អន្តរជាតិ - La Reine Media

សូរ្យគ្រាសក្នុងថ្ងៃទី 20 មេសា 2023 ៖ រូបភាពខ្លះៗដែលថតបានពីតំបន់មួយចំនួនលើពិភពលោក

នៅថ្ងៃទី 20 មេសានេះ សូរ្យគ្រាសកូនកាត់ត្រូវបានមើលឃើញនៅក្នុងតំបន់ជាច្រើននៅអូស្ត្រាលី និងឥណ្ឌូណេស៊ី រួមនឹងតំបន់ខ្លះរបស់នូវែលសេឡង់ ហ្វ៊ីលីពីន ទីម័រខាងកើត និងតំបន់ខ្លះទៀតនៅអាស៊ីអាគ្នេយ៍។

នៅអូស្ត្រាលី មនុស្សជិត 20,000 នាក់ប្រមូលផ្ដុំគ្នានៅក្រោមផ្ទៃមេឃដែលស្ទើរតែមិនមានពពកក្នុងទីរួមស្រុកក្បែរឆ្នេរសមុទ្រ Exmouth ដើម្បីគយគន់បាតុភូតសូរ្យគ្រាសពេញលេញដែលអូសបន្លាយពេលប្រហែលមួយនាទីនាព្រឹកថ្ងៃទី 20 មេសានេះ។ នេះគឺជាទីតាំងមួយក្នុងចំណោមតំបន់ដែលមានអំណោយផលល្អបំផុតនៅអូស្ត្រាលីក្នុងការតាមដានបាតុភូតសូរ្យគ្រាសដ៏កម្រជួបប្រទះ។

សូរ្យគ្រាសលើកនេះចាប់ផ្ដើមពីភាគខាងត្បូងនៃមហាសមុទ្រឥណ្ឌា និងធ្វើដំណើរឆ្លងកាត់ទ្វីបអូសេអានី អាស៊ីអាគ្នេយ៍ និងបញ្ចប់នៅមហាសមុទ្រប៉ាស៊ីហ្វិក។ ប៉ុន្តែ តំបន់ដែលមើលឃើញបាតុភូតសូរ្យគ្រាសរាងវង់ចិញ្ចៀន និងសូរ្យគ្រាសពេញលេញគឺមានតិចតួច ដោយភាគច្រើនកើតឡើងនៅលើសមុទ្រ។

ពេលសូរគ្រាសកើតឡើង តំបន់មួយចំនួនលើផែនដីនឹងអាចមើលឃើញសូរ្យគ្រាសពេញលេញ ខណៈតំបន់ខ្លះមើលឃើញតែសូរ្យគ្រាសរាងរង់ចិញ្ចៀន ចំណែកខ្លះទៀតក៏ឃើញតែមួយផ្នែកតូច។ សូរ្យគ្រាសពេញលេញលើកនេះត្រូវបានមើលឃើញនៅឧបទ្វីប North West Cape និងកោះ Barrow នៅអូស្ត្រាលីខាងលិច តំបន់ភាគខាងកើតរបស់ទីម័រខាងកើត កោះ Damar និងមួយផ្នែករបស់ខេត្ត Papua នៅឥណ្ឌូណេស៊ី។

https://www.youtube.com/watch?v=KhXA7gkmYWk

April 20, 2023

អាម៉េរិកផ្ដល់ជំនួយបន្ថែមជាង 300 លានដុល្លារដល់អ៊ុយក្រែន

មន្ត្រីអាម៉េរិកបានប្រកាសអំពីកញ្ចប់ជំនួយផ្នែកយោធាថ្មីតម្លៃ 325 លានដុល្លារដល់អ៊ុយក្រែន ក្នុងនោះក៏មានគ្រាប់រំសេវច្រើនប្រភេទ រួមនឹងមីនប្រឆាំងរថក្រោះផងដែរ។

«រុស្ស៊ីអាចបញ្ចប់សង្គ្រាមភ្លាមៗនៅថ្ងៃនេះ… អាម៉េរិករួមនឹងសម្ព័ន្ធមិត្ត និងដៃគូសហការនឹងនៅជាមួយអ៊ុយក្រែននៅពេលចាំបាច់ រហូតដល់រុស្ស៊ីធ្វើដូច្នោះ» រដ្ឋមន្ត្រីការបរទេសអាម៉េរិក Antony Blinken នាថ្ងៃទី 20 មេសានេះបានឱ្យដឹងដូច្នេះនៅពេលប្រកាសអំពីកញ្ចប់ជំនួយផ្នែកយោធាថ្មីដល់អ៊ុយក្រែន។

មន្ត្រីអាម៉េរិកនិយាយថា កញ្ចប់ជំនួយនេះមានទាំងគ្រាប់រ៉ុក្កែតរបស់ប្រព័ន្ធកាំជ្រួចហ្វូង HIMARS, មីនប្រឆាំងរថក្រោះ និងគ្រាប់កាំភ្លើងជាង 9 លានគ្រាប់សម្រាប់អាវុធផ្ទាល់ខ្លួន។ ក្រៅពីនេះ អាម៉េរិកក៏ផ្ដល់មធ្យោបាយសម្រាប់ដឹកជញ្ជូន និងគាំទ្រដល់ការជួសជុលដើម្បីជួយឱ្យអ៊ុយក្រែនស្ដារ និងពង្រឹងខ្សែការពារផងដែរ។

