អន្តរជាតិ - La Reine Media

ឆេះស្ពានបុរាណអាយុកាលជាង ៩០០ ឆ្នាំ នៅ ប្រទេសចិន

ស្ពាន Wan’an ជាស្ពានដែលមានដំបូលធ្វើពីឈើ ស្ថិតនៅក្នុងខេត្ត Fujian ប្រទេសចិន និងមានប្រវត្តិជាង ៩០០ ឆ្នាំ ត្រូវបានលេបត្របាក់ដោយអគ្គិភ័យ នាំឱ្យសមត្ថកិច្ចក្នុងតំបន់បើកការស៊ើបអង្កេតរកមូលហេតុ។

ប្រភពព័ត៌មានពី ប្រទេសចិន បានឱ្យដឹងថា ស្ពាន Wan’an នៅទីរួមស្រុក Changqiao ស្រុក Pingnan នៃខេត្ត Fujian ត្រូវបានភ្លើងឆាបឆេះកាលពីព្រលប់ថ្ងៃទី ០៦ សីហា និងត្រូវបានពន្លត់ក្រោយភ្លើងឆេះបានជាង ១ ម៉ោង។

ស្ពានបុរាណនេះបានស្រុតរលំ បន្ទាប់ពីត្រូវអគ្គិភ័យឆាបឆេះ។ សំណាងល្អ ពុំមានមនុស្សស្លាប់ ឬរងរបួសនៅក្នុងហេតុការណ៍នេះ។ អាជ្ញាធរក្នុងតំបន់ បានបង្កើតក្រុមស៊ើបអង្កេតមួយដើម្បីស្រាវជ្រាវរកមូលហេតុនៃករណីអគ្គិភ័យ។

ស្ពានបុរាណ Wan’an មានប្រវត្តិជាង ៩០០ ឆ្នាំ ត្រូវបានកសាងក្នុងរាជវង្សសុងខាងជើង។ ស្ពាននេះធ្លាប់បានឆេះម្ដងរួចហើយកាលពីរជ្ជកាល ព្រះចៅអធិរាជកាងស៊ី នៃរាជវង្ស ឈីង និងត្រូវបានសាងសង់ឡើងវិញក្នុងឆ្នាំ ១៧៤២ ក្នុងរជ្ជកាលស្ដេច ឆៀនឡុង ហើយត្រូវបានជួសជុលច្រើនលើកនៅក្នុងរជ្ជកាលបន្តបន្ទាប់។

ស្ពាន Wan’an ក៏ជាស្ពានបុរាណមានដំបូលធ្វើពីឈើវែងជាងគេនាបច្ចុប្បន្ននៅ ប្រទេសចិន។ ស្ពាននេះឆ្លងកាត់ទន្លេ Changqiao នេះ មានប្រវែង ៩៨.២ ម៉ែត្រ, ទទឹង ៤.៧ ម៉ែត្រ និងត្រូវបានដាក់បញ្ចូលទៅក្នុងបញ្ជីបេតិកភណ្ឌវប្បធម៌សំខាន់របស់ ចិន កាលពីឆ្នាំ ២០០៦។

https://www.youtube.com/watch?v=r9rYySaGVUQ

August 8, 2022

សភាជាន់ខ្ពស់អាម៉េរិក អនុម័តច្បាប់ចំណាយតម្លៃ ៤៣០ ពាន់លានដុល្លារ

សភាជាន់ខ្ពស់របស់ សហរដ្ឋអាម៉េរិក កាលពីថ្ងៃទី ០៧ សីហា បានអនុម័តសេចក្ដីព្រាងច្បាប់ស្ដីពីការចំណាយលើសុខាភិបាល និងអាកាសធាតុ តម្លៃ ៤៣០ ពាន់លានដុល្លារ ដែលនេះនឹងនាំមកនូវជោគជ័យដ៏សំខាន់សម្រាប់ប្រធានាធិបតី ចូ បៃដិន។

គម្រោងប្រើប្រាស់ថវិកា ៤៣០ ពាន់លានដុល្លារនេះនឹងរួមមាន បណ្ដាខ្ទង់វិនិយោគធំៗបំផុតមិនធ្លាប់មានពីមុនមករបស់ សហរដ្ឋអាម៉េរិក ទៅលើការដោះស្រាយបញ្ហាអាកាសធាតុ ក្នុងនោះ ខ្ទង់ប្រាក់ ៣៧០ ពាន់លានដុល្លារនឹងត្រូវបានប្រើប្រាស់ដើម្បីកាត់បន្ថយឧស្ម័នផ្ទះកញ្ចក់ឱ្យ ៤០% នៅក្នុងឆ្នាំ ២០៣០។

សេចក្ដីព្រាងច្បាប់នេះត្រូវបានគេជឿថា នឹងនាំមកនូវជ័យជម្នះយ៉ាងច្បាស់លាស់សម្រាប់លោក បៃដិន នៅមុនការបោះឆ្នោតពាក់កណ្ដាលអាណត្តិនាចុងឆ្នាំនេះ ព្រមទាំងស្ដារតួនាទីនាំមុខគេរបស់ សហរដ្ឋអាម៉េរិក នៅក្នុងកិច្ចប្រឹងប្រែងទប់ទល់នឹងបម្រែបម្រួលអាកាសធាតុពិភពលោក។

