Category: អន្តរជាតិ

Putin ថា សម្ព័ន្ធមិត្តយោធារុស្ស៊ី-ចិន នឹងអាចកើតមានឡើងក្នុងពេលខាងមុខ
ប្រធានាធិបតីប្រទេសរុស្ស៊ី លោក Putin យល់ថា សម្ព័ន្ធមិត្តយោធារវាងរុស្ស៊ីនិងចិន អាចកើតមានឡើងក្នុងពេលអនាគត នៅពេលដែលភាពតានតឹងរវាងប្រទេសទាំង2 ជាមួយនឹងសហរដ្ឋអាមេរិក បានកើនឡើងខ្ពស់។
“បច្ចុប្បន្ន យើងមិនទាន់ត្រូវការវាទេ ប៉ុន្តែ ជាទ្រឹស្ដី ការដែលស្រមៃអំពីទំនាក់ទំនងជាសម្ព័ន្ធមិត្តបែបនេះ គឺពិតជាអាចកើតមានឡើង” ប្រធានាធិបតីរុស្ស៊ី លោក Vladimir Putin បានឆ្លើយនឹងសំណួរដែលសួរអំពីលទ្ធភាពនៃការបង្កើតសម្ព័ន្ធមិត្តយោធារវាងទីក្រុងម៉ូស្គូ និងទីក្រុងប៉េកាំង នៅក្នុងកិច្ចប្រជុំតាមរយៈវីដេអូមួយជាមួយនឹងក្រុមអ្នកជំនាញផ្នែកគោលនយោបាយការបរទេសអន្តរជាតិកាលពីថ្ងៃទី22តុលា។
ក្រុមអ្នកតាមដានសភាពការណ៍នយោបាយយល់ថា ការប្រកាសរបស់លោក Putin គឺជាសញ្ញាដែលបង្ហាញថា ទំនាក់ទំនងរវាងរុស្ស៊ី-ចិន នឹងកាន់តែស្និទ្ធស្នាល ក្នុងគ្រាដែលភាពតានតឹងរវាងប្រទេសទាំង2 ជាមួយនឹងសហរដ្ឋអាមេរិក កំពុងតែឡើងកម្ដៅ។
ប្រទេសរុស្ស៊ី និងចិន តែងតែសរសើរចំពោះ “ទំនាក់ទំនងជាដៃគូយុទ្ធសាស្ត្រ” រវាងប្រទេសទាំង2 ក៏ប៉ុន្តែ មកដល់ពេលនេះ នៅតែច្រានចោលរាល់ការចរចាអំពីលទ្ធភាពនៃការបង្កើតសម្ព័ន្ធមិត្តយោធា។
រុស្ស៊ី និងចិន បានព្យាយាមស្វែងរកវិធីដើម្បី “ចាប់ដៃគ្នាក្នុងបំណងបង្កើតភាពកក់ក្ដៅ” នៅពេលទំនាក់ទំនងរវាងទីក្រុងម៉ូស្គូ ជាមួយនឹងបណ្ដាប្រទេសលោកខាងលិច បានធ្លាក់ចុះដល់កម្រិតទាបបំផុត ក្រោយសង្គ្រាមត្រជាក់ ដោយសារកត្តាមួយចំនួន ដូចជា បញ្ហារុស្ស៊ីរឹបអូសយកតំបន់ Crimea ការចោទប្រកាន់ថារុស្ស៊ីបានលូកដៃចូលក្នុងកិច្ចការបោះឆ្នោតឆ្នាំ2016នៅអាមេរិក។ល។ ចំណែកទីក្រុងប៉េកាំងវិញ ក៏កំពុងតែប្រឈមមុខដាក់គ្នាជាមួយនឹងសហរដ្ឋអាមេរិកនៅក្នុងវិស័យជាច្រើន រាប់ចាប់ពី សង្គ្រាមពាណិជ្ជកម្ម បច្ចេកវិទ្យា រហូតដល់បញ្ហានៅតំបន់ Xinjiang បញ្ហាហុងកុង បញ្ហាតៃវ៉ាន់ និងសមុទ្រចិនខាងត្បូងជាដើម៕
ប្រភព៖ AP
October 24, 2020
កម្ពុជារកឃើញអ្នកផ្ទុកCovid-19 1ករណី និងជាសះស្បើយ3ករណី ខណៈពិភពលោកមានករណីវិជ្ជមាន42,469,950នាក់
ក្រសួងសុខាភិបាល បានប្រកាសឱ្យដឹងនាព្រឹកថ្ងៃទី24នេះថា កម្ពុជាទើបតែបានរកឃើញអ្នកផ្ទុកCovid-19 ចំនួន1ករណីបន្ថែមទៀត និងជាសះស្បើយចំនួន3ករណីផងដែរ។
ករណីវិជ្ជមានដែលបានរកឃើញខាងលើនេះ កើតឡើងចំពោះបុរសជនជាតិបារាំងអាយុ37ឆ្នាំ ស្នាក់នៅក្នុងទីក្រុងភ្នំពេញ។ បុរសនេះបានធ្វើដំណើរពីប្រទេសបារាំង និងឆ្លងកាត់កោះតៃវ៉ាន់មុននឹងមកដល់កម្ពុជានៅថ្ងៃទី11តុលា។ បច្ចុប្បន្ន អ្នកជំងឺរូបនេះកំពុងសម្បាកព្យាបាលនៅមន្ទីរពេទ្យមិត្តមានខ្មែរ-សូវៀតក្នុងទីក្រុងភ្នំពេញ។
គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុសCovid-19 សរុប 287នាក់ ក្នុងនោះមាន283នាក់បានជាសះស្បើយ និង4នាក់ទៀតកំពុងទទួលការព្យាបាលនៅមន្ទីរពេទ្យ ដែលក្នុងនោះដែរ មានជនជាតិខ្មែរ3នាក់ និងបារាំង1នាក់។
នៅទូទាំងពិភពលោក គិតដល់ពេលនេះ មានអ្នកឆ្លងវីរុសCovid-19 សរុប 42,469,950នាក់ ក្នុងនោះអ្នកស្លាប់បានឡើងដល់1,149,142នាក់ អ្នកបានជាសះស្បើយ31,423,036នាក់ និងអ្នកកំពុងព្យាបាលមានចំនួន9,897,772នាក់៕
ប្រភព៖ ក្រសួងសុខាភិបាល, Worldometers
October 24, 2020
ទិដ្ឋភាពយានអវកាសរបស់អង្គការ NASA ហោះចូលទៅយកសំណាកដីនៃអាចម៍ផ្កាយវ័យ4.5ពាន់លានឆ្នាំ នៅលើមេឃា (វីដេអូ)
យានអវកាស OSIRIS-REx របស់ទីភ្នាក់ងារអវកាសអាមេរិក (NASA) បានចុះចតក្នុងរយៈពេល16វិនាទី នៅលើផ្ទៃរបស់ Bennu ដែលជាអាចម៍ផ្កាយមួយដែលបានកកើតតាំងពីសម័យដំបូងនៃការចាប់កំណើតរបស់ប្រព័ន្ធព្រះអាទិត្យ។
NASA បានទទួលជោគជ័យក្នុងបេសកកម្មបញ្ជូនយានអវកាសទៅចុះចតលើអាចម៍ផ្កាយមួយដែលមានចម្ងាយ322លានគីឡូម៉ែត្រពីផែនដី។ យានអវកាស OSIRIS-REx បានប្រមូលយកសំណាកដីពីផ្ទៃអាចម៍ផ្កាយ Bennu ដោយប្រើដៃយន្តរបស់វា។
អាចម៍ផ្កាយ Bennu គឺជាបណ្ដុំនៃបំណែកថ្មនៅទីអវកាសដ៏សែនឆ្ងាយ និងមានកម្ពស់ស្មើនឹងអគារ Empire State នៅទីក្រុង New York នៃសហរដ្ឋអាមេរិក។
