អន្តរជាតិ - La Reine Media

កម្ពុជារកឃើញអ្នកវិជ្ជមាននឹង Covid-19 ចំនួន 3នាក់ទៀត ខណៈតួលេខអ្នកវិជ្ជមានសរុបទូទាំងពិភពលោក កើនដល់ជាង 98លាននាក់

ក្រសួងសុខាភិបាលកម្ពុជាបានប្រកាសថា នៅក្នុងរយៈពេល 24 ម៉ោងកន្លង មានអ្នកឆ្លងវីរុស Covid-19 ចំនួន 3 នាក់ត្រូវបានរកឃើញ ហើយអ្នកជំងឺទាំងនេះគឺសុទ្ធតែជាករណីនេះចូលដែលមិនមែនជាពលករត្រលប់ពីប្រទេសថៃ។

សម្រាប់ព័ត៌មានបន្ថែមទាក់ទងនឹងករណីរកឃើញថ្មីនេះ សូមបន្តអានរបាយការណ៍ខាងក្រោមរបស់ក្រសួងសុខាភិបាលកម្ពុជា។

គិតត្រឹមព្រឹកថ្ងៃទី 22 ខែមករា ឆ្នាំ 2021 នេះ កម្ពុជាបានរកឃើញអ្នកឆ្លងវីរុស Covid-19 សរុបចំនួន 456 នាក់ ក្នុងនោះមានអ្នកជាសះស្បើយចំនួន 399 នាក់ និងអ្នកកំពុងព្យាបាលមានចំនួន 59 នាក់។

នៅទូទាំងពិភពលោក ករណីវិជ្ជមាននឹង Covid-19 សរុប បានកើនដល់ 98,050,016 នាក់ ក្នុងនោះមានអ្នកស្លាប់សរុបចំនួន 2,098,160 នាក់ និងអ្នកជាសះស្បើយចំនួន 70,446,519 នាក់។ ក្នុងចំណោមអ្នកជំងឺដែលកំពុងព្យាបាលចំនួន 25,505,337 នាក់គឺមាន 111,298 នាក់កំពុងមានអាការធ្ងន់ធ្ងរ អាចប្រឈមនឹងការស្លាប់គ្រប់ពេល៕

January 22, 2021

ឆេះរោងចក្រផលិតវ៉ាក់សាំងធំជាងគេក្នុងពិភពលោក! មនុស្ស 5នាក់បាត់បង់ជីវិត

អណ្ដាតភ្លើងបានឆាបឆេះនៅក្នុងវិទ្យាស្ថានស្រាវជ្រាវមួយក្នុងរដ្ឋ Maharashtra ជាកន្លែងដែលកំពុងផលិតវ៉ាក់សាំង Covid-19 រាប់លានដូស បណ្ដាលឱ្យមនុស្ស 5 នាក់បានស្លាប់។

រូបភាពនៅលើកញ្ចក់ទូរទស្សន៍បង្ហាញថា ផ្សែងខ្មួលខ្មាញ់បាញ់ចេញពីអគារមួយនៃវិទ្យាស្ថាន Serum ផលិតវ៉ាក់សាំង នៅទីក្រុង Pune រដ្ឋ Maharashtra ភាគខាងលិចប្រទេសឥណ្ឌាកាលពីល្ងាចថ្ងៃទី 21 មករា។ អណ្ដាតភ្លើងបានឆាបឆេះនៅក្នុងទីតាំងដែលកំពុងសាងសង់លើផ្ទៃដីទំហំ 40 ហិកតា។

សេចក្ដីរាយការណ៍បានឱ្យដឹងថា តំបន់ដែលរងអគ្គិភ័យនេះ មានចម្ងាយពីទីតាំងផលិតវ៉ាក់សាំង Covid-19 ត្រឹមតែប៉ុន្មាននាទីប៉ុណ្ណោះ បើធ្វើដំណើរតាមរថយន្ត។ មានអគារចំនួន 9 ដែលកំពុងត្រូវបានសាងសង់នៅក្នុងតំបន់ដែលមានអគ្គិភ័យ ដើម្បីបង្កើនផលិតភាពក្នុងការផលិតវ៉ាក់សាំង។

Murlidhar Mohol អភិបាលក្រុង Pune បានឱ្យដឹងថា «មនុស្ស 5 នាក់់បានបាត់បង់ជីវិត។ សាកសពរបស់ជនរងគ្រោះត្រូវបានរកឃើញបន្ទាប់ពីអគ្គិភ័យត្រូវបានគ្រប់គ្រង។

បច្ចុប្បន្ន គេមិនទាន់រកឃើញមូលហេតុដែលនាំឱ្យមានគ្រោះអគ្គិភ័យខាងលើនេះនៅឡើយ។

វិទ្យាស្ថាន Serum ឥណ្ឌា (SII) ជាទីតាំងផលិតវ៉ាក់សាំងធំជាងគេបង្អស់ក្នុងពិភពលោក កំពុងផលិតវ៉ាក់សាំង Covishield ប្រឆាំង Covid-19 រាប់លានដូស ដែលត្រូវបានអភិវឌ្ឍដោយក្រុមហ៊ុន AstraZeneca និងសាកលវិទ្យាល័យ Oxford។ ភាគីក្រុមហ៊ុនបានអះអាងថា អគ្គិភ័យនេះមិនប៉ះពាល់ដល់ដំណើរការនៃការផលិតវ៉ាក់សាំងនោះទេ។

វិទ្យាស្ថាន Serum របស់ឥណ្ឌា ត្រូវបានបង្កើតឡើងកាលពីឆ្នាំ 1966 ដោយលោក Cyrus Poonawalla។ វិទ្យាស្ថាននេះផលិតវ៉ាក់សាំងចំនួន 1.5 ពាន់លានដូសជារៀងរាល់ឆ្នាំ រួមមានវ៉ាក់សាំងប្រឆាំងជំងឺស្វិតដៃជើង រលាកថ្លើមប្រភេទ B ជំងឺកញ្ជ្រិល។ល។ វ៉ាក់សាំងរបស់ SII ត្រូវបាននាំចេញទៅកាន់ប្រទេសជាង 170 នៅទូទាំងពិភពលោក។

វិទ្យាស្ថានខាងលើក៏មានគម្រោងផ្គត់ផ្គង់វ៉ាក់សាំង Covid-19 ដែលស្ថិតក្នុងកម្មវិធី Covax ដឹកនាំដោយអង្គការសុខភាពពិភពលោក (WHO) ដើម្បីប្រមូលទិញ និងចែកចាយវ៉ាក់សាំង Covid-19 ទៅឱ្យបណ្ដាប្រទេសក្រីក្រផងដែរ៕

ប្រភព៖ AFP

January 22, 2021

ខាងក្នុងបន្ទប់ការិយាល័យពងក្រពើរបស់ប្រធានាធិបតីអាមេរិក Joe Biden មានអ្វីខ្លះ?

