Category: អន្តរជាតិ

តើចិននឹងទប់ទល់យ៉ាងណា បើវីរុសកូរ៉ូណានឹងនៅមានរហូត?
ឆ្នាំនេះ កន្លងផុតទៅហើយកន្លះឆ្នាំ ស្មេរមានអារម្មណ៍ថា ពេលវេលាកន្លងផុតទៅលឿនដូចគេកុហក…។ ថយត្រឡប់ទៅគិតឡើងវិញថា តើឆ្នាំនេះ មានបានធ្វើអ្វីសម្រេចតាមគោលដៅខ្លះហើយឬនៅ? ចម្លើយក៏គឺ រឿងរ៉ាវជាច្រើន ត្រូវគាំងង៉ក់នៅមួយកន្លែងដោយស្វ័យប្រវត្តិ ក្រោយវត្តមានរបស់មេរោគកូវីដ-19។ ស្មេរជឿថា មិត្តអ្នកអានជាច្រើន ក៏អាចមានអារម្មណ៍បែបហ្នឹងដូចគ្នាដែរ…វីរុសកូរ៉ូណាប្រភេទថ្មីនេះ ចេញមកលឿន ហើយសាយភាយ ឆ្លងរាលដាលយ៉ាងឆាប់រហ័ស ដោយខណៈនេះ ចំនួនអ្នកឆ្លងមេរោគទូទាំងពិភពលោក មានច្រើនជាង 9លាននាក់ទៅហើយ…តាមរយៈនិន្នាការនេះ យើងមិនទាន់មើលឃើញពីសញ្ញាថា តួលេខនេះ នឹងថយចុះនៅឡើយ និងអាចនិយាយបានថា ពិភពលោករបស់យើងនៅតែស្ថិតក្នុងស្ថានការណ៍ដែលគួរឱ្យព្រួយបារម្ភខ្លាំងមែនទែន។ រោគរាតត្បាត គឺជាអ្វីដែលរុករានមនុស្សជាតិយើងគ្រប់យុគ គ្រប់សម័យកាល និងជារឿងដែលនៅក្បែរខ្លួនមនុស្សគ្រប់រូប។ មនុស្សខំព្យាយាមចង់យកឈ្នះលើធម្មជាតិ តែការពិតទៅ នៅពេលប្រឈមនឹងគ្រោះវិបត្តិផ្សេងៗវិញ មនុស្សយើង ជាច្រើនដង ជាអ្នកបរាជ័យ។
កន្លះឆ្នាំដែលកន្លងទៅ ចិន និងប្រទេសជាច្រើនទៀតទូទាំងពិភពលោក បានប្រើប្រាស់ពេលវេលា ប្រើប្រាស់កម្លាំងថាមពលទាំងអស់ទៅលើការប្រយុទ្ធប្រឆាំងនឹងរោគរាតត្បាតប្រភេទថ្មីនេះ ឯវិធីការតស៊ូប្រឆាំង និងការការពារវិញ ប្រទេសជាច្រើន មានគោលការណ៍ស្រដៀងៗគ្នា។ ចំណែកប្រទេសចិនវិញ បានប្រើប្រព័ន្ធបន្ទាន់ និងឆាប់រហ័ស បញ្ជាដោយផ្ទាល់ពីមជ្ឈិម ធ្វើឱ្យអាចរួបរួម គ្រប់គ្រង និងរៀបចំធនធានគ្រប់បែបយ៉ាងបានយ៉ាងមានប្រសិទ្ធភាព តែវាដូចអ្វីដែលយើងទាំងអស់គ្នាបានដឹងហើយថា ការឆ្លងរាលដាលរបស់វីរុសកូរ៉ូណា វាឆាប់រហ័សណាស់ និងងាយឆ្លងបំផុត ដូច្នេះនៅគ្រប់ប្រទេស បន្ទាប់ពីគ្រប់គ្រងដំណាក់កាលដំបូងបានហើយ ត្រូវប្រយ័ត្នលើការវិលត្រឡប់មកឆ្លងរាលដាលរលកទី2 បន្តទៀត ជាពិសេសគឺ កុំភ្លេចខ្លួន លែងការពារ…។
រហូតមកដល់ពេលនេះ អ្នកជំនាញការមកពីប្រទេសជាច្រើន ក៏នៅតែមិនទាន់ប្រកាសច្បាស់ 100% ដែរថា វីរុសកូរ៉ូណា ការពិតទៅ មានដើមកំណើតមកពីណានៅឡើយ។ សព្វថ្ងៃនេះ យើងនៅតែត្រូវស្រាវជ្រាវអំពីមេរោគមួយនេះជារឿយៗ ព្រោះវីរុសកូរ៉ូណា វាអភិវឌ្ឍខ្លួន ឱ្យត្រូវនឹងសភាពបរិស្ថាន និងសាយភាយពង្រីក បែកខ្នែងប្រភេទចេញមកយ៉ាងច្រើន។ អ្នកជំនាញការផ្នែករោគរាតត្បាតវិទ្យាជាច្រើននាក់របស់ចិន បានប្រាប់ដូចៗគ្នារួចមកហើយថា វីរុសកូរ៉ូណាប្រភេទនេះ រស់នៅក្នុងសភាពបរិស្ថានផ្សេងៗបានយ៉ាងធន់មាំ និងមាននិន្នាការថា អាចនឹងរស់នៅជាមួយយើងរហូតតទៅទៀតផង ពោលគឺ វីរុសកូរ៉ូណាប្រភេទនេះ នៅមានជីវិត និងសាយភាយបានស្ទើរតែគ្រប់សភាពបរិស្ថាន ហើយថែមទាំងស្ថិតនៅលើស្រទាប់ខាងលើរបស់វត្ថុផ្សេងៗ វាអាចនឹងមានជីវិតរស់នៅបានច្រើនថ្ងៃទៀតផង!!។ ក្រោយពីកើតឧប្បត្តិការណ៍មេរោគកូវីដ-19មក ជីវិតមនុស្សគ្រប់រូបប្រែប្រួលខុសពីមុន… ការសម្របខ្លួន និងការការពារខ្លួន បានធ្វើឱ្យមានវិថីជីវិតបែបថ្មីមួយកើតឡើងដោយបរិយាយ។
ក្នុងសប្ដាហ៍កន្លងមកនេះ មានកើតហេតុការណ៍ឆ្លងរាលដាលឡើងជាថ្មី នៅក្នុងប្រទេសចិន ដែលធ្វើឱ្យមនុស្សគ្រប់គ្នាងឿងឆ្ងល់ ភាន់ភាំង និងនាំគ្នាប្រយ័ត្នប្រយែងឡើងម្ដងទៀត គឺនៅក្នុងទីក្រុងប៉េកាំង។ តាំងពីថ្ងៃទី11 មិថុនា កន្លងទៅ ទីក្រុងប៉េកាំងបានរកឃើញអ្នកជំងឺថ្មីម្នាក់ ក្រោយពីចំនួនអ្នកឆ្លងមេរោគស្ថិតក្នុងតួលេខសូន្យអស់ 56ថ្ងៃ និងរហូតមកដល់ថ្ងៃដែលស្មេរកំពុងសរសេរអត្ថបទនេះ(ថ្ងៃទី14 មិថុនា) កន្លងទៅតែ 4ថ្ងៃ អ្នកជំងឺថ្មីក្នុងតំបន់ក្រុងប៉េកាំង បានកើនឡើងជិត 50នាក់ហើយ។ អ្នកជំងឺថ្មីទាំងនេះ សុទ្ធតែមានប្រវត្តិពាក់ព័ន្ធនឹងផ្សារ ស៊ីនហ្វាទី មជ្ឈមណ្ឌលលក់ដុំអាហារស្រស់ដ៏ធំមួយ ស្ថិតនៅក្នុងតំបន់ហ្វឹងថៃ ប៉ែកខាងត្បូងទីក្រុងប៉េកាំង។ អាជ្ញាធរបានបិទផ្សារ និងភូមិកផ្ទះសំបែងក្បែៗនោះភ្លាមៗ ក្រោយពីរកឃើញអ្នកជំងឺទី3 និងទី4 និងថែមទាំងហាមមនុស្សចេញ-ចូល និងពិនិត្យរកមេរោគគ្រប់មនុស្សទាំងអស់ គ្របដណ្ដប់ទាំងអ្នកនៅក្នុងផ្សារ និងអ្នកជិតខាងទាំងអស់ ចេញសេចក្ដីប្រកាសទៅគ្រប់តំបន់ ឱ្យអ្នកដែលធ្លាប់ទៅផ្សារស៊ីនហ្វាទីក្នុងអំឡុងក្រោយថ្ងៃទី30 ឧសភា ទៅពិនិត្យរកមេរោគវីរុស ព្រមទាំងប្រមូលសំណាកផ្សេងៗពីវត្ថុរបស់របរនៅក្នុងផ្សារទៀតផង។
នេះគឺជាភាពប្រថុយប្រថានថ្មីរបស់ចិនជាមួយការវិលមកឆ្លងរាលដាលក្នុងរង្វង់ធំ រលកទី2…លើកនេះរដ្ឋបាលកណ្ដាល រដ្ឋបាលក្នុងតំបន់ អង្គភាពឯកជន និងប្រជាជនចិនបាននាំគ្នាស្វាហាប់យ៉ាងខ្លាំងក្លា។ ការឆ្លងរាលដាលថ្មីនេះ ជាអ្វីមួយដែលលើសពីការប៉ាន់ស្មានរបស់មនុស្សទូទៅ ព្រោះក្នុងអំឡុងពេលនេះ ចិនសង្កត់ធ្ងន់លើការការពារអ្នកឆ្លងមេរោគកូវីដ-19 មកពីក្រៅប្រទេសយ៉ាងតឹងរ៉ឹង ហើយតាមរយៈការឆ្លងរាលដាលជាថ្មីនេះ ពុំទាន់រកមូលហេតុ និងប្រភពឃើញនៅឡើយថា តើវាចេញមកពីណា? បើទោះជាបានពិនិត្យរកឃើញមេរោគវីរុសកូរ៉ូណានៅលើជ្រញ់ពន្លះសាច់ត្រីសាល់ម៉ុនហើយក៏ដោយ ក៏នៅតែមិនទាន់ប្រាកដច្បាស់ថា តើមនុស្សឆ្លងមេរោគមកពីត្រីសាល់ម៉ុន ឬក៏ត្រីសាល់ម៉ុនឆ្លងមេរោគពីមនុស្សនៅឡើយ?។
