អន្តរជាតិ - La Reine Media

រ៉ុក្កែតកម្លាំងខ្លាំងបំផុតក្នុងពិភពលោក ត្រូវបានបាញ់បង្ហោះក្រោយការរង់ចាំរយៈពេលបីឆ្នាំ

(សហរដ្ឋអាម៉េរិក)-ក្រោយការរង់ចាំអស់រយៈពេល 40 ខែ រ៉ុក្កែតរុញច្រានធុនធ្ងន់ Falcon Heavy របស់ក្រុមហ៊ុន SpaceX បានហោះឡើងម្ដងទៀតកាលពីថ្ងៃទី 01 វិច្ឆិកា ដោយប្រើប្រាស់កំណាត់រុញច្រានថ្មីទាំងស្រុង។

រ៉ុក្កែត Falcon Heavy របស់ក្រុមហ៊ុន SpaceX ដែលរួមមានកំណាត់រុញច្រានចំនួន 3 ដំបូងរបស់ Falcon 9 តភ្ជាប់ជាមួយគ្នា បានហោះឡើងពីប្រព័ន្ធបាញ់បង្ហោះ 39A នៅមជ្ឈមណ្ឌលអវកាស Kennedy (KSC) កាលពីព្រឹកថ្ងៃទី 01 វិច្ឆិកា ក្នុងពេលមេឃចុះអ័ព្ទក្រាស់។ រ៉ុក្កែតនេះដឹកទំនិញប្រភេទសម្ងាត់ជាច្រើនមុខឡើងទៅកាន់គន្លងគោចរសម្រាប់កងកម្លាំងអវកាសរបស់ សហរដ្ឋអាម៉េរិក នៅក្នុងបេសកកម្ម USSF-44។

បេសកកម្ម USSF-44 គឺជាការហោះហើរជើងទី 4 របស់ រ៉ុក្កែត Falcon Heavy រាប់ចាប់តាំងពីធ្វើសកម្មភាព និងជាលើកដំបូងចាប់តាំងពីខែមិថុនា 2019។

ជើងហោះហើរដំបូងកាលពីខែកុម្ភៈ 2018 របស់ Falcon Heavy បាននាំយករថយន្ត Tesla Roadster ពណ៌ក្រហមរបស់មហាសេដ្ឋី អ៊ីឡុន ម៉ាស រួមនឹងមនុស្សសិប្បនិម្មិត Starman ដែលត្រូវបានដាក់ឱ្យអង្គុយនៅលើកៅអីអ្នកបើកបរ ឡើងទៅកាន់លំហអវកាសអន្តរភព។ ជើងហោះហើរបន្តបន្ទាប់ចំនួនពីរទៀតរបស់ Falcon Heavy ត្រូវបានធ្វើឡើងកាលពីខែមេសា 2019 ក្នុងបេសកកម្មនាំយកផ្កាយរណបខ្នាតធំ Arabsat-6A ទៅកាន់គន្លងគោចរ និងខែមិថុនា 2019 នៅក្នុងបេសកកម្ម STP-2៕

November 2, 2022

ពលរដ្ឋកូរ៉េខាងត្បូង បារម្ភអំពី «រថភ្លើងអគ្គិសនីក្រោមដីមានហានិភ័យប្រជ្រៀតជាន់គ្នាស្លាប់ដូចកូនផ្លូវនៅ Itaewon»

Lee អាយុ 30 ឆ្នាំ ជាបុគ្គលិកការិយាល័យ មានការពិបាកដកដង្ហើមនៅពេលធ្វើដំណើរលើរថភ្លើងអគ្គិសនីក្រោមដីលេខ 9 នៅ សេអ៊ូល។

«ខ្ញុំមិនអាចដកដង្ហើមបាន។ នេះមិនមែនជាលើកដំបូងដែលខ្ញុំពិបាកដកដង្ហើមនៅពេលទៅធ្វើការដោយជិះរថភ្លើងអគ្គិសនីក្រោមដីនាពេលព្រឹក ប៉ុន្តែការធ្វើដំណើរនៅព្រឹកនេះពិតជាមានសភាពធ្ងន់ធ្ងរ អារម្មណ៍ដូចជាកំពុងស្ថិតក្នុងភាពច្របូកច្របល់» Lee ដែលបានធ្វើដំណើរពីស្ថានីយ Dangsan ទៅកាន់ Sinnonhyeon និយាយដូច្នេះនៅពេលចាកចេញពីរថភ្លើងកាលពីព្រឹកថ្ងៃទី 31 តុលា។

