កាលពីថ្ងៃទី ២៣ ខែមិថុនា ឆ្នាំ ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានចុះពិនិត្យ វឌ្ឍនភាពការងារសាងសង់គម្រោងស្ដារកំណាត់ផ្លូវជាតិលេខ៥ ភាគខាងត្បូង (ព្រែកក្តាម -ធ្លាម្អម) ដោយមានការចូលរួមពីថ្នាក់ដឹកនាំក្រសួង និងភាគីពាក់ព័ន្ធ។
គម្រោងស្ដារកំណាត់ផ្លូវជាតិលេខ៥ ភាគខាងត្បូងនេះ មានប្រវែង ១៣៥.២៥ គីឡូម៉ែត្រ និងត្រូវបានបែងចែកជាបីកញ្ចប់ការងារ ដោយចាប់ផ្តើមសាងសង់ចេញពី ព្រែកក្តាម (ខេត្តកណ្តាល) ដល់ ធ្លាម្អម (ខេត្តពោធិ៍សាត់) ។ តាមផែនការ គម្រោងនេះគ្រោងនឹងចំណាយថវិកាប្រមាណ ២៤៦.៣៥ លានដុល្លារអាមេរិក។
គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងត្បូងនេះ បានបើកការដ្ឋានសាងសង់នៅថ្ងៃទី២១ ខែឧសភា ឆ្នាំ ២០១៨ និងគ្រោងចំណាយពេលសាងសង់ចំនួន ៤៨ ខែ។ គិតមកទល់ពេលនេះ គម្រោងនេះសម្រេចបាន ៨០% ហើយគ្រោងបញ្ចប់នៅចុងឆ្នាំ ២០២៣។
គម្រោងខាងលើនេះស្ថិតក្នុង គម្រោងធ្វើឱ្យប្រសើរឡើងផ្លូវជាតិលេខ៥ ដែលមានប្រវែងសរុប ៣៦៦ គីឡូម៉ែត្រ ឋិតក្នុងខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។ គម្រោងធ្វើឱ្យប្រសើរឡើងផ្លូវជាតិលេខ៥ ទទួលបានកម្ចីឥណទាន សម្បទានពីរដ្ឋាភិបាលជប៉ុន ហើយគ្រោងចំណាយថវិកាប្រមាណ ៥០០ លានដុល្លារអាមេរិក។
គម្រោងនេះមានការសាងសង់ផ្លូវវាងក្រុងសរុបចំនួន ៥ ខ្សែ មានប្រវែងសរុប ៦២ គីឡូម៉ែត្រ។ គម្រោងនេះមានការពង្រីកស្ពានចាស់ និងសាងសង់ស្ពានថ្មី ដែលស្ថិតនៅក្នុងកំណាត់ផ្លូវជាតិលេខ៥ មានចំនួនសរុប ៨០ កន្លែង។
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា ការស្វែងរកថវិកាទាំងប្រាក់កម្ចី ទាំងថវិកាជាតិ និងជំនួយឥតសំណង មកកសាងប្រព័ន្ធផ្លូវថ្នល់ទាល់នេះ គឺដើម្បីធ្វើយ៉ាងណាឱ្យប្រព័ន្ធភស្តុភារកម្ម និងការដឹកជញ្ជូនមានតម្លៃថោក អាចប្រកួតប្រជែងជាមួយប្រទេសជិតខាង និងអាច ទាក់ទាញវិនិយោគិនមកដាក់ទុននៅកម្ពុជា បង្កើតការងារជូនប្រជាពលរដ្ឋ៕
