ភ្នំពេញ៖ គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី បានក្លាយជាសមាជិកធនាគារស៊ាងហៃពាណិជ្ជ និងសន្សំ (The Shanghai Commercial & Savings Bank, Ltd.) ហៅកាត់ថាធនាគារ អេស ស៊ី អេស ប៊ី។ ថ្នាក់ដឹកនាំទាំងពីរស្ថាប័នជឿជាក់ថា ការចូលជាសមាជិកគ្រួសារតែមួយនេះនឹងធ្វើឱ្យ អេ អឹម ខេ ផ្លាស់ប្តូរមុខមាត់ថ្មីក្លាយជាគ្រឹះស្ថានមីក្រូហិរញ្ញវត្ថុមួយដែលឈានមុខគេនៅប្រទេសកម្ពុជាក្នុងពេលអនាគត ជាពិសេសគ្រួសារមួយនេះនឹងជួយលើកកម្ពស់វិស័យធនាគារនៅកម្ពុជាផងដែរ។
លោក John Yung សមាជិកក្រុមប្រឹក្សាភិបាល EVP & CIO នៃធនាគារ អេស ស៊ី អេស ប៊ី បានមានប្រសាសន៍ថា “ឥឡូវនេះយើងបានក្លាយជាគ្រួសារតែមួយ។ យើងដឹងហើយថា អេស ស៊ី អេស ប៊ី ជាធនាគារមួយដែលបានបង្កើតឡើងនៅក្នុងឆ្នាំ១៩១៥ ដូចនេះយើងមានទាំងបទពិសោធន៍ ចំណេះ ជំនាញ លើវិស័យហិរញ្ញវត្ថុយូរឆ្នាំកមកហើយ យើងនឹងនាំយកបទពិសោធន៍ទាំងនេះមកជួយ អេ អឹម ខេ ដោយផ្តោតសំខាន់ទៅលើការផ្តល់សេវាហិរញ្ញវត្ថុដ៏សម្បូរបែបដល់វិស័យឯកជន អាជីវកម្មខ្នាតតូច និងមធ្យមនៅកម្ពុជា ជាពិសេសប្រជាពលរដ្ឋដែលមានចំណូលទាបរស់នៅតំបន់ដាច់ស្រយាល។ យើងជឿថា នៅពេលដែលពួកគាត់ទទួលសេវាហិរញ្ញវត្ថុទាន់ពេល និងសមស្របពីយើង គាត់នឹងយកកម្ចីទាំងនោះទៅពង្រីកការរកស៊ី ឬរបរដំណាំដាំដុះរបស់គាត់ដែលជាកត្តាមួយជួយជម្រុញឱ្យសេដ្ឋកិច្ចនៅក្នុងប្រទេសមានភាពរីកចម្រើនមួយកម្រិតទៀត។
“បុគ្គលិកថ្នាក់គ្រប់គ្រង ក្រុមប្រឹក្សាភិបាល និងម្ចាស់ភាគហ៊ុន អេ អឹម ខេ ទាំងអស់មានសេចក្តីសោមនស្សរីករាយយ៉ាងខ្លាំងដោយ អេ អឹម ខេ និង អេស ស៊ី អេស ប៊ី បានក្លាយជាសមាជិកគ្រួសារតែមួយ។ ផ្អែកលើទស្សនវិស័យ និងបេសកកម្មរបស់ស្ថាប័នទាំងពីរគឺមានភាពដូចគ្នា ដែលជួយដល់ប្រជាពលរដ្ឋមានចំណូលទាបភាគច្រើន ក្នុងគោលបំណងធ្វើឱ្យប្រសើរឡើងនូវជីវភាពរស់នៅរបស់ពួកគេ តាមរយៈការផ្តល់សេវាមីក្រូហិរញ្ញវត្ថុសមស្រប និងឋិតថេរ។ ដូចនេះយើងសង្ឃឹមយ៉ាងមុតមាំថា អេស ស៊ី អេស ប៊ី នឹងធ្វើឱ្យ អេ អឹម ខេ រីកចម្រើនមួយកម្រិតទៀត” ប្រសាសន៍របស់ លោក Tanmay Chetan ប្រធានក្រុមប្រឹក្សាភិបាល និងជាប្រធានអគ្គនាយកនៃគ្រឹះស្ថានមីក្រូហិរញ្ញវត្ថុអាហ្គូរ៉ា។