នាងបានឱ្យដឹងថា រថភ្លើងខ្សែលេខ 9 តែងតែលើសចំណុះនៅក្នុងម៉ោងប្រញាប់។ នៅពេលមនុស្សម្នាបន្តប្រជ្រៀតគ្នាចូលទៅក្នុងទូរថភ្លើងដែលកំពុងពេញណែន Lee ចេះតែគិតដល់ហេតុការណ៍ដែលអាចកើតឡើងដូចទៅនឹងករណីប្រជ្រៀតគ្នាស្លាប់រាប់រយនាក់នៅ Itaewon រដ្ឋធានីសេអ៊ូល កាលពីថ្ងៃទី 29 តុលា 2022។

ខាងក្នុងរថភ្លើងអគ្គិសនីក្រោមដីនៅ កូរ៉េខាងត្បូង

«បើទោះជាខ្ញុំមិនមានមុខក្នុងហេតុការណ៍នៅ Itaewon កាលពីយប់នោះ ខ្ញុំនៅតែមានអារម្មណ៍ថាការស្លាប់ដ៏សាហាវអាចកើតឡើងនៅលើរថភ្លើងអគ្គិសនីក្រោមដីនេះ» Lee រៀបរាប់ដូច្នេះ។

កាលពីព្រលប់ថ្ងៃទី 29 តុលាឆ្នាំ 2022 ហេតុការណ៍ដ៏មហាអាក្រក់មួយបានកើតឡើង នៅពេលមនុស្សម្នាចូលរួមពិធីបុណ្យ Halloween ប្រជ្រៀតជាន់គ្នានៅក្នុងផ្លូវតូចមួយនៅទីប្រជុំជន Itaewon បណ្ដាលឱ្យមនុស្សស្លាប់យ៉ាងតិច 156 នាក់ និងរបួស 151 នាក់ គិតត្រឹមថ្ងៃទី 01 វិច្ឆិកា។

ពលរដ្ឋកូរ៉េខាងត្បូង កន្លងមកបានស៊ាំទៅនឹងស្ថានភាពមនុស្សច្រើន ការប្រជ្រៀតគ្នានៅតាមដងផ្លូវក្នុងក្រុង និងក្នុងរថភ្លើងក្រោមដី នេះបើតាម Park Cheong-woong សាស្ត្រាចារ្យមួយរូបមកពីសាកលវិទ្យាល័យ Sejong។ ក៏ប៉ុន្តែ ហេតុការណ៍ខាងលើកំពុងតែជះឥទ្ធិពលអាក្រក់ដល់ជីវភាពប្រចាំថ្ងៃរបស់ប្រជាជនទាំងមូលនៅ កូរ៉េខាងត្បូង។

ហេតុការណ៍ប្រជ្រៀតជាន់គ្នាស្លាប់ជាងរយនាក់នៅ សេអ៊ូល កាលពីថ្ងៃទី 29 តុលា 2022

Lee Song-Kyu ដែលជាមេដឹកនាំរបស់សមាគមអ្នកជំនាញផ្នែកសុវត្ថិភាពរបស់ កូរ៉េខាងត្បូង បានព្រមានថា ហេតុការណ៍ប្រជ្រៀតជាន់គ្នាស្លាប់អាចកើតមាននៅគ្រប់ព្រឹត្តិការណ៍ ឬកម្មវិធីប្រមូលផ្ដុំគ្នាធំ៕

November 2, 2022

កូរ៉េខាងជើងបាញ់ប្លោងមីស៊ីល ធ្វើឱ្យកូរ៉េខាងត្បូងប្រកាសអាសន្ន

កូរ៉េខាងត្បូង បានប្រកាសអាសន្ន និងឈ្លៀសប្រជាជននៅលើកោះ Ulleungdo នៅតំបន់សមុទ្រភាគខាងកើត បន្ទាប់ពីបានឃើញមីស៊ីលរបស់ កូរ៉េខាងជើង ហោះសំដៅមកកោះនេះ។

អគ្គសេនាធិការរួមកូរ៉េខាងត្បូង (JSC) នៅថ្ងៃទី 02 វិច្ឆិកា ប្រកាសថា កូរ៉េខាងជើង បាញ់ប្លោងមីស៊ីលមួយគ្រាប់ដែលមិនទាន់ស្គាល់អត្តសញ្ញាណ សំដៅទៅកាន់សមុទ្រភាគខាងកើត។ ករណីបាញ់ប្លោងនេះកើតឡើងនៅពេលកងទ័ពអាកាសរបស់ សហរដ្ឋអាម៉េរិក និង កូរ៉េខាងត្បូង ធ្វើសមយុទ្ធរួមទ្រង់ទ្រាយធំនៅក្នុងតំបន់ចាប់ពីថ្ងៃទី 31 តុលា ដល់ 04 វិច្ឆិកា។