កញ្ចប់ជំនួយយោធាថ្មីដែលមានតម្លៃ 325 លានដុល្លារនេះ បានធ្វើឱ្យជំនួយយោធាសរុបដែលអាម៉េរិកបានផ្ដល់ឱ្យអ៊ុយក្រែន កើនឡើងដល់ជាង 35.4 ពាន់លានដុល្លារ រាប់ចាប់តាំងពីរុស្ស៊ីចូលឈ្លានពានទឹកដីអ៊ុយក្រែនកាលពីថ្ងៃទី 24 កុម្ភៈ 2022 ដល់បច្ចុប្បន្ន (ជិត 14 ខែ)។

ជំនួយថ្មីនេះត្រូវបានផ្ដល់ឱ្យក្នុងគ្រាដែលអ៊ុយក្រែនកំពុងត្រៀមខ្លួនសម្រាប់ការវាយបកដើម្បីដណ្ដើមទឹកដីដែលរុស្ស៊ីបានវាយយកទៅកាន់កាប់។ ការវាយបកនេះនឹងជួយឱ្យអ៊ុយក្រែនទទួលបានជោគជ័យមួយចំនួន ប៉ុន្តែមិនអាចដណ្ដើមមកវិញបានទាំងស្រុងនូវទឹកដីរបស់អ៊ុយក្រែនដែលកំពុងត្រូវបានគ្រប់គ្រងដោយរុស្ស៊ី។ នេះបើតាមការវាយតម្លៃរបស់ក្រុមអ្នកវិភាគ៕

April 20, 2023

ហេតុការណ៍ប្រជ្រៀតគ្នាស្លាប់ជិត 80 នាក់នៅយេម៉ែន ពេលចែកអំណោយ

កងកម្លាំង Houthi បានឱ្យដឹងថា យ៉ាងតិចណាស់មានមនុស្ស 79 នាក់បានស្លាប់ និងជាង 100 នាក់រងរបួសនៅក្នុងហេតុការណ៍ប្រជ្រៀតជាន់គ្នាក្នុងពិធីចែកអំណោយមនុស្សធម៌នៅរដ្ឋធានីសាណា។

«ហេតុការណ៍កើតឡើងក្នុងពិធីចែកអំណោយមនុស្សធម៌ដែលធ្វើឡើងដោយក្រុមអ្នកជំនួញនៅរដ្ឋធានី សាណា» ស្ថាប័នមហាផ្ទៃរបស់កងកម្លាំង Houthi នៅយេម៉ែន នាថ្ងៃនេះបានឱ្យដឹងដូច្នេះ។ ជនរងគ្រោះត្រូវបានដឹកទៅកាន់មន្ទីរពេទ្យ ខណៈដែលក្រុមអ្នកចែកអំណោយក៏ត្រូវបានចាប់ខ្លួន។ ចំណែកក្រុមមន្ត្រី Houthi ក៏បានស្នើឱ្យមានការស៊ើបអង្កេតលើហេតុការណ៍នេះ។

ពិធីចែកអំណោយនេះធ្វើឡើងមុនថ្ងៃបុណ្យ Eid al-Fitr ដែលជាថ្ងៃបញ្ចប់រដូវបុណ្យរ៉ាម៉ាដានរបស់អ៊ីស្លាមសាសនិក។

សង្គ្រាមបានផ្ទុះឡើងនៅយេម៉ែនចាប់ពីចុងឆ្នាំ 2014 នៅពេលកងកម្លាំង Houthi គ្រប់គ្រងដែនដីជាច្រើននៅប្រទេសនេះ រួមទាំងរដ្ឋធានីសាណា។ សម្ព័ន្ធយោធាដែលដឹកនាំដោយអារ៉ាប៊ីសាអូឌីត បានចូលធ្វើអន្តរាគមន៍នៅយេម៉ែនចាប់ពីខែមីនា 2015 ដើម្បីប្រឆាំង Houthi និងពង្រឹងរដ្ឋាភិបាលដែលអន្តរជាតិទទួលស្គាល់របស់ប្រធានាធិបតី Abd-Rabbu Mansour Hadi ដែលកំពុងនិរទេសខ្លួននៅបរទេស។

ក៏ប៉ុន្តែ Houthi នៅតែកាន់កាប់ទឹកជាច្រើនតំបន់របស់យេម៉ែន ក្នុងនោះក៏មានរដ្ឋធានីសាណា និងបន្តវាយប្រហារលើទឹកដីអារ៉ាប៊ីសាអូឌីតដើម្បីសងសឹក។ សង្គ្រាមនៅយេម៉ែនបានបង្កឱ្យមានមនុស្សស្លាប់ជាង 150,000 នាក់ ក្នុងនោះមានជាង 14,000 នាក់ជាជនស៊ីវិល។

សង្គ្រាមខាងលើក៏រុញច្រានយេម៉ែនឱ្យធ្លាក់ទៅក្នុងគ្រោះទុរភិក្ស។ អង្គការសហប្រជាជាតិបានហៅគ្រោះអត់ឃ្លាននេះថាជាសោកនាដកម្មមនុស្សធម៌ដ៏អាក្រក់បំផុតលើពិភពលោក និងបានឱ្យដឹងថា មនុស្សជាង 21.7 លាននាក់ ស្មើនឹង 2/3 នៃចំនួនប្រជាជនសរុបនៅយេម៉ែន ត្រូវការជំនួយមនុស្សធម៌នៅក្នុងឆ្នាំនេះ៕