ចិនគឺជាប្រទេសដំបូងគេដែលកើតការឆ្លងរាលដាលមេរោគវីរុសកូរ៉ូណាប្រភេទថ្មី ដោយផ្ដើមចេញពីទីក្រុងវូហាន កាលពីចុងខែធ្នូ ឆ្នាំទៅ។ នៅពេលចិនគ្រប់គ្រងការឆ្លងរាលដាលបាន ប្រជាជនចិនគ្រប់រូប បានទន្ទឹងរង់ចាំថ្ងៃដែលមេរោគកូវីដ-19 នឹងបាត់អស់វិញ និងត្រឡប់មករស់នៅយ៉ាងសុខសាន្តប្រក្រតីដូចពីមុន ប៉ុន្តែ រង់ចាំរហូតដល់កន្លះឆ្នាំហើយ ក៏នៅតែគ្មានសញ្ញាថា មេរោគចង្រៃនេះនឹងរលាយបាត់អស់…ចំណែកឯវ៉ាក់សាំងការពារវិញ ក៏ប្រហែលជានៅតែមិនទាន់មានការប្រកាសចេញមកឱ្យប្រើប្រាស់ឆាប់ៗនេះទៀត ដូច្នេះ គឺវាពិតជាដូចអ្វីដែលពួកអ្នកជំនាញការបានសន្និដ្ឋានទុកថា មេរោគកូវីដ-19 អាចនឹងនៅជាមួយយើងរយៈពេលយូររហូតតទៅ ឬភាសាចិន និយមនាំគ្នានិយាយញឹកញាប់ថា “长期共存” (អានថា ឆាងឈីកុងឈុន) ឬភាសាអង់គ្លេស Long-term coexistence។
ការពាក់ម៉ាស់អនាម័យការពារនៅក្នុងទីសាធារណៈ ដូចជាស្ថានីយរថភ្លើងអគ្គិសនី ជាដើម បានក្លាយជាសភាវប្រក្រតីថ្មីទៅហើយ
ក្នុងពេលដែលនៅមិនទាន់រកឃើញវិធីយកឈ្នះដាច់លើមេរោគវីរុសកូរ៉ូណានេះបាន ក៏ត្រូវតែងាកមករកវិធីទប់ទល់ទាំងអស់គ្នាតទៅទៀត ហើយបើនៅតែកើតមានការឆ្លងរាលដាលឥតឈប់ឈរ និងកើតឡើងជាថ្មីជាប់រហូតនោះ សួរថា តើប្រទេសចិនមានវិធានការទប់ទល់នាពេលអនាគតយ៉ាងណា? ស្មេរសូមសរុបជាចំណុចផ្សេងៗ ត្រួសៗដូចខាងក្រោមនេះ…៖
1-ការលើកកម្ពស់ការត្រួតពិនិត្យសុខភាពរបស់ប្រជាជនគ្រប់រូប Healthy code ប្រចាំខ្លួនបុគ្គលម្នាក់ៗនឹងត្រូវប្រើជារៀងរហូតតទៅ៖ ក្រោយការឆ្លងរាលដាលជាសហគមន៍ជាថ្មីនៅក្នុងទីក្រុងប៉េកាំង រដ្ឋបាលបានប្រកាសថា នឹងអាប់ហ្គ្រេត វើហ្សឹន ថ្មីរបស់ Healthy code ទូទាំងប្រទេស ដែលមានភាពលម្អិត និងជាក់ច្បាស់ខ្លាំងឡើង មិនមែនគ្រាន់តែភ្ជាប់ជាមួយអត្តសញ្ញាណប័ណ្ណ និងលេខទូរស័ព្ទប៉ុណ្ណោះទេ តែនឹងមានភ្ជាប់ជាមួយបណ្ណសុខុមាលភាពសង្គម រហូតដល់បណ្ណចេញ-ចូលទីប្រជុំជនទៀតផង។ ទាំងអស់នេះ គឺដើម្បីកាត់បន្ថយអត្រាការខុសឆ្គងរបស់ទិន្នន័យការត្រួតពិនិត្យ និងបង្កើនកម្រិតការគ្រប់គ្រងជំងឺយ៉ាងគ្រប់ជ្រុងជ្រោយ។ ក្នុងពេលបច្ចុប្បន្ន តំបន់សាធារណៈជាច្រើននៅក្នុងប្រទេសចិន ក្រៅពីវាស់សីតុណ្ហភាពរាងកាយហើយ នៅមានការពិនិត្យមើល Healthy code ក្នុងការចេញ-ចូលស្ទើរតែគ្រប់កន្លែង ហើយរឿងនេះនឹងក្លាយជាសភាវប្រក្រតីថ្មីមួយ របស់ប្រទេសចិនទៅជារៀងរហូត ដែលគ្រប់គ្នាត្រូវតែងាកមកសម្របខ្លួនឱ្យស៊ាំធ្លាប់ឱ្យបាន។
2-ការពាក់ម៉ាស់អនាម័យការពារនៅក្នុងទីសាធារណៈ នឹងក្លាយជាសភាវប្រក្រតីថ្មីរបស់ជនជាតិចិន៖ ក្រោយពីការបានពាក់ម៉ាស់អនាម័យការពារ ពេញមួយរយៈពេលកន្លះឆ្នាំកន្លងមក ជនជាតិចិនក៏នៅតែនាំគ្នាពាក់ជាបន្តទៅទៀត ទោះបីជាតំបន់ជាច្រើនមានការបន្ធូរបន្ថយវិធានការខ្លះហើយក្ដី តែការពាក់ម៉ាស់ការពារ នៅតែជារឿងចាំបាច់ក្នុងការជិះរថយន្តក្រុងសាធារណៈ និងការចូលក្នុងទីកន្លែងដែលបិទជិតផ្សេងៗដដែល។ ទាំងអស់នេះ ការពាក់ម៉ាស់អនាម័យការពារ នឹងក្លាយជារឿងមួយដែលគ្រប់គ្នាត្រូវតែធ្វើជាប់ជានិច្ច ព្រោះការការពារជំងឺរាតត្បាត ជាតួនាទីរបស់មនុស្សគ្រប់រូបនៅក្នុងសង្គម ដូច្នេះគ្រប់គ្នាត្រូវតែងាកមកសម្របសម្រួលខ្លួនឱ្យស៊ាំធ្លាប់ដូចៗគ្នា។
3-បង្កើនសក្ដានុពលខាងវេជ្ជសាស្ត្រ ជាពិសេសផ្នែកតិចណូឡូជី ការពិនិត្យមេរោគកូវីដ-19 នឹងក្លាយជាសភាវប្រក្រតីថ្មី៖ ក្នុងពេលបច្ចុប្បន្ន ចិនបានបើកទូលាយការពិនិត្យរកមេរោគកូវីដ-19 ជាមួយប្រជាជនទូទៅហើយ ខុសគ្នានឹងកាលពីពេលមុននេះ ពួកគេនឹងមិនពិនិត្យឱ្យបុគ្គលណាដែលមិនមែនជាក្រុមប្រថុយប្រថានក្នុងការឆ្លងនោះឡើយ។ ដូចជាសព្វថ្ងៃនេះ ក្នុងទីក្រុងប៉េកាំង មានចំណុចពិនិត្យមេរោគកូវីដ-19 ក្នុងមន្ទីរពេទ្យទាំងអស់ 98កន្លែង។ កាលពីមុនហ្នឹង ធនធានឈុតត្រួតពិនិត្យផ្សេងៗមានចំនួនកំណត់ តែចិនប្រើពេលត្រឹមតែប៉ុន្មានខែប៉ុណ្ណោះ ក្នុងការលើកកម្ពស់សក្ដានុពលការផលិតឧបករណ៍ពេទ្យ ឱ្យត្រឡប់មកមានគ្រប់គ្រាន់ជាមួយតម្រូវការ និងថែមទាំងត្រៀមជាស្រេចសម្រាប់តម្រូវការនាពេលអនាគតទៀតផង។ ឈុតត្រួតពិនិត្យ និងវិធីការពិនិត្យកូវីដ-19 របស់ចិន មានច្រើន វើហ្សឹន មានច្រើនវិធី អភិវឌ្ឍរហូតមកដល់បច្ចុប្បន្ន ដែលមានភាពច្បាស់លាស់ខ្ពស់ និងឆាប់រហ័ស…ទាំងអស់នេះ នាពេលអនាគត ការពិនិត្យរកមេរោគកូវីដ-19 ផ្ទៃក្នុងប្រទេស នឹងក្លាយជាសភាវប្រក្រតីថ្មី ដូចគ្នា។
នៅមានសេចក្ដីលម្អិតច្រើនចំណុចទៀត ដែលស្មេរមិនបានរៀបរាប់ដល់ តែរឿងដែលកើតឡើងក្នុងពេលបច្ចុប្បន្ន ធ្វើឱ្យយើងត្រូវតែរិះរកវិធីទប់ទល់បន្តទៅទៀតនាពេលអនាគត បើទោះបីជាមិនស៊ាំធ្លាប់ជាមួយរឿងជាច្រើនក្ដី តែក៏ត្រូវតែបង្ខំចិត្ត និងសម្របសម្រួលខ្លួនទាំងអស់គ្នា ដើម្បីសុខសុវត្ថិភាពរបស់ខ្លួនឯង និងសួនរួម ហើយខណៈពេលនេះ វ៉ាក់សាំងការពារមេរោគកូវីដ-19 គឺជាសេចក្ដីសង្ឃឹមតែមួយគត់របស់មនុស្សទូទាំងពិភពលោក៕
ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា
June 22, 2020
ជាង9លាននាក់បានឆ្លងវីរុសCOVID-19 នៅទូទាំងពិភពលោក
ពិភពលោកទាំងមូលមានមនុស្សជាង9លាននាក់បានឆ្លងវីរុសCOVID-19 និងជិត470,000នាក់បានស្លាប់ដោយសារវីរុសនេះ។
ប្រទេសនិងដែនដីចំនួន221បានរកឃើញអ្នកផ្ទុកវីរុសCOVID-19សរុប 9,032,065នាក់ និងអ្នកស្លាប់ដោយសារវីរុសនេះសរុប 469,527នាក់ ក្នុងនោះមានអ្នកជំងឺថ្មីចំនួន131,832នាក់ និងអ្នកស្លាប់ថ្មីចំនួន3,412នាក់ត្រូវបានរកឃើញក្នុងអំឡុង24ម៉ោងចុងក្រោយនេះ។ ចំនួនអ្នកជំងឺដែលបានជាសះស្បើយបានកើនឡើងដល់ជិត5លាននាក់។
ទ្វីបអាមេរិកមានអ្នកជំងឺសរុប4,513,806នាក់ ខណៈទ្វីបអឺរ៉ុបមាន2,310,961នាក់ ទ្វីបអាស៊ីមាន1,900,841នាក់ និងទ្វីបអាហ្វ្រិកមាន309,153នាក់។
ប្រទេសដែលបានរកឃើញអ្នកផ្ទុកវីរុសចាប់ពី300,000នាក់ឡើងទៅ មានចំនួន5ប្រទេស រួមមាន សហរដ្ឋអាមេរិក (2,356,657នាក់) ប្រេស៊ីល (1,086,990នាក់) រុស្ស៊ី (584,680នាក់) ឥណ្ឌា (426,910នាក់) និងប្រទេសអង់គ្លេស (304,331នាក់)។