ក្រុមមន្ត្រីកូរ៉េខាងត្បូង បានប្រកាសអាសន្នថាមានការវាយប្រហារតាមអាសន្ន និងឈ្លៀសមនុស្សនៅលើកោះ Ulleungdo នៅភាគខាងកើតរបស់ ឧបទ្វីបកូរ៉េ។ ក្រុមមន្ត្រីការពារជាតិកូរ៉េខាងត្បូង បានឱ្យដឹងថា មីស៊ីលរបស់ កូរ៉េខាងជើង ហោះសំដៅមកកាន់កោះ Ulleungdo មុនពេលធ្លាក់ទៅក្នុងសមុទ្រ។

មកដល់ពេលនេះ មន្ត្រីកូរ៉េខាងជើង មិនទាន់ប្រកាសព័ត៌មានទាក់ទងនឹងការបាញ់ប្លោងគ្រាប់មីស៊ីលនេះនៅឡើយ។

រដ្ឋមន្ត្រីការបរទេសកូរ៉េខាងជើង កាលពីថ្ងៃទី 01 វិច្ឆិកា បានស្នើឱ្យ អាម៉េរិក និង កូរ៉េខាងត្បូង បញ្ឈប់សកម្មភាពសមយុទ្ធ និងបានព្រមានថា បានត្រៀមខ្លួនរួចរាល់ដើម្បីការពារប្រទេសជាតិ។ កូរ៉េខាងជើង ក៏បានព្រមានថា នឹងពិនិត្យលទ្ធភាពសម្រាប់ការឆ្លើយតបខ្លាំងក្លាជាងមុន។

សម្មភាពយោធារបស់ភាគីនានា កំពុងតែធ្វើឱ្យ ឧបទ្វីបកូរ៉េ «ឡើងកម្ដៅ» នាប៉ុន្មានខែចុងក្រោយនេះ។ កូរ៉េខាងជើង បានបាញ់ប្លោងមីស៊ីលជាច្រើនលើក ដោយលើកមូលហេតុថា ដើម្បីឆ្លើយតបនឹងសមយុទ្ធយោធារបស់ អាម៉េរិក កូរ៉េខាងត្បូង និងជប៉ុន។ ចំណែក សហរដ្ឋអាម៉េរិក និងសម្ព័ន្ធមិត្ត ក៏បានថ្កោលទោសករណីបាញ់ប្លោងមីស៊ីលរបស់ ព្យុងយ៉ាង ដោយចាត់ទុកថា នោះគឺជាសកម្មភាពបង្កហេតុ និងនាំឱ្យមានអស្ថិរភាព ព្រមទាំងបង្កើនការធ្វើសមយុទ្ធរួម៕

November 2, 2022

ក្រុមប្រទេសផលិតប្រេង (OPEC) ព្យាករថា តម្រូវការប្រេងរ៉ែនឹងផ្ទុះការកើនឡើងជាថ្មី

របាយការណ៍ថ្មីរបស់ ក្រុមប្រទេសផលិតប្រេង (OPEC) យល់ថា តម្រូវការប្រេងហ្វូស៊ីល នឹងនៅតែកើនឡើងខ្ពស់ក្នុងរយៈពេលពីរទសវត្សរ៍ខាងមុខ ដោយឡើងដល់ជិត 110 លានធុង/ថ្ងៃនៅក្នុងឆ្នាំ 2040។

OPEC យល់ថា តម្រូវការប្រើប្រាស់ប្រេងនឹងកើនឡើងខ្ពស់នៅពេលចំនួនប្រជាជន និងសេដ្ឋកិច្ចនៅក្នុងបណ្ដាប្រទេសកំពុងអភិវឌ្ឍ រីកចម្រើនខ្លាំង។ អង្គការនេះអះអាងថា តម្រូវការប្រេងក្នុងឆ្នាំ 2025 នឹងឡើងដល់ 105.5 លានធុងជារៀងរាល់ថ្ងៃ ច្រើនជាងប្រហែល 2 លានធុង/ថ្ងៃ ធៀបនឹងការព្យាករដែលបានលើកឡើងកាលពីឆ្នាំកន្លង។ ឆ្នាំ 2021 ពិភពលោកបានប្រើប្រាស់ប្រេង 97 លានធុង/ថ្ងៃ។

ការដែលតម្រូវការប្រេងនៅ ប្រទេសចិន បន្ថយល្បឿនមកវិញ រួមនឹងការចាកចោលឥន្ធនៈហ្វូស៊ីលរបស់ប្រទេសលោកខាងលិច នឹងនាំឱ្យកំណើននៃតម្រូវការប្រេងរ៉ែត្រូវធ្លាក់ចុះ ហើយនឹងចុះទាបបំផុតនៅពាក់កណ្ដាលទសវត្សរ៍ខាងមុខ។ ក៏ប៉ុន្តែ OPEC នៅតែយល់ថា តម្រូវការប្រេងរបស់ពិភពលោលនឹងឡើងដល់ជិត 110 លានធុង/ថ្ងៃ ចាប់ពីឆ្នាំ 2040 កើនឡើងជិត 2 លានធុង/ថ្ងៃ ធៀបនឹងការព្យាករ 108.2 លានធុង/ថ្ងៃដែលពួកគេបានព្យាករកាលពីឆ្នាំ 2021។

