នុងពិភពលោក៕
ប្រភព៖ CNN