បណ្ដាប្រទេសដែលមានអ្នកស្លាប់ដោយសារវីរុសCOVID-19 ច្រើនជាង20,000នាក់ មានចំនួន7ប្រទេស រួមមានសហរដ្ឋអាមេរិក (122,247នាក់) ប្រេស៊ីល (50,659នាក់) អង់គ្លេស (42,632នាក់) អ៊ីតាលី (34,634នាក់) ប្រទេសបារាំង (29,640នាក់) អេស្ប៉ាញ (28,323នាក់) ម៉ិកស៊ិក (21,825នាក់) និងប្រទេសឥណ្ឌា (13,703នាក់)៕
ប្រភព៖ សារព័ត៌មានបរទេស
June 22, 2020
គ្រូបបង្រៀនក្លាយជា “ចោរ zombie” ប្លន់ធនាគារ18កន្លែងនៅអាមេរិក
Alan Hurwitz ធ្លាប់ជាគ្រូបង្រៀនម្នាក់ដែលជួយជំរុញឱ្យមានយត្តិធម៌សង្គម ក៏ប៉ុន្តែចាប់ពីឆ្នាំ1992 Alan Hurwitz ត្រូវបានគេស្គាល់ជាទូទៅថាជា “ចោរ Zombie” បន្ទាប់ពីបានប្លន់ធនាគារជាបន្តបន្ទាប់។
រយៈពេល9សប្ដាហ៍ក្នុងឆ្នាំ1992 Zurwitz បានប្លន់ធនាគារចំនួន18កន្លែងនៅក្នុងរដ្ឋ Michigan, Indiana, Illinois និងរដ្ឋ Ohio នៃសហរដ្ឋអាមេរិក។ ទឹកមុខដែលប្រកបដោយភាពគ្មានវិញ្ញាណរបស់គាត់ក្នុងពេលប្លន់ធនាគារ បានធ្វើឱ្យ FBI ដាក់រហ័សនាមឱ្យគាត់ថា “ចោរ zombie” (Zombie Bandit)។
ក្រោយពីកម្មវិធី “ជនល្មើសត្រូវតាមចាប់ខ្លួនខ្លាំងក្លាបំផុតនៅអាមេរិក” បានបង្ហោះវីដេអូស្ដីអំពីករណីប្លន់ធនាគាររបស់ Hurwitz ភាគីខាង FBI ក៏ទទួលបានតម្រុយមួយចំនួនដែលនាំឱ្យឈានដល់ការចាប់ខ្លួន Hurwitz នៅក្នុងតំបន់ Fowlerville នៃទីក្រុង Detroit រដ្ឋ Michigan។ Hurwitz បានសារភាពថា បានប្លន់ធនាគារចំនួន13កន្លែង ហើយក៏ទទួលទោសជាប់ពន្ធនាគារ12ឆ្នាំ។
ប៉ុន្តែ Hurwitz មិនបានកែខ្លួននោះឡើយ។ នៅចុងឆ្នាំ2008 Hurwitz ប្រើប្រាស់កាំភ្លើងដើម្បីប្លន់ជាច្រើនលើកនៅ Oregon និង North California នៅពេលកំពុងរស់នៅក្នុងតំបន់ Orleans រដ្ឋ California ជាមួយកូនស្រី Laura។ Hurwitz ត្រូវបានចាប់ខ្លួននៅក្នុងតំបន់ Wyoming និងត្រូវបានកាត់ទោសឱ្យជាប់ពន្ធនាគារចំនួន17ឆ្នាំកន្លះ។
កាលពីថ្ងៃទី20ឧសភា Hurwitz ត្រូវបានដោះលែងពីពន្ធនាគារមួយនៅ North Carolina ក្នុងគ្រាដែល COVID-19 កំពុងរាតត្បាតខ្លាំងនៅក្នុងពន្ធនាគារ។ អ្នកទោស8នាក់បានស្លាប់ដោយសារCOVID-19 នៅពេលដែល Hurwitz ត្រូវបានដោះលែង។ កូនស្រី Kanwitz Hurwitz Hoene បានឱ្យដឹងថា ឪពុករបស់នាងមិនទាន់បានធ្វើតេស្តរកវីរុសនៅឡើយនៅពេលនៅក្នុងពន្ធនាគារ។
លោក Alan Hurwitz កាលពីពេលមិនទាន់ក្លាយជា “ចោរ zombie”
Hurwitz បានធ្វើដំណើរតាមយន្តហោះពី North Carolina ទៅកាន់ Chicago ហើយក៏បានធ្លាក់ខ្លួនឈឺ បន្ទាប់ពីធ្វើដំណើរទៅដល់ Denver ក្នុងដំណើរឆ្ពោះទៅកាន់ Orleans។ Hurwitz ត្រូវបានបញ្ជូនទៅកាន់មន្ទីរពេទ្យនៅក្នុងតំបន់ Denver ហើយក៏បានស្លាប់ក្នុងថ្ងៃទី6មិថុនានៅក្នុងវ័យ79ឆ្នាំ ដោយសារតែឆ្លង COVID-19។
Alan Hurwitz កើតនៅថ្ងៃទី18មករា1941 នៅក្នុងទីក្រុង Detroit។ ម្ដាយរបស់ Alan Hurwitz ឈ្មោះ Minnie គឺជាលេខាម្នាក់ ចំណែកឪពុកឈ្មោះ Theodor គឺជាមន្ត្រីគយ។ Alan Hurwitz បាននិយាយប្រាប់ Detroit Metro Times កាលពីឆ្នាំ2005ថា “ខ្ញុំធំឡើងជាមួយនឹងតម្លៃនៃសាសនាយូដាប្រកបដោយសេរីភាពទាក់ទិននឹងយុត្តិធម៌ ការសិក្សា និងភាពស្មើគ្នា”។
ក្រោយពីត្រូវបានបញ្ឈប់ពីការសិក្សានៅសាកលវិទ្យាល័យរដ្ឋ Wayne ព្រោះតែរៀនខ្សោយ Hurwitz ក៏បានចូលបម្រើកងទ័ពបម្រុងនៃទ័ពម៉ារីន។ បន្ទាប់មក Hurwitz ក៏ត្រលប់មកសាកលវិទ្យាល័យរដ្ឋ Wayne ដើម្បីទទួលយកសញ្ញាបត្របរិញ្ញាផ្នែកអប់រំ។
លោក Hurwitz បានធ្វើជាគ្រូបង្រៀនផ្នែកអក្សរសាស្ត្រនិងស្រាវជ្រាវសង្គមនៅសាលាមធ្យមសិក្សាមួយ និងបានកាន់កាប់តំណែងមួយចំនួន រួមមានទីប្រឹក្សាផ្នែកកិច្ចការឈប់អនុវត្តគោលនយោបាយបែងចែកសិស្សទៅតាមពូជសាសន៍នៅក្នុងបណ្ដាសាលាឯកជននៅទីក្រុងDetroit។ លោកថែមទាំងជាសមាជិកនៃក្រុមសកម្មជនប្រឆាំងអំពើហិង្សាក្នុងសាលា និងជានាយកផ្នែកអប់រំរបស់ក្រុមសង្គមស៊ីវិលមួយដែលមានឈ្មោះថា New Dtroit ផងដែរ។
Hurwitz ចាប់ផ្ដើមចេញប្លន់ធនាគារក្រោយពីញៀនថ្នាំកូកាអ៊ីន។ Tim George ជាមន្ត្រីប្រចាំការនៅប៉ូស្តិ៍នគរបាល Medford ក្នុងរដ្ឋ Oregon ថ្លែងថា “គាត់បានធ្វើកិច្ចការល្អជាច្រើនក្នុងជីវិត ប៉ុន្តែគាត់គឺជាទាសកររបស់កូកាអ៊ីន”។ Hurwitz ប្រាប់ថា គាត់បាក់ទឹកចិត្តដោយសារតែការប្រឹងប្រែងកែទម្រុងផ្នែកអប់រំនិងទប់ស្កាត់គ្រោះរើសអើងពូជសាសន៍របស់ខ្លួនទទួលបរាជ័យ”។
លោក Alan Hurwitz
ប៉ុន្តែ ជីវិតប្រកបដោយទោសទណ្ឌបានផ្ដល់ឱកាសឱ្យគាតបង្រៀនអ្នកទោស។ Karen និយាយថា “គាត់បានរកឃើញគោលដៅរបស់ខ្លួននៅក្នុងពន្ធនាគារ។ គាត់បានបង្រៀនអ្នកទោសឱ្យចេះសរសេរនិងអានអក្សរ ព្រមទាំងបង្រៀនអំពីប្រវត្តិសាស្ត្រផងដែរ”។
Hurwitz មិនមានអារម្មណ៍ថាមានកំហុសចំពោះការប្លន់ធនាគារនោះទេ។ Karen ប្រាប់ថា “គាត់ស្អប់ក្រុមមនុស្សជាម្ចាស់ធនាគារ និងការដែលពួកគេទទួលបានការធានាគាំពារ។ ប៉ុន្តែគាត់មានអារម្មណ៍សោកស្ដាយព្រោះតែអាចធ្វើឱ្យប៉ះពាល់ដល់ផ្លូវចិត្តរបស់បុគ្គលិកធនាគារ ដែលជាអ្នកជឿថា Hurwitz បានលាក់កាំភ្លើងខ្លីនៅត្រង់ចង្កេះ”។
Karen បន្តថា “ប្រការដែលឪពុកខ្ញុំសោកស្ដាយបំផុតនោះគឺការដែលជីតារបស់ខ្ញុំបានស្លាប់ក្នុងពេលដែលគាត់ត្រូវជាប់ពន្ធនាគារ។ លោកតាខ្ញុំ ជឿជាក់លើឪពុកខ្ញុំ ហើយក៏បានលើកលែងទោសឱ្យគាត់”៕
ប្រភព៖ NYTimes
June 22, 2020
COVID-19! ជាង460,000នាក់ស្លាប់នៅទូទាំងពិភពលោក! អ្នកជំងឺនៅប្រេស៊ីលឡើងដល់ខ្ទង់លាននាក់
ពិភពលោកបានរកឃើញអ្នកផ្ទុកវីរុសCOVID-19 ជាង8.7លាននាក់ និងអ្នកស្លាប់ជាង460,000នាក់ ក្នុងគ្រាដែលស្ថានភាពវិបត្តិសុខភាពនៅក្នុងបណ្ដាប្រទេសក្នុងតំបន់អាមេរិកឡាទីននៅតែអាក្រក់ឡើងៗ។