OPEC ព្យាករថា ចំនួនប្រជាជនទូទាំងពិភពលោកនឹងកើន 1.6 ពាន់លាននាក់បន្ថែមទៀតចាប់ពីពេលនេះដល់ឆ្នាំ 2045។ 96% នៃកំណើនរបស់ប្រជាជនថ្មីនេះគឺស្ថិតនៅក្នុងបណ្ដាប្រទេសកំពុងអភិវឌ្ឍ។ ដូច្នេះ បើទោះតម្រូវប្រេងរបស់បណ្ដាប្រទេសអ្នកមានក្នុងក្រុម OECD នៅឆ្នាំ 2045 នឹងថយចុះ 10.7 លានធុង/ថ្ងៃ ក៏តម្រូវការប្រេងក្នុងបណ្ដាប្រទេសនៅក្រៅក្រុមនេះ កើន 23.6 លានធុង/ថ្ងៃ។

យោងតាម OPEC ថាមពលហ្វូស៊ីល រួមមានប្រេងរ៉ែ ធ្យូងថ្ម និងឧស្ម័នធម្មជាតិនឹងនៅតែគ្រប់គ្រងទីផ្សារច្រើនទសវត្សរ៍ទៀត។ ថាមពលនេះនឹងកាន់កាប់ប្រហែល 70% ក្នុងចំណោមថាមពលសរុបរបស់ពិភពលោកនៅឆ្នាំ 2045 ដោយថយចុះបន្តិចធៀបនឹង 80% នាបច្ចុប្បន្ន។ ការថយចុះនេះបណ្ដាលមកពីការកាត់បន្ថយការប្រើប្រាស់ធ្យូងថ្ម។ ចំណែកប្រេងឧស្ម័នវិញ នឹងមិនមានការប្រែប្រួលឡើយ។

OPEC គិតថា វិស័យឧស្សាហកម្មថាមពលហ្វូស៊ីលនឹងត្រូវការខ្ទង់ប្រាក់វិនិយោគ 12.1 ទ្រីលាន ( 12,100,000,000,000) ដុល្លារអាម៉េរិក រហូតដល់ឆ្នាំ 2045 ដើម្បីឆ្លើយតបនឹងតម្រូវការ និងធានាសន្តិសុខថាមពលរបស់ពិភពលោក។ តួលេខនេះខ្ពស់ជាង 3 សែនលាន ( 300,000,000,000) ដុល្លារ ធៀបនឹងការព្យាករកាលពីឆ្នាំមុន។

ក៏ប៉ុន្តែ អង្គការថាមពលអន្តរជាតិ (IEA) បានឱ្យដឹងថា ខ្ទង់ប្រាក់វិនិយោគថ្មីសម្រាប់ឥន្ធនៈហ្វូស៊ីល ត្រូវតែផ្អាកជាបណ្ដោះអាសន្ន បើសិនពិភពលោកចង់ឱ្យកម្ដៅរបស់ផែនដីស្ថិតក្នុងកម្រិតដែលអាចគ្រប់គ្រងបាន៕

November 2, 2022

កូរ៉េខាងត្បូង ផ្ដល់សំណងដល់ជនរងគ្រោះក្នុងហេតុការណ៍ប្រជ្រៀតជាន់គ្នាស្លាប់នៅសេអ៊ូល

អាជ្ញាធរកូរ៉េខាងត្បូង ផ្ដល់សំណងឡើងដល់ 14,000 ដុល្លារ ក្នុងមនុស្សម្នាក់ដែលបានស្លាប់ និងផ្ដល់ជំនួយជាប្រាក់សម្រាប់ពិធីបុណ្យសព និងយានយន្តដឹកជញ្ជូនសព។

រដ្ឋាភិបាលកូរ៉េខាងត្បូង កាលពីថ្ងៃទី 31 តុលា បានប្រកាសអំពីខ្ទង់ប្រាក់សំណងសម្រាប់ជនរងគ្រោះក្នុងហេតុការណ៍ប្រជ្រៀតគ្នាស្លាប់នៅក្រុង Itaewon។ យោងតាមគោលការណ៍ក្នុងការផ្ដល់ជំនួយរបស់ ក្រសួងសន្តិសុខមាតុភូមិរបស់កូរ៉េខាងត្បូង គ្រួសារដែលមានសមាជិកស្លាប់ក្នុងគ្រោះមហន្តរាយថ្នាក់ជាតិនឹងទទួលបានប្រាក់សំណង 20 លានវ៉ុន (ប្រហែល 14,100 ដុល្លារអាម៉េរិក)។ អ្នកដែលរងរបួសនឹងទទួលបានពី 5 លានវ៉ុន (ប្រហែល 3,520 ដុល្លារអាម៉េរិក) ដល់ 10 លានវ៉ុន (ប្រហែល 7,000 ដុល្លារអាម៉េរិក)។