សារព័ត៌មាន Washington Post បានចេញផ្សាយថា ការិយាល័យរាងពងក្រពើគឺជានិមិត្តរូបនៃអំណាចរបស់ប្រធានាធិបតីអាមេរិក។ នៅពេលក្លាយជាម្ចាស់សេតវិមាន ប្រធានាធិបតីនីមួយៗ តែងតែស្នើឱ្យមានការតុបតែងការិយាល័យនេះទៅតាមចំណូលចិត្តរបស់ខ្លួនដើម្បីបង្ហាញអំពីភាពដោយឡែក និងរបៀបនៃការដឹកនាំ។

សម្រាប់លោក Joe Biden វិញ លោកបានស្នើឱ្យដាក់តាំងរូបភាព និងរូបចម្លាក់នានារបស់បុគ្គលល្បីឈ្មោះជាច្រើនរូបរបស់សហរដ្ឋអាមេរិក នៅក្នុងការិយាល័យពងក្រពើ (Oval Office) នេះ។

កម្រាលព្រំថ្មីនៅក្នុងបន្ទប់ការិយាល័យរបស់ប្រធានាធិបតី Joe Biden

អ្វីដែលជាចំណុចគួរឱ្យចាប់អារម្មណ៍ជាងគេនៅក្នុងការិយាល័យនេះ នោះគឺរូបភាពទំហំធំរបស់ប្រធានាធិបតីទី 32 ឈ្មោះ Franklin Delano Roosevelt ដែលត្រូវបានដាក់តាំងនៅក្បែរតុ Resolute របស់ប្រធានាធិបតី។ Franklin Delano Roosevelt គឺជាប្រធានាធិបតីដែលបានជួយឱ្យសហរដ្ឋអាមេរក ឆ្លងផុតពីវិបត្តិដ៏ធំ ដែលដូចទៅនឹងឧបសគ្គដែលលោក Biden កំពុងជួបប្រទះ។

រូបថតមួយចំនួនត្រូវបានព្យួរជាគូ ដូចជា រូបថតរបស់ប្រធានាធិបតីទី 3 Thomas Jefferson និងរូបអតីតរដ្ឋមន្ត្រីហិរញ្ញវត្ថុ Alexander Hamilton ជាដើម ដែលជាបុគ្គលមិនសូវចុះសម្រុងនឹងគ្នា ដែលនេះបង្ហាញអំពីផលប្រយោជន៍ដែលបានមកពីការយល់ឃើញផ្ទុយគ្នា។ ការិយាល័យរបស់ប្រធានាធិបតី Biden ឱ្យដឹងថា ការដែលរូបថតត្រូវបានដាក់តាំងជាគូបែបនេះគឺដើម្បីបញ្ជាក់ និងសង្កត់ធ្ងន់ថា ភាពខុសគ្នានៅក្នុងការយល់ឃើញគឺជាប្រការដ៏ចាំបាច់នៃលទ្ធិប្រជាធិបតេយ្យ។

រូបរបស់បុគ្គលល្បីៗដែលត្រូវបានដាក់តាំងជាគូ

ក្រៅពីរូបថតនានា ការិយាល័យពងក្រពើនេះក៏មានតាំងរូបចម្លាក់ពាក់កណ្ដាល់ខ្លួនជាច្រើនផងដែរ ក្នុងនោះក៏មានរូបចម្លាក់របស់ Martin Luther King និង Robert F. Kennedy ដែលត្រូវបានដាក់នៅក្បែរម៉ាស៊ីនកម្ដៅ។ លោក Biden តែងតែរំលឹកដល់បុគ្គលទាំងពីររូបនេះ នៅពេលលោកនិយាយដល់សិទ្ធិពលរដ្ឋ។

រូបភាពរបស់ Benjamin Franklin នៅក្នុងការិយាល័យនេះបង្ហាញអំពីការយកចិត្តទុកដាក់របស់លោក Biden នៅក្នុងការដើរតាមមាគ៌ាវិទ្យាសាស្ត្រ។ រូបភាពនេះត្រូវបានដាក់តាំងនៅក្បែរដុំថ្មរបស់ឋានព្រះចន្ទដែលស្ថិតនៅលើធ្នើរសៀវភៅ ក្នុងបំណងរំលឹកដល់ប្រជាជនអាមេរិកាំងអំពីមហិច្ឆតា និងសមិទ្ធផលរបស់មនុស្សជំនាន់មុន។

រូបចម្លាក់របស់សកម្មជនសិទ្ធិពលរដ្ឋ Cesar Chavez និងរូបថតឯកជនរបស់លោក Biden

គ្រឿងសង្ហារិមក្នុងការិយាល័យប្រធានាធិបតី ត្រូវបានប្ដូរនៅក្នុងថ្ងៃចូលកាន់តំណែងដំបូងរបស់លោក Biden។ ទង់ជ័យរបស់កងទ័ពអាមេរិកដែលលោក Trump ដាក់តាំងនៅខាងក្រោយតុប្រធានាធិបតី ត្រូវបានដកចេញ និងជំនួសដោយទង់ជាតិអាមេរិក និងទង់ដែលមានរូបត្រាប្រធានាធិបតី។

រូបភាពរបស់ប្រធានាធិបតី Andrew Jackson ដែលលោក Trump បានតាំង ក៏ត្រូវបានយកចេញ។ លោក Trump និងលោក Jackson សុទ្ធតែជាអ្នកដើរតាមមាគ៌ាប្រជានិយម។ លោក Andrew Jackson គឺជាប្រធានាធិបតីដំបូងគេដែលត្រូវបានបោះឆ្នោតផ្ទាល់ ហើយលោកក៏ជាអ្នកដែលបានស្នើឱ្យលុបបំបាត់របបប្រតិភូតំណាងម្ចាស់ឆ្នោត (ប្រតិភូតំណាងម្ចាស់ឆ្នោតគឺជាក្រុមតំណាងរាស្ត្រដែលបោះឆ្នោតជ្រើសរើសប្រធានាធិបតីដោយផ្ទាល់ បន្ទាប់ពីការបោះឆ្នោតពីពលរដ្ឋទូទៅ) ផងដែរ។