ប្រទេសនិងដែនដីជាង221ក្នុងពិភពលោក បានរាយការណ៍ថា បានរកឃើញអ្នកផ្ទុកCOVID-19សរុប 8,735,990នាក់ និងអ្នកស្លាប់សរុប461,522នាក់ កើនជាបន្តបន្ទាប់គឺ 180,588នាក់ និង 6,322នាក់បើធៀបនឹងម្សិលមិញ។ ចំណែកអ្នកជំងឺដែលបានជាសះស្បើយមានចំនួន 4,617,507នាក់។
ទ្វីបអាមេរិកបានរកឃើញអ្នកជំងឺCOVID-19សរុប4,348,734នាក់ ខណៈទ្វីបអឺរ៉ុបរកឃើញ2,283,096នាក់ ទ្វីបអាស៊ី1,816,317នាក់ និងអាហ្វ្រិករកឃើញ288,812នាក់។
សហរដ្ឋអាមេរិកនៅតែជាសម្បុកមេរោគធំជាងគេបង្អស់ក្នុងពិភពលោក ដោយបានរកឃើញអ្នកជំងឺសរុប2,294,246នាក់ និងអ្នកស្លាប់សរុប121,379នាក់ ក្នុងនោះមានអ្នកជំងឺថ្មី34,257នាក់និងអ្នកស្លាប់ថ្មី836នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។
ស្ថានភាពឆ្លងវីរុសCOVID-19 នៅបណ្ដាប្រទេសក្នុងតំបន់អាមេរិកឡាទីនកំពុងតែកើនឡើងខ្លាំង ក្នុងនោះ ប្រទេស
ប្រេស៊ីលជាសម្បុកមេរោគCOVID-19ធំជាងគេលំដាប់ទីពីរបន្ទាប់់ពីសហរដ្ឋអាមេរិក។ ប្រទេសនេះរកឃើញអ្នកជំងឺសរុប1,038,568នាក់ និងអ្នកស្លាប់សរុប48,954នាក់។ អ្នកជំងឺថ្មីដែលទើបរកឃើញមានចំនួន49,554នាក់ និងអ្នកស្លាប់ថ្មី1,085នាក់។
ប្រទេសរុស្ស៊ីរកឃើញអ្នកជំងឺថ្មី 7,972នាក់ និងអ្នកស្លាប់ថ្មី181នាក់ នាំឱ្យតួលេខអ្នកជំងឺសរុបឡើងដល់569,063នាក់ និងអ្នកស្លាប់សរុបឡើងដល់324,406នាក់។
ឥណ្ឌាឈរលំដាប់ទី4នៅក្នុងចំណោមបណ្ដាប្រទេសដែលមានអ្នកជំងឺច្រើនជាងគេក្នុងពិភពលោក ដោយមានអ្នកជំងឺសរុប395,812នាក់ និងអ្នកស្លាប់សរុប12,970នាក់ ក្នុងនោះមានអ្នកជំងឺថ្មី14,721នាក់ និងអ្នកស្លាប់ថ្មីមានចំនួន366នាក់៕
June 20, 2020
ដំណឹងល្អ!! WHO ជឿជាក់ថា នឹងមានវ៉ាក់សាំងព្យាបាលកូវីដ-19 ប្រមាណជា 200លានដូស នៅចុងឆ្នាំនេះ
ទីភ្នាក់ងារព័ត៌មាន សៅថ៍ ឆាយណា ម៉រនីង ផូស្ត បានរាយការណ៍ថា អង្គការសុខភាពពិភពលោក(WHO) កាលពីថ្ងៃព្រហស្បតិ៍ ទី18 មិថុនាម្សិលមិញ បានថ្លែងថា ខ្លួនជឿជាក់ថា វ៉ាក់សាំងប្រឆាំងមេរោគកូវីដ-19 ប្រមាណជា 200លានដូស អាចនឹងត្រូវផលិតចេញមកក្នុងអំឡុងចុងឆ្នាំនេះ និងមានគោលដៅដំបូងគេគឺ ជួយដល់ក្រុមមនុស្សដែលទន់ខ្សោយចំពោះមេរោគវីរុសនេះខ្លាំងជាងគេបំផុតជាមុនសិន។
អង្គភាពសុខភាពសាធារណៈ នៃអង្គការសហប្រជាជាតិ បានឱ្យដឹងថា ពួកគេកំពុងធ្វើការងារក្រោមការប៉ាន់ប្រមាណដែលថា វ៉ាក់សាំងចំនួន 2,000លានដូស នឹងត្រូវផលិតឡើងនៅក្នុងអំឡុងចុងឆ្នាំ2021 ក្នុងខណៈដែលក្រុមហ៊ុនផលិតឱសថទាំងឡាយ កំពុងនាំគ្នាប្រញាប់រួសរាន់យ៉ាងពេញទំហឹង ក្នុងការព្យាយាមស្វែងរកវ៉ាក់សាំងផ្សេងៗទៀត ដែលអាចព្យាបាលអាការជំងឺដែលបណ្ដាលមកពីមេរោគវីរុសកូរ៉ូណាប្រភេទថ្មី យ៉ាងមានប្រសិទ្ធភាព។
លោកស្រីវេជ្ជបណ្ឌិត សូមៀ ស្វាមីណាថាន ប្រធានក្រុមអ្នកវិទ្យាសាស្ត្ររបស់អង្គការសុខភាពពិភពលោក បានថ្លែងថា ក្រុមអ្នកស្រាវជ្រាវទាំងឡាយកំពុងដំណើរការស្រាវជ្រាវវិភាគអនាគតវ៉ាក់សាំងផ្សេងៗច្រើនជាង 200ប្រភេទទូទាំងពិភពលោក ក្នុងនោះមានប្រមាណជា 10ប្រភេទដែលបានចូលទៅដល់ដំណាក់កាលនៃការសាកល្បងនៅលើមនុស្សហើយ។ លោកស្រីបានថ្លែងតាមរយៈវីដេអូថា “បើយើងសំណាងល្អខ្លាំងនោះ យើងនឹងមានអនាគតវ៉ាក់សាំងដែលទទួលបានជោគជ័យ 1 ឬ 2យ៉ាង មុនដំណាច់ឆ្នាំនេះ”។
ទាំងអស់នេះ លោកស្រីបានបញ្ជាក់អំពីក្រុមមនុស្ស 3ក្រុម ដែលត្រូវការវ៉ាក់សាំងឈុតដំបូងៗខ្លាំងជាងគេបំផុត ដែលមានដូចជា ទី1 មន្ត្រីដែលប្រតិបត្តិការនៅជួរមុខ ដែលប្រថុយក្នុងការឆ្លងមេរោគខ្ពស់បំផុត ដូចជា គ្រូពេទ្យ និងប៉ូលិស ជាដើម។ ទី2 ក្រុមបុគ្គលដែលទន់ខ្សោយចំពោះមេរោគវីរុសខ្លាំងបំផុត ដូចជា មនុស្សចាស់ជរា និងអ្នកជំងឺទឹកនោមផ្អែម និងទី3 ក្រុមបុគ្គលដែលរស់នៅក្នុងសភាពបរិស្ថានដែលមេរោគអាចសាយភាយបានដោយងាយ ដូចជា ទីប្រជុំជនអនាធិបតេយ្យ និងមណ្ឌលមើលថែទាំមនុស្សចាស់ជរា ជាដើម។
លោកស្រីវេជ្ជបណ្ឌិត ស្វាមីណាថាន បានថ្លែងថា “អ្នកចាំបាច់ត្រូវចាប់ផ្ដើមដោយក្រុមមនុស្សដែលទន់ខ្សោយបំផុត ហើយបន្ទាប់ពីនោះ វ៉ាក់សាំងក៏នឹងតម្រង់ឆ្ពោះជាបណ្ដើរៗទៅរកក្រុមមនុស្សផ្សេងៗបន្ថែមទៀត…យើងកំពុងធ្វើការក្រោមចំណុចប៉ាន់ប្រមាណដែលថា យើងអាចនឹងមានវ៉ាក់សាំងចំនួន 200លានដូសនៅចុងឆ្នាំនេះ ព្រោះវាកំពុងមានការមើលឃើញបែបវិជ្ជមានច្រើនណាស់”
“យើងសង្ឃឹមថា ក្នុងឆ្នាំ2021 យើងនឹងមានវ៉ាក់សាំងដែលមានប្រសិទ្ធភាពក្នុងការព្យាបាលប្រមាណជា 1,000 ឬ 2,000 ឬក៏ 3,000លានដូស ចែកចាយទៅទូទាំងពិភពលោក តែក្នុងពេលនេះ ប្រហែលជាត្រូវនៅប្រើពាក្យថា “បើសិន” សិនហើយ ព្រោះថា យើងនៅមិនទាន់ទទួលបានវ៉ាក់សាំងណាមួយ ដែលទទួលបានការពិសោធរួចហើយនៅឡើយ”។ លោកស្រីបានបន្តទៀតថា “តែដោយសារតែគ្រប់ការវិនិយោគ កំពុងឆ្ពោះទៅរកការផលិតវ៉ាក់សាំង ទើបខ្ញុំចង់និយាយថា ក្នុងអំឡុងចុងឆ្នាំ2021 យើងប្រហែលជានឹងមានវ៉ាក់សាំងចំនួន 2,000លានដូសសម្រាប់ប្រជាជន ឬយ៉ាងតិចបំផុត ក៏មានសម្រាប់ចាក់ឱ្យពលរដ្ឋគោលដៅដែរ”។
ការយល់ឃើញនេះ ស៊ីចង្វាក់គ្នាជាមួយអ្នកគ្រប់គ្រងលំដាប់ខ្ពស់់របស់ក្រុមហ៊ុនផលិតថ្នាំពេទ្យទាំងឡាយ ដែលបានប្រាប់កាលពីខែកន្លងទៅថា ប្រហែលជានឹងមានការបង្ហាញខ្លួនវ៉ាក់សាំងប្រឆាំងកូវីដ-19 មួយ ឬក៏ច្រើនយ៉ាង មុននឹងចូលដល់ឆ្នាំ2021 តែសូមប្រាប់ជាមុនថា អាចចាំបាច់ត្រូវមានវ៉ាក់សាំងរួមគ្នាច្រើនដល់ទៅ 15,000លានដូសឯណោះ សម្រាប់យកឈ្នះមេរោគវីរុសប្រភេទនេះ៕
ប្រភព៖ សារព័ត៌មានបរទេស
June 19, 2020
ឥណ្ឌាបញ្ជូនអាវក្រោះទៅឱ្យទាហាននៅព្រំដែន ក្រោយហេតុការណ៍វាយតប់គ្នានឹងទាហានចិន