ក្រសួងសន្តិសុខមាតុភូមិកូរ៉េខាងត្បូង បានប្រកាសថា នឹងផ្ដល់ជំនួយបន្ថែមដល់គ្រួសារដែលមានមនុស្សស្លាប់ក្នុងហេតុការណ៍ដ៏រន្ធត់នេះ សម្រាប់ការធ្វើពិធីបុណ្យសព និងការដឹកជញ្ជូន។ ខ្ទង់ប្រាក់ជំនួយនេះមានចំនួន 15 លានវ៉ុន (ប្រហែល 10,500 ដុល្លារអាម៉េរិក) សម្រាប់ជនរងគ្រោះម្នាក់។

កូរ៉េខាងត្បូង បានកំណត់ថា ខណ្ឌ Yongsan នៅ រដ្ឋធានីសេអ៊ូល ជាកន្លែងដែលមានទីប្រជុំជន Itaewon គឺជា «តំបន់គ្រោះមហន្តរាយ»។ ប្រធានាធិបតីកូរ៉េខាងត្បូង លោក Yoon Suk-yeol ក៏បានប្រកាសកាន់ទុក្ខចាប់ពីថ្ងៃទី 30 តុលារ ដល់ 05 វិច្ឆិកាផងដែរ។

ក្រុមបុព្វជិតកំពុងសូត្រធម៌ជូនជនរងគ្រោះ កាលពីថ្ងៃទី 31 តុលា

រដ្ឋាភិបាលបានបង្កើតគណៈកម្មការរៀបចំបុណ្យសព និងបញ្ជូនបុគ្គលិកទៅកាន់គ្រួសារជនរងគ្រោះដើម្បីជួយជ្រោមជ្រែង។ អ្នកដែលរងរបួសនឹងទទួលបានប័ណ្ណធានារ៉ាប់រងពីរដ្ឋ និងមានបុគ្គលិកម្នាក់របស់រដ្ឋ ទៅជួយសម្រាលទុក្ខ បើសិនជាត្រូវការ។

ក្រុមមន្ត្រីកូរ៉េខាងត្បូង ក៏បានប្រកាសថា គ្រួសារទាំងឡាយដែលរងផលប៉ះពាល់ពីហេតុការណ៍ប្រជ្រៀតគ្នានេះ នឹងទទួលបានការលើកលែងពន្ធ ព្រមទាំងទទួលបានខ្ទង់ប្រាក់ជំនួយផ្សេងៗ មានដូចជាការកាត់បន្ថយ ការលើកលែង ឬពន្យារពេលនៃការទូទាត់ថ្លៃសេវាទូរស័ព្ទជាដើម។

ហេតុការណ៍ប្រជ្រៀតជាន់គ្នាខាងលើកើតឡើងកាលពីយប់ថ្ងៃទី 29 តុលា នៅពេលមនុស្សប្រមាណ 100,000 នាក់ចូលរួមពិធីបុណ្យ Halloween នៅទីប្រជុំជន Itaewon ក្នុង រដ្ឋធានីសេអ៊ូល។ ហេតុការណ៍នេះបានសម្លាប់មនុស្សយ៉ាងតិច 156 នាក់ និងជាង 150 នាក់ផ្សេងទៀតរងរបួស ក្នុងនោះមានមនុស្សជាច្រើនកំពុងស្ថិតក្នុងស្ថានភាពធ្ងន់ធ្ងរ៕

November 1, 2022

មូលហេតុចម្បងដែលអាចនាំឱ្យស្ពានយោលបុរាណរបស់ ឥណ្ឌា ត្រូវបាក់

ក្រុមមន្ត្រីខ្វះការតាមដានលើការថែទាំ កត្តាលើសចំណុះ និងការអង្រួនជាដើម អាចជាមូលហេតុចម្បងដែលនាំឱ្យ ស្ពានយោលអាយុកាលជាង 100 ឆ្នាំនៅ ប្រទេសឥណ្ឌា ត្រូវបាក់។

អាជ្ញាធរឥណ្ឌា បានបង្កើតក្រុមស្រាវជ្រាវពិសេសមួយ (SIT) រួមមានសមាជិក 5 នាក់ ដើម្បីស្វែងយល់អំពីមូលហេតុពិតដែលនាំឱ្យស្ពានប្រវត្តិសាស្ត្រឆ្លងកាត់ទន្លេ Machchhu នៅក្នុងទីរួមស្រុក Morbi រដ្ឋ Gujarat ត្រូវបាក់កាលពីព្រលប់ថ្ងៃទី 30 តុលា បណ្ដាលឱ្យមនុស្សយ៉ាងតិច 141 នាក់បាត់បង់ជីវិត។

