(សហរដ្ឋអាម៉េរិក) -ថ្នាំងងុយដេក ថ្នាំសណ្ដំ ជាតិពុលប៉ះពាល់ដល់សរសៃប្រសាទមួយចំនួន និងសីតុណ្ហភាពទាបជាដើម អាចជាកត្តាដែលងាយធ្វើឱ្យអ្នកជំងឺមួយចំនួនធ្លាក់ក្នុងសភាពសន្លប់ និងត្រូវគេច្រឡំថាបានស្លាប់។
កាលពីថ្ងៃទី 07 កុម្ភៈ 2023 មណ្ឌលចាស់ជរាមួយនៅ New York បានប្រកាសថា ស្ត្រីវ័យ 82 ឆ្នាំមួយរូបបានទទួលមរណភាព។ ប៉ុន្តែ ក្រោយមកទើបដឹងថា លោកយាយរូបនេះនៅមានជីវិត។ ហេតុការណ៍ស្រដៀងគ្នានេះក៏បានកើតឡើងលើអ្នកជំងឺវ័យ 66 ឆ្នាំម្នាក់ផ្សេងទៀតដែលមានជំងឺបាត់បង់ការចងចាំ នៅរដ្ឋ Iowa សហរដ្ឋអាម៉េរិក។ ស្ត្រីរូបនេះត្រូវបានរកឃើញនៅក្នុងស្ថានភាពមានដង្ហើមក្នុងពេលបុគ្គលិកនៅឈាបនដ្ឋាន បើកថង់សាកសព។
បច្ចុប្បន្ន វេជ្ជបណ្ឌិតទាំងអស់សុទ្ធតែត្រូវបានបង្រៀនអំពីវិធីសាស្ត្រដែលអាចបញ្ជាក់ថា មនុស្សណាម្នាក់បានស្លាប់ តាមរយៈការពិនិត្យចង្វាក់បេះដូង និងដង្ហើមជាដើម តាំងពីនៅរៀន។ ប៉ុន្តែនៅតែមានករណីអ្នកស្លាប់រស់ឡើងវិញបន្ទាប់ពីត្រូវបានវេជ្ជបណ្ឌិតបញ្ជាក់ថាបានអស់ជីវិត។
ការដែលមិនបានធ្វើត្រឹមត្រូវនៅក្នុងការពិនិត្យបញ្ជាក់អំពីការស្លាប់ អាចនាំឱ្យមានករណីប្រកាសបញ្ជាក់ដោយភាន់ច្រឡំចំពោះស្ថានភាពរបស់អ្នកជំងឺដែលកំពុងបាត់បង់ស្មារតី។ ករណីខ្លះកើតឡើងដោយសារវេជ្ជបណ្ឌិតត្រូវបែកអារម្មណ៍ មិនអាចស្ដាប់ឮសំឡេងបេះដូង និងខ្សល់ដង្ហើមដែលខ្លី និងខ្សោយ។ ថ្នាំព្យាបាលជំងឺមួយចំនួនក៏អាចបណ្ដាលឱ្យអ្នកជំងឺខ្លះធ្លាក់ទៅក្នុងស្ថានភាព «ស្លាប់ក្លែងក្លាយ»។
ថ្នាំសណ្ដំដែលមានប្រសិទ្ធភាពក្នុងការការពារខួរក្បាលពីការខូចខាត តែងត្រូវបានប្រើដើម្បីសណ្ដំនៅក្នុងករណីវះកាត់ធំ ពិសេស បើសិនជាវេជ្ជបណ្ឌិតត្រូវការបញ្ឈប់ចរន្តឈាមរបស់អ្នកជំងឺនៅក្នុងរយៈពេលយូរ។ ការប្រើប្រាស់ថ្នាំនេះលើសចំណុះអាចធ្វើឱ្យការប្រតិកម្មថយចុះ ដង្ហើម និងចរន្តឈាមខ្សោយ នាំឱ្យអ្នកជំងឺមានអារម្មណ៍ជិតដូចទៅនឹងការស្លាប់។ ក្នុងពេលជាមួយគ្នានោះ ខួរក្បាលត្រូវបានការពារពីបញ្ហាខ្វះអ៊ុកស៊ីសែន។ បន្ទាប់ពីជាតិថ្នាំសណ្ដំត្រូវបានបញ្ចេញមកក្រៅ អ្នកជំងឺនឹងដឹកខ្លួនឡើងវិញ។
