អន្តរជាតិ - La Reine Media

ទាហានឥណ្ឌា-ចិន វាយតប់គ្នានៅព្រំដែន បណ្ដាលឱ្យមនុស្ស3នាក់ស្លាប់

ទាហានឥណ្ឌា និងទាហានចិន “ប្រវាយប្រតប់គ្នា” យ៉ាងខ្លាំងក្លានៅជ្រលងភ្នំ Galwan ក្នុងតំបន់ Ladakh បណ្ដាលឱ្យទាហានឥណ្ឌា3នាក់បានបាត់បង់ជីវិត។

ក្នុងខណៈពេលធ្វើសកម្មភាពកាត់បន្ថយភាពតានតឹងដែលចេះតែកើនឡើងរវាងចិននិងឥណ្ឌានៅជ្រលងភ្នំ Galwan មានករណីវាយតប់គ្នាមួយបានកើតឡើង នាំឱ្យភាគីទាំងសងខាងរងរបួស និងស្លាប់។ នាយទាហានម្នាក់ និងទាហានឥណ្ឌា2នាក់បានបាត់បង់ជីវិត” នេះបើតាមសេចក្ដីប្រកាសក្នុងថ្ងៃនេះរបស់កងទ័ពឥណ្ឌា។

កងទ័ពឥណ្ឌាបានបញ្ជាក់ថា ទាហាន3នាក់របស់ខ្លួនដែលត្រូវបានសម្លាប់នោះមិនមែនដោយសារការបាញ់ប្រហារនោះទេ។

ក្នុងសេចក្ដីប្រកាសខាងលើបានឱ្យដឹងដែរថា “ក្រុមមន្ត្រីជាន់ខ្ពស់របស់ប្រទេសទាំងពីរកំពុងជួបពិភាក្សាគ្នាដើម្បីរកវិធីកាត់បន្ថយកម្ដៅនៃស្ថានករណ៍នេះ”។

ទាហានឥណ្ឌា-ចិន វាយតប់គ្នា បណ្ដាលឱ្យមនុស្ស3នាក់ស្លាប់

សារព័ត៌មានឥណ្ឌាបានចេញផ្សាយថា នាយទាហាននិងទាហានឥណ្ឌា3នាក់ដែលបានស្លាប់នោះ គឺស្ថិតនៅក្នុងជួរកងទ័ពជើងគោក ក្នុងនោះមាននាយទាហានម្នាក់មានឋានន្តរស័ក្ដិអនុសេនីយ៍។ នេះគឺជាហេតុការណ៍ប្រើហិង្សាដាក់គ្នាដំបូងដែលបង្កឱ្យមានមនុស្សស្លាប់រវាងទាហានចិននិងឥណ្ឌានៅតំបន់ព្រំដែន រាប់ចាប់ពីឆ្នាំ1975 រហូតមកដល់បច្ចុប្បន្ន។

ទាហានឥណ្ឌានិងទាហានចិនបាននិងកំពុងប្រឈមមុខដាក់គ្នាអស់រយៈពេលជាច្រើនសប្ដាហ៍មកហើយនៅបឹង Pangong Tso ជ្រលងភ្នំ Galwan ក្នុងតំបន់ Demchok និងមូលដ្ឋាន Daulat Beg Oldi នៅភាគខាងត្បូងតំបន់ Ladakh។ ការប្រវាយប្រតប់គ្នាជាច្រើនលើកកន្លងមកបានបណ្ដាលឱ្យភាគីទាំងសងខាងរងរបួស ប៉ុន្តែមិនមានករណីស្លាប់នោះទេ។

https://www.youtube.com/watch?v=oz62eFRVH8A

ភាគីឥណ្ឌាបានចោទប្រកាន់ទាហានមួយក្រុមរបស់ចិនថា បានឆ្លងកាត់បន្ទាត់ព្រំដែន និងបានចូលមកក្នុងទឹកដីដែលឥណ្ឌាកំពុងកាន់កាប់។

ក្រុមអ្នកវិភាគយល់ឃើញថា មូលហេតុដែលនាំឱ្យមានករណីប្រវាយប្រតប់គ្នារវាងទាហានចិននិងទាហានឥណ្ឌានេះគឺដោយសារឥណ្ឌាធ្វើការសាងសង់ផ្លូវថ្នល់នានា និងព្រលានយន្តហោះក្នុងតំបន់ Ladakh។ ប្រទេសចិនបានធ្វើការប្រឆាំងជាច្រើនលើកចំពោះការសាងសង់ផ្លូវ និងព្រលានយន្តហោះរបស់ឥណ្ឌានេះ។

រដ្ឋាភិបាលឥណ្ឌាកំពុងអនុវត្តគម្រោងកែលម្អផ្លូវថ្នល់ក្នុងតំបន់ ក្នុងនោះផ្លូវចំនួន66ខ្សែនៅតាមបន្ទាត់ព្រំដែនជាមួយចិននឹងត្រូវបានស្ថាបនាចាប់ពីឆ្នាំ2022ខាងមុខ។ ផ្លូវមួយខ្សែក្នុងចំណោមនោះគឺជាផ្លូវដែលឆ្លងកាត់ជ្រលងភ្នំ Galwan ភ្ជាប់ជាមួយមូលដ្ឋានទ័ព Daulat Beg Oldi ដែលត្រូវបានសម្ពោធបើកករដ្ឋានសាងសង់កាលពីខែតុលា ឆ្នាំ2019។

ចិននិងឥណ្ឌាបានបង្កើតយន្តការដោះស្រាយជម្លោះព្រំដែនចាប់ពីឆ្នាំ1962 បន្ទាប់ពីសង្គ្រាមចិន-ឥណ្ឌាបានបញ្ចប់។ ក្នុងសង្គ្រាមនោះ ឥណ្ឌារងការខូចខាតច្រើនជាងគេ បង្ខំឱ្យប្រទេសនេះត្រូវធ្វើកំណែទម្រង់កងទ័ពដើម្បីត្រៀមសម្រាប់សង្គ្រាមនាពេលអនាគត៕

ប្រភព៖ សារព័ត៌មានបរទេស

June 16, 2020

អ្នកមាននៅហុងកុងត្រៀមខ្លួនសម្រាប់ស្ថានភាពអាក្រក់បំផុតទាក់ទិននឹងទ្រព្យសម្បត្តិ និងអស្ថិរភាពសង្គម

Cheng ដែលជាអ្នកជំនួញហុងកុងម្នាក់ បានផ្ទេរប្រាក់10លានដុល្លារសហរដ្ឋអាមេរិកទៅកាន់ប្រទេសសិង្ហបុរី ចំណែក Dennis ដែលជាប្រធានក្រុមហ៊ុនពិគ្រោះយោបល់ក៏កំពុងស្វែងរកទិញផ្ទះនៅប្រទេសអង់គ្លេស។

ហុងកុងដែលជាមជ្ឈមណ្ឌលហិរញ្ញវត្ថុអាស៊ី កំពុងតែឆ្លងកាត់វិបត្តិសេដ្ឋកិច្ចនិងនយោបាយដ៏អាក្រក់បំផុត រាប់ចាប់ពីឆ្នាំ1997។ បើទោះជាមកដល់បច្ចុប្បន្ន ទីក្រុងហុងកុងមិនទាន់មានរលកនៃការដកទុន ប៉ុន្តែក្រុមអ្នកមាននៅទីនេះក៏កំពុងតែដុតដៃដុតជើងក្នុងការទប់ទល់នឹងហានិភ័យដែលអាចកើតឡើងនាពេលខាងមុខ។ ពួកគេកាត់បន្ថយវត្តមាននៅហុងកុង និងស្វែងរកវិធីដើម្បីអាចដកទ្រព្យចេញពីទីនេះ។

Cheng គឺជាឧទាហរណ៍។ អ្នកជំនួញហុងកុង ឈ្មោះ Cheng នេះ បានផ្ទេរប្រាក់ចំនួន10លានដុល្លារអាមេរិក ទៅកាន់សិង្ហបុរី និងកំពុងដាក់លក់ផ្ទះរបស់ខ្លួននៅហុងកុងផងដែរ។ លោក Cheng មិនទាន់មានគម្រោងចាកចេញពីហុងកុងនៅឡើយ ប៉ុន្តែកំពុងពិចារណាទៅលើជម្រើសដទៃ។ លោកនិងក្រុមគ្រួសារសុទ្ធតែមានលិខិតឆ្លងដែនសម្រាប់ទៅកាន់សហរដ្ឋអាមេរិក កាណាដា អូស្ត្រាលី និងបារាំង។ គ្រួសារលោក Cheng កំពុងមានការព្រួយបារម្ភចំពោះបញ្ហាដែលចិនរឹតបន្តឹងក្នុងការគ្រប់គ្រងហុងកុង និងហានិភ័យនៃអស្ថិរភាពដែលកាន់តែតានតឹងឡើងពីមួយថ្ងៃទៅមួយថ្ងៃ។