ក្នុងគ្រាដែលការស៊ើបអង្កេតកំពុងត្រូវបានធ្វើឡើង ក្រុមអ្នកជំនាញនៅ ឥណ្ឌា បានបង្ហាញអំពីមូលហេតុមួយចំនួនដែលអាចនាំទៅរកមហន្តរាយរបស់ស្ពាន ដែល SIT អាចនឹងលើកយកមកស្រាវជ្រាវលម្អិត។

ក្រុមអ្នកជំនាញនិយាយថា បញ្ហាមួយចំនួនដែលអាចនឹងត្រូវបាន SIT ធ្វើការស្រាវជ្រាវ ស៊ើបអង្កេតជាអាទិភាព រួមមាន ទីមួយ ៖ ស្ពាននេះត្រូវបានបើកដំណើរការមុនពេលបញ្ចប់ការជួសជុល, ទីពីរ ៖ ការថែទាំមិនបានល្អ, ទីបី ៖ លើសចំណុះ និងទីបួន ៖ កម្លាំងពីខាងក្រៅ (ដោយសារការអង្រួនរបស់មនុស្ស) ជាដើម។ល។

November 1, 2022

មុនពេលបាក់ និងសម្លាប់មនុស្សជាងរយនាក់ ស្ពានយោលនៅឥណ្ឌា ត្រូវបានជួសជុលដោយ «ក្រុមហ៊ុនផលិតនាឡិកា»

ស្ពានយោល Morbi ត្រូវបានក្រុមហ៊ុនផលិតនាឡិកាជួសជុលក្នុងរយៈពេល 6 ខែ មុនពេលបាក់ បណ្ដាលឱ្យមនុស្សយ៉ាងតិច 141 នាក់ត្រូវបាត់បង់ជីវិត។

ស្ពានយោលឆ្លងកាត់ទន្លេ Machchhu ក្នុងទីរួមស្រុក Morbi រដ្ឋ Gujarat បានបាក់កាលពីព្រលប់ថ្ងៃទី 30 តុលា ក្រោយពីបើកឱ្យឆ្លងកាត់ឡើងវិញបាន 4 ថ្ងៃ។ ស្ពានដែលមានទទឹង 1.25 ម៉ែត្រ និងបណ្ដោយជាង 230 ម៉ែត្រនេះ ត្រូវបានសាងសង់តាំងពីឆ្នាំ 1877 ហើយត្រូវបានបិទជាបណ្ដោះអាសន្នដើម្បីជួសជុលក្នុងរយៈពេល 6 ខែ។

ការជួសជុលស្ពាននេះត្រូវបានក្រុមហ៊ុន Oreva ដែលមានទីស្នាក់ការកណ្ដាលនៅក្នុងរដ្ឋ Gujarat ទទួលខុសត្រូវទៅតាមកិច្ចសន្យា 15 ឆ្នាំជាមួយនឹងអាជ្ញាធរឥណ្ឌា។ បច្ចុប្បន្ន មិនទាន់ដឹងច្បាស់ថា ហេតុអ្វីបានជា Oreva ដែលជាអ្នកជំនាញខាងផលិតនាឡិកា និងម៉ូតូអគ្គិសនី បែរជាទទួលបានសិទ្ធិជួសជុលស្ពាននេះ។

សារព័ត៌មានឥណ្ឌា បានឱ្យដឹងថា Oreva បានជួលក្រុមហ៊ុនម៉ៅការសំណង់មួយគឺ Devprakash Solutions ទទួលបន្ទុកបញ្ហាបច្ចេកទេសក្នុងការជួសជុល។ ក្រោយពីបានបើកឱ្យប្រើប្រាស់ឡើងវិញកាលពីថ្ងៃទី 26 តុលា Oreva ទទួលបានសិទ្ធិយកថ្លៃពីអ្នកឆ្លងកាត់ 0.21 ដុល្លារអាម៉េរិក/ម្នាក់។

Sandipsinh Zala ដែលជាមន្ត្រីមួយរូបរបស់រដ្ឋ Gujarat បានថ្លែងថា Oreva បានបើកឱ្យប្រើប្រាស់ស្ពាននេះដោយចិត្តឯង នៅពេលរដ្ឋមិនទាន់អនុញ្ញាត។ Sandeep Singh ដែលជាមន្ត្រីមួយរូបផ្សេងទៀតបានឱ្យដឹងថា តាមធម្មតា «មានមនុស្សតែ 20 ទៅ 25 នាក់ ឆ្លងកាត់ស្ពានក្នុងពេលតែមួយ» ដើម្បីការពារសុវត្ថិភាព។