អង្គការ NASA បានចែករំលែកឱ្យដឹងអំពីសកម្មភាពដែលបានកើតឡើងនៅក្នុងពេល OSIRIS-REx បានចុះចត និងប្រមូលសំណាកដីនៅលើអាចម៍ផ្កាយ Bennu នេះ។
ដោយសារតែការបញ្ជូននិងការទទួលទិន្នន័យរវាងឧបករណ៍នៅលើផែនដីជាមួយនឹងយានអវកាស OSIRIS-REx នៅលើអាចម៍ផ្កាយ Bennu យឺតជាងធម្មតា18.5នាទី ទើបបេសកកម្មនេះត្រូវបានគេកំណត់ឱ្យ OSIRIS-REx ធ្វើការដោយស្វ័យប្រវត្តិ ទៅតាមកម្មវិធីកុំព្យូទ័រ។
OSIRIS-REx បានចុះចតលើផ្ទៃអាចម៍ផ្កាយនេះក្នុងរយៈពេលត្រឹមតែ16វិនាទីប៉ុណ្ណោះ។ បេសកកម្មនេះ ចំណាយពេល4ម៉ោងកន្លះ ប៉ុន្តែ រហូតដល់ឆ្នាំ2023 ទើបយាន OSIRIS-REx នាំយកដីរបស់អាចម៍ផ្កាយនេះត្រលប់មកកាន់ផែនដី។
សំណាក់ដីដែលយកមកពីអាចម៍ផ្កាយ Bennu នឹងជួយឱ្យអ្នកវិទ្យាសាស្ត្រយល់ច្បាស់អំពីដំណើរការនៃការកកើតរបស់ភពនានា និងសភាវមានជីវិត៕
ប្រភព៖ CNN
October 23, 2020
ថ្នាំប្រឆាំងCovid-19 ដែលប្រើសម្រាប់លោក Donald Trump ត្រូវបានសហរដ្ឋអាមេរិកអនុញ្ញាតឱ្យប្រើសម្រាប់ព្យាបាលជាផ្លូវការ
នាយកដ្ឋានគ្រប់គ្រងចំណីអាហារនិងឱសថអាមេរិកាំង (FDA) បានផ្ដល់អាជ្ញាប័ណ្ណរួចហើយចំពោះ Remdesivir ដែលជាថ្នាំមួយប្រភេទត្រូវបានក្រុមវេជ្ជបណ្ឌិតប្រើសម្រាប់ករណីរបស់ប្រធានាធិបតីសហរដ្ឋអាមេរិក ដើម្បីបើកផ្លូវឱ្យមានការព្យាបាលទូលំទូលាយទៅលើអ្នកជំងឺ Covid-19។
ក្រុមហ៊ុនផលិតថ្នាំពេទ្យ Gilead Sciences កាលពីថ្ងៃទី22តុលាបានឱ្យដឹងថា ថ្នាំប្រឆាំងនឹងវីរុស Remdesivir ដែលនឹងត្រូវបានលក់ដោយប្រើឈ្មោះ Veklury ទទួលបានការយល់ព្រមឱ្យប្រើប្រាស់នៅក្នុងករណីបន្ទាន់កាលពីខែឧសភា។ Remdesivir ត្រូវបានអនុញ្ញាតឱ្យប្រើប្រាស់បណ្ដោះអាសន្នដើម្បីព្យាបាលជំងឺ Covid-19 នៅក្នុងប្រទេសប្រមាណ50 នៅក្នុងពិភពលោក។
នៅសហរដ្ឋអាមេរិក ថ្នាំ Veklury ត្រូវបានអនុញ្ញាតឱ្យប្រើប្រាស់សម្រាប់ព្យាបាលមនុស្សពេញវ័យ និងក្មេងដែលមានអាយុចាប់ពី12ឡើងទៅ និងមានទម្ងន់យ៉ាងតិចចាប់ពី40គីឡូក្រាម ដើម្បីព្យាបាល Covid-19 ក្នុងករណីត្រូវចូលព្យាបាលនៅមន្ទីរពេទ្យ។ Veklury គួរត្រូវបានប្រើនៅក្នុងមន្ទីរពេទ្យ ឬមណ្ឌលសុខាភិបាលដែលមានលទ្ធភាពប្រហាក់ប្រហែលនឹងសេវាសុខាភិបាលនៅមន្ទីរពេទ្យ” នេះបើតាមក្រុមហ៊ុនផលិតឱសថ Gilead Sciences។
បច្ចុប្បន្ន ថ្នាំ Rembesivir គឺជាមធ្យោបាយព្យាបាលជំងឺ Covid-19 ដំបូងគេបង្អស់ និងតែមួយគត់ដែលត្រូវបានអនុញ្ញាតឱ្យប្រើប្រាស់ពេញលេញនៅសហរដ្ឋអាមេរិក។ មូលបត្ររបស់ Gilead បានកើនឡើង5% ក្រោយពីព័ត៌មានខាងលើត្រូវបានប្រកាស។
លោក Daniel O’Day នាយកប្រតិបត្តិរបស់ ក្រុមហ៊ុន Gilead
Daniel O’Day នាយកប្រតិបត្តិរបស់ Gilead បាននិយាយថា៖ “ពិតជាមិនគួរឱ្យជឿ ក្នុងរយៈពេលមិនដល់មួយឆ្នាំ រាប់ចាប់ពីពេលបានរកឃើញករណីឆ្លងដំបូង វិធីសាស្ត្រព្យាបាលមួយត្រូវបាន FDA អនុញ្ញាតឱ្យប្រើប្រាស់”។ លោក Daniel O’Day បន្តថា ថ្នាំ Rembesivir នេះ មានគ្រប់គ្រាន់សម្រាប់អ្នកជំងឺគ្រប់រូបដែលមានតម្រូវការ។
កាលពីដើមខែតុលានេះ ការសិក្សាស្រាវជ្រាវទូទាំងពិភពលោកដែលទទួលបានជំនួយពីអង្គការសុខភាពពិភពលោក (WHO) បានបង្ហាញថា ថ្នាំ Remdesivir មិនបានជួយឱ្យអ្នកជំងឺផុតពីការស្លាប់ ឬជាសះស្បើយបានលឿននោះទេ ប៉ុន្តែ ការសិក្សាស្រាវជ្រាវមួយរបស់សហរដ្ឋអាមេរិកបានបង្ហាញថា ថ្នាំនេះជួយកាត់បន្ថយពេលវេលាបាន1/3 នៅក្នុងការព្យាបាលរហូតដល់ជាសះស្បើយនៅលើអ្នកជំងឺមួយចំនួន។
ការយល់ព្រមឱ្យប្រើប្រាស់ថ្នាំខាងលើនេះពីសំណាក់ FDA គឺយោងទៅលើទិន្នន័យដែលត្រូវបានក្រុមហ៊ុន Gilead Sciences ដាក់ជូនសម្រាប់ពិនិត្យនិងអនុម័តនៅមុនពេលផ្ដល់អាជ្ញាប័ណ្ណ។ លទ្ធផលនៃការស្រាវជ្រាវរបស់ Gilead Sciences ត្រូវបានប្រកាសនៅលើទស្សនាវដ្ដី New England បានបង្ហាញថា ថ្នាំនេះ កាត់បន្ថយពេលវេលានៃការផ្ទុកវីរុសCovid-19 ពីមធ្យមភាគ15ថ្ងៃ ចុះមកនៅត្រឹមប្រមាណ11ថ្ងៃ នៅក្នុងករណីអ្នកជំងឺសម្រាកព្យាបាលក្នុងមន្ទីរពេទ្យ។
បណ្ឌិត Stephen Hahn ប្រធាន FDA