អ្នកមាននៅហុងកុងត្រៀមខ្លួនសម្រាប់ស្ថានភាពអាក្រក់បំផុតទាក់ទិននឹងទ្រព្យសម្បត្តិ និងអស្ថេរភាពសង្គម — ទីក្រុងហុងកុង

ធនាគារដែលផ្ដល់សេវាកម្មសម្រាប់ឯកត្តជន(Retail Banking)នានាបានឱ្យដឹងថា ពួកគេកំពុងពន្លឿនផែនការបន្ទាន់ បន្ទាប់ពីប្រទេសចិនកាលពីខែមុន បានប្រកាសថានឹងអនុវត្តច្បាប់សន្តិសុខជាតិលើហុងកុង។ ច្បាប់នេះត្រូវបានគេយល់ថានឹងគំរាមកំហែងដល់សិទ្ធិស្វ័យសម្រេចរបស់ហុងកុង នាំឱ្យអាមេរិកាំងដាក់ទណ្ឌកម្មទៅលើទីក្រុងនេះ និងធ្វើឱ្យមានរលកបាតុកម្មជាថ្មី។

“រថភ្លើងកំពុងតែធ្លាក់ចេញពីផ្លូវដែកបន្តិចម្ដង” Richard Harris នាយករបស់ Port Shelter Investment Management ថ្លែងបែបនេះ។ លោកបន្តថា “អ្នកដែលមិនទាន់បានបញ្ចេញសកម្មភាពអ្វីសោះ នឹងអាចត្រូវបានដាស់តឿនជាមួយនឹងការគិត៖ “ខ្ញុំគួរតែផ្ទេរទ្រព្យសម្បត្តិចេញពីទីនេះហើយមើលទៅ”។ ដំណើរការនេះនឹងអាចនៅតែបន្តកើតឡើង”។

យ៉ាងនេះក្ដី មានភ័ស្តុតាងតិចតួចណាស់ដែលបង្ហាញថា រលកនៃការដកទ្រព្យចេញពីហុងកុងកំពុងកើតឡើង។ ខ្ទង់ប្រាក់ដែលបានផ្ញើនៅក្នុងធនាគារនៅហុងកុង នៅតែកើនឡើងក្នុងខែមេសា។ ដុល្លារហុងកុងនៅតែមានតម្លៃខ្ពស់។

អាជ្ញាធរហុងកុងនិយាយថា ច្បាប់សន្តិសុខហុងកុងនឹងជួយឱ្យទីក្រុងនេះក្លាយជាតំបន់ “សុវត្ថិភាព និងស្ថិរភាពជាងបច្ចុប្បន្ន” ព្រមទាំងមិនប៉ះពាល់ដល់សិទ្ធិស្វ័យសម្រេច និងសេរីភាពរបស់ប្រជាជន ឬអ្នកវិនិយោគបរទេសនោះឡើយ។ មហាសេដ្ឋីហុងកុងមួយចំនួនក៏បានគាំទ្រដល់ច្បាប់នេះផងដែរ។

ប៉ុន្តែ ក្រុមអ្នកជំនួញ និងអ្នកមានចំណូលខ្ពស់បែរជាមិនយល់ស្របនឹងមតិខាងលើ។ Sam ដែលជាបុគ្គលិកធនាគារវិនិយោគលំដាប់ខ្ពស់នៅហុងកុង បានសម្រេចចិត្តថានឹងចាកចេញពីទីនេះ។ លោកនឹងទៅរស់នៅក្នុងប្រទេសអូស្ត្រាលីជាមួយប្រពន្ធនិងកូនៗនៅ3ខែខាងទៀត។

Margaret Chau ដែលនាយកកម្មវិធីចំណាកស្រុកនៃក្រុមហ៊ុន Goldmax Immigration Consulting បានឱ្យដឹងថា ចំនួនអតិថិជនដែលបានមកទាក់ទងក្រុមហ៊ុនដើម្បីសុំប្រឹក្សាយោបល់បានកើនឡើង5ដងក្រោយពីមានដំណឹងស្ដីអំពីច្បាប់សន្តិសុខហុងកុង។ បច្ចុប្បន្ន អតិថិជនស្ទើរតែទាំងអស់របស់អ្នកស្រី មានចំណាប់អារម្មណ៍ក្នុងការរៀបគម្រោងចាកចេញពីហុងកុងច្រើនជាងការចាកចេញទៅភ្លាមៗ។ អ្នកស្រី Margaret Chau និយាយថា “ពួកគេចាត់ទុកនេះជាគម្រោងបង្ការ”។

នាយកក្រុមហ៊ុន Kamet Capital លោក Kerry Goh វិញ បានប្រាប់ថា អតិថិជនរបស់លោកលែងសួរសំណួរទូទៅដូចមុនទាក់ទិននឹងការចាកចេញពីហុងកុង ប៉ុន្តែពួកគេងាកមកសួរអំពីព័ត៌មានលម្អិត តាំងពីសាលារៀន ទិដ្ឋាការ រហូតដល់គណនីធនាគារ។ “អ្វីដែលបានកើតឡើងនៅហុងកុងនាបច្ចុប្បន្ន គឺពិតជាកំពុងពន្លឿននៃដំណើរការទៅរកឆ្នាំ2047” លោក Goh និយាយបែបនេះសំដៅទៅលើរយៈពេលកំណត់ដែលហុងកុងបានទទួលសិទ្ធិគ្រប់គ្រងដោយស្វ័យភាពទៅតាមកិច្ចសន្យារបស់ប្រទេសចិនដែលត្រូវបានលើកឡើងកាលពីអង់គ្លេសប្រគល់ហុងកុងមកឱ្យចិនវិញកាលពីឆ្នាំ1997 ពោលគឺហុងកុងនឹងបាត់បង់សេរីភាពមុនឆ្នាំ2047។

Dennis ដែលជាអ្នកដឹកនាំម្នាក់ អាយុ34ឆ្នាំ មកពីក្រុមហ៊ុនប្រឹក្សាយោបល់មួយនៅហុងកុងបានថ្លែងថា គ្រួសារ និងមិត្តរបស់លោកបានចាប់ផ្ដើមផ្ទេរប្រាក់ចេញពីហុងកុង។ ចំណែកលោក ក៏កំពុងតែស្វែងរកទិញអចលនទ្រព្យនៅអង់គ្លេស ដែលជាកន្លែងលោកធ្លាប់បានសិក្សាជិត10ឆ្នាំ ព្រោះតែតម្លៃអចលនទ្រព្យនៅហុងកុងមានតម្លៃខ្ពស់។

Dennis និយាយថា “នៅទីក្រុងឡុងដ៍ ខ្ញុំអាចទិញផ្ទះមួយខ្នងធំជាងនៅហុងកុង។ ដូច្នេះ តើហេតុអ្វីយើងមិនទិញ?”។ លោកបន្តថា “ខ្ញុំគ្រាន់តែចង់ការពារប្រាក់របស់ខ្ញុំឱ្យគេចផុតពីអស្ថិរភាពតែប៉ុណ្ណោះ”៕

ប្រភព៖ Bloomberg

June 16, 2020

យន្តហោះចម្បាំងឥណ្ឌូនេស៊ី ធ្លាក់ចំផ្ទះប្រជាជនជាច្រើនខ្នងពេលកំពុងហ្វឹកហាត់

យន្តហោះចម្បាំងប្រភេទស្រាល Hawk 209 មួយគ្រឿងរបស់ឥណ្ឌូនេស៊ី បានជួបនឹងបញ្ហាម៉ាស៊ីន អ្នកបើកបរបានចុចកៅអីរំដោះខ្លួនទាន់ពេល ខណៈយន្តហោះធ្លាក់ចំផ្ទះជាច្រើនខ្នងរបស់ប្រជាពលរដ្ឋ។