ក្រុមមន្ត្រីឥណ្ឌា ឱ្យដឹងថា នៅពេលស្ពាន Morbi បាក់ គឺមានមនុស្សជិត 500 នាក់ ក្នុងនោះមានទាំងស្ត្រី និងកុមារ កំពុងស្ថិតនៅលើស្ពាន និងនៅជុំវិញស្ពាន ដើម្បីចូលរួមពិធីបុណ្យពន្លឺ Diwali របស់សាសនាហិណ្ឌូ។

ក្រុមមន្ត្រីស្រាវជ្រាវបានប្រមូលសំណាករបស់ស្ពាននេះ និងបានរកឃើញថា មូលហេតុនៃករណីបាក់គឺដោយសារមនុស្សច្រើនលើសចំណុះ។

ចំណែក Jaysukhbhai Patel ប្រធានក្រុមហ៊ុន Oreva និយាយថា ក្រុមហ៊ុនយកថ្លៃអ្នកឆ្លងកាត់ស្ពានគឺដើម្បីបញ្ចៀសបញ្ហាមនុស្សឆ្លងកាត់ច្រើន ប៉ះពាល់ដល់គុណភាពរបស់ស្ពាន។

ប៉ូលិសឥណ្ឌា បានបើកការស៊ើបអង្កេត និងបានចាប់ខ្លួនអ្នកទទួលខុសត្រូវក្នុងការជួសជុល ថែទាំ និងគ្រប់គ្រងស្ពាននេះ ចំនួន 9 នាក់ ប៉ុន្តែមិនទាន់ប្រកាសអំពីអត្តសញ្ញាណរបស់មនុស្សទាំងនេះនៅឡើយ៕

November 1, 2022

ទស្សនាវីដេអូស្ដីពី «រថភ្លើងវែងជាងគេបង្អស់ក្នុងពិភពលោក» «លូនដូចពស់» នៅក្នុងរូង និងលើភ្នំ

ប្រទេសស្វ៊ីស បានប្រារព្ធខួប 175 ឆ្នាំនៃវិស័យផ្លូវដែកដោយការបញ្ចេញរថយន្តដឹកអ្នកដំណើរបំបែកកំណត់ត្រា Guinness ពិភពលោក ដោយមានប្រវែងជិត 2 គីឡូម៉ែត្រ។

ក្រុមហ៊ុនគ្រប់គ្រងផ្លូវដែក Rhaetian (RhB) របស់ ប្រទេសស្វ៊ីស កាលពីថ្ងៃទី 29 តុលា បានបំបែកកំណត់ត្រាពិភពលោក ស្ដីពីរថភ្លើងដឹកអ្នកដំណើរវែងជាងគេបង្អស់ក្នុងពិភពលោក នៅពេលរថភ្លើងមួយខ្សែប្រវែង 1.91 គីឡូម៉ែត្រ បានបញ្ចប់ដំណើររយៈចម្ងាយ 25 គីឡូម៉ែត្រនៅលើជួរភ្នំ Alps ដោយចេញដំណើរពី Preda ទៅកាន់ Filisur ឆ្លងកាត់ស្ពានគោក និងផ្លូវក្រោមដីជាច្រើនកន្លែងនៅលើភ្នំ។

ខ្សែរថភ្លើងដែលមានទូដឹកភ្ញៀវចំនួន 100 នេះ មានបុគ្គលិកបើកបរចំនួន 7 នាក់ និងវិស្វករចំនួន 21 នាក់។ វាអាចធ្វើដំណើរក្នុងល្បឿន 35 គីឡូម៉ែត្រ/ម៉ោង។

RhB បានឱ្យដឹងថា ជើងរថភ្លើងនេះត្រូវបានទទួលស្គាល់ដោយស្ថាប័នឯតទគ្គកម្មពិភពលោក Guinness ហើយព្រឹត្តិការណ៍នេះក៏ជាការរម្លឹកខួបអនុស្សាវរីយ៍ 175 ឆ្នាំនៃវិស័យផ្លូវដែករបស់ ប្រទេសស្វ៊ីស ផងដែរ។

October 31, 2022

ស្ថានទូតកម្ពុជានៅកូរ៉េខាងត្បូង ថា ក្នុងហេតុការណ៍ប្រជ្រៀតគ្នាស្លាប់ជាង 150 នាក់នៅ អ៊ីថេវ៉ុន មិនមានពលរដ្ឋខ្មែរទេ

ស្ថានទូតកម្ពុជាប្រចាំកូរ៉េខាងត្បូង បានឱ្យដឹងថា គិតត្រឹមម៉ោង 9:15 នាទីយប់ ថ្ងៃទី 30 ខែតុលា ឆ្នាំ 2022 ស្ថានទូតបានទទួលព័ត៌មានពីអាជ្ញាធរមានសមត្ថកិច្ចមកថា មានជនបរទេសចំនួន 25 នាក់ ដែលបានទទួលមរណភាពក្នុងឧប្បត្តិហេតុនៅតំបន់ អ៊ីថេវ៉ុន នៅយប់ថ្ងៃទី 29 រំលងចូលអាធ្រាតថ្ងៃទី 30 ខែតុលានេះ ហើយក្នុងចំណោមជនបរទេសដែលអាជ្ញាធរបានរកឃើញអត្តសញ្ញាណ គឺមិនមានជនជាតិខ្មែរទេ។

