វីដេអូបង្ហាញត្រាប (simulation) អំពីសេណារីយ៉ូថ្មីមួយដែលត្រូវបានបង្កើតឡើងដោយក្រុមអ្នកស្រាវជ្រាវរបស់ សាកលវិទ្យាល័យ Princeton បង្ហាញថា មនុស្សជាង ៩០ លាននាក់នឹងត្រូវស្លាប់ និងរងរបួសក្នុងអំឡុងពេលតែប៉ុន្មានម៉ោងប៉ុណ្ណោះ បន្ទាប់ពីសង្គ្រាមនុយក្លេអែររវាង រុស្ស៊ី និង សហរដ្ឋអាម៉េរិក បានផ្ទុះឡើង នេះបើតាមទីភ្នាក់ងារសារព័ត៌មាន Independent។
ការបង្ហាញត្រាបអំពីសង្គ្រាមនុយក្លេអែរខាងលើ គឺជាលទ្ធផលនៃការស្រាវជ្រាវមួយរបស់កម្មវិធីវិទ្យាសាស្ត្រ និងសន្តិសុខសកលរបស់ Princeton (SGS)។ វាបង្ហាញថា មនុស្សជាង ៣៤ លាននាក់នឹងស្លាប់ និង ៥៧ លាននាក់រងរបួស នៅក្នុងប៉ុន្មានម៉ោងដំបូងនៃសង្គ្រាមនុយក្លេអែរ នេះមិនទាន់និយាយដល់អ្នកត្រូវធ្លាក់ខ្លួនឈឺ និងបញ្ហាសុខភាពយូរអង្វែងដែលបង្កឡើងដោយអាវុធប្រល័យលោក។
ក្នុងទិដ្ឋភាពដែលបង្កើតឡើងដោយក្រុមអ្នកស្រាវជ្រាវ បង្ហាញថា ខ្សែពន្លឺរាងកោងគឺជាមីស៊ីលបំពាក់ក្បាលគ្រាប់នុយក្លេអែរ ត្រូវបានគូសត្រូវបាញ់សំដៅភាគីជម្លោះ ចំណែតដុំពណ៌សគឺជាគោលដៅដែលត្រូវបានកម្ទេចដោយអាវុធនុយក្លេអែរ។
ការស្រាវជ្រាវនេះត្រូវបានលើកឡើងនៅក្នុងគ្រាដែលស្ថានការណ៍ត្រូវបានគេជឿថា កំពុងតែមានការរត់ប្រណាំងផ្នែកអាវុធប្រល័យលោករវាង រុស្ស៊ី និង សហរដ្ឋអាម៉េរិក ក៏ដូចជាសម្ព័ន្ធមិត្តណាតូ។
ការសន្មត់អំពីការវាយប្រហារនេះត្រូវបានលើកឡើងគឺ «សង្ឃឹមថា ទប់ស្កាត់ការបោះជំហានរបស់ សហរដ្ឋអាម៉េរិក-ណាតូ និង រុស្ស៊ី ក្នុងការបាញ់ព្រមានដោយអាវុធនុយក្លេអែរពីមូលដ្ឋានទ័ពមួយកន្លែងនៅក្បែរទីក្រុង Kaliningrad។ ណាតូ ឆ្លើយតបដោយការវាយប្រហារអាវុធប្រល័យលោកយុទ្ធសាស្ត្រ»។
នៅពេលបន្ទាត់ក្រហមនុយក្លេអែរត្រូវគេរំលង ការប៉ះទង្គិចគ្នានឹងប្រែក្លាយទៅជាសង្គ្រាមនុយក្លេអែរយុទ្ធសាស្ត្រនៅ អឺរ៉ុប។ រុស្ស៊ី ប្រើប្រាស់យន្តហោះ និងមីស៊ីលបំពាក់ក្បាលគ្រាប់នុយក្លេអែរ ៣០០ គ្រាប់ វាយប្រហារទៅលើមូលដ្ឋានទ័ពនានារបស់ ណាតូ។ ណាតូ ឆ្លើយតបដោយគ្រាប់បែកប្រល័យលោកប្រហែល ១៨០ គ្រាប់ទម្លាក់ចុះពីយន្តហោះ។
បន្ទាប់មក ការវាយប្រហាររាប់រយលើកដោយអាវុធនុយក្លេអែរ នឹងត្រូវបានធ្វើឡើងដោយភាគីទាំងពីរ។ ក្នុងវីដេអូ ខ្សែពន្លឺពណ៌ក្រហមគឺជាមីស៊ីលរបស់ រុស្ស៊ី ដែលបាញ់ចេញពីក្រោមទឹក មុនពេលមីស៊ីលពណ៌ខៀវរបស់ សហរដ្ឋអាម៉េរិក ស្រោចទៅលើ រុស្ស៊ី។ ក្រោយមក រុស្ស៊ី វាយប្រហារទៅលើឆ្នេរសមុទ្រអាម៉េរិក។ តមកទៀត ទីក្រុងវ៉ាស៊ីងតោន និង មូស្គូ នឹងវាយប្រហារផ្ដោតទៅលើតំបន់ដែលមានប្រជាជនច្រើន ក្នុងនោះ ទីក្រុងនីមួយៗនឹងត្រូវទទួលរងគ្រាប់បែកនុយក្លេអែរប្រមាណ ១០ គ្រាប់។
យោងតាម SGS វីដេអូនេះគឺយោងទៅលើស្ថានភាពកម្លាំង គោលដៅ និងការគណនាអំពីការស្លាប់ជាក់ស្ដែង។ ប៉ុន្តែ Sam Dudin អ្នកស្រាវជ្រាវប្រចាំវិទ្យាស្ថានស្រាវជ្រាវការពារជាតិ និងសន្តិសុខអង់គ្លេស បានឱ្យដឹងថា សេណារីយ៉ូប្រល័យលោករបស់ SGS មិនងាយនឹងកើតឡើង ព្រោះថា គោលនយោបាយរបស់ សហរដ្ឋអាម៉េរិក ចាប់ពីឆ្នាំ ១៩៥០ គឺការចៀសវាងសង្គ្រាមដោយផ្ទាល់ជាមួយ រុស្ស៊ី។ «មូស្គូ ក៏មិនចង់ធ្វើសង្គ្រាមជាមួយ ណាតូ» លោក Sam Dudin បញ្ជាក់ដូច្នេះ។
VIDEO លោក Sam Dudin បន្ថែមថា សេណារីយ៉ូនេះ ហាក់មិនបានគិតដល់ប្រព័ន្ធការពារដែនអាកាសរបស់ភាគីទាំងពីរ។ ប្រព័ន្ធទាំងនេះនឹងមានឥទ្ធិពលធំធេងដល់ការវាយប្រហារដោយអាវុធនុយក្លេអែរដែលបាញ់ចេញពីយន្តហោះ៕
