Category: អន្តរជាតិ

បក្ខភាពអនុប្រធានាធិបតីដែលទើបត្រូវបានជ្រើសរើសដោយលោក Joe Biden មានដើមកំណើតអាស៊ី-អាហ្វ្រិក
ការដែលត្រូវបានលោក Joe Biden ជ្រើសរើសជាអនុប្រធានាធិបតីសម្រាប់ការបោះឆ្នោតខាងមុខ លោកស្រី Kamala Harris បានក្លាយជាស្ត្រីអាមេរិកាំងដើមកំណើតអាស៊ីនិងអាហ្វ្រិកដំបូងគេ ដែលបានក្លាយជាបេក្ខភាពអនុប្រធានាធិបតី តំណាងឱ្យគណបក្សមួយនៅសហរដ្ឋអាមេរិក។
បេក្ខភាពប្រធានាធិបតីមកពីបក្សប្រជាធិបតេយ្យអាមេរិក លោក Joe Biden កាលពីថ្ងៃទី11សីហា បានប្រកាសជ្រើសរើសស្ត្រីតំណាងរាស្ត្រម្នាក់ឈ្មោះ Kamala Harris អាយុ55ឆ្នាំ ឱ្យធ្វើជាបេក្ខភាពអនុប្រធានាធិបតីសម្រាប់ការបោះឆ្នោត “ប្រជែងចូលកាន់កាប់” សេតវិមាននាឆ្នាំ2020នេះ។
លោកស្រី Harris កើតឆ្នាំ1964 នៅទីក្រុង Oakland រដ្ឋ California និងមានឈាមជ័រជាជនជាតិអាស៊ីនិងអាហ្វ្រិក។
ម្ដាយរបស់លោកស្រី Harris ឈ្មោះ Shyamala Gopalan ដែលជាកូនស្រីម្នាក់របស់អ្នកការទូតឥណ្ឌា និងធ្លាប់រៀនចប់មហាវិទ្យាល័យ Delhi ក្នុងវ័យ19ឆ្នាំ។ ដើម្បីចៀសវាងអាពាហ៍ពិពាហ៍ផ្សំផ្គុំ លោកស្រី Gopalan ក៏បានទៅសិក្សានៅសហរដ្ឋអាមេរិក នៅសាកលវិទ្យាល័យ Califoria ក្នុងតំបន់ Berkeley។ នៅទីនេះ លោកស្រី Gopalan បានជួបលោក Donald Harris ជាបុរសមកពី Jamaica និងជានិស្សិតស្រាវជ្រាវផ្នែកសេដ្ឋកិច្ច។
ក្នុងរូបថតខាងលើ លោកស្រី Harris (ខាងឆ្វេងបង្អស់) ថតជាមួយសមាជិកគ្រួសារ។
បន្ទាប់ពីបានបញ្ចប់ការសិក្សាផ្នែកច្បាប់នៅសាកលវិទ្យាល័យ California លោកស្រី Harris ក៏បានចាប់ផ្ដើមធ្វើជាមេធាវីនៅមុនពេលឆ្លងកាត់តំណែងផ្សេងៗនៅ California។ លោកស្រីគឺជាស្ត្រីអ្នកនយោបាយដ៏លេចធ្លោម្នាក់នៅក្នុងរដ្ឋនេះ ហើយក៏ជាសមាជិកម្នាក់ដែលមានការគាំទ្រច្រើននៅក្នុងបក្សប្រជាធិបតេយ្យនៅក្នុងការស្ទង់មតិនានាផងដែរ។
លោកស្រី Harris បានជាប់ឆ្នោតជាតំណាងរាស្ត្រនៃសភាជាន់ខ្ពស់សហរដ្ឋអាមេរិកកាលពីឆ្នាំ2016 ដែលនេះគឺជាតំណាងរាស្ត្រអាមេរិកាំងដើមកំណើតអាស៊ីដំបូងគេដែលត្រូវបានជ្រើសរើសជាអ្នកតាក់តែងច្បាប់នៅក្នុងស្ថាប័ននេះ។
លោកស្រី Harris ក៏ធ្លាប់ជាបេក្ខភាពប្រធានាធិបតីឆ្នាំ2020 របស់បក្សប្រជាធិបតេយ្យ ដែលបានធ្វើឱ្យមានការចាប់អារម្មណ៍ច្រើនក្នុងដំណាក់កាលដំបូងនៃការបោះឆ្នោតបឋមក្នុងការជ្រើសរើសតំណាងរបស់បក្សនេះសម្រាប់ទៅប្រកួតប្រជែងដណ្ដើមយកតំណែងប្រធានាធិបតីនៅក្នុងខែវិច្ឆកាខាងមុខ។ លោកស្រីក៏ធ្លាប់បានចូលរួមតតាំងជាមួយនឹងបេក្ខភាពប្រធានាធិបតីដទៃទៀតរបស់បក្សប្រជាធិបតេយ្យ ក្នុងនោះក៏មានលោក Joe Biden ផងដែរ នៅមុនពេលដកថយកាលពីខែធ្នូ2019 ដោយសារអត្រានៃសំឡេងឆ្នោតបានថយចុះ និងបញ្ហាខ្វះហិរញ្ញវត្ថុដើម្បីប្រជែងរកសម្លេងឆ្នោត។
លោកស្រី Harris មានទំនាក់ទំនងល្អជាមួយនឹងអតីតប្រធានាធិបតី Barack Obama ដែលជាមនុស្សម្នាក់ធ្លាប់បានបញ្ចេញសំឡេងគាំទ្រអតីតប្រធានាធិបតី Joe Biden ក្នុងការ “រត់ប្រណាំង” ចូលសេតវិមាន។ លោក Obama និងលោកស្រី Harris នៅក្នុងរូបដែលបានថតកាលពីឆ្នាំ2013 ដែលកាលណោះលោកស្រីនៅជាអគ្គរដ្ឋអាជ្ញារបស់រដ្ឋ California នៅឡើយ។
លោកស្រី Harris ក៏ជាមិត្តជិតស្និទ្ធរបស់ Beau Beden ដែលជាកូនប្រុសរបស់លោក Joe Beden និងធ្លាប់ជាអគ្គរដ្ឋអាជ្ញារបស់រដ្ឋ Delaware ផងដែរ។ លោក Beau បានស្លាប់កាលពីឆ្នាំ2015 ដោយសារជំងឺដុះសាច់ក្នុងខួរក្បាល។
