PR - La Reine Media

កំពូលតារាបាល់ទាត់ RUUD VAN NISTELROOY៖ ខ្ញុំចង់ទៅលេងប្រាសាទ អង្គរវត្តខ្លាំងណាស់

ភ្នំពេញ៖ ក្នុងឱកាសជួបជាមួយអ្នកគាំទ្រ របស់ខ្លួនក្នុងថ្ងៃចុងក្រោយ នៃដំណើរទស្សនកិច្ច ទេសចរណ៍នៅលើទឹកដីកម្ពុជា នាត្រីថ្ងៃទី4 ខែមេសា ឆ្នាំ2018 នៅកោះពេជ្រ លោក Ruud van Nistelrooy បានបង្ហាញនូវចំណាប់អារម្មណ៍ផ្ទាល់ខ្លួន និងសម្តែង នូវក្តីសប្បាយរីករាយយ៉ាងខ្លាំង ដល់អ្នកគាំទ្រ ហើយប្រកាសថា នឹងទៅទស្សនា ប្រាសាទអង្គរវត្ត ដែលជាប្រាសាទ មានកេរិ៍ឈ្មោះល្បីល្បាញ លើពិភពលោក ។

លោក Ruud van Nistelrooy ដែលជាអតីតខ្សែប្រយុទ្ធ បាល់ទាត់របស់ក្រុម Manchester United និងក្រុម Real Madrid បានធ្វើការដង្ហែពាន UEFA Champions League ឆ្នាំ2018 និងបានជួបអ្នកគាំទ្រ ដែលរៀបចំដោយស្រាបៀរ Heineken ។

ក្នុងឱកាសជួបជាមួយ អ្នកគាំទ្ររបស់ខ្លួន លោក Ruud van Nistelrooy បានថ្លែងថា លោកមានដំណឹងល្អមួយ សម្រាប់បងប្អូនទាំងអស់គ្នា ហើយនឹងធ្វើឲ្យបងប្អូន មានភាពរំភើបរីករាយ ជាខ្លាំងផងដែរ នោះគឺរង្វាន់ដ៏ធំ ពីរូបលោកផ្ទាល់តែម្តង ។ នៅពេលដែលសួរថា តើលោក Ruud van Nistelrooy មានអារម្មណ៍យ៉ាងណា ដែលមកដល់ប្រទេសកម្ពុជា? លោក Ruud បានបញ្ជាក់យ៉ាងខ្លីថា ” លោកមានភាពសប្បាយរីករាយ ដែលមានឱកាស ជួបជាមួយពលរដ្ឋកម្ពុជា និងស្វែងយល់ពីប្រទេសកម្ពុជា ក៏ដូចជាស្វែងយល់បន្ថែមពីប្រជាជនកម្ពុជា ដោយក្នុងថ្ងៃទី 4ខែមេសានេះ ខ្ញុំបានធ្វើដំណើរទៅទស្សនាព្រះបរមរាជវាំង ហើយនៅថ្ងៃស្អែក ខ្ញុំនឹងទៅទស្សនា ប្រាសាទអង្គរវត្ត”។ ខ្ញុំចង់ទៅលេងឯខេត្តសៀមរាបអង្គរ ព្រោះខេត្តនេះសម្បូរទៅដោយ ប្រាងប្រាសាទជាច្រើន ដែលសុទ្ធសឹងតែជាប្រាសាទ ដែលមានកេរិ៍ឈ្មោះល្បី ជាពិសេសប្រាសាទអង្គរវត្ត ដែលមានភាពល្បីល្បាញ នៅទូទាំងសាកលលោក ខ្ញុំចង់ទៅលេងប្រាសាទ អង្គរវត្តខ្លាំងណាស់។

នារាត្រីចុងក្រោយនេះ កំពូលកីឡាករបាល់ទាត់ លោក Ruud van Nistelrooy បានចុះហត្ថលេខា ជាមួយអ្នកគាំទ្ររបស់ខ្លួន នៅលើអាវ វត្ថុអនុស្សាវរីយ៍ និងបាល់ទាត់ និងមានការថតរូប ជាមួយកំពូលកីឡាករ បាល់ទាត់អន្តរជាតិ និងថតរូបជាមួយពានរង្វាន់ UEFA CHAMPIONS LEAGUE ជាដើម។

អមជាមួយវត្តមាន របស់លោក Ruud van Nistelrooy ស្រាបៀរ Heineken ក៏បាន អញ្ជើញតារាចម្រៀងល្បីៗ ដែលប្រចាំ ព្រះរាជាណាចក្រកម្ពុជា ដើម្បីចូលរួមច្រៀង កំដអារម្មណ៍ភ្ញៀវកិត្តិយសជាតិ និងអន្តរជាតិ នៅក្នុងរាត្រីនោះមានដូចជា៖កញ្ញារ៉េត ស៊ូស្ស៉ាណា ក្រុមក្មេងខ្មែរ កញ្ញាឡូ រ៉ាម៉មនិងក្រុមរាំប្រចាំស្រាបៀ Heineken ផងដែរ។សូមរំលឹកថា កម្មវិធីដំណើរទេសចរណ៍ រយៈពេលបីថ្ងៃ ត្រូវបានរៀបចំឡើង ដោយស្រាបៀរ Heineken ហើយកម្មវិធីនេះ នឹងជំរុញផ្តល់ឲ្យអ្នកគាំទ្រ ទូទាំងពិភពលោក នូវឱកាសផ្ទាល់ ក្នុងការចូលរួម ទទួលបានភាពរំភើបរីករាយ នៃការទស្សនាការប្រកួតនេះ តាមរយៈយុទ្ធនាការ របស់ស្រាបៀរ Heineken ដែលមានឈ្មោះថា “ចែករំលែកភាពរំភើបរីករាយ ចែករំលែកពានរង្វាន់”៕

April 5, 2018

ពាន UEFA Champions League បង្ហាញវត្តមានលើកដំបូង លើឆាកស្រាបៀរ Heineken នៅកម្ពុជា

ភ្នំពេញ៖ បន្ទាប់ពី វត្តមានអតីតកំពូលកីឡាករ ដ៏ល្បីល្បាញ នៃក្រុម Manchester United កីឡាករ Ruud Van Nistelrooy បានមកដល់កម្ពុជា នៅយប់ថ្ងៃទី២ ខែមេសា ឆ្នាំ២០១៨នេះ ក្រុមហ៊ុន ស្របៀរ Heineken បាននាំយក ការភ្ញាក់ផ្អើលមួយ ដល់អ្នកគាំទ្រ នោះគឺ កាបង្ហាញ ពាន UEFA Champions League នៅលើឆាកស្រាបៀរ Heineken ហើយក៏ជាលើកដំបូង និងអស្ចារ្យ ផងដែលនៅកម្ពុជា ។

ដើម្បីស្វាគមន៍នៅកម្មវិធី ដំណើរទេសចរណ៍ ពានរង្វាន់ក្របខ័ណ្ឌ UEFA Champions League ដែលក្រុមហ៊ុនស្រាបៀរ Heineken ប្រចាំកម្ពុជា បានប្រកួតប្រជែង ជាមួយបណ្តាប្រទេសជាង ១៩២ ដើម្បីដណ្តើមយក ឱកាសធ្វើជាម្ចាស់ផ្ទះ នៃកម្មវិធីនេះ ដោយបានធ្វើការដង្ហែលពាន UEFA Champions League មកកាន់ ឆាកស្រាបៀរ Heineken និងផ្តល់ឱកាស ដល់អ្នកគាំទ្រ ថតរូបទុកជាអនុស្សាវរីយ៍ ព្រមជាមួយការរៀបចំតន្ត្រី និងការទទួលទានស្រាបៀរ Heineken ដែលជាស្រាបៀរលំដាប់ពិភពលោក ។

សូមរំលឹកថា លោក Ruud Van Nistelrooy ត្រូវបានចាត់ទុកថា ជាកីឡាករដ៏ឆ្នើមបំផុតម្នាក់ ក្នុងជំនាន់របស់គាត់ ដោយស៊ុតបញ្ចូលទីបាន ១៥០គ្រាប់ ក្នុង ២១៩ប្រកួត សម្រាប់ក្រុម Manchester United និងជាកីឡាករស៊ុតបញ្ចូលទី ច្រើនជាងគេ ក្នុងកំណត់ត្រាបាល់ទាត់អឺរ៉ុប របស់ក្លិបនេះ និងជាកីឡាករស៊ុតបាល់ បញ្ចូលទីច្រើនជាងគេបី សម័យកាល ក្នុងក្របខ័ណ្ឌ UEFA Champions League និងបានមកកាន់ប្រទេសកម្ពុជា ក្នុងគោលបំណង ទស្សនកិច្ច ៣ថ្ងៃ និងចូលរួមក្នុងកម្មវិធី ដំណើរទេសចរណ៍ ពានរង្វាន់ក្របខ័ណ្ឌ UEFA Champions Leagueនៅកម្ពុជា ។

