អន្តរជាតិ - La Reine Media

អង់គ្លេសដាក់បម្រាមគោចរទូទាំងប្រទេសជាថ្មី

នាយករដ្ឋមន្ត្រីអង់គ្លេសបានចេញបទបញ្ជាដាក់បម្រាមគោចរទូទាំងប្រទេស អំពាវនាវឱ្យប្រជាជននៅក្នុងផ្ទះ និងបិទទ្វារសាលារៀនដើម្បីឈានទៅរកការគ្រប់គ្រងស្ថានភាព Covid-19 ក្លាយពូជ។

«មន្ទីរពេទ្យនានាកាន់តែទទួលរងសម្ភាធខ្លាំងដោយសារ Covid-19 បើធៀបនឹងដំណាក់កាលដំបូងនៃការរាតត្បាតរបស់វីរុសនេះ។ ភាគច្រើន ប្រទេសយើងកំពុងអនុវត្តវិធានការតឹងរ៉ឹង ពិតណាស់ យើងត្រូវការធ្វើច្រើនជាងនេះដើម្បីគ្រប់គ្រងវីរុសក្លាយពូជនេះ។ យើងត្រូវតែដាក់បម្រាមគោចរទូទាំងប្រទេស ហើយរដ្ឋាភិបាល ជាថ្មីម្ដងទៀត សូមណែនាំឱ្យពលរដ្ឋនៅក្នុងផ្ទះ» នាយករដ្ឋមន្ត្រីអង់គ្លេស លោក Boris Johnson មានប្រសាសន៍លើកញ្ចក់ទូរទស្សន៍កាលពីថ្ងៃទី 4 មករា។

យោងតាមបទបញ្ជាបម្រាមគោចរថ្មីនេះ ហាងលក់ទំនិញមិនចាំបាច់នៅទូទាំងប្រទេស និងទីតាំងទទួលភ្ញៀវនានានឹងត្រូវបន្តបិទទ្វារ។ សាលាបឋម និងមធ្យមសិក្សានឹងចាប់ផ្ដើមបិទទ្វារចាប់ពីថ្ងៃទី 5 មករា ដោយទទួលតែសិស្សងាយរងគ្រោះ ឬកូនៗរបស់ក្រុមពលករដែលធ្វើការក្នុងវិស័យចាំបាច់ក្នុងសង្គម។

នាយករដ្ឋមន្ត្រីបានឱ្យដឹងថា បទបញ្ជាខាងលើអាចនឹងត្រូវបានបន្ធូរបន្ថយចចាប់ពីពាក់កណ្ដាលខែកុម្ភៈ បើសិនជាកម្មវិធីចាក់វ៉ាក់សាំងដំណើរការរលូតដូចបានគ្រោងទុក។

បច្ចុប្បន្ន អង់គ្លេសគឺជាសម្បុកវីរុសធំជាងគេលំដាប់ទីប្រាំក្នុងពិភពលោក ដោយមានអ្នកឆ្លង Covid-19 សរុបជាង 2.7 លាននាក់ ក្នុងនោះមានជាង 75,000 នាក់បានបាត់បង់ជីវិត៕

ប្រភព៖ Reuters

January 5, 2021

នាយករដ្ឋមន្ត្រីថៃស្នើឱ្យពលរដ្ឋនៅក្នុងផ្ទះ ក្នុងគ្រាករណីវិជ្ជមាននឹង Covid-19 កំពុងកើនឡើងយ៉ាងខ្ពស់

នាយករដ្ឋមន្ត្រីនៃប្រទេសថៃ បានអំពាវនាវឱ្យពលរដ្ឋរបស់ខ្លួននៅក្នុងផ្ទះដើម្បីទប់ស្កាត់ «រលកធំបំផុត» នៃការឆ្លងរាលដាលរបស់វីរុស Covid-19 បន្ទាប់ពីក្រុមមន្ត្រីបញ្ជាក់អំពីការកើនឡើងខ្ពស់នៃករណីឆ្លងថ្មីដល់ទៅ 745 នាក់ក្នុងថ្ងៃនេះ។

រដ្ឋាភិបាលថៃ ថ្ងៃនេះបានប្រកាសថា ខេត្តក្រុងចំនួន 28 រួមមានទាំងរាជធានីបាងកកផងដែរ គឺជាតំបន់ដែលកំពុងមានហានិភ័យខ្ពស់ក្នុងការឆ្លង Covid-19 ហើយបានអំពាវនាវឱ្យប្រជាជនធ្វើការក្នុងផ្ទះ ចៀសវាងការជួបជុំគ្នា ឬចាកចេញពីខេត្តរបស់ខ្លួនក្នុងគ្រាដែលមានការផ្ទុះឆ្លងរាលដាលខ្លាំង ក្រោយការរកឃើញករណីឆ្លងនៅក្នុងផ្សារត្រីក្បែរទីក្រុងបាងកកកាលពីពេលថ្មីៗនេះ។

នាយករដ្ឋមន្ត្រីថៃ លោក Prayuth Chan-ocha បានប្រាប់ក្រុមអ្នកយកព័ត៌មានថា៖ «យើងមិនចង់បិទទ្វារប្រទេសទាំងមូលនោះទេ ព្រោះយើងដឹងច្បាស់អំពីបញ្ហា ដូច្នេះតើគ្រប់គ្នាអាចបិទទ្វារដោយខ្លួនឯងបានទេ?។ ប្រការនេះអាស្រ័យលើអ្នកគ្រប់គ្នា ហើយបើសិនជាមិនចង់ឆ្លងវីរុស គ្រប់គ្នាគ្រាន់តែនៅផ្ទះក្នុងរយៈពេលពី 14-15 ថ្ងៃ។ បើសិនអ្នកគិតដូច្នេះ នោះគ្រប់យ៉ាងនឹងមានសុវត្ថិភាព ហើយងាយស្រួលក្នុងការគ្រប់គ្រង»។