ថ្នាំ Diazepam (ឱសថពិសេសរបស់ Valium), alprazolam (ថ្នាំពិសេសរបស់ Xanax) និងសារធាតុពុលមួយចំនួនក៏អាចធ្វើឱ្យអ្នកជំងឺត្រូវបានគេច្រឡំថាបានស្លាប់។ កាលពីយុគសម័យកណ្ដាល គ្រូធ្មប់ គ្រូវេទមន្តជាដើម តែងឱ្យជនរងគ្រោះផឹកទឹក ឬម្សៅដែលមានផ្ទុកជាតិពុល tetrodotoxin ដែលបានមកពីត្រីពុលម្យ៉ាងដែលមានឈ្មោះថា Tetraodontidae ដើម្បីសណ្ដំ។ ជនរងគ្រោះនេះ ក្រោយមកក៏ត្រូវគេចាប់យកទៅបូជាយញ្ញ សែនឱ្យបីសាចជាដើម។ តាមពិត នេះត្រូវបានហៅថា ស្ថានភាព «ខ្មោចឆៅ» កើតឡើងនៅពេលជនរងគ្រោះលេបចំសារធាតុពុល tetrodotoxin។
ការត្រាំខ្លួននៅក្នុងទឹកត្រជាក់យូរពេកក៏អាចនាំឱ្យរាងកាយប្រែជាបាត់បង់ស្មារតី ជិតដូចទៅនឹងស្ថានភាពស្លាប់ ព្រោះថាសីតុណ្ហភាពត្រជាក់ពេកធ្វើឱ្យបេះដូងដើរយឺត និងខ្សោយ ដែលនេះអាចធ្វើឱ្យគេច្រឡំថាបានស្លាប់។
ក្នុងការសង្គ្រោះបន្ទាន់ វេជ្ជបណ្ឌិតមិនត្រូវបានអនុញ្ញាតឱ្យបញ្ជាក់អំពីការស្លាប់ចំពោះអ្នកស្លាប់ដោយសារលង់ទឹកនោះទេ រហូតដល់ពេលស្អំកម្ដៅបានគ្រប់គ្រាន់ទៅតាមវេជ្ជសាស្ត្រ។ ការសន្លប់ ពេលខ្លះក៏ធ្វើឱ្យមានការស្រឡំថាបានស្លាប់ ព្រោះថា ស្ថានភាពនៃការដាស់សរសៃប្រសាទ vagus nerve (សរសៃប្រសាទវែងជាងគេក្នុងរាងកាយ) កើតឡើងក្នុងពេលសន្លប់ ធ្វើឱ្យចង្វាក់បេះដូងដើរយឺតជាងមុន ហើយសម្ពាធឈាមក៏ធ្លាក់ចុះ។
កាលពីឆ្នាំ 2015 ស្ត្រីមានផ្ទៃពោះម្នាក់ត្រូវបានវេជ្ជបណ្ឌិតបញ្ជាក់ថាបានស្លាប់ព្រោះតែរន្ធត់នៅពេលឮសំឡេងផ្ទុះរបស់គ្រាប់កាំភ្លើង។ មួយថ្ងៃបន្ទាប់ពីពិធីបុណ្យសព មនុស្សជាច្រើនបានឱ្យដឹងថា បានឮសំឡេងនាងស្រែកចេញពីផ្នូររបស់ខ្លួន។ នៅកម្ពុជា ហេតុការណ៍ស្រដៀងនេះក៏ធ្លាប់កើតមានផងដែរ៕