អតីតកីឡាករ Ruud van Nistelrooy នឹងធ្វើការចែករំលែកបទពិសោធន៍ ដល់អ្នកគាំទ្រ និងចំណេះដឹង របស់លោក ដើម្បីជួយណែនាំ អ្នកមានទេពកោសល្យ ខាងបាល់ទាត់ ជំនាន់ក្រោយ ឲ្យសម្រេចបាននូវ គោលដៅរបស់ពួកគេ ។

គួរបញ្ជាក់ថា កម្មវិធីដំណើរទេសចរណ៍ រយៈពេលបីថ្ងៃ ត្រូវបានរៀបចំឡើង ដោយស្រាបៀរ Heineken ហើយកម្មវិធីនេះ នឹងជំរុញផ្តល់ឲ្យអ្នកគាំទ្រ ទូទាំងពិភពលោក នូវឱកាសផ្ទាល់ ក្នុងការចូលរួម ទទួលបានភាពរំភើបរីករាយ នៃការទស្សនាការប្រកួតនេះ តាមរយៈយុទ្ធនាការ របស់ស្រាបៀរ Heineken ដែលមានឈ្មោះថា “ចែករំលែកភាពរំភើបរីករាយ ចែករំលែកពានរង្វាន់”៕

April 4, 2018

សន្និសីទសារព័ត៌មានស្តីពីកម្មវិធីដំណើរទេសចរណ៍ពានរង្វាន់ UEFA CHAMPIONS LEAGUE 2018 ជាមួយកីឡាបាល់ទាត់អន្តរជាតិ RUUD VAN NISTELROOY

ភ្នំពេញ៖ នៅថ្ងៃទី 3 ខែមេសា សន្និសីទសារព័ត៌មានមួយបានរៀបចំឡើងដើម្បីឧទ្ទេសនាមតារាបាល់ទាត់អន្តរជាតិលោក Ruud van Nistelrooy អតីតៈខ្សែប្រយុទ្ធរបស់ក្រុម Manchester United និងក្រុម Real Madrid ដែលកាន់តួនាទីជាទូតសុឆន្ទៈប្រចាំកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League 2018 ដែលនាំជូនដោយស្រាបៀរ Heineken®។

លោក Roland Bala នាយកគ្រប់គ្រងនៃក្រុមហ៊ុនស្រាបៀរ Heineken ប្រចាំប្រទេសកម្ពុជា លោកម៉ៃ តុលា អគ្គលេខាធិការស្តីទីនៃសហព័ន្ធកីឡាបាល់ទាត់កម្ពុជា (FFC) ឯកឧត្តម ស៊ាន បូរ៉ាត រដ្ឋលេខាធិការនៃក្រសួងអប់រំយុវជននិងកីឡា បានចូលរួមជាអធិបតីភាពនៃអង្គសន្និសីទសារព័ត៌មាននេះ ហើយបានស្វាគមន៍លោក Ruud van Nistelrooy មកកាន់ព្រះរាជាណាចក្រកម្ពុជា។

ឯកឧត្តម វ៉ាត់ ចំរើន អនុអគ្គលេខាធិការនៃក្រសួងទេសចរណ៍ និងជាអគ្គលេខាធិការនៃគណៈកម្មាធិការជាតិអូឡាំពិកក៏បានចូលរួមក្នុងពិធីស្វាគមន៍នេះផងដែរ។

ជាផ្នែកមួយនៃយុទ្ធនាការទូទាំងពិភពលោក កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League 2018 ដែលនាំជូនដោយស្រាបៀរ Heineken® ធ្វើឡើងនៅប្រទេសកម្ពុជាចាប់ពីថ្ងៃទី 2 ដល់ថ្ងៃទី 4 ខែមេសា ឆ្នាំ 2018 ។ សម្រាប់រយៈពេលបីថ្ងៃ ក្រុមអ្នកគាំទ្រមានឱកាសដ៏កម្រក្នុងការថតរូបជាមួយនឹងពានរង្វាន់ដ៏ល្បីល្បាញនេះ ជួបផ្ទាល់ជាមួយ Ruud van Nistelrooy និងទទួលបទពិសោធន៍ដ៏រំភើបនៃដំណើរទស្សនកិច្ចនេះ។

លោក Ruud van Nistelrooy ត្រូវបានចាត់ទុកថាជាកីឡាករដ៏ឆ្នើមបំផុតម្នាក់ក្នុងជំនាន់របស់គាត់ដោយស៊ុតបញ្ចូលទីបាន 150គ្រាប់ក្នុង 219 ប្រកួតសម្រាប់ក្រុម Manchester United និងជាកីឡាករស៊ុតបញ្ចូលទីច្រើនជាងគេក្នុងកំណត់ត្រាបាល់ទាត់អឺរ៉ុបរបស់ក្លិប និងជាកីឡាករស៊ុតបាល់បញ្ចូលទីច្រើនជាងគេបីសម័យកាលក្នុងក្របខ័ណ្ឌ UEFA Champions League ។ លោក Ruud van Nistelrooy មានទំនាក់ទំនងជាប្រវត្តិសាស្ត្រជាមួយនឹងក្របខ័ណ្ឌ UEFA Champions League និងដើរតួយ៉ាងសំខាន់ជំនួសស្រាបៀរ Heineken® ក្នុងការបង្ហាញនូវមហិច្ឆិតានិងចំណាប់អារម្មណ៍ខ្លាំងចំពោះកម្មវិធីប្រកួតនេះ។

តារាបាល់ទាត់រូបនេះមានអារម្មណ៍រំភើបរីករាយខ្លាំងណាស់ចំពោះដំណើរទស្សនកិច្ចនៅព្រះរាជាណាចក្រកម្ពុជា ជាពិសេសឱកាសជួបជាមួយអ្នកគាំទ្រ និងកីឡាករបាល់ទាត់កម្ពុជា ដោយកីឡាករកម្ពុជាមួយចំនួននឹងមានឱកាសចូលរួមក្នុងវគ្គបង្វឹកពិសេសជាមួយលោក Ruud van Nistelrooy ។

លោក Roland Bala នាយកគ្រប់គ្រងនៃក្រុមហ៊ុនស្រាបៀរ Heineken ប្រចាំប្រទេសកម្ពុជា បានសម្តែងនូវភាពរីករាយយ៉ាងខ្លាំងចំពោះដំណើរទស្សនកិច្ចនៅកម្ពុជា ដោយមានប្រសាសន៍ថា៖ “ស្រាបៀរ Heineken®មានកិត្តិយសយ៉ាងក្រៃលែងក្នុងការនាំកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League មកកាន់ប្រទេសកម្ពុជា។

នេះគឺជាបទពិសោធន៍វិសេសវិសាលមួយសម្រាប់អ្នកគាំទ្រកម្ពុជាចំពោះក្របខ័ណ្ឌ UEFA Champions League ដើម្បីបានឃើញផ្ទាល់នូវពានរង្វាន់ដ៏ល្បីល្បាញនេះ ហើយនិងជួបផ្ទាល់ជាមួយ Ruud van Nistelrooy។ គោលបំណងរបស់យើងគឺធ្វើឲ្យអ្នកគាំទ្រដែលមិនមានឱកាសអាចទទួលបាននូវបទពិសោធន៍រំភើបរីករាយ និងអារម្មណ៍រំជើបរំជួលចំពោះការប្រកួតក្របខ័ណ្ឌ UEFA Champions League ។ យើងក៏ចង់លើកស្ទួយវិស័យកីឡាបាល់ទាត់របស់កម្ពុជានៅលើឆាកអន្តរជាតិ”

ចំពោះព័ត៌មានលម្អិតបន្ថែមអំពីកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® នៅកម្ពុជា សូមចូលមើលគេហទំព័រ៖ www.facebook.com/Heineken