លោកស្រី ជ្រឹង បុទុមរង្សី ឯកអគ្គរាជទូតវិសាមញ្ញ និងពេញសមត្ថភាពកម្ពុជាប្រចាំសាធារណរដ្ឋកូរ៉េ បានបង្ហោះសារឱ្យដឹងថា នឹងបន្តតាមដានព័ត៌មានខាងលើបន្តទៀតដោយយកចិត្តទុកដាក់។

យោងតាមព័ត៌មានថ្មីបំផុត នាយករដ្ឋមន្ត្រីកូរ៉េខាងត្បូង បានឱ្យដឹងថា តួលេខអ្នកស្លាប់ក្នុងហេតុការណ៍ប្រជ្រៀតគ្នានៅ តំបន់ អ៊ីថេវ៉ុន បានកើនឡើងដល់ 154 នាក់ ក្នុងនោះមានអ្នករងរបួស 133 នាក់ ហើយក្នុងចំណោមនោះក៏មាន 37 នាក់រងរបួសធ្ងន់ធ្ងរ។ ក្រសួងការបរទេសកូរ៉េខាងត្បូង បញ្ជាក់ថា ក្នុងចំណោមជនរងគ្រោះដែលបានស្លាប់ មាន 26 នាក់ជាជនបរទេស មកពី 15 ប្រទេស។

October 31, 2022

ទិដ្ឋភាពនៃហេតុការណ៍បាក់ស្ពានយោលនៅប្រទេសឥណ្ឌា ដែលបានសម្លាប់មនុស្សជាងរយនាក់

ក្រុមមន្ត្រីឥណ្ឌា បានបង្កើតក្រុមស្រាវជ្រាវរកមូលហេតុនៃករណីបាក់ស្ពានយោលដែលបានបណ្ដាលឱ្យមនុស្សយ៉ាងតិច 132 បាត់បង់ជីវិតកាលពីថ្ងៃទី 30 តុលា 2022។

ស្ពានយោលនៅទីរួមស្រុក Morbi ក្នុងរដ្ឋ Gujarat បានបាក់នៅវេលាម៉ោង 18 និង 42 នាទី ថ្ងៃទី 30 តុលា ត្រូវនឹងម៉ោង 20 និង 12 នាទីនៅ កម្ពុជា។ ក្រុមមន្ត្រីឥណ្ឌា ឱ្យដឹងថា មានមនុស្សជិត 500 នាក់ ក្នុងនោះមានទាំងកុមារ និងស្ត្រី កំពុងប្រមូលផ្ដុំគ្នានៅលើស្ពាន និងជុំវិញស្ពាន ដើម្បីប្រារព្ធពិធីបុណ្យពន្លឺ Diwali របស់សាសនាហិណ្ឌូ នៅពេលហេតុការណ៍បាក់ស្ពានកើតឡើង។ ជនរងគ្រោះជាច្រើននាក់បានធ្លាក់ចូលក្នុងទឹកទន្លេ Machchhu ដែលនៅក្រោមស្ពានយោលនេះ។

ក្រុមមន្ត្រីបានបញ្ជូនក្រុមសង្គ្រោះ ក្នុងនោះមានទាំងកប៉ាល់ អ្នកមុជទឹកជាដើមទៅកាន់កន្លែងកើតហេតុដើម្បីស្វែងរកជនរងគ្រោះដែលបានបាត់ខ្លួន។ ក្រុមទាហានរបស់ ឥណ្ឌា ក៏ត្រូវបានបញ្ជូនទៅចូលរួមបេសកកម្មជួយសង្គ្រោះនេះ។

អាជ្ញាធរក្នុងតំបន់បានរៀបផែនការទប់ប្រភពទឹកដែលហូរចូលទន្លេ Machchhu ពីទំនប់មួយនៅក្បែរនោះ និងប្រើប្រាស់ម៉ាស៊ីនបូមរំលស់ទឹកក្នុងទន្លេដើម្បីបង្កើនល្បឿនបេសកកម្មសង្គ្រោះ។

មកដល់បច្ចុប្បន្ន តួលេខជនរងគ្រោះដែលបានស្លាប់ក្នុងហេតុការណ៍បាក់ស្ពាននេះបានកើនឡើងដល់ 132 នាក់ហើយ នេះបើតាមសារព័ត៌មាន Times of India។

October 31, 2022

Category: អន្តរជាតិ