ដោយមានសេចក្ដីព្រាងច្បាប់នេះ ពលរដ្ឋអាម៉េរិក នឹងទទួលបានការអនុគ្រោះពន្ធឡើងដល់ ៧,៥០០ ដុល្លារ នៅពេលទិញរថយន្តអគ្គិសនី បូករួមនឹងការបញ្ចុះតម្លៃ ៣០% នៅពេលដំឡើងផ្ទាំងសូឡានៅលើដំបូលផ្ទះ។

វាក៏នឹងផ្ដល់រាប់លានដុល្លារសម្រាប់កិច្ចប្រឹងប្រែងការពារ និងថែរក្សាព្រៃឈើរបស់ សហរដ្ឋអាម៉េរិក។ ការលើកលែងពន្ធរាប់ពាន់លានដុល្លារក៏នឹងត្រូវបានធ្វើឡើងសម្រាប់វិស័យឧស្សាហកម្មមួយចំនួនដែលបង្កផលប៉ះពាល់ធ្ងន់ធ្ងរដល់បរិស្ថាន ដោយជួយឱ្យក្រុមហ៊ុន រោងចក្រទាំងនោះងាកមកប្រើប្រាស់ថាមពលស្អាត។

សេចក្ដីព្រាងច្បាប់នេះនឹងកាត់បន្ថយការចំណាយក្នុងការថែទាំសុខភាពរបស់ ពលរដ្ឋអាម៉េរិក តាមរយៈកិច្ចព្រមព្រៀងធានារ៉ាប់រង។

សេចក្ដីព្រាងច្បាប់នេះនឹងត្រូវបានបញ្ចូនទៅកាន់ សភាជាន់ទាបអាម៉េរិក ដើម្បីធ្វើការអនុម័តនៅថ្ងៃទី ១២ សីហាខាងមុខ ក្រោយមក នឹងត្រូវបញ្ជូនទៅកាន់ប្រធានាធិបតី ចូ បៃដិន ដើម្បីចុះហត្ថលេខាឱ្យទៅជាច្បាប់៕

August 8, 2022

សាធារណរដ្ឋកូរ៉េ ផ្ដល់ «ទិដ្ឋាការហាត់ការ» ក្នុងវិស័យបច្ចេកវិទ្យាជាន់ខ្ពស់ សម្រាប់និស្សិតបរទេស

កាលពីថ្ងៃទី ០៥ សីហា ក្រសួងយុត្តិធម៌ របស់ សាធារណរដ្ឋកូរ៉េ (កូរ៉េខាងត្បូង) បានឱ្យដឹងថា និស្សិតដែលមកពីសាកលវិទ្យាល័យល្បីឈ្មោះនៅបរទេស នឹងត្រូវបានអនុញ្ញាតឱ្យចូលហាត់ការនៅក្នុងបណ្ដាក្រុមហ៊ុនបច្ចេកវិទ្យាជាន់ខ្ពស់ និងវិទ្យាស្ថានស្រាវជ្រាវរបស់ កូរ៉េខាងត្បូង ទៅតាមកម្មវិធីទិដ្ឋាការថ្មី ដើម្បីជួយបង្កើនសមត្ថភាពប្រកួតប្រជែងរបស់បណ្ដាក្រុមហ៊ុននៅប្រទេសនេះ។

យោងតាមការប្រកាសរបស់ ក្រសួងយុត្តិធម៌កូរ៉េខាងត្បូង កម្មវិធីផ្ដល់ទិដ្ឋាការហាត់ការក្នុងវិស័យបច្ចេកវិទ្យាជាន់ខ្ពស់ (D-10-3) សម្រាប់និស្សិតមកពីសាកលវិទ្យាល័យធំៗនៅបរទេស នឹងមានសុពលភាពចាប់ពីថ្ងៃទី ៨ សីហាខាងមុខ។

ទិដ្ឋាការ D-10-3 នឹងផ្ដល់ជូននិស្សិតដែលសិក្សាជំនាញបច្ចេកវិទ្យាជាន់ខ្ពស់នៅក្នុងសាកលវិទ្យាល័យចំនួន ២០០ ដែលល្អបំផុតក្នុងពិភពលោក ត្រូវបានវាយតម្លៃ ជ្រើសរើសដោយទស្សនាវដ្ដី Time របស់ សហរដ្ឋអាម៉េរិក ឬមកពីសាកលវិទ្យាល័យលំដាប់កំពូលទាំង ៥០០ ដែលដាក់ចំណាត់ថ្នាក់ដោយ QS World University Rankings)។

