ប្រធានាអង្គការសុខភាពពិភពលោកបានព្រមានថា មិនត្រូវរំពឹងទៅលើវ៉ាក់សាំងតែមួយមុខ ដើម្បីបញ្ចប់វិបត្តិសុខភាពសកលនោះឡើយ នៅក្នុងស្ថានភាពដែលករណីឆ្លងCovid-19 បានកើនលើសពី55លាននាក់នៅទូទាំងសកលលោក។
ពិភពលោកបានរាយការណ៍ថា ករណីស្លាប់ថ្មីដោយសារCovid-19 នៅក្នុងរយៈពេល24ម៉ោងចុងក្រោយនេះ មានចំនួន7,467នាក់ ធ្វើឱ្យតួលេខអ្នកស្លាប់ដោយសារវិបត្តិសុខភាពនេះ ឡើងដល់ 1,331,345នាក់។ ចំណែកអ្នកឆ្លងវីរុសសរុបក៏បានឡើងដល់55,302,552នាក់ កើនជាង51ម៉ឺននាក់ធៀបនឹងម្សិលមិញ ខណៈអ្នកជំងឺជាង 38,400,000នាក់បានជាសះស្បើយ និង 15,523,061នាក់កំពុងសម្រាកព្យាបាល។
ប្រទេសដែលបានរកឃើញអ្នកឆ្លងវីរុសCovid-19 ចាប់ពី1លាននាក់ឡើងទៅ មាន11ប្រទេស រួមមាន សហរដ្ឋអាមេរិក (11,538,057) ឥណ្ឌា (8,874,172) ប្រេស៊ីល (5,876,740) បារាំង (1,991,233) រុស្ស៊ី (1,948,603) អេស្ប៉ាញ (1,521,899) អង់គ្លេស (1,390,681) អាហ្សង់ទីន (1,318,384) អ៊ីតាលី (1,205,881) កូឡុំប៊ី (1,205,217) និងប្រទសម៉ិកស៊ិក (1,009,396)។
ប្រធានអង្គការសុខភាពពិភពលោក Tedros Adhanom Ghebreyesus បានថ្លែងកាលពីថ្ងៃទី15វិច្ឆិកាថា “យើងនៅតែបន្តទទួលបានព័ត៌មានដ៏គួរឱ្យត្រេកអរអំពីវ៉ាក់សាំងប្រឆាំង Covid-19។ ប៉ុន្តែ នេះមិនមែនជាពេលដែលត្រូវជឿជាក់ពេកនោះដែរ ព្រោះថា ការរំពឹងលើវ៉ាក់សាំងតែមួយមុខ គឺមិនគ្រប់គ្រាន់សម្រាប់ការទប់ស្កាត់រោគរាតត្បាតឡើយ”។
ប្រសាសន៍ខាងលើត្រូវបានលើកឡើងក្រោយពីក្រុមហ៊ុនផលិតឱសថ Moderna ប្រកាសថា វ៉ាក់សាំងCovid-19 របស់ពួកគេមានប្រសិទ្ធភាព94.5% ដោយយោងទៅលើទិន្នន័យបឋមនៃការប្រើប្រាស់សាកល្បងដំណាក់កាលចុងក្រោយ ដែលនេះបានជួយឱ្យ Moderna ក្លាយជាក្រុមហ៊ុនអាមេរិកទីពីរដែលត្រូវបានរាយការណ៍ថា លទ្ធផលនៃការប្រើប្រាស់សាកល្បងលើកចុងក្រោយ គឺលើសពីអ្វីដែលបានរំពឹងទុកទៅទៀត។ សហរដ្ឋអាមេរិក បច្ចុប្បន្នមានវ៉ាក់សាំងចំនួន2ដែលមានប្រសិទ្ធភាពលើសពី90% នៅក្នុងការប្រើប្រាស់សាកល្បងទ្រង់ទ្រាយធំ។ តាមការរំពឹងទុក វ៉ាក់សាំងទាំងនេះនឹងត្រូវបានអនុម័តយល់ព្រមឱ្យប្រើប្រាស់បន្ទាន់នៅក្នុងខែធ្នូឆ្នាំ2020នេះ៕
ប្រភព៖ Reuters, Worldometers