លោកស្រី Harris ទទួលទានអាហារថ្ងៃត្រង់នៅក្នុងអាហារដ្ឋានមួយនៅពេលកំពុងចូលរួមការឃោសនារកសំឡេងឆ្នោតសម្រាប់តំណែងប្រធានាធិបតី នៅឯទីក្រុង Charleston ក្នុងរដ្ឋ South Carolina កាលពីខែកុម្ភៈ2019។
លោកស្រី Harris ចូលរួមធ្វើការទាមទារដំឡើងប្រាក់ខែឱ្យបាន15ដុល្លារ/ម៉ោង ជូនកម្មករនៅ Las Vegas នៃរដ្ឋ Nevada កាលពីខែមិថុនា2019។
លោកស្រី Harris អាំងសាច់ក្នុងពេលចូលរួមពិធីតាំងពិព័ណ៍មួយនៅ Des Moines រដ្ឋ Iowa ដែលស្ថិតក្នុងយុទ្ធនាការឃោសនារកសំឡេងឆ្នោតមួយកាលពីខែសីហា2019។
លោកស្រី Harris គាំទ្រសហគមន៍ LGBTQ (ជាសហគមន៍របស់មនុស្សភេទទី3) នៅក្នុងព្យុហយាត្រាមួយដែលមានឈ្មោះថា Pride នៅក្នុងទីក្រុង San Francisco នៃរដ្ឋ California។
លោកស្រី Harris បានរៀបការជាមួយមេធាវី Douglas Emhoff កាលពីឆ្នាំ2014។ អ្នកទាំង2 មិនទាន់មានកូនជាមួយគ្នាទេ ប៉ុន្តែលោក Emhoff មានកូន2នាក់ជាមួយនឹងអតីតភរិយារបស់លោក។ គិតមកដល់ខែសីហា2019 គ្រួសាររបស់លោកស្រី Harris មានទ្រព្យសរុបប្រមាណជា5.8លានដុល្លារអាមេរិក។
ក្រោយពីត្រូវបានជ្រើសរើសជាបេក្ខភាពអនុប្រធានាធិបតីពីសំណាក់លោក Biden លោកស្រី Harris បានក្លាយជាស្ត្រីអាមេរិកាំងដើមកំណើតអាស៊ី និងអាហ្វ្រិកដំបូងគេដែលបានក្លាយជាបេក្ខភាពអនុប្រធានាធិបតីដែលតំណាងឱ្យបក្សធំមួយនៅសហរដ្ឋអាមេរិក។ ដោយសារជាមនុស្សម្នាក់នៅមានកម្លាំងមាំមួន មានបទពិសោធន៍ច្រើនផ្នែកច្បាប់ និងនយោបាយ លោកស្រី Harris ត្រូវបានរំពឹងថានឹងនាំមកនូវ “ជំនោរថ្មី” សម្រាប់យុទ្ធនាការរកសំឡេងឆ្នោតរបស់បេក្ខភាពប្រធានាធិបតី Joe Biden នៃគណបក្សប្រជាធិបតេយ្យរបស់សហរដ្ឋអាមេរិក៕
ប្រភព៖ Reuters, AP
August 12, 2020
ឪពុកចិត្តឃោរឃៅ ដាក់ច្រវាក់កូនអាយុ12ឆ្នាំឱ្យរស់នៅក្នុងក្រោលសត្វ និងយកចំណីពពែជាអាហារអស់រយៈពេលជាង2ឆ្នាំ
ឪពុកបង្កើត រួមជាមួយនឹងម្ដាយចុងចំនួន3នាក់របស់ក្មេងប្រុសនេះ ត្រូវបានចាប់ខ្លួនក្រោយពីក្រុមអ្នកជួយសង្គ្រោះបានប្រទះឃើញជនរងគ្រោះត្រូវចងនឹងច្រវាក់នៅក្នុងក្រោលសត្វចិញ្ចឹម ព្រមទាំងមានរូបរាងស្គាំងស្គម និងបាក់កម្លាំងទៀតផង។
បន្ទាប់ពីទទួលបានព័ត៌មានពីក្រុមមេធាវីសិទ្ធិមនុស្ស កាលពីថ្ងៃទី9សីហា បុគ្គលិកជួយសង្គ្រោះមួយក្រុមបាននាំគ្នាទៅកាន់ក្រោលសត្វចិញ្ចឹមនៅឯទីលំនៅរបស់កុមារនេះ ដែលស្ថិតក្នុងតំបន់ Badariya នៃប្រទេសនីហ្សេរីយ៉ា ហើយក៏បានរកឃើញជនរងគ្រោះកំពុងជាប់ច្រវាក់នៅទីនោះ។ ស្ថានភាពរបស់កុមាររូបនេះ ពិតជាគួរឱ្យអាណិតអាសូរខ្លាំងណាស់ ដោយរូបរាងកាយមានសភាពទ្រុឌទ្រោម ស្គមស្គាំង ដោយសារត្រូវបង្អត់អាហារ និងមិនអាចក្រោកឈរដោយខ្លួនឯងបាន។
យោងតាម BBC កុមារនេះត្រូវបានចងទៅនឹងគំនរឈើមួយ និងទុកឱ្យរស់នៅជាមួយសត្វមាន់ និងពពែអស់រយៈពេល2ឆ្នាំ។ Hamza Attahiru Wala ដែលជាប្រធានក្រុមអ្នកជួយសង្គ្រោះ បានឱ្យដឹងថា គ្រួសាររបស់ក្មេងប្រុសនេះ រួមមានឪពុកបង្កើត និងម្ដាយចុង3នាក់ កំពុងរស់នៅយ៉ាងសុខស្រួល និងមានជីវភាពល្អ ជាមួយនឹងកូនៗចំនួន17នាក់ផ្សេងទៀតនៅក្នុងផ្ទះ។ ពួកគេបានឱ្យដឹងថា ម្ដាយបង្កើតរបស់កុមាររងគ្រោះនេះ បានស្លាប់កាលពី2ឆ្នាំមុនមកម្លេះ។
ដោយសារតែត្រូវបង្អត់អាហារ កុមាររងគ្រោះក៏ត្រូវបង្ខំចិត្ត ហូបស្មៅ និងអាហារផ្សេងៗដែលជារបស់សត្វពពែដើម្បីចម្អែកក្រពះ។