នាយកដ្ឋាន FDA ក៏បានពិនិត្យទៅលើលទ្ធផលនៃការស្រាវជ្រាវចំនួនពីរផ្សេងទៀត ក្នុងនោះមានលទ្ធផលមួយបង្ហាញថា ថ្នាំ Rembesivir មានប្រយោជន៍ខ្លះៗ និងលទ្ធផលមួយទៀតឱ្យដឹងថា ថ្នាំនេះមិនបានធ្វើឱ្យមានការប្រែប្រួលច្រើននោះឡើយ។
បណ្ឌិត Stephen Hahn ប្រធាន FDA បានឱ្យដឹងថា៖ “ការអនុម័តយល់ព្រម ត្រូវបានយោងទៅតាមទិន្នន័យដែលបានមកពីលទ្ធផលនៃការព្យាបាលសាកល្បងជាច្រើនដែលអង្គភាពនេះបានវាយតម្លៃយ៉ាងម៉ត់ចត់ និងបង្ហាញអំពីដំណាក់កាលសំខាន់នៃវិទ្យាសាស្ត្រនៅក្នុងសម័យ Covid-19”។
ថ្នាំខាងលើនេះត្រូវបានអនុញ្ញាតឱ្យប្រើប្រាស់នៅក្នុងពេលដែលសហរដ្ឋអាមេរិកបានរកឃើញអ្នកផ្ទុកវីរុសCovid-19 ជាង8.6លាននាក់ ក្នុងនោះមានអ្នកជំងឺជាង228,000នាក់បានបាត់បង់ជីវិត។ Remdesivir គឺជាថ្នាំដែលត្រូវបានប្រើសម្រាប់ព្យាបាលជំងឺCovid-19 របស់លោក Donald Trump ពេលដែលលោកបានឆ្លងវីរុសនេះកាលពីដើមខែតុលា។ ក្រៅពីនេះ លោក Trump ក៏បានប្រើប្រាស់ថ្នាំសាកល្បង REGN-COV2 និងបន្ថែមថ្នាំស័ង្កសី វីតាមីន D ថ្នាំ famotidine រួមនឹងថ្នាំ melatonin និងថ្នាំ aspirin ផងដែរ៕
ប្រភព៖ CNN, CNBC
October 23, 2020
ភរិយារបស់អ្នកមានជាងគេបង្អស់នៅទ្វីបអាស៊ី មានជីវភាពរស់នៅបែបណា?
ភរិយារបស់មហាសេដ្ឋី Mukesh Ambani មានសម្ភារប្រើប្រាស់ប្រភេទប្រណិតយ៉ាងច្រើន រួមនឹងគ្រឿងអលង្ការដែលមានតម្លៃរាប់សិបលានដុល្លារ យន្តហោះរផ្ទាល់ខ្លួន និងថែមទាំងមានចិត្តទូលាយដោយចងដៃពេទ្រដែលមានតម្លៃ55លានដុល្លារដល់កូនប្រសារទៀតផង។
លោកស្រី Nita គឺជាភរិយារបស់លោក Mukesh Ambani ដែលជាអ្នកមានជាងគេបង្អស់ប្រចាំទ្វីបអាស៊ីនិងឥណ្ឌា ដោយមានទ្រព្យសម្បត្តិជាង80ពាន់លានដុល្លារអាមេរិក។ លោកស្រី ត្រូវបានគេដាក់រហ័សនាមថា “ជំទាវទីមួយ” របស់ត្រកូល Ambani ដែលជាត្រកូលមួយក្នុងចំណោមត្រកូលអ្នកមានជាងគេក្នុងពិភពលោក។ លោកស្រីមានសម្រស់ស្រស់សោភា និងក្មេងជាងវ័យ ជាមួយនឹងទិន្នាការប្រើប្រាស់សម្លៀកបំពាក់ប្រកបដោយភាពប្រណិត។ ភរិយារបស់អ្នកជំនួញដែលមានអំណាចបំផុតនៅឥណ្ឌា ដែលជាម្ចាស់នៃក្រុមហ៊ុនយក្ស Reliance Industries តែងតែជាចំណុចកណ្ដាលនៃចំណាប់អារម្មណ៍របស់មនុស្សគ្រប់គ្នា នៅពេលបង្ហាញខ្លួនម្ដងៗ។
មហាសេដ្ឋី Mukesh Ambani និងភរិយា Nita
ដំបូងឡើយ អ្នកស្រី Nita គ្រាន់តែជានាទីមួយដែលខ្លាចមុខ ខ្លាចក្រោយតែប៉ុណ្ណោះ។ ក្នុងគ្រាដំបូងដែលទើបបានក្លាយជាកូនប្រសាររបស់ត្រកូល Ambani អ្នកស្រីបានត្រឹមតែចូលរួមពិធីជប់លៀងដែលធ្វើឡើងក្នុងគ្រួសារ និងមានវត្តមានក្នុងព្រឹត្តិការណ៍ខ្លះៗរបស់ក្រុមហ៊ុនតែប៉ុណ្ណោះ។ ក៏ប៉ុន្តែ ពេលនេះ លោកស្រីបានក្លាយជាស្ត្រីម្នាក់ក្នុងចំណោមស្ត្រីដែលមានឥទ្ធិពលបំផុតនៅប្រទេសឥណ្ឌា។ បច្ចុប្បន្ន លោកស្រី Nita គឺជានាយិកាសាលាអន្តរជាតិ Dhirubhai Ambani (DAIS) ដែលជាសាលាល្អជាងគេមួយនៅទីក្រុង Mumbai ដែលត្រូវបានគ្រួសារ Ambani បង្កើតឡើងកាលពីឆ្នា2003។ លោកស្រីក៏កាន់កាប់តំណែងនាយិកាមិនប្រតិបត្តិនៅ Reliance Industries ផងដែរ ដោយទទួលបានប្រាក់បៀវត្ស និងប្រាក់កម្រៃជាង160,000ដុល្លារក្នុងមួយឆ្នាំ។ លោកស្រីក៏កាន់កាប់ Mumbai Indians ដែលជាក្រុមកីឡាវាយកូនបាល់ (cricket) ដែលទទួលបានជោគជ័យបំផុតនៅឯពានរង្វាន់ IPL (Indian Premier Leage) ចាប់ពីឆ្នាំ2008។ លោកស្រីក៏ធ្លាប់មានឈ្មោះនៅក្នុងបញ្ជីឈ្មោះស្ដីអំពីស្ត្រីអ្នកជំនួញដែលមានឥទ្ធិពលបំផុតនៅអាស៊ី របស់សារព័ត៌មាន Forbes។ លោកស្រី Nita ជាស្ត្រីដំបូងគេនៅឥណ្ឌាដែលបានក្លាយជាសមាជិករបស់គណៈកម្មធិការអូឡាំពិកអន្តរជាតិ។
លោកស្រី Nita រស់នៅក្នុងវិមានមួយដែលមានតម្លៃថ្លៃជាគេបំផុតក្នុងពិភពលោក ដោយការចំណាយទៅលើការសាងសង់ឡើងដល់1ពាន់លានដុល្លារ និងត្រូវការបុគ្គលិក600នាក់ដើម្បីគ្រប់គ្រង។ វិមាននេះមានកម្ពស់174ម៉ែត្រ និងមាន27ជាន់ ព្រមទាំងមានកន្លែងចុះចតសម្រាប់ឧទ្ធម្ភាគចក្រចំនួន2កន្លែង ភោជនីយដ្ឋាន កន្លែងជិះស្គីលើទឹកកកក៏មាននៅខាងក្នុង។ ចំណែកសម្ភារ និងគ្រឿងសង្ហារិមក្នុងវិមាននេះ ត្រូវបានលោកស្រី Nita ជ្រើសរើសដោយផ្ទាល់ពីបណ្ដាក្រុមហ៊ុនដែលមានឈ្មោះល្បីល្បាញ និងមានគុណភាពបំផុតក្នុងពិភពលោក។ សារព័ត៌មាន Economics Times ឱ្យដឹងថា លោកស្រី Nita ធ្លាប់បានបញ្ជាទិញឈុតសម្រាប់ការទទួលទានអាហាររបស់ក្រុមហ៊ុន Noritake (ជប៉ុន) ពីរោងចក្រនៅស្រីលង្កា ដែលមួយឈុតៗសុទ្ធតែត្រូវបានស្រោបមាស់22ការ៉ាត់ ហើយបើគិតជាសរុប វាមានតម្លៃដល់ទៅ1លានដុល្លារឯណោះ។