ក្នុងការិយាល័យពងក្រពើនេះ មានវត្ថុមួយដែលមិនត្រូវបានប្ដូរផ្លាស់ នោះគឺតុ Resolute របស់ប្រធានាធិបតី។ តុនេះសុទ្ធតែត្រូវបានប្រធានាធិបតីមុនៗប្រើប្រាស់ រួមទាំងលោក Trump ផងដែរ។

នៅលើតុនេះ ក្នុងថ្ងៃចូលធ្វើការដំបូង លោក Biden បានចុះហត្ថលេខាលើបទបញ្ជាចំនួន 15 ដើម្បីដោះស្រាយបញ្ហាបន្ទាន់មួយចំនួន ដូចជា បញ្ហា Covid-19 បញ្ហាប្រែប្រួលអាកាសធាតុ និងបញ្ហារើសអើងពូជសាសន៍ រួមនឹងការលុបចោលគោលនយោបាយមួយចំនួនដែលត្រូវបានអតីតប្រធានាធិបតី Donald Trump ដាក់ចេញ៕

ប្រភព៖ Washington Post

January 21, 2021

ធ្លាក់យន្តហោះនៅអាមេរិក ចំថ្ងៃលោក Biden ស្បថឡើងកាន់តំណែង! ទាហាន 3នាក់បាត់បង់ជីវិត

នៅយប់ថ្ងៃទី 20 ខែមករា (នៅអាមេរិក) ឧទ្ធម្ភាគចក្រមួយគ្រឿងរបស់កងកម្លាំងឆ្មាំការពារជាតិសហរដ្ឋអាមេរិក បានធ្លាក់នៅពេលកំពុងបំពេញបេសកកម្មហ្វឹកហាត់តាមធម្មតារបស់ខ្លួននៅជាយក្រុង New York បណ្ដាលឱ្យទាហានចំនួន 3 នាក់បានស្លាប់។

CNN បានដឹកស្រង់ប្រភពព័ត៌មានពីការិយាល័យយោធា និងកងទ័ពជើងទឹកនៃរដ្ឋ New York ឱ្យដឹងថា ករណីគ្រោះធ្លាក់ឧទ្ធម្ភាគចក្រនេះកើតឡើងនៅក្នុងទីរួមស្រុក Mendon ដែលមានចម្ងាយប្រហែល 27 គីឡូម៉ែត្រទៅទិសខាងត្បូងនៃទីក្រុង Rochester។

យោងតាមអធិការដ្ឋាននគរបាលនៃតំបន់ Monroe ឧទ្ធម្ភាគចក្រដែលជួបគ្រោះថ្នាក់នេះគឺជាប្រភេទ UH-60 ប្រើប្រាស់សម្រាប់ជម្លៀសផ្នែកសុខាភិបាល។ UH-60 បានធ្លាក់ទៅលើវាលស្រែស្ងាត់មួយនៅវេលាម៉ោង 6 និង 32 នាទីល្ងាច ថ្ងៃទី 20 មករា។

ព័ត៌មានដែលទទួលបានពីការហៅទូរស័ព្ទមកកាន់លេខ 911 បានឱ្យដឹងថា មុនពេលធ្លាក់ ឧទ្ធម្ភាគចក្រនេះបានហោះក្នុងកម្ពស់ទាប និងមានរបាយការណ៍អំពីបញ្ហាម៉ាស៊ីនផងដែរ នេះបើតាមការឱ្យដឹងពីអាជ្ញាធរ នៅក្នុងសន្និសីទសារព័ត៌មានមួយកាលពីព្រលប់ថ្ងៃទី 20 ខែមករា។

អធិការដ្ឋាននគរបាលខាងលើក៏បានឱ្យដឹងថា ក្រុមពន្លត់អគ្គិភ័យ ប៉ូលិសថ្នាក់រដ្ឋ និងតំណាងកងទ័ព ត្រូវបានបញ្ជូនទៅកាន់កន្លែងកើតហេតុ។ ឧទ្ធម្ភាគចក្រនេះកំពុងឆាបឆេះយ៉ាងសន្ធោសន្ធៅនៅពេលក្រុមអ្នកជួយសង្គ្រោះដំបូងបានទៅដល់។

បច្ចុប្បន្ន ផ្លូវដែលនៅក្បែរកន្លែងកើតហេតុ ត្រូវបានបិទការចេញចូលជាបណ្ដោះអាសន្ន ដើម្បីទុកឱ្យសមត្ថកិច្ចធ្វើការ។

Andrew Cuomo អភិបាលរដ្ឋ New York បានប្រកាសថា៖ «ក្រុមឆ្មាំការពារជាតិគឺជាក្រុមទាហានរបស់ប្រជាជន ជាក្រុមមនុស្សដែលស្ម័គ្រចិត្តបម្រើ និងការពារប្រទេសជាតិ។ ខ្ញុំជំនួសមុខឱ្យប្រជាជន New York សូមផ្ញើសេចក្ដីបួងសួង និងរំលែកទុក្ខដល់ក្រុមគ្រួសារសព អ្នកជាទីស្រលាញ់ និងមិត្តរួមក្រុមរបស់អ្នកក្លាហានដ៏គួរឱ្យគោរពទាំងនេះ ពួកគេគឺជាមនុស្សដែលយើងនឹងមិនបំភ្លេចចោលឡើយ»។

អភិបាលរដ្ឋខាងលើក៏បានបញ្ជាឱ្យបង្ហូតទង់ជាតិពាក់កណ្ដាលដងនៅលើអគារទាំងអស់របស់រដ្ឋ New York នៅថ្ងៃទី 21 ខែមករានេះ ដើម្បីគោរព និងផ្ដល់កិត្តិយសដល់ទាហានរងគ្រោះទាំងនេះ។

ការិយាល័យយោធា និងកងទ័ពជើងទឹករបស់រដ្ឋ New York បានបញ្ជាក់ថា ការណីគ្រោះថ្នាក់នេះកំពុងត្រូវបានស៊ើបអង្កេតយ៉ាងយកចិត្តទុកដាក់៕

ប្រភព៖ CNN

January 21, 2021

ប្រធានាធិបតីអាមេរិក Joe Biden នឹងទូរស័ព្ទទៅកាន់មេដឹកនាំប្រទេសមួយណាដំបូងគេបង្អស់?