ក្រោយពីបានរំដោះជនរងគ្រោះ ក្រុមអ្នកជួយសង្គ្រោះក៏បាននាំកុមារនេះទៅកាន់មន្ទីរពេទ្យនៅ Birnin Kebbi ជាកន្លែងដែលក្មេងនេះត្រូវបញ្ជូនចូលបន្ទប់ថែទាំពិសេស។
Nafi’u Abubakar ដែលជាមន្ត្រីផ្នែកទំនាក់ទំនងសាធារណៈរបស់ក្រុមជួយសង្គ្រោះ បានថ្លែងថា៖ “ក្រុមរបស់យើង បានចាប់ខ្លួន Jibrin Aliyu ដែលជាឪពុកបង្កើតរបស់កុមាររងគ្រោះ រួមនឹងប្រពន្ធ3នាក់របស់បុរសនេះ ក្រោមបទល្មើស “ដាក់ច្រវាក់ និងឃុំឃាំងកូនរបស់ខ្លួនក្នុងក្រោលសត្វជាង2ឆ្នាំ។ យើងកំពុងតែបន្តស៊ើបអង្កេតលើករណីនេះ”។
បងប្រុសម្នាក់របស់កុមាររងគ្រោះបាននិយាយប្រាប់អ្នកយកព័ត៌មានថា កុមាររងគ្រោះនេះមានជំងឺឆ្កួតជ្រូក (តំបន់ខ្លះហៅថា ជំងឺប្រកាច់ជ្រូក) ហើយគ្រួសារក៏ចងកុមារនេះឱ្យនៅមួយកន្លែងដើម្បីកុំឱ្យដើរវង្វេងបាត់ពីផ្ទះ។ បុរសដែលជាបងប្រុសរបស់កុមាររងគ្រោះបាននិយាយបន្តថា ប្អូនរបស់ខ្លួនត្រូវចងតែពេលថ្ងៃប៉ុណ្ណោះ។ ក្រុមគ្រួសារនេះក៏បានអះអាងថា ធ្លាប់បានលក់ផ្ទះ លក់មធ្យោបាយធ្វើដំណើរផ្សេងៗដើម្បីយកប្រាក់មកព្យាបាលជំងឺឱ្យកុមារនេះទៀតផង៕
ប្រភព៖ Mail
August 12, 2020
George Floyd! វីដេអូថ្មី បង្ហើបអំពីទិដ្ឋភាពមិនធ្លាប់បានឃើញក្នុងគ្រាប៉ូលិសចាប់ខ្លួនបុរសស្បែកខ្មៅរូបនេះ
ព័ត៌មានស្ដីអំពី George Floyd ដែលជាបុរសស្បែកខ្មៅម្នាក់ត្រូវបានប៉ូលិសយកជង្គង់សង្កត់ករហូតដល់ស្លាប់កាលពីថ្ងៃទី25ឧសភា នៅក្នុងទីក្រុង Minneapolis នៃរដ្ឋ Minnesota ដោយសារជាប់សង្ស័យថាបានប្រើប្រាស់លុយក្លែងក្លាយ ពេលនេះនៅលើទំព័រសារព័ត៌មាននានា មានការចុះផ្សាយវីដេអូថ្មីបំផុតដែលបង្ហើបឱ្យឃើញអំពីទិដ្ឋភាពមិនធ្លាប់បានដឹងក្នុងគ្រាប៉ូលិសចាប់ខ្លួនបុរសស្បែកខ្មៅរូបនេះ។
លោក Floyd អាយុ46ឆ្នាំ ត្រូវបានប៉ូលិស4នាក់ចាប់ខ្លួនកាលពីថ្ងៃទី25ឧសភា ក្រោមបទចោទថាបានប្រើប្រាស់ប្រាក់ក្លែងក្លាយ។ មន្ត្រីប៉ូលិសម្នាក់ឈ្មោះ Derek Chauvin បានយកជង្គង់សង្កត់ទៅលើកគល់កផ្នែកខាងក្រោយរបស់ Floyd ក្នុងរយៈពេល9នាទី បើទោះជាបុរសនេះបានស្រែកអង្វរ និងនិយាយថា “ខ្ញុំមិនអាចដកដង្ហើម” យ៉ាងណាក៏ដោយ។ លោក Floyd បានបាត់បង់ជីវិត នៅក្នុងមន្ទីរពេទ្យ។
ករណីនេះបានធ្វើឱ្យមានបាតុកម្មរាប់មិនអស់នៅទូទាំងសហរដ្ឋអាមេរិក រួមនឹងបាតុកម្មជាច្រើននៅក្រៅប្រទេស ក្នុងនោះមានទាំងបាតុកម្មអហិង្សា និងហិង្សាផងដែរ។
វីដេអូថ្មីនេះ បានបង្ហាញអំពីទិដ្ឋភាពទាំងមូលនៃសកម្មភាព17នាទីចុងក្រោយរបស់ជីវិតលោក Floyd។ សូមទស្សនាវីដេអូខាងក្រោម៖
ប្រភព៖ Nypost
August 11, 2020
កូនភព Ceres លាក់មហាសមុទ្រនៅក្រោមស្រទាប់ដី! នេះជារបកគំហើញថ្មីរបស់អាមេរិកនិងអឺរ៉ុប
លទ្ធផលនៃការសិក្សាស្រាវជ្រាវថ្មីមួយបានបង្ហាញថា វត្ថុអវកាសធំបំផុតក្នុងតំបន់ខ្សែក្រវាត់អាចម៍ផ្កាយដែលស្ថិតនៅចន្លោះពិភពព្រះអង្គារនិងពិភពព្រហស្បតិ៍ គឺជា “ពិភពមហាសមុទ្រ” មួយ។
ការរកឃើញនេះត្រូវបានអង្គការ NASA ប្រកាសឱ្យដឹងកាលពីថ្ងៃទី10សីហាកន្លងទៅ ក្រោយពីបានវិភាគទៅលើរូបភាពគុណភាពច្បាស់កម្រិតខ្ពស់ស្ដីអំពីផ្ទៃខាងលើរបស់កូនភព Ceres ដែលថតដោយយានរុករក Dawn។ មុននេះ Ceres តែងត្រូវបានគេចាត់ទុកថាជាដុំថ្មអាចម៍ផ្កាយដ៏សោះកក្រោះមួយនៅក្នុងលម្ហអវកាសតែប៉ុណ្ណោះ។