កងទ័ពនៃប្រទេសឥណ្ឌាបានបញ្ជូនអាវក្រោះប្រឆាំងកុបកម្មរាប់រយឈុតទៅឱ្យទាហានរបស់ខ្លួននៅក្នុងតំបន់ Ladakh ដើម្បីការពារពួកគេពីអាវុធមុតស្រួច និងដុំថ្មរបស់សត្រូវ។
ក្នុងដំណាក់កាលដំបូង ឈុបការពារខ្លួនចំនួន500ត្រូវបានដឹកជញ្ជូនតាមយន្តហោះពីទីក្រុង Mumbai ទៅកាន់ទីរួមស្រុក Leh ក្នុងតំបន់ Ladakh កាលពីម្សិលមិញដើម្បីបំពាក់ជូនទាហានដែលកំពុងបំពេញភារកិច្ចការពារព្រំដែននៅតាមបន្ទាត់គ្រប់គ្រងជាក់ស្ដែង LAC (Line of Actual Control)។ ក្នុងចំណោមឈុតការពារខ្លួននោះក៏មានបន្ទះpolycarbonate ដែលអាចការពារដែកស្រួច និងដុំថ្មផងដែរ។ នេះបើតាមប្រភពព័ត៌មានពីរដ្ឋាភិបាលឥណ្ឌា។
ឈុតការពារខ្លួនខាងលើ ត្រូវបានបំពាក់ជូនទាហានឥណ្ឌានៅតាមព្រំដែន ក្រោយពីមានហេតុការណ៍វាយតប់គ្នាជាមួយទាហានចិនកាលពីថ្ងៃទី15មិថុនាកន្លងទៅនៅត្រង់ចំណុចត្រួតពិនិត្យទី14 (PP-14) នៅតំបន់ជ្រលងភ្នំ Galwan។ ប្រភពព័ត៌មានបានឱ្យដឹងថា ក្នុងហេតុការណ៍វាយតប់គ្នា ទាហានចិនបានប្រើប្រាស់ដំបងដែកដែលមានផ្សារភ្ជាប់ដែកគោល និងដំបូងរុំខ្សែលួស ខណៈដែលទាហានឥណ្ឌាមានតែដៃទទេ។
ពលរដ្ឋឥណ្ឌាសម្ដែងការខឹងសម្បានឹងប្រទេសចិនដោយការដុតទង់ជីតចិន
ក្នុងហេតុការណ៍នោះ មានទាហានឥណ្ឌាយ៉ាងតិច20នាក់បានស្លាប់ ក្នុងនោះមាន3នាក់ស្លាប់នៅនឹងកន្លែងកើតហេតុ និង17នាក់ផ្សេងទៀតបានស្លាប់បន្ទាប់ពីហេតុការណ៍បានស្ងប់ស្ងាត់។
សារព័ត៌មានឥណ្ឌាបានចេញផ្សារដែរថា ទាហានចិនជាង40នាក់បានស្លាប់និងរងរបួសក្នុងហេតុការណ៍វាយតប់គ្នាខាងលើ។ ទីក្រុងប៉េកាំងបានទទួលស្គាល់ថា ទាហានមួយចំនួនរបស់ខ្លួនបានស្លាប់និងរងរបួស ប៉ុន្តែមិនបានបញ្ជាក់អំពីតួលេខច្បាស់លាស់នោះឡើយ។
សារព័ត៌មានឥណ្ឌារាយការណ៍ថា ទាហានឥណ្ឌាត្រូវបានទាហានចិនវាយប្រហារ និងសម្លាប់នៅនឹងកន្លែង នៅតំបន់ក្បែរចំណុចត្រួតពិនិត្យ PP-14។ ប៉ុន្តែ បញ្ជាការដ្ឋានភូមិភាគខាងលិចរបស់កងទ័ពរំដោះប្រជាជនចិន (PLA) និយាយថា ទាហានឥណ្ឌាបានឆ្លងកាត់បន្ទាត់ព្រំដែន LAC និង “មានចេតនាបញ្ឆេះកំហឹង” នាំឱ្យមានហេតុការណ៍វាយតប់គ្នាកើតឡើង។
ហេតុការណ៍ខាងលើនេះ គឺជាការប៉ះទង្គិចគ្នានាំឱ្យមានមនុស្សស្លាប់ដំបូងគេបង្អស់នៅតាមបន្ទាត់ព្រំដែនប្រវែង3,488គីឡូម៉ែត្ររវាងប្រទេសទាំងពីរ រាប់ចាប់តាំងពីការផ្ទុះអាវុធដាក់គ្នាដែលបានបណ្ដាលឱ្យទាហានឥណ្ឌា4នាក់ស្លាប់នៅ Tulung La ក្នុងតំបន់ Arunachal Pradesh កាលពីឆ្នាំ1975។
ចិននិងឥណ្ឌាកាលពីថ្ងៃទី17មិថុនាកន្លងទៅ បានព្យាយានបន្ធូរបន្ថយភាពតានតឹងនៅតំបន់ព្រំដែន។ រដ្ឋមន្ត្រីការបរទេសនៃប្រទេសទាំងពីរបានពិភាក្សាគ្នាតាមទូរស័ព្ទ និងបានយល់ព្រម “បន្ថយកម្ដៅស្ថានការណ៍” បើទោះជាប្រទេសទាំងពីរនៅតែចោទដាក់គ្នាលើហេតុការណ៍ដែលបានកើតឡើងក៏ដោយ៕
ប្រភព៖ សារព័ត៌មានបរទេស
June 19, 2020
អតីតទីប្រឹក្សាផ្នែកសន្តិសុខ និងក្មួយស្រីរបស់លោកត្រាំ សរសេរសៀវភៅ 2ក្បាល បកអាក្រាត និងបង្ហាញពីពុតត្បុតលោកត្រាំ
នៅសល់តែ 4ខែទៀតប៉ុណ្ណោះ នឹងដល់ថ្ងៃបោះឆ្នោតជ្រើសតាំងប្រធានាធិបតីសហរដ្ឋអាមេរិកហើយ ហើយលោកដូណាល់ ត្រាំ ក៏កំពុងជឿជាក់យ៉ាងខ្លាំងថា លោកនឹងត្រូវតែទទួលបានការជ្រើសតាំងជាប្រធានាធិបតីនៃសហរដ្ឋអាមេរិក ជាលើកទី2 ដោយសារតែជាទំនៀមទម្លាប់ខាងនយោបាយ ដែលប្រធានាធិបតីរបស់សហរដ្ឋអាមេរិក ច្រើនតែនៅបាន 2អាណត្តិ និងដោយសារតែការមានប្រៀបច្រើនជាង លើផ្នែកការគ្រប់គ្រងការផ្សព្វផ្សាយព័ត៌មាន ដែលបង្ហាញតែលទ្ធផល និងស្នាដៃរបស់ប្រធានាធិបតី រួមទាំងការថ្លែងការណ៍ និងការសម្ភាសផ្សេងៗ ដែលគូប្រជែងមិនបានទទួលឱកាសបែបនោះឡើយ។
រឹតតែនៅពេលលោកដូណាល់ ត្រាំ ចូលមកទទួលតំណែងនៅក្នុងសេតវិមាន លោកបានជំរុញផែនការកាត់បន្ថយពន្ធភាស៊ីដ៏ធំមួយ ដែលធ្វើឱ្យត្រូវចិត្តបណ្ដាអ្នកជំនួញលំដាប់ធំៗ ដោយមានការទម្លាក់ពន្ធភាស៊ីសម្រាប់ពួកអ្នកមានៗ និងក្រុមហ៊ុនផ្សេងៗទៀតផង ដោយសារតែពួក Republican មានផ្នត់គំនិតមួយថា បើអ្នកធុរកិច្ច និងក្រុមហ៊ុនរបស់ពួកគេ បានទទួលការកាត់បន្ថយពន្ធភាស៊ី ពួកគេក៏នឹងមានប្រាក់នៅសល់ ដើម្បីទៅពង្រីកធុរកិច្ចថ្មី ជាការបន្ថែមឱកាសការងារកាន់តែច្រើនឡើងដល់ពលរដ្ឋ ដោយប្រាក់របស់ពួកអ្នកមានទាំងនោះ នឹងហូរហៀរទៅដល់ក្រុមកម្មករនិយោជិតដែលមានប្រាក់ចំណូលតិច តាមរយៈការបង្កើនឱកាសការងារហ្នឹងឯង។ វាជា Repple Effect ដែលប្រាក់ និងភាពមានបាន នឹងហូរចុះពីលើទៅក្រោម ដែលទោះជាផ្នត់គំនិតនេះ ត្រូវបានជំទាស់ដោយអ្នកជំនាញខាងសេដ្ឋកិច្ចលំដាប់រង្វាន់ណូបែលជាច្រើននាក់ របស់អាមេរិក ដូចជាលោក Paul Krugman និងលោក Joseph Stiglitz ដែលខំព្យាយាមពិសោធឱ្យឃើញថា វាមិនមែនដូច្នោះឡើយ និងវាថែមទាំងធ្វើឱ្យមានភាពមិនស្មើភាពគ្នាកាន់តែច្រើនឡើងក៏ដោយ។
សេដ្ឋកិច្ចដែលវាស់តាមរយៈ Index ផ្សារហ៊ុនដែលបំបែកស្ថិតិ ស្ទើរតែរៀងរាល់អាទិត្យកាលពីមុនពេលកើតមានវិបត្តិកូវីដ-19 រួមទាំង GDP ដែលពង្រីកខ្លួន(ទោះជាភាពមិនស្មើភាពគ្នា រឹតតែមានធ្ងន់ធ្ងរឡើងនៅក្នុងសហរដ្ឋអាមេរិក ប្រភេទដែលលោក Warren Buffet មហាសេដ្ឋីផ្សារហ៊ុន បានចេញមកបង្ហាញពីការអាណិតអាសូរ អ្នកដែលមានប្រាក់ចំណូលតិចថា លេខារបស់លោក ត្រូវបង់ពន្ធច្រើនជាងរូបលោកទៅទៀតក៏ដោយ) វាបានធ្វើឱ្យលោកត្រាំមានទំនុកចិត្តថា ពលរដ្ឋសហរដ្ឋអាមេរិក នឹងជ្រើសរើសយករូបលោកទៀត ក្នុងអាណត្តិទី2 នេះជាមិនខាន ព្រោះរាល់ពេលដែលលោកទៅជួបប្រាស្រ័យរកសំឡេងឆ្នោតជាមួយប្រជាជន លោកតែងតែគាស់យកមកបង្ហាញ តែរឿងតួលេខល្អៗខាងសេដ្ឋកិច្ច និងឱកាសការងារ មកបន្ថែមពិន្ទុនិយមឱ្យខ្លួនឯង ពេញមួយរយៈពេល 3ឆ្នាំកន្លងទៅនេះ។
