ការកើតមាននូវសក់ស្កូវមុនអាយុស្ទើរតែបានក្លាយជារឿងធម្មតាទៅហើយសម្រាប់មនុស្សសម័យនេះ។ វាចាប់ផ្តើមពីចំនួន2-3សរសៃ រួចបន្តទៅកើនឡើងជាលំដាប់រហូតក្លាយជាក្តីបារម្ភនៃសម្រស់ ជាពិសេសចំពោះបុរសនារីដែលស្ថិតនៅក្នុងវ័យខ្ទង់ទើបតែសាមសិប ដែលមិនមែនជាវ័យសមស្របក្នុងការកើតមានសក់ស្កូវទាល់តែសោះ។ មិនថាយ៉ាងណាទេ គ្មានអ្នកណាប្រាថ្នាចង់ឃើញរូបរាងខ្លួនឯងក្នុងរូបបែបជាស្ត្រី ឬបុរសចំណាស់ ដោយសារតែសក់ឡើងស្កូវព្រោងព្រៀតនោះទេ ហើយបើនៅក្នុងវ័យដែលមិនសមគួរទៀតនោះគឺរឹតតែមិនចង់ដឹងមិនចង់ឃើញទៀតទៅហើយ។ បែបនេះបណ្តោយមិនបានទេ ត្រូវតែចាត់ការទើបបាន។
សក់ស្កូវអាចកើតមានឡើងតាមកត្តាផ្សេងៗមួយចំនួនដូចជា ដំណរពូជ របៀបរបបនៃការរស់នៅ ការផ្លាស់ប្តូររបបអាហារដោយទាន់ហន់ និងការធុញថប់ជាដើម។ វាក៏អាចកើតឡើងបានដែរ ប្រសិនបើអ្នកកើតមានដោយសារការប្រើឱសថព្យាបាលជំងឺមួយចំនួនដូចជា ជំងឺខ្វះឈាមជំងឺខ្វះទីរ៉ុកស៊ីន (hypothyroidism) និងក្រិនកោសិកាស្បែកជាដើមផងដែរ។ ហេតុផលចម្បងមួយទៀតដែលបណ្តាលឱ្យសក់ស្កូវគឺ ការបាត់បង់នៃសារជាតិពណ៌ខ្មៅដែលមាននៅក្នុងឫសសក់។ ដូច្នេះប្រសិនបើអ្នកយល់ឃើញថាមានចំណុចណាដែលអាចកែប្រែបាន ដើម្បីកាត់បន្ថយ និងការពារការកើតមានសក់ស្កូវមុនអាយុនោះ អ្នកគួរតែព្យាយាមធ្វើ និងគេចឱ្យផុត។ ក្រៅពីនេះអ្នកក៏អាចសាកល្បងវិធីមួយចំនួនដូចជា ទី1 យកស្លឹកកន្ត្រោបទៅស្ងោរជាមួយប្រេងដូងទុករហូតវាឡើងពណ៌ខ្មៅ ទុកវាឱ្យត្រជាក់ រួចសឹមយកវាមកលាបលើសរសៃសក់3-4ដងក្នុងមួយសប្តាហ៍មុនពេលចូលគេង ហើយលាងសម្អាតចេញនាពេលព្រឹកថ្ងៃបន្ទាប់។ ទី2 យកតែខ្មៅ2ស្លាបព្រាបាយ ជាមួយនឹងអំបិល1ស្លាបព្រាកាហ្វេទៅដាក់ក្នុងទឹកដែលដាំលើភ្លើងរយៈពេល2នាទី។ ទុកវាឱ្យត្រជាក់ រួចត្រងវាឱ្យស្អាត ដើម្បីយកទៅលាងសក់(មិនចាំបាច់ប្រើសាប៊ូទេ) ហើយទុកឱ្យវាស្ងួតដោយខ្លួនឯងជាការស្រេច។ ធ្វើបែបនេះ2-3ដងក្នុងមួយសប្តាហ៍អ្នកនឹងទទួលបានផលជាទីគាប់ចិត្តមិន-ខាន។ ទី3 ខ្ទឹមបារាំងគៀបយកតែទឹកចំណុះ3ស្លាបព្រាកាហ្វេ យកមកលាយជាមួយនឹងទឹកក្រូចឆ្មារ2ស្លាបព្រាកាហ្វេ មកលាបឱ្យសព្វលើសរសៃសក់ ទុកចោល30នាទីសឹមសម្អាតចេញ។អនុវត្ត4-5ដង ក្នុងមួយសប្តាហ៍ រយៈពេល2សប្តាហ៍ អ្នកនឹងឃើញពីប្រសិទ្ធភាព។
កុំអាលនិយាយថាមិនជឿណា សាកល្បងសិនទៅ ថាមិនត្រូវរូបមន្តមួយក្នុងចំណោមរូបមន្តទាំងអស់នេះអាចផ្តល់ប្រសិទ្ធភាពដល់សក់របស់អ្នកក៏អាចថាបានដែរ៕