“មានយន្តហោះចម្បាំង3គ្រឿងបានចូលរួមធ្វើសមយុទ្ធកាលពីថ្ងៃទី15មិថុនាកន្លងទៅនៅក្នុងខេត្ត Riau នៅលើកោះ Sumatra។ នៅពេលយន្តហោះទាំងនេះត្រៀមចុះចត ក៏ស្រាប់តែមានមួយគ្រឿងបានជួបនឹងបញ្ហាម៉ាស៊ីន ហើយក៏បានធ្លាក់នៅលើតំបន់ Kampar ដែលមានចម្ងាយ2គីឡូម៉ែត្រពីផ្លូវចុះចត” នេះបើតាមមេបញ្ជាការកងទ័ពអាកាសឥណ្ឌូនេស៊ី Fadjar Prasetyo។

អ្នកបើកបរតែម្នាក់គត់នៅលើយន្តហោះចម្បាំងធុនស្រាល Hawk 209 បានចុចកៅអីរំដោះខ្លួនដោយសុវត្ថិភាព ចំណែកយន្តហោះបានធ្លាក់ទៅលើផ្ទះរបស់ប្រជាជនជាច្រើនខ្នង ប៉ុន្តែមិនបានបង្កឱ្យមានពលរដ្ឋណាម្នាក់បាត់បង់ជីវិតនោះឡើយ។

ក្រសួងការពារជាតិឥណ្ឌូនេស៊ីកំពុងធ្វើការស្រាវជ្រាវរកមូលហេតុដែលនាំឱ្យមានគ្រោះថ្នាក់នេះ។ មុនហេតុការណ៍ខាងលើនេះ10ថ្ងៃក៏មានករណីគ្រោះថ្នាក់ធ្លាក់ឧទ្ធម្ភាគចក្រ Mi-17 មួយគ្រឿងរបស់ទ័ពអាកាសឥណ្ឌូនេស៊ី ខណៈកំពុងធ្វើការហ្វឹកហាត់ បណ្ដាលឱ្យមនុស្ស4នាក់បានបាត់បង់ជីវិត។

Hawk 209 គឺជាយន្តហោះចម្បាំងធុនស្រាលដែលមានម៉ាស៊ីនតែមួយ ផលិតឡើងដោយក្រុមហ៊ុន British Aerospace របស់ប្រទេសអង់គ្លេស ដែលអភិវឌ្ឍសម្រាប់កងទ័ពឥណ្ឌូនេស៊ី ដោយយោងទៅលើម៉ូដែលយន្តហោះប្រដេញសម្រាប់ហ្វឹកហាត់ Hawk 200។ Hawk 209 មានប្រព័ន្ធបំពាក់អាវុធចំនួន7 និងអាចបំពាក់កាំជ្រួច និងគ្រាប់បែកជាច្រើនប្រភេទ រួមនឹងប្រព័ន្ធយកការណ៍ដែលអនុញ្ញាតឱ្យវាអាចបំពេញបេសកកម្មអាពារដែនអាកាស ប្រឆាំងនាវាចម្បាំង វាយប្រហារតាមផ្លូវអាកាស និងការពារកងទ័ពថ្មើរជើងផងដែរ។

ទ័ពអាកាសឥណ្ឌូនេស៊ីមានយន្តហោះចម្បាំង Hawk 209 ចំនួន23គ្រឿង ប៉ុន្តែ តាមគម្រោងយន្តហោះទាំងនេះនឹងត្រូវបានជំនួសដោយយន្តហោះចម្បាំងទំនើប F-16 បន្តិចម្ដងៗនាពេលដ៏ខ្លីខាងមុខ៕

ប្រភព៖ Reuters

June 16, 2020

WHO ថា “សម្បុក COVID-19” នៅប៉េកាំង ពិតជាគួរឱ្យព្រួយបារម្ភ ខណៈជាង8លាននាក់បានឆ្លងវីរុសនេះនៅទូទាំងពិភពលោក

អង្គការសុខភាពពិភពលោកយល់ថា ចំនួនអ្នកឆ្លងវីរុសCOVID-19 នៅក្នុងរដ្ឋធានីប៉េកាំងនៃប្រទេសចិន កំពុងកើនឡើងសាជាថ្មី ក្រោយរយៈពេលជិត2ខែមកនេះ គឺពិតជាគួរឱ្យព្រួយបារម្ភ និងត្រូវតែចាត់វិធានការគ្រប់គ្រងឱ្យបានត្រឹមត្រូវ។

នៅក្នុងសន្និសីទសារព័ត៌មានមួយកាលពីថ្ងៃទី15ម្សិលមិញ នាយកកម្មវិធីបន្ទាន់របស់ WHO លោក Mike Ryan ថ្លែងថា “នៅប្រទេសចិន ក្រោយរយៈពេលជាង50ថ្ងៃ ហាក់មិនមានករណីឆ្លងវីរុសណាមួយកើតឡើង ដូច្នេះករណីឆ្លងតាមក្រុមបែបនេះគឺជាបញ្ហាគួរឱ្យព្រួយបារម្ភដែលត្រូវការការស្រាវជ្រាវ និងគ្រប់គ្រងជាបន្ទាន់”។

លោក Mike Ryan បន្តថា “ដូចដែលយើងធ្លាប់បានឃើញកន្លងមក ការបង្ហាញវត្តមានរបស់សម្បុកមេរោគថ្មី ពិសេសគឺករណីដែលមិនមានប្រភពច្បាស់លាស់ តែងតែជាបញ្ហាគួរព្រួយបារម្ភ។ ប៉ុន្តែ ប្រការដែលយើងចង់ឃើញនោះគឺការដោះស្រាយជាបន្ទាន់ និងចាត់វិធានការគ្រប់បែបយ៉ាង”។

ទាក់ទិននឹងព័ត៌មានពីមន្ត្រីចិនដែលយល់ថា សម្បុកមេរោគផ្ទុះឡើងនៅទីក្រុងប៉េកាំងបច្ចុប្បន្នមានប្រភពពីផ្នែកនាំចូលត្រីសាលម៉ុង លោក Ryan ថ្លែងថា មិនទាន់ប្រាកដនៅឡើង ហើយត្រូវស្រាវជ្រាវបន្ថែម។

ជាង8លាននាក់បានឆ្លង COVID-19 នៅទូទាំងពិភពលោក! WHO ថា "សម្បុកមេរោគ" នៅប៉េកាំង ពិតជាគួរឱ្យព្រួយបារម្ភ — នាយកកម្មវិធីបន្ទាន់របស់ WHO លោក Mike Ryan (ស្ដាំបង្អស់)

លោក Ryan សង្កត់ធ្ងន់ថា WHO កំពុងតាមដានយ៉ាងយកចិត្តទុកដាក់លើសម្បុកមេរោគថ្មីនៅប៉េកាំង និងត្រៀមខ្លួនជាស្រេចក្នុងការជួយផ្នែកបច្ចេកទេស និងសហការជាមួយមន្ត្រីចិនដើម្បីគ្រប់គ្រងស្ថានការណ៍។

មតិខាងលើនេះត្រូវបានធ្វើឡើងក្នុងគ្រាដែលចំនួនអ្នកឆ្លងវីរុសCOVID-19 នៅទីក្រុងប៉េកាំងបានកើនឡើង79ករណីបន្ថែមទៀតក្នុងរយៈពេលត្រឹមតែ4ថ្ងៃ បន្ទាប់ពីរយៈពេល2ខែដែលស្ទើរមិនមានករណីឆ្លងណាមួយកើតឡើង។

ករណីឆ្លងមេរោគថ្មីនេះ ស្ទើរតែទាំងអស់ត្រូវបានគេជឿថា មានជាប់ទាក់ទងនឹងផ្សារលក់ដុំ Xinfadi នៅរដ្ឋធានីប៉េកាំង។ តំណាំងភាគីគ្រប់គ្រងផ្សារនេះឱ្យដឹងថា តាមការធ្វើតេស្ត វីរុសCOVID-19 ហាក់បានឆ្លងពីតូបលក់ត្រីសាលម៉ុងនាំចូលពីបរទេសមួយកន្លែងនៅក្នុងផ្សារនេះ។

អាជ្ញាធរទីក្រុងប៉េកាំងបានស្នើឱ្យបិទផ្សារខាងលើ រួមជាមួយនឹងផ្សារមួយចំនួនដែលនៅក្បែរខាង ព្រមទាំងដាក់បម្រាមគោចរលើទីប្រជុំជនដែលនៅជុំវិញតំបន់ផ្សារទាំងនោះ និងអនុវត្តយន្តការសម័យសង្គ្រាមដើម្បីទប់ស្កាត់វីរុសឆ្លងរាលដាលក្នុងបំណងមិនឱ្យរដ្ឋធានីប៉េកាំងក្លាយជា “Wuhan ទីពីរ”។