សូមរីករាយទទួលទានស្រាបៀរ Heineken ដោយទទួលខុសត្រូវ

April 3, 2018

ពានរង្វាន់អចលនទ្រព្យនាំមកនូវសន្ទុះថ្មីដល់វិស័យសំណង់ និងវិស័យអចលនទ្រព្យនៅកម្ពុជា

វាគឺជាភាពជោគជ័យដ៏ធំធេងមួយសម្រាប់ពានរង្វាន់ប្រចាំឆ្នាំលើកទីបីរបស់ PropertyGuru Cambodia Property Awards ឆ្នាំ2018 ដែលបាននាំមកជូនដោយក្រុមហ៊ុន KHI បានប្រារព្ធធ្វើឡើងនៅថ្ងៃទី16 ខែមីនាកន្លងទៅនេះនៅរាជធានីភ្នំពេញ ដែលប្រព្រឹត្តទៅនៅសណ្ឋាគារលំដាប់ផ្កាយប្រាំ Sofitel Phnom Penh Phokeethra ដោយមានការចូលរួមពីភ្ញៀវជាតិ និងអន្តរជាតិយ៉ាងច្រើនកុះករ។ បើយើងធ្វើការប្រៀបធៀបរវាងព្រឹត្តិការណ៍ពានរង្វាន់អចលនទ្រព្យ កម្ពុជា កាលពីឆ្នាំមុន ជាមួយនឹងព្រឹត្តិការណ៍ពានរង្វាន់អចលនទ្រព្យ កម្ពុជា លើកទីបីនៅក្នុងឆ្នាំ2018នេះ ឃើញថា មានការរីកចម្រើនជាខ្លាំង ទាំងចំនួនភ្ញៀវដែលមកចូលរួមនៅក្នុងកម្មវិធី ដែលមានទាំងភ្ញៀវជាតិ និងភ្ញៀវអន្តរជាតិនៅក្នុងវិស័យអចលនទ្រព្យ ហើយចំពោះចំនួនពានរង្វាន់ក៏មានការកើនឡើងផងដែរ ដែលកាលពីឆ្នាំកន្លងទៅពានរង្វាន់អចលនទ្រព្យកម្ពុជា មានត្រឹមតែ12ពានរង្វាន់តែប៉ុណ្ណោះ ចំណែកនៅក្នុងឆ្នាំ2018នេះ ពានរង្វាន់បានកើនទាំងរហូតដល់26ពានរង្វាន់ផ្សេងៗគ្នា និងត្រូវបានទទួលស្គាល់ និងវាយតម្លៃដោយគណៈកម្មាធិការឯករាជ្យសម្រាប់ការអភិវឌ្ឍ ការរចនា និងការអនុវត្តន៍អាជីវកម្មល្អឥតខ្ចោះ។ ចំណែកក្រុមហ៊ុនដែលមានសិទ្ធិចូលរួមនៅក្នុងកម្មវិធីនេះ ត្រូវបានជ្រើសរើស និងសម្រិតសម្រាំងជាខ្លាំង គឺមានតែក្រុមហ៊ុនជាង50ប៉ុណ្ណោះ ដែលមានសិទ្ធិចូលរួមប្រកួតនៅក្នុងចំណោមក្រុមហ៊ុនដែលបានដាក់ពាក្យយ៉ាងច្រើន (ចំនួនក្រុមហ៊ុនដែលបានដាក់ពាក្យគឺកើនឡើងទ្វេដង បើប្រៀបធៀបនឹងឆ្នាំមុន)។ ចំណុចវិជ្ជមានទាំងអស់នេះហើយ ដែលឆ្លុះបញ្ចាំងឱ្យឃើញថា វិស័យសំណង់ និងអចលនទ្រព្យនៅកម្ពុជាគឺកំពុងមានការរីកចម្រើន និងមានការចាប់អារម្មណ៍ពីសំណាក់បណ្តាវិនិយោគិននានាទាំងនៅក្នុងស្រុក នៅក្នុងតំបន់ និងនៅជំុវិញពិភពលោក។

ពានរង្វាន់នេះមានសារៈសំខាន់ណាស់ក្នុងការជំរុញឱ្យមានការរីកចម្រើនក្នុងវិស័យសំណង់ និងវិស័យអចលនទ្រព្យនៅក្នុងព្រះរាជាណាចក្រកម្ពុជា ហើយការប្រកួតប្រជែងនេះក៏ជួយទាក់ទាញវិនិយោគិនពីបណ្តាប្រទេសរីកចម្រើនក្នុងវិស័យអចលនទ្រព្យឱ្យមកកាន់ប្រទេសកម្ពុជាកាន់តែច្រើនឡើង។ ភាពជោគជ័យនៃកម្មវិធីពានរង្វាន់ PropertyGuru Cambodia Property Awards ឆ្នាំ2018នេះ បានបង្ហាញយ៉ាងច្បាស់ថា វិស័យសំណង់ និងអចលនទ្រព្យ គឺជាសសរស្តម្ភដ៏សំខាន់មួយដែលគាំទ្រដល់កំណើនសេដ្ឋកិច្ចជាតិ។

កម្មវិធីពានរង្វាន់អចលនទ្រព្យ កម្ពុជា លើកទីបីនៅក្នុងឆ្នាំ2018នេះ គឺទទួលបាននូវភាពជោគជ័យ និងមានភាពរីកចម្រើនគួរជាទីមោទនៈក្រៃលែង ដូច្នេះសូមរងចាំតាមដានថា តើកម្មវិធីពានរង្វាន់អចលនទ្រព្យ កម្ពុជា នៅឆ្នាំបន្ទាប់ នាឆ្នាំ2019ខាងមុននេះ នឹងមានភាពរីកចម្រើន និងមានអ្នកគាំទ្រខ្លាំងដល់កម្រិតណាជាបន្តទៀត៕

(សម្រាប់ព័ត៌មានបន្ថែមសូមចូលទៅកាន់គេហទំព័រ PropertyGuruGroup.com)

April 3, 2018

ព្រឹត្តិការណ៍សង្ក្រាន្តនៅ PPSEZ IDOL 2018 បង្កបរិយាកាសសប្បាយរីករាយដល់កម្មករ-កម្មការិនីប្រចាំឆ្នាំ

ការរៀបចំព្រឹត្តិការណ៍ប្រចាំឆ្នាំដ៏ធំមួយដើម្បីអបអរសាទរពិធីបុណ្យចូលឆ្នាំខ្មែរកាលថ្ងៃទី31ខែមីនា ឆ្នាំ2018 កន្លងទៅដែលមានឈ្មោះថា “សង្ក្រាន្ត PPSEZ IDOL 2018” មានការអញ្ជើញចូលរួមពីភ្ញៀវកិត្តិយសសំខាន់ៗជាច្រើន ដូចជាលោកជំទាវវេជ្ជ. អ៊ឹង កន្ថាផាវី រដ្ឋមន្ត្រីក្រសួងកិច្ចការនារី លោកជំទាវ ស៊ើង សរសុចិត្តា រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈជាតំណាងឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ឯកអគ្គរដ្ឋទូតសហរដ្ឋអាមេរិក និងឯកអគ្គរាជទូតថៃប្រចាំនៅកម្ពុជា ព្រមទាំងសមាជិកនៃសមាគមសហគ្រិនស្ត្រីកម្ពុជាជាច្រើនរូបបានចូលរួមលើកទឹកចិត្តដល់ប្អូនៗកម្មករទាំងអស់ឱ្យមានភាពសប្បាយរីករាយនៅក្នុងព្រឹត្តិការណ៍ផងដែរ។

ក្នុងព្រឹត្តិការណ៏នេះមានបេក្ខជន-បេក្ខនារីចំនួន 10រូបដែលបានឆ្លងមកដល់វគ្គផ្តាច់ព្រ័ត្រក្នុងការប្រកួតប្រជែងសម្រស់ និងទេពកោសល្យពិសេសពីចំណោមក្រុមកម្មករ-កម្មការិនីជាច្រើនដែលកំពុងបម្រើការងារនៅក្នុងក្រុមហ៊ុននានាក្នុងតំបន់សេដ្ឋកិច្ចពិសេសភ្នំពេញដែលបានសម្តែងសមត្ថភាព និងទេពកោសល្យរបស់ខ្លួនយ៉ាងអស់ពីសមត្ថភាព។ នៅក្នុងព្រឹត្តិការណ៍នោះថែមទាំងមានការសម្តែងសិល្បៈរបាំបុរាណ របាំសហសម័យ ព្រមទាំងមានវត្ដមានតារាល្បីៗ ដូចជាលោក ព្រាប សុវត្ថិ អ្នកនាង ខាត់ សុឃីម និងក្រុមកំប្លែងនាយពែកមីដើម្បីចូលរួមបង្កបរិយាកាសដ៏សែនរីករាយទៀតផង។

លោកជំទាវឧកញ៉ា លីម ឈីវហូរ អគ្គនាយិកាក្រុមហ៊ុន ភ្នំពេញ PPSEZ ភីអិលស៊ីបានមានប្រសាសន៍ថា ក្រុមហ៊ុន ភ្នំពេញ PPSEZ បានរៀបចំមហាព្រឹត្តិការណ៍ដ៏ធំអស្ចារ្យបែបនេះជារៀងរាល់ឆ្នាំ គឺចាប់តាំងពីឆ្នាំ2014មកម្ល៉េះ ដោយទទួលជោគជ័យ និងមានការគាំទ្រយ៉ាងខ្លាំងពីសាធារណជន ជាពិសេសពីសំណាក់បងប្អូនកម្មករ-កម្មការិនីយើង ហើយលើកនេះគឺជាឆ្នាំទី5ហើយ។ ការរៀបចំកម្មវិធីនេះឡើង គឺជាការអបអរសាទរពិធីចូលឆ្នាំថ្មីប្រពៃណីខ្មែរនាខែមេសានេះ និងអបអរទិវាពលកម្មអន្តរជាតិថ្ងៃទី1 ឧសភា ឆ្នាំ2018 ក្រោមប្រធានបទ “ដើម្បីសន្តិភាព ស្ថិរភាព ការងារ និងមុខរបរ” ផងដែរ។

