កងកម្លាំងរុស្ស៊ី ប្រកាសថា «បានសម្រេចភារកិច្ច» និងដកទ័ពចេញពីកោះ Zmiinyi នៅលម្ហសមុទ្រខ្មៅ ជាកាយវិការសុច្ឆន្ទៈ ដើម្បីឱ្យ អ៊ុយក្រែន នាំចេញកសិផល។
«ជាកាយវិការសុច្ឆន្ទៈមួយ កងកម្លាំងប្រដាប់អាវុធរបស់ រុស្ស៊ី នាថ្ងៃទី ៣០ មិថុនា បានសម្រេចភារកិច្ចនៅលើកោះ Zmiinyi និងដកអង្គភាពចេញពីទីនេះ» ក្រសួងការពារជាតិរុស្ស៊ី ប្រកាសនាថ្ងៃនេះដូច្នេះ។ «ប្រការនេះបង្ហាញឱ្យសហគមន៍អន្តរជាតិឃើញថា រុស្ស៊ី មិនរារាំងការប្រឹងប្រែងរបស់ អង្គការសហប្រជាជាតិក្នុងកម្មភាពមនុស្សធម៌ សម្រាប់ការនាំចេញកសិផលពីទឹកដីរបស់ អ៊ុយក្រែន»។
ក៏ប៉ុន្តែ ភាគីខាងទីក្រុងកៀវ វិញ បានអះអាងថា មូលហេតុដែល កងទ័ពរុស្ស៊ី ដកថយពីកោះខាងលើ គឺដោយសារត្រូវរងការវាយប្រហារពីកងកម្លាំងរបស់ អ៊ុយក្រែន។
កោះ Zmiinyi ឬហៅថា កោះពស់ មានទំហំផ្ទៃដីប្រហែល ១៧ ហិកតា ស្ថិតនៅលើសមុទ្រខ្មៅ (Black Sea) និងមានចម្ងាយពីកំពង់ផែ Odessa របស់ អ៊ុយក្រែន ប្រហែល ៣៥ គីឡូម៉ែត្រ។ មុនពេលមានសង្គ្រាម កងកម្លាំងការពារព្រំដែនរបស់ អ៊ុយក្រែន ប្រហែល ១០០ នាក់ ឈរជើងការពារនៅទីនេះ។ នៅក្នុងដំណាក់កាលដំបូងនៃសង្គ្រាម រុស្ស៊ី បានចូលកាន់កាប់ និងបានចាប់ខ្លួនទាហានរបស់ អ៊ុយក្រែន នៅលើកោះនេះ។
ក្រសួងការពារជាតិរុស្ស៊ី បានប្រកាសថា «កងកម្លាំងប្រដាប់អាវុធរបស់ រុស្ស៊ី នឹងបន្តយុទ្ធនាការយោធាពិសេសនៅ អ៊ុយក្រែន»។
បើទោះជាហាក់មិនមានធនធានធម្មជាតិ ក៏ដូចជាមូលដ្ឋានទ័ពអចិន្ត្រៃយ៍ ប៉ុន្តែកោះ Zmiinyi ដើរតួនាទីសំខាន់ក្នុងការគ្រប់គ្រងបណ្ដាកប៉ាល់ដឹកទំនិញនៅលើសមុទ្រខ្មៅ ក្នុងនោះមានទាំងផ្លូវទឹកចេញចូលកំពង់ផែ Odessa ផងដែរ។ ដូច្នេះហើយ កោះ Zmiinyi គឺជាគោលដៅដែលភាគីខាង រុស្ស៊ី និង អ៊ុយក្រែន ប្ដេជ្ញាដណ្ដើមយកមកកាន់កាប់៕