សម្រាប់ថ្ងៃនេះ ប្រទេសថៃមានអ្នកស្លាប់ថ្មីចំនួន 1 ករណី និងបានរកឃើញករណីវិជ្ជមានថ្មីចំនួន 745 នាក់ ដែលនេះគឺជាកម្រិតខ្ពស់បំផុតរាប់ចាប់ពីថ្ងៃដែលប្រទេសនេះរកឃើញករណីដំបូង។ គិតត្រឹមថ្ងៃនេះ ប្រទេសថៃបានរកឃើញអ្នកវិជ្ជមាននឹង Covid-19 សរុបចំនួន 8,439 នាក់ និងអ្នកស្លាប់សរុបចំនួន 65 នាក់។ យ៉ាងនេះក្ដី ប្រទេសថៃនៅតែស្ថិតក្នុងចំណោមបណ្ដាប្រទេសដែលមានករណីឆ្លងទាបជាងគេនៅអាស៊ី។

ករណីឆ្លងថ្មីភាគច្រើនគឺជាប់ទាក់ទងនឹងក្រុមពលរដ្ឋបរទេសដែលចាប់ផ្ដើមឆ្លងរាលដាលនៅខេត្ត Samut Sakhon នៅភាគនិរតីក្រុងបាងកក និងបានរាលដាលទៅកាន់ខេត្តនានាជាងពាក់កណ្ដាលរបស់ប្រទេសនេះ។ រដ្ឋាភិបាលថៃបានចេញបញ្ជាឱ្យហាងនានា និងអ្នកលក់អាហារនៅតាមដងផ្លូវក្នុងក្រុង ផ្អាកដំណើរការជាបណ្ដោះអាសន្នចាប់ពីម៉ោង 19 យប់ ដល់ម៉ោង 6 ព្រឹកថ្ងៃបន្ទាប់ ដោយផ្ដើមអនុវត្តចាប់ពីថ្ងៃទី 5 ខែមករា ដើម្បីទប់ទល់នឹងការឆ្លងវីរុស។

ការលក់គ្រឿងស្រវឹងនៅក្នុងហាង និងបារ ក៏ដូចជាទីតាំងកម្សាន្តនានានៅក្នុងបណ្ដាខេត្តដែលមានហានិភ័យខ្ពស់ក៏ត្រូវបិទទ្វារបណ្ដោះអាសន្ន។ អភិបាលខេត្ត-ក្រុងនានា ទទួលបានសិទ្ធិក្នុងការចេញបទបញ្ជាដោយឡែកដើម្បីចូលរួមទប់ស្កាត់ Covid-19។

ចំណែកសាលារៀន និងមជ្ឈមណ្ឌលអប់រំនៅទូទាំងប្រទេស ក៏ត្រូវបិទទ្វារ ផ្អាកដំណើរការរយៈពេលពេញមួយខែផងដែរ៕

ប្រភព៖ Reuters

January 4, 2021

ករណីវិជ្ជមាននឹង Covid-19 ក្នុងពិភពលោក កើនលើស 85លាននាក់! អាមេរិកព្រួយបារម្ភពីការផ្ទុះឆ្លងក្រោយថ្ងៃបុណ្យ

ពិភពលោកបានរកឃើញមនុស្សជាង 85.4លាននាក់ វិជ្ជមាននឹង Covid-19 ក្នុងនោះមានជាង 1.85លាននាក់បានស្លាប់។ ក្រុមមន្ត្រីសហរដ្ឋអាមេរិក កំពុងមានការព្រួយបារម្ភខ្លាំងអំពីហានិភ័យនៃការផ្ទុះឆ្លងរាលដាលថ្មីនៅក្រោយការឈប់សម្រាកថ្ងៃបុណ្យ។

ក្នុងរយៈពេល 24ម៉ោងចុងក្រោយនេះ ពិភពលោកបានរកឃើញអ្នកឆ្លងវីរុស Covid-19 ថ្មី ចំនួន 538,797 នាក់ និងអ្នកស្លាប់ថ្មីចំនួន 7,715 នាក់ ធ្វើឱ្យអ្នកវិជ្ជមាននឹងវីរុសនេះសរុបកើនដល់ 85,455,471នាក់ និងអ្នកស្លាប់សរុបកើនដល់ 1,850,112នាក់។ អ្នកជំងឺដែលបានជាសះស្បើយមានចំនួន 60,387,163នាក់។ នេះបើតាមគេហទំព័រ Worldometers។

សហរដ្ឋអាមេរិកគឺជាសម្បុកវីរុស Covid-19 ធំជាងគេបង្អស់ក្នុងពិភពលោក ដោយមានអ្នកវិជ្ជមានសរុប 21,080,684នាក់ ក្នុងនោះមានអ្នកស្លាប់សរុបចំនួន 360,027នាក់ បន្ទាប់ពីបានរកឃើញអ្នកឆ្លងវីរុសថ្មីចំនួន 161,493នាក់ និងអ្នកស្លាប់ថ្មីចំនួន 1,336នាក់ ក្នុងអំឡុង 24ម៉ោងកន្លងទៅនេះ។ ក្នុងខែចុងក្រោយនៃឆ្នាំ 2020 ប្រទេសនេះ មានអ្នកឆ្លងវីរុសដល់ទៅជាង 6.4លាននាក់ និងអ្នកស្លាប់ជាង 77,000នាក់។

