ឧត្តមសេនីយ៍ Philip Breedlove ដែលធ្លាប់ជាអគ្គមេបញ្ជាការកងទ័ពណាតូ ប្រចាំ អឺរ៉ុប ពីឆ្នាំ ២០១៣ ដល់ ២០១៦ បានជំរុញឱ្យ អ៊ុយក្រែន បាញ់កម្ទេចស្ពានគ្រីមៀ (Crimea) ឬហៅថា ស្ពាន Kerch និងបានហៅវាថាជា «គោលដៅស្របច្បាប់»។
«ខ្ញុំមិនភ្ញាក់ផ្អើលទេនៅពេល រុស្ស៊ី បារម្ភអំពីស្ពាន Kerch។ វាពិតជាមានសារសំខាន់ខ្លាំងណាស់សម្រាប់ពួកគេ» អតីតមេបញ្ជាការរបស់ណាតូ ឱ្យដឹងដូច្នេះ និងបានអះអាងថា «បច្ចុប្បន្ន លោកខាងលិចបានផ្ដល់មីស៊ីល Harpoon ឱ្យ អ៊ុយក្រែន (អាចបាញ់បានចម្ងាយជាង ៣០០ គីឡូម៉ែត្រ) ដូច្នេះ ខ្ញុំគិតថា រុស្ស៊ី មានមូលហេតុដើម្បីបារម្ភអំពីការដែល អ៊ុយក្រែន វាយកម្ទេចស្ពាននេះ»។
លោក Philip យល់ថា «ខ្ញុំបានឮមនុស្សជាច្រើនដាក់សំនួរថា តើ អ៊ុយក្រែន មានសិទ្ធិធ្វើសកម្មភាពបង្កហេតុដូច្នេះ ឬអត់ ហើយតើលោកខាងលិចគាំទ្រការសម្រេចចិត្តនេះ ឬទេ ប៉ុន្តែ ខ្ញុំមិនយល់សោះអំពីការអះអាងនោះ។ រុស្ស៊ី បានវាយប្រហារមិនត្រឹមតែពីក្នុងទឹកដីរបស់ អ៊ុយក្រែន នោះទេ តែថែមទាំងវាយប្រហារពី ទឹកដីរុស្ស៊ី បេឡារូស គ្រីមៀ និង សមុទ្រខ្មៅ ទៀតផង»។
ក្រុមមន្ត្រីនៅ គ្រីមៀ និង រុស្ស៊ី បានព្រមានជាច្រើនលើកចំពោះសកម្មភាពបង្កហេតុដែលសំដៅលើស្ពាននៅ គ្រីមៀ ដោយយល់ថា ការកម្ទេចស្ពាននេះ មិនខុសអ្វីទៅនឹងអំពើភេរវកម្ម។ វិមានក្រឹមឡាំង បានអះអាងថា រាល់វិធានការចាំបាច់នឹងត្រូវបានអនុវត្តដើម្បីការពារស្ពាន។
ស្ពាន Kerch ត្រូវបានដាក់ឱ្យប្រើប្រាស់កាលពីខែឧសភា ២០១៨ ហើយបានក្លាយជាសំណង់ដែលសំខាន់ចំពោះការតភ្ជាប់ ឧបទ្វីបគ្រីមៀ ជាមួយនឹងទឹកដីរបស់ រុស្ស៊ី៕