ក្រៅពីនិស្សិតដែលមានលក្ខខណ្ឌដូចខាងលើ និស្សិតទាំងឡាយដែលបានបញ្ចប់ការសិក្សាផ្នែកជំនាញបច្ចេកវិទ្យាជាន់ខ្ពស់ពីបណ្ដាសាកលវិទ្យាល័យលំដាប់កំពូលៗក្នុងពិភពលោក នៅក្នុងរយៈពេល ៣ ឆ្នាំចុងក្រោយនេះ ក៏នឹងទទួលបានវីសាប្រភេទ D-10-3 នេះដែរ។

ពលរដ្ឋបរទេសទាំងឡាយដែលមានទិដ្ឋាការប្រភេទ D-10-3 អាចចូលហាត់ការងារនៅក្នុងបណ្ដាក្រុមហ៊ុន ឬវិទ្យាស្ថានស្រាវជ្រាវនៅ កូរ៉េខាងត្បូង ក្នុងវិស័យបច្ចេកវិទ្យាជាន់ខ្ពស់ ដែលទាក់ទងនឹងជំនាញមួយចំនួន មានដូចជា បច្ចេកវិទ្យាបន្ទះអេឡិចត្រូនិក (semiconductor), ព័ត៌មានវិទ្យា, គ្រប់គ្រងបច្ចេកវិទ្យា, បច្ចេកវិទ្យាណាតូ, អេឡិចត្រូនិចឌីជីថល និងបច្ចេកវិទ្យាជីវសាស្ត្រ ជាដើម។

រដ្ឋាភិបាលកូរ៉េខាងត្បូង ក៏នឹងអាចពន្យារសុពលភាពនៃការស្នាក់នៅសម្រាប់ពលរដ្ឋបរទេសដែលហាត់ការផ្នែកបច្ចេកវិទ្យាជាន់ខ្ពស់ ដើម្បីជួយឱ្យពួកគេអាចស្វែងរកការងារបានធ្វើនៅ កូរ៉េខាងត្បូង និងជួយដល់ការប្ដូរពីទិដ្ឋការ D-10-3 ទៅជាទិដ្ឋាការពលកម្ម ឬទិដ្ឋាការបើកក្រុមហ៊ុនផងដែរ។

ទោះជាយ៉ាងណាក៏ដោយ រដ្ឋាភិបាលកូរ៉េខាងត្បូង ក៏បានកំណត់ចំនួនអ្នកហាត់ការដែលជាពលរដ្ឋបរទេស ក្នុងអត្រាមិនឱ្យលើសពី ២០% ធៀងនឹងបុគ្គលិកសរុបនៅក្នុងបណ្ដាក្រុមហ៊ុនក្នុងស្រុក៕

August 6, 2022

មជ្ឈិមបូព៌ា បង្កើនការផលិតឧស្ម័នដើម្បីបំពេញតម្រូវការពិភពលោក

មជ្ឈិមបូព៌ា ដែលជាតំបន់នាំចេញប្រេងរ៉ែលំដាប់កំពូលរបស់ពិភពលោក កំពុងរកវិធីបង្កើនការផលិត និងនាំចេញឧស្ម័នធម្មជាតិ នៅពេលតម្រូវការចំពោះថាមពលប្រភេទនេះនឹងកើនឡើងនៅក្នុងប្រទេស ក៏ដូចជានៅទូទាំងសកលលោកនាប៉ុន្មានឆ្នាំខាងមុខ។

ទំព័រ oilprice.com បានចុះផ្សាយថា កាតា ដែលជាប្រទេសនាំចេញឧស្ម័នធម្មជាតិរាវ (LNG) ធំជាងគេមួយក្នុងពិភពលោក បាននាំមុខគេក្នុងវិស័យឧស្ម័ននៅ មជ្ឈិមបូព៌ា ក្នុងរយៈពេលច្រើនឆ្នាំមកហើយ គ្រាដែលបណ្ដាប្រទេសដទៃក្នុងតំបន់ដែលសម្បូរឧស្ម័នធម្មជាតិនេះ បែរជាមិនបានយកចិត្តទុកដាក់ក្នុងការវិនិយោគទៅលើវិស័យនេះ។ ក៏ប៉ុន្តែ ពេលនេះ ប្រទេសទាំងនោះសុទ្ធតែកំពុងចាប់ផ្ដើមប្ដូរផ្លាស់ឥរិយាបថដើម្បីចាប់យកឱកាស ក្នុងពេលតម្លៃឧស្ម័នធម្មជាតិកើនឡើងខ្ពស់។

ក្រុមអ្នកផលិតប្រេងធំៗក្នុងអង្គការ OPEC មានដូចជា អារ៉ាប៊ីសាអូឌីត និងអេមីរ៉ាតអារ៉ាប់រួម (UAE) ជាដើម បាន និងកំពុងបង្កើនបរិមាណឧស្ម័នក្នុងប្រទេស។