ក្រុមមន្ត្រីសុខាភិបាល កាលពីថ្ងៃទី 3មករា ឆ្នាំ2021 បានព្រមានថា ថ្ងៃខែដ៏អាក្រក់នៅតែស្ថិតនៅខាងមុខ នៅពេលដែលករណីឆ្លងថ្មីអាចបន្តកើនឡើង ទាក់ទិននឹងសកម្មភាពជួបជុំគ្នាក្នុងរដូវបុណ្យ។

វេជ្ជបណ្ឌិត Anthony S. Fauci ដែលជាអ្នកជំនួញលំដាប់កំពូលផ្នែករោគឆ្លងនៅសហរដ្ឋអាមេរិក បានឱ្យដឹងថា៖ «នោះគឺជាទិដ្ឋភាព និងសំណាងអាក្រក់បំផុត ប៉ុន្តែ ត្រូវបានព្យាករជាមុនរួចហើយ»។

ប្រភព៖ AFP, Reuters

January 4, 2021

មន្ត្រីចិននិយាយថា «មិនចាំបាច់ខ្លាច Covid-19 ដែលបានក្លាយពូជថ្មីនោះទេ»

មន្ត្រីសុខាភិបាលចិនបាននិយាយថា មិនទាន់មានសញ្ញាណាមួយបង្ហាញថា Covid-19 ក្លាយពូជថ្មីប៉ះពាល់ដល់សមត្ថភាពបង្កើតអង្គបដិប្រាណរបស់វ៉ាក់សាំង Covid-19 ដែលចិនទើបតែបានអនុញ្ញាតឱ្យប្រើប្រាស់នៅឡើយ។

«មិនចាំបាច់ភ័យខ្លាចនោះទេ។ Covid-19 ប្រភេទថ្មី មកដល់ពេលនេះមិនទាន់ប្ដូរផ្លាស់ជាក់លាក់ទៅលើលទ្ធភាពនៃការបង្កជំងឺនៅឡើយ បើធៀបនឹងប្រភេទមុននេះ» លោក Yu Wang ប្រធានវិទ្យាស្ថានទប់ស្កាត់រោគឆ្លងដោយសារវីរុសនៃមជ្ឈមណ្ឌលគ្រប់គ្រងនិងទប់ស្កាត់ជំងឺឆ្លងរបស់ចិន (China CDC) ថ្លែងនៅលើកញ្ចក់ទូរទស្សន៍កាលពីថ្ងៃទី 1 ខែមករា។

ព័ត៌មាននេះត្រូវបានលើកឡើងមួយថ្ងៃបន្ទាប់ពីចិនបានផ្ដល់ការអនុញ្ញាតឱ្យប្រើប្រាស់វ៉ាក់សាំង Covid-19 របស់ក្រុមហ៊ុន Sinopharm។ លោក Yu Wang បានឱ្យដឹងថា មិនទាន់រកឃើញផលប៉ះពាល់របស់ Covid-19 ក្លាយពូជថ្មី ទៅលើសមត្ថភាពនៃការបង្កអង្គបដិប្រាណនៃវ៉ាក់សាំងរបស់ Sinopharm នៅឡើយ។

ក្រុមមន្ត្រីចិន កាលពីថ្ងៃទី 31 ខែធ្នូ ឆ្នាំ 2020 បានបញ្ជាក់ថា បានរកឃើញករណីឆ្លង Covid-19 ក្លាយពូជ B.1.1.7 ដំបូងនៅប្រទេសនេះ ដែលកើតឡើងលើនារីវ័យ 23 ឆ្នាំម្នាក់ដែលបានត្រលប់ពីប្រទេសអង់គ្លេស កាលពីពាក់កណ្ដាលខែធ្នូ។ នារីនេះត្រូវបានបញ្ជូនចូលពេទ្យ នៅពេលមានរោគសញ្ញាមួយចំនួន។

ក្រុមអ្នកឯកទេសផ្នែកសុខាភិបាលចិន បានធ្វើតេស្តហ្សែននៃសំណាកកាលពីថ្ងៃទី 24 ធ្នូ ដោយសារតែនារីខាងលើ «មានប្រវត្តិធ្វើដំណើរទៅមកប្រទេសអង់គ្លេស និងភាពមិនប្រក្រតីមួយចំនួននៃលទ្ធផលធ្វើតេស្ត Nucleic acids»។

លទ្ធផលបានបង្ហាញថា ប្រភេទ Covid-19 នៅលើអ្នកជំងឺនេះ ខុសទៅនឹងប្រភេទដែលបានបង្ហាញខ្លួននៅទីក្រុង Wuhan និង Shanghai។ ការធ្វើតេស្តលម្អិតបង្ហាញថា វាគឺជា Covid-19 ក្លាយពូជថ្មី B.1.1.7 ដែលមានសមត្ថភាពចម្លងខ្ពស់ ដែលត្រូវបានរកឃើញនៅប្រទេសអង់គ្លេសនាពេលកន្លងមក។

សូមរំលឹកថា កាលពីថ្ងៃទី 14 ខែធ្នូ ឆ្នាំ 2020 ប្រទេសអង់គ្លេសបានប្រកាសថា បានរកឃើញប្រភេទ Covid-19 ក្លាយពូជថ្មីដែលមានសភាពប្រែប្រួលដល់ទៅ 20 ទម្រង់ផ្សេងទៀត បើធៀបនឹងវីរុសដើម ព្រមទាំងមានសមត្ថភាពចម្លងខ្ពស់ជាង 70% ទៀតផង។ ក៏ប៉ុន្តែ ក្រុមអ្នកវិទ្យាសាស្ត្រអះអាងថា មិនទាន់មានភ័ស្តុតាងបង្ហាញថា B.1.1.7 មានសមត្ថភាពសម្លាប់មនុស្សខ្ពស់ជាងប្រភេទ Covid-19 ដើមនៅឡើយ។