លោក ចន បូលតុន
តែ មហិទ្ធិឫទ្ធិ ដែលលោកដូណាល់ ត្រាំ ត្រូវប្រឈមយ៉ាងមិននឹកស្មានដល់នោះគឺ មេរោគកូវីដ-19 ដែលលោកមើលងាយថា វានឹងធ្វើស្អីសហរដ្ឋអាមេរិកមិនបាននោះ និងធ្វើឱ្យលោកចេញវិធានការទប់ទល់យឺតយ៉ាវដល់ទៅ 8អាទិត្យនោះ បានធ្វើឱ្យមេរោគរីករាលដាលឥតឈប់ និងសេដ្ឋកិច្ចរងគ្រោះជាបន្តបន្ទាប់ រួមទាំងការធ្វើបាតុកម្មតវ៉ាដ៏ធំ ទូទាំងសហរដ្ឋអាមេរិក រឿងប៉ូលិសប្រើអំពើហិង្សាដោយអគតិទៀតផង។
ដោយទាំង 3រឿង ដែលកំពុងទាញទម្លាក់សំឡេងឆ្នោតរបស់លោកត្រាំនេះ ធ្វើឱ្យរហូតមកដល់ពេលនេះ គូប្រជែងរបស់លោកត្រាំ គឺលោក ចូ បៃដេន កំពុងតែវ៉ាទៅមុខដាច់ ទាំងក្នុងផូលទូទាំងប្រទេស និងក្នុងរដ្ឋដែលធ្លាប់ជួយលោកត្រាំឱ្យបានទៅអង្គុយក្នុងសេតវិមានទៀតផង។
ពេលនេះលោកត្រាំ បានងាកមកប្រើកលយុទ្ធរកសំឡេងឆ្នោត 2រឿងគឺ រឿងដំបូង ម៉ៅឱ្យចិនក្លាយជាពពែរងគ្រោះ ក្នុងងរឿងមេរោគកូវីដ-19 និងរឿងចិនប្លន់ការងារធ្វើពីប្រជាជនអាមេរិក។
រឿងទី2 គឺ សរុបយកការតវ៉ាទាមទារយ៉ាងស្ងប់ស្ងាត់ទូទាំងសហរដ្ឋអាមេរិក ដើម្បីធ្វើការរៀបចំក្រុមអង្គភាពប៉ូលិសជាថ្មី និងកែសម្រួលគ្រោងសាងខាងសង្គម ឱ្យប្រាសចាកការអគតិ ចំពោះក្រុមជនជាតិភាគតិច គឺជនស្បែកខ្មៅ(អតីតទាសករ) និងពួកស្បែកក្រហម(គឺពួក Hispanics ហ្នឹងឯង) ដោយលោកត្រាំ បានងាកមកនិយាយសង្កត់ធ្ងន់ថា ត្រូវប្រើកម្លាំង(ទាហាន) ចូលទៅបង្ក្រាបក្រុមអ្នកតវ៉ាយ៉ាងស្ងប់ស្ងាត់ទាំងនោះ ដែលលោកបាននិយាយបង្វែងឱ្យក្លាយជាក្រុមជនអន្ធពាល កម្ទេចអ្វីៗសព្វបែបយ៉ាង យកភ្លើងដុតបំផ្លាញអគារ ឆក់ប្លន់ទំនិញរបស់ហាងនានា និងជាភេរវករ។
តែ ស្រាប់តែមានបណ្ដាឧត្ដមសេនីយ៍ធំៗ ទាំងពេលបច្ចុប្បន្ន(ដូចជា អគ្គមេបញ្ជាការ លោកឧត្ដមសេនីយ៍ឯក Mark Milley) និងចូលនិវត្តន៍ហើយ បាននាំគ្នាចេញមក ប្រកាសមិនឯកភាព ដែលលោកត្រាំចង់ប្រើកម្លាំងប្រចាំការ មកបង្ក្រាបអ្នកប្រឆាំងតវ៉ាយ៉ាងស្ងប់ស្ងាត់ និងចោទថា លោកត្រាំមិនស័ក្តិសមក្នុងការធ្វើជាប្រធានាធិបតីឡើយ។ ដល់ថ្នាក់លោក Colin Powell (អតីតឧត្ដមសេនីយ៍ឯក ប្រធានគណៈសេនាធិការយោធាចម្រុះ) ចេញមកប្រកាសថា នឹងមិនទៅបោះឆ្នោតជ្រើសរើសលោកដូណាល់ ត្រាំ នៅថ្ងៃទី3 ខែវិច្ឆិកាខាងមុខទៀតផង ព្រោះលោកត្រាំមិនស័ក្តិសមជាមេដឹកនាំសេតវិមានទៀតទេ និងភូតកុហកគ្រប់ពេលវេលា។
អគ្គមេបញ្ជាការ លោកឧត្ដមសេនីយ៍ឯក Mark Milley
ហើយរឿងដែលគួរឱ្យភ្ញាក់ផ្អើលបំផុតនោះគឺ នៅថ្ងៃទី23 មិថុនាខាងមុខនេះ សៀវភៅរបស់លោក John Bolton អតីតទីប្រឹក្សាផ្នែកសន្តិសុខ(មនុស្សទី3 របស់លោកត្រាំ) កំពុងតែជិតដល់ពេលដាក់លក់នៅលើទីផ្សារជាផ្លូវការហើយ ដោយកាលពីពេលមុន មានកំណត់នឹងដាក់លក់ក្នុងអំឡុងខែកន្លងទៅ តែត្រូវអង្គភាពសន្តិសុខរបស់សេតវិមាន បានស្នើសុំឱ្យផ្ញើសេចក្ដីលម្អិតនៃខ្លឹមសារ ទៅឱ្យពួកគេពិនិត្យមើលសិន តែរហូតមកដល់ពេលនេះ លោក ចន បូលតុន បានបញ្ជូនសៀវភៅទាំងមូលដែលបោះពុម្ពរួចហើយ ទៅឱ្យបណ្ដាទីភ្នាក់ងារព័ត៌មានផ្សេងៗ ដើម្បីឱ្យនាំយកខ្លឹមសារមួយផ្នែកទៅផ្សព្វផ្សាយឱ្យប្រជាជនបានដឹង។
កាលពីដើម រឿងដែលធ្វើឱ្យលោក បូលតុន សម្រេចចិត្តសុំលាឈប់ពីមុខតំណែងនោះ គឺដោយសារតែលោក “ទ្រាំធំក្លិនស្អុយមិនបាន” ករណីដែលលោកត្រាំ បានពន្យារថវិកាជួយខាងយោធា ដែលសភាសហរដ្ឋអាមេរិក បានអនុម័តរួចរាល់ហើយ…ជាថវិកាជួយទៅដល់រដ្ឋាភិបាលប្រទេសយូក្រេន ដែលកងទ័ពរបស់ប្រទេសនេះ ត្រូវការយ៉ាងចាំបាច់ខ្លាំង សម្រាប់ទៅប្រយុទ្ធតស៊ូនឹងការរុករានឈ្លានពានរបស់កងទ័ពរុស្ស៊ី។
លោកត្រាំ បានគាបសង្កត់មេដឹកនាំប្រទេសយូក្រេន ថា លោកថវិកានេះនឹងទម្លាក់ទៅជួយយូក្រេន តែប្រធានាធិបតីថ្មីរបស់យូក្រេន ត្រូវតែលើករឿងមួយឡើងថា ពួកគេកំពុងពិនិត្យករណីលោក ចូ បៃដេន(គូប្រជែងរបស់លោកត្រាំ) ថា មានការទទួលបានផលប្រយោជន៍ពីកូនប្រុសរបស់លោក ចូ បៃដេន ដែលបានធ្វើជាប្រធានក្រុមហ៊ុនឧស្ម័នធំបំផុតរបស់យូក្រេន។
លោក ចន បូលតុន បានមិចភ្នែកដាក់កូនចៅរបស់លោក ឱ្យទៅប្រាប់អ្នកត្រួតពិនិត្យកិច្ចការរដ្ឋ អំពីរឿងដែលលោកត្រាំបានទូរស័ព្ទទៅតវ៉ាទាមទារផលប្រយោជន៍ ជាមួយប្រធានាធិបតីប្រទេសយូក្រេន…តែនៅទីបំផុត លោកបូលតុន ក៏លាលែងចេញពីតំណែង។
តែ នៅក្នុងសៀវភៅ 1ក្បាលនោះ ក្រៅពីមានសេចក្ដីលម្អិតដ៏គួរឱ្យភ្ញាក់ផ្អើលថា លោកបានស្ថិតនៅក្នុងហេតុការណ៍ ពេលលោកត្រាំទូរស័ព្ទ ទៅតវ៉ាជាមួយមេដឹកនាំយូក្រេន ក្នុងគ្រានោះហើយ…លោកបូលតុន ថែមទាំងបកអាក្រាតពីការដែលលោកត្រាំ បានតវ៉ាដោះដូរផលប្រយោជន៍ជាមួយលោកប្រធានាធិបតី ស៊ី ជីនភីង របស់ចិនទៀតផងកាលពីពេលជួបគ្នាក្នុងឆ្នាំកន្លងទៅ ទាំងរឿងដែលលោកប្រធានាធិបតី ស៊ី ព្យាយាមបញ្ចុះបញ្ចូល មិនឱ្យលោកត្រាំ វាយប្រហារលោកស៊ី រឿងជំរំ(ធ្វើទុក្ខបុកម្នេញ) អប់រំប្ដូរទស្សនគតិរបស់ជនភាគតិចអ៊ុយគូ នៅឯស៊ីនកៀង ដែលរដ្ឋបាលចិនបានចាប់ខ្លួនយកទៅដាក់នៅទីនោះជាង 1លាននាក់។ ដោយលោកត្រាំ បានប្រាប់ថា ឯកភាពចំពោះជំរំសម្ងាត់នេះ…និងរឿង 1ទៀតគឺ លោកត្រាំ បានសុំឱ្យលោកស៊ី ជួយទិញទំនិញកសិកម្មដែលជាមូលដ្ឋានសំឡេងឆ្នោតរបស់ខ្លួន(លោកត្រាំ) ដើម្បីឱ្យខ្លួនបានក្លាយជាប្រធានាធិបតីក្នុងអាណត្តិទី2 នេះទៀតផង។ លោក បូលតុន បានរៀបរាប់នៅក្នុងសៀវភៅនោះថា លោកត្រាំ បាននិយាយច្បាស់ៗតែម្ដងថា សុំឱ្យលោកស៊ី ជួយលោកឱ្យក្លាយជាប្រធានាធិបតីក្នុងអាណត្តិទី2។
នៅមានរឿងការចរចា រវាងលោកត្រាំ ជាមួយលោក វ៉្លាឌីមៀ ពូទីន ទៀតផង ដោយលោកបូលតុន បានលើកចំណុចសង្កេតថា វាក៏ដូចគ្នាដែរ គឺលោកត្រាំសុខចិត្តបន្ទន់ឥរិយាបថឱ្យលោកពូទីន ដើម្បីឱ្យប្រទេសរុស្ស៊ី ជួយក្នុងការបោះឆ្នោតរបស់លោក…។