លោកជំទាវ ស៊ើង សរសុចិត្តា បានមានប្រសាសន៍ថា នេះជាលើកទី5 ហើយដែលក្រុមហ៊ុនភ្នំពេញ PPSEZ ភីអិលស៊ី បានរៀបចំកម្មវិធីបែបនេះ ហើយលើកនេះកាន់តែមានលក្ខណៈទូលំទូលាយជាងមុន ដោយមានការចូលរួមពីអ្នកវិនិយោគក្នុងតំបន់សេដ្ឋកិច្ចពិសេសទូទាំងប្រទេស។ សំដៅបង្កបរិយាកាសសប្បាយរីករាយជូនបងប្អូនកម្មករ-កម្មការិនី ក្នុងឱកាសអបអរសាទរខួបអនុស្សាវរីយ៍លើកទី132 នៃទិវាពលកម្មអន្តរជាតិ 1ឧសភា ឆ្នាំ2018 ផងដែរ។ ក្មួយៗកម្មករ-កម្មការិនីដែលបានចូលរួមប្រកួតប្រជែង មិនត្រឹមតែមានរូបសម្ផស្សស្រស់ស្អាត និងមានសមត្ថភាពល្អខាងសិល្បៈផ្សេងៗប៉ុណ្ណោះទេ ប៉ុន្តែថែមទាំងយល់ដឹងច្បាស់ពីច្បាប់ការងារ ដែលនឹងជួយលើកស្ទួយដល់សិទិ្ធ និងផលប្រយោជន៍កម្មករនិយោជិតក្នុងវិស័យនេះ ហើយបានចូលរួមបំផុសឱ្យបងប្អូនកម្មករនិយោជិតរបស់យើងបានស្គាល់ពីតម្លៃការងាររបស់ខ្លួន និងកាន់តែស្រឡាញ់ការងាររបស់ខ្លួន សំដៅបង្កើនផលិតភាពការងារ និងទំនាក់ទំនងវិជ្ជាជីវៈជាមួយនិយោជក និងគោរពច្បាប់ការងារទាំងអស់គ្នាទៀតផង។

លោកជំទាវវេជ្ជ. អ៊ឹង កន្ថាផាវី រដ្ឋមន្ត្រីក្រសួងកិច្ចការនារីក៏បានមានប្រសាសន៍នៅក្នុងឱកាសនោះដែរថា កម្មវិធីនេះគឺដើម្បីលើកទឹកចិត្តក្មួយៗដែលបានបម្រើការងារនៅតំបន់សេដ្ឋកិច្ចពិសេសនេះឱ្យបានបង្ហាញស្នាដៃដែលបានធ្វើការងារ នឹងទេពកោសល្យ សមត្ថភាពរបស់ខ្លួន។ យើងអាចរៀបចំកម្មវិធីដ៏អស្ចារ្យនេះបាន គឺដោយសារមានសុខសន្តិភាពក្នុងប្រទេសជាតិ យើងអាចរកការងារធ្វើបានដូចមាននៅក្នុងតំបន់សេដ្ឋកិច្ចពិសេសដូចសព្វថ្ងៃនេះបាន គឺដោយសារមានសុខសន្តិភាពក្នុងប្រទេសយើង ដូច្នេះសូមបងប្អូន-ក្មួយៗខំប្រឹងធ្វើការងារឱ្យបានល្អដើម្បីទាក់ទាញអ្នកវិនិយោគចូលមកប្រទេសកម្ពុជាយើង បង្កើតការងារបានកាន់ច្រើនសម្រាប់បងប្អូនយើងបន្ថែមទៀត៕

April 3, 2018

អគារស្នាក់នៅសហកម្មសិទ្ធិ Residences Bel air ស្ដងដារបែបបារាំងបង្ហាញខ្លួនលើកដំបូងនៅកម្ពុជា

Residences Bel Air គឺជាគម្រោងសំណង់អគាររស់នៅសហកម្មសិទ្ធិដែលមានសលក្ខណៈខុសប្លែកស្រស់ស្អាតទំនើបជាងបណ្តាខុនដូ និងអាផាតមិន ដែលមាន និងកំពុងដំណើរនៅក្នុងប្រទេសកម្ពុជានាពេលបច្ចុប្បន្ននេះ។ Residences Bel Air ដែលបានប្រារព្វពិធីប្រកាសដាក់លក់ជាផ្លូវការណ៍នៅភោជនីយដ្ឋានទំនើប Hearth Rock Cafe ស្ថិតនៅក្នុងអគារមណ្ឌលពាណិជ្ជកម្ម Exchange Square ក្រោមការចូលរួមពីសំណាក់បណ្តាអ្នកវិនិយោគផ្នែកអចលនទ្រព្យ ក៏ដូចជាអតិថិជនលំដាប់អភិជន ជាតិ-អន្តរជាតិ ព្រមទាំងបណ្តាអ្នកសារព័ត៌មានជាច្រើននាក់ កាលពីរាត្រីថ្ងៃទី31 ខែមីនា ឆ្នាំ2018កន្លងទៅនេះ មានកម្ពស់18 ជាន់ ស្មើនឹង 82 Units ក្រោមការបណ្តាក់ទុនវិនិយោគរួមគ្នារវាងអ្នកវិនិយោគជាជាតិខ្មែរ និងជនជាតិបរទេស សរុបចំនួន 8 លានដុល្លារសហរដ្ឋអាមេរិក ។

លោក ជា ឡាយឃាង អគ្គនាយក Residences Bel Air បានលើកឡើងថា អគារលំនៅដ្ឋានសហកម្មសិទ្ធិដែលមានលក្ខណៈស្អាតទំនើបតាមបែបបារាំងមួយនេះ នឹងត្រូវចំណាយពេលលើដំណើរការសាងសង់រយៈពេល 30ខែ (2ឆ្នាំកន្លះ) នៅលើទឹកដីដែលកំពុងមានការអភិវឌ្ឍយ៉ាងសកម្មនាតំបន់ជ្រោយចង្វារ ខណ្ឌជ្រោយចង្វារ ស្ថិតនៅទិសខាងកើត ឈាងខាងជើង រាជធានីភ្នំពេញ ដែលមានពន្លឺភ្លឺគ្រប់គ្រាន់ ខ្យល់អាកាសល្អបរិសុទ្ធ បក់ផាត់ពីដងទន្លេមេគង្គ និងដៃទន្លេសាបដែលនៅអមតួអគារទាំងមូល ក្រោមការរចនាប្លង់ពីសំណាក់កំពូលអ្នកជំនាញផ្នែកឌីហ្សាញ់ជនជាតិបារាំង រួមជាមួយនឹងគំនិតច្នៃប្រឌិតរបស់អ្នកជំនាញឌីហ្សាញ និងសាង់ជនជាតិកូរ៉េផងដែរ ។

ដោយឡែកសម្រាប់ ទីធ្លានៅក្នុង Units នីមួយៗ មានទំហំចាប់ពី 42 ម៉ែត្រការ៉េ រហូតដល់ 196 ម៉ែត្រការ៉េ ដោយមានការបែងចែកចេញជាទីកន្លែងសម្រាប់ទទួលភ្ញៀវ កន្លែងទទួលទានដំណេក ទីធ្លាលំហែរអារម្មណ៍ យ៉ាងប្រណីត ក្រោមការបំពាក់សម្ភារៈប្រើប្រាស់ទំនើបនាសម័យចុងក្រោយ ជាមួយនឹងតម្លៃចាប់ពី 8ម៉ឺនដុល្លារ ឡើងទៅ ជាមួយនឹងជម្រើសជាច្រើនសម្រាប់ការទិញធ្វើជាកម្មសិទ្ធិ ដោយមិនមានអត្រាការប្រាក់នោះឡើយ ។

កញ្ញា រ៉េត មេត្តា (Mercy) នាយកផ្នែកលក់ និងទីផ្សារ បានលើកឡើងផងដែរថា ៖ «Residences Bel Air ថ្វីត្បិតតែទើបតែចាប់ផ្តើមប្រកាសលក់ប៉ុន្តែយើងទទួលបានការកក់ទុកពីបណ្តាភ្ញៀវជាតិ និងអន្តរជាតិមួយចំនួនហើយដែលភាគច្រើនពួកគាត់សុទ្ធតែជាអ្នកហដែលធ្លាប់បានរស់នៅ និងបានដឹងច្បាស់ពីគុណតម្លៃនៃប្រភេទលំនៅដ្ឋានសហកម្មសិទ្ធិដែលមានលក្ខណៈតាមបែបបារាំងទំនើប ។

ជាមួយគ្នានេះក៏មានអ្នកវិនិយោគផ្នែកអចលនទ្រព្យក្នុងស្រុកមួយចំនួនទៀតផងដែរ ដែលបានកក់ទុកក្នុងគោលបំណងវិនិយោគបន្តទទួលភាគលាភនៅថ្ងៃខាងមុខ។ កញ្ញា មេត្តា បានបន្តទៀតថា ៖ «ជាការពិតណាស់ បច្ចុប្បន្ននេះនៅកម្ពុជា ដែលជាប្រទេសកំពុងមានការអភិវឌ្ឍយ៉ាងខ្លាំងជាពិសេសលើវិស័យអចលនទ្រព្យពិតជាមានការរីកចម្រើន ជាពិសេសលើវិស័យសំណង់ និងអគារស្នាក់នៅបែបទំនើប និងសហកម្មសិទ្ធិតែម្ដង ។