COVID-19 បានចាប់ផ្ដើមផ្ទុះឆ្លងចេញពីផ្សារត្រីនិងសត្វព្រៃមួយកន្លែងក្នុងទីក្រុង Wuhan ខេត្ត Hubei ប្រទេសចិនកាលពីចុងឆ្នាំ2019។ បច្ចុប្បន្ន វីរុសនេះបានសម្លាប់មនុស្ស 438,408នាក់ ក្នុងចំណោមអ្នកជំងឺជាង 8,103,335លាននាក់នៅទូទាំងពិភពលោក។ ក្នុងរយៈពេល24ម៉ោងចុងក្រោយនេះ ចំនួនអ្នកស្លាប់ដោយសារវីរុសCOVID-19 នេះ មានចំនួន 3,267នាក់ និងអ្នកឆ្លងវីរុសមានចំនួន122,268នាក់៕

ប្រភព៖ សារព័ត៌មានបរទេស

June 16, 2020

ជិត8លាននាក់បានឆ្លងវីរុសCOVID-19 នៅទូទាំងសកលលោក

ពិភពលោកទាំងមូលបានរកឃើញអ្នកផ្ទុកវីរុសCOVID-19 ជិត8លាននាក់ និងអ្នកស្លាប់ជាង435,000នាក់។

ប្រទេស និងដែនដីចំនួន 221 ក្នុងពិភពលោក បានរាយការណ៍ថា បានរកឃើញអ្នកផ្ទុកវីរុស COVID-19 សរុប 7,981,067នាក់ និងអ្នកស្លាប់សរុប435,141នាក់។ អ្នកជំងឺកើន127,998នាក់ និងអ្នកស្លាប់កើន3,520នាក់បើធៀបនឹងម្សិលមិញ។ អ្នកជំងឺដែលបានជាសះស្បើយ មានចំនួន 4,096,444នាក់។

ទ្វីបអាមេរិកបានរកឃើញអ្នកផ្ទុកវីវុសCOVID-19 សរុបជិត4លាននាក់ ខណៈទ្វីបអឺរ៉ុបរកឃើញជាង2,200,000នាក់ ទ្វីបអាស៊ីរកឃើញជាង1,600,000នាក់ និងទ្វីបអាហ្វ្រិករកឃើញជាង244,000នាក់។

បើគិតតាមអត្រានៃចំនួនប្រជាជនសរុបក្នុងពិភពលោក ក្នុងចំណោមមនុស្ស1លាននាក់ គឺមាន1,024នាក់បានឆ្លងវីរុសCOVID-19 ចំណែកអ្នកអត្រានៃការស្លាប់វិញ គឺក្នុងចំណោមមនុស្ស1លាននាក់គឺមាន55.8នាក់បានស្លាប់ដោយសារវីរុសនេះ។

ប្រភព៖ សារព័ត៌មានបរទេស

June 15, 2020

UN ថា គ្រាប់កាំជ្រួចតម្រង់គោលដៅ ដែលវាយប្រហាររោងចក្រផលិតប្រេងរបស់អារ៉ាប៊ី សាអ៊ូឌីតនោះ ចេញមកពី “អ៊ីរ៉ង់”

អគ្គលេខាធិការអង្គការសហប្រជាជាតិ បានអះអាងចំពោះគណៈមន្ត្រីសន្តិសុខ UN ថា កាំជ្រួចតម្រង់គោលដៅដែលប្រើវាយប្រហាររោងចក្រចម្រាញ់ប្រេងដ៏ធំំមួយ និងព្រលានយន្តហោះអន្តរជាតិរបស់ប្រទេសអារ៉ាប៊ី សាអ៊ូឌីតកាលពីឆ្នាំទៅនោះ “មានប្រភពចេញមកពីប្រទេសអ៊ីរ៉ង់” ខណៈរដ្ឋបាលក្រុងតេអេរ៉ង់ បានប្រញាប់ចេញមកបដិសេធភ្លាមៗតែម្ដង។

លោក អង់តូនីញ៉ូ ហ្គុយតឺរេស អគ្គលេខាធិការ UN បានបញ្ជាក់ថា អាវុធ និងឧបករណ៍ដែលពាក់ព័ន្ធជាច្រើនបំណែកដែលសហរដ្ឋអាមេរិករឹបអូសបានកាលពីខែវិច្ឆិកា ឆ្នាំ2019 និងខែកុម្ភៈ ឆ្នាំ2020 “ចេញមកពីអ៊ីរ៉ង់” ដោយបំណែកខ្លះមានលក្ខណៈដូចគ្នានឹងទំនិញដែលផលិតដោយក្រុមហ៊ុនសញ្ជាតិអ៊ីរ៉ង់ និងមានតួអក្សរ ហ្វាហ្ស៊ី នៅលើនោះទៀតផង ខណៈដែលបំណែកខ្លះទៀត ត្រូវបាននាំចូលអ៊ីរ៉ង់ក្នុងអំឡុងខែកុម្ភៈ ឆ្នាំ2016 រហូតដល់ខែមេសា ឆ្នាំ2018។

លោក ហ្គុយតឺរេស បានចង្អុលបង្ហាញថា ការរៀបចំបញ្ជូនឧបករណ៍ទាំងនោះ អាចល្មើសមតិគណៈមន្ត្រីសន្តិសុខ UN ឆ្នាំ2015 ដែលធានាលើចំណុចព្រមព្រៀងគ្រប់គ្រងនុយក្លេអ៊ែរ រវាងប្រទេសអ៊ីរ៉ង់ នឹងក្រុមមហាអំណាច P5+1។

គណៈទូតអ៊ីរ៉ង់ប្រចាំ UN បានចង្អុលបង្ហាញថា របាយការណ៍នោះ “ខុសឆ្គងយ៉ាងធ្ងន់ធ្ងរ និងបន្លំបង្វែង ខុសពីការពិត…រដ្ឋបាលអ៊ីរ៉ង់ សូមបដិសេធចោលទាំងស្រុងចំពោះរបាយការណ៍ដែលថា អ៊ីរ៉ង់មានការពាក់ព័ន្ធជាមួយការនាំចេញអាវុធ និងឧបករណ៍ដែលប្រើប្រាស់ក្នុងការវាយប្រហារប្រទេសអារ៉ាប៊ី សាអ៊ូឌីត រួមទាំងទិន្នន័យដែលថា ភ័ស្តុតាងដែលសហរដ្ឋអាមេរិករឹបអូសបាននោះ មានប្រភពមកពីប្រទេសអ៊ីរ៉ង់”

សហរដ្ឋអាមេរិក បានទាមទារឱ្យគណៈមន្ត្រីសន្តិសុខ UN 15ប្រទេស បន្តអាយុបទបញ្ជាហ៊ុមព័ទ្ធផ្នែកអាវុធ(Arms embargo) ចំពោះប្រទេសអ៊ីរ៉ង់ ដែលកំពុងតែជិតផុតកំណត់ក្នុងខែតុលា តាមលក្ខខណ្ឌកិច្ចព្រមព្រៀងគ្រប់គ្រងនុយក្លេអ៊ែរ ខណៈប្រទេសរុស្ស៊ី និងចិន ដែលមានអំណាច “វេតូ” បានបញ្ជូនសញ្ញាជំទាស់យ៉ាងពេញទំហឹង។

ទាំងអស់នេះ លោក ហ្គុយតឺរេស នឹងត្រូវបញ្ជូនរបាយការណ៍ទៅគណៈមន្ត្រីសន្តិសុខ UN ក្នុង 1ឆ្នាំ 2ដង
ដើម្បីបកស្រាយរឿងបទបញ្ជាហ៊ុមព័ទ្ធផ្នែកអាវុធ និងការកំណត់ផ្សេងៗ ដែលចូលជាធរមានចំពោះអ៊ីរ៉ង់ ក្រោមកិច្ចព្រមព្រៀងគ្រប់គ្រងនុយក្លេអ៊ែរ។