ទីផ្សារឧស្ម័នទូទាំងពិភពលោក បានប្រែប្រួលខ្លាំងចាប់តាំងពី រុស្ស៊ី ចូលលុកលុយ អ៊ុយក្រែន។ តម្រូវការចំពោះ LNG ត្រូវបានគេព្យាករថា នឹងកើនឡើងខ្ពស់ខ្លាំងនៅ អឺរ៉ុប នៅពេលទ្វីបនេះ ស្វែងរកវិធីដើម្បីបញ្ចប់ការពឹងផ្អែកលើប្រេង និងឧស្ម័នរបស់ រុស្ស៊ី។ នេះគឺជាកត្តាវិជ្ជមានសម្រាប់បណ្ដាប្រទេសផលិតប្រេងឥន្ធនៈនៅ មជ្ឈិមបូព៌ា សម្រាប់ការបង្កើនបរិមាណឧស្ម័ន LNG។

នៅ ប្រទេសកាតា កាលពីឆ្នាំមុន រដ្ឋាភិបាលបានប្រកាសគម្រោង LNG ធំជាងគេបង្អស់ក្នុងពិភពលោក នោះគឺគម្រោង North Field East (NFE) ដើម្បីបង្កើនការផលិត LNG របស់ប្រទេសនេះ ពី ៧៧ លានតោន ឱ្យឡើងដល់ ១១០ លានតោនជារៀងរាល់ឆ្នាំ។ គម្រោងនេះនឹងចាប់ផ្ដើមការផលិតនៅត្រីមាសទី ៤ ឆ្នាំ ២០២៥ ដោយត្រូវចំណាយប្រាក់វិនិយោគប្រមាណ ២៨.៧៥ ពាន់លានដុល្លារអាម៉េរិក។ ដំណាក់កាលទីពីរនៃការពង្រីកគម្រោងខាងលើ នោះគឺគម្រោង North Field South (NFS) ដែលគ្រោងនឹងបង្កើនការផលិតពី ១១០ លានតោន ដល់ឡើង ១២៦ លានតោនជារៀងរាល់ឆ្នាំ ដោយគ្រោងនឹងផ្ដើមការផលិតចាប់ពីឆ្នាំ ២០២៧។

ក្រៅពី ប្រទេសកាតា បណ្ដាប្រទេសក្នុងតំបន់ មជ្ឈិមបូព៌ា ដទៃទៀតក៏កំពុងពង្រីកសកម្មភាពក្នុងវិស័យផលិត និងនាំចេញឧស្ម័នធម្មជាតិរាវនេះដែរ ក្នុងនោះ ប្រទេសដែលលេចធ្លោជាងគេបន្ទាប់ពី កាតា គឺ អេមីរ៉ាតអារ៉ាប់រួម និង ប្រទេសអូម៉ង់។

August 6, 2022

សហភាពអឺរ៉ុប ដាក់ទណ្ឌកម្មលើ អតីតប្រធានាធិបតីរបស់ អ៊ុយក្រែន

ក្រុមប្រឹក្សាអឺរ៉ុប ដាក់បញ្ចូលអតីតប្រធានាធិបតីរបស់ អ៊ុយក្រែន លោក Viktor Yanukovich និងកូនប្រុសរបស់លោក គឺ Aleksandr ទៅក្នុងបញ្ជីទណ្ឌកម្ម កាលពីថ្ងៃទី ០៤ សីហា។

សហភាពអឺរ៉ុប (EU) បានចោលថា អតីតប្រធានាធិបតីអ៊ុយក្រែន ដើរតួនាទីសំខាន់ក្នុងការ «ធ្វើឱ្យថយចុះ ឬគំរាមកំហែងដល់ការបង្រួមបង្រួមទឹកដី បូរណភាពទឹកដី និងឯករាជ្យភាពរបស់ អ៊ុយក្រែន» ក៏ដូចជា «ស្ថិរភាព និងសន្តិសុខ» របស់ប្រទេសនេះ។

ចំណែក Aleksandr ដែលជាកូនប្រុសរបស់ អតីតប្រធានាធិបតីអ៊ុយក្រែន Yanukovich ត្រូវបានចោទថា «ធ្វើការជួញដូរជាមួយបណ្ដាក្រុមផ្ដាច់ខ្លួន» នៅតំបន់ Donbass។

មុននោះ ក្រុមមនុស្សដែលមានសញ្ជាតិអ៊ុយក្រែនតែមួយ ដែលត្រូវបាន EU ដាក់ទណ្ឌកម្ម គឺជាក្រុមមនុស្សដែលធ្វើការក្នុងរដ្ឋបាលនៅតាមតំបន់ដែល រុស្ស៊ី បានចូលគ្រប់គ្រង បន្ទាប់ពីយុទ្ធនាការយោធាកាលពីថ្ងៃទី ២៤ កុម្ភៈ។

លោក Yanukovich ទទួលបានសិទ្ធិជ្រកកោននៅ ប្រទេសរុស្ស៊ី ក្រោយពីហេតុការណ៍រដ្ឋប្រហារកាលពីឆ្នាំ ២០១៤។ ឆ្នាំ ២០១៩ តុលាការអ៊ុយក្រែន បានកាត់ទោសកំបាំងមុខចំពោះ អតីតប្រធានាធិបតី Yanukovich ឱ្យជាប់ពន្ធនាគារ ១៣ ឆ្នាំ ពីបទក្បត់ជាតិ។

