អតិថិជនដំបូងដែលឡើងទៅទេសចរណ៍នៅទីអវកាស ដោយធ្វើដំណើរលើយានរបស់ក្រុមហ៊ុន Blue Origin នឹងត្រូវចំណាយប្រាក់មិនទាបជាង 2.6លានដុល្លារអាមេរិក ដែលនេះគឺជាលទ្ធផលនៃការលក់ដេញថ្លៃសំបុត្រថ្មីបំផុត។
ក្រុមហ៊ុនអវកាសឯកជន Blue Origin របស់កំពូលមហាសេដ្ឋី Jeff Bezos កំពុងលក់ដេញថ្លៃសំបុត្រទេសចរណ៍អវកាសមួយសន្លឹក ក្នុងចំណោមសំបុត្រចំនួន 6សន្លឹក សម្រាប់ដំណើរទេសចរណ៍ដំបូងទៅកាន់ទីអវកាស ដោយប្រើប្រព័ន្ធយាន New Shepard ដែលគ្រោងនឹងហោះហើរនៅថ្ងៃទី20 ខែកក្កដា ឆ្នាំ2021។ ការលក់ដេញថ្លៃសម្ងាត់ ក្រោមរូបភាពអនឡាញ បានចាប់ផ្ដើមពីថ្ងៃទី5 ខែឧសភា ហើយទើបតែបានងាកមកដេញថ្លៃជាសាធារណៈ កាលពីថ្ងៃទី19 ខែឧសភាកន្លងទៅ។
យោងតាមព័ត៌មាននៅលើទំព័ររបស់ Blue Origin អតិថិជនម្នាក់ ហ៊ានឱ្យថ្លៃដល់ទៅ 2.6លានដុល្លារអាមេរិក សម្រាប់ទិញសំបុត្រមួយសន្លឹក។ តម្លៃនេះអាចកើនឡើងខ្ពស់ជាងនេះ នៅពេលដំណាក់កាលនៃការដេញថ្លៃជាសាធារណៈ នឹងត្រូវអូសបន្លាយពេលរហូតដល់ថ្ងៃទី10 ខែមិថុនា។ ព្រឹត្តិការណ៍នេះ នឹងត្រូវបញ្ចប់ដោយការដេញថ្លៃផ្ទាល់មាត់ ដែលនឹងធ្វើឡើងនៅថ្ងៃទី12 ខែមិថុនា ឆ្នាំ2021។
កំពូលមហាសេដ្ឋីអាមេរិក Jeff Bezos បានឱ្យដឹងថា ប្រាក់ទាំងអស់ដែលបានមកពីការលក់ដេញថ្លៃនេះ នឹងត្រូវបរិច្ចាគទៅឱ្យមូលនិធិ «ក្លឹបដើម្បីអនាគត» របស់ក្រុមហ៊ុន Blue Origin ដើម្បីបំផុសគំនិតដល់មនុស្សជំនាន់ក្រោយ ឱ្យដេញតាមអាជីពនៅក្នុងវិស័យ STEM (វិទ្យាសាស្ត្រ, បច្ចេកវិទ្យា, បច្ចេកទេស និងគណិតសាស្ត្រ)។
ប្រព័ន្ធ New Shepard រួមមាន រ៉ុក្កែតមួយដើម និងយានអវកាសមួយគ្រឿង ដែលអាចប្រើប្រាស់ឡើងវិញបានទាំងស្រុង។ រ៉ុក្កែត ត្រូវបានរចនាឡើងដើម្បីអាចចុះចតលើផ្ទៃផែនដីដោយប្រើម៉ាស៊ីន ខណៈដែលយានអវកាសនឹងចុះចតយ៉ាងយឺតៗដោយប្រើប្រាស់ឆត្រយោង។ មកដល់បច្ចុប្បន្ន New Shepard បានហោះហើរក្រោមគន្លងតារាវិថីដោយគ្មានមនុស្សបើក ប្រកបដោយជោគជ័យចំនួន 15លើកមកហើយ ក្នុងនោះ លើកចុងក្រោយ ត្រូវបានធ្វើឡើងកាលពីថ្ងៃទី14 ខែមេសា ឆ្នាំ2021។
ក្រុមហ៊ុន Blue Origin មិនទាន់ប្រកាសឱ្យដឹងពីតម្លៃសំបុត្រធម្មតា សម្រាប់ដំណើរទេសចរណ៍ទៅកាន់ទីអវកាសរបស់ពួកគេនៅឡើយ ប៉ុន្តែ ប្រាកដណាស់ វានឹងមានតម្លៃទាបជាងច្រើន បើធៀបនឹងតម្លៃដែលត្រូវដាក់លក់ដេញថ្លៃ។
គូប្រជែងសំខាន់របស់ Blue Origin គឺក្រុមហ៊ុន Virgin Galactic ថ្មីៗនេះក៏បានប្រកាសឱ្យដឹងអំពីតម្លៃសំបុត្រយាន សម្រាប់ហោះទៅទេសចរណ៍នៅទីអវកាសផងដែរ។ Virgin Galactic នឹងប្រើប្រាស់យានអវកាស SpaceShipTwo ហើយតម្លៃសម្រាប់សំបុត្រមួយសន្លឹក គឺស្មើនឹង 250,000ដុល្លារអាមេរិក៕
ប្រភព៖ Space
ប្រែសម្រួល៖ បុត្រា