អង្គការសហប្រជាជាតិ បានធ្វើការត្រួតពិនិត្យបំណែកគ្រាប់កាំជ្រួចដែលប្រើវាយប្រហាររោងចក្រចម្រាញ់ប្រេងរបស់ប្រទេសអារ៉ាប៊ី សាអ៊ូឌីត ក្នុងទីក្រុង អាហ្វីហ្វ កាលពីខែឧសភា ឆ្នាំទៅ រួមទាំងអាកាសយានដ្ឋានអន្តរជាតិ អាបា ក្នុងខែមិថុនា និងសីហា និងរោងចក្រចម្រាញ់ប្រេង 2កន្លែងទៀតរបសក្រុមហ៊ុន សាអ៊ូឌីត អារ៉ាមកូ នៅទីក្រុងឃូរ៉ៃស៍ និង Abqaiq ក្នុងខែកញ្ញា។

លោក ហ្គុយតឺរេស បានបញ្ជាក់នៅក្នុងរបាយការណ៍ថា “កាំជ្រួចតម្រង់គោលដៅ ឬបំណែកមួយចំនួនដែលប្រើវាយប្រហារទីតាំងទាំង 4កន្លែងនោះ មានប្រភពមកពីប្រទេសអ៊ីរ៉ង់” លោកថែមទាំង
ឱ្យដឹងទៀតថា យន្តហោះគ្មានអ្នកបើក(ដ្រូន) ដែលប្រើប្រាស់ក្នុងការវាយប្រហារកាលពីខែឧសភា និងកញ្ញា ឆ្នាំទៅនោះ ក៏ចេញមកពីប្រទេសអ៊ីរ៉ង់ដូចគ្នាដែរ។

UN ថែមទាំងរកឃើញទៀតផងថា ភ័ស្តុតាងមួយចំនួន ដែលសហរដ្ឋអាមេរិករឹបអូសបាន “មានលក្ខណៈដូច ឬស្រដៀងគ្នា” នឹងបំណែកកាំជ្រួចតម្រង់គោលដៅ និងដ្រូនដែលប្រើវាយប្រហារអារ៉ាប៊ី សាអ៊ូឌីត កាលឆ្នាំ2019។

លោកស្រី ខេលលី ក្រាហ្វត៍ ឯកអគ្គរដ្ឋទូតសហរដ្ឋអាមេរិក ប្រចាំ UN បានបញ្ជាក់ថា លោកស្រី នឹងចែកចាយសេចក្ដីព្រាងញត្តិ ពន្យារបទបញ្ជាហ៊ុមព័ទ្ធផ្នែកអាវុធ ជូនទៅបណ្ដារដ្ឋជាសមាជិកគណៈមន្ត្រីសន្តិសុខ UN ក្នុងពេលឆាប់ៗនេះ និងប្រសិនបើការទាមទារនេះ ត្រូវបដិសេធ សហរដ្ឋអាមេរិក នឹងជំរុញឱ្យ UN ចាត់វិធានការដាក់ទណ្ឌកម្មសេដ្ឋកិច្ចអ៊ីរ៉ង់ទាំងអស់ ដែលអ្នកការទូតជាច្រើននាក់បានសម្លឹងឃើញថា វាមិនមែនជារឿងងាយឡើយក្នុងការធ្វើបែបនោះ៕

ប្រភព៖ សាព័ត៌មានបរទេស

June 14, 2020

(វិដេអូ) ប៉ូលិសអាមេរិកាំងបាញ់សម្លាប់ជនជាតិស្បែកខ្មៅម្នាក់ទៀតហើយ! បាតុកម្មនានាក៏បាននិងកំពុងកើតឡើង

បុរសជនជាតិស្បែកខ្មៅម្នាក់ត្រូវបានបាញ់សម្លាប់នៅពេលព្យាយាមតដៃនឹងក្រុមប៉ូលិស ក្រោយពីត្រូវបានត្រួតពិនិត្យនៅក្បែរអាហារដ្ឋានមួយកន្លែងនៅក្នុងទីក្រុង Atlanta សហរដ្ឋអាមេរិក។

Rayshard Brooks ជាជនជាតិស្បែកខ្មៅ អាយុ27ឆ្នាំ ត្រូវបានប៉ូលិសស្បែកស2រូបបាញ់សម្លាប់នៅចំណតរថយន្តមួយក្នុងទីក្រុង Atlanta រដ្ឋ Georgia សហរដ្ឋអាមេរិក កាលពីយប់ថ្ងៃទី12 ខែមិថុនាកន្លងទៅ។

Rayshard Brooks ដេកលក់នៅក្នុងរថយន្តក្នុងពេលតម្រង់ជួររង់ចាំសេវាកម្មនៅមុខអាហារដ្ឋាននៅក្បែរនោះ។ ការិយាល័យប៉ូលិស Atlanta បានឱ្យដឹងថា បុរសស្បែកខ្មៅនេះបានតដៃប្រឆាំងប៉ូលិសនៅពេលមិនអាចឆ្លងផុតការធ្វើតេស្តរកជាតិស្រវឹង ឬគ្រឿងញៀន។

វីដេអូមួយដែលថតបានសកម្មភាពនៅកន្លែងកើតហេតុ បង្ហាញថា Brooks ប្រតាយប្រតប់នឹងប៉ូលិស2រូប ក្រោយមកក៏ដណ្ដើមបានកាំភ្លើងអគ្គិសនីពីប៉ូលិសម្នាក់ ហើយក៏បាញ់ទៅលើមុខរបស់ប៉ូលិសនោះ។ រូបភាពពីកាមេរ៉ាសន្តិសុខនៅក្បែរនោះក៏បានបង្ហាញថា ប៉ូលិស2រូបនោះបានដេញតាម ភ្លាមនោះ Brooks បានបាញ់ទៅលើប៉ូលិស ធ្វើឱ្យប៉ូលិសម្នាក់ធ្លាក់កាំភ្លើងអគ្គិសនីពីដៃ។ បន្ទាប់មក ប៉ូលិសក៏ដកកាំភ្លើងហើយបាញ់ទៅលើ Brooks។

ក្រោយពីហេតុការណ៍នេះបានកើតឡើង អធិការប៉ូលិសក្រុង Atlanta លោកស្រី Erika Shields បានសុំលាលែងពីតំណែង ហើយក៏ទទួលបានការយល់ព្រមពីថ្នាក់លើ។ បច្ចុប្បន្ន សមត្ថកិច្ចរដ្ឋ Georgia កំពុងធ្វើការស៊ើបអង្កេតលើរឿងនេះ។

បាតុកម្មជាច្រើនត្រូវបានបង្កើតឡើងដើម្បីប្រឆាំងនឹងហេតុការណ៍ខាងលើ និងដើម្បីទាមទារយុត្តិធម៌ ក្នុងនោះមានបាតុកររាប់សិបនាក់បានប្រមូលផ្ដុំគ្នានៅទីកន្លែងដែល Brooks បានស្លាប់ដើម្បីរំឭកវិញ្ញាណក្ខន្ធ។ ក្រុមប៉ូលិសបានប្រើប្រាស់គ្រាប់បែកផ្សែងបង្ហូរទឹកភ្នែក និងគ្រាប់បែកជះពន្លឺដើម្បីបំបែកហ្វូងបាតុករ នាំឱ្យបាតុកររត់ទៅកាន់តំបន់ផ្សេង ហើយក៏បានបិទផ្លូវល្បឿនលឿនរបស់រដ្ឋ Georgia។

June 14, 2020

បន្ទាន់!! ក្រុងប៉េកាំង ប្រកាស “ស្ថានការណ៍អាសន្នសភាវសង្គ្រាម” ក្រោយរកឃើញអ្នកឆ្លងមេរោគកូវីដ-19 នៅក្នុងផ្សារ 45នាក់!!