នាយករដ្ឋមន្ត្រីកាណាដា លោក Justin Trudeau នឹងក្លាយជាមេដឹកនាំបរទេសដំបូងគេដែលទទួលបានការហៅទូរស័ព្ទពីលោក Joe Biden នៅក្នុងនាមជាប្រធានាធិបតីទី 46 របស់សហរដ្ឋអាមេរិក។

ទូរទស្សន៍ CNN ដកស្រង់សម្ដីរបស់ជំនួយការផ្នែកសារព័ត៌មាន Jen Psaki កាលពីព្រលប់ថ្ងៃទី 20 មករា (ម៉ោងនៅអាមេរិក) បានឱ្យដឹងថា ប្រធានាធិបតីអាមេរិក Joe Biden មានគម្រោងទូរស័ព្ទទៅកាន់មេដឹកនាំនានានៃបណ្ដាប្រទេសជាសម្ព័ន្ធមិត្តរបស់សហរដ្ឋអាមេរិក នៅថ្ងៃទី 22 មករាខាងមុខ ក្នុងនោះ នាយករដ្ឋមន្ត្រីកាណាដាមានអាទិភាពមុនគេ។

លេខាផ្នែកសារព័ត៌មាននៃសេតវិមានខាងលើ បានបង្ហើបឱ្យដឹងថា ខ្លឹមសារនៃការហៅទូរស័ព្ទទៅកាន់មេដឹកនាំកាណាដានេះ នឹងផ្ដោតសំខាន់លើទំនាក់ទំនងរវាងប្រទេសទាំងពីរ ក៏ដូចជាបទបញ្ជាដែលលោក Biden បានចុះហត្ថលេខាបញ្ចប់ការផ្ដល់សិទ្ធិទៅលើផ្លូវនៃបណ្ដាញបំពង់បង្ហូរប្រេង Keystone XL។

មុននេះ នាយករដ្ឋមន្ត្រីកាណាដា Trudeau បានឱ្យដឹងថា លោកមានការខកចិត្តចំពោះបទបញ្ជាថ្មីរបស់លោក Biden ទាក់ទងនឹងផ្លូវសម្រាប់បំពង់បង្ហូរប្រេងដែលមានតម្លៃ 9 ពាន់លានដុល្លារ។ «ក្នុងគ្រាដែលយើងអបអរចំពោះការដែលប្រធានាធិបតី Biden សន្យាថានឹងត្រលប់មកធ្វើសង្គ្រាមប្រឆាំងនឹងបម្រែបម្រួលអាកាសធាតុ យើងក៏មានការខកចិត្ត នៅពេលបានដឹងថា លោកបានធ្វើទៅតាមការសន្យាកាលពីពេលឃោសនាបោះឆ្នោត អំពីផ្លូវបំពង់បង្ហូរប្រេង Keystone XL» នាយករដ្ឋមន្ត្រីកាណាដា ថ្លែងដូច្នេះ។

នាយករដ្ឋមន្ត្រីកាណាដា មានការខកចិត្តនឹងលោក Biden ទាក់ទងនឹងបញ្ហាផ្លូវសម្រាប់បំពង់បង្ហូរប្រេង

ត្រូវបានចាប់ផ្ដើមសាងសង់កាលពីឆ្នាំ 2018 Keystone XL គឺជាប្រព័ន្ធផ្លូវនៃបំពង់បង្ហូរប្រេងឆៅពីបណ្ដាអណ្ដូងរ៉ែប្រេងនានានៅក្នុងខេត្ត Alberta (កាណាដា) ទៅកាន់រោងចក្រចម្រាញ់ប្រេងនានានៅក្នុងរដ្ឋតូចៗជាច្រើននៅសហរដ្ឋអាមេរិក។ គម្រោងនេះធ្លាប់ជាបញ្ហាចម្រូងចម្រាសនៅក្នុងអាណត្តិប្រធានាធិបតីអាមេរិកជាច្រើនជំនាន់ ព្រមទាំងត្រូវបានជំទាស់ដោយក្រុមអ្នកការពារបរិស្ថានផងដែរ។

នៅក្នុងសន្និសីទកាលពីព្រលប់ថ្ងៃទី 20 មករា លេខាផ្នែកសារព័ត៌មាន Psaki បានឱ្យដឹងដែរថា ប្រធានាធិបតី Biden មិនទាន់មានគម្រោងទូរស័ព្ទទៅកាន់អតីតប្រធានាធិបតី Donald Trump ក៏ដូចជាប្រធានាធិបតីរុស្ស៊ី លោក Vladimir Putin នៅឡើយ៕

ប្រភព៖ CNN, Thestar

January 21, 2021

ប្រធានាធិបតីទី 46 របស់អាមេរិក Joe Biden ស្បថចូលកាន់តំណែងជាផ្លូវការ

នៅវេលាថ្ងៃត្រង់ ទី 20 មករា (កណ្ដាលយប់នៅកម្ពុជា) លោក Joe Biden បានក្លាយជាប្រធានាធិបតីអាមេរិកទី 46 ជាផ្លូវការ បន្ទាប់ពីបានស្បថចូលកាន់តំណែង ខណៈលោកស្រី Kamala Harris ក៏ក្លាយជាស្ត្រីអនុប្រធានាធិបតីដំបូងគេរបស់សហរដ្ឋអាមេរិក។

នៅវេលាម៉ោង 11 និង 40 នាទី ថ្ងៃទី 20 មករា នៅភ្នំ Capitol ជាកន្លែងដែលមានវិមានសភាអាមេរិក លោកស្រី Kamala Harris បានចាប់ផ្ដើមការឡើងស្បថចូលកាន់តំណែងជាអនុប្រធានាធិបតី នៅចំពោះមុខការចាត់ចែងរបស់ចៅក្រមតុលាការកំពូល Sonia Sotomayor។ លោកស្រី Harris បានក្លាយជាស្ត្រីអនុប្រធានាធិបតីដំបូងគេរបស់សហរដ្ឋអាមេរិក និងជាជនជាតិអាស៊ីដំបូងដែលបានកាន់កាប់តំណែងនេះ។

បន្ទាប់ពីលោកស្រី Harris បានបញ្ចប់ពិធីរបស់ខ្លួន លោក Joe Biden ក៏បានឡើងស្បថចូលកាន់តំណែង ក្រោមការដឹកនាំពិធីរបស់ប្រធានចៅក្រមតុលាការកំពូល John Roberts និងបានក្លាយជាប្រធានាធិបតីទី 46 របស់សហរដ្ឋអាមេរិកជាផ្លូវការ។