ក្រុមអ្នកវិទ្យាសាស្ត្រដែលធ្វើការលើរឿងនេះ រួមមានអ្នកជំនាញមកពីសហរដ្ឋអាមេរិក និងអឺរ៉ុប។ ពួកគេបានផ្ដោតការពិនិត្យទៅលើមាត់ភ្នំភ្លើង Occator ដែលមានអាយុកាល20លានឆ្នាំ។ តាមរយៈការប្រើប្រាស់រូបភាពអ៊ីនហ្វ្រារ៉េដដែលយានរុករកថតបានពីលើកម្ពស់ប្រហែល35គីឡូម៉ែត្រធៀបនឹងផ្ទៃរបស់កូនភព ក្រុមអ្នកវិទ្យាសាស្ត្របានរកឃើញវត្តមានរបស់ hydrohalite ដែលជាសមាសធាតុមាននៅក្នុងទឹកកកសមុទ្រ។ សមាសធាតុ hydrohalite នេះ កន្លងមកត្រូវបានគេរកឃើញនៅលើភពផែនដីតែប៉ុណ្ណោះ។
អ្នកស្រាវជ្រាវ Maria Cristina De Sanctis មកពីមន្ទីរតារាវិទ្យាជាតិនៃប្រទេសអ៊ីតាលី បានបកថ្លែងថា៖ “ពេលនេះយើងអាចនិយាយបានថា Ceres គឺជាពិភពមហាសមុទ្រ ដោយមានបឹងផ្ទុកទឹកសមុទ្រនានានៅខាងក្រោមផ្ទៃរបស់វា។ Hydrohalite គឺជាសញ្ញាដ៏ច្បាស់លាស់មួយបញ្ជាក់ថា កូនភពនេះមានទឹក”។
កូនភព Ceres មានទីតាំងស្ថិតនៅក្នុងតំបន់ខ្សែក្រវាត់អាចម៍ផ្កាយចន្លោះពិភពព្រះអង្គារនិងពិភពព្រហស្បតិ៍
ក្រុមអ្នកវិទ្យាសាស្ត្រឱ្យដឹងដែរថា អណ្ដូងរ៉ែអំបិលទាំងឡាយនៅលើផ្ទៃរបស់កូនភព Ceres ទំនងជាត្រូវបានកកើតឡើងបន្តិចម្ដងៗក្នុងអំឡុង2លានឆ្នាំកន្លងមកហើយ។ ប្រការនេះក៏បង្ហាញថា ទឹកសមុទ្រនៅតែអាចត្រូវបានរុញឡើងពីខាងក្នុងកូនភព។ ដោយការវិភាគទៅលើរូបភាពនៃមាត់ភ្នំភ្លើង Occator អ្នកវិទ្យាសាស្ត្រក៏បានរកឃើញដំបូក និងកូនភ្នំជាច្រើន ដែលនេះទំនងជាត្រូវបានបង្កើតឡើងនៅពេលទឹកបាញ់ចេញពីក្រោមដី ដោយសារឥទ្ធិពលនៃការប៉ះទង្គិចជាមួយអាចម៍ផ្កាយផ្សេងៗ ហើយក្រោយមកក៏ត្រូវកកជាទឹកកក។
អ្នកវិទ្យាសាស្ត្រ De Sanctis សង្កត់ធ្ងន់ថា៖ “ធាតុរ៉ែទាំងឡាយដែលត្រូវបានរកឃើញនៅលើកូនភព Ceres មានដូចជា hydrohalite ជាដើម ពិតជាមានសារសំខាន់ទាក់ទិននឹងតារាជីវសាស្ត្រ ដោយសារពួកវាចាំបាច់សម្រាប់វត្តមាននៃជីវិត”។
លទ្ធផលនៃការសិក្សាស្រាវជ្រាវខាងលើនេះត្រូវបានចុះផ្សាយនៅលើទស្សនាវដ្ដី Nature Astronomy, Nature Geoscience និងទស្សនាវដ្ដី Nature Comunications៕
ប្រភព៖ AFP
August 11, 2020
ញាប់ញ័រ! លោកត្រាំ គេចចេញពីបន្ទប់ថ្លែងព័ត៌មាន ក្រោយមានហេតុការណ៍បាញ់គ្នានៅក្រៅសេតវិមាន
លោកប្រធានាធិបតី ដូណាល់ ត្រាំ នៃសហរដ្ឋអាមេរិក ត្រូវបានក្រុមអង្គរក្សប្រធានាធិបតី ឬអង្គភាព Secret service នាំខ្លួនចេញពីបន្ទប់ថ្លែងព័ត៌មានយ៉ាងប្រញាប់ប្រញាល់ កាលពីថ្ងៃម្សិលមិញ(ទី10សីហា) បន្ទាប់ពីមានកើតហេតុការណ៍បាញ់ប្រហារគ្នានៅខាងក្រៅមន្ទីរសេតវិមាន។
លោក ដូណាល់ ត្រាំ កំពុងឈរនៅលើផូឌៀម និងថ្លែងបញ្ជាក់ពីរឿងទីផ្សារភាគហ៊ុន ក្នុងខណៈដែលមន្ត្រីអង្គភាព Secret service ម្នាក់ បានចូលមកបញ្ឈប់ និងអញ្ជើញលោកប្រធានាធិបតីចេញពីបន្ទប់ ចំណែករដ្ឋមន្ត្រីក្រសួងហិរញ្ញវត្ថុ លោក ស្ទីវេន មនូឈីន និងអគ្គនាយកផ្នែកថវិកា រ៉ាស់ វ៉ត ក៏ត្រូវបាននាំចេញពីបន្ទប់ថ្លែងព័ត៌មានដូចគ្នាដែរ។
ជាច្រើននាទីបន្តមកទៀត មេដឹកនាំសហរដ្ឋអាមេរិក បានត្រឡប់ចូលមកក្នុងបន្ទប់ថ្លែងព័ត៌មានសាជាថ្មីម្ដងទៀត និងបានថ្លែងបញ្ជាក់ថា អាជ្ញាធរមានសមត្ថកិច្ចបានបាញ់កាំភ្លើងដើម្បីរារាំងបុគ្គលម្នាក់ដែលមានអាវុធក្នុងដៃ និងក្រោយមក បាននាំបុគ្គលម្នាក់នោះទៅមន្ទីរពេទ្យហើយ។
លោកត្រាំ បានប្រាប់អ្នកសារព័ត៌មានទាំងអស់ថា “មានការបាញ់គ្នាមួយ បានកើតឡើងនៅខាងក្រៅមន្ទីរសេតវិមាន ហើយពេលនេះមើលទៅដូចជាអាចគ្រប់គ្រងស្ថានការណ៍បានហើយ តែមានការបាញ់គ្នាកើតឡើងមែន និងមានមនុស្សម្នាក់ត្រូវបាននាំខ្លួនទៅមន្ទីរពេទ្យ ខ្ញុំមិនទាន់ដឹងថា អាការគេ យ៉ាងណាទៅហើយទេ”
លោកត្រាំ ថែមទាំងប្រាប់ទៀតថា ចំណុចដែលមានការបាញ់គ្នានោះ ស្ថិតនៅជិតរបងខាងក្រៅមន្ទីរសេតវិមាន។