ក្រុមទីភ្នាក់ងារព័ត៌មានអន្តរជាតិ បានរាយការណ៍នៅព្រឹកថ្ងៃសៅរ៍(ទី13មិថុនា) ថា តំបន់ ហ្វឹងថៃ របស់ទីក្រុងប៉េកាំង បានប្រកាស “ស្ថានការណ៍អាសន្នសភាវសង្គ្រាម” ក្រោយពីរកឃើញអ្នកឆ្លងមេរោគវីរុសកូវីដ-19 មកពីផ្សារចំនួនច្រើននាក់។

របាយការណ៍បញ្ជាក់ថា ការឆ្លងរាលដាលរលកថ្មីនេះ កើតឡើងនៅក្នុងបរិវេណផ្សារស៊ីនហ្វាទី(Xinfadi) ក្នុងតំបន់ហ្វឹងថៃ ដោយតាមរយៈការប្រមូលយកសំណាកដោយការកៀរកំពង់ក (Throat swab) ពីអ្នកដែលមានភាពជិតស្និទ្ធនឹងផ្សារចំនួន 517នាក់ បានរកឃើញថា មានអ្នកឆ្លងមេរោគវីរុសកំណាចនេះដោយមិនបង្ហាញអាការចំនួន 45នាក់។

កាលពីពេលមុនហ្នឹង នៅថ្ងៃសុក្រ(ទី12មិថុនា) ចិនបានរកឃើញអ្នកឆ្លងមេរោគកូវីដ-19ថ្មី រួមទាំងអស់ 11នាក់ ដោយមាន 6នាក់ ស្នាក់អាស្រ័យនៅក្នុងទីក្រុងប៉េកាំង និង 5នាក់ទៀត ជាអ្នកជំងឺដែលធ្វើដំណើរមកពីក្រៅប្រទេស។

អ្នកនាំពាក្យរបស់មហាទីក្រុងប៉េកាំងបានថ្លែងថា អ្នកជំងឺថ្មី 6នាក់ ដែលបានទទួលការអះអាងថា មានការឆ្លងមេរោគមែនកាលពីថ្ងៃសុក្រនោះ សុទ្ធតែមានប្រវត្តិធ្លាប់ធ្វើដំណើរទៅផ្សារមួយនោះទាំងអស់។ ទីក្រុងប៉េកាំង បានប្រកាសប្រើវិធានការ ហាមធ្វើដំណើរឆ្លងទីក្រុង និងដាក់បញ្ជាឱ្យផ្អាកកិច្ចការងារខាងការប្រកួតកីឡាគ្រប់ប្រភេទ។

រដ្ឋបាលក្រុងប៉េកាំង បានបញ្ជាឱ្យបិទផ្សារស៊ីនហ្វាទី រួមទាំងផ្សារបោះដុំទំនិញផ្សេងៗទៀត ក្នុងទីក្រុងនេះរួចហើយ ក្រៅពីនេះ រដ្ឋបាលតំបន់ហ្វឹងថៃ បានបញ្ជាឱ្យបិទព្រំដែនរវាងតំបន់ទីប្រជុំជន 11កន្លែងដែលនៅជិតផ្សរស៊ីនហ្វទីនេះភ្លាមៗផងដែរ។

សូភើរម៉ារខេត ក្នុងទីក្រុងប៉េកាំង បានយកត្រីសាល់ម៉ុនចេញពីទូថ្នាក់ដាក់បង្ហាញទំនិញ ក្រោយពីមានរបាយការណ៍ថា រកឃើញមេរោគវីរុស នៅលើជ្រញ់ដែលប្រើសម្រាប់ធ្វើត្រីសាល់ម៉ុនក្នុងផ្សារស៊ីនហ្វាទី។

អាជ្ញាធរក្រុងប៉េកាំង មានបញ្ជាឱ្យអ្នកនៅក្នុងផ្សារជាង 10,000នាក់ ចូលមកទទួលការពិនិត្យដើម្បីរកមេរោគកូវីដ-19 ខណៈពេលជាមួយគ្នា ក៏បានលុបចោលផែនការដែលបម្រុងនឹងឱ្យសិស្សថ្នាក់បឋមសិក្សាឆ្នាំទី1-3 ចូលរៀននៅថ្ងៃចន្ទ(ទី15មិថុនា)ស្អែកនេះផងដែរ។

ការឆ្លងរាលដាលរលកទី2 របស់មេរោគកូវីដ-19 បានចាប់ផ្ដើមក្លាយជាក្ដីវិតក្កកង្វល់ខ្លាំងឡើងជារឿយៗ បើទោះជាប្រទេសជាច្រើន មើលទៅហាក់ដូចជាអាចទប់ស្កាត់ការឆ្លងសាយភាយរបស់មេរោគនេះបានហើយក៏ដោយ។

លោគ ផាំង ស៊ឹងហួ មន្ត្រីទីស្នាក់ការគ្រប់គ្រងជំងឺ ប្រចាំក្រុងប៉េកាំង បានបញ្ជាក់ថា “ការវិនិច្ឆ័យ
រយៈដំបូង បានបង្ហាញថា ការឆ្លងមេរោគ បណ្ដាលមកពីការប៉ះពាល់សភាពបរិស្ថានជុំវិញនៅក្នុងផ្សារ ឬមិនទេ ក៏ឆ្លងមេរោគតាមរយៈការនៅជិតស្និទ្ធនឹងអ្នកដែលឆ្លងមេរោគ…យើងនៅមិនទាន់អាចប៉ាន់ស្មានពីផលប៉ះពាល់ដែលនឹងកើតឡើងនាពេលអនាគតបាននៅឡើយទេ”៕

ប្រភព៖ សាព័ត៌មានបរទេស

June 14, 2020

នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ (តចប់)

ទំហំពាណិជ្ជកម្មរវាងចិន ជាមួយបណ្ដាប្រទេសអាស៊ាន មានប្រមាណជា 85,320លានដុល្លារសហរដ្ឋអាមេរិកក្នុងខែមករា និងខែកុម្ភៈ បើទោះជាទំហំពាណិជ្ជកម្មដែលធ្វើជាមួយដៃគូពាណិជ្ជកម្មផ្សេងទៀត សុទ្ធតែស្ថិតក្នុងសញ្ញាធ្លាក់ចុះដោយសារតែផលប៉ះពាល់ជំងឺរាតត្បាតក៏ដោយ ហើយរឿងនេះ ក៏ធ្វើឱ្យកើតមានសេចក្ដីសង្ឃឹមបង្ហាញខ្លួនឡើងមកថា ខ្សែចង្វាក់ផ្គត់ផ្គង់ផ្សេងៗ នឹងអាចវិលត្រឡប់មករស់ឡើងវិញជាថ្មីមិនខាន។

អត្ថបទទាក់ទង៖
នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ(1)
នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ(2)
នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ(3)

ចិនជាមួយប្រជាជាតិអាស៊ានទាំងអស់ មានជំនឿជឿជាក់យ៉ាងមុតមាំក្នុងលទ្ធិពហុភាគីនិយម និងការរួមសហការគ្នា ដែលវាជារឿងមួយអាចជួយបាន ក្នុងពេលដែលសហគមន៍ពិភពលោកចាំបាច់ត្រូវទប់ទល់នឹងវិបត្តិខាងសេដ្ឋកិច្ច ហើយលទ្ធផលក៏គឺ លោកាវិវឌ្ឍន៍កំពុងបង្កើតគុណសម្បត្តិថ្មីមួយរបស់ “ភូមិភាគាវិវឌ្ឍន៍” (Regionalization) ឡើង។ នេះក៏ជារឿងមួយដែលលោកស្រី មើរកែល កំពុងគិតនៅក្នុងចិត្តនៅក្នុងការជួបប្រាស្រ័យនៅទីក្រុងប៊ែរឡាំងរបស់លោកស្រី កាលពីថ្ងៃទី27 មេសាកន្លងទៅដែរ។

ការពិតទៅ ការថ្លែងការណ៍របស់លោកប្រធានាធិបតី ដូណាល់ ត្រាំ ស្ដីអំពី “ការប្រតិបត្តិការដើម្បីប្រឆាំងចិន” (Actions Against China) កាលពីថ្ងៃទី29 ឧសភា បានឆ្លុះបញ្ចាំងឱ្យឃើញដូចគ្នាថា លោកមានការនឹកឃើញក្នុងកម្រិតមួយថា សហរដ្ឋអាមេរិកកំពុងហត់ឥតប្រយោជន៍ក្នុងការព្យាយាមបង្ហើតទិដ្ឋភាពឱ្យចិនក្លាយជា “បិសាចកំណាច” ក្នុងគ្រានេះ។ លោកត្រាំ មើលទៅហាក់ដូចជាម៉ឺងម៉ាត់មាំមួនដាច់ខាតខាងរឿងវាចា ប៉ុន្តែ ជួនកាលវាក៏អាចគ្រាន់តែជាគ្រឿងបំភ័ន្តដែលផុយស្រួយបំផុតមួយប៉ុណ្ណោះ។ ការថ្លែងការណ៍ក្នុងគ្រានោះរបស់លោកត្រាំ បានវែកញែកចំណុចបញ្ហាផ្សេងៗដែលមានជាមួយចិនចេញមកយ៉ាងវែងអន្លាយដូចកន្ទុយខ្លែង ដែលធ្វើឱ្យមើលទៅ ឃើញដូចជាការថ្លែងដែលតម្រង់ឆ្ពោះទៅ “សម្លាប់ចិន” ឱ្យខាងតែបានដូច្នោះដែរ…តែនៅពេលសម្លឹងមើលក្នុងទិដ្ឋភាពរួមវិញនោះ វាបែរជាមិនមានការតភ្ជាប់ឱ្យក្លាយជាយុទ្ធសាស្ត្រដែលស៊ីចង្វាក់ ឬត្រូវគ្នាសោះឡើយ។

