ពិធីសម្ភោធដាក់ឱ្យប្រើប្រាស់ផ្លូវជាតិលេខ ៥១ ដែលជាកំណាត់ផ្លូវតភ្ជាប់ពីផ្លូវជាតិលេខ ៤ ទៅកាន់ផ្លូវជាតិលេខ ៥ ធ្វើឡើងនៅព្រឹកថ្ងៃទី ២៥ ខែមីនា ឆ្នាំ ២០២២ ក្រោមអធិបតីភាពរបស់ ប្រមុខរដ្ឋាភិបាលកម្ពុជា។
កំណាក់ផ្លូវជាតិលេខ ៥១ មានប្រវែងសរុប ៣៧,៩៥ គីឡូម៉ែត្រ ចាប់ផ្តើមពីចំណុចប្រសព្វផ្លូវជាតិលេខ ៥ នៅឧដុង្គ ទៅដល់ចំណុចប្រសព្វផ្លូវជាតិលេខ ៤ នៅ ថ្នល់ទទឹង។ នេះគឺជាផ្លូវបេតុងកៅស៊ូ AC កម្រាស់ ៩ សង់ទីម៉ែត្រ និងទទឹងតួផ្លូវសរុប ១២ ម៉ែត្រ ដោយមាន ២ គន្លងសម្រាប់រថយន្តធ្វើចរាចរណ៍ទៅមក និង ២ គន្លងសម្រាប់ទោចក្រយានយន្ត។
គម្រោងផ្លូវជាតិលេខ ៥១ ដែលត្រូវបានសាងសង់ដោយក្រុមហ៊ុនចិន CRBC និងត្រួតពិនិត្យបច្ចេកទេសដោយក្រុមហ៊ុនចិន ក្វាងចូវវ៉ានអាន នេះ ប្រើប្រាស់ពេលសាងសង់ ២៧ ខែ រាប់ចាប់ពីខែមិថុនា ២០១៧ ដល់ខែសីហា ២០១៩ និងចំណាយថវិកាសរុបជិត ៤១ លានដុល្លារអាម៉េរិក ដែលជាប្រាក់កម្ចីពី ប្រទេសចិន និងថវិកាបដិភាគរបស់ កម្ពុជា។
ផ្លូវជាតិលេខ ៥១ ស្ថិតនៅក្នុង ខេត្តកណ្តាល និង ខេត្តកំពង់ស្ពឺ ជាប់ជាមួយនឹង ផ្លូវជាតិលេខ ៤, ផ្លូវជាតិលេខ ៥, ផ្លូវជាតិលេខ ៤១ និងតភ្ជាប់ទៅផ្លូវជាតិលេខ ៣, ផ្លូវជាតិលេខ ៤២ ទៅរាជធានីភ្នំពេញ, និងផ្លូវលេខ ១៤៤០ ទៅក្រុងច្បារមន ខេត្តកំពង់ស្ពឺ។
ផ្លូវនេះស្ថិតនៅតំបន់ដែលសម្បូររោងចក្រឧស្សាហកម្ម សិប្បកម្ម និងសហគ្រាសខ្នាតធំ ព្រមទាំងជាតំបន់ទីប្រជុំជន ដែលមានអំណោយផលសម្រាប់គម្រោងអភិវឌ្ឍន៍វិស័យអចលនទ្រព្យ និងបង្កើតការងារដល់ប្រជាពលរដ្ឋក្នុងតំបន់៕