April 20, 2023

អាចម៍ផ្កាយធំជាងតួ Eiffel នៅប្រទេសបារាំង ជិតហោះកាត់ពីមុខផែនដី

អាចម៍ផ្កាយ 2006 HV5 ត្រូវបានអ្នកវិទ្យាសាស្ត្រគណនាឃើញថា នឹងហោះកាត់មុខផែនដីក្នុងល្បឿនប្រហែល 62,600 គីឡូម៉ែត្រ/ម៉ោង លឿនជាងប្រហែល 22 ដង ធៀបនឹងល្បឿនរបស់គ្រាប់កាំភ្លើង នៅថ្ងៃទី 26 មេសាខាងមុខ។

2006 HV5 មានប្រវែងប្រហែល 400 ម៉ែត្រ វែងជាងឆ្ងាយបើធៀបនឹងតួ Eiffel នៅទីក្រុងបារីស ដែលមានកម្ពស់ត្រឹមតែប្រហែល 300 ម៉ែត្រ។ អាចម៍ផ្កាយនេះនឹងហោះមកក្បែរផែនដីក្នុងគម្លាតឆ្ងាយជាង 6.3 ដងធៀបនឹងចម្ងាយពីព្រះចន្ទមកផែនដី ពោលគឺប្រហែល 2.4 លានគីឡូម៉ែត្រ។ នេះបើតាមទិន្នន័យពីណាសា។

អាចម៍ផ្កាយគឺជាដុំថ្មទាំងឡាយដែលនៅសេសសល់ពីដំណាក់កាលកកើតប្រព័ន្ធព្រះអាទិត្យកាលពីរាប់ពាន់លានឆ្នាំមុន។ អាចម៍ផ្កាយភាគច្រើនស្ថិតនៅក្នុងតំបន់ខ្សែក្រវាត់អាចម៍ផ្កាយ។ អាចម៍ផ្កាយអាចមានទំហំប្រហែល 9 ម៉ែត្រ និងធំបំផុតត្រឹមរាប់រយគីឡូម៉ែត្រ។ អាចម៍ផ្កាយធំជាងគេបង្អស់ក្នុងប្រព័ន្ធព្រះអាទិត្យគឺ Ceres ដោយមានប្រវែង 945 គីឡូម៉ែត្រ និង Vesta មានប្រវែង 530 គីឡូម៉ែត្រ។

2006 HV5 គឺជាមួយក្នុងចំណោមវត្ថុអវកាសជាង 31,000 ដុំដែលស្ថិតនៅក្បែរផែនដី (NEO) និងត្រូវបានរកឃើញដោយក្រុមអ្នកវិទ្យាសាស្ត្រ។ NEO ត្រូវបានកំណត់និយមន័យថាជាវត្ថុអវកាសដែលហោះក្នុងគម្លាតពីផែនដីចាប់ពី 48 លានគីឡូម៉ែត្រមកក្រោម។ ពួកវានឹងត្រូវបានចាត់ចូលក្នុងក្រុមដែលអាចបង្កគ្រោះថ្នាក់ដល់ផែនដី បើសិនមានគម្លាតប្រហែល 7.4 លានគីឡូម៉ែត្រ និងមានអង្កត់ផ្ចិតធំជាង 140 ម៉ែត្រ។

មកដល់បច្ចុប្បន្ន ណាសាកំណត់បានអាចម៍ផ្កាយប្រហែល 2,300 ដុំដែលមានលទ្ធភាពបង្កគ្រោះថ្នាក់។ យ៉ាងណាក៏ដោយ 2006 HV5 ពិបាកបង្កការប៉ះទង្គិចជាមួយផែនដី ប៉ុន្តែវាគ្រាន់តែហោះកាត់ពីមុខប៉ុណ្ណោះ៕

April 19, 2023

ស្វាមីភរិយាលោក ចូ បៃដិន រកប្រាក់ចំណូលបានជិត 580,000 ដុល្លារក្នុងឆ្នាំ 2022

ប្រធានាធិបតីអាម៉េរិក លោក ចូ បៃដិន និងភរិយា Jill កាលពីថ្ងៃទី 18 មេសា បានបញ្ចេញឯកសារបង់ពន្ធអាករ បង្ហាញថា ស្វាមីភរិយាមួយគូនេះមានប្រាក់ចំណូលជិត 580,000 ដុល្លារអាម៉េរិកក្នុងឆ្នាំកន្លង។

យោងតាមរបាយការណ៍ស្ដីពីប្រាក់ចំណូល ស្វាមីភរិយាលោក បៃដិន រកបានប្រាក់ 579,514 ដុល្លារអាម៉េរិកនៅក្នុងឆ្នាំ 2022 និងបានបង់ពន្ធអស់ 137,658 ដុល្លារ។ កាលពីឆ្នាំ 2021 ដែលជាឆ្នាំដំបូងលោក បៃដិន ឡើងកាន់អំណាច ប្រាក់ចំណូលរបស់លោក និងភរិយាគឺ 610,702 ដុល្លារ។