កាលពីខែមីនា ឆ្នាំនេះ សារព័ត៌មានអ៊ុយក្រែន មួយចំនួន បានរាយការណ៍ថា រុស្ស៊ី កំពុងមានគម្រោងលើកបន្តុបលោក Yanukovich ជា ប្រធានាធិបតីអ៊ុយក្រែន ជាថ្មី ប៉ុន្តែ មិនបានបង្ហាញភ័ស្ដុតាងសម្រាប់ការអះអាងនេះ។

អតីតប្រធានាធិបតីអ៊ុយក្រែន លោក Yanukovich មិនទាន់មានប្រតិកម្មអ្វីនៅឡើយ ទាក់ទិននឹងព័ត៌មានខាងលើនេះ៕

August 5, 2022

មេដឹកនាំកំពូលៗ ៧ រូប របស់ក្រុមភេរវករល្បីឈ្មោះ ដែលត្រូវបាន សហរដ្ឋអាម៉េរិក កម្ចាត់ចោល

មេដឹកនាំកំពូលៗ និងល្បីឈ្មោះជាច្រើនរូបរបស់ក្រុមភេរវករធំៗ ត្រូវបានកម្លាំងពិសេសរបស់ សហរដ្ឋអាម៉េរិក កម្ចាត់ចោល រាប់ចាប់តាំងពីឆ្នាំ ២០០៦ ដោយប្រើប្រាស់យុទ្ធសាស្ត្របាញ់ប្រហារពីលើអាកាស ឬឆ្មក់ចូលប្រហារដល់កន្លែងលាក់ខ្លួន។

មេដឹកនាំក្រុមភេរវករដែលត្រូវបាន សហរដ្ឋអាម៉េរិក កម្ចាត់ រួមមានដូចខាងក្រោម ៖

ទី ១ ៖ Abu Musab al-zarqawi

-តួនាទី ៖ មេដឹកនាំ Al Qaeda នៅ ប្រទេសអ៊ីរ៉ាក់
-ពេលវេលាដែលត្រូវបានកម្ចាត់ ៖ ០៧ ឧសភា ២០០៦
-ទីតាំងដែលត្រូវបានកម្ចាត់ ៖ អ៊ីរ៉ាក់

ទី ២ ៖ Osama bin Laden

-តួនាទី ៖ អ្នកបង្កើតអង្គការសកម្មប្រយុទ្ធអ៊ីស្លាមជ្រុលនិយម Al-Qaeda
-ពេលវេលាដែលត្រូវបានកម្ចាត់ ៖ ១១ ឧសភា ២០១១
-ទីតាំងដែលត្រូវបានកម្ចាត់ ៖ ប្រទេសប៉ាគីស្ថាន

ទី ៣ ៖ Hamza bin Laden

-តួនាទី ៖ កូនប្រុសទី ១៥ របស់ Osama bin Laden ដែលគេចាត់ទុកថាជាអ្នកស្នងតួនាទីពីឪពុក
-ពេលវេលាដែលត្រូវបានកម្ចាត់ ៖ ខែកញ្ញា ឆ្នាំ ២០១៩
-ទីតាំងដែលត្រូវបានកម្ចាត់ ៖ ប្រទេសប៉ាគីស្ថាន

ទី ៤ ៖ Abu Bakr al-Baghdadi

-តួនាទី ៖ មេដឹកនាំរបស់ អង្គការរដ្ឋអ៊ីស្លាម (IS) នៅ អ៊ីរ៉ាក់ និង ឡេវ៉ាន (ក្នុងតំបន់មេឌីទែរ៉ាណេខាងកើត)
-ពេលវេលាដែលត្រូវបានកម្ចាត់ ៖ ២៦ តុលា ២០១៩
-ទីតាំងដែលត្រូវបានកម្ចាត់ ៖ ប្រទេសស៊ីរី

ទី ៥ ៖ Abu Ibrahim al-Hashimi al-Qurayshi

-តួនាទី ៖ មេដឹកនាំរបស់ អង្គការរដ្ឋអ៊ីស្លាមនៅ ភាគខាងលិចនៃ ប្រទេសស៊ីរី
-ពេលវេលាដែលត្រូវបានកម្ចាត់ ៖ ០២ កុម្ភៈ ២០២២
-ទីតាំងដែលត្រូវបានកម្ចាត់ ៖ ប្រទេសស៊ីរី

ទី ៦ ៖ Maher al-Agal

-តួនាទី ៖ មេដឹកនាំលំដាប់កំពូលក្នុងការរៀបចំបណ្ដាញរបស់ អង្គការរដ្ឋអ៊ីស្លាម IS នៅខាងក្រៅប្រទេសអ៊ីរ៉ាក់ និង ស៊ីរី
-ពេលវេលាដែលត្រូវបានកម្ចាត់ ៖ ១១ កក្កដា ២០២២
-ទីតាំងដែលត្រូវបានកម្ចាត់ ៖ ប្រទេសស៊ីរី

