ក្រុមហ៊ុនឱសថអាមេរិក Pfizer កាលពីថ្ងៃទី 23មីនា បានប្រកាសថា បានចាប់ផ្ដើមពិសោធដំណាក់កាលដំបូងនៅសហរដ្ឋអាមេរិក ចំពោះប្រភេទថ្នាំគ្រាប់សម្រាប់ព្យាបាល Covid-19។
យោងតាមសារព័ត៌មាន Reuters ក្រុមហ៊ុន Pfizer ឱ្យដឹងថា បេក្ខភាពថ្នាំប្រឆាំងនឹងវីរុសបានបង្ហាញថា វាសកម្មយ៉ាងខ្លាំងក្លាក្នុងការប្រឆាំងនឹងវីរុស Covid-19 នៅក្នុងការស្រាវជ្រាវនៅមន្ទីរពិសោធន៍នានា។ ក្រុមហ៊ុនខាងលើបានប្រាប់ថា ថ្នាំនេះអាចយកទៅព្យាបាលអ្នកជំងឺដែលមានរោគសញ្ញាដំបូងនៃការឆ្លងវីរុស។
បេក្ខភាពថ្នាំប្រឆាំង Covid-19 របស់ Pfizer ដែលត្រូវបានដាក់ឈ្មោះបែបវិទ្យាសាស្ត្រថា PF-07321332 និងជាសារធាតុទប់ស្កាត់ protease បានបង្ហាញអំពីប្រសិទ្ធភាពក្នុងការរារាំងមិនឱ្យវីរុសបង្កើនចំនួននៅក្នុងកោសិកា។
ក្រុមហ៊ុនឱ្យដឹងថា សារធាតុទប់ស្កាត់ protease មានប្រសិទ្ធភាពក្នុងការប្រឆាំងនឹងបណ្ដាវីរុសដូចជា HIV, វីរុសបង្កជំងឺរលាកថ្លើមប្រភេទ C ជាដើម ដោយការប្រើប្រាស់ដោយឡែក ឬផ្សំជាមួយនឹងប្រភេទថ្នាំប្រឆាំងនឹងវីរុសដទៃ។
ក្រុមហ៊ុន Pfizer ក៏កំពុងតែពិសោធដំណាក់កាលដំបូងលើបេក្ខភាពថ្នាំប្រឆាំងនឹងវីរុស Covid-19 មួយផ្សេងទៀត តាមរយៈការចាក់ចូលក្នុងសរសៃឈាមរបស់អ្នកជំងឺ Covid-19 ដែលកំពុងព្យាបាលនៅមន្ទីរពេទ្យ។
«បេក្ខភាពថ្នាំគ្រាប់ និងថ្នាំចាក់ក្នុងសរសៃឈាម មានសក្ដានុពលបង្កើតបានជារូបមន្តមួយក្នុងការព្យាបាលពីដំបូងដល់ចប់ បន្ថែមពីលើការចាក់វ៉ាក់សាំង សម្រាប់ករណីដែលនៅតែកើតជំងឺ» នេះបើតាម Mikael Dolsten នាយកផ្នែកសុខាភិបាលរបស់ Pfizer បានឱ្យដឹងនៅក្នុងសេចក្ដីប្រកាសរបស់ក្រុមហ៊ុន។
បេក្ខភាពថ្នាំព្យាបាល Covid-19 ថ្មីរបស់ Pfizer នេះ ឈរពីក្រោយបេក្ខភាពថ្នាំប្រឆាំងវីរុសប្រភេទគ្រាប់សម្រាប់លេបចំនួនពីរផ្សេងទៀត ដែលកំពុងស្ថិតក្នុងដំណាក់កាលសាកល្បង ក្នុងនោះមានបេក្ខភាពមួយគឺជាថ្នាំដែលត្រូវបានសហការអភិវឌ្ឍដោយក្រុមហ៊ុន Merck & Co និងក្រុមហ៊ុន Ridgeback Bio ខណៈបេក្ខភាពថ្នាំលេបទីពីរមកពីក្រុមហ៊ុន Roche Holding និង Atea Pharmaceuticals។
បច្ចុប្បន្ន remdesivir របស់ Gilead Sciences គឺជាប្រភេទថ្នាំតែមួយគត់ដែលត្រូវបាននាយកដ្ឋានគ្រប់គ្រងចំណីអាហារ និងថ្នាំពេទ្យអាមេរិក (FDA) ទទួលស្គាល់សម្រាប់ការព្យាបាល Covid-19។
FDA បានអនុញ្ញាតបន្ទាន់ឱ្យប្រើប្រាស់ថ្នាំអង្គបដិប្រាណ Eli Lilly-bamlanivimab ដោយប្រើប្រាស់ដោយឡែក ឬផ្សំជាមួយនឹង etesevimab និងការព្យាបាលមួយផ្សេងទៀតដែលរួមផ្សំជាមួយនឹងថ្នាំពីក្រុមហ៊ុន Regeneron៕
ប្រភព៖ Reuters, CNBC
ប្រែសម្រួល៖ បុត្រា
