កូរ៉េខាងជើង បានហៅដំណើរទស្សនកិច្ចនៅ កោះតៃវ៉ាន់ របស់ ប្រធានសភាជាន់ទាបអាម៉េរិក ថា «ជាការជ្រៀតជ្រែកយ៉ាងគឃ្លើន» របស់ សហរដ្ឋអាម៉េរិក ទៅក្នុងកិច្ចការផ្ទៃក្នុងរបស់ ប្រទេសចិន។
«ការជ្រៀតជ្រែកយ៉ាងគឃ្លើនរបស់ សហរដ្ឋអាម៉េរិក ទៅក្នុងកិច្ចការផ្ទៃក្នុងរបស់ប្រទេសដទៃ និងសកម្មភាពបង្កហេតុផ្នែកនយោបាយ យោធា ដោយមានចេតនារបស់ប្រទេសនេះ គឺពិតជាមូលហេតុចម្បងដែលបណ្ដាលឱ្យសន្តិភាព សន្តិសុខក្នុងតំបន់ ត្រូវរងការរំលោភបំពាន» អ្នកនាំពាក្យនៃ ក្រសួងការបរទេសកូរ៉េខាងជើង ថ្ងៃនេះ (០៣ សីហា) ប្រកាសដូច្នេះ។
អ្នកនាំពាក្យខាងលើ បន្ថែមថា «តៃវ៉ាន់ គឺជាផ្នែកមួយដែលមិនអាចកាត់ផ្ដាច់បានរបស់ ប្រទេសចិន ហើយបញ្ហា កោះតៃវ៉ាន់ គឺទាក់ទិននឹងកិច្ចការផ្ទៃក្នុងរបស់ ប្រទេសចិន»។
ប្រកាសរបស់ កូរ៉េខាងជើង ត្រូវបានធ្វើឡើងបន្ទាប់ពី ប្រធានសភាជាន់ទាបអាម៉េរិក លោកស្រី Nancy Pelosi បានបំពេញទស្សនកិច្ចនៅ កោះតៃវ៉ាន់ កាលពីថ្ងៃទី ០២ សីហា ជាដំណើរទស្សនកិច្ចរបស់ មន្ត្រីជាន់ខ្ពស់បំផុតនៃ សហរដ្ឋអាម៉េរិក មកកាន់កោះនេះក្នុងអំឡុង ២៨ ចុងក្រោយនេះ ធ្វើឱ្យភាពតានតឹងរវាង សហរដ្ឋអាម៉េរិក និង ចិនដីគោក ឡើងកម្ដៅថែមមួយកម្រិតទៀត។
ចិនដីគោក គឺជាសម្ព័ន្ធមិត្តយូរឆ្នាំ និងជាដៃគូសេដ្ឋកិច្ចធំបំផុតរបស់ កូរ៉េខាងជើង។ ទីក្រុងព្យុងយ៉ាង បានប្រកាសគាំទ្រដល់ ទីក្រុងប៉េកាំង ក្នុងការថ្កោលទោសចំពោះដំណើរទស្សនកិច្ចរបស់លោកស្រី Pelosi។
កងទ័ពចិន និយាយថា កងកម្លាំងរបស់ប្រទេសនេះកំពុងស្ថិតក្នុងការប្រកាសអាសន្នកម្រិតខ្ពស់ និងត្រៀមឆ្លើយតបនឹងដំណើរទស្សនកិច្ចនេះ។ អាជ្ញាធរចិន ប្រកាសថា នឹងធ្វើសមយុទ្ធយោធានៅជុំវិញ កោះតៃវ៉ាន់ ចាប់ពីថ្ងៃទីនេះ (០៣ សីហា)។
ស្ថាប័នការពារកោះតៃវ៉ាន់ បានឱ្យដឹងថា យន្តហោះយោធាចិន ជាង ២០ គ្រឿង បានហោះចូលក្នុងតំបន់កំណត់អត្តសញ្ញាណការពារដែនអាកាសរបស់កោះនេះក្នុងថ្ងៃទី ០២ សីហា៕