លោកស្រី Nita មានទូមួយដែលដាក់សម្លៀកបំពាក់មានតម្លៃខ្ពស់កប់ពពក រាប់ចាប់ពីសម្លៀកបំពាក់ប្រពៃណី រហូតដល់កាបូបដៃ ឬគ្រឿងអលង្ការដែលមានតម្លៃរាប់សិបលានដុល្លារអាមេរិក។ ក្នុងនោះមានកាបូប Hermes Himalayan Birkin ដ៏កម្រ ដែលមានតម្លៃ350,000ដុល្លារ ដោយវាត្រូវបានផលិតឡើងអំពីស្បែកក្រពើពណ៌សហិមព្វាន (ហិមាល័យ) និងមានដាំពេជ្រ240គ្រាប់ ចំណែកគន្លឹះរបស់កាបូបនេះធ្វើអំពីមាស18ការ៉ាត់ ដែលត្រូវបានបញ្ជាទិញលក្ខណដោយឡែក។
យន្តហោះ Airbus A319 តម្លៃ60លានដុល្លាររបសលោកស្រី Nita
នៅក្នុងពិធីរៀបការកូនប្រុសកាលពីឆ្នាំ2019 លោកស្រី Nita បានបញ្ជាទិញកងកពេជ្រទម្ងន់407ការ៉ាត់ ធ្វើជាចំណងដៃសម្រាប់កូនប្រសារ Shloka Mehta។ កងកនេះមានឈ្មោះថា L’Incomparable និងត្រូវបានសៀវភៅ Guiness ចាត់ជាកងដែលថ្លៃបំផុតក្នុងពិភពលោក ជាមួយនឹងតម្លៃឡើងដល់55លានដុល្លារអាមេរិក។
បច្ចុប្បន្ន លោកស្រី Nita កំពុងរស់នៅដោយមានសេចក្ដីសុខជាទីបំផុត នៅក្បែរស្វាមីដ៏មានអំណាច និងកូន3នាក់ គឺ Anant, Isha និង Akash។ ពួកគេត្រូវបានវាយតម្លៃថាជាអ្នកស្នងដ៏លេចធ្លោរបស់ត្រកូល Ambani។ កូនប្រសារស្រី និងកូនប្រសារប្រុសរបស់លោកស្រី សុទ្ធតែជាមនុស្សដែលមានសមត្ថភាព៕
ប្រភព៖ SCMP
October 22, 2020
ដើម្បីទប់ទល់នឹងទឹកជំនន់ ពលរដ្ឋវៀតណាមនាំគ្នាច្នៃផ្ទះបណ្ដែតទឹកពិសេសដែលអាចឱ្យពួកគេរស់នៅជាមួយគ្រោះធម្មជាតិនេះបានដោយសុវត្ថិភាព
នៅកណ្ដាលតំបន់ទឹកជំនន់ ទឹកបានជន់លិចស្ទើរដល់ដំបូលផ្ទះរបស់ប្រជាជនគ្រប់គ្នា ប៉ុន្តែ ដោយសារ “ផ្ទះពោង” ទើបពលរដ្ឋវៀតណាមនៅតំបន់ Tan Hoa នៃខេត្ត Quang Binh មិនចាំបាច់ជម្លៀសខ្លួន ឬរើទៅនៅទីទួលសុវត្ថិភាព ព្រោះថា ផ្ទះនឹងចេះតែអណ្ដែតឡើងលើ ទៅតាមកម្ពស់របស់ទឹកជំនន់។
នៅក្នុងរយៈពេលច្រើនថ្ងៃកន្លងទៅ ជំនន់ទឹកភ្លៀងបានជន់លិចផ្ទះរាប់សែនខ្នងរបស់ប្រជាជននៅក្នុងខេត្ត Quang Binh ប្រទេសវៀតណាម ពិសេសទឹកជំនន់នេះបានកើនឡើងខ្ពស់ជាងគ្រោះទឹកជំនន់ប្រវត្តិសាស្ត្រនៅវៀតណាមកាលពីឆ្នាំ1979ទៅទៀត។
នៅស្ទើរគ្រប់ទីកន្លែង ទឹកបានជន់លិចដល់ដំបូលផ្ទះ ពលរដ្ឋត្រូវរើ ឬចោះដំបូងផ្ទះដើម្បីអាចឡើងទៅលើក្នុងបំណងស្រែកសុំជំនួយជាបន្ទាន់ ឬជម្លៀសគ្រួសារចេញពីផ្ទះ ទៅរកទីទួលសុវត្ថិភាព។
ក៏ប៉ុន្តែ មកដល់បច្ចុប្បន្ន បញ្ហាទាំងនោះហាក់លែងកើតឡើងទៀងហើយ ពិសេសគឺនៅក្នុងតំបន់ Tan Hoa ស្រុក Minh Hoa ខេត្ត Quang Binh ភាគកណ្ដាលនៃប្រទេសវៀតណាម បើទោះជាទឹកជំនន់នៅតែបន្តជន់លិច ព្រោះថា ពលរដ្ឋនៅទីនេះនាំគ្នាច្នៃសង់ផ្ទះបណ្ដែតទឹកដែលអាចទប់ទល់នឹងជំនន់ទឹកភ្លៀងបានយ៉ាងល្អ។
អាជ្ញាធរនៅក្នុងតំបន់ Tan Hoa បានឱ្យដឹងថា ពលរដ្ឋក្នុងតំបន់នេះលែងព្រួយបារម្ភខ្លាំងដូចមុនទៀតហើយ។ ដោយសារមាន “ផ្ទះពោង” បណ្ដែតទឹកចំនួន540ខ្នង ពលរដ្ឋនៅតែអាចមានសុវត្ថិភាពដោយមិនចាំបាច់ជម្លៀសគ្រួសារចេញពីតំបន់ទឹកជំនន់នេះ។
ពលរដ្ឋក្នុងតំបន់ខាងលើបានឱ្យដឹងដែរថា ជារៀងរាល់ឆ្នាំ ឱ្យតែដល់រដូវទឹកជំនន់ ពលរដ្ឋក្នុងឃុំ Tan Hoa តែងតែត្រូវឡើងភ្នំ ឬទីទួលដើម្បីសង់ខ្ទម និងជម្លៀសគ្រួសារចេញពីតំបន់ទឹកជំនន់។ ចំណែកទ្រព្យសម្បត្តិ បើសិនយកមិនទាន់ពេល វានឹងត្រូវលិច ឬត្រូវហូរទៅតាមទឹកជំនន់អស់ជាក់ជាមិនខាន។
មើលឃើញការលំបាកនេះ ពលរដ្ឋនៅ Tan Hoa មានគំនិតដ៏ល្អមួយ នោះគឺការសង់ផ្ទះបណ្ដែតទឹក ដើម្បីអាចរស់នៅជាមួយនឹងទឹកជំនន់បាន។ ផ្ទះបណ្ដែតទឹកនេះត្រូវបានធ្វើឡើងនៅលើធុងសាំងជ័រទទេធំៗចាប់ពី20ដល់30ធុង។ នៅពេលទឹកឡើងខ្ពស់ ធុងទាំងនេះនឹងជួយលើកផ្ទះឱ្យអណ្ដែតទៅតាមកម្ពស់របស់ទឹក។ ដើម្បីអាចរក្សាលំនឹង និងទប់ផ្ទះឱ្យនៅមួយកន្លែង ពលរដ្ឋក៏ច្នៃបង្គោលចំនួន2បន្ថែមទៀត ដោយដាំនៅជ្រុងចំនួន2របស់ផ្ទះ។