អង្គភាព Secret service បានថ្លែងឱ្យដឹងតាមរយៈប្រព័ន្ធធ្វីតធើរថា “យើងកំពុងស៊ើបសួរមន្ត្រីអង្គភាព Secret service ដែលពាក់ព័ន្ធនឹងហេតុការណ៍បាញ់គ្នានេះ…បុរសដែលជាជនសង្ស័យ និងមន្ត្រីអង្គភាព Secret service ត្រូវបាននាំខ្លួនទៅមន្ទីរពេទ្យទាំង 2នាក់ តែយើងសូមអះអាងថា គ្មាននរណាសម្រុកចូលមកក្នុងទីតាំងមន្ទីរសេតវិមាន និងគ្មានអ្នកដែលត្រូវបានការពារណាម្នាក់បានទទួលគ្រោះថ្នាក់ឡើយ”
ទ្វារបន្ទប់ថ្លែងព័ត៌មានរបស់មន្ទីរសេតវិមាន ត្រូវបានចាក់សោបិទដោយស្វ័យប្រវត្តិភ្លាមៗ ក្រោយពីមន្ត្រីអង្គភាព Secret service បាននាំលោកត្រាំចេញផុត។
មេដឹកនាំសហរដ្ឋអាមេរិក បានថ្លែងកោតសរសើរក្រុមអង្គរក្ស ដែលបានប្រតិបត្តិតួនាទីឃុំគ្រងការពាររូបលោកយ៉ាងឆាប់រហ័ស និងបានបញ្ជាក់ថា ខាងអង្គភាព Secret service នឹងថ្លែងព័ត៌មានលម្អិតអំពីរឿងនេះឱ្យបានដឹង នៅពេលក្រោយ៕

ប្រភព៖ សារព័ត៌មានបរទេស
August 11, 2020
រុស្ស៊ីចាប់ផ្ដើមប្រើប្រាស់សាកល្បងវ៉ាក់សាំងទប់ស្កាត់វីរុសCOVID-19 នៅហ្វីលីពីន
ប្រទេសរុស្ស៊ីនឹងផ្ដើមប្រើប្រាស់សាកល្បងវ៉ាក់សាំងទប់ស្កាត់ COVID-19 នៅក្នុងប្រទេសហ្វីលីពីន ចាប់ពីពាក់កណ្ដាលខែសីហា2020 ក្នុងនោះ ប្រធានាធិបតីហ្វីលីពីននឹងអាចក្លាយជាអ្នកស្ម័គ្រចិត្តដំបូងគេបង្អស់។
ថ្លែងនៅចំពោះមុខអ្នកយកព័ត៌មាន លោក Kirill Dmitriev ដែលជាប្រធានមូលនិធិវិនិយោគផ្ទាល់របស់រុស្ស៊ី (RDIF) បានឱ្យដឹងថា ជាប្រទេសមួយក្នុងចំណោមប្រទេសជាដៃគូរបស់រុស្ស៊ីក្នុងការស្រាវជ្រាវនិងអភិវឌ្ឍវ៉ាក់សាំងទប់ស្កាត់COVID-19 រដ្ឋាភិបាលហ្វីលីពីនបានបង្កភាពងាយស្រួលជាច្រើនដើម្បីជួយឱ្យការសាកល្បងវ៉ាក់សាំង អាចធ្វើឡើងបានយ៉ាងឆាប់រហ័សតាមដែលអាចធ្វើបាន។ បច្ចុប្បន្ន ដំណាក់កាលនៃការត្រៀមសម្រាប់ការសាកល្បងនានាត្រូវបានរៀបចំរួចរាល់ហើយ។ តាមគម្រោង ការសាកល្បងប្រើប្រាស់វ៉ាក់សាំងCOVID-19នេះ នឹងត្រូវផ្ដើមធ្វើឡើងចាប់ពីថ្ងៃទី15សីហាខាងមុខ។
ទាក់ទិននឹងការសាកល្បងប្រើប្រាស់វ៉ាក់របស់រុស្ស៊ីខាងលើនេះ ប្រធានាធិបតីហ្វីលីពីន លោក Rodrigo Duterte បានឱ្យដឹងថា លោកមានក្ដីសង្ឃឹមយ៉ាងច្រើនទៅលើលទ្ធផលនៃការប្រើប្រាស់សាកល្បងវ៉ាក់សាំងរបស់រុស្ស៊ី។ ទន្ទឹមនឹងនេះ លោកក៏បានថ្លែងថា ខ្លួនលោកផ្ទាល់បានត្រៀមជាស្រេចដើម្បីធ្វើជាអ្នកស្ម័គ្រចិត្តដំបូងគេបង្អស់ក្នុងការសាកល្បងប្រើប្រាស់វ៉ាក់សាំងនេះនៅហ្វីលីពីន។ តាមផែនការ បើសិនជាទទួលបានជោគជ័យ វ៉ាក់សាំងនេះក៏នឹងត្រូវបានចែកចាយនៅក្នុងប្រទេសហ្វីលីពីនជាមួយនឹងតម្លៃសមរម្យ។

លោក Kirill Dmitriev ដែលជាប្រធានមូលនិធិវិនិយោគផ្ទាល់របស់រុស្ស៊ី RDIF (Russian Direct Investment Fund)
មូលនិធិវិនិយោគផ្ទាល់ និងមជ្ឈមណ្ឌលស្រាវជ្រាវ Gamaleya កំពុងតែញាប់ដៃញាប់ជើងក្នុងកិច្ចសហការនានាសម្រាប់ដំណាក់កាលផលិតវ៉ាក់សាំងCOVID-19 ដែលបច្ចុប្បន្នស្ថិតក្នុងដំណាក់កាលប្រើប្រាស់សាកល្បងនៅលើមនុស្ស។ ការសាកល្បងប្រើវ៉ាក់សាំងនៅលើមនុស្ស បានចាប់ផ្ដើមធ្វើឡើងនៅសាកលវិទ្យាល័យ Sechenov កាលពីថ្ងៃទី18មិថុនា ជាមួយនឹងអ្នកស្ម័គ្រចិត្តចំនួន38នាក់ ហើយសុវត្ថិភាពរបស់វ៉ាក់សាំងនេះក៏ត្រូវបានទទួលស្គាល់។ អ្នកស្ម័គ្រចិត្តទាំងអស់ សុទ្ធតែមានលទ្ធភាពទប់ទល់នឹងវីរុសCOVID-19 បន្ទាប់ពីបានចាក់វ៉ាំងសាំងនេះ៕
ប្រភព៖ សារព័ត៌មានបរទេស