ប្រទេសរាប់សិបនៅលើពិភពលោក បានរកឃើញករណីឆ្លង Covid-19 ប្រភេទថ្មី។ មកដល់ពេលនេះ ប្រទេសជាង 50 បានហាម ឬរឹតបន្តឹងលើការធ្វើដំណើរពីប្រទេសអង់គ្លេសដើម្បីកាត់បន្ថយការឆ្លងវីរុស Covid-19 ប្រភេទថ្មីនេះ។

Covid-19 បានផ្ទុះឆ្លងរាលដាលនៅប្រទេសចិនចាប់ពីខែធ្នូ ឆ្នាំ 2019 ហើយគិតដល់បច្ចុប្បន្ន វាបានបង្ហាញខ្លួននៅក្នុងប្រទេស និងដែនដីចំនួន 218 ក្នុងពិភពលោក ដោយមានមនុស្សជាង 84 លាននាក់បានឆ្លងវីរុស និងជាង 1,8 លាននាក់បានស្លាប់ ខណៈជាង 59 លាននាក់បានជាសះស្បើយ។ ប្រទេសចិនមានអ្នកវិជ្ជមាននឹង Covid-19 សរុបជាង 87 លាននាក់ និងជាង 4.600 នាក់បានបាត់បង់ជីវិត៕

ប្រភព៖ Reuters

January 2, 2021

បាក់ចង្កេះភ្នំនៅន័រវែស! ផ្ទះច្រើនខ្នងនៅក្នុងភូមិត្រូវ «ធរណីស្រូប»

គ្រោះបាក់ដីដ៏ធំមួយបានបំផ្លាញផ្ទះជាច្រើនខ្នងនៅក្នុងភូមិ Ask ក្បែររដ្ឋធានី Oslo ប្រទេសន័រវែស កាលពីយប់ថ្ងៃទី 29 ខែធ្នូ បណ្ដាលឱ្យមនុស្សចំនូន 10 នាក់រងរបួស និង 12 នាក់បាត់ខ្លួន។

វីដេអូពីកន្លែងកើតហេតុបានបង្ហាញថា ចង្កេះភ្នំយ៉ាងវែងបានបាក់ទៅលើភូមិ Ask ស្ថិតក្នុងទីប្រជុំជន Gjerdrum ដែលមានចម្ងាយពីរដ្ឋធានី Oslo ប្រហែល 24 គម ទៅទិសឦសាន។ ផ្ទះជាច្រើនខ្នងត្រូវកប់ទៅក្នុងភក់ខ្មៅ។

ព្រឹលបានធ្លាក់ពេញមួយព្រឹកនៃថ្ងៃទី 30 ខែធ្នូ នៅក្នុងពេលដែលក្រុមអ្នកជួយសង្គ្រោះកំពុងជម្លៀសអ្នករងរបួស និងព្យាយាមរក្សាផ្ទះមិនឱ្យរលំ។ ផ្ទះជាច្រើនខ្នងដែលផ្អៀងទៅរកមាត់រណ្ដៅដែលបានកើតឡើងក្រោយការបាក់ដីចង្កេះភ្នំ ក្រោយមកក៏បានបាក់រលំនិងធ្លាក់ចូលក្នុងរណ្ដៅនោះ។

នាយករដ្ឋមន្ត្រីន័រវែស Erna Solberg ដែលបានទៅមើលកន្លែងកើតហេតុ បានថ្លែងថា «នេះគឺជាគ្រោះបាក់ដីធំបំផុត» ដែលប្រទេសនេះធ្លាប់បានជួប។

លោកស្រី Solberg បន្តថា៖ «ស្ថានភាពមិនទាន់ប្រសើរឡើយនៅឡើយ ហើយយើងក៏មិនទាន់ធ្វើអ្វីបានក្រៅពីការជួយសង្គ្រោះមនុស្សដោយឧទ្ធម្ភាគចក្រ»។

សារព័ត៌មានប្រទេសនេះបានរាយការណ៍ថា មនុស្សប្រមាណ 700 នាក់ ត្រូវបានជម្លៀសចេញពីកន្លែងកើតហេតុ ខណៈអាជ្ញាធរក្រុងបានព្រមានថា មនុស្សប្រហែល 1,500 នាក់ អាចនឹងត្រូវចាកចេញពីតំបន់ ដោយសារមានការព្រួយបារម្ភអំពីសុវត្ថិភាព។

មកដល់យប់ថ្ងៃទី 30 ខែធ្នូ មនុស្សចំនួន 12 នាក់នៅតែបន្តបាត់ខ្លួន ខណៈ 10 នាក់បានរងរបួស ក្នុងនោះមានមនុស្សម្នាក់ត្រូវបានបញ្ជូនទៅកាន់ Oslo ដោយសាររបួសមានសភាពធ្ងន់ធ្ងរ នេះបើតាមការឱ្យដឹងពីសមត្ថកិច្ច។

យោងតាមនាយកដ្ឋានគ្រប់គ្រងធនធានទឹកនិងថាមពលរបស់ន័រវែស (NVE) គ្រោះបាក់ដីនេះបានកើតឡើងនៅពេលចង្កេះភ្នំប្រវែងពី 300-700 ម៉ែត្រ បានរអិលបាក់ និងធ្លាក់មកក្រោមដោយសារតែបាតុភូត «ដីឥដ្ឋហូរ»៕