ដើម្បីអាចសង់បានផ្ទះអណ្ដែតទឹកដែលមានទំហំចាប់ពី15ទៅ20ម៉ែត្រក្រឡា គេត្រូវចំណាយប្រាក់ចាប់ពី30ទៅ35លានដុង (1,300-1,500ដុល្លារ)។ នៅពេលទឹកជំនន់មកដល់ ផ្ទះបណ្ដែតទឹកនេះនឹងជាកន្លែងជ្រកកោនរបស់សមាជិកគ្រួសារទាំងមូល ដោយវាអាចផ្ទុកមនុស្សបានចាប់ពី8ដល់10នាក់ ព្រមទាំងអាចដាក់សម្ភារប្រើប្រាស់ និងទ្រព្យសម្បត្តិផ្សេងៗ ដូចជាម៉ូតូ ទូរទស្សន៍ ស្បៀងអាហារ។ល។
មិនត្រឹមតែធ្វើផ្ទះបណ្ដែតទឹកសម្រាប់គ្រួសារខ្លួនឯងជ្រកកោននោះទេ ពលរដ្ឋមួយចំនួនក្នុងតំបន់ទឹកលិច Tan Hoa ថែមទាំងមានសេវាសង់ផ្ទះបណ្ដែតទឹកដើម្បីផ្គត់ផ្គង់ដល់គ្រួសារដែលមានតម្រូវការផងដែរ។
ទាក់ទងនឹងគ្រោះទឹកជំនន់នៅវៀតណាម អាជ្ញាធរខេត្ត Quang Binh បានឱ្យដឹងថា ខេត្តនេះមានផ្ទះជាង1សែនខ្នងត្រូវជន់លិច បណ្ដាលឱ្យមានមនុស្សស្លាប់9នាក់ និងរបួស29នាក់។ ចំណែកនៅទូទាំងប្រទេសវិញ ទឹកជំនន់បានសម្លាប់មនុស្សជាង120នាក់ និងរាប់សែននាក់ត្រូវជម្លៀសខ្លួន រាប់ម៉ឺនគ្រួសារត្រូវបាត់បង់ទ្រព្យគ្មានសល់៕
ប្រភព៖ DT
October 22, 2020
អាមេរិកយល់ព្រមលក់រ៉ុកកែតដែលមានតម្លៃជិត1.5ពាន់លានដុល្លារទៅឱ្យតៃវ៉ាន់
ក្រសួងការបរទេសសហរដ្ឋអាមេរិកបានសម្រេចយល់ព្រមលក់កាំជ្រួចរយៈចម្ងាយឆ្ងាយ SLAM-ER ចំនួន135ដើម និងប្រព័ន្ធកាំជ្រួចហ្វូង HIMARS ដែលមានតម្លៃសរុបជិត1.5ពាន់លានដុល្លារទៅឱ្យកោះតៃវ៉ាន់ដើម្បីការពារខ្លួន។
អង្គភាពសហការផ្នែកសន្តិសុខជាតិ (DSCA) នៃមន្ទីរបញ្ចកោណ កាលពីថ្ងៃទី21តុលា បានប្រកាសថា៖ “ក្រសួងការបរទេសសហរដ្ឋអាមេរិក សម្រេចយល់ព្រមលើកកិច្ចសន្យាលក់កាំជ្រួចរយៈចម្ងាយឆ្ងាយបាញ់ទៅលើដី AGM-84H ចំនួន135ដើម និងឧបករណ៍អមនានា ទៅឱ្យកោះតៃវ៉ាន់ ក្នុងតម្លៃប្រមាណ1,008ពាន់លានដុល្លារអាមេរិក។ យើងបានបញ្ជូនសេចក្ដីប្រកាសលើកិច្ចសន្យានេះទៅឱ្យសភាអាមេរិករួចហើយ”។
ក្រៅពី AGM-84H ដែលមានសមត្ថភាពគ្រប់គ្រាន់ក្នុងការប្រយុទ្ធ សហរដ្ឋអាមេរិកក៏នឹងប្រគល់មីស៊ីល ATM-84H ចំនួន4ដើម ក្បាលគ្រាប់សម្រាប់ប្រើក្នុងការហ្វឹកហាត់ CATM-84H ចំនួន12គ្រាប់ រួមនឹងគ្រឿងបន្លាស់ ឧបករណ៍ត្រួតនិត្យ និងឯកសារណែនាំផងដែរ។ ទីក្រុងវ៉ាស៊ីងតោនក៏ទទួលខុសត្រូវទៅលើការបណ្ដុះបណ្ដាលទាហាន និងជំនួយផ្នែកបច្ចេកទេស ក្រោយពីបានប្រគល់អាវុធទាំងនេះទៅឱ្យទីក្រុងតៃប៉ិ។
កាំជ្រួចរយៈចម្ងាយឆ្ងាយ AGM-84H
នៅក្នុងសេចក្ដីប្រកាសមួយផ្សេងទៀត DSCA បានឱ្យដឹងថា ក្រសួងការបរទេសអាមេរិកក៏បានយល់ព្រមលក់ប្រព័ន្ធកាំជ្រួចហ្វូងរយៈចម្ងាយឆ្ងាយ M142 HIMARS រួមនឹងសម្ភារអម និងជំនួយផ្នែកបច្ចេកទេសទៅឱ្យតៃវ៉ាន់ ជាមួយនឹងតម្លៃសរុប 436លានដុល្លារអាមេរិក។
សភាសហរដ្ឋអាមេរិកមានពេល30ថ្ងៃ រាប់ចាប់ពីពេលបានទទួលសេចក្ដីប្រកាសពីក្រសួងការបរទេស ដើម្បីធ្វើការពិចារណាថា តើគួររាំងខ្ទប់កិច្ចព្រមព្រៀងលក់អាវុធនេះដែរ ឬអត់។ បើសិនជាមិនមានការជំទាស់ពីសភាជាតិ កិច្ចព្រមព្រៀងនេះនឹងត្រូវបានបញ្ជូនទៅឱ្យប្រធានាធិបតី Donald Trump ដើម្បីចុះហត្ថលេខាចុងក្រោយ។
ក្រសួងការបរទេសចិន និងការិយាល័យតំណាងរបស់តៃវ៉ាន់ ប្រចាំទីក្រុងវ៉ាស៊ីងតោន មិនទាន់មានប្រតិកម្មណាមួយទៅនឹងព័ត៌មានខាងលើនេះនៅឡើយ។
សូមរំឭកថា ប្រទេសចិន តែងចាត់ទុកកោះតៃវ៉ាន់ ជាផ្នែកមួយនៃទឹកដីរបស់ខ្លួនដែលរង់ចាំតែថ្ងៃច្របាច់បញ្ចូលគ្នាប៉ុណ្នោះ បើទោះជាត្រូវប្រើកម្លាំងបាយក៏ដោយ។ ចំណែកសហរដ្ឋអាមេរិកវិញ ទោះបីជាទទួលស្គាល់គោលការណ៍ “ប្រទេសចិនតែមួយ” ប៉ុន្តែសហរដ្ឋអាមេរិកនៅតែរក្សាទំនាក់ទំនងការទូតជាមួយតៃវ៉ាន់ និងកំពុងផ្គត់ផ្គង់សព្វាវុធទំនើបៗទៅឱ្យកោះនេះ ក្នុងគ្រាដែលភាពតានតឹងរវាងចិនដីគោក និងចិនតៃវ៉ាន់កំពុងឡើងកម្ដៅខ្លាំង។
ថ្មីៗនេះ ទីក្រុងប៉េកាំង បានបង្កើនសកម្មភាពយោធានៅក្បែរកោះតៃវ៉ាន់ ក្នុងពេលដែលទំនាក់ទំនងរវាងអាមេរិក-ចិន កំពុងដាំក្បាលចុះទាបបំផុតក្នុងអំឡុងច្រើនទសវត្សរ៍កន្លងមកនេះ។
យន្តហោះចម្បាំង F-16V