លោកត្រាំ ប្រាប់ថា សហរដ្ឋអាមេរិកកំពុងសិក្សាថា តើនឹងអាចធ្វើអ្វីបានខ្លះ ពាក់ព័ន្ធនឹងក្រុមហ៊ុនរបស់ចិនដែលបានចុះបញ្ជីនៅក្នុងផ្សារហ៊ុនរបស់អាមេរិក។ សហរដ្ឋអាមេរិក នឹងកំណត់ចំនួននិស្សិតក្រោយបរិញ្ញាត្រីជនជាតិចិន និងអ្នកវិទ្យាសាស្ត្រជនជាតិចិន ដែលមកសិក្សារៀនសូត្រនៅក្នុងមជ្ឈមណ្ឌលកណ្ដាលនៃការរៀនយល់ដឹង និងការស្រាវជ្រាវវិភាគផ្សេងៗរបស់អាមេរិក, ការប្រណិប័តន៍យ៉ាងពិសេសចំពោះទីក្រុងហុងកុងនឹងត្រូវលុបចោល, ពួកមន្ត្រីចិនដែលជាប់ពាក់ព័ន្ធក្នុងស្ថានការណ៍ក្រុងហុងកុង អាចនឹងត្រូវរងទណ្ឌកម្ម និងសហរដ្ឋអាមេរិក កំពុងតែលុបចោលសមាជិកភាពរបស់ខ្លួនក្នុងអង្គការពាណិជ្ជកម្មពិភពលោកទៀតផង។

តែអ្វីដែលគួរឱ្យចម្លែកចិត្តនោះគឺ ផ្សារហ៊ុនទាំងឡាយរបស់សហរដ្ឋអាមេរិក បាននាំគ្នាហក់ឡើងខ្ពស់ ក្រោយការថ្លែងការណ៍របស់លោកត្រាំក្នុងគ្រានេះ។ វាមើលទៅហាក់ដូចជាថា ពួកអ្នកវិនិយោគទាំងឡាយ មានអារម្មណ៍ធូរស្បើយ នៅពេលមើលឃើញថា វិធានការផ្សេងៗដែលលោកត្រាំបានសរុបចេញមកទាំងនោះ វាមិនដល់ថ្នាក់អាក្រក់ ដូចនឹងអ្វីដែលពួកគេធ្លាប់គិតទុកនោះទេ និងប្រាកដណាស់ តាមរយៈពាក្យសម្ដីដែលលោកបានប្រើ វាថែមទាំងធ្វើឱ្យកើតមានចន្លោះប្រហោងមិនច្បាស់លាស់ក្នុងរឿងកំណត់ពេលវេលា និងរឿងការប្រតិបត្តិពិតប្រាកដឡើងទៀតផង។

ចំណុចសំខាន់បំផុតក៏គឺ នៅក្នុងសេចក្ដីថ្លែងការណ៍លើកនោះរបស់លោក លោកត្រាំ មិនបាននិយាយអ្វី 1ម៉ាត់សោះ ពាក់ព័ន្ធនឹងវាសនាកម្មរបស់កិច្ចព្រមព្រៀងពាណិជ្ជកម្មរវាងសហរដ្ឋអាមេរិក-ចិន ដែលធ្វើឱ្យគេនាំគ្នាសន្និដ្ឋានថា វានៅតែជាការងារដែលដំណើរការទៅមុខបន្តទៀតជារឿយៗ រួមទាំងលោកត្រាំ ក៏អាចមានការដឹងខ្លួនយ៉ាងច្បាស់ទៀតផងថា ពាណិជ្ជកម្មជាមួយចិន អាចក្លាយជារឿងសំខាន់បំផុត សម្រាប់ការងើបឡើងវិញខាងសេដ្ឋកិច្ច ក្រោយចប់កូវីដ-19 របស់សហរដ្ឋអាមេរិក។

បទវិភាគមួយរបស់ទីភ្នាក់ងារព័ត៌មានរ៉យទ័រ ដែលបានផ្សព្វផ្សាយកាលពីថ្ងៃទី1 មិថុនា បានប្រើចំណងជើងរឿងដ៏គួរឱ្យអស់សំណើច និងលាយចំអកផងថា “ភ្លីភ្លើ ឬយ៉ាងណាក៏ដោយ តែត្រាំនៅតែស្អិតល្មួតជាមួយហ្វេស1 របស់ឌីលពាណិជ្ជកម្មចិន” (Lemon’ or not, Trump is stuck with Phase 1 of the China trade deal.)

ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា

June 14, 2020

នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ (តពីម្សិលមិញ)

អ៊ីយូ(សហភាពអឺរ៉ុប) ថែមទាំងបានជំរុញលោកត្រាំ ឱ្យប្ដូរចិត្តទៀតផងថា៖ “ទង្វើផ្សេងៗ ដែលជាការធ្វើឱ្យលទ្ធផលលំដាប់អន្តរជាតិត្រូវចុះខ្សោយនោះ គឺជារឿងដែលត្រូវចៀសវាង…ដោយសារតែបរិបទនេះហើយ ទើបយើងជំរុញសហរដ្ឋអាមេរិកឱ្យពិចារណាឡើងវិញអំពីការសម្រេចចិត្ត ដែលបានប្រកាសចេញមកហើយនោះជាថ្មីម្ដងទៀត”

អត្ថបទពាក់ព័ន្ធ៖
នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ(1)
នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ(2)

ក្នុងទំនងដូចគ្នានោះដែរ ខណៈដែលអ៊ីយូ មានការយល់ឃើញមិនស្របគ្នានឹងចិនកាលពីពេលថ្មីៗនេះ ក្នុងរឿងដែលក្រុងប៉េកាំងបម្រុងនឹងចេញច្បាប់សន្តិសុខជាតិថ្មីមកប្រើលើទីក្រុងហុងកុងនោះ ទាំងទីក្រុង ប្រ៊ុចសែល និងទីក្រុងធំៗសំខាន់ៗនានារបស់អឺរ៉ុប បាននាំគ្នាដាក់ខ្លួនឯងឱ្យនៅឆ្ងាយពីពាក្យសម្ដីធ្ងន់ៗដែលក្រុងវ៉ាស៊ីនតោនប្រើវាយប្រហារក្រុងប៉េកាំង។ តែទីបំផុតទៅ សហរដ្ឋអាមេរិកចាំបាច់ត្រូវតែសុខចិត្ត និងល្មមគ្រប់គ្រាន់ ត្រឹមតែការបានចេញសេចក្ដីថ្លែងការណ៍មួយច្បាប់ ជាមួយបក្ខពួកប្រទេសអង់ហ្គ្លោ-សាក់សុងដូចគ្នា ក្នុងរឿងពាក់ព័ន្ធនឹងស្ថានការណ៍ក្នុងទីក្រុងហុងកុង។

សម្រាប់អ៊ីយូវិញ ពួកគេងាកមកចេញសេចក្ដីថ្លែងការណ៍យ៉ាងខ្លី អំពីទីក្រុងហុងកុងមួយច្បាប់របស់ខ្លួន ដោយបានបង្ហាញពី “ក្ដីបារម្ភកង្វល់ខ្លាំងបំផុតចំពោះវិធានការផ្សេងៗដែលភាគីចិនបានប្រើកាលពីថ្ងៃទី28 ឧសភា”។ ដោយអ៊ីយូ បានវាយតម្លៃថា តាមរយៈសកម្មភាពនេះ ក្រុងប៉េកាំងបាន “បង្កើតភាពប្រថុយប្រថានក្នុងការក្លាយជាការវាយបំផ្លាញយ៉ាងធ្ងន់ធ្ងរដល់គោលការណ៍ “ប្រទេស1 ប្រព័ន្ធ2” និងដល់ការអាណាព្យាបាលខ្លួនឯងក្នុងកម្រិតខ្ពស់របស់តំបន់គ្រប់គ្រងពិសេសហុងកុង”