វិស័យធនាគារនៅប្រទេសកម្ពុជាមានការរីកចម្រើនគួរឱ្យកត់សំគាល់ក្នុងរយៈពេលប៉ុន្មានឆ្នាំចុងក្រោយនេះ។ បើយោងតាមរបាយការណ៍របស់ធនាគារជាតិនៃកម្ពុជាបានបង្ហាញថា នៅពេលបច្ចុប្បន្នប្រទេសកម្ពុជាមានធនាគារពាណិជ្ជចំនួន៣៩ ធនាគារឯកទេសចំនួន១៥ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើចំនួន៧ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើចំនួន៧០ និងស្ថាប័នផ្តល់ឥណទានជនបទចំនួន៣០។ មានធនាគារ និងគ្រឹះស្ថានមីក្រូហិរញ្ញវត្ថុធំៗមួយចំនួនបាន និងកំពុងតែធ្វើបច្ចុប្បន្នភាពផលិតផល និងសេវាកម្មរបស់ខ្លួនដែលមានភាពបត់បែន និងទាន់សម័យ។
លោក គា បូរាណ ប្រធាននាយកប្រតិបត្តិ អេ អឹម ខេ បានមានប្រសាសន៍ថា “យើងមានចិត្តសប្បាយរីករាយយ៉ាងខ្លាំងដែលបានក្លាយជាសមាជិករបស់ អេស ស៊ី អេស ប៊ី។ ឥឡូវនេះ អេ អឹម ខេ និង អេស ស៊ី អេស ប៊ី គឺជាគ្រួសារតែមួយ មានគោលដៅតែមួយ ហើយយើងនឹងរឹងមាំនៅថ្ងៃអនាគត។ យើងដឹងហើយថាវិស័យធនាគារនៅប្រទេសកម្ពុជានាពេលបច្ចុប្បន្នបានដើរដល់របត់មួយដែលប្រើប្រាស់ប្រព័ន្ធ ឌីជីថល ដែលតម្រូវឱ្យធនាគារ និងគ្រឹះស្ថានមីក្រូហិរញ្ញវត្ថុវិនិយោគទៅលើបច្ចេកវិទ្យាថ្មីដើម្បីធ្វើឱ្យសេវាហិរញ្ញវត្ថុរបស់ខ្លួនមានភាពបត់បែន និងសម្បូរបែប។ ក្លាយជាសមាជិក អេស ស៊ី អេស ប៊ី យើងមិនត្រឹមតែទទួលបានបទពិសោធន៍ ចំណេះ ជំនាញ នោះទេ ប៉ុន្តែជាមួយគ្នានេះដែរយើងក៏នឹងទទួលបានប្រភពទុនក្នុងការវិនិយោគផ្សេង។ ខ្ញុំមានសុទិដ្ឋិនិយមថា ពេលក្លាយជាសមាជិក អេស ស៊ី អេស ប៊ី នឹងធ្វើឱ្យ អេ អឹម ខេ កាន់តែរឹងមាំទៅថ្ងៃអនាគត។
អំពី អេ អឹម ខេ
អេ អឹម ខេ គឺជាគ្រឹះស្ថានដែលឈានមុខគេលើវិសាលភាពប្រតិបត្តិការ និងចំនួនអតិថិជនប្រាក់កម្ចី។ គិតត្រឹមខែកញ្ញា ឆ្នាំ២០១៨នេះ អេ អឹម ខេ មានអតិថិជនចំនួនជាង ៨៣ ម៉ឺននាក់ ជាមួយនឹងផលប័ត្រប្រាក់កម្ចីជាង ២៤៤ លានដុល្លារអាមេរិក និងប្រាក់បញ្ញើជាង ១៤៣ លានដុល្លារអាមេរិក មានការិយាល័យប្រតិបត្តិការចំនួន ១៤៩ កន្លែង និងមានភ្នាក់ងារជាង ៣.