August 11, 2020
ចិនដាក់ទណ្ឌកម្មមន្ត្រីអាមេរិកាំងចំនួន11រូប ដើម្បីសងសឹក
ក្រសួងការបរទេសចិនបានឱ្យដឹងថា ប្រទេសនេះបានសម្រេចដាក់ទណ្ឌកម្មលើតំណាងរាស្ត្រ2រូបមកពីសភាជាន់ខ្ពស់ រួមនឹងមន្ត្រីអាមេរិកាំងចំនួន9រូបផ្សេងទៀតចាប់ពីថ្ងៃនេះតទៅ។
អ្នកនាំពាក្យក្រសួងការបរទេសចិន លោក Zhao Lijian បានឱ្យដឹងថា បទបញ្ជាដាក់ទណ្ឌកម្មនេះសំដៅទៅលើមន្ត្រីអាមេរិកាំងចំនួន11រូប ដើម្បីឆ្លើយតបទៅនឹងការដែលទីក្រុងវ៉ាស៊ីងតោនបានដាក់ទណ្ឌកម្មទៅលើលោកស្រី Carrie Lam ដែលជាប្រធានតំបន់ពិសេសហុងកុង រួមជាមួយនឹងមន្ត្រី10រូបផ្សេងទៀតនៅទីក្រុងនេះ និងនៅប្រទេសចិនដីគោក។
ក្រុមមន្ត្រីអាមេរិកាំងដែលត្រូវបានប្រទេសចិនដាក់ទណ្ឌកម្មលើកនេះ មានដូចជាសមាជិកសភាជាន់ខ្ពស់ Ted Cruz និង Marco Rubio រួមនឹងប្រធានអង្គភាពតាមដានបញ្ហាសិទ្ធិមនុស្ស Kenneth Roth និងលោក Michael Abramowitz ដែលជាប្រធានអង្គការក្រៅរដ្ឋាភិបាល Freedom House។ នេះបើតាមសម្ដីរបស់លោក Zhao Lijian ដែលបានថ្លែងនៅក្នុងសន្និសីទសារព័ត៌មានមួយនាថ្ងៃនេះនៅរដ្ឋធានីប៉េកាំង។
លោក Zhao Lijian បានប្រកាសថា “ដើម្បីឆ្លើយតបទៅនឹងឥរិយាបថខុសឆ្គងរបស់សហរដ្ឋអាមេរិក ប្រទេសចិនបានសម្រេចដាក់ទណ្ឌកម្មទៅលើបុគ្គលដែលបានធ្វើសកម្មភាពមិនល្អនៅក្នុងបញ្ហាដែលទាក់ទិននឹងហុងកុង”។
សមាជិកសភាជាន់ខ្ពស់អាមេរិកាំង លោក សមាជិកសភាជាន់ខ្ពស់ Ted Cruz
សូមរំឭកថា កាលពីពេលថ្មីៗនេះ ទីក្រុងប៉េកាំងក៏ធ្លាប់បានប្រកាសដាក់ទណ្ឌកម្មលើលោក Cruz និងលោក Rubio រួមនឹងក្រុមមន្ត្រីអាមេរិកាំងមួយចំនួនផ្សេងទៀតផងដែរ ក្រោយពីទីក្រុងវ៉ាស៊ីងតោនបានដាក់ទណ្ឌកម្មលើមន្ត្រីចិនដោយចោទថា “រើសអើង” ចំពោះជនជាតិអ៊ុយហ្គួនៅតំបន់ស៊ីនជាំង។
ការដាក់ទណ្ឌកម្មពីសំណាក់ទីក្រុងប៉េកាំងនេះ ត្រូវបានធ្វើឡើងក្រោយពីក្រសួងហិរញ្ញវត្ថុសហរដ្ឋអាមេរិក កាលពីថ្ងៃទី7សីហា បានប្រកាសដាក់ទណ្ឌកម្មទៅលើប្រធានតំបន់ពិសេសហុងកុង លោកស្រី Carrie Lam រួមជាមួយនឹងមន្ត្រីហុងកុងនិងមន្ត្រីចិនដីគោកចំនួន10រូបផ្សេងទៀត ដោយចោទថា “ធ្វើឱ្យថយចុះនូវស្វ័យភាព និងការបំបិទសិទ្ធិសេរីភាពក្នុងការបញ្ចេញមតិ ឬការប្រមូលផ្ដុំគ្នារបស់ពលរដ្ឋហុងកុង”។
លោកស្រី Carrie Lam ប្រធានតំបន់ពិសេសហុងកុង
ទំនាក់ទំនងរវាងអាមេរិកាំង និងចិន ក្នុងមួយរយៈពេលចុងក្រោយនេះ បានប្រែទៅជាតានតឹងឡើងៗ ពិសេសនៅពេលដែលទីក្រុងប៉េកាំងបានដាក់ឱ្យប្រើប្រាស់ច្បាប់សន្តិសុខហុងកុងកាលពីចុងខែមីថុនា។ ពលរដ្ឋហុងកុងដែលបំពានលើច្បាប់ថ្មីនេះ អាចត្រូវកាត់ទោសឱ្យជាប់ពន្ធនាគារអស់មួយជីវិត ហើយសិទ្ធិប្ដឹងផ្ដល់ និងកាត់ទោសលើ “ករណីធ្ងន់ធ្ងរ” គឺស្ថិតក្រោមការចាត់ចែងរបស់រដ្ឋអំណាចថ្នាក់កំពូលនៅប្រទេសចិន។
ប្រទេសចិនបានអះអាងថា ច្បាប់សន្តិសុខថ្មីសម្រាប់ហុងកុងនេះ សំដៅទៅលើតែមនុស្សមួយក្រុមតូចប៉ុណ្ណោះ ចំណែកផលប្រយោជន៍ សេរីភាពរបស់ពលរដ្ឋហុងកុង ក៏ដូចជាផលប្រយោជន៍របស់ក្រុមអ្នកវិនិយោគបរទេសនៅតែទទួលបានការធានា។ ក៏ប៉ុន្តែ សហរដ្ឋអាមេរិក និងប្រទេសជាច្រើននៅអឺរ៉ុប បានរិះគន់ទៅលើច្បាប់ថ្មីនេះ ហើយបានហៅច្បាប់នេះថា ជាការបំផ្លិចបំផ្លាញស្វ័យភាព សេរីភាពរបស់កុងហុង ព្រមទាំងបានធ្វើឱ្យគោលការណ៍ “ប្រទេសមួយ របបពីរ” ត្រូវថមថយឥទ្ធិពល។
មេដឹកនាំសារព័ត៌មាន Next Digital និងជាស្ថាបនិករបស់ក្រុមហ៊ុន Giordano លោក Jimmy Lai (Lai Chee-Ying)