កន្លងមក អាមេរិកបានផ្គត់ផ្គង់អាវុធ និងយល់ព្រមលក់អាវុធទំនើបៗជាច្រើនទៅឱ្យកោះតៃវ៉ាន់ ក្នុងនោះមានយន្តហោះចម្បាំង F-16V ចំនួន66គ្រឿង និងរថក្រោះ M1A2 Abrams ចំនួន102គ្រឿង ក្នុងតម្លៃរាប់ពាន់លានដុល្លារអាមេរិក។ ក៏ប៉ុន្តែ មកដល់ពេលនេះ គេមិនទាន់ប្រាកដថា អាមេរិកនឹងចូលទៅជួយតៃវ៉ាន់ដែរ ឬយ៉ាងណានោះទេ បើសិនជាមានករណីវាយប្រហារដោយយោធាពីសំណាក់ទីក្រុងប៉េកាំង។
យ៉ាងនេះក្ដី កាលពីដើមខែតុលា ទីប្រឹក្សាសន្តិសុខជាតិអាមេរិកាំង លោក Robert O’Brien បានព្រមានថា សហរដ្ឋអាមេរិកប្រឆាំងទៅនឹងការព្យាយាមណាមួយដើម្បីគ្រប់គ្រងលើកោះតៃវ៉ាន់ដោយកម្លាំងបាយ។ លោកក៏បានអំពាវនាវឱ្យតៃវ៉ាន់វិនិយោគបន្ថែមទៀតទៅលើមីស៊ីលរយៈចម្ងាយឆ្ងាយ មីស៊ីលក្រោមទឹក នាវាវាយប្រហាររហ័ស ប្រព័ន្ធរ៉ុកកែតចល័ត និងមធ្យោបាយតាមដានទំនើបដទៃទៀត៕
ប្រភព៖ Sputnik
October 22, 2020
អីយ៉ា មិនធម្មតាទេ!! លោកគ្រូពេទ្យក្នុងឈុតPPE បង្អួតក្បាច់រាំ ឱ្យអ្នកជំងឺកូវីដ សប្បាយចិត្ត
ជាឃ្លីប ដែលកំពុងត្រូវបានគេចែករំលែកយ៉ាងច្រើននៅក្នុងប្រទេសឥណ្ឌា គឺឃ្លីបដែលលោកគ្រូពេទ្យម្នាក់ នៅក្នុងរដ្ឋអាស់សាម បង្អួតក្បាច់រាំយ៉ាងស្ទាត់ជំនាញ ប្រៀបដូចអ្នករាំអាជីព ដើម្បិឱ្យមិត្តរួមការងារ និងអ្នកជំងឺកូវីដនៅក្នុងមន្ទីរពេទ្យ មានសេចក្ដីសុខ។
លោកគ្រូពេទ្យ អារុព សេនាប៉ាទិ មកពីមហាវិទ្យាល័យវេជ្ជសាស្ត្រ និងមន្ទីរពេទ្យ ស៊ីលឆារ រដ្ឋអាស់សាម ប្រទេសឥណ្ឌា បានក្លាយជាជនល្បីឈ្មោះ ត្រឹមតែ 1រាត្រីប៉ុណ្ណោះ ដោយសារឃ្លីបគួរឱ្យស្ងើចសរសើរ និងអស់សំណើច ខណៈពេលលោកបង្អួតក្បាច់ជើង តាមចង្វាក់បទចម្រៀង Ghungroo ក្នុងខ្សែភាពយន្តរឿង War ក្នុងឯកសណ្ឋានឈុតPPE(ឈុតការពារការឆ្លងជំងឺកូវីដ-19) ដោយក្បាច់រាំ មិនមែនធម្មតាឡើយ។ រអិលទន់ ប្រៀបដូចជាអ្នករាំអាជីព ហើយត្រឹមតែ 1ថ្ងៃប៉ុណ្ណោះ ក្រោយពីមិត្តភក្តិម្នាក់ របស់លោកគ្រូពេទ្យឈ្មោះ សៃអេត ហ្វៃសាន អាម៉ាត់ នាំយកឃ្លីបនេះ ទៅចែករំលែកនៅក្នុងបណ្ដាញសង្គមធ្វីតធើរ ដោយសរសេរថា “លោកគ្រូពេទ្យ អារុព ពេទ្យជំនាញច្រមុះ មាត់ បំពង់ក រាំបង្អួតអ្នកជំងឺកូវីដ ដើម្បីឱ្យពួកគេមានសេចក្ដីសុខ” រួចមក ក៏ស្រាប់តែមានចំនួនចូលទស្សនា ច្រើនដល់ទៅជាង 4លានដង(គិតត្រឹមថ្ងៃទី20តុលា)។
លោកគ្រូពេទ្យពូកែរាំ បាននិយាយថា នៅក្នុងបន្ទប់សម្រាកព្យាបាល មានអ្នកជំងឺមួយចំនួន ជាមួយនឹងក្រុមគ្រូពេទ្យ។ ពួកយើង ប្រចាំការនៅក្នុងបន្ទប់អ្នកជំងឺកូវីដ និងធ្វើការយ៉ាងខ្លាំងក្លា 7ថ្ងៃពេញ។ ថ្ងៃនោះ ជាថ្ងៃចុងក្រោយនៃវេនធ្វើការ មុនពេលដែលពួកយើងនឹងត្រូវបង្ខាំងខ្លួននៅដោយឡែកនៅថ្ងៃបន្ទាប់។ មិត្តភក្តិបានប្រាប់គាត់ ទុកមុនហើយថា នៅក្នុងថ្ងៃចុងក្រោយ គាត់ត្រូវតែរាំ “ពួកគេទាំងអស់គ្នា ហេបភីខ្លាំងណាស់ ខ្ញុំខ្លួនឯង ក៏ចង់ដាស់ស្មារតីពួកគេ…វាជាសប្ដាហ៍ដ៏លំបាកលំបិន ការធ្វើការងារក្នុងឯកសណ្ឋានឈុតPPE មិនមែនជារឿងងាយស្រួលឡើយ…និងទោះជាអត្រាការជាសះស្បើយនៅក្នុងរដ្ឋអាស់សាម ល្អប្រសើរឡើង និងស្ថានការណ៍ជារួម ល្អប្រសើរហើយក៏ដោយ តែសង្គ្រាមមួយនេះ នៅមានតទៅទៀតយូរទម្រាំនឹងចប់… ពួកយើងនៅត្រូវនាំគ្នាធ្វើការរាល់ថ្ងៃ ដើម្បីយកឈ្នះឱ្យបាន”។
សារព័ត៌មាន ឥណ្ឌា អ៊ិចស្ព្រេស បានសរសេរថា លោកគ្រូពេទ្យ អារុព ស្រឡាញ់ការរាំ តាំងពីសម័យនៅរៀនមហាវិទ្យាល័យវេជ្ជសាស្ត្រGauhati ម្ល៉េះ និងធ្លាប់ចូលរួមប្រកួតច្រើនវេទិកាមកហើយ និងទទួលបានរង្វាន់មួយចំនួនទៀតផង។
អ្នកលេងបណ្ដាញសង្គមឥណ្ឌា នាំគ្នាស្ងើចសរសើរលោកគ្រូពេទ្យម្នាក់នេះ និងឆ្លៀតឱកាសថ្លែងអំណរគុណអ្នកប្រយុទ្ធអាវពេទ្យក្នុងសមរភូមិមុខគ្រប់គ្នាម្ដងទៀត ព្រោះស្ថិតក្នុងស្ថានការណ៍តានតឹងបែបនេះ ក៏ពួកលោកនៅតែ ផ្ដល់សេចក្ដីសុខដល់មនុស្សគ្រប់គ្នា។ ខណៈដែល Hrithik Roshan តារាសម្ដែង ម្ចាស់ក្បាច់រាំនៅក្នុងបទចម្រៀងដូចគ្នានោះ បានអត់មិនស្ងើចសរសើរមិនបាន ទាំងការរាំ និងចរិយាធម៌របស់គ្រូពេទ្យ “សូមប្រាប់ទៅលោកគ្រូពេទ្យ អារុព ផងថា ខ្ញុំនឹងរៀនរាំតាមលោកគ្រូពេទ្យ និងរាំឱ្យពូកែដូចលោកគ្រូពេទ្យ នៅថ្ងៃណាមួយឱ្យបាន…អស្ចារ្យមែន លោកគ្រូពេទ្យ!!”៕
Meet my #COVID duty colleague Dr Arup Senapati an ENT surgeon at Silchar medical college Assam .