លោកបូលតុន បានបញ្ជាក់តាំងពីដើមដំបូង របស់សៀវភៅរបស់លោកថា លោកត្រាំ នឹងធ្វើគ្រប់យ៉ាង ដើម្បីផលប្រយោជន៍របស់ខ្លួនឯងមុនគេក្នុងការបោះឆ្នោត និងយកផលប្រយោជន៍របស់ជាតិជារឿងបន្ទាប់។
សៀវភៅរបស់លោក បូលតុន ឈ្មោះថា “បន្ទប់ដែលមានហេតុការណ៍កើតឡើង” ឬ The Room Where it Happened នៅមានព័ត៌មានសម្ងាត់ជាច្រើនទៀត ដែលបានទាញកញ្ឆក់បើកស្រោមមុខរបស់លោកត្រាំ ឱ្យមើលឃើញពីភាពល្បិចកល និងគិតតែពីផលប្រយោជន៍របស់ខ្លួន មុនផលប្រយោជន៍ប្រទេសជាតិ។
សៀវភៅ 1ក្បាលទៀតរបស់ក្មួយស្រី របស់លោកត្រាំ ឈ្មោះ Mary Trump អាយុ 55ឆ្នាំ ដែលជាកូនស្រីរបស់បងប្រុសច្បងរបស់លោកត្រាំ(ដែលមានឈ្មោះថា Fred Trump JR)។ លោកស្រី បានសរសេរសៀវភៅ បានយ៉ាងឆ្ងាញ់ដៃសម្បើមណាស់ ក្នុងការបើកកកាយពុតត្បុតលោកពូ ដ៏សែនអាក្រក់របស់លោកស្រី ដែលមានចំណងជើងថា “ច្រើនប៉ុនណា ក៏មិនដែលគ្រប់…តើហេតុអីបានក្រុមគ្រួសាររបស់យើង ជួយគ្នាសាងបុរសម្នាក់ដែលមានគ្រោះថ្នាក់បំផុតរបស់ពិភពលោកឡើងកើត? ឬ Too Much and Never Enough…How My Family Created the Wold’s Most Dangerous Man?។ បោះពុម្ពដោយ Simon & Schuster ហើយបម្រុងនឹងដាក់លក់លើទីផ្សារ(ដោយបានគណនាយ៉ាងល្អិតល្អន់) នៅថ្ងៃទី28 កក្កដា ដែលជិតដល់ថ្ងៃបោះឆ្នោតធំ ដើម្បីចូលរួមចំណែកទាញកញ្ឆក់បើកស្រោមមុខ និងបកអាក្រាតលោកត្រាំ។
លោកស្រី មែរី ត្រាំ
យកត្រឹមតែឧទាហរណ៍ខ្លីៗគឺ លោកស្រីបានរៀបរាប់ថា លោកពូត្រាំ បានកេងបន្លំកេរមរតកដែលលោកតា Fred Trump Sr.តាំងជាគំនរមរតកទុកឱ្យបណ្ដាទាយាទក្រោយៗទាំងអស់…លោកស្រីខ្លួនឯង និងប្អូនប្រុស ត្រូវបានកេងប្រវ័ញ្ច រហូតដល់លោកស្រីបានប្ដឹងលោកត្រាំ ក្នុងឆ្នាំ2000 និងត្រូវរងការធ្វើបាបផ្សេងៗជាច្រើន ហើយអ្វីដែលលោកត្រាំបានអួតក្អេងក្អាងថា លោកបានទទួលប្រាក់ពីឪពុកមកចាប់ផ្ដើមរកស៊ីតាំងខ្លួនតែ 1លានដុល្លារនោះ ការពិត បានទទួលប្រាក់ពីឪពុកដល់ទៅ 400លានដុល្លារឯណោះ និងកើតឡើងក្នុងអំឡុងពេលដែលឪពុក(Fred Trump Sr.) ចាប់ផ្ដើមភ្លេចភ្លាំង ដោយរោគអាល់សៃមើរ៍។ រួមទាំងរឿងរ៉ាវរបស់ឪពុក របស់លោកស្រី មែរី គឺលោក Fred Trump Jr. បានងាកមកញៀនសុរា ដោយសារតែលោកតា Fred បង្ខំឱ្យឪពុករបស់លោកស្រី មកធ្វើការរកស៊ីខាងអចលនទ្រព្យ ទាំងខ្លួនគាត់ ចង់ក្លាយជាអ្នកបើកយន្តហោះ…រហូតដល់ទីបំផុត ឪពុករបស់លោកស្រី ត្រូវស្លាប់តាំងពីអាយុត្រឹមតែ 42ឆ្នាំ ហើយលោកស្រីមែរី និងប្អូន ក៏ត្រូវមករស់នៅក្រោមការមើលថែ របស់លោកដូណាល់ ត្រាំ និងគំនរកេរមរតក ក៏ត្រូវបានកេងប្រវ័ញ្ចយកដោយលោកត្រាំទៀតផង។
ខណៈពេលនេះ លោកស្រី មែរី ដែលរៀនចប់បរិញ្ញាឯកផ្នែកចិត្តវិទ្យា បានបើកធុរកិច្ចផ្ដល់ការប្រឹក្សាដល់អ្នកដែលធ្លាក់ទឹកចិត្ត និងនៅក្នុងទំព័រវេបសាយរបស់លោកស្រី បានឆ្លុះបង្ហាញពីភាពសោកស្ដាយរបស់លោកស្រីយ៉ាងខ្លាំង នៅពេលដែលលោកដូណាល់ ត្រាំ ឈ្នះការបោះឆ្នោតឆ្នាំ2016 ហើយសៀវភៅ 1ក្បាលនេះ នឹងចេញមកដើម្បីទប់ស្កាត់ មិនឱ្យលោកត្រាំ បានដើរចូលសេតវិមានជាលើកទី2 ហ្នឹងឯង៕
ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា
June 19, 2020
ចិនដោះលែងទាហានឥណ្ឌាដែលត្រូវចាប់ខ្លួនក្នុងហេតុការណ៍វាយតប់គ្នានៅព្រំដែន ប៉ុន្តែនៅតែចោទប្រកាន់ ទម្លាក់កំហុស និងគំរាមដាក់គ្នាដដែល
ទាហានឥណ្ឌាចំនួន10នាក់ដែលត្រូវបានចិនចាប់ខ្លួននៅក្នុងហេតុការណ៍វាយតប់គ្នាទ្រង់ទ្រាយធំនៅព្រំដែនប្រទេសទាំងពីរ បន្ទាប់ពីមានកិច្ចចរចាថ្នាក់មេបញ្ជាការយោធារបស់ចិននិងឥណ្ឌា។
សារព័ត៌មាន Press Trust រួមនឹងសារព័ត៌មានរបស់ឥណ្ឌាជាច្រើនទៀតបានរាយការណ៍ថា ទាហានឥណ្ឌាចំនួន10នាក់ត្រូវបានប្រទេសចិនដោះលែងកាលពីយប់ថ្ងៃទៅ18មិថុនាកន្លងទៅ។ រដ្ឋាភិបាលឥណ្ឌាមិនបានបញ្ចេញមតិអ្វីនៅឡើយទាក់ទិននឹងបញ្ហានេះ ប៉ុន្តែភាគីកងទ័ពឥណ្ឌាបានចេញមកអះអាងថា “មិនមានទាហានឥណ្ឌាណាម្នាក់បានបាត់ខ្លួនក្នុងពេលបំពេញភារកិច្ច” នៅក្នុងហេតុការណ៍វាយតប់គ្នានៅជ្រលងភ្នំ Galwan នោះទេ។
សារព័ត៌មានឥណ្ឌាបានចេញផ្សាយថា កិច្ចព្រមព្រៀងដោះលែងទាហានខាងលើត្រូវបានធ្វើឡើងដោយជោគជ័យក្រោយពីមានកិច្ចប្រជុំថ្នាក់ឧត្តមសេនីយ៍រវាងប្រទេសចិននិងឥណ្ឌា។
សូមរំឭកថា ទាហានឥណ្ឌា និងទាហានចិន បានវាយតប់គ្នាជាក្រុមកាលពីយប់ថ្ងៃទី15មិថុនា2020 នៅជ្រលងភ្នំ Galwan នៃតំបន់ Ladakh។ កងទ័ពជើងគោកឥណ្ឌាបញ្ជាក់ថា ទាហានឥណ្ឌាចំនួន20នាក់បានបាត់បង់ជីវិត ក្នុងនោះមាននាយទាហាន Santosh Babu ដែលជាមេបញ្ជាការកងវរសេនាតូច Bihar 16 ខណៈទាហានចំនួន18នាក់ផ្សេងទៀតកំពុងទទួលការព្យាបាលដោយសារតែរងរបួសធ្ងន់។
សារព័ត៌មានឥណ្ឌាបានចេញផ្សារដែរថា ទាហានចិនជាង40នាក់បានស្លាប់និងរងរបួសក្នុងហេតុការណ៍វាយតប់គ្នាខាងលើ។ ទីក្រុងប៉េកាំងបានទទួលស្គាល់ថា ទាហានមួយចំនួនរបស់ខ្លួនបានស្លាប់និងរងរបួស ប៉ុន្តែមិនបានបញ្ជាក់អំពីតួលេខច្បាស់លាស់នោះឡើយ។
ប្រជាជនឥណ្ឌារាប់ពាន់នាក់ចូលរួមពិធីបុណ្យសពរបស់ទាហានដែលបានបាត់បង់ជីវិតនៅក្នុងហេតុការណ៍វាយតប់គ្នាជាមួយទាហានចិននៅព្រំដែន
ក្នុងពេលមានការអំពាវនាវឱ្យឈប់ប្រើប្រាស់ទំនិញចិន កាលពីម្សិលមិញ ជនជាតិឥណ្ឌារាប់ពាន់នាក់បានចូលរួមពិធីបុណ្យសពរបស់ទាហានឥណ្ឌាដែលបានស្លាប់នៅក្នុងហេតុការណ៍ការពារទឹកដីខាងលើ។ នៅក្នុងទីក្រុងមួយចំនួន គេឃើញប្រជាជនឥណ្ឌាជាច្រើនបាននាំគ្នាលើកបដាដែលមានសរសេរថា “ឈប់ប្រើផលិតផលចិន” ព្រមទាំងធ្វើការប្រឆាំងនឹងប្រធានាធិបតីចិន លោក ស៊ី ជីនភីងផងដែរ។