លោក បៃដិន ទទួលបានប្រាក់បៀវត្សរ៍សម្រាប់ប្រធានាធិបតីចំនួន 400,000 ដុល្លារ ខណៈដែលជំទាវទីមួយ Jill Biden រកបាន 82,335 ដុល្លារ ពីការងារបង្រៀននៅសាលា Northern Virginia ។ ប្រាក់ចំណូលផ្សេងពីនេះរបស់ពួកគាត់គឺបានមកពីការវិនិយោគ ប្រាក់ចូលនិវត្តន៍ និងប្រាក់កម្មសិទ្ធិសៀវភៅជាដើម។ល។

គ្រួសារលោក បៃដិន បានបរិច្ចាគប្រហែល 3.5% នៃប្រាក់ចំណូលរបស់ពួកគាត់ ដែលស្មើនឹង 20,180 ដុល្លារ ទៅឱ្យអង្គការមនុស្សធម៌ចំនួន 20 ស្ថាប័ន។

ចំណែកអនុប្រធានាធិបតី Kamala Harris និងស្វាមី Doug Emhoff មានប្រាក់ចំណូល 456,918 ដុល្លារអាម៉េរិក និងបានបង់ពន្ធ 93,570 ដុល្លារ ស្មើនឹង 20.5% នៃប្រាក់ចំណូលសរុប៕

April 19, 2023

ប្រព័ន្ធសន្តិសុខសម្ងាត់នៅសេតវិមានប្រកាសអាសន្ន ព្រោះមានមនុស្សឆ្លងកាត់របងដែក

កម្លាំងសម្ងាត់អាម៉េរិកត្រូវបានប្រកាសអាសន្នបន្ទាប់ពីប្រព័ន្ធសន្តិសុខនៅសេតវិមានបានបញ្ចេញសញ្ញា ប៉ុន្តែ «ជនដែលសម្រុកចូល» គ្រាន់តែជាកុមារមួយរូបដែលទើបតែចេះដើរ។

ប្រធានផ្នែកព័ត៌មានរបស់អង្គភាពសម្ងាត់អាម៉េរិក Anthony Guglielmi កាលពីថ្ងៃទី 18 មេសាបានឱ្យដឹងថា កុមារម្នាក់បានវារកាត់តាមរបងដែកនៅទិសខាងជើងរបស់សេតវិមាន នាំឱ្យប្រព័ន្ធប្រកាសអាសន្នផ្នែកសន្តិសុខបញ្ចេញសកម្មភាព។

«មន្ត្រីសម្ងាត់បានឃើញភ្ញៀវតូចដែលកំពុងចង់ដឹងចង់ឃើញ បានវារឡើងតាមរបងទិសខាងជើងដើម្បីចូលមកក្នុងបរិវេណសេតវិមានក្នុងរយៈពេលខ្លី។ ភ្លាមនោះប្រព័ន្ធសន្តិសុខក៏ចាប់ផ្ដើមធ្វើការប្រកាសអាសន្នដល់កម្លាំងសម្ងាត់ ហើយកុមារនោះក៏ត្រូវបាននាំទៅប្រគល់ឱ្យឪពុកម្ដាយ» Gugliemli ឱ្យដឹងដូច្នេះ។

យោងតាមសមត្ថកិច្ច ក្មេងតូចនេះគឺជាកូនរបស់ប្ដីប្រពន្ធជនជាតិកាណាដាដែលមកលេងរដ្ឋធានីវ៉ាស៊ីងតោន។ អ្នកនាំពាក្យអង្គភាពសម្ងាត់ Paul Mayhair និយាយថា កុមាររូបនេះទំនងជាមនុស្សដំបូងគេដែលបានឆ្លងកាត់របងដែកថ្មីនៅខាងក្រៅសេតវិមាន។ របងថ្មីនេះខ្ពស់ជាងរបងចាស់ និងបានដំឡើងខាងក្រៅសេតវិមានតាំងពីដើមឆ្នាំ 2020។

កុមារារូបនេះត្រូវបានប្រគល់ឱ្យឪពុកម្ដាយរួចហើយ បន្ទាប់ពីបុគ្គលិកអង្គភាពសម្ងាត់ «ចាប់ខ្លួន»

នេះមិនមែនជាលើកដំបូងទេដែលក្មេងតូចវារឆ្លងកាត់របងសេតវិមាន។ ហេតុការណ៍ដូចគ្នានេះក៏បានកើតឡើងកាលពីឆ្នាំ 2014 នៅមុនពេលប្រធានាធិបតី បារ៉ាក់ អូបាម៉ា ថ្លែងសុន្ទរកថាអំពីបញ្ហាប្រទេសអ៊ីរ៉ាក់។ ហេតុការណ៍នេះបាននាំឱ្យមានការបិទខ្ទប់សេតវិមានជាបណ្ដោះអាសន្ន ហើយសេចក្ដីថ្លែងការណ៍របស់លោក អូបាម៉ា ក៏ត្រូវបានពន្យារពេល៕