Dancing infront of COVID patients to make them feel happy #COVID19 #Assam pic.twitter.com/rhviYPISwO
— Dr Syed Faizan Ahmad (@drsfaizanahmad) October 18, 2020
ប្រភព៖ សាព័ត៌មានបរទេស
October 22, 2020
ចិនបានបើកទ្វារសេដ្ឋកិច្ចនិងសង្គម ប៉ុន្តែហេតុអ្វីបានជាអាចគ្រប់គ្រងវីរុស Covid-19 បានយ៉ាងល្អដូច្នេះ?
ក្រោយពីកំណត់បានតំបន់ឆ្លងវីរុស អាជ្ញាធរនៅប្រទេសចិន នឹងចាប់ផ្ដើមធ្វើសកម្មភាពយ៉ាងឆាប់រហ័សក្នុងការបិទទ្វារ ឬដាក់បំរាមគោចរ ធ្វើតេស្តរកវីរុស និងសម្អាតមេរោគគ្រប់កន្លែង ដែលទាំងនេះគឺជាកត្តាលេចធ្លោដែលនាំឱ្យចិនអាចគ្រប់គ្រងស្ថានភាព Covid-19 បានប្រសើរជាងបណ្ដាប្រទេសនៅលោកខាងលិច។
ក្នុងគ្រាដែលប្រទេសជាច្រើននៅអឺរ៉ុប និងអាមេរិក កំពុងប្រឈមនឹងរលកនៃការឆ្លងវីរុសCovid-19 បន្ទាប់ និងត្រូវបិទទ្វារប្រទេស ឬដាក់បំរាមគោចរឡើងវិញ នៅឯតំបន់អាស៊ីខាងកើតវិញ បែរជាអាចគ្រប់គ្រងស្ថានភាពជំងឺបានល្អ ពិសេសគឺប្រទេសចិន។
កាលពីដើមសប្ដាហ៍នេះ ប្រទេសចិនបានប្រកាសអំពីកំណើនសេដ្ឋកិច្ចវិជ្ជមាននៅក្នុងត្រីមាសទីពីរជាបន្តទៀត ដែលនេះបញ្ជាក់ថា សេដ្ឋកិច្ចរបស់មហាយក្សទីពីរនៃពិភពលោក បានងើបឡើងវិញយ៉ាងឆាប់រហ័សដល់កម្រិតណា។ ដូច្នេះ តើធ្វើយ៉ាងណាទើបប្រទេសចិននៅតែអាចគ្រប់គ្រងស្ថានការណ៍ Covid-19 បានយ៉ាងល្អបែបនេះ បើទោះជាបានបើកដំណើរការសេដ្ឋកិច្ចនិងសង្គមឡើងវិញ?
ក្រោយការផ្ទុះឆ្លងវីរុសដំបូងនៅទីក្រុង Wuhan មនុស្សជាច្រើននៅតែគិតថា វិធានការសំខាន់របស់ចិនគឺការដាក់បំរាមគោចរឱ្យទាន់ពេល។ ប៉ុន្តែ នេះគ្រាន់តែជាជំហានដំបូងនៅក្នុងចំណោមវិធីសាស្ត្ររាប់មិនអស់ដែលប្រទេសនេះបាន និងកំពុងប្រើប្រាស់។
ក្រោយពីកំណត់បានតំបន់ឆ្លងវីរុស អាជ្ញាធរនៅប្រទេសចិន នឹងចាប់ផ្ដើមធ្វើសកម្មភាពយ៉ាងឆាប់រហ័សក្នុងការបិទទ្វារ ឬដាក់បំរាមគោចរ ធ្វើតេស្តរកវីរុស និងសម្អាតមេរោគគ្រប់កន្លែង ដែលទាំងនេះគឺជាកត្តាលេចធ្លោដែលនាំឱ្យចិនអាចគ្រប់គ្រងស្ថានភាព Covid-19 បានប្រសើរជាងបណ្ដាប្រទេសនៅលោកខាងលិច
ជោគជ័យរបស់ចិន គឺយោងទៅលើសមត្ថភាពនៃការតាមដាន និងស្រាវជ្រាវករណីឆ្លងនីមួយៗយ៉ាងល្អិតល្អន់នៅទូទាំងប្រទេស។ វិធីសាស្ត្រនេះ រួមមានទាំងការប្រើប្រាស់ប្រព័ន្ធ “កូដសុខភាព” តាមលំដាប់ពណ៌ និងកូដ QR ដែលអាចតាមដានការធ្វើដំណើររបស់ពលរដ្ឋ ដែលជួយឱ្យការស្វែងរកប្រភពចម្លងវីរុសបានងាយស្រួលជាងមុន។
ក្រោយពីកំណត់បានតំបន់ឆ្លងវីរុស អាជ្ញាធរនៅប្រទេសចិន នឹងចាប់ផ្ដើមធ្វើសកម្មភាពយ៉ាងឆាប់រហ័សក្នុងការបិទទ្វារ ឬដាក់បំរាមគោចរ ធ្វើតេស្តរកវីរុស និងសម្អាតមេរោគគ្រប់កន្លែង។ ជាក់ស្ដែង នៅក្នុងរលកនៃការឆ្លងថ្មីមួយនៅក្នុងទីក្រុង Qingdao កាលពីដើមខែនេះ មនុស្សជាង10លាននាក់ត្រូវបានធ្វើតេស្តដោយប្រើពេលត្រឹមតែមួយសប្ដាហ៍ប៉ុណ្ណោះ បន្ទាប់ពីមានការឆ្លងវីរុសចំនួន12ករណី។
ក្រៅពីនេះ ការដែលពលរដ្ឋមានការយល់ដឹងច្រើន និងការគោរពតាមវិធានការរបស់អាជ្ញាធរ ក៏ជាកត្តារួមចំណែកយ៉ាងសំខាន់ផងដែរ ដែលបានជួយឱ្យវិធានការទប់ស្កាត់វីរុសទទួលបានលទ្ធផលគាប់ប្រសើរ។
ពីទីក្រុង Qingdao លោក Wei បាននិយាយថា៖ “សាធារណជននៅក្នុងទីក្រុង ធ្វើសកម្មភាពទប់ស្កាត់ និងគ្រប់គ្រងវីរុសបានយ៉ាងល្អ។ គ្រប់គ្នានៅតែមានអារម្មណ៍ថាមានសុវត្ថិភាព សូម្បីតែនៅពេលមានការរកឃើញករណីវិជ្ជមាន”។
