មន្ត្រីការពារជាតិមួយរូបរបស់ សហរដ្ឋអាម៉េរិក កាលពីថ្ងៃទី ៨ កក្កដា បានឱ្យដឹងថា សហរដ្ឋអាម៉េរិក នឹងដឹកជញ្ជូនសម្ភារយោធាដែលមានតម្លៃ ៤០០ លានដុល្លារ ទៅឱ្យ អ៊ុយក្រែន។
យោងតាមមន្ត្រីខាងលើ យោធូបករណ៍ដែល អាម៉េរិក បញ្ជូនទៅឱ្យ អ៊ុយក្រែន លើកនេះ រួមមាន ប្រព័ន្ធមីស៊ីលទំនើបចំនួន ៤ ឈុត ដើម្បីជួយឱ្យ ទីក្រុងកៀវ ការពារខ្លួននៅតំបន់ Donbass ភាគខាងកើតប្រទេសនេះ។
មុននោះ សហរដ្ឋអាម៉េរិក បានបញ្ជូនប្រព័ន្ធកាំជ្រួចប្រតិកម្មរហ័សចំនួន ៨ ឈុតទៅឱ្យ អ៊ុយក្រែន ហើយបច្ចុប្បន្ន ប្រព័ន្ធអាវុធទាំងនេះកំពុងត្រូវបានប្រើប្រាស់។ ជំនួយយោធាថ្មីបំផុតរបស់ សហរដ្ឋអាម៉េរិក នេះ ត្រូវបានធ្វើឡើងក្នុងគ្រាដែល រុស្ស៊ី ទើបតែបានប្រកាសថា បានគ្រប់គ្រងខេត្ត Luhansk ទាំងស្រុង នៅក្នុងតំបន់ Donbass បើទោះក្រុមមន្ត្រីរបស់ អ៊ុយក្រែន យល់ថា កងទ័ពប្រទេសនេះនៅតែគ្រប់គ្រងមួយភាគរបស់ខេត្ត Luhansk ចំណែកការប្រយុទ្ធគ្នាក៏កំពុងកើតឡើងនៅទីនេះ។
នេះគឺជាកញ្ចប់ជំនួយជាអាវុធ និងឧបករណ៍យោធាទី ១៥ ដែល សហរដ្ឋអាម៉េរិក ផ្ដល់ឱ្យ អ៊ុយក្រែន រាប់ចាប់ពីខែសីហាឆ្នាំកន្លង។ គិតមកដល់ពេលនេះ សហរដ្ឋអាម៉េរិក បានផ្ដល់ជំនួយដល់ អ៊ុយក្រែន សរុបជាទឹកប្រាក់ ៧.៣ ពាន់លានដុល្លារ ចាប់តាំងពី រុស្ស៊ី បានបើកយុទ្ធនាការយោធាពិសេសកាលពីថ្ងៃទី ២៤ កុម្ភៈ៕