April 19, 2023

ស្អែកនេះអាចទស្សនាបាតុភូត «សូរ្យគ្រាសកូនកាត់» ដែលកម្រកើតមាន

នៅពេលកើតមានបាតុភូតសូរ្យគ្រាសកូនកាត់ ព្រះអាទិត្យនឹងមាន «រូបរាងពីរ» ផ្សេងគ្នានៅពេលមើលពីតំបន់ផ្សេងគ្នានៅលើផែនដី។

សូរ្យគ្រាសនៅថ្ងៃទី 20 មេសា 2023 គឺជាសូរ្យគ្រាសកូនកាត់ (hybrid solar eclipse) ដ៏សែនកម្រ ដោយសារវាមានតែ 3.1% ប៉ុណ្ណោះនៅក្នុងចំណោមបាតុភូតសូរ្យគ្រាសទាំងឡាយក្នុងសតវត្សរ៍ទី 21 នេះ។

សូរ្យគ្រាសលើកនេះនឹងចាប់ផ្ដើមពីភាគខាងត្បូងនៃមហាសមុទ្រឥណ្ឌា ឆ្លងកាត់ទ្វីបអូសេអានី អាស៊ីអាគ្នេយ៍ និងបញ្ចប់ត្រង់មហាសមុទ្រប៉ាស៊ីហ្វ៊ិក។ ប៉ុន្តែតំបន់ដែលមនុស្សអាចមើលឃើញសូរ្យគ្រាសរាងចិញ្ចៀន និងសូរ្យគ្រាសពេញលេញគឺមានតិចតួច ដោយភាគច្រើនកើតឡើងនៅលើសមុទ្រ។

នៅពេលបាតុភូតសូរ្យគ្រាសកើតឡើង តំបន់មួយចំនួននៅលើផែនដីនឹងមើលឃើញសូរគ្រាសពេញលេញ គ្រាដែលតំបន់ខ្លះទៀតនឹងមើលឃើញសូរ្យគ្រាសរាងចិញ្ចៀន ចំណែកតំបន់ខ្លះក៏មើលឃើញតែមួយផ្នែក។

សូរ្យគ្រាសពេញលេញលើកនេះនឹងមើលឃើញពីឧបទ្វីប North West Cape និងកោះ Barrow នៅអូស្ត្រាលីខាងលិច តំបន់ភាគខាងកើតរបស់ទីម័រខាងកើត កោះ Damar និងមួយផ្នែករបស់ខេត្ត Papua នៅឥណ្ឌូណេស៊ី។

សូរ្យគ្រាសពេញលេញ សូរ្យគ្រាសរាងចិញ្ចៀន និងសូរ្យគ្រាសមួយផ្នែក

យោងតាមអ្នកវិទ្យាសាស្ត្រ នៅពេលតាមដានបាតុភូតសូរ្យក្រាស អ្នកទស្សនាមិនត្រូវមើលដោយភ្នែកទទេ ឬពាក់វ៉ែនតាខ្មៅ ព្រោះមិនអាចទប់កាំរស្មីអាក្រក់ពីព្រះអាទិត្យ។ ល្អបំផុត អ្នកមើលគួរពាក់វ៉ែនតាពិសេសដែលអាចទប់រស្មី UV ឬវ៉ែនតាពិសេសសម្រាប់មើលបាតុភូតសូរ្យគ្រាស។

យើងក៏អាចមើលបាតុភូតសូរ្យគ្រាសដោយប្រយោល ដោយការចោះប្រហោងតូចលើប្រអប់កាតុង រួចដាក់ប្រហោងនោះឱ្យបែរចំថ្ងៃដើម្បីឱ្យពន្លឺព្រះអាទិត្យចាំងឆ្លងកាត់ប្រហោង និងជះទៅលើដី ដូច្នេះយើងអាចមើលរូបរាងសូរ្យគ្រាសនៅលើដីនោះដោយផ្ទាល់ និងដោយសុវត្ថិភាព។

សូរ្យគ្រាសកូនកាត់គឺជាការរួមផ្សំរបស់បាតុភូតសូរ្យគ្រាសពេញលេញ និងសូរ្យគ្រាសរាងចិញ្ចៀន។ សូរ្យគ្រាសកើតឡើងនៅពេលព្រះចន្ទស្ថិតនៅត្រង់ចន្លោះផែនដី និងព្រះអាទិត្យ និងបាំងពន្លឺមួយផ្នែកដែលជះពីព្រះអាទិត្យមកកាន់ផែនដី។ ពេលនោះ ស្រមោលរបស់ព្រះចន្ទនឹងជះមកលើផែនដី។ នៅតំបន់ដែលមានស្រមោលព្រះចន្ទឆ្លងកាត់ មនុស្សម្នានឹងមើលឃើញព្រះអាទិត្យត្រូវព្រះចន្ទបាំងបិទមួយផ្នែក (សូរ្យគ្រាសមួយផ្នែក) ឬបាំងបិទទាំងស្រុង (សូរ្យគ្រាសពេញលេញ)។

នៅពេលផែនដី និងព្រះចន្ទមានគម្លាតឆ្ងាយពីគ្នាជាងធម្មតា ទំហំព្រះចន្ទដែលមនុស្សមើលឃើញគឺមានទម្រង់តូចជាងទំហំនៃរូបរាងរបស់ព្រះអាទិត្យ នាំឱ្យព្រះចន្ទមិនអាចបិទបាំងព្រះអាទិត្យបានទាំងស្រុង ដោយបន្សល់ទុកពន្លឺជារង្វង់មូលត្រង់ជាយខាងក្រៅដែលដូចទៅនឹងចិញ្ចៀន ដែលនោះគេហៅថា សូរ្យគ្រាសរាងចិញ្ចៀន៕