នៅក្នុងថ្ងៃនេះដែរ ក្រុមប៉ូលិសហុងកុងក៏បានចាប់ខ្លួនមេដឹកនាំសារព័ត៌មាន Next Digital និងជាស្ថាបនិករបស់ក្រុមហ៊ុន Giordano ឈ្មោះ Jimmy Lai (Lai Chee-Ying) ដោយបានចោទប្រកាន់ថា បានឃុបឃិតជាមួយកម្លាំងបរទេស ដោយយោងទៅលើច្បាប់សន្តិសុខហុងកុង៕
ប្រភព៖ Reuters
August 10, 2020
អាជ្ញាធរ Niger កំពុងតាមប្រមាញ់ក្រុមភេរវករ “បាញ់សម្លាប់-ដុតរថយន្ត” សម្លាប់ក្រុមមន្ត្រីមនុស្សធម៌បារាំង
នៅព្រឹកថ្ងៃទី10 សីហា ទីភ្នាក់ងារព័ត៌មាន AFP បានរាយការណ៍ថា កាលពីថ្ងៃអាទិត្យ(ទី9សីហា)ម្សិលមិញ វេលាម៉ោងប្រមាណជា11.30នាទី ម៉ោងនៅក្នុងស្រុករបស់ Niger ប្រទេសមួយក្នុងតំបន់អាហ្វ្រិកខាងលិច មានកើតហេតុការណ៍ក្រុមខ្មាន់កាំភ្លើង 1ក្រុមបានបើកម៉ូតូដេញតាមបាញ់រះរថយន្តក្រុមមន្ត្រី របស់អង្គការ ACTED ជាស្ថាប័នឯកជនមិនស្វែងរកប្រាក់កម្រៃ ដែលផ្ដល់ការជួយសង្គ្រោះផ្នែកមនុស្សធម៌ នៅក្នុងទីក្រុងឃូរេ តំបន់ធីរ៉ាបេរី បណ្ដាលឱ្យមានមនុស្សស្លាប់ 8នាក់ ជាបុគ្គលិកអង្គការជនជាតិបារាំង 6នាក់ អ្នកនាំផ្លូវជនជាតិណៃជើរ 1នាក់ និងអ្នកបើករថយន្តម្នាក់ទៀត។ ចំណែកទីភ្នាក់ងារព័ត៌មានBBC បានរាយការណ៍ឱ្យដឹងថា សាកសពជនរងគ្រោះ បានដេកស្លាប់រប៉ាត់រប៉ាយនៅជុំវិញរថយន្តដែលភេរវករបានដុតបំផ្លាញចោល ខណៈដែលប្រធានាធិបតី នៃប្រទេសបារាំង លោក អេមម៉ានូអែល ម៉ាក្រុង បានថ្លែងថ្កោលទោសក្រុមអ្នកបង្កហេតុ ចំណែកប៉ូលិសណៃជើរ កំពុងប្រញាប់ប្រញាល់ស៊ើបអង្កេត និងតាមប្រមាញ់ជនល្មើស ដែលទោះជានៅមិនទាន់ដឹងច្បាស់ថា ជាស្នាដៃរបស់ក្រុមណាក៏ដោយ តែនៅក្នុងតំបន់នោះ មានកងកម្លាំងបំពាក់អាវុធ ក្រុមបូកូហារ៉ាម កំពុងពួនសម្ងំនៅទីនោះ៕

ប្រភព៖ សារព័ត៌មានបរទេស
August 10, 2020
ចិនទាមទារឱ្យសហរដ្ឋអាមេរិក បញ្ជាក់ពីករណីមន្ទីរពិសោធន៍យោធា ដែលកំពុងដំណើរការយ៉ាងសម្ងាត់នៅបរទេស
ទីភ្នាក់ងារព័ត៌មានស៊ីនហួ បានរាយការណ៍កាលពីថ្ងៃអង្គារ ដើមសប្ដាហ៍កន្លងទៅថា ចិនបានជំរុញឱ្យសហរដ្ឋអាមេរិក ឆ្លើយតបនឹងក្ដីកង្វល់របស់សហគមន៍អន្តរជាតិឱ្យបានច្បាស់លាស់ និងបញ្ជាក់ពីករណីដែលសហរដ្ឋអាមេរិក បានរៀបចំកិច្ចការងារបែបជីវសាស្ត្រខាងយោធានៅឯបរទេស។
លោក វ៉ាង វឹនពីន អ្នកនាំពាក្យនៃក្រសួងការបរទេសចិន បានចេញសេចក្ដីថ្លែងការណ៍មួយ ស្ដីអំពីកិច្ចការងារខាងយោធារបស់សហរដ្ឋអាមេរិក ដែលបង្កឱ្យកើតមានក្ដីកង្វល់យ៉ាងខ្លាំង និងនាំមកនូវសំណួរ និងសំឡេងជំទាស់ដ៏ច្រើន។
កាលពីពេលថ្មីៗនេះ សារព័ត៌មាននៅក្នុងសាធារណរដ្ឋកូរ៉េ (ROK) បានរាយការណ៍ជាច្រើនលើកថា ទាហានសហរដ្ឋអាមេរិកដែលប្រចាំការនៅក្នុងប្រទេសកូរ៉េខាងត្បូង បានរៀបចំធ្វើកិច្ចការងារមួយ ដែលល្មើសនឹងអនុសញ្ញាហាមឃាត់អាវុធជីវសាស្ត្រ (BWC) រហូតធ្វើឱ្យមនុស្សនៅក្នុងសង្គមជាច្រើនក្រុម បានចេញមកទាមទារឱ្យបិទបន្ទប់ប្រតិបត្តិការរបស់កងទ័ពសហរដ្ឋអាមេរិកនោះ និងបណ្ដេញកងយោធាសហរដ្ឋអាមេរិកនៅក្នុងប្រទេសកូរ៉េខាងត្បូង ដែលមានចំណែកពាក់ព័ន្ធនឹងការល្មើសនេះ ចេញពីប្រទេស។
លោក វ៉ាង បានបញ្ជាក់ថា សហរដ្ឋអាមេរិក បានរៀបចំធ្វើកិច្ចការងារបែបជីវសាស្ត្រខាងយោធានៅក្នុងប្រទេសជាច្រើន ដែលបង្កឱ្យកើតមានក្ដីសង្ស័យ និងការតតាំងយ៉ាងទូលំទូលាយ។ ដោយសារតែកិច្ចការងារទាំងនោះមិនបានបញ្ជាក់ច្បាស់ ទើបមានប្រទេសដែលពាក់ព័ន្ធជាច្រើន មិនដឹងថា តើបន្ទប់ប្រតិបត្តិការខាងយោធារបស់សហរដ្ឋអាមេរិកនោះ កំពុងធ្វើអ្វី? ទាំងដែលសហរដ្ឋអាមេរិកជាប្រទេសដែលដំណើរការខាងកិច្ចការងារយោធានៅក្នុងប្រទេសផ្សេងៗច្រើនជាងគេបំផុត តែបែរជាគ្មានការបញ្ជាក់ឱ្យបានច្បាស់លាស់អំពីរឿងនេះនៅក្នុងឯកសារវិធានការសាងភាពជឿជាក់ (CBM) ដែលសហរដ្ឋអាមេរិកបានផ្ញើទៅឱ្យអង្គការអនុសញ្ញាហាមឃាត់អាវុធជីវសាស្ត្រ។