ប្រភព៖ CBS

December 31, 2020

សិង្ហបុរី បានចាប់ផ្ដើមចាក់វ៉ាក់សាំង Covid-19 ដល់ពលរដ្ឋអាទិភាព

ប្រទេសសិង្ហបុរី កាលពីថ្ងៃទី 30 ខែធ្នូ បានចាប់ផ្ដើមយុទ្ធនាការចាក់វ៉ាក់សាំង Covid-19 របស់ក្រុមហ៊ុន Pfizer ដល់ពលរដ្ឋរបស់ខ្លួន ដោយផ្ដល់អាទិភាពដំបូងគេដល់បុគ្គលិកសុខាភិបាល និងពលរដ្ឋវ័យចំណាស់។

តាមគម្រោង រដ្ឋាភិបាលប្រទេសនេះនឹងមានវ៉ាក់សាំងក្នុងបរិមាណគ្រប់គ្រាន់សម្រាប់ពលរដ្ឋ 5.7 លាននាក់ នៅក្នុងត្រីមាសទី 3 នៃឆ្នាំ 2021 ក្នុងនោះ ពលរដ្ឋសិង្ហបុរី និងជនបរទេសដែលរស់នៅយូរអង្វែងក្នុងប្រទេសនេះនឹងទទួលបានវ៉ាក់សាំងដោយមិនគិតថ្លៃ។

គិតមកដល់បច្ចុប្បន្ន សិង្ហបុរី បានរកឃើញអ្នកវិជ្ជមាននឹង Covid-19 សរុបចំនួន 58,569 នាក់ ក្នុងនោះមាន 29 នាក់បានស្លាប់ និង 58,411 នាក់បានជាសះស្បើយ។ ក្នុងរយៈពេល 24 ម៉ោងចុងក្រោយនេះ សិង្ហបុរីរកឃើញអ្នកវិជ្ជមានថ្មីចំនួន 27 ករណីបន្ថែមទៀត។

នៅទូទាំងពិភពលោក គិតត្រឹមព្រឹកថ្ងៃទី 31 ខែធ្នូ ឆ្នាំ 2020 នេះ មានមនុស្សចំនួន 83,060,556 នាក់បានឆ្លងវីរុស Covid-19 ក្នុងនោះមានអ្នកស្លាប់ 1,812,050 នាក់ និងអ្នកបានជាសះស្បើយចំនួន 58,862,045 ខណៈអ្នកកំពុងព្យាបាលចំនួន 22,386,461 នាក់៕

December 31, 2020

មានករណីផ្ទុះយ៉ាងធំមួយនៅពេលយន្តហោះដឹកនាយករដ្ឋមន្ត្រីយេមែនចុះចត

យ៉ាងហោចណាស់មានមនុស្សចំនួន 16 នាក់បានស្លាប់នៅក្នុងករណីផ្ទុះមួយយ៉ាងកក្រើកនៅព្រលានយន្តហោះ Aden កាលពីថ្ងៃទី 30 ខែធ្នូ បន្ទាប់ពីនាយករដ្ឋមន្ត្រី រួមនឹងសមាជិកគណៈរដ្ឋមន្ត្រីដែលទើបតែត្រូវបានបង្កើតឡើង បានចុះចតភ្លាម។

សាក្សីបានឱ្យដឹងថា ពួកគេបានឮសំឡេងផ្ទុះមួយយ៉ាងធំ រួមនឹងសំឡេងកាំភ្លើងនៅក្នុងព្រលានយន្តហោះ នៅពេលយន្តហោះបានចុះចតភ្លាម។ ប្រភពព័ត៌មានពីក្រុមសន្តិសុខក្នុងតំបន់បានប្រាប់ថា គ្រាប់កាំភ្លើងត្បាល់ចំនួន 3 គ្រាប់បានធ្លាក់លើព្រលានយន្តហោះ។ មនុស្សយ៉ាងតិច 13 នាក់បានស្លាប់ និង 60 នាក់បានរងរបួស។ មិនទាន់មានក្រុមណាមួយបានចេញមុខទទួលខុសត្រូវលើករណីនេះនៅឡើយ ប៉ុន្តែ ក្រុមមន្ត្រីយល់ថា នេះអាចជាការវាយប្រហាររបស់ក្រុមឧទ្ទាម Houthi ដែលមានអ៊ីរ៉ង់នៅពីក្រោយ។

រដ្ឋមន្ត្រីក្រសួងព័ត៌មានយេមែន លោក Moammar Al-Eryani ឱ្យដឹងថា មន្ត្រីទាំងអស់មានសុវត្ថិភាព និងបានទៅដល់វិមានប្រធានាធិបតីនៅក្នុងទីក្រុង។ នាយករដ្ឋមន្ត្រី Maeen Abdulmalik បានសរសេរនៅលើ Twitter ថា៖ «យើងនិងក្រុមសមាជិកគណៈរដ្ឋមន្ត្រីកំពុងស្ថិតនៅក្នុងទីក្រុង Aden ជាបណ្ដោះអាសន្ន ហើយគ្រប់គ្នាមិនមានបញ្ហាអ្វីទេ។ សកម្មភាពភេរវកម្មដ៏កំសាក វាយប្រហារលើព្រលានយន្តហោះ Aden គឺជាផ្នែកមួយនៃការប្រយុទ្ធដែលកំពុងធ្វើឡើងដើម្បីប្រឆាំងនឹងរដ្ឋាភិបាល និងពលរដ្ឋយេមែន។

