នាយករដ្ឋមន្ត្រីអ៊ីស្រាអែល បានឱ្យដឹងថា ប្រទេសនេះកំពុងត្រៀមខ្លួនដើម្បីចាប់ផ្ដើមយុទ្ធនាការចាក់វ៉ាក់សាំងបង្ការ ជំងឺកូវីដ-១៩ ដូសទី ៤ សម្រាប់ពលរដ្ឋដែលមានវ័យលើសពី ៦០ ឆ្នាំ និងបុគ្គលិកសុខាភិបាល។
«ខ្ញុំបានស្នើឱ្យត្រៀមសម្រាប់ការចាក់វ៉ាក់សាំងដូសទី ៤ ជាបន្ទាន់។ ពិភពលោកនឹងដើរតាមក្រោយយើង» នាយករដ្ឋមន្ត្រីអ៊ីស្រាអែល លោក Naftali Bennett បានសរសេរដូច្នេះ នៅលើទំព័រ Twitter កាលពីថ្ងៃទី ២១ ធ្នូ ២០២។
អ្នកនាំពាក្យមួយរូបរបស់ នាយករដ្ឋមន្ត្រី ក៏បានឱ្យដឹងថា អ៊ីស្រាអែល នឹងជាប្រទេសដំបូងគេក្នុងពិភពលោក ដែលបើកយុទ្ធនាការចាក់វ៉ាក់សាំងបង្ការ ជំងឺកូវីដ-១៩ ដូសទី ។
ការសម្រេចខាងលើនេះគឺយោងទៅតាមអនុសាសន៍របស់គណៈកម្មការជំនាញផ្នែកជំងឺរាតត្បាតសកលរបស់ អ៊ីស្រាអែល ដែលថា គួរចាក់វ៉ាក់សាំងដូសទី ៤ សម្រាប់ពលរដ្ឋដែលមានវ័យលើសពី ៦០ ឆ្នាំ និងក្រុមបុគ្គលិកសុខាភិបាល។ លោក Bennett បានហៅសេចក្ដីសម្រេចនេះថាជា «ព័ត៌មានដ៏អស្ចារ្យ»។
ក្រសួងសុខាភិបាលអ៊ីស្រាអែល កាលពីថ្ងៃទី ២១ ខែធ្នូ បានឱ្យដឹងថា ប្រទេសនេះបានរកឃើញអ្នកឆ្លង វីរុសកូវីដ-១៩ ប្រភេទ អូមីក្រុង ចំនួន ១,១៤៨ នាក់ ក្នុងនោះមានជាងពាក់កណ្ដាល ជាពលរដ្ឋដែលបានចាក់វ៉ាក់សាំងរួចរាល់។ ប្រទេសនេះក៏មានករណីស្លាប់ដំបូងដោយសារ អូមីក្រុង ផងដែរ។
ជាង ៤.១ លាននាក់ ក្នុងចំណោមប្រជាជនសរុប ៩.៣ លាននាក់ នៅ ប្រទេសអ៊ីស្រាអែល បានចាក់វ៉ាក់សាំងបង្ការ ជំងឺកូវីដ-១៩ ដូសទី ៣ រួចរាល់។ ប៉ុន្តែ អត្រានៃការចាក់វ៉ាក់សាំងនៅលើកុមារតូច និងក្មេងជំទង់ នៅមានកម្រិតទាប។ អត្រានៃការចាក់វ៉ាក់សាំងជូនកុមារចាប់ពីអាយុ ១ ឆ្នាំ ដល់ ១១ ឆ្នាំ នៅប្រទេសនេះ សម្រេចបានមិនដល់ ១% នៅឡើយ សម្រាប់ដូសទី ១៕
