ជនសង្ស័យ Yamagami បានសារភាពថា មូលហេតុដែលនាំឱ្យមានការធ្វើឃាតលើលោក Abe ក៏ព្រោះតែយល់ថា អតីតនាយករដ្ឋមន្ត្រីជប៉ុន មានទំនាក់ទំនងជាមួយអង្គការមួយដែលជននេះស្អប់ នេះបើតាមអ្នកនាំពាក្យប៉ូលិសខេត្ត Nara។
យោងតាមប៉ូលិស ជនសង្ស័យ Yamagami Tetsuya អាយុ ៤១ ឆ្នាំ និងជាអតីតសមាជិកកងកម្លាំងការពារសមុទ្រជប៉ុន បាននិយាយថា ការកំណត់គោលដៅលើលោក Abe «មិនមែនជារឿងនយោបាយឡើយ»។ សមត្ថកិច្ចកំពុងស្រាវជ្រាវដើម្បីបញ្ជាក់ថា លោក Abe មានទំនាក់ទំនងជាមួយអង្គការដែលជនសង្ស័យបានសារភាពដែរ ឬអត់ ប៉ុន្តែ មិនបានបង្ហើបឱ្យដឹងអំពីឈ្មោះរបស់អង្គការនេះទេ។
អតីតនាយករដ្ឋមន្ត្រីជប៉ុន លោក Shinzo Abe វ័យ ៦៧ ឆ្នាំ ត្រូវបានជនសង្ស័យបាញ់ពីក្រោយនៅពេលលោកកំពុងថ្លែងឃោសនារកសំឡេងឆ្នោតនៅក្នុងទីក្រុង Nara នៃខេត្ត Nara។ នៅពេលបាញ់ប្រហារ ជនសង្ស័យ Yamagami ស្ថិតនៅចម្ងាយប្រហែល ៥ ម៉ែត្រ ពីលោក Abe។
លោក Abe ត្រូវបានបញ្ជូនទៅកាន់មន្ទីរពេទ្យតាមឧទ្ធម្ភាគចក្រក្នុងស្ថានភាពបាត់បង់ស្មារតី។ វេជ្ជបណ្ឌិត ២០ នាក់ បានចូលរួមជួយសង្គ្រោះលោក Abe ប៉ុន្តែមិនអាចឃាត់ឈាមបាន។ អតីតនាយករដ្ឋមន្ត្រីជប៉ុន ត្រូវបានប្រកាសថា បានទទួលមរណភាពដោយសារបាត់បង់ឈាមច្រើនពេក។