April 19, 2023

តៃវ៉ាន់ទំនងជាបានទិញមីស៊ីលប្រឆាំងនាវាចម្បាំងទំនើបពីសហរដ្ឋអាម៉េរិក

កោះតៃវ៉ាន់ទំនងជាបានចំណាយប្រាក់ជិត 1.2 ពាន់លានដុល្លារអាម៉េរិកដើម្បីទិញមីស៊ីលប្រឆាំងនាវាចម្បាំង Harpoon បាញ់ពីដី ដែលផលិតដោយសហរដ្ឋអាម៉េរិក ចំនួន 400 គ្រាប់បន្ថែមទៀត។

ប្រធានក្រុមប្រឹក្សាពាណិជ្ជកម្មអាម៉េរិក-តៃវ៉ាន់ Rupert Hammond-Chambers កាលពីថ្ងៃទី 17 មេសា និយាយថា កងទ័ពជើងទឹកអាម៉េរិកបានជំនួសមុខឱ្យកម្លាំងប្រដាប់អាវុធតៃវ៉ាន់ ចុះហត្ថលេខាលើកិច្ចព្រមព្រៀងទិញមីស៊ីលប្រឆាំងនាវាចម្បាំង UGM-84 ដែលផលិតដោយសាជីវកម្ម Boeing ហើយនេះគឺជាលើកដំបូងដែលតៃប៉ិមានមីស៊ីល Harpoon កំណែបាញ់ពីដី។

ព័ត៌មាននេះត្រូវបានបង្ហើបឱ្យដឹងនៅប៉ុន្មានថ្ងៃក្រោយពីមន្ទីរបញ្ចកោណប្រកាសអំពីកិច្ចព្រមព្រៀងតម្លៃ 1.17 ពាន់លានដុល្លារសម្រាប់ការទិញមីស៊ីលប្រឆាំងនាវាចម្បាំង Harpoon ចំនួន 400 គ្រាប់ ដែលត្រូវប្រគល់រួចរាល់នៅឆ្នាំ 2029 ប៉ុន្តែមិនបានឱ្យដឹងអំពីអតិថិជន។

ទាក់ទងនឹងកិច្ចព្រមព្រៀង ក៏ដូចជាព័ត៌មានដែលត្រូវបានបង្ហើបឱ្យដឹងខាងលើ ទីក្រុងតៃប៉ិមិនទាន់បញ្ចេញប្រតិកម្មអ្វីនៅឡើយ។ ចំណែកក្រសួងការពារជាតិអាម៉េរិកក៏បានបដិសេធការបញ្ចេញមតិអំពីករណីនេះ ប៉ុន្តែអះអាងថា វ៉ាស៊ីងតោនត្រៀមខ្លួនរួចរាល់ក្នុងការផ្ដល់ឱ្យតៃវ៉ាន់នូវសព្វាវុធចាំបាច់ដើម្បីរក្សាសមត្ថភាពការពារខ្លួន។

Chang Che-ping មេដឹកនាំយោធាលំដាប់ទីពីររបស់កងទ័ពតៃវ៉ាន់ កាលពីឆ្នាំ 2020 ធ្លាប់បានប្រកាសថា តៃប៉ិចង់ទិញ Harpoon បាញ់ពីដីរបស់វ៉ាស៊ីងតោន ដើម្បីពង្រឹងសមត្ថភាពការពារទឹកដី និងបានអះអាងថា ផែនការទាំងនេះអាចត្រូវបានអនុវត្តក្នុងឆ្នាំ 2023។ បច្ចុប្បន្ន តៃវ៉ាន់មានកំណែ Harpoon បាញ់ពីយន្តហោះ និងនាវាចម្បាំង។

មីស៊ីលប្រឆាំងនាវាចម្បាំង Harpoon របស់សហរដ្ឋអាម៉េរិក

Harpoon គឺជាមីស៊ីលប្រឆាំងនាវាចម្បាំងពិសេសដំបូងរបស់ទ័ពជើងទឹកអាម៉េរិក ដែលបង្ហាញខ្លួនជាលើកដំបូងកាលពីដើមឆ្នាំ 1977។ មីស៊ីលនេះអាចបាញ់បានចម្ងាយ 280 គីឡូម៉ែត្រ និងល្បឿន 865 គីឡូម៉ែត្រ/ម៉ោង ហើយអាចហោះលើផ្ទៃទឹកសមុទ្រតែប៉ុន្មានម៉ែត្រប៉ុណ្ណោះក្នុងពេលសំដៅជិតដល់គោលដៅ។ Harpoon មួយគ្រាប់ផ្ទុកក្បាលគ្រាប់ផ្ទុះទម្ងន់ 220 គីឡូក្រាម ល្មមអាចគំរាមកំហែងដល់នាវាចម្បាំងច្រើនប្រភេទនាពេលបច្ចុប្បន្ន។