នៅក្នុងពិធីស្បថចូលកាន់តំណែង លោក Biden បានថ្លែងថា «ថ្ងៃនេះគឺជាថ្ងៃរបស់សហរដ្ឋអាមេរិក ជាថ្ងៃនៃប្រជាធិបតេយ្យ ថ្ងៃនៃប្រវត្តិសាស្ត្រនិងក្ដីសង្ឃឹម ថ្ងៃនៃការផ្លាស់ប្ដូរនិងការប្ដេជ្ញាចិត្ត។ សហរដ្ឋអាមេរិកបានប្រឈមមុខនឹងឧបសគ្គថ្មី និងបានក្រោកឈរដើម្បីតតាំងនឹងឧបសគ្គទាំងនោះ»។

លោក Biden សង្កត់ធ្ងន់ថា៖ «ថ្ងៃនេះ យើងអបអរជ័យជំនះ ប៉ុន្តែមិនមែនជាជ័យជំនះរបស់បេក្ខភាពម្នាក់ ប៉ុន្តែជាជ័យជំនះរបស់ខឿនប្រជាធិបតេយ្យទាំងមូល។

លោក Biden ក៏បានអំពាវនាវឱ្យមានការសាមគ្គី ស្ដារ និងផ្សះផ្សាជាតិ។ ទាក់ទងនឹងបញ្ហាអន្តរជាតិ ប្រធានាធិបតីថ្មី បានសន្យាថានឹងស្ដារឡើងវិញនូវ «ទំនាក់ទំនងជាមួយសម្ព័ន្ធមិត្ត និងចូលរួមធ្វើកិច្ចការពិភពលោកជាថ្មីម្ដងទៀត»។ ប្រធានាធិបតីថ្មីនេះក៏បានប្រកាសថានឹងកែប្រែគោលនយោបាយឯកោនិយមរបស់អតីតប្រធានាធិបតី Trump ផងដែរ។

ពិធីស្បថចូលកាន់តំណែងត្រូវបានធ្វើឡើងបន្ទាប់ពីការបោះឆ្នោតកាលពីជាងពីរខែមុន ពោលគឺនៅថ្ងៃទី 3 ខែវិច្ឆិកា ឆ្នាំ 2020 ក្នុងនោះ លោក Joe Biden ដណ្ដើមបានជ័យជំនះ ដោយទទួលបានសំឡេងឆ្នោតគាំទ្រចំនួន 306 សំឡេងពីតំណាងម្ចាស់ឆ្នោត ខណៈលោក Trump ទទួលបាន 232 សំឡេង។

ព្រឹត្តិការណ៍នេះ ត្រូវបានពលរដ្ឋទូទាំងសហរដ្ឋអាមេរិកទន្ទឹងរង់ចាំ ប៉ុន្តែទំហំនៃពិធីនេះត្រូវបានកាត់បន្ថយ ដោយសារតែឥទ្ធិពលរបស់ Covid-19។ ទន្ទឹមនឹងនេះ បញ្ហាសន្តិសុខក៏ត្រូវបានរឹតបន្តឹងជាពិសេស ដោយសារមានការព្រួយបារម្ភចំពោះសុវត្ថិភាពរបស់ក្រុមមន្ត្រី ក្រោយពីមានបាតុកម្មហិង្សានៅវិមានសភាជាតិកាលពីថ្ងៃទី 6 មករា ឆ្នាំ 2021៕

ប្រភព៖ Guardian

January 21, 2021

ទិដ្ឋភាពនៅរដ្ឋធានីរបស់អាមេរិក មុនម៉ោងលោក Joe Biden ឡើងទទួលតំណែងប្រធានាធិបតី

បេសកកម្មត្រៀមនានាត្រូវបានធ្វើឡើងរួចរាល់ សន្តិសុខត្រូវបានរឹតបន្តឹង ខណៈដែលនៅសល់តែប៉ុន្មានម៉ោងទៀតប៉ុណ្ណោះដែលពិធីស្បថចូលកាន់តំណែងប្រធានាធិបតីរបស់លោក Joe Biden នឹងត្រូវចាប់ផ្ដើម។

ផ្នែកខាងមុខនៃទិសខាងលិចរបស់ភ្នំ Capitol Hill ជាកន្លែងដែលពិធីស្បថចូលកាន់តំណែងរបស់ប្រធានាធិបតីអាមេរិកទី 46 Joe Biden នឹងត្រូវប្រារព្ធឡើង។ ទិដ្ឋភាពនេះគឺថតបានកាលពីយប់ថ្ងៃទី 19 មករា។ ឆាកសំខាន់ជាងគេដែលធ្វើអំពីឈើត្រូវបានដំឡើងរួចរាល់ក្នុងរយៈពេល 3 ម៉ោងសម្រាប់បម្រើដល់ព្រឹត្តិការណ៍មហាសំខាន់នេះ។

ពិធីស្បថចូលកាន់តំណែងនេះនឹងចាប់ផ្ដើមនៅវេលាម៉ោង 11 និង 30 នាទី (ម៉ោង 23 និង 30 នាទី នៅកម្ពុជា) ថ្ងៃទី 20 មករា។ អនុប្រធានាធិបតីជាប់ឆ្នោត Kamala Harris តាមគម្រោងនឹងជាអ្នកដែលត្រូវឡើងស្បថចូលកាន់តំណែងមុនគេ នៅចំពោះមុខចៅក្រមតុលាការកំពូល លោកស្រី Sonia Sotomayor។

បន្ទាប់មក ប្រធានាធិបតីជាប់ឆ្នោត Joe Biden នឹងត្រូវបានប្រធានចៅក្រមតុលាការកំពូលអាមេរិក ទទួលស្គាល់ការស្បថចូលកាន់តំណែងនៅវេលាម៉ោង 12 ថ្ងៃត្រង់។

ប្រធានសភាជាន់ទាប Nancy Pelosi (កណ្ដាល) រួមនឹងមេដឹកនាំសំឡេងភាគច្រើននៅសភាជាន់ខ្ពស់ Mitch McConnell កំពុងត្រួតពិនិត្យសកម្មភាពត្រៀមនៅក្នុងថ្ងៃចុងក្រោយ មុនពេលពិធីឡើងកាន់តំណែងចូលមកដល់។

នឹងមានឥស្សរជនប្រមាណ 1,000 នាក់ ចូលរួមពិធីខាងលើ ដែលភាគច្រើនគឺជាតំណាងរាស្ត្រ និងភ្ញៀវសំខាន់ៗរបស់រដ្ឋាភិបាលថ្មី។ នៅក្នុងពិធីស្បថចូលកាន់តំណែងកន្លងមក សំបុត្រអញ្ជើញសរុបចំនួន 200,000 សន្លឹក ត្រូវបានផ្ដល់ជូនដល់សមាជិកសភា ប៉ុន្តែឆ្នាំនេះ តំណាងរាស្ត្រម្នាក់ៗ ទទួលបានសំបុត្រអញ្ជើញតែមួយសន្លឹកគត់។