តែសេចក្ដីថ្លែងការណ៍នេះ ក៏បានសរុបដោយសំណេរថា៖ “សម្ព័ន្ធភាពដែលអ៊ីយូមានជាមួយចិន ស្ថិតលើការគោរព និងភាពជឿទុកចិត្ត រវាងគ្នានឹងគ្នា។ ការសម្រេចចិត្តលើកនេះ បានធ្វើឱ្យកើតជាសំណួរ និងចម្ងល់កាន់តែច្រើនឡើងទៅទៀត ពាក់ព័ន្ធនឹងការតាំងចិត្តរបស់ចិនក្នុងការប្រកាន់ខ្ជាប់ការប្រព្រឹត្តតាមសន្ធិសញ្ញាអន្តរជាតិផ្សេងៗរបស់ខ្លួន។ យើងនឹងលើកយកប្រធានបទបញ្ហានេះមកពិភាក្សា ក្នុងកិច្ចសន្ទនាដែលយើងកំពុងធ្វើយ៉ាងបន្តបន្ទាប់ជាមួយចិន”

ការប្រេះស្រាំ ដែលធ្វើឱ្យទន់ខ្សោយ

បទសរុបដែលបង្ហាញឱ្យឃើញនៅក្នុងពេលនេះក៏គឺ ការដែលលោកប្រធានាធិបតី ដូណាល់ ត្រាំ គិតតែពីធ្វើអ្វីតាមអំពើចិត្តតែម្នាក់ឯង ក្នុងរឿងពាក់ព័ន្ធនឹង G7 និងភាពប្រេះស្រាំដែលកាន់តែមុតជ្រៅខ្លាំងឡើងគ្រប់ពេល ដែលលោកបានសាងឡើង រវាងសហរដ្ឋអាមេរិក ជាមួយប្រទេសសម្ព័ន្ធមិត្តណាតូរបស់ខ្លួន។ នៅទីបំផុតទៅ អាចនឹងពិសោធឱ្យឃើញថា វាបានក្លាយជាការកាត់បន្ថយកម្លាំងរបស់អាមេរិកយ៉ាងស៊ីជម្រៅ។

ការឈ្លោះទាស់ទែងគ្នា រវាងប្រទេសនៅត្រើយទាំងសងខាងនៃអាត្លង់ទិកនេះ មិនមែនជារឿងថ្មីឡើយ ប៉ុន្តែ សម្រាប់គ្រានេះ ការបែកបាក់គ្នាមែនទែនកំពុងតែបង្កខ្លួន និងអភិវឌ្ឍឡើង…ទង្វើផ្សេងៗរបស់លោកត្រាំ កំពុងទាមទារឱ្យត្រូវតែដាក់សំណួរពាក់ព័ន្ធនឹងសាមគ្គីភាពកម្រិតមូលដ្ឋានរបស់ប្រទេសលោកខាងលិច ដែលធ្លាប់ជាគុណសម្បត្តិដ៏ស្ថិតស្ថេរមួយប្រការ របស់នយោបាយពិភពលោករហូតមក តាំងពីសង្គ្រាមត្រជាក់ ចាប់ផ្ដើមឡើងក្នុងអំឡុងចុងទសវត្សរ៍1940។

សហរដ្ឋអាមេរិក ដែលព្យាយាមរក្សាឋានៈភាពជាមេកើយលើអ្នកឯទៀតក្នុងកម្រិតទូទាំងពិភពលោក ឱ្យស្ថិតនៅជានិរន្តន៍កាលនោះ នៅតែកំពុងដើរលើដំណើរផ្លូវរបស់អំឡុង 7ទសវត្សរ៍កន្លងមកក្នុងអតីតកាល ដោយខ្សែភ្នែកដែលបានទទួលការហ្វឹកហាត់មក ក្នុងរឿងការសាង “ទិដ្ឋភាពសត្រូវ” ដែលបានជួយបង្កឱ្យកើតកិច្ចការងារខាងធុរកិច្ច សម្រាប់សម្ព័ន្ធមិត្តខាងយោធា ជាមួយភាគីឧស្សហកម្ម(military-industrial complex) របស់ខ្លួន ហើយបន្ទាប់ពីនោះ វាក៏ក្លាយជាប្រភពចំហេះ ចិញ្ចឹមក្ដីស្រមើស្រមៃក្នុងរឿងសតវត្សរ៍ថ្មីរបស់ជនជាតិអាមេរិក (New American Century)។

សារៈខ្លឹមសាររបស់ក្ដីស្រមៃនេះ ស្ទើរតែមិនបានរីកលូតលាស់ចេញមកពីសេចក្ដីពិតឡើយ ចំណាប់អារម្មណ៍ ក្ដីកង្វល់បារម្ភរបស់ពួកប្រទេសសម្ព័ន្ធមិត្តចម្បងៗរបស់សហរដ្ឋអាមេរិក កំពុងងាកចេញផ្សេងទៅ ជាបណ្ដើរៗពីចំណាប់អារម្មណ៍ ក្ដីកង្វល់បារម្ភរបស់អាមេរិក។

រូបភាពប្រវត្តិសាស្ត្រនៃការប្រឈមមុខដាក់គ្នារវាងលោកស្រីនាយករដ្ឋមន្ត្រីនៃប្រទេសអាល្លឺម៉ង់ អ៊ែងជើឡា មើរកែល ជាមួយលោកប្រធានាធិបតីនៃសហរដ្ឋអាមេរិក ដូណាល់ ត្រាំ ក្នុងអំឡុងកិច្ចប្រជុំ សាំមិតក្រុម G7 កាលពីថ្ងៃទី9 មិថុនា ឆ្នាំ2018 នៅប្រទេសកាណាដា

គ្មានអ្នកណាលេងជាមួយ

ដូច្នេះ រឿងប្រភេទការលែងលះបំបែកដាច់ (Decoupling) ពីចិន ដែលលោកត្រាំព្យាយាមជំរុញទាមទារនោះ ខាងភាគីលោកខាងលិច ក៏មិនមានអ្នកណាលេងជាមួយឡើយ ដោយសម្រាប់ប្រទេសលោកខាងលិចផ្សេងៗវិញ ការយល់ឃើញចរន្តចម្បងនោះ គឺប្រកាន់ខ្ជាប់ក្នុងការសហការគ្នាខាងសេដ្ឋកិច្ចក្នុងកម្រិតទូទាំងពិភពលោក។ ការយល់ឃើញភាគច្រើនក្នុងពិភពលោកក្នុងពេលនេះ គឺថា សង្គមទាំងឡាយដែលអាចសាងខ្លួនឯងឡើងមកថ្មីយ៉ាងជោគជ័យខ្លាំងបំផុត បានទៅលើសង្គមដែលអាចធ្វើការរួមគ្នាបាន ក្នុងកម្រិតឆ្លងប្រទេស និងឆ្លងភូមិភាគ ដើម្បីជួយឧបត្ថម្ភគាំទ្រឱ្យសេដ្ឋកិច្ចរបស់ពួកគេងើបខ្លួនឡើងបាន។

នៅពេលច្នៃចូលមកនៅក្នុងបរិបទរបស់ជំងឺរាតត្បាតកូវីដ-19 ជាពិសេសមុននេះ ដែលកំពុងបង្កឱ្យកើតជាស្រមោលខ្មៅងងឹតនៃភាពអាចទៅរួចមួយដែលថា សេដ្ឋកិច្ចទូទាំងពិភពលោកនឹងឈានចូលឆ្ពោះទៅរកសភាវធ្លាក់ចុះ កណ្ដាលភាពភ័យខ្លាចដែលលាក់កប់ជ្រៅ ស្រមោលខ្មៅងងឹតរបស់ជំងឺរាតត្បាតដ៏ធំនេះ អាចនឹងសណ្ដូកខ្លួនវែង ហុចផលប៉ះពាល់យ៉ាងយូរអង្វែងតទៅទៀត។ ទើបវាក្លាយជារឿងចៀសមិនផុតស្រេចទៅហើយ ដែលការងើបខ្លួនឡើង ដែលដឹកនាំដោយប្រជាជាតិអាស៊ី កំពុងមានមន្តស្នេហ៍ទាក់ទាញចំណាប់អារម្មណ៍ពេញមួយរយៈពេល 4ខែកន្លងមកនេះ ដោយសហគមន៍អាស៊ាន បានក្លាយជាដៃគូពាណិជ្ជកម្មធំបំផុតរបស់ចិនទៅហើយ ដោយបានចូលមកជំនួសសហភាពអឺរ៉ុប។

…នៅមានត…

ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា

June 13, 2020

Category: អន្តរជាតិ