ប្រទេសចិនចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួនដែលមិនអាចកាត់ផ្ដាច់បាន ហើយថានឹងប្រើប្រាស់កម្លាំងបាយដើម្បីដណ្ដើមយកមកកាន់កាប់ បើសិនចាំបាច់។ ចំណែកក្រុមមេដឹកនាំកោះតៃវ៉ាន់វិញអះអាងថា មានតែពលរដ្ឋរបស់កោះនេះប៉ុណ្ណោះដែលមានសិទ្ធិសម្រេចជោគវាសនារបស់តៃវ៉ាន់។ រីឯសហរដ្ឋអាម៉េរិកវិញ ថ្វីបើមិនមានទំនាក់ទំនងការទូតជាផ្លូវការជាមួយតៃវ៉ាន់ ប៉ុន្តែគឺជាអ្នកផ្គត់ផ្គង់អាវុធសំខាន់ជាងគេរបស់ទីក្រុងតៃប៉ិ៕

April 18, 2023

អាម៉េរិកវាយឆ្មក់លើមេបញ្ជាការជាន់ខ្ពស់របស់ ISIS នៅប្រទេសស៊ីរី

សហរដ្ឋអាម៉េរិកបានឱ្យដឹងថា កងកម្លាំងរបស់ខ្លួនបានធ្វើការវាយឆ្មក់ដោយឧត្ថម្ភាគចក្រនៅភាគខាងជើងនៃប្រទេសស៊ីរី ហើយទំនងជាបានសម្លាប់មេបញ្ជាការជាន់ខ្ពស់មួយរូបរបស់ ISIS។

«កងកម្លាំងនៃទីបញ្ជាការកណ្ដាលកងទ័ពអាម៉េរិក (CENTCOM) ធ្វើការវាយឆ្មក់នៅភាគខាងជើងប្រទេសស៊ីរីកាលពីព្រឹកព្រលឹមថ្ងៃទី 17 មេសា សំដៅលើមេដឹកនាំជាន់ខ្ពស់ម្នាក់របស់ក្រុមប្រដាប់អាវុធរដ្ឋអ៊ីស្លាម (ISIS) និងជាអ្នករៀបផែនការសម្រាប់ការវាយប្រហារភេរវកម្មនៅមជ្ឈិមបូព៌ា និងអឺរ៉ុប» CENTCOM ប្រកាសនាថ្ងៃនេះដូច្នេះ។

CENTCOM មិនបញ្ជាក់ព័ត៌មានលំអិតស្ដីពីអត្តសញ្ញាណរបស់មេដឹកនាំ ISIS នៅក្នុងការវាយឆ្មក់ និងមូលហេតុដែលពួកគេមិនទាន់អាចបញ្ជាក់បានថាជននេះបានស្លាប់ ឬនៅ។ កងកម្លាំងពិសេសអាម៉េរិកតែងតែបញ្ជាក់អត្តសញ្ញាណគោលដៅដោយការយកស្នាមក្រយៅដៃ ឬវិភាគ DNA នៅក្នុងករណីមានអំណោយផលល្អ។

យោងតាម CENTCOM អាម៉េរិកបានរៀបផែនការយ៉ាងហ្មត់ចត់ដើម្បីធានាថា យុទ្ធនាការវាយឆ្មក់របស់ខ្លួនទទួលបានជោគជ័យ។ នៅក្នុងការវាយឆ្មក់លើកនេះ ពុំមានទាហានអាម៉េរិក ឬពលរដ្ឋស៊ីវិលរងរបួស ហើយក៏ពុំមានឧត្ថម្ភាគចក្រណាមួយរបស់អាម៉េរិកបានរងការខូចខាត។

«បើទោះបានចុះខ្សោយ ប៉ុន្តែ ISIS នៅតែធ្វើសកម្មភាពក្នុងតំបន់ ដោយពួកគេចង់វាយប្រហារចេញផុតពីមជ្ឈិមបូព៌ា។ យើងនឹងបន្តធ្វើយុទ្ធនាការមិនឈប់ឈរសំដៅលើ ISIS» ឧត្ដមសេនីយ៍ Michael Kurilla មេបញ្ជាការរបស់ CENTCOM ឱ្យដឹងដូច្នេះ។

ចំណែកអ្នកនាំពាក្យរបស់ CENTCOM ក៏បាននិយាយថា ការវាយឆ្មក់នេះបញ្ជាក់ជាថ្មីនូវការសន្យារបស់សហរដ្ឋអាម៉េរិកជាមួយនឹងតំបន់ ក៏ដូចជាធានាលើការផ្ដួល ISIS។

ISIS បានបាត់បង់ទឹកដីមួយភាគធំដែលធ្លាប់គ្រប់គ្រងនៅស៊ីរី និងអ៊ីរ៉ាក់ ក្រោយពីអំណាចរបស់ពួកគេបានឡើងដល់កំពូលនៅមជ្ឈិមបូព៌ាកាលពីឆ្នាំ 2014 និងបានបាត់បង់មូលដ្ឋានចុងក្រោយនៅសមុទ្រខ្សាច់ក្នុងតំបន់ភាគខាងកើតប្រទេសស៊ីរីកាលពីដើមឆ្នាំ 2019។ មនុស្សជាច្រើននៅតែជឿថា ISIS អាចនឹងងើបឡើងវិញ។