ទី ៧ ៖ Ayman al-Zawahiri

-តួនាទី ៖ សមាជិកក្រុមប្រឹក្សាពិគ្រោះយោបល់របស់ Al Qaeda, វេជ្ជបណ្ឌិត និងជាជំនួយការរបស់ Osama bin Laden
-ពេលវេលាដែលត្រូវបានកម្ចាត់ ៖ ៣១ កក្កដា ២០២២
-ទីតាំងដែលត្រូវបានកម្ចាត់ ៖ ប្រទេសស៊ីរី

August 5, 2022

ប្រទេសថៃ ៖ រថភ្លើងមួយខ្សែត្រូវគេបាញ់ប្រហារច្រើនគ្រាប់ ពេលកំពុងធ្វើដំណើរ

រថភ្លើងដឹកអ្នកដំណើរ បាងកក-ស៊ុនង៉ៃ កូឡុក (Bangkok – Sungai Kolok) ត្រូវរងគ្រាប់កាំភ្លើងជាច្រើនគ្រាប់នៅវេលាថ្ងៃត្រង់ទី ០៤ សីហា នៅក្នុងស្រុករូសូ (Rueso) ខេត្ត ណារ៉ាធីវ៉ាត់ (Narathiwat) ភាគខាងត្បូងនៃ ប្រទេសថៃ។

លោក Prachaniwat Buasri មកពីក្រុមហ៊ុនផ្លូវដែករដ្ឋថៃ បានឱ្យដឹងថា រថភ្លើងត្រូវបានគេបាញ់ច្រើនគ្រាប់ចំពីខាងមុខក្បាលម៉ាស៊ីន។ ស្នាមគ្រាប់កាំភ្លើងនៅលើកញ្ចក់ផ្នែកខាងមុខរបស់ក្បាលរថភ្លើងបង្ហាញថា ខ្មាន់កាំភ្លើងមានបំណងសម្លាប់អ្នកបើកបរ ប៉ុន្តែសំណាងល្អ ពួកគេមិនបានរងរបួស។

បន្ទាប់ពីហេតុការណ៍បានកើតឡើង ក្រុមហ៊ុនគ្រប់គ្រងផ្លូវដែកខាងលើក៏បានផ្អាកសេវាកម្មដឹកជញ្ជូនពី បាងកក-ស៊ុនង៉ៃ កូឡុក ដើម្បីស៊ើបអង្កេតរកមូលហេតុ។

ក្នុងរយៈពេលប៉ុន្មានថ្ងៃចុងក្រោយនេះ ហេតុការណ៍បាញ់ប្រហារ ការបំផ្ទុះគ្រាប់បែក បានកើតឡើងច្រើនករណីនៅក្នុងតំបន់នានារបស់ ប្រទេសថៃ។ កាលពីថ្ងៃទី ០៣ សីហា មានករណីប្រយុទ្ធគ្នារវាងបុរស ២ ក្រុមនៅក្នុងខេត្ត អ៊ូប៊ុន រ៉ាត់ថានី (Ubon Ratchathani) បណ្ដាលឱ្យមនុស្ស ២ នាក់បាត់បង់ជីវិត និង ៧ នាក់ត្រូវរងរបួស៕

August 5, 2022

ប្រទេសថៃ ៖ គំនិតផ្ដួចផ្ដើមសន្តិភាពថ្មីសម្រាប់តំបន់ភាគខាងត្បូងប្រទេស

ប្រភពព័ត៌មាននៅ រាជធានីបាងកក បានឱ្យដឹងថា ការចរចាសន្តិភាពលើកទី ៥ រវាង អាជ្ញាធរថៃ និង BRN ដែលជាក្រុមផ្ដាច់ខ្លួននៅតំបន់ភាគខាងត្បូងរបស់ប្រទេសនេះ ត្រូវបានធ្វើឡើងនៅ រាជធានីគួឡាឡាំពួ ប្រទេសម៉ាឡេស៊ី ចាប់ពីថ្ងៃទី ១ ដល់ទី ២ សីហា ដោយមាន រាជរដ្ឋាភិបាលម៉ាឡេស៊ី ជាអ្នកសម្របសម្រួល។

ក្នុងការចរចានេះ ភាគីថៃ បានស្នើឱ្យមានបទឈប់ប្រើអំពើហិង្សាក្នុងរយៈពេល ១០៨ ថ្ងៃ។ នេះគឺជាការប្រឹងប្រែងថ្មីបំផុតដើម្បីកាត់បន្ថយអំពើហិង្សានៅតំបន់ចុងទក្សិណរបស់ ប្រទេសថៃ បន្ទាប់ពី គំនិតផ្ដួចផ្ដើមសន្តិភាព Ramadan ដែលក្នុងនោះ ភាគីទាំងពីរយល់ព្រមផ្អាករាល់សកម្មភាពអំពើហិង្សាក្នុងរដូវបុណ្យតមអាហាររបស់អ៊ីស្លាមសាសនិក ចាប់ពីថ្ងៃទី ៣ មេសា ដល់ ១៤ ឧសភា។