ក្រុមមន្ត្រីចិននិងឥណ្ឌាកំពុងប្រឹងប្រែងស្វែងរកវិធីដោះស្រាយភាពតានតឹងតាមរយៈការចរចាដើម្បីចៀសវាងការកើនឡើងកម្ដៅដែលអាចនាំឱ្យមានការផ្ទុះអាវុធតាមព្រំដែន ប៉ុន្តែពួកគេបានទម្លាក់កំហុសដាក់គ្នាអំពីហេតុការណ៍វាយតប់គ្នា និងបានធ្វើការព្រមានដាក់គ្នានៅក្នុងសេចក្ដីប្រកាសរៀងៗគ្នា។
“ឥណ្ឌាមិនគួរវាយតម្លៃទាបចំពោះការអត់ធ្មត់របស់ចិនក្នុងកិច្ចការពារបូរណភាពទឹកដីរបស់ខ្លួននោះទេ” ក្រសួងការបរទេសចិនចេញសេចក្ដីប្រកាសបែបនេះ ក្រោយពីកិច្ចពិភាក្សារវាងរដ្ឋមន្ត្រីការបរទេសចិន លោក Wang Yi និងសមភាគីឥណ្ឌា Subrahmanyam Jaishankar។
ចំណែករដ្ឋមន្ត្រីក្រសួងការបរទេសឥណ្ឌាវិញ ថ្លែងថា ចិនបានធ្វើការវាយប្រហារដោយមាន “ផែនការមុន” ហើយថាបញ្ហានេះនឹងជះឥទ្ធិពលធ្ងន់ធ្ងរដល់ទំនាក់ទំនងរវាងប្រទេសទាំងពីរ៕
ប្រភព៖ សារព័ត៌មានបរទេស
June 19, 2020
ប្រទេសចំនួន18ដែលបានរកឃើញអ្នកជំងឺCOVID-19 លើសពី100,000នាក់ ខណៈអ្នកជំងឺសរុបឡើងដល់ជិត8.6លាននាក់នៅទូទាំងសកលលោក
ពិភពលោកទាំងមូលត្រូវបានរាយការណ៍ថា មានអ្នកជំងឺ COVID-19 ជិត8.6លាននាក់ និងជាង455,000នាក់បានស្លាប់ ហើយបើគិតតាមចំនួនសរុបនៃប្រជាជនរបស់ពិភពលោក ក្នុងចំណោមមនុស្ស1000,000នាក់គឺមាន58.4នាក់ស្លាប់ដោយសារវីរុសនេះ។
ប្រទេសនិងដែនដីចំនួន221ក្នុងពិភពលោក បានរកឃើញអ្នកផ្ទុកវីរុសចំនួន8,555,402នាក់ និង455,200នាក់បានស្លាប់ដោយសារCOVID-19។ ក្នុងរយៈពេល24ម៉ោងកន្លងទៅនេះ អ្នកជំងឺCOVID-19 បានកើន165,793នាក់ និងអ្នកស្លាប់កើន4,803នាក់បើធៀបនឹងម្សិលមិញ។ ចំណែកអ្នកជំងឺដែលបានជាសះស្បើយមានចំនួន4,503,093នាក់។
ទ្វីបអាមេរិកបានរកឃើញអ្នកផ្ទុកវីរុសCOVID-19 សរុប4,235,439នាក់ ខណៈទ្វីបអឺរ៉ុបរកឃើញ2,268,136 ទ្វីបអាស៊ីរកឃើញ1,775,302នាក់ និងទ្វីបអាហ្វ្រិករកឃើញ278,677នាក់។
បណ្ដាប្រទេសដែលបានរកឃើញអ្នកជំងឺCOVID-19 លើសពី100,000នាក់ បានកើនដល់18ប្រទេស រួមមានសហរដ្ឋអាមេរិក ប្រេស៊ីល រុស្ស៊ី ឥណ្ឌា អង់គ្លេស អេស្ប៉ាញ ប៉េរូ អ៊ីតាលី ឈីលី អ៊ីរ៉ង់ អាល្លឺម៉ង់ ទួរគី បារាំង ម៉ិកស៊ិក ប៉ាគីស្ថាន អារ៉ាប់ប៊ីសាអូឌីត កាណាដា និងបង់ក្លាដែស។
បើគិតទៅតាមចំនួនប្រជាជនសរុបនៅទូទាំងពិភពលោក ក្នុងចំណោមមនុស្ស1000,000នាក់ គឺមាន1,099នាក់បានឆ្លងវីរុសCOVID-19 និងក្នុងចំណោមមនុស្ស1000,000នាក់គឺមាន58.4នាក់បានស្លាប់ដោយសារវីរុសនេះ៕
ប្រភព៖ សារព័ត៌មានបរទេស
June 19, 2020
ទាហានឥណ្ឌា20នាក់បានស្លាប់នៅក្នុងហេតុការណ៍វាយតប់គ្នាជាមួយទាហានចិន
កងទ័ពជើងគោកឥណ្ឌាបានឱ្យដឹងថា ទាហានរបស់ខ្លួនចំនួន20នាក់បានស្លាប់នៅក្នុងករណីវាយតប់គ្នាជាមួយទាហានចិននៅតំបន់ព្រំដែនដែលកំពុងមានជម្លោះ ដែលស្ថិតនៅតំបន់ Galwan កាលពីថ្ងៃទី15មិថុនាកន្លងទៅ។
“ទាហានឥណ្ឌា17នាក់ដែលរងរបួសធ្ងន់ធ្ងរនៅពេលបំពេញបេសកកម្មនៅតំបន់មានជម្លោះ និងត្រូវស្ថិតក្រោមសីតុណ្ហភាពក្រោម 0°C ក្នុងរយៈពេលវែង បណ្ដាលឱ្យពួកគេត្រូវបាត់បង់ជីវិត នាំឱ្យចំនួនទាហានដែលបានស្លាប់ក្នុងការបំពេញភារកិច្ចនៅព្រំដែនបានឡើងដល់20នាក់” នេះបើតាមកងទ័ពជើងគោកឱ្យដឹងកាលពីថ្ងៃទី16មិថុនា ដែលនេះទាក់ទិននឹងករណីវាយតប់គ្នាយ៉ាងខ្លាំងក្លារវាងទាហានឥណ្ឌា និងទាហានចិននៅតំបន់ព្រំដែនដែលកំពុងមានជម្លោះ។
ករណីវាយតប់គ្នាបានកើតឡើងនៅព្រលប់ថ្ងៃទី15មិថុនា នៅជ្រលងភ្នំ Galwan ក្នុងតំបន់ Ladakh ជាកន្លែងដែលឥណ្ឌានិងចិនសុទ្ធតែអះអាងថាជាកម្មសិទ្ធិរបស់ខ្លួន។ នេះគឺជាករណីវាយតប់គ្នាដែលបង្កឱ្យមានមនុស្សស្លាប់ដំបូងគេបង្អស់រាប់ចាប់ពីករណីចិនស្ទាក់វាយទាហានឥណ្ឌាក្នុងឆ្នាំ1975 នៅលើបន្ទាត់គ្រប់គ្រងជាក់ស្ដែង (Line of Actual Control/LAC) ជាកន្លែងដែលត្រូវបានចាត់ទុកថាជាព្រំដែនចិន-ឥណ្ឌា។ បន្ទាត់ព្រំដែនដែលមានប្រវែង 3,488គីឡូម៉ែត្រនេះ ត្រូវបានបង្កើតឡើងក្រោយសង្គ្រាមចិន-ឥណ្ឌា ឆ្នាំ1962។
ទាហានឥណ្ឌាកំពុងការពារព្រំដែននៅតំបន់ភ្នំ Bumla ជាប់នឹងព្រំដែនចិនកាលពីឆ្នាំ2012
“ប្រភពព័ត៌មានពីរដ្ឋាភិបាលឥណ្ឌាឱ្យដឹងថា នៅពេលទាហានទាំងសងខាងកំពុងពិភាក្សាអំពីវិធានការកាត់បន្ថយភាពតានតឹងនៅតំបន់កំពុងមានជម្លោះ ស្រាប់តែទាហានចិនវាយតប់គ្នាជាមួយនឹងទាហានឥណ្ឌា។ ភាគីចិនបានបន្ថែមកម្លាំងជំនួយ ហើយអំពើងហិង្សាខ្លាំងក្លាក៏បានកើតឡើងនិងអូសបន្លាយពេលជាច្រើនម៉ោង។
ប្រភពឱ្យដឹងថា “ពួកគេវាយប្រហារគ្នាដោយដំបងដែក ធ្វើឱ្យទាហានភាគីរបស់ខ្ញុំត្រូវរងរបួសធ្ងន់ និងខ្លះដួលសន្លប់។ ក្នុងពេលនោះដែរ ទ័ពជំនួយរបស់ចិនក៏បានមកដល់ និងវាយប្រហារមកពួកយើងដោយដុំថ្ម”។
ឥណ្ឌាឱ្យដឹងថា ភាគីខាងទាហានចិនក៏រងរបួស និងស្លាប់ផងដែរ ប៉ុន្តែប្រទេសចិនមិនបានប្រកាសឱ្យដឹងអំពីចំនួនអ្នកស្លាប់និងរបួសក្នុងករណីវាយតប់គ្នានេះនោះទេ។ ភាគីទាហានចិនបានចោទប្រកាន់ថា ទាហានឥណ្ឌាបានឆ្លងចូលមកទឹកដីរបស់ពួកគេ យើងវាយប្រហារលើទាហានចិន។
យ៉ាងនេះក្ដី ភាគីទាំងសងខាងបានបញ្ជាក់ថា មិនមានការប្រើប្រាស់កាំភ្លើងនោះទេនៅក្នុងករណីនេះ ហើយការស្លាប់និងរបួសភាគច្រើនកើតឡើងដោយសារការប្រើប្រាស់កណ្ដាប់ដៃ ដុំថ្ម និងដំបងដែក។
តំបន់ព្រំដែនចិន-ឥណ្ឌាដែលកំពុងមានជម្លោះ
អ្នកនាំពាក្យបញ្ជាការដ្ឋានកងទ័ពចិនប្រចាំភូមិភាគខាងលិចបានចោទថា “ឥណ្ឌាមិនគោរពកិច្ចសន្យា និងបានឆ្លងកាត់បន្ទាត់ LAC ដោយខុសច្បាប់”។ លោកបន្តថា “ពួកគេមានចេតនាវាយប្រហារនាំឱ្យមានការវាយតប់គ្នាកើតឡើង បណ្ដាលឱ្យមានអ្នកស្លាប់និងរបួសច្រើននាក់”។
ចំណែកឯក្រសួងការបរទេសឥណ្ឌាវិញ ក៏បានចោទទាហានចិនថាបានបង្កើតឱ្យមានករណីវាយតប់គ្នានៅព្រំដែន ដោយសារភាគីចិនស្វែងរកវិធីដោយឯកតោភាគីដើម្បីផ្លាស់ប្តូរស្ថានភាពនៅតំបន់កំពុងមានជម្លោះ។
June 17, 2020