ហាងកាហ្វេតូចមួយដែលត្រូវបានរៀបចំយ៉ាងល្អ និងមានកៅអីសរុបត្រឹម 8 កន្លែងប៉ុណ្ណោះ ប៉ុន្តែ ម្ចាស់ហាងប្រើយុទ្ធសាស្ត្រចម្លែក៖ «ភ្ញៀវចង់ឱ្យថ្លៃកាហ្វេប៉ុន្មានរៀលក៏បាន»។
មកដល់ហាងកាហ្វេនេះ អ្នកអាចញ៉ាំកាហ្វេប៉ុន្មានពែងក៏បាន ហើយឱ្យថ្លៃប៉ុន្មានរៀលក៏បាន អាស្រ័យលើអារម្មណ៍ដែលអ្នកកំពុងមាន បើទោះជា 1 ដុល្លារ ឬ 5 ដុល្លារ ព្រោះថា ប្រការនេះមិនមែនជារឿងសំខាន់។
ហាងកាហ្វេឈ្មោះ Refined នេះ ស្ថិតនៅក្នុង ទីក្រុងហាណូយ នៃ ប្រទេសវៀតណាម។ កំលោះម្ចាស់ហាងនេះ ឈ្មោះ Vu Tu។ គាត់បានបោះបង់ការងារការិយាល័យ មករកស៊ីមុខរបរកាហ្វេ។
ហាងកាហ្វាត្រូវបានលាបពណ៌ខ្មៅដូចពណ៌កាហ្វេ។ នៅខាងក្រោយកញ្ចក់ទ្វារគឺជាជញ្ជាំងទាំង 4 ដែលត្រូវបានលាបពណ៌ខ្មៅដូចគ្នា និងមានសំឡេងតន្ត្រី jazz សូររងំរណ្ដំចិត្ត ដែលស្ថិតនៅក្នុងផ្ទៃក្រឡាជិត 20 ម៉ែត្រ។
នៅពេលត្រូវបានសួរអំពីឈ្មោះ Refined ម្ចាស់ហាងប្រាប់ថា ចំពោះគាត់ ការឆុងកាហ្វេមួយពែងក៏ត្រូវតែធ្វើឱ្យបានម៉ត់ចត់ទៅតាមជំហានៗ ដូចជា ការថ្លឹងទម្ងន់កាហ្វេ បរិមាណទឹក និងទឹកដោះគោជាដើម។ ជាងនេះ ដើម្បីជ្រើសរើសបានគ្រាប់កាហ្វេឈ្ងុយឆ្ងាញ់ កំលោះម្ចាស់ហាង ត្រូវដើរសុំមតិពីមនុស្សជាង 300 នាក់ឯណោះ។
មិនដូចហាងកាហ្វេដទៃ ហាង Refined មានតែកន្លែងឆុងកាហ្វេ និងកៅអីសរុបចំនួន 8 ប៉ុណ្ណោះ ដែលនៅជុំវិញកន្លែងឆុង។ នៅទីនេះ ភ្ញៀវអាចមើលឃើញដំណើរការទាំងអស់នៃការឆុងកាហ្វេ។ ថ្វីបើតូចពិតមែន ប៉ុន្តែហាងកាហ្វេនេះត្រូវបានយកចិត្តទុកដាក់យ៉ាងល្អិតល្អន់។
នៅពេលត្រូវបានសួរថា ហេតុអ្វីមានគំនិតបើកហាងកាហ្វេ «ទូទាត់ប្រាក់តាមអារម្មណ៍» បែបនេះ ម្ចាស់ហាងប្រាប់ថា៖ «ខ្ញុំគិតពីគុណភាពជាងបរិមាណ។ បែបនេះគឺងាយស្រួលបម្រើភ្ញៀវ និងសន្ទនាជាមួយភ្ញៀវ។ ទន្ទឹមនឹងនេះ ភ្ញៀវគ្រប់រូបអាចយល់ និងដឹងបានអំពីដំណើរការនៃការបង្កើតកាហ្វេមួយពែងថា វាយ៉ាងណា»។
មីនុយរបស់ហាងនេះរួមមាន 5 មុខ ក្នុងនោះមាន 2 មុខមានឈ្មោះចម្លែក គឺ «Tuesday» និង «Van Mieu» ដែលត្រូវបានដាក់ទៅតាមអារម្មណ៍របស់ភ្ញៀវប្រចាំហាង។
ម្ចាស់ហាងនេះនិយាយថា៖ «ដំបូងឡើយ ខ្ញុំបើកហាងនេះដើម្បីឱ្យមិត្តភក្ដិបានដឹង ប៉ុន្តែ ពេលមិត្តភក្ដិទាមទារជួយចេញថ្លៃកាហ្វេ ក៏មិនដឹងត្រូវធ្វើយ៉ាងណា ទើបប្រាប់ឱ្យពួកគេដាក់ប្រាក់ក្នុងប្រអប់ប៉ុន្មានរៀលក៏បាន តាមចិត្ត។ ហើយយូរៗទៅក៏ក្លាយជាប្រអប់ «អាស្រ័យលើអារម្មណ៍» នេះតែម្ដង។
«ម្យ៉ាងទៀត ការឆុងកាហ្វេពិបាកនឹងធ្វើឱ្យមាន «ស្ថិរភាព» ដោយសារថា ថ្ងៃនេះភ្ញៀវញ៉ាំអាចថាឆ្ងាញ់ ប៉ុន្តែថ្ងៃផ្សេងទៀតអាចថាមិនឆ្ងាញ់ក៏មាន។ ដូច្នេះ ខ្ញុំទុកឱ្យភ្ញៀវជាអ្នកកំណត់ថ្លៃសម្រាប់រស់ជាតិកាហ្វេដែលពួកគេបានទទួល» ម្ចាស់ Vu Tu ថ្លែងដូច្នេះ៕