យោងតាមឧត្តមសេនីយ៍ Wanlop Rugsanoh ប្រធានគណៈកម្មការនៃកិច្ចការចរចាសន្តិភាពរបស់ ប្រទេសថៃ ដំណាក់កាលមិនមានអំពើហិង្សាដែលត្រូវបានស្នើនេះនឹងអូសបន្លាយពេលពីថ្ងៃទី ១៥ សីហា ដល់ ៣០ វិច្ឆិកា និងត្រូវបានហៅថា គំនិតផ្ដួចផ្ដើមសន្តិភាពរដូវបុណ្យភ្ជុំពុទ្ធសាសនា។ ប៉ុន្តែ គំនិតនេះនឹងត្រូវកែសម្រួលបន្តទៀត មុននឹងមានការឯកភាព។

ឧត្តមសេនីយ៍ Wanlop ក៏បានឱ្យដឹងថា រាជរដ្ឋាភិបាលថៃ ត្រៀមខ្លួនជានិច្ចក្នុងការចរចាសន្តិភាពជាមួយនឹងបណ្ដាក្រុមបះបោរផ្សេងទៀត រួមមានទាំង អង្គការរំដោះឯកភាព Patani (Pulo) ជាក្រុមដែលត្រូវបានគេជឿថា ជាអ្នកនៅពីក្រោយករណីបំផ្ទុះគ្រាប់បែកកាលពីថ្ងៃទី ១៥ មេសាកន្លងទៅ។

យោងតាម អង្គការតាមដានតំបន់ចុងទក្សិណរបស់ថៃ ចាប់តាំងពីការបះបោរបានផ្ទុះឡើងកាលពីឆ្នាំ ២០០៤ មនុស្សជាង ៧,០០០ នាក់បានស្លាប់ និងជាង ១៣,៥០០ នាក់ផ្សេងទៀត ត្រូវរងរបួស នៅក្នុងករណីអំពើហិង្សាដែលកើតមាននៅពាសពេញតំបន់ភាគខាងត្បូងរបស់ ប្រទេសថៃ រួមមានខេត្ត Narathiwat, Pattani និង Yala៕

August 4, 2022

បណ្ដាកោះគ្រប់គ្រងដោយ តៃវ៉ាន់ ដែលនៅកៀកនឹង ចិនដីគោក បំផុត

កោះស្ថិតក្នុងការកាន់កាប់របស់ អាជ្ញាធរក្រុងតៃប៉ិ ដែលស្ថិតនៅក្បែរបំផុតធៀបនឹងទឹកដីដែលគ្រប់គ្រងដោយ អាជ្ញាធរទីក្រុងប៉េកាំង រួមមាន កោះនៅក្នុងប្រជុំកោះ Kinmen, ប្រជុំកោះ Wuqiu និងកោះនៅក្នុងប្រជុំកោះ Matsu។

ទីមួយ ៖ ប្រជុំកោះ Kinmen

Kinmen ឬហៅថា Quemoy គឺជាប្រជុំកោះដែលគ្រប់គ្រងដោយ សាធារណរដ្ឋចិន (ចិនតៃវ៉ាន់) និងស្ថិតនៅភាគនិរតីនៃឆ្នេរសមុទ្ររបស់ សាធារណរដ្ឋប្រជាមានិតចិន (ចិនដីគោក)។ វាស្ថិតនៅចម្ងាយប្រហែល ១០ គីឡូម៉ែត្រ ពីទីក្រុង Xiamen នៃខេត្ត Fujian។ ប្រជាកោះ Kinmen មានចម្ងាយពីឆ្នេររបស់ កោះតៃវ៉ាន់ ប្រហែល ១៨៧ គីឡូម៉ែត្រ ទៅទិសខាងលិច ធៀបនឹង ច្រកសមុទ្រតៃវ៉ាន់។

នៅលើប្រជុំកោះ Kinmen នេះ ធ្លាប់មានការប្រយុទ្ធគ្នាច្រើនលើករវាង កងទ័ពចិនដីគោក និង កងទ័ពចិនតៃវ៉ាន់ ក្នុងនោះ ជម្លោះប្រដាប់អាវុធកាលពីឆ្នាំ ១៩៥៨ មានសភាពធ្ងន់ធ្ងរជាងគេ។

ទីពីរ ៖ ប្រជុំកោះ Wuqiu

Wuqiu (Wuchiu, Wuciou, Ockseu) គឺជាប្រជុំកោះដែលមានកោះសំខាន់ចំនួន ២ នោះគឺ Greater Qiu Islet និង Smaller Qiu Islet ដែលស្ថិតនៅក្នុងច្រកសមុទ្រតៃវ៉ាន់។

