អង្គភាពស៊ើបអង្កេតអ៊ុយក្រែន (SBI) កាលពីថ្ងៃទី ១២ មេសា ប្រកាសថា បានរឹបអូសកប៉ាល់ចំនួន ១០ គ្រឿង របស់ រុស្ស៊ី ដែលកំពុងជួសជុលនៅកំពង់ផែ Odessa។
«ក្រុមអ្នកស៊ើបអង្កេតរបស់ SBI ដែលត្រូវបានការពារដោយកងកម្លាំងល្បាតឆ្នេរ និងអង្គភាព ១៧ របស់កម្លាំងការពារព្រំដែន បានបង្ខាំងកប៉ាល់ដឹកទំនិញ ៨ គ្រឿង និងកប៉ាល់ដឹកប្រេង ២ គ្រឿងរបស់ រុស្ស៊ី ដែលកំពុងទទួលការជួសជុលនៅកំពង់ផែ Odessa ដោយមិនឱ្យចាកចេញពី អ៊ុយក្រែន។ កប៉ាល់ទាំងនេះជាប់ទាក់ទងនឹងសកម្មភាពដឹកជញ្ជូនរបស់ រុស្ស៊ី នៅលើសមុទ្រខ្មៅ និងទន្លេ Danube» SBI លើកឡើងដូច្នេះ។
យោងតាមអង្គភាព SBI ប្រទេសអ៊ុយក្រែន នឹង «បន្តប្រឹងប្រែងដើម្បីស្វែងរក និងរឹបអូសធ្វើជាសម្បត្តិជាតិ» ចំពោះទ្រព្យទាំងឡាយរបស់ រុស្ស៊ី។
ប្រធានាធិបតីអ៊ុយក្រែន លោក ហ្សេឡែនស្គី កាលពីថ្ងៃទី ១០ មីនា បានចុះហត្ថលេខាលើច្បាប់មួយដែលអនុញ្ញាតឱ្យអាជ្ញាធរប្រទេសនេះ រឹបអូសទ្រព្យទាំងឡាយដែលជារបស់ រុស្ស៊ី និងក្រុមមន្ត្រី អ្នកមានរបស់ រុស្ស៊ី។ នាយករដ្ឋមន្ត្រីអ៊ុយក្រែន លោក ដេនីស ស្មីហាល (Denis Shmyhal) កាលពីថ្ងៃទី ៨ មេសា បានប្រកាសថា ទ្រព្យគ្រប់ប្រភេទរបស់ រុស្ស៊ី នៅ អ៊ុយក្រែន នឹងត្រូវបានរឹបអូសយកមកធ្វើជារបស់រដ្ឋ។