រដ្ឋាភិបាលដែលត្រូវបានអន្តរជាតិទទួលស្គាល់ និងកងកម្លាំងផ្ដាច់ខ្លួននៅភាគខាងត្បូង បានចាប់ដៃគ្នាបង្កើតជាគណៈរដ្ឋមន្ត្រីកាលពីថ្ងៃទី 18 ខែធ្នូ ដើម្បីបង្កើតសមរភូមិរួមមួយក្នុងបំណងទប់ទល់នឹងឧទ្ទាម Houthi ដែលកំពុងកាន់កាប់រដ្ឋធានី Sana’a និងភាគច្រើននៃតំបន់ភាគខាងជើង។

សមាជិកគណៈរដ្ឋមន្ត្រីបានទៅកាន់ទីក្រុង Aden តែប៉ុន្មានថ្ងៃប៉ុណ្ណោះក្រោយពីប្រធានាធិបតីយេមែន Abedrabbo Mansour Hadi បានតែងតាំងពួកគេនៅអារ៉ាប៊ីសាអូឌីត ជាប្រទេសដែលកំពុងដឹកនាំសម្ព័ន្ធមិត្តយោធាប្រឆាំងនឹងឧទ្ទាម Houthi។ លោក Hadi បានធ្វើដំណើរទៅកាន់រដ្ឋធានី Riyadh របស់អារ៉ាប៊ីសាអូឌីត ក្រោយពីរដ្ឋធានី Sana’a បានធ្លាក់ទៅលើកណ្ដាប់ដៃរបស់ក្រុម Houthi កាលពីឆ្នាំ 2014។

មនុស្សរាប់ម៉ឺននាក់ ដែលភាគច្រើនគឺជាជនស៊ីវិល បានបាត់បង់ជីវិត និងរាប់លាននាក់បានភៀសខ្លួនចោលផ្ទះសម្បែងក្នុងអំឡុងសង្គ្រាមដែលអូសបន្លាយ 5 ឆ្នាំនៅយេមែន។ អង្គការសហប្រជាជាតិបានហៅសង្គ្រាមនេះថាជាសោកនាដកម្មមនុស្សធម៌អាក្រក់បំផុតក្នុងពិភពលោក៕

ប្រភព៖ Reuters, AFP

December 31, 2020

ផ្កាយរណបធ្វើពីឈើដំបូងគេបង្អស់ក្នុងពិភពលោក

សាកលវិទ្យាល័យ Kyoto កំពុងសហការជាមួយនឹងក្រុមហ៊ុនព្រៃឈើមួយដើម្បីអភិវឌ្ឍផ្កាយរណបធ្វើអំពីឈើ និងបញ្ជូនវាឡើងទៅកាន់គន្លងគោចរក្នុងឆ្នាំ 2023 ក្នុងបំណងកាត់បន្ថយសំរាមក្នុងទីអវកាស។

Takao Doi ដែលជាអ្នកអវកាសជនជាតិជប៉ុន និងជាសាស្ត្រាចារ្យនៅសាកលវិទ្យាល័យ Kyoto បានឱ្យដឹងថា គុណប្រយោជន៍របស់ផ្កាយរណបធ្វើអំពីឈើ នោះគឺថា បើសិនជាវាធ្លាក់មកកាន់ផែនដី ហើយឆេះ វានឹងមិនបញ្ចេញសារធាតុដែលបង្កផលប៉ះពាល់ដូចទៅនឹងផ្កាយរណបធ្វើអំពីលោហធាតុ។

«យើងយកចិត្តទុកដាក់ទៅលើភាពជាក់ស្ដែងដែលថា រាល់ផ្កាយរណបដែលធ្លាក់មកកាន់បរិយាកាសផែនដី សុទ្ធតែត្រូវឆេះ ហើយបង្កើតបានជាគ្រាប់អុកស៊ីដអាលុយមីញ៉ូមល្អិតៗ អណ្ដែតនៅក្នុងស្រទាប់បរិយាកាសខាងលើជាច្រើនឆ្នាំ ដែលនេះនឹងបង្កផលប៉ះពាល់ដល់បរិស្ថានលើផែនដី» លោក Takao Doi បកស្រាយដូច្នេះ។

សាកលវិទ្យាល័យ Kyoto និងក្រុមហ៊ុន Sumitomo Forestry កំពុងរៀបចំគម្រោងធ្វើពិសោធន៍ដើម្បីឱ្យដឹងថា ឈើប្រភេទណាដែលមានគុណភាពខ្ពស់ជាងគេក្នុងការស៊ូទ្រាំបានជាមួយនឹងបរិស្ថាននៅទីអវកាស និងដើម្បីអភិវឌ្ឍប្រភេទឈើទាំងនោះ ឱ្យកាន់តែមានគុណភាពដែលអាចទប់ទល់បានជាមួយនឹងសីតុណ្ហភាព និងពន្លឺព្រះអាទិត្យនៅក្នុងលម្ហអវកាស។

សំរាមអវកាសបានក្លាយជាបញ្ហាគួរឱ្យព្រួយបារម្ភសម្រាប់ក្រុមអ្នកវិទ្យាសាស្ត្រ។ «បំណែកនៃសំរាមនៅទីអវកាសកំពុងតែកើនឡើងពីមួយថ្ងៃទៅមួយថ្ងៃ។ ការប៉ះទង្គិចគ្នារវាងបំណែកសំរាមអវកាសនានាដែលមានទម្ងន់ចាប់ពី 1 ដល់ 10 តោន បង្កឱ្យមានហានិភ័យខ្ពស់ដល់បរិស្ថាន» នេះបើតាម Daniel Oltrogge ប្រធានមជ្ឈមណ្ឌស្ដង់ដានិងការច្នៃប្រឌិតក្នុងវិស័យអវកាស (CSSI / Center for Space Standards & Innovation)។