ចំពោះរដ្ឋបាល ទីរួមស្រុក Wuqiu ស្ថិតក្នុងការគ្រប់គ្រងរបស់ ចិនតៃវ៉ាន់ និងស្ថិតនៅក្នុងរយៈចម្ងាយពីកំពង់ផែ Taichung របស់ តៃវ៉ាន់ ប្រហែល ១៣៥ គីឡូម៉ែត្រ។ Wuqiu មានចម្ងាយតែ ១៧ គីឡូម៉ែត្រប៉ុណ្ណោះ ធៀបនឹងកោះ Luci (Lusi) ដែលគ្រប់គ្រងដោយ ចិនដីគោក។ ចំណែក កោះ Greater Qiu គឺជាទីតាំងនៃបង្គោលភ្លើងហ្វា Wuqiu របស់ ចិនតៃវ៉ាន់។

ទីបី ៖ ប្រជុំកោះ Matsu

Matsu (Lienchiang) គឺជាប្រជុំកោះដែលមានកោះតូចធំចំនួន ៣៦ នៅ សមុទ្រចិនខាងកើត ដែលគ្រប់គ្រងដោយ ចិនតៃវ៉ាន់ ហើយស្ថិតនៅក្បែរ និងតាមបណ្ដោយឆ្នេរសមុទ្រភាគអាគ្នេយ៍របស់ ចិនដីគោក។

Lienchiang ត្រូវបានបំបែកពី សាធារណរដ្ឋប្រជាមានិតចិន និងស្ថិតក្រោមការគ្រប់គ្រងរបស់ សាធារណរដ្ឋចិន ក្រោយសង្គ្រាមស៊ីរិល កាលពីឆ្នាំ ១៩៤៩៕

August 4, 2022

កងទ័ពតៃវ៉ាន់ បាញ់គ្រាប់បញ្ចេញពន្លឺដើម្បីបណ្ដេញយន្តហោះចិន នៅក្បែរកោះជួរមុខ

អង្គភាពការពារកោះតៃវ៉ាន់ បានបាញ់គ្រាប់បញ្ចេញពន្លឺ ដើម្បីបណ្ដេញយន្តហោះគ្មានមនុស្សបើក នៅតំបន់កោះ Kinmen របស់ តៃវ៉ាន់ ដែលស្ថិតនៅកៀកនឹង ចិនដីគោក។

Chang Zone-sung មេបញ្ជាការកងទ័ពនៅ ប្រជុំកោះ Kinmen បានឱ្យដឹងថា យន្តហោះគ្មានមនុស្សបើក (UAV) មួយគូរបស់ ចិនដីគោក បានចូលមកតំបន់ប្រជុំកោះ Kinmen របស់ តៃវ៉ាន់ ចំនួន ២ លើកជាបន្តបន្ទាប់ កាលពីព្រលប់ថ្ងៃទី ០៣ សីហា។

«ភ្លាមៗនោះ យើងបានបាញ់គ្រាប់បញ្ចេញពន្លឺដើម្បីព្រមាន និងបណ្ដេញ ដោយសារ UAV ទាំងនេះបានចូលមកកាន់តំបន់ហាមឃាត់របស់កោះ។ យើងធ្វើសកម្មភាពទៅតាមដំណាក់កាល ហើយនឹងប្រតិកម្មបើសិន UAV ទាំងនោះបន្តបង្ហាញខ្លួន» ឧត្តមសេនីយ៍ទោ Chang បញ្ជាក់ដូច្នេះ។

យោងតាមលោក Chang យន្តហោះ UAV ទាំងនេះ ត្រូវបានបញ្ជូនមកដើម្បីប្រមូលព័ត៌មានស្ដីពីប្រព័ន្ធការពារសន្តិសុខរបស់ តៃវ៉ាន់ នៅលើកោះជួរមុខដូច Kinmen ជាទីដែលមានការការពារយ៉ាងរឹងមាំ និងស្ថិតនៅក្បែរ ចិនដីគោក បំផុត។

អាជ្ញាធរទីក្រុងប៉េកាំង មិនទាន់មានការអធិប្បាយអ្វីនៅឡើយ ទាក់ទិននឹងព័ត៌មានខាងលើនេះ។

កាលពីសប្ដាហ៍កន្លង អាជ្ញាធរតៃវ៉ាន់ បានឱ្យដឹងថា បានបាញ់គ្រាប់បញ្ចេញពន្លឺដើម្បីព្រមាន UAV ១ គ្រឿងនៅក្បែរប្រជុំកោះ Matsu របស់ តៃវ៉ាន់ ដែលស្ថិតនៅក្បែរខេត្ត Fujiang របស់ ចិនដីគោក។

កងកម្លាំងរបស់ តៃវ៉ាន់ កំពុងស្ថិតក្នុងការប្រុងប្រយ័ត្នខ្ពស់បំផុត នៅពេល ចិនដីគោក ធ្វើសមយុទ្ធយោធាដើម្បីឆ្លើយតបនឹងដំណើរទស្សនកិច្ចនៅ កោះតៃវ៉ាន់ របស់ ប្រធានសភាជាន់ទាបអាម៉េរិក លោកស្រី Nancy Pelosi ដែលបានបណ្ដាលឱ្យភាពតានតឹងនៅ ច្រកសមុទ្រតៃវ៉ាន់ «ឡើងកម្ដៅកាន់តែខ្លាំង»៕

August 4, 2022

Category: អន្តរជាតិ