ការដែលពលរដ្ឋមានការយល់ដឹងច្រើន និងការគោរពតាមវិធានការរបស់អាជ្ញាធរ ក៏ជាកត្តារួមចំណែកយ៉ាងសំខាន់ផងដែរ ដែលបានជួយឱ្យវិធានការទប់ស្កាត់វីរុសទទួលបានលទ្ធផលគាប់ប្រសើរ
អង្គការសុខភាពពិភពលោក (WHO) ថ្មីៗនេះ ក៏បានឱ្យដឹងថា បណ្ដាប្រទេសនៅអាស៊ីខាងកើត ក្នុងនោះមានប្រទេសចិនជាដើម បានធ្វើការយ៉ាងល្អនៅក្នុងការទប់ស្កាត់ការឆ្លងរបស់វីរុស ព្រមទាំងបានណែនាំបណ្ដាប្រទេសនៅអឺរ៉ុប និងអាមេរិកខាងជើងជាដើម ឱ្យរៀនសូត្រតាមគំរូនេះ។
លោក Michael Ryan នាយកគ្រប់គ្រងកម្មវិធីបន្ទាន់ផ្នែកសុខាភិបាលរបស់អង្គការ WHO បានថ្លែងថា៖ “ប្រជាជននៅអាស៊ីខាងកើត មានការជឿជាក់ និងអនុវត្តតាមវិធានការរបស់រដ្ឋអំណាចបានខ្ពស់ជាង ពួកគេក៏តែងតែរក្សាវិធានការទប់ស្កាត់វីរុសបានយូរជាង” បើធៀបនឹងនៅអឺរ៉ុប។
ក្នុងចំណោមវិធានការខាងលើរបស់ចិន ការពាក់ម៉ាស់គឺជាកត្តាសំខាន់ជាងគេក្នុងការទប់ស្កាត់វីរុស។ សកម្មភាពនេះត្រូវបានពលរដ្ឋក្នុងបណ្ដាប្រទេសនៅអាស៊ី ពិសេសគឺចិន អនុវត្តបានយ៉ាងខ្ជាប់ខ្ជួន៕
ប្រភព៖ RT, CB, BI
October 21, 2020
ទស្សនាឃ្លីប បុគ្គលិកអនាម័យនៅប្រទេសចិន ផឹកទឹកពីចានបង្គន់ បង្អួតស្នាដៃសម្អាតអនាម័យកម្រិតកំពូល!!
បុគ្គលិកស្រី របស់ក្រុមហ៊ុនមួយ ក្នុងមណ្ឌលសាន់តុង កំពុងផឹកទឹកដែលដួសចេញពីចានបង្គន់ ដើម្បីអះអាងពីស្នាដៃរបស់នាង ក្នុងការសម្អាតអនាម័យដ៏ស្អាតផុតកំពូល និងគ្មានមេរោគ
ឃ្លីបបុគ្គលិកសម្អាតអនាម័យ របស់ក្រុមហ៊ុនមួយនៅក្នុងប្រទេសចិន ដែលបានផឹកទឹកពីចានបង្គន់ ដើម្បីបង្ហាញពីស្នាដៃក្នុងការដុសខាត់សម្អាតចានបង្គន់ បានស្អាតកម្រិតកំពូល គ្មានមេរោគ បានក្លាយជាឃ្លីបដ៏គួរឱ្យភ្ញាក់ផ្អើលមួយ នៅក្នុងពិភពអនឡាញក្នុងប្រទេសចិន។
បុគ្គលិកស្រី សម្អាតអនាម័យរបស់ក្រុមហ៊ុនលក់ចំណីសត្វ សាន់តុង ហ្វ៊ើយឈឹង ក្នុងមណ្ឌលសាន់តុង កំពុងផឹកទឹកដែលបានដួសចេញមកពីចានបង្គន់ប្រភេទអង្គុយចោងហោង ដើម្បីអះអាងពីស្នាដៃសម្អាតអនាម័យរបស់នាងដ៏អស្ចារ្យ និងគ្មានមេរោគ។
បុគ្គលិកស្រី ស៊ែលួ ម្នាក់នោះ បានទទួលការស្ងើចសរសើរ និងលើកតម្កើង ពីការឧទ្ទិសខ្លួនក្នុងតួនាទីការងារ និងបានទទួលរង្វាន់ពិសេសពីក្រុមហ៊ុន ក្នុងឋានៈជាបុគ្គលិក “ឆ្នើមអស្ចារ្យថ្នាក់ពិសេស”។
ទង្វើរបស់ ស៊ែលួ បានក្លាយជាប្រធានបទជជែកវែកញែកយ៉ាងទូលំទូលាយនៅក្នុងបណ្ដាញសង្គមដ៏ល្បីល្បាញរបស់ចិន “វេយបូ” ដោយមានមនុស្សម្នាក់បានខមមិនថា “ក្រុមហ៊ុនមិនគួរជំរុញឱ្យមានទង្វើបែបនេះទេ ក្នុងអំឡុងពេលដែលមានការឆ្លងរាលដាលនៃជំងឺកូវីដ-19”។
និងម្នាក់ទៀតបានសរសេរថា “ឱ្យមេធំរបស់ក្រុមហ៊ុន មកភ្លក្សរសជាតិទឹកពីចានបង្គន់នោះខ្លះផង…”
អ្នកទស្សនាឃ្លីបនេះម្នាក់ទៀត ជឿថា “ស្ត្រីបុគ្គលិកសម្អាតអនាម័យម្នាក់នោះ ត្រូវបានបង្ខំឱ្យធ្វើបែបនោះ ដើម្បីឱ្យទទួលបានលទ្ធផលការងារ តាមគោលដៅរបស់ក្រុមហ៊ុន…ហ៊ឺ! ជីវិតអ្នកសម្អាតអនាម័យ ពិតជាលំបាកមែន”
ខ្នាតទឹកម៉ាស៊ីននៅក្នុងប្រទេសចិន មិនទាន់ស្អាត និងមានសុវត្ថិភាពគ្រប់គ្រាន់សម្រាប់ផឹកនៅឡើយផង តែក្រុមហ៊ុនខាងលើ បែរជាអះអាងថា ទឹកនៅក្នុងចានបង្គន់របស់ក្រុមហ៊ុន ពិតជាស្អាតមានអនាម័យ ដល់ថ្នាក់ផឹកបាន និងអះអាងថា បុគ្គលិកម្នាក់នោះ ធ្វើឡើងដោយការស្ម័គ្រចិត្តទៀតផង។
ចំណែកអ្នកនាំពាក្យរបស់ក្រុមហ៊ុន បាននិយាយថា ស៊ែលួ បានផឹកទឹកពីចានបង្គន់ អស់រយៈពេលជិត 2ឆ្នាំមកហើយក្រោយពីបាន “យកឈ្នះឧបសគ្គខាងចិត្តវិទ្យា” រួចមក៕
ប្រភព៖ សារព័ត៌មានបរទេស
October 21, 2020