យោងតាម Oltrogge បច្ចុប្បន្ន មានវត្ថុធំជាង 1 សម ចំនួនជាង 760,000 ដុំ កំពុងស្ថិតនៅក្នុងគន្លងគោចររបស់ផែនដី។ តួលេខនេះនឹងចេះតែកើនឡើងជាបន្តបន្ទាប់ ដោយសារតែក្រុមហ៊ុននានាបន្តបាញ់បង្ហោះផ្កាយរណប និងបណ្ដុំផ្កាយរណប។ ក្រុមហ៊ុន SpaceX របស់លោក Elon Musk បានបាញ់បង្ហោះផ្កាយរណបអ៊ីនធើណិតល្បឿនលឿន Starlink ចំនួនជិត 900 គ្រឿងទៅកាន់គន្លងគោចរ និងកំពុងមានគម្រោងបាញ់បង្ហោះផ្កាយរណបថ្មីសរុបចំនួន ចាប់ពី 12,000 ទៅ 14,000 គ្រឿងទៀតនាពេលខាងមុខ៕

ប្រភព៖ Business Insider

December 30, 2020

កងទ័ពអាមេរិកទទួលបានក្បាលគ្រាប់នុយក្លេអែរដែលធ្លាប់ត្រូវបាន Biden ជំទាស់

កងទ័ពជើងទឹកសហរដ្ឋអាមេរិក ទទួលបានក្បាលគ្រាប់នុយក្លេអែរដែលមានកម្លាំងបំផ្លាញកម្រិតទាប W76-2 ដែលជាប្រភេទអាវុធធ្លាប់ត្រូវបានលោក Joe Biden រិះគន់ថាជា «គំនិតអាក្រក់»។

នាយកដ្ឋានសន្តិសុខនុយក្លេអែរជាតិអាមេរិកាំង (NNSA) ដែលជាស្ថាប័នគ្រប់គ្រងឃ្លាំងអាវុធនុយក្លេអែររបស់សហរដ្ឋអាមេរិក កាលពីថ្ងៃទី 28 ខែធ្នូកន្លងទៅ បានឱ្យដឹងថា ខ្លួនបានប្រគល់ក្បាលគ្រាប់នុយក្លេអែរ W76-2 ទាំងអស់ទៅឱ្យកងទ័ពជើងទឹកសហរដ្ឋអាមេរិករួចហើយ ដើម្បីបំពាក់ទៅលើកាំជ្រួចផ្លោងរបស់នាវាមុជទឹក Trident D5។ ក៏ប៉ុន្តែ NNSA មិនបានបង្ហើបឱ្យដឹងអំពីចំនួនក្បាលគ្រាប់ដែលត្រូវបានផលិត និងបំពាក់លើកាំជ្រួច Trident D5 នេះទេ។

ការប្រគល់ក្បាលគ្រាប់នុយក្លេអែរ W76-2 ខាងលើនេះ ត្រូវបានធ្វើឡើងចំពេលដែលលោក Trump នៅមានឱកាសតែប៉ុន្មានសប្ដាហ៍ទៀតប៉ុណ្ណោះក្នុងការដឹកនាំប្រទេស។ លោក Biden ធ្លាប់បានជំទាស់ទៅនឹងការអនុម័តលើការផលិត និងពង្រាយប្រភេទក្បាលគ្រាប់នុយក្លេអែរនេះ ខណៈដែលរដ្ឋាភិបាលរបស់លោក Trump បែរជាគាទ្រ និងជំរុញឱ្យអនុវត្តគំនិតនេះ។

W76-2 ត្រូវបានអភិវឌ្ឍនិងផលិតទៅតាមសំណើនៃរដ្ឋាភិបាលរបស់លោក Trump ក្រោយពីរបាយការណ៍របស់ NPR (អង្គភាពវាយតម្លៃស្ថានភាពអាវុធនុយក្លេអែរអាមេរិក) កាលពីឆ្នាំ 2018 បានបង្ហាញថា សហរដ្ឋអាមេរិកមិនត្រឹមតែមានបំណងធ្វើទំនើបកម្មលើអាវុធនុយក្លេអែររបស់ខ្លួនដែលកំពុងហួសសម័យប៉ុណ្ណោះទេ តែថែមទាំងស្រាវជ្រាវផលិតអាវុធថ្មីៗ ដើម្បីទប់ទល់នឹងរុស្ស៊ី ចិន និងប្រទេសជាសត្រូវជាច្រើនផ្សេងទៀត។

ឧបករណ៍ផ្ទុកក្បាលគ្រាប់នុយក្លេអែរ W76-1 ក្រោយពីត្រូវបានពិនិត្យរួចរាល់

របាយការណ៍បានអះអាងថា ទីក្រុងវ៉ាស៊ីងតោន អាចប្រើប្រាស់អាវុធនុយក្លេអែរកម្លាំងបំផ្លាញកម្រិតទាបដើម្បីឆ្លើយតបនឹងការវាយប្រហារដែលប្រើអាវុធយុទ្ធសាស្ត្រមិនមែននុយក្លេអែរ មានដូចជា ការវាយឆ្មក់សំដៅលើហេដ្ឋារចនាសម្ព័ន្ធ និងពលរដ្ឋអាមេរិកាំង ក៏ដូចជាប្រទេសសម្ព័ន្ធមិត្ត និងប្រទេសជាដៃគូយុទ្ធសាស្ត្រជាដើម។