ប៉ុន្តែ ចំពោះ Residences Bel Air ហាក់មិនមានអ្វីដែលព្រួយបារម្ភពាក់ព័ន្ធទៅនឹងដំណើរការលក់នៅលើទីផ្សារមួយនេះឡើយ។ ភាពជឿជាក់របស់យើងក៏ព្រោះតែ Residences Bel Air មានភាពល្អខុសប្លែកពីបណ្តាសំណង់អគារទាំងអស់នោះ ខុសទាំងរូបភាពខាងក្រៅនៃការរចនាដ៏គួរឱ្យទាក់ទាញ ផ្តល់នូវផាសុកភាពខ្ពស់ក្នុងពេលស្នាក់នៅ មានប្រព័ន្ធការពារសុវត្ថិភាពដែលបំពាក់ដោយឧបករណ៍បញ្ចៀសហានីភ័យដ៏ទំនើបប្រកបដោយភាពជឿជាក់ ជាពិសេសស្ថិតនៅតំបន់អភិវឌ្ឍកម្រិតផ្កាយ5»៕

April 3, 2018

ក្រុមហ៊ុនផលិតឱសថដ៏ធំនៅតៃវ៉ាន់ នឹងមកបង្ហាញវត្តមាននៅកម្ពុជា

ជាមួយនឹងការព្យាករសម្រាប់ឆ្នាំ2018 ដែលកម្ពុជាអាចរក្សាបានកំណើនសេដ្ឋកិច្ចក្នុងរង្វង់ 6,9% ក្រោមការទទួលបានលំហូរវិនិយោគលើគ្រប់វិស័យ ជាពិសេស វិស័យអចលនទ្រព្យ ដែលឈរនៅលំដាប់ទីមួយនោះ នៅអំឡុងខែឧសភា ឆ្នាំ2018 ឆាប់ៗខាងមុខនេះ ក្រុមហ៊ុនផលិតឱសថNang Kuang Pharmaceutical Co.,Ltd ដែលមានរោងចក្រផ្ទាល់ខ្លួនដ៏ធំមួយ និងល្បីឈ្មោះនៅ តៃវ៉ាន់ បានសម្លឹងឃើញពីភាពវិជ្ជមានលើការវិនិយោគមកកាន់ប្រទេសដែលកំពុងអភិវឌ្ឍន៍មួយនេះ។ នេះបើយោងតាមការបង្ហើបប្រាប់ឱ្យដឹងពីសំណាក់លោក ឧកញ៉ា ចិត្រ សេរីសុភ័ក្ត្រ អគ្គនាយកក្រុមហ៊ុន Luxury Smile Cambodia Co., Ltd ដែលជាអ្នកនាំយកក្រុមហ៊ុនផលិតឱសថមួយនេះមកកាន់ប្រទេសកម្ពុជា។

មានប្រសាសន៍ប្រាប់អ្នកយកព័ត៌មានប្រចាំកាសែត “ឡារ៉ែន ពាណិជ្ជ”កាលពីពេលកន្លងទៅថ្មីៗនេះ លោកឧកញ៉ា ចិត្រ សេរីសុភ័ក្ត្រ បានលើកឡើងថា ចំពោះក្រុមហ៊ុនផលិតឱសថ Nang Kuang Pharmaceutical Co.,Ltd គឺជាក្រុមហ៊ុនដែលមានកេរ្តិ៍ឈ្មោះល្បីល្បាញនៅក្នុងប្រទេសតៃវ៉ាន់ជាច្រើនឆ្នាំមកហើយ ដោយបានទទួលស្គាល់ពីស្ថាប័នកំពូលរបស់វិស័យសុខាភិបាលប្រចាំតំបន់ ជាមួយនឹងការចរាចរយ៉ាងទូលំទូលាយនៅតាមបណ្តាប្រទេសជឿនលឿនមួយចំនួន ដូចជា សហរដ្ឋអាមេរិក ជប៉ុន សិង្ហបុរី ម៉ាឡេស៊ី និងនៅតាមបណ្តាប្រទេសប៉ែកអឺរ៉ុបមួយចំនួនទៀត ហើយកម្ពុជាក៏ជាប្រទេសមួយដែលទទួលស្គាល់ និងគាំទ្រផលិតផលផ្នែកវិស័យសុខាភិបាលរបស់ក្រុមហ៊ុនមួយនេះផងដែរ ដែលក្នុងនោះក្រៅពីផលិតផលឱសថហើយ នៅមានគ្រឿងបរិក្ខារពេទ្យ ក៏ដូចជាផលិតផលពាក់ព័ន្ធនឹងផ្នែកសម្ផស្សជាដើមផងដែរ។

លោកឧកញ៉ា ចិត្រ សេរីសុភ័ក្ត្រ បានបញ្ជាក់យ៉ាងដូច្នេះថា ៖ “វាជាមោទនភាពមួយរបស់កម្ពុជាដែលមានក្រុមហ៊ុនធំៗ និងល្បីឈ្មោះនៅបរទេស ងាកមកចាប់អារម្មណ៍បោះទុនវិនិយោគ និងចាប់ជាដៃគូជំនួញរួមគ្នា។ ចំពោះក្រុមហ៊ុន Nang Kuang Pharmaceutical Co.,Ltd ដែលមានចង្វាក់ផលិតកម្មផ្តោតទៅលើការផលិតផលិតផលសុខាភិបាល និងមានទីតាំងរោងចក្រផ្ទាល់ខ្លួននៅតៃវ៉ាន់មួយនេះ ត្រូវបានបង្កើតឡើងតាំងពីអំឡុងឆ្នាំ1963 ក្រោមកិច្ចដំណើរការយ៉ាងសកម្ម ប្រើប្រាស់បច្ចេកវិទ្យារបស់ជប៉ុន និងមានលទ្ធភាពអាចរកបានចំណូលប្រមាណ1800លានតៃវ៉ាន់ ស្មើនឹងប្រមាណ50លានដុល្លារសហរដ្ឋអាមេរិក ក្នុងមួយឆ្នាំ និងមានបុគ្គលិកប្រមាណជិត 800នាក់។ អ្វីដែលជាលក្ខណៈពិសេស និងភាពលេចធ្លោរបស់ក្រុមហ៊ុនមួយនេះ គឺភាពជំនាញមានបទពិសោធខ្ពស់ លើការផលិតឱសថទូទៅ ជាពិសេសអាចស្រាវជ្រាវ និងផលិតថ្នាំបង្ការជាច្រើនប្រភេទប្រកបដោយប្រសិទ្ធភាព ដែលក្នុងនោះរួមមានដូចជា ថ្នាំបង្ការជំងឺមហារីក, ជំងឺរលាកស្រោមខួរ, ថ្នាំបង្ការជំងឺថ្លើម, បង្ការជំងឺផ្តាសាយ និងប្រតិកម្មចាញ់អាកាសធាតុ ជាដើម។

ដោយឡែកពាក់ព័ន្ធទៅនឹងការបោះជំហានចូលមកវិនិយោគនៅកម្ពុជាក្នុងពេលដ៏ខ្លីឆាប់ៗខាងមុខនេះ ត្រូវបានលោកឧកញ៉ា ចិត្រ សេរីសុភ័ក្ត្រ ដែលជាអគ្គនាយកក្រុមហ៊ុន Luxury Smile Cambodia Co., Ltd និងជាអគ្គនាយកគ្រប់គ្រងក្រុមហ៊ុន Nang Kuang Pharmaceutical Cambodia Co.,Ltd ប្រចាំនៅកម្ពុជា បានបង្ហើបប្រាប់ថា ជាមួយនឹងការសម្រេចបោះទុននៅកម្ពុជានាពេលខាងមុខនេះ អ្នកតំណាងក្រុមហ៊ុនប្រចាំនៅប្រទេសតៃវ៉ាន់ រួមជាមួយនឹងអ្នកតំណាងក្រុមហ៊ុននៅប្រទេសកម្ពុជា ក្រោមវត្តមានរបស់លោកឧកញ៉ាផ្ទាល់ លោកជំទាវ សាស៊ីតាន់ ឡៅរ៉ូពីនយោ (SasitanLaorojpinyo) លោក Chen Li Shien លោក Alan Chen លោក Eric Tan Choon លោក Teoh Boon Heng លោក Kong Sovath លោកវេជ្ជបណ្ឌិត ChhanVannak នឹងបង្កើតសកម្មភាពយុទ្ធនាការសប្បុរសធម៌ ចុះផ្សព្វផ្សាយពីបញ្ហាថែទាំសុខភាព រួមជាមួយការផ្តល់ជូននូវថ្នាំបង្ការជំងឺមួយចំនួនដោយឥតគិតថ្លៃ ទៅដល់បណ្តាប្រជាពលរដ្ឋកម្ពុជា ដែលស្ថិតតាមបណ្តាខេត្តក្រុងនានាផងដែរ ដោយផ្តើមចេញពី រាជធានីភ្នំពេញ ខេត្តកំពង់ចាម ត្បូងឃ្មុំ បាត់ដំបង និងខេត្តតាកែវ។