លោក វ៉ាង បានថ្លែងថា ការដំណើរការទាំងអស់នោះ មិនមានសុវត្ថិភាព កិច្ចការងារជាច្រើនយ៉ាងរបស់ពួកគេ មានចំណែកពាក់ព័ន្ធនឹងមេរោគ ដែលមានភាពប្រថុយប្រថានខ្ពស់យ៉ាងជិតដិត ដែលបើសិនជាមានឧប្បត្តិហេតុណាមួយកើតឡើង នឹងកើតមានផលប៉ះពាល់ដ៏អាក្រក់ទៅដល់ប្រទេសដែលពាក់ព័ន្ធ ប្រទេសជិតខាង និងទូទាំងពិភពលោក។
ក្រៅពីនេះ សហរដ្ឋអាមេរិក នៅខ្វះភាពយុត្តិធម៌ ដែលយើងអាចមើលឃើញបានថា មានតែសហរដ្ឋអាមេរិកប៉ុណ្ណោះ ដែលជាអ្នកនាំមុខគេ ក្នុងការបង្កើតបន្ទប់ប្រតិបត្តិការខាងជីវសាស្ត្រទូទាំងពិភពលោក និងប្រមែប្រមូលធនធានខាងជីវសាស្ត្រនៅក្នុងប្រទេសផ្សេងៗយ៉ាងគ្មានដែនកំណត់ និងមានតែសហរដ្ឋអាមេរិកប៉ុណ្ណោះ ដែលប្រឆាំងនឹងការចរចារឿងរបៀបការត្រួតពិនិត្យសមាជិកអនុសញ្ញាហាមឃាត់អាវុធជីវសាស្ត្រ “ដែលទោះជាសហរដ្ឋអាមេរិក ចង់អធិប្បាយប៉ុនណា ក៏មិនអាចពិសោធភាពបរិសុទ្ធរបស់ខ្លួនឯងក្នុងរឿងនេះបានដែរ”។
លោក វ៉ាង បានថ្លែងទៀតថា “យើងទាមទារឱ្យសហរដ្ឋអាមេរិក ទទួលខុសត្រូវក្នុងរឿងនេះ ចាត់ការរឿងក្ដីកង្វល់របស់សហគមន៍អន្តរជាតិយ៉ាងពិតប្រាកដ បញ្ជាក់ពីកិច្ចការងារបែបជីវសាស្ត្រខាងយោធានៅក្នុងប្រទេសផ្សេងៗទាំងនោះឱ្យបានច្បាស់លាស់ ប្រតិបត្តិតាមកាតព្វកិច្ចរបស់អនុសញ្ញាខាងលើយ៉ាងពិតប្រាកដ និងបញ្ឈប់ការធ្វើខ្លួនជាអ្នកប្រឆាំង រារាំងការចរចាស្ដីពីការត្រួតពិនិត្យរបស់អនុសញ្ញានោះ”៕
ប្រភព៖ សាព័ត៌មានបរទេស
August 10, 2020
តួលេខអ្នកជំងឺ និងអ្នកស្លាប់ដោយសារCOVID-19នៅក្នុងតំបន់អាស៊ីអាគ្នេយ៍
នៅតំបន់អាស៊ីអាគ្នេយ៍ ប្រទេសហ្វីលីពីន ឥណ្ឌូនេស៊ី និងសិង្ហបុរី គឺជាចំណុចក្ដៅនៃការរាតត្បាតរបស់វីរុសបង្កជំងឺរលាកសួតប្រភេទថ្មី COVID-19 ខណៈដែលតួលេខសរុបនៃអ្នកជំងឺដែលត្រូវបានរកឃើញក្នុងតំបន់នេះ បានកើនដល់ជាង324,400នាក់។
ខាងក្រោមនេះគឺជាចំណាត់ថ្នាក់ ក៏ដូចជាតួលេខនៃអ្នកជំងឺ និងអ្នកស្លាប់ដោយសារCOVID-19 នៅអាស៊ីអាគ្នេយ៍៖
1.ហ្វីលីពីនបច្ចុប្បន្នជាសម្បុកវីរុសធំជាងគេបង្អស់នៅអាស៊ីអាគ្នេយ៍ ដោយមានអ្នកជំងឺសរុប129,913នាក់ និងអ្នកស្លាប់ដោយសារឆ្លងវីរុសCOVID-19នេះ ឡើងដល់2,270នាក់។
2.ឥណ្ឌូនេស៊ីបានធ្លាក់មកនៅលំដាប់ទី2 ជាមួយនឹងអ្នកជំងឺសរុប125,396នាក់ និងអ្នកស្លាប់សរុប5,723នាក់។
3.សិង្ហបុរីវិញ រកឃើញអ្នកផ្ទុកវីរុសសរុប55,104នាក់ និងអ្នកស្លាប់27នាក់។
4.ម៉ាឡេស៊ី រកឃើញអ្នកជំងឺ9,083នាក់ និងស្លាប់125នាក់។
5.ប្រទេសថៃ រកឃើញអ្នកជំងឺ3,351នាក់ និងស្លាប់58នាក់។
6.វៀតណាមរកឃើញអ្នកជំងឺ841នាក់ និងស្លាប់11នាក់។
7.មីយ៉ានម៉ារកឃើញអ្នកជំងឺ360នាក់ និងស្លាប់6នាក់។
8.កម្ពុជាឈរលំដាប់ទី8 ដោយបានរកឃើញអ្នកជំងឺCOVID-19 សរុបចំនួន251នាក់។
9.ប៊្រុយណេមានអ្នកជំងឺ142នាក់ និងស្លាប់3នាក់។
10.ទីម័រខាងកើតមានអ្នកជំងឺ25នាក់។
11.ប្រទេសឡាវមានអ្នកជំងឺ20នាក់។
ដូច្នេះ យោងតាមតួលេខខាងលើនេះ គេឃើញថា នៅទូទាំងតំបន់អាស៊ីអាគ្នេយ៍ មានអ្នកជំងឺCOVID-19 សរុបឡើងដល់324,486នាក់ និងអ្នកស្លាប់សរុបឡើងដល់8,474នាក់៕
ប្រភព៖ Worldometers

August 10, 2020