៥០០ កន្លែងនៅទូទាំងប្រទេស។ អេ អឹម ខេ មានផលិតផល និងសេវាកម្មជាច្រើនកំពុងផ្តល់ជូនអតិថិជនដូចជា៖ សេវាប្រាក់កម្ចី ប្រាក់សន្សំ ផ្ទេរប្រាក់ក្នុង និងក្រៅប្រទេស សេវាទូទាត់វិក្កយបត្រ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATMs/CDMs) ។
អំពី អេស ស៊ី ប៊ី ស៊ី
ធនាគារពាណិជ្ជកម្ម និងសន្សំសៀងហៃ ត្រូវបានបង្កើតឡើងនៅទីក្រុងសៀងហៃ ឆ្នាំ ១៩១៥ ក្នុងគោលបំណងដើម្បីលើកកម្ពស់សង្គម គាំទ្រផ្នែកឧស្សាហកម្ម និងពាណិជ្ជកម្មអន្តរជាតិ។ ធនាគារ អេស ស៊ី អេស ប៊ី ត្រូវបានទទួលស្គាល់យ៉ាងទូលំទូលាយពីសំណាក់សហគ្រាសធុនតូច និងមធ្យមទូទាំងពិភលលោក អំពីសេវាហិរញ្ញប្បទានពាណិជ្ជកម្មនិងសេវាផ្ទេរប្រាក់ក្រៅប្រទេសប្រកបដោយប្រសិទ្ធភាព។ ជាមួយបុត្រសម្ព័ន្ធនៃធនាគារពាណិជ្ជសៀងហៃ អិលធីឌី ធនាគារ អេស ស៊ី អេស ប៊ី គ្រប់គ្រងទ្រព្យសកម្មសរុបចំនួនជាង ៥៨ ពាន់លានដុល្លារ និងដើមទុនជាង ១,៣ ពាន់លានដុល្លារអាមេរិក និងមូលធនរបស់ម្ចាស់ភាគហ៊ុនសរុបជាង ៥,៥ពាន់លានដុល្លារអាមេរិក។
ធនាគារ អេស ស៊ី អេស ប៊ី មានបុគ្គលិកជាង ៤,០០០ នាក់ និងមានការិយាល័យប្រតិបត្តិការចំនួន ៤៤៧ ទូទាំងពិភពលោក។ អេស ស៊ី អេស ប៊ី មាន ៦៩ សាខានៅតៃវ៉ាន់ ដែលមានបុគ្គលិកជាង ២,៤០០ នាក់ និងមាន ៣ សាខាផ្សេងទៀតនៅហុងកុង វៀតណាម និងសឹង្ហបូរី និងមានការិយាល័យតំណាង ៣ នៅប្រទេសថៃ កម្ពុជា និងឥណ្ឌូនេស៊ី។ យើងមានការិយាល័យប្រតិបត្តិការចំនួន ៤៥ សាខា នៅហុងកុង និង៧សាខាទៀតនៅក្រៅប្រទេសដូចជា៖ Shanghai, Shenzhen, Shanghai Pilot Free Trade Zone, London, New York, San Francisco, and Los Angeles។
សម្រាប់ព័ត៌មានបន្ថែម៖
លោកស្រី សូរិនច័ន្ទ ស៊ូសាណា នាយិកាប្រតិបត្តិទីផ្សារ និងទំនាក់ទំនងអាសយដ្ឋាន៖ អគារ ២៨៥ មហាវិថី យោធពលខេមរៈភូមិន្ទ (២៧១) សង្កាត់ទំនប់ទឹក ខណ្ឌចំការមន រាជធានីភ្នំពេញ
ប្រអប់សំបុត្រលេខ ៤៨០
ទូរស័ព្ទលេខ៖ ០៩៣ ៥៥៤ ៥៥៥/០២៣ ៩៩៣ ០៦២
សារអេឡិចត្រូនិក៖ [email protected]