សូមបញ្ជាក់ផងដែរថា បច្ចុប្បន្ន លោកឧកញ៉ា ចិត្រ សេរីសុភ័ក្ត្រ គឺជាអ្នកជំនួញវ័យក្មេងនៅកម្ពុជាដែលមានក្រុមហ៊ុនចំនួន9 នៅក្នុងដៃ រួមមានក្រុមហ៊ុន ៖ Monsne Café Cambodia, Chicken Bucket Cambodia, Maya Cosmic Cambodia , Maya Cosmic Health and Beauty center, Firdo Cambodia , CSS Real Estate, LLC, និងក្រុមហ៊ុន MohaSerey Pawnshop ដែលទាំងអស់នេះ ស្ថិតនៅក្រោមក្រុមហ៊ុន CSS Development Group Co.,Ltd រួមជាមួយនឹងក្រុមហ៊ុន Nang Kuang Pharmaceutical CambodiaCo.,Ltd ដែលនឹងចាប់ដំណើរការក្នុងពេលឆាប់ៗខាងមុខនេះ៕

April 2, 2018

ខុនដូ Picasso City Garden សម្ពោធដាក់លក់ជាផ្លូវការហើយ

គម្រោងលំនៅដ្ឋានបែបទំនើបចុងក្រោយរបស់សហព័ន្ឋ JU SHI នៃ ទីក្រុងហុងកុង “Picasso City Garden” បានប្រារព្ធពិធីសម្ពោធការលក់ខុនដូររបស់ខ្លួនជាផ្លូវការនៅថ្ងៃនេះ ដោយមានការអញ្ជើញចូលរួមដ៏ខ្ពង់ខ្ពស់របស់ ឯកឧត្តម ឧត្តមសេនីយ៍ឯក ហ៊ុន ម៉ាណែត នាយរងសេនាធិការចំរុះ នៃកងយោធពលខេមរភូមិន្ទ និងជាមេបញ្ជាការរងកងទ័ពជើងគោក បានអញ្ជើញជាអធិបតី និងមានម្ចាស់អាជីវកម្ម អ្នកជំនួញក្នុងប្រទេស កម្ពុជា និងចិនជាច្រើនរូបទៀត។ Picasso City Garden គឺជាអគារខុនដូរតែមួយគត់នៅក្នុងទ្វីបអាស៊ីដែលត្រូវបានទទួលសិទ្ធិដោយស្លាកសញ្ញាអន្តរជាតិ “Picasso” ។ នេះគឺជាគម្រោង កម្រិតកំពូលនៃសិល្បៈ គឺជាតំណាងសន្ទស្សន៍នៃលំនៅដ្ឋានបែបប្រណិតនៅក្នុងរាជធានីភ្នំពេញ។

ក្នុងប៉ុន្មានឆ្នាំថ្មីៗនេះប្រទេសកម្ពុជាទទួលបានកំណើនសេដ្ឋកិច្ចយ៉ាងរឹងមាំ ហើយជាប្រទេសមួយក្នុងចំណោមប្រទេសដែលមានអត្រាកំណើន GDP ខ្ពស់បំផុតក្នុងចំណោមបណ្តាប្រទេសក្នុងតំបន់អាស៊ាន។ សហព័ន្ឋ JU SHI នៃទីក្រុងហុងកុង បានកំពុងសម្លឹងមើលសក្តានុពលរបស់ប្រទេសកម្ពុជា ហើយបានចាប់ដៃគូជាមួយ Picasso ដើម្បីបើកដំណើរការ ” Picasso City Garden ” នៅរាជធានីភ្នំពេញដែលបានទទួលសិទ្ធជាផ្លូវការដោយ Picasso តែមួយគត់នៅតំបន់អាស៊ី ។

ស្ថាបត្យកម្មនៃការសាងសង់ រួមទាំងការរចនាតុបតែងផ្ទៃខាងក្នុងបែប Picasso ដើម្បីបង្កើតអគារខុនដូ ដែលមានបែបផែនសិល្បៈកំពូល។ គម្រោងនេះមានទីតាំងស្ថិតនៅក្នុងតំបន់បឹងកេងកងទី1 វាជាអគារខុនដូរមួយនេះប្រើប្រាស់វិធីសាស្ដ្របន្តជញ្ជាំងដែលមានលក្ខណៈស្តង់ដារខ្ពស់ ផ្គួបផ្សំនឹងការបុកគ្រឹះក្បូន លើកកំពស់សន្ទស្សន៍សុវត្ថិភាពនៃអគារកាន់តែប្រសើរទ្បើង។ គម្រោងមួយនេះ ជាគម្រោងដែលឈានមុខគេក្នុងឧស្សហកម្មសំណង់ជាច្រើននៅកម្ពុជានាពេលបច្ចុប្បន្ន។

ឯកឧត្តម ឧត្តមសេនីយ៍ឯក ហ៊ុន ម៉ាណែត បានមានប្រសាសន៍ថា “ប្រទេសកម្ពុជាមានស្ថានភាពអភិវឌ្ឍន៍សេដ្ឋកិច្ចដ៏ល្អដូចជាសម្បូរធនធានរ៉ែ ប្រជាសាស្ត្រវ័យក្មេង គោលនយោបាយវិនិយោគទុនបើកចំហរ ហេដ្ឋារចនាសម្ពន្ធដ៏ល្អ ជាដើម ដែលជាហេតុធ្វើអោយអត្រាកំណើន GDP មានសន្ទុះ 7% ក្នុងមួយឆ្នាំ ដែលនេះបង្ហាញថា ប្រទេសកម្ពុជាគឺជាប្រទេសមួយដែលរីកចម្រើនលឿនបំផុតក្នុងចំណោមបណ្តាប្រទេសនៅលើពិភពលោក។ យើងសូមលើកទឹកចិត្តវិនិយោគិនបរទេស ឬក្រុមហ៊ុនវិនិយោគ មកវិនិយោគនៅប្រទេសកម្ពុជាអោយបានកាន់តែច្រើនបន្ថែមទៀត។ ជាពិសេស សូមស្វាគមន៍ក្រុមហ៊ុនបរទេសដែលមានជំនាញវិជ្ជាជីវៈដូចជាសហព័ន្ឋ JU SHI នៃហុងកុង ដែលបានបោះជំហ៊ានចូលរួមរីកចម្រើនជាមួយប្រទេសកម្ពុជា “។

ឯកឧត្តម ឧត្តមសេនីយឯក បណ្ឌិត ហេង វុទ្ធី អគ្គលេខាធិការរងអាជ្ញាធរជាតិអាវុធគីមី ហើយក៏ជាប្រធានក្រុមប្រឹក្សាភិបាលក្រុមហ៊ុន T&B Import Export And Construction Co., Ltd. បានលើកឡើងផងដែរថា “ភ្នំពេញ គឺជាមជ្ឈមណ្ឌលពាណិជ្ជកម្មរបស់កម្ពុជា ដែលយើងអាចខ្ចីដោយគោលនយោបាយ វិនិយោគទុនបរទេសនេះ ទាក់ទាញសហគ្រាសបរទេសចូលមក ដើម្បីនាំមកនូវឱកាសការងារជាច្រើនសម្រាប់ប្រជាជនក្នុងស្រុក ហើយផ្នែកអចលនទ្រព្យបានក្លាយទៅជាឧស្សាហកម្មសសរស្តម្ភដ៏សំខាន់។ Picasso City Garden ជាអ្នកវិនិយោគនៅលើផ្នែកអចលនទ្រព្យជាច្រើន ហើយអនាគតយើងសង្ឃឹមថា នឹងកាន់តែមានគម្រោងកំពូលៗនាំមុខគេក្នុងទីផ្សារនាបណ្តាទីក្រុងអភិវឌ្ឍដូចជាប្រទេសកម្ពុជា”។

សហព័ន្ឋ JU SHI នៃហុងកុងមានហិរញ្ញវត្ថុដ៏រឹងមាំ និងបទពិសោធន៍ផ្នែកវិនិយោគ និងមានដៃគូរសហការនៅទូទាំងប្រទេសចិន និងអាស៊ីអាគ្នេយ៍។ ប្រធានក្រុមប្រឹក្សាភិបាល លោក Ye Wei Guo បាននិយាយថាជាយោងតាមការប្រែប្រួលសេដ្ឋកិច្ចរបស់ពិភពលោកថា អាស៊ីអាគ្នេយ៍ នឹងក្លាយជាតំបន់អភិវឌ្ឍសេដ្ឋកិច្ចនាពេលអនាគត ហើយកម្លាំងរីកដុះដាលសេដ្ឋកិច្ចរបស់ប្រទេសកម្ពុជា អាចមានសន្ទុះអភិវឌ្ឍសេដ្ឋកិច្ចក្នុងរយៈពេលខ្លី និងជាប្រទេសតែមួយដែលមានស្ថេរភាពក្នុងប្រទេសអាស៊ីអាគ្នេយ៍យើង ។ នេះជាហេតុដែលប៉ុន្មានឆ្នាំថ្មីៗនេះសហព័ន្ឋ JU SHI នៃហុងកុង បង្កើនការវិនិយោគរបស់ខ្លួននៅក្នុងប្រទេសកម្ពុជា ក្រៅពីគម្រោងអចលនទ្រព្យ នៅមានការគ្រប់គ្រងទ្រព្យសម្បត្តិ និងក្រុមហ៊ុនធានារ៉ាប់រងផងដែរ។