ព្រឹត្តិការណ៍នេះនឹងត្រូវបានគណៈកម្មធិការរៀបចំពិធីស្បថចូលកាន់តំណែងប្រធានាធិបតី ធ្វើការផ្សាយផ្ទាល់ ខណៈពលរដ្ឋអាមេរិកត្រូវបានស្នើឱ្យនៅផ្ទះ ដោយបារម្ភអំពីបញ្ហាសន្តិសុខ និងបញ្ហា Covid-19។

ក្រុមឆ្មាំការពារជាតិប្រមូលផ្ដុំគ្នានៅកន្លែងត្រូវរក្សាសន្តិសុខមួយ នៅជិតវិមានសភាជាតិ។ ឆ្មាំការពារជាតិចំនួន 25,000 នាក់ នឹងត្រូវបានដាក់ពង្រាយនៅក្នុងថ្ងៃទី 20 មករា ដើម្បីទប់ទល់នឹងការគំរាមកំហែងនានាផ្នែកសន្តិសុខ។

របងបន្លាលួស និងខ្សែបន្លាលួសត្រូវបានដំឡើងនៅជុំវិញ Capitol Hill ខណៈដែលកងកម្លាំងអនុវត្តច្បាប់ និងឆ្មាំការពារជាតិដើរល្បាត 24/7។

រថយន្តអគ្គិភ័យត្រូវបានប្រើប្រាស់ធ្វើជារបាំងការពារនៅតាមដងផ្លូវក្បែរទីតាំងប្រារព្ធពិធីខាងលើ។ តំបន់ជុំវិញ Capitol Hill និងទីប្រជុំជនធំៗនៅកណ្ដាលក្រុងវ៉ាស៊ីងតោន សុទ្ធតែត្រូវបានដាក់បម្រាមគោចរ ឬរឹតបន្តឹងការធ្វើចរាចរណ៍របស់យានយន្ត។

នៅក្នុងឧទ្យាន Lafayette ខាងក្រៅសេតវិមាន គេឃើញមានពាក្យស្លោកជាច្រើនដែលសរសេរអបអរពិធីឡើងកាន់តំណែងរបស់លោក Biden និងលោកស្រី Harris ត្រូវបានដាក់បង្ហាញជាជួរ និងជាច្រើនស្រទាប់។

នៅស្លាបខាងលិចនៃសេតវិមាន មានភាពស្ងប់ស្ងាត់ នៅពេលប្រធានាធិបតី Donald Trump ស្នាក់នៅយប់ចុងក្រោយនៅទីនេះ។ សេតវិមានមិនបានប្រកាសអំពីកាលបរិច្ឆេទថ្ងៃចុងក្រោយនៃអាណត្តិរបស់លោក Trump ដោយគ្រាន់តែឱ្យដឹងថា លោកនឹងចាកចេញនៅវេលាម៉ោង 8 ព្រឹក ទៅកាន់ Palm Beach រដ្ឋ Florida។

ព្រឹកថ្ងៃទី 20 មករា លោក Trump នឹងធ្វើដំណើរទៅកាន់មូលដ្ឋានទ័ពអាកាស Andrews ក្បែររដ្ឋធានីវ៉ាស៊ីងតោន ដោយប្រើប្រាស់ឧទ្ធម្ភាគចក្រ Marine One ដើម្បីចូលរួមពិធីជូនដំណើរលាគ្នាជាលើកចុងក្រោយរបស់កងទ័ព។

ក្រោយមក លោក Trump នឹងធ្វើដំណើរមកកាន់ក្លឹប Mar-a-Lago នៅក្នុងរដ្ឋ Florida ដែលពេលនោះ អាណត្តិកាលប្រធានាធិបតីរបស់លោកនឹងត្រូវបញ្ចប់នៅវេលាម៉ោង 12 និង 01 នាទី ជាពេលដែលលោក Biden ចូលកាន់តំណែង។

នៅខាងលើដំបូលនៃអគារសេតវិមាន ក្រុមបុគ្គលិកសេវាកម្មសម្ងាត់អាមេរិក ត្រូវបានដាក់ពង្រាយជាមួយនឹងសព្វាវុធទំនើបៗ ដើម្បីការពារសន្តិសុខ។ ក្រោយពីបានស្បថចូលកាន់តំណែង លោក Biden នឹងត្រូវបានក្រុមកិត្តិយសដែលតំណាងឱ្យកងទ័ពសហរដ្ឋអាមេរិកទាំងមូល អមដំណើរចាប់ពីវិថី 15 Washington ចូលទៅកាន់សេតវិមាន។

ក្រុមបាតុករប្រឆាំងលោក Trump ប្រមូលផ្ដុំគ្នានៅទីប្រជុំជន Black Lives Matter Plaza ខាងមុខសេតវិមាន នៅថ្ងៃចុងក្រោយរបស់ប្រធានាធិបតី Donald Trump។ ពួកគេកាន់បដាដែលមានសរសេរថា «Trump បានបរាជ័យ» ឬ «ជញ្ជាំងកំពុងរាំងខ្ទប់ Trump»។ល។

ទិដ្ឋភាពនៃឧទ្យានជាតិ National Mall នៅខាងមុខតំបន់ Capitol Hill

ទិដ្ឋភាពនៅស្ថានីយរថភ្លើង Union នាទីក្រុងវ៉ាស៊ីងតោន

អ្នកគាំទ្ររបស់លោក Biden ជិះស្គីតាមដងផ្លូវក្បែរសេតវិមាន

ប្រភព៖ AFP, Reuters

January 20, 2021

ការផ្ទេរវ៉ាលីគ្រាប់បែកនុយក្លេអែរពី Trump ទៅឱ្យ Biden ត្រូវធ្វើឡើងយ៉ាងដូចម្ដេច?