ក្បាលគ្រាប់ W76-2 ត្រូវបានផលិតរួចរាល់ជាស្ថាពរលើកដំបូងកាលពីខែកុម្ភ ឆ្នាំ 2019។ នាវាមុជទឹក USS Tennessee របស់សហរដ្ឋអាមេរិក កាលពីដើមឆ្នាំនេះ ត្រូវបានគេដឹងថា បានចេញទៅល្បាតសមុទ្រជាមួយនឹងកាំជ្រួចផ្លោង Trident D5 ដែលមានបំពាក់ក្បាលគ្រាប់នុយក្លេអែរ W76-2។ រយៈពេលនៃការផលិត និងប្រគល់អាវុធនេះ ស៊ីពេលអស់ត្រឹមតែ 17 ខែប៉ុណ្ណោះ ខណៈដែលការផលិតផ្កាយគ្រាប់ម៉ូដែលមុនៗ ស៊ីពេលអស់ជាង 10 ឆ្នាំ ដែលប្រការនេះបង្ហាញថា W76-2 ទំនងជាត្រូវបានកែលម្អខ្លះៗពីក្បាលគ្រាប់ W76-1 ដែលមានស្រាប់។

W76-2 មានកម្លាំងបំផ្លាញប្រហាក់ប្រហែលនឹងរំសេវ TNT ចាប់ពី 5,000 ដល់ 7,000 តោន ដែលនេះគឺជាកម្លាំងកម្រិតទាបបើធៀបជាមួយនឹង 100,000 តោន របស់ម៉ូដែល W76-1 ឬ 455,000 តោន របស់ក្បាលគ្រាប់ W88 ដែលបំពាក់លើកាំជ្រួចផ្លោត Trident D5។ ក៏ប៉ុន្តែ W76-2 នឹងត្រូវបានបាញ់ទៅដល់គ្រប់ទីតាំងនៅលើពិភពលោកដោយប្រើពេលយ៉ាងខ្លី៕

ប្រភព៖ Drive

December 30, 2020

ថតបានទិដ្ឋភាពយ៉ាងច្បាស់និងស្រស់ស្អាតនៃកាឡាក់ស៊ីមួយដែលមានចម្ងាយ 65 លានឆ្នាំពន្លឺពីផែនដី

កែវយឹតអវកាស Hubble បានបញ្ជូនរូបថតថ្មីនិងស្រស់ស្អាតនៃកាឡាក់ស៊ីរាងគូទខ្យង ដែលអ្នកវិទ្យាសាស្ត្រដាក់ឈ្មោះឱ្យថា NGC 2217។

មានចម្ងាយប្រមាណ 65 លានឆ្នាំពន្លឺពីផែនដី និងស្ថិតនៅក្នុងកញ្ចុំផ្កាយ Canis Major កាឡាក់ស៊ី NGC 2217 ដែលមានរាងដូចគូទខ្យង់និងមានខ្សែធូលីកាត់ទទឹងមួយកំណាត់ដ៏ពិសេសនេះ គឺជាកាឡាក់ស៊ីមួយដែលមានទំហំប្រហាក់ប្រហែលនឹងកាឡាក់ស៊ី Milky Way របស់មនុស្ស ដោយមានអង្កត់ផ្ចិតប្រវែង 100,000 ឆ្នាំពន្លឺ។

នៅក្នុងរូបថតថ្មីដែលទើបត្រូវបានទីភ្នាក់ងារអវកាសអាមេរិក (NASA) និងទីភ្នាក់ងារអវកាសអឺរ៉ុប (ESA) យើងឃើញថាមានគន្លងពណ៌ប្រផេះដ៏វែងមួយកំណាត់នៅតំបន់កណ្ដាល និងព័ទ្ធជុំវិញដោយរង្វង់មូលរាងពងក្រពើ ជាកន្លែងប្រមូលផ្ដុំនៃផ្កាយយ៉ាងច្រើនសន្ធឹក ដែលមានតួនាទីសំខាន់នៅក្នុងវិវត្តន៍របស់កាឡាក់ស៊ី។

«កំណាត់ខ្សែទទឹងរបស់ NGC 2217 កំពុងនាំយកឧស្ម័ន និងធូលីពីថាសជុំវិញ ចូលទៅក្នុងចំណុចកណ្ដាលរបស់កាឡាក់ស៊ី ដើម្បីបង្កបង្កើតផ្កាយថ្មី និងចិញ្ចឹមប្រហោងខ្មៅខ្នាតយក្ស។ កាឡាក់ស៊ីធំៗស្ទើរតែទាំងអស់ សុទ្ធតែមានប្រហោងខ្មៅយក្សនៅចំកណ្ដាល និងមានម៉ាសធ្ងន់ជាងព្រះអាទិត្យចាប់ពីរាប់រយ រហូតដល់ជាង 1 ពាន់លានដងឯណោះ»។

ទិដ្ឋភាពខាងលើ ត្រូវបានថតដោយកាមេរ៉ាសង្កេតកម្រិតខ្ពស់ (ACS) របស់តេឡេស្កុបអវកាស Hubble និងត្រូវបានបន្ថែមពណ៌ដោយយោងទៅតាមទិន្នន័យពីកែវយឹតសង្កេតទិដ្ឋភាពទូលាយ & ប្រព័ន្ធប្រតិកម្មរហ័ស (PanSTARRS)៕

ប្រភព៖ SciTech Daily

December 30, 2020

Category: អន្តរជាតិ