ស្ថិតនៅផ្លូវព្រៃស ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ស្ថានីយបញ្ចូលថាមពលយានយន្តអគ្គិសនី រួមនឹងស្ថានីយប្រេងមួយកន្លែងរបស់ កាល់តិច ត្រូវបានសម្ពោធដាក់ឱ្យដំណើរការ នៅថ្ងៃទី ២៦ មេសា ២០២២ ក្រោមវត្តមានជាអធិបតីភាពរបស់ ឯកឧត្តមស៊ុន ចាន់ថុល ទេសរដ្ឋមន្ដ្រី និងជា រដ្ឋមន្ត្រីក្រសួងសាធារណការ និងដឹកជញ្ជូន។
ពិធីសម្ពោធខាងលើក៏មានការចូលរួមពី ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា ថ្នាក់ដឹកនាំក្រសួង និងក្រុមអ្នកជំនួញពាក់ព័ន្ធជាច្រើនរូបផងដែរ។
ក្នុងពិធីនេះ ឯកឧត្តមទេសរដ្ឋមន្ត្រី បានថ្លែងថា ក្នុងរយៈពេល ៣ ខែដំបូងនៃឆ្នាំ ២០២២ កំណើននៃការចុះបញ្ជីយានយន្តអគ្គិសនី កើនដល់ ៧០០% បើប្រៀបធៀបនឹងរយៈពេលដូចគ្នាកាលពីឆ្នាំ ២០២១។
ការប្រើប្រាស់យានយន្ដ ម៉ូតូ និងម៉ូតូកង់បីដើរដោយថាមពលអគ្គិសនី នឹងមានការកើនឡើងច្រើននៅក្នុងពេលអនាគត នៅពេលដែលហេដ្ឋារចនាសម្ព័ន្ធបញ្ចូលថាមពលអគ្គិសនីត្រូវបានដំឡើងយ៉ាងទូលំទូលាយ និងនៅពេលប្រជាពលរដ្ឋកម្ពុជាយល់ដឹងច្រើនអំពីអត្ថប្រយោជន៍នៃការប្រើប្រាស់យានយន្ដអគ្គិសនី នេះបើតាមប្រសាសន៍របស់ ឯកឧត្តមស៊ុន ចាន់ថុល។
បច្ចុប្បន្ននេះអង្គការ UNDP កំពុងជួយជ្រោមជ្រែងដល់ក្រសួងសាធារណាការ ក្នុងការបង្កើតផែនទីបង្ហាញផ្លូវសម្រាប់ការដំឡើងស្ថានីយសាកថ្មយានយន្តអគ្គិសនីនៅទូទាំងប្រទេស។ ក្រសួង ក៏មានបំណងបង្កើតគណៈកម្មាធិការអន្តរក្រសួងដើម្បីសិក្សាបន្ថែម និងអភិវឌ្ឍន៍គោលនយោបាយជាតិទូលំទូលាយមួយស្ដីពីយានយន្តអគ្គិសនីផងដែរ។
ក្រសួងសាធារណការ បានធ្វើការជាមួយក្រុមហ៊ុន Energy Lab និងក្រុមហ៊ុន GIZ ដើម្បីដាក់តាំងបង្ហាញយានយន្ត និងម៉ូតូអគ្គិសនីនៅចំណតយានយន្តទីស្ដីការក្រសួង និងបានបើកសម្ពោធឱ្យប្រើប្រាស់ស្ថានីយសាកថ្មយានយន្តអគ្គិសនីលើកដំបូង ដែលផ្ដល់ដោយអង្គការ UNDP នៅទីស្តីការក្រសួង កាលពីថ្ងៃទី ២៦ ខែមីនា ឆ្នាំ ២០២២។ នៅឯ ក្រុងព្រះសីហនុ នាព្រឹកថ្ងៃទី ២៧ មេសា ក្រសួងនេះនឹងសម្ពោធដាក់ឱ្យប្រើប្រាស់ស្ថានីយសាកថ្មយានយន្តអគ្គិសនីលើកទី ២ ដែលផ្ដល់ដោយអង្គការ UNDP។