កាលពីខែកុម្ភៈ 2023 របាយការណ៍មួយរបស់អង្គការសហប្រជាជាតិបានឱ្យដឹងថា ISIS មានសមាជិក និងអ្នកគាំទ្រប្រហែលពី 5,000 ទៅ 7,000 នាក់ នៅប្រទេសស៊ីរី និងអ៊ីរ៉ាក់ ហើយពាក់កណ្ដាលក្នុងចំណោមនោះគឺជាខ្មាន់កាំភ្លើង។

នៅចុងឆ្នាំកន្លង ISIS ប្រកាសថា បានតែងតាំង Abu al-Hussein al-Husseini al-Quraishi ជាមេបញ្ជាក់កំពូល ក្រោយពីមេដឹកនាំរបស់ពួកគេត្រូវបានសម្លាប់នៅភាគខាងត្បូងប្រទេសស៊ីរី៕

April 17, 2023

ទាហានអ៊ីរ៉ង់ដប់នាក់ដែលបានបាញ់ទម្លាក់យន្តហោះអ៊ុយក្រែនសម្លាប់មនុស្ស 176 នាក់ ត្រូវបានកាត់ទោស

តុលាការអ៊ីរ៉ង់ បានកាត់ទោសសមាជិកដប់នាក់របស់កងកម្លាំងប្រដាប់អាវុធដែលទាក់ទិននឹងករណីបាញ់ច្រឡំយន្តហោះពាណិជ្ជកម្មដឹកមនុស្ស 176 នាក់របស់ប្រទេសអ៊ុយក្រែន កាលពីឆ្នាំ 2020។

គេហទំព័ររបស់ស្ថាប័នយុត្តិធម៌អ៊ីរ៉ង់ Iran Mizan កាលពីថ្ងៃទី 16 មេសា បានរាយការណ៍ថា មេបញ្ជាការម្នាក់របស់កងទ័ពប្រទេសនេះត្រូវបានកាត់ទោសឱ្យជាប់ពន្ធនាគារដប់ឆ្នាំ ព្រោះតែបានប្រព្រឹត្តខុសបទបញ្ជា ដោយសារបានបាញ់មីស៊ីលពីរគ្រាប់ដោយមិនមានការអនុញ្ញាត នាំឱ្យមានករណីបាញ់ច្រឡំយន្តហោះដឹកអ្នកដំណើរ 176 នាក់របស់អ៊ុយក្រែន កាលពីខែមករា 2020។ ទាហាន 9 នាក់ផ្សេងទៀតត្រូវបានកាត់ទោសដាក់ពន្ធនាគារចាប់ពីមួយដល់បីឆ្នាំ។

ជើងហោះហើរលេខ PS752 របស់ក្រុមហ៊ុនអាកាសចរណ៍អន្តរជាតិអ៊ុយក្រែន (UIA) បានធ្លាក់បន្ទាប់ពីហោះឡើងបានពីរនាទីពីព្រលានយន្តហោះអន្តរជាតិ Imam Khomeini នៅអ៊ីរ៉ាក់ នាព្រឹកថ្ងៃទី 08 មករា 2020 ប៉ុន្មានម៉ោងប៉ុណ្ណោះក្រោយពីទីក្រុងតេហេរ៉ង់វាយប្រហារដោយរ៉ុក្កែតទៅលើមូលដ្ឋានទ័ពដែលមានវត្តមានរបស់កងកម្លាំងអាម៉េរិកនៅប្រទេសអ៊ីរ៉ាក់ ដើម្បីសងសឹកទៅនឹងការធ្វើឃាតឧត្តមសេនីយ៍ Qassem Soleimani។

បីថ្ងៃក្រោយការបាញ់ទម្លាក់យន្តហោះរបស់អ៊ុយក្រែន អាជ្ញាធរអ៊ីរ៉ង់ប្រកាសទទួលស្គាល់ថា បានបាញ់ច្រឡំ ដោយសារតែគិតថា យន្តហោះអ៊ុយក្រែនគឺជាមីស៊ីលរបស់អាម៉េរិក បណ្ដាលឱ្យមនុស្សទាំង 176 នាក់នៅលើយន្តហោះនោះ បាត់បង់ជីវិត។

ខែវិច្ឆិកា 2021 អ៊ីរ៉ង់ប្រកាសបើកសវនាការនៅតេហេរ៉ង់ ដើម្បីកាត់ទោសទាហានដប់នាក់។ ខែមករា 2022 អ៊ីរ៉ង់ប្រកាសចាប់ផ្ដើមសងសំណង 150,000 ដុល្លារអាម៉េរិកដល់គ្រួសារជនរងគ្រោះ។

ក្រុមប្រទេសដែលដឹកនាំដោយកាណាដា កំពុងនាំយកករណីបាញ់ទម្លាក់យន្តហោះខាងលើឡើងតុលាការយុត្តិធម៌អន្តរជាតិ។ ចំណែកសមាគមគ្រួសារជនរងគ្រោះ កាលពីថ្ងៃទី 16 មេសាក៏បានរម្លឹកឡើងវិញនូវប្រកាសដែលថា គួរតែនាំយករឿងក្ដីនេះឡើងតុលាការអន្តរជាតិ៕

April 17, 2023

Category: អន្តរជាតិ