Trump និង Biden នឹងកាន់កាប់វ៉ាលីគ្រាប់បែកនុយក្លែចំនួនពីរផ្សេងគ្នា និងមានលេខកូដសម្រាប់ធ្វើសកម្មភាពដោយឡែក ក្នុងនោះ លេខកូដរបស់ប្រធានាធិបតីជាប់ឆ្នោត Joe Biden នឹងដំណើរការនៅវេលាម៉ោង 12 ថ្ងៃទី 20 មករា ស្របពេលដែលលេខកូដរបស់លោក Trump ត្រូវអស់សុពលភាព។

ការដែលប្រធានាធិបតីអាមេរិក Donald Trump មិនចូលរួមក្នុងពិធីស្បថចូលកាន់តំណែងរបស់លោក Joe Biden នឹងមិនប៉ះពាល់ដល់ពិធីនេះ ប៉ុន្តែនឹងធ្វើឱ្យមានការផ្លាស់ប្ដូរដ៏សំខាន់មួយនៅក្នុងកាលៈទេសៈនេះ នោះគឺដំណើរការនៃការផ្ទេរ «គ្រាប់បាល់នុយក្លេអែ/nuclear football» ជាពាក្យដែលត្រូវបានប្រើសំដៅលើវ៉ាលីដែលមានផ្ទុកលេខកូដសម្រាប់ការចេញបញ្ជាឱ្យវាយប្រហារដោយគ្រាប់បែកនុយក្លេអែរ ដែលតែងតែត្រូវបានយកទៅតាមប្រធានាធិបតីអាមេរិក។

យោងតាមគោលការណ៍ វ៉ាលីពណ៌ខ្មៅនេះនឹងត្រូវបានជំនួយការផ្នែកយោធាម្នាក់ យកតាមខ្លួនដើម្បីអមដំណើរប្រធានាធិបតីនៅគ្រប់ទីកន្លែង និងគ្រប់ពេលវេលា រហូតដល់ប្រធានាធិបតីត្រូវផុតអាណត្តិនៅម៉ោង 12 ថ្ងៃត្រង់នៃថ្ងៃទី 20 មករា (ម៉ោងនៅអាមេរិក)។ ប្រការនេះមានន័យថា ជំនួយការយោធារួមនឹងវ៉ាលីនុយក្លេអែរនឹងត្រូវឡើងយន្តហោះរបស់កងទ័ព នាំលោក Trump ចាកចេញពីរដ្ឋធានីវ៉ាស៊ីងតោន ទៅកាន់ Florida នៅព្រឹកថ្ងៃទី 20 មករា ខណៈដែលលោក Biden មិនទាន់ដល់ពេលឡើងកាន់អំណាច។

កន្លងមក នៅក្នុងពិធីស្បថចូលកាន់តំណែង អ្នកជំនួយការជាន់ខ្ពស់ផ្នែកយោធា នឹងនាំយកវ៉ាលីនុយក្លេអែរទៅតាមប្រធានាធិបតីជិតផុតអាណត្តិ ដើម្បីប្រគល់អំណាចនេះជូនប្រធានាធិបតីថ្មី នៅក្នុងអគារសភាជាតិនាទីក្រុងវ៉ាស៊ីងតោន។

ដំណើរការនៃផ្ទេរវ៉ាលីនុយក្លេអែរដែល «មិនមានចន្លោះប្រហោង» នេះគឺដើម្បីទប់ស្កាត់មិនឱ្យសត្រូវរបស់សហរដ្ឋអាមេរិក ឆ្លៀតយកឱកាសដ៏រសើបនេះ ធ្វើការវាយប្រហារដោយគ្រាប់បែកនុយក្លេអែរប្រឆាំងនឹងអាមេរិក។

ច្បាប់រដ្ឋធម្មនុញអាមេរិកបានប្រគល់សិទ្ធិទាំងស្រុងក្នុងការប្រើប្រាស់គ្រាប់បែកនុយក្លេអែរ ទៅឱ្យប្រធានាធិបតី ដែលនេះក៏ជាពេលដែលវ៉ាលីនុយក្លេអែរត្រូវបានចាប់កំណើតដើម្បីធានាឱ្យបានប្រាកដថា អគ្គបញ្ជាការដ្ឋាននៃកងទ័ពសហរដ្ឋអាមេរិកអាចអនុវត្តទៅតាមការបញ្ជារបស់ប្រធានាធិបតីបានគ្រប់ពេល និងគ្រប់កាលៈទេសៈ។

ការដែលលោក Trump មិនចូលរួមពិធីស្បថចូលកាន់តំណែងរបស់លោក Biden នឹងនាំឱ្យសិទ្ធិប្រើប្រាស់អាវុធនុយក្លេអែរត្រូវផ្ទេរពីចម្ងាយជាលើកដំបូងក្នុងប្រវត្តិសាស្ត្រ ដែលនេះក៏ត្រូវការកិច្ចសហការយ៉ាងម៉ត់ចត់របស់ប្រព័ន្ធយោធា ទាក់ទងនឹង «គ្រាប់បាល់នុយក្លេអែរ» ក៏ដូចជាប្រព័ន្ធបញ្ជាក់អំពីបទបញ្ជាប្រើប្រាស់គ្រាប់បែកនុយក្លេអែរ មានរហ័សនាមថា «នំខូឃីស» ដែលមាននៅក្នុងវ៉ាលីទាំងពីរ។

Scott Sagan ជាសាស្ត្រាចារ្យម្នាក់នៅសាកលវិទ្យាល័យ Stanford និង Stephen Schwartz អ្នកស្រាវជ្រាវប្រចាំសារព័ត៌មាន BAS នៅសហរដ្ឋអាមេរិក យល់ថា ការដែល Trump មិនចូលរួមពិធីស្បថចូលកាន់តំណែងរបស់លោក Biden នឹងធ្វើឱ្យបញ្ហាមិនចាំបាច់មួយចំនួនកើតឡើង ហើយថានឹងមានការលំបាកច្រើនធៀបនឹងឆ្នាំមុន។ ប៉ុន្តែ អ្នកវិភាគខាងលើបានបញ្ជាក់ថា កងទ័ពអាមេរិកនៅតែមានវិធានការបម្រុងដើម្បីធានាថា ដំណើរការនៃការប្រគល់អំណាចប្រព្រឹត្តិដោយរលូន និងសុវត្ថិភាពបើទោះជាមានបញ្ហាអ្វីកើតឡើងក៏ដោយ។

Schwartz បានឱ្យដឹងថា៖ «មានគ្រាប់បាល់នុយក្លេអែរដូចគ្នាយ៉ាងតិចចាប់ពី 3-4 គ្រាប់។ 1 គ្រាប់តែងតែធ្វើដំណើរតាមប្រធានាធិបតី 1 គ្រាប់ទៀតសម្រាប់អនុប្រធានាធិបតី ចំណែក 1 គ្រាប់ផ្សេងទៀតគឺសម្រាប់អ្នកដែលនៅរស់រានមានជីវិតនៅក្នុងព្រឹត្តិការណ៍ធំៗដូចជា ពិធីទទួលតំណែងប្រធានាធិបតី ឬអ្នកអានសាររបស់ជាតិ»។ អ្នកវិភាគរូបនេះបន្ថែមថា ស្ថានភាពឆ្នាំនេះអាចបង្ខំឱ្យការិយាល័យយោធារបស់សេតវិមាន ត្រូវត្រៀមវ៉ាលីនុយក្លេអែរបម្រុងមួយទៀតសម្រាប់លោក Biden។

