ក្រសួងការពារជាតិអាម៉េរិក កាលពីថ្ងៃទី ០៨ សីហា បានប៉ាន់ប្រមាណឃើញថា ទាហានរុស្ស៊ី ប្រហែល ៨០,០០០ នាក់ បានស្លាប់ និងរបួសក្នុងសង្គ្រាមដែលអូសបន្លាយពេលជិត ៦ ខែកន្លងនៅ អ៊ុយក្រែន។
នេះគឺជាលើកដំបូងហើយដែល កងទ័ពអាម៉េរិក លើកឡើងនូវការប៉ាន់ស្មានស្ដីពីចំនួនទាហានរបស់ រុស្ស៊ី ដែលបានរងរបួស និងស្លាប់នៅ អ៊ុយក្រែន។
ថ្លែងនៅចំពោះមុខក្រុមអ្នកយកព័ត៌មានកាលពីថ្ងៃទី ០៨ សីហា អនុរដ្ឋមន្ត្រីក្រសួងការពារជាតិអាម៉េរិក Colin Kahl បានឱ្យដឹងថា យោងតាមការប៉ាន់ស្មានរបស់ សហរដ្ឋអាម៉េរិក ទាហានរុស្ស៊ី ចន្លោះពី ៧០,០០០ ទៅ ៨០,០០០ នាក់ បានស្លាប់ និងរងរបួសនៅ អ៊ុយក្រែន។ បណ្ដាប្រទេសលោកខាងលិច ជឿថា រុស្ស៊ី បានបញ្ជូនទាហានប្រហែល ១៥០,០០០ នាក់ ទៅកាន់តំបន់ក្បែរព្រំដែនជាមួយ អ៊ុយក្រែន មុនពេលបើកយុទ្ធនាការយោធាពិសេសកាលពីថ្ងៃទី ២៤ កុម្ភៈ។
យោងតាម លោក Colin Kahl បើទោះជាបានរងការខាតបង់ធ្ងន់ធ្ងរដូច្នេះ ប៉ុន្តែ រុស្ស៊ី នៅតែមិនអាចសម្រេចបានគោលដៅដែលបានដាក់ចេញក្នុងគ្រាដំបូង នោះគឺការប្ដូរផ្លាស់រដ្ឋាភិបាលទីក្រុងកៀវ និងការប្រែក្លាយ អ៊ុយក្រែន ទៅជាប្រទេសលែងមានឯករាជ្យភាព និងបូរណភាពទឹកដី។
កាលពីខែមុន ប្រធានទីភ្នាក់ងារស៊ើបការណ៍សម្ងាត់អាម៉េរិក William Burns ក៏ធ្លាប់បានលើកឡើងថា សហរដ្ឋអាម៉េរិក ប៉ាន់ប្រមាណឃើញថា ទាហានរុស្ស៊ី ១៥,០០០ នាក់បានស្លាប់ និងប្រហែល ៤៥,០០០ នាក់ផ្សេងទឿបានរងរបួស ក្នុងសង្គ្រាមនៅ អ៊ុយក្រែន។
ការប៉ាន់ស្មានរបស់ ក្រសួងការពារជាតិអាម៉េរិក ត្រូវបានប្រកាសដំណាលគ្នានឹងការផ្ដល់ជំនួយផ្នែកយោធាតម្លៃ ១ ពាន់លានដុល្លារ ដល់ អ៊ុយក្រែន។