លោក Deng Zhen Yue អ្នកចាត់ការទូទៅនៃសហព័ន្ឋ JU SHI នៃទីក្រុងហុងកុងបានយល់ថាជាមួយនឹងការកើនឡើងយ៉ាងលឿននៃអ្នកដែលមានទ្រព្យសម្បត្តិ ខុនដូរបែបសិល្បៈ និងជាគម្រោងអភិរក្ស និងកាន់តែមានតម្លៃ។

” Picasso City Garden ” ដែលមានលក្ខណៈសាងសង់ពិសេស ដែលមិនធ្លាប់មាននៅក្នុងភ្នំពេញ បានបង្កើនគុណភាពនៃលំនៅដ្ឋានបែបប្រណីត ជាមួយនឹងសេវាកម្មគ្រប់គ្រងដ៏មានប្រសិទ្ធិភាព។ ក្រោយពីសម្រេចនិងក្លាយជាសូចនាករ នៃភ្នំពេញ ដឹកនាំវិស័យអចលនទ្រព្យភ្នំពេញផ្សារភ្ជាប់ទៅនិងអន្តរជាតិ ហើយនឹងឈានទៅកាន់អនាគត។

គួរបញ្ជាក់ផងដែរថា សហព័ន្ឋ JU SHI នៃហុងកុង បានបង្កើតឡើងនៅក្រុងហុងកុងកាលពីឆ្នាំ 2003 ក្នុងនាមជាសហព័ន្ឋវិនិយោគហិរញ្ញវត្ថុ ដែលមានអាជីវកម្មរួមមាន៖ អចលនទ្រព្យនៅក្រៅប្រទេស ការទិញទំនិញមូលធន ការគ្រប់គ្រងទ្រព្យសម្បត្តិ ហិរញ្ញប្បទានឯកជន ធនាគារវិនិយោគ និងធនាគារឯកជន។ ជាមួយនឹងបទពិសោធន៍ហិរញ្ញវត្ថុរយៈពេល 15 ឆ្នាំ ព្រមទាំងបទពិសោធន៍ដ៏សំបូរបែបនៅក្នុងប្រតិបត្តិការវិនិយោគ សហព័ន្ឋ JU SHI នៃហុងកុង ផ្តល់នូវឱកាសវិនិយោគដ៏ល្អបំផុត និងឈានមុខគេសម្រាប់សហគ្រាស និងអ្នកវិនិយោគ៕

March 31, 2018

ទាំងនេះជាអ្វីដែលអ្នកត្រូវតែដឹងអំពីបច្ចេកវិទ្យា Dual Inverter របស់ម៉ាស៊ីនត្រជាក់ LG

របកគំហើញ និងការច្នៃប្រឌិតថ្មីៗ ជាមួយការផ្លាស់ប្តូរ ។ ក្រុមហ៊ុន LG បានបោះជំហ៊ានទៅមុខបន្ថែមទៀតដើម្បីធ្វើឱ្យកាន់តែប្រសើរឡើងពីបច្ចេកវិទ្យា Inverter ទៅជា Dual Inverter ដែលប្រើប្រាស់ថាមពលតិចជាងប្រភេទម៉ាស៊ីនត្រជាក់ធម្មតា។

ក្រុមហ៊ុន LG ហៅបច្ចេកវិទ្យា Dual Inverter របស់ខ្លួនជា Dual Cool ទាំងពីរនេះគឺដូចគ្នា !

ម៉ាស៊ីនត្រជាក់ថ្មីជាច្រើនប្រភេទរបស់ក្រុមហ៊ុន LG បានធ្វើការផ្លាស់ប្តូរទៅជាបច្ចេកវិទ្យា Dual Cool បច្ចេកវិទ្យានេះជាមួយនិងកុំប្រេសស័រ Dual Inverter ដែលល្អដាច់គេគឺនាំមុខប្រភេទម៉ាស៊ីនត្រជាក់ ធម្មតាហើយវាអាចធ្វើអោយម៉ាស៊ីនត្រជាក់របស់យើងត្រជាក់កាន់លឿនត្រជាក់បានយូរនិងដំណើរការបានយ៉ាងស្ងាត់ល្អ ។

តើបច្ចេកវិទ្យា Dual Cool របស់ LG វាដំណើរការយ៉ាងដូចម្តេច?

ម៉ាស៊ីនត្រជាក់ LG ជាមួយបច្ចេកវិទ្យា Dual Cool មានម៉ូទ័របង្វិលល្បឿនទ្វេរដងដែលមានប្រេកង់បង្វិលយ៉ាងធំ ។ នេះធានាបាននូវល្បឿនត្រជាក់កាន់តែលឿននិងប្រសិទ្ធភាពថែមទៀតក៏ដូចជាការកាត់បន្ថយកំរិតសំលេង។ វាតែងតែកែតម្រូវល្បឿនរបស់ Compressor ដើម្បីរក្សាកម្រិតសីតុណ្ហភាពដែលលើសពីនេះទៅទៀត បច្ចេកវិទ្យារក្សាស្ថេរភាពអគ្គីសនីរបស់ក្រុមហ៊ុន LG នឹងមិនត្រឹមតែជួយអតិថិជនក្នុងការសន្សំលុយដែលចំណាយទៅលើអគ្គីសនីប៉ុណ្ណោះទេប៉ុន្តែថែមទាំងជួយបង្កើនសោភ័ណភាពនៃបន្ទប់ផងដែរ។ ការនាំមុខក្នុងការប្រកួតប្រជែងនេះក្រុមហ៊ុន LG ក៏នឹងផ្តល់ជូននូវការធានារយៈពេល 10 ឆ្នាំលើ Compressor ផងដែរ។

អត្ថប្រយោជន៍របស់បច្ចេកវិទ្យា Dual Cool

ត្រជាក់លឿន

ល្បឿននិងដំណើរការរបស់កុំប្រេសស័រគឺកាន់តែលឿននិងមានអនុភាពកាន់តែខ្លាំងធ្វើអោយ ម៉ាស៊ីនត្រជាក់វាត្រជាក់លឿនជាងប្រភេទម៉ាស៊ីនត្រជាក់ធម្មតា។

អ្នកប្រើប្រាស់មានផាសុកភាព

ល្បឿនរបស់ Dual Inverter កុំប្រេសស័រគឺតែងតែកែតម្រូវនិងផ្លាស់ប្តូរដើម្បីរក្សារសីតុណ្ហភាពដែល យើងចង់បានដែលមានសីតុណ្ហភាពចុះឡើងទាបបំផុត។

កាត់បន្ថយការចំណាយលើប្រតិបត្តិការ

បច្ចេកវិទ្យា Dual Cool ធ្វើអោយការចំណាយអគ្គីសនីកាន់តែតិច ហើយរក្សាប្រសិទ្ធិភាពកម្រិតខ្ពស់ ដើម្បីផ្តល់នូវម៉ាស៊ីនត្រជាក់ប្រភេទសន្សំសំចៃ។

សំលេងស្ងាត់ល្អ

នេះវាធ្វើអោយម៉ាស៊ីនត្រជាក់ដំណើរការក្នុងកម្រឹតសំលេងទាបបំផុត ដោយបច្ចេកវិទ្យាកង្ហារវៀចរបស់ LG និងបច្ចេកវិទ្យា Dual Inverter កុំប្រេសស័រ ដែលគ្មានសំលេងរំខាន ។

លក្ខណះពិសេស 4 ដំណាក់កាលសន្សំសំចៃអគ្គីសនី

ការធ្វើអោយសីតុណ្ហភាពក្នុងផ្ទះត្រជាក់វាចំណាយច្រើនជាពិសេសនៅរដូវក្តៅតែម្តង ម៉ាស៊ីនត្រជាក់ LG ជៀសវាងការចំណាយនេះ។ហើយសន្សំសចៃអគ្គីសនីដោយទទួលយកអត្ថប្រយោជន៍ពីមុខងារគ្រប់គ្រងអគ្គីសនី។ប្រសិទ្ធិភាពមុខងារនេះវាកំណត់ថាមពលប្រើប្រាស់ពី 40% ទៅ 80% នៃការប្រើប្រាស់ធម្មតា និងសន្សំសំចៃអគ្គីសនីរហូតដល់ 70% ។

អតិថិជនទាំងអស់អាចអញ្ជើញមកទស្សនានៅការដាក់តាំងបង្ហាញម៉ាស៊ីនត្រាជាក់ LG Dual Cool ស៊េរីថ្មីនេះបាននៅគ្រប់ហាងលក់គ្រឿងអេឡិចត្រូនិចដែលជាអ្នកចែកចាយលក់បន្តរបស់ក្រុមហ៊ុន G Gear និងហាង LG BrandShop គ្រប់សាខាទាំងអស់៕

