ក្លៀកខ្មៅ ជាបញ្ហាដ៏ធំណាស់សម្រាប់សុភាព-នារីយើង ហើយក៏ជាមូលជាហេតុដែលធ្វើឱ្យអ្នកមិនហ៊ានពាក់អាវដៃវាលក្លៀក ឬមិនចង់បង្ហាញបរិវេណវង្វង់ក្លៀករបស់អ្នកនោះទេ ព្រោះមានភាពខ្មាសអៀនខ្លាំង ព្រមទាំងជាបញ្ហាដ៏គួររំខានផងដែរ។ អស់កង្វល់តទៅទៀតហើយ ឡារ៉ែន នឹងប្រាប់ពីវិធីក្នុងការកែប្រែបញ្ហានេះឱ្យសុភាពនារីទាំងអស់មានទំនុកចិត្តមកលើខ្លួនឯងជាថ្មីឡើងវិញ ដោយការកែប្រែក្លៀកខ្មៅឱ្យប្រែជាសស្អាត ហើយតឹងណែនមិនមានស្នាមប្រហោងបានក្នុងរយៈពេលតែ1ខែប៉ុណ្ណោះ តាមរូបមន្ដបែបធម្មជាតិ។
គ្រឿងផ្សំសម្រាប់ត្រៀម ដើម្បីម៉ាស្សាស្បែកក្លៀកខ្មៅឱ្យប្រែជាសស្អាត៖
• ទឹកត្រសក់ក្រឡុក 1ស្លាបព្រាកាហ្វេ
• ទឹកក្រូចឆ្មារ 1ស្លាបព្រាកាហ្វេ
• ម្សៅល្មៀត កន្លះស្លាបព្រាកាហ្វេ
• ប្រេងដូង 1ស្លាបព្រាបាយ
វិធីធ្វើ
គ្រាន់តែយកវត្ថុធាតុផ្សំដែលបានតៀមទុកដូចខាងលើ មកលាយឱ្យក្លាយជាល្បាយស្មើសាច់ តែមិនត្រូវលាយជាមួយប្រេងដូងនៅក្នុងចានតែមួយនោះទេ។
វិធីម៉ាស្សា
បន្ទាប់ពីងូតទឹករួច ចូរជូតខ្លួនឱ្យស្ងួត រួចយកសំឡីជ្រលក់ជាមួយប្រេងដូង ចំនួន1ស្លាបព្រា-បាយ ដោយម៉ាស្សាថ្មមៗនៅបរិវេណរង្វង់ក្លៀក។ ក្រោយមកទៀត សូមយកសំឡីជ្រលក់ជាមួយវត្ថុធាតុដែលបានត្រៀមរួចជាស្រេច ហើយលាបថ្មមៗពីលើបរិវេណក្លៀកជាបន្ត រួចទុកចោលរយៈពេល20នាទី ទើបលាងសម្អាតដោយទឹកឱ្យស្អាតជាការស្រេច។
ការអនុវត្ត
សម្រាប់អ្នកដែលមានបញ្ហាក្លៀកខ្មៅខ្លាំង យកល្អអ្នកគួរតែអនុវត្តតាមវិធីនេះ យ៉ាងហោច-ណាស់ឱ្យបាន2-3ដង ក្នុងមួយសបា្ដហ៍ ទើបទទួលបានលទ្ធផលគួរជាទីពេញចិត្ត៕