March 30, 2018

ស្រាបៀរ HEINEKEN និង EDM CAMBODIA មានមោទនភាពសូមនាំជូនកម្មវិធី“RAVEGROUND 3.0” ជាកម្មវិធីរាំរែកដ៏ធំបំផុតនៅលើទីវាល

ភ្នំពេញ៖ ស្រាបៀរ Heineken ដែលជាស្រាបៀរគុណភាពលំដាប់ថ្នាក់អន្តរជាតិដ៏ខ្ពស់បំផុតក្នុងពិភពលោក និងក្រុម EDM Cambodia រួមសហការជាមួយក្រុមហ៊ុនជំនាញរៀបចំពិធីការ និង ពិព័រណ៏ SlickBooth Events & Public Relations នឹងរៀបចំកម្មវិធីរាំរែកមួយដ៏គួរជាទីចាប់អារម្មណ៍។ កម្មវិធីនេះបានត្រឡប់មកវិញសាជាថ្មីម្តងទៀតហើយ ដែលមានឈ្មោះថា ” Raveground 3.0″។

កម្មវិធី “Raveground 3.0” គឺជាកម្មវិធីរាំរែកដ៏ធំបំផុតនៅក្នុងព្រះរាជាណាចក្រកម្ពុជា។ កម្មវិធីនេះនឹងនាំមកជូនលោកអ្នកនូវបទពិសោធន៍រាំរែកដ៏វិសេសវិសាលជាមួយនឹងតន្ត្រីអេឡិចត្រូនិចសុទ្ធសាធប្រកបដោយគុណភាពខ្ពស់ និងផលិតកម្មលំដាប់ថ្នាក់ពិភពលោកពីក្រុម Three6 ព្រមទាំងការសម្តែងពិសេសដ៏អស្ចារ្យ។

សម្រាប់ឆ្នាំនេះ កម្មវិធីនេះប្រព្រឹត្តធ្វើឡើងនៅសណ្ឋាគារកាំបូឌីយ៉ាណានៅថ្ងៃសៅរ៍ទី 31 ខែមីនាចាប់ពីម៉ោង 4 រសៀលដល់ម៉ោង 11 យប់។ ក្រុម EDM Cambodia ទើបតែបានបង្ហើបឱ្យដឹងថា ANGEMI គឺជាឌីជេវ័យក្មេងដែលមានទេពកោសល្យ និងជាផលិតករដែលមានដើមកំណើតនៅប្រទេសអ៊ីតាលី។ ក្នុងឆ្នាំ 2016 គាត់បានបង្ហាញខ្លួនជាលើកដំបូងនៅក្នុងកម្មវិធី Tomorrowland ហើយមួយឆ្នាំក្រោយមកគាត់បានសម្តែងនៅក្នុងកម្មវិធី Mainstage of Tomorrowland! នេះគឺជាការសម្តែងលើកដំបូងរបស់គាត់នៅក្នុងព្រះរាជាណាចក្រកម្ពុជា ហើយយើងពិតជាអន្ទះសារចង់ចូលរួមកម្មវិធីនេះដែលនឹងជាកម្មវិធីដ៏ល្អមួយ!

យើងមានមោទនភាពសូមនាំជូនលោកអ្នកនូវក្រុម MAKE YOU FREAK មកពីប្រទេសថៃ! ឌីជេ T.Vinn និង MC Lingofking គឺជាសមាជិកពីរនាក់ក្នុងក្រុម MAKE YOU FREAK ដែលល្បីខាងផ្តល់ឈុតតន្ត្រីថាមពលខ្ពស់ជាមួយនឹងជម្រើសបទភ្លេងចម្រុះ។ ក្រុមនេះបានលេងនៅក្នុងកម្មវិធីធំៗដូចជាពិធីបុណ្យតន្ត្រីសង្ក្រាន្ត S2O, កម្មវិធី Waterzonic, កម្មវិធី Full Moon Party និងកម្មវិធីជាច្រើនទៀត។ មិនតែប៉ុណ្ណោះក្រុមនេះបានដើរតួនាទីជាអ្នកគាំទ្រតារាសំខាន់ៗមួយចំនួនដូចជា Martin Garrix, Don Diablo, Yellow Claw ជាដើម។

ឌីជេ Maily ដែលជាអ្នកឈ្នះជ័យលាភីក្នុងកម្មវិធី Pioneer Digital Battle ត្រឡប់មកចូលរួមក្នុងកម្មវិធី RAVEGROUND វិញបន្ទាប់ពីអវត្តមានពីកម្មវិធី RAVEGROUND កាលពីឆ្នាំមុន។ ជាមួយនឹងជំនាញម៉ិចភ្លេងដ៏ល្អឥតខ្ចោះ ឌីជេរូបនេះអាចធ្វើឱ្យទស្សនិកជនរំភើបរីករាយ និងសប្បាយពេញមួយម៉ោង។

Vutha x Yoku គឺជាក្រុមសមាជិកពីរនាក់ដែលល្បីខាងឈុតតន្ត្រីថាមពលខ្ពស់ និងការសម្តែងប្លែកៗគ្រប់កម្មវិធីដែលក្រុមនេះបានចូលរួម។ ដូចដែលអ្នករាល់គ្នារំពឹងទុកថា ក្រុមនេះនឹងប្រឹងប្រែងឱ្យអស់ពីសមត្ថភាពដើម្បីសម្តែងឱ្យលើសពីការរំពឹងទុករបស់អ្នករាល់គ្នា ហើយ Vutha បាននិពន្ធបទចម្រៀងថ្មីៗមួយចំនួនដើម្បីត្រៀមសម្តែងសម្រាប់កម្មវិធីរាត្រីដ៏អស្ចារ្យនេះ។

DJ Lin គឺជា DJ ថ្មីមួយរូបដែលបានបញ្ចប់វគ្គ DJ នៅ DJ Academy។ គាត់មានជំនាញខាង mix បទដែលមានចង្វាក់ខុសៗ នៅក្នុង set របស់គាត់។ គាត់នឹងមក DJ នៅ Raveground។

ក្រុម Make You Freak មកពីប្រទេសថៃ និងឌីជេល្បីៗជាច្រើនរូបប្រចាំព្រះរាជាណាចក្រកម្ពុជានឹងធ្វើការសម្តែងរួមគ្នាលើឆាកនៃកម្មវិធីនេះ។ ចំពោះការសម្តែងដ៏អស្ចារ្យនេះ យើងក៏នឹងឃើញក្បាច់រាំពិសេសៗដោយក្រុមរាំមកពីក្រៅប្រទេស និងក្រុម Universo Robot Team of Pyrotechnics ដែលធ្វើការសម្តែងជាមួយនឹងបច្ចេកវិទ្យា LED ដ៏អស្ចារ្យដែលធ្វើឱ្យទស្សនិកជនមានការភ្ញាក់ផ្អើល។

សណ្ឋាគារកាំបូឌីយ៉ាណាជាកន្លែងល្អបំផុតនៅក្នុងទីក្រុងសម្រាប់រៀបចំព្រឹត្តិការណ៍ពិសេសនេះ។ ទីធ្លាខាងក្រៅដែលបានកែលម្អជាថ្មីមានឆាកទំហំ 22 ម៉ែត្រ និងជាទីកន្លែងសម្រាប់រៀបចំកម្មវិធីផ្សេងៗយ៉ាងមានសុវត្ថិភាព ហើយអាចទទួលភ្ញៀវបានរាប់ពាន់នាក់។ សណ្ឋាគារនេះក៏មានកន្លែងដើរកម្សាន្តដ៏ធំមួយដែលមានទីវាលដ៏ធំដែលអាចរៀបចំព្រឹត្តិការណ៍ធំៗដូចជាកម្មវិធីប្រគំតន្ត្រី កម្មវិធីតាំងពិព័រណ៍ ពិធីអាពាហ៍ពិពាហ៍ និងកម្មវិធីពិសេសផ្សេងទៀតដែលលោកអ្នកចង់រៀបចំ។

កម្មវិធីនេះនឹងក្លាយជាបទពិសោធន៍ប្លែកអស្ចារ្យមួយក្នុងការកម្សាន្តសប្បាយរីករាយជាមួយនឹងពិធីជប់លៀង និងតន្ត្រី។ សូមកុំខកខានរំលងឱកាសដ៏កម្រនេះ! តម្លៃសំបុត្រ 15 ដុល្លារថែមជូនស្រាបៀរ Heineken មួយកំប៉ុង។ សូមតាមដានព័ត៌មានលើហ្វេសប៊ុក ឬ អញ្ជើញទៅទិញសំបុត្រនៅសណ្ឋាគារកាំបូឌីយ៉ាណាដោយផ្ទាល់។

ដើម្បីស្វែងយល់បន្ថែមអំពីព្រឹត្តិការណ៍ Heineken នៅកម្ពុជា សូមចូលមើលទំព័រហ្វេសប៊ុកផ្លូវការ៖ www.facebook.com/heineken/

#Heineken #OpenYourWorld #Cambodia

សូមរីករាយទទួលទានស្រាបៀរ Heineken ដោយការទទួលខុសត្រូវ

March 30, 2018

Category: PR