នៅក្នុងវ៉ាលីនុយក្លេអែរនេះ មិនមានគ្រាប់ចុច ឬលេខកូដដើម្បីឱ្យប្រធានាធិបតីអាចបញ្ជាឱ្យធ្វើការវាយប្រហារដោយគ្រាប់បែកនុយក្លេអែរបានភ្លាមៗនោះទេ។ ក្នុងវ៉ាលីនេះមានទូរស័ព្ទមួយគ្រឿង កាត «នំខូឃីស» មួយបន្ទះដែលមានផ្ទុកលេខកូដសម្ងាត់ដែលអនុញ្ញាតឱ្យប្រធានាធិបតីចេញបញ្ជាឱ្យវាយប្រហារដោយអាវុធនុយក្លេអែរ និងបញ្ជីឈ្មោះគោលដៅដែលបានជ្រើសរើសពីមុនជាស្រេច។

Schwartz បញ្ជាក់ថា៖ «Trump នៅតែជាប្រធានាធិបតីអាមេរិករហូតដល់ម៉ោង 11 59នាទី និង 59 វិនាទី ថ្ងៃទី 20 ខែមករានេះ។ Trump ជាមនុស្សតែម្នាក់គត់ដែលមានសិទ្ធិចេញបញ្ជាឱ្យប្រើប្រាស់អាវុធនុយក្លេអែររបស់សហរដ្ឋអាមេរិក គិតត្រឹមអំឡុងពេលខាងលើ។ បើសិនជាជំនួយការផ្នែកយោធា នាំវ៉ាលីនុយក្លេអែរនេះអមដំណើរ Trump ទៅកាន់ Florida នោះជំនួយការរូបនេះនឹងត្រូវចាកចេញពី Trump នៅវេលាថ្ងៃត្រង់ និងនាំយកវ៉ាលីនោះមកកាន់វ៉ាស៊ីងតោន»។

នៅម៉ោង 12 ថ្ងៃទី 20 មករា Trump នឹងលែងមានសិទ្ធិក្នុងការធ្វើសង្គ្រាមនុយក្លេអែរ ហើយវ៉ាលីនុយក្លេអែរដែលអមដំណើរលោកក៏នឹងត្រូវអស់សុពលភាព។ ក្នុងករណី Trump ចេញបញ្ជាឱ្យវាយប្រហារដោយអាវុធនុយក្លេអែរនៅវេលាលើសពីម៉ោង 12 នោះបទបញ្ជានេះនឹងត្រូវបានចាត់ទុកថាខុសច្បាប់ ហើយក្រុមមន្ត្រីគ្រប់គ្រងអាវុធនុយក្លេអែរនឹងបដិសេធបទបញ្ជានេះ។

លោក Biden ទំនងជានឹងបានទទួល «នំខូឃីស» នៅព្រឹកថ្ងៃទី 20 មករា (ម៉ោងនៅអាមេរិក) ក្នុងគ្រាដែលលោក និងអនុប្រធានាធិបតីជាប់ឆ្នោត Kamala Harris មានកិច្ចប្រជុំសម្ងាត់មួយដើម្បីទទួលការណែនាំអំពីវិធីប្រើប្រាស់វ៉ាលីនុយក្លេអែរ។ ក៏ប៉ុន្តែ ប្រព័ន្ធលេខកូដសម្ងាត់របស់លោក Biden នឹងមិនទាន់មានសុពលភាពនៅឡើយ រហូតដល់ម៉ោង 12 និង 00 នាទី ក្នុងអំឡុងពេលដែលលេខកូដរបស់លោក Trump អស់សុពលភាព៕

ប្រភព៖ CNN

January 20, 2021

Biden យំនៅពេលថ្លែងសារលាស្រុកកំណើត មុននឹងមកទទួលតំណែងប្រធានាធិបតីអាមេរិកនៅរដ្ឋធានី

លោក Joe Biden យំនៅពេលកំពុងថ្លែងសារលាស្រុកកំណើតនៅក្នុងរដ្ឋ Delaware ខណៈនិយាយពាក្យអរគុណដល់ពលរដ្ឋក្នុងតំបន់ និងរំលឹកដល់កូនប្រុស Beau ដែលបានបាត់បង់ជីវិតកាលពីឆ្នាំ 2015។

«សូមអភ័យទោសចំពោះការរំជួលចិត្តនេះ ប៉ុន្តែនៅពេលខ្ញុំស្លាប់ Delaware នឹងត្រូវឆ្លាក់ជាប់ក្នុងបេះដូងរបស់ខ្ញុំ ក៏ដូចជាបេះដូងរបស់គ្រប់គ្នា។ យើងស្រលាញ់គ្រប់គ្នា។ គ្រប់គ្នាបាននៅទីនោះដើម្បីយើងខ្ញុំ បើទោះជាដោយរលូន ឬដោយឧបសគ្គ មិនដែលបែរខ្នងដាក់សោះឡើយ។ ខ្ញុំពិតជាមានមោទកភាពជាកូនម្នាក់របស់ Delaware» ប្រធានាធិបតីជាប់ឆ្នោតអាមេរិក Joe Biden ថ្លែងនៅក្នុងព្រឹត្តិការណ៍លាគ្នានៅក្នុងទីក្រុង Wilmington រដ្ឋ Delaware កាលពីថ្ងៃទី 19 មករា មុនពេលធ្វើដំណើរមកកាន់រដ្ឋធានីវ៉ាស៊ីងតោន។

«ខ្ញុំក៏កាន់តែមានមោទកភាពនៅពេលបានឈរនៅទីនេះ និងធ្វើដូច្នេះនៅទីកន្លែងដែលមានឈ្មោះ វរសេនីយត្រី Beau Biden។ ខ្ញុំមានការសោកស្ដាយតែម្យ៉ាងគត់នោះគឺ Beau មិននៅទីនេះ ព្រោះថា យើងគួរតែជ្រើសតាំងគាត់ឱ្យធ្វើជាប្រធានាធិបតី» លោក Joe Biden និយាយបណ្ដើរយំបណ្ដើរ ពេលរំលឹកដល់កូនប្រុសរបស់គាត់។ ទីកន្លែងដែលលោក Joe Biden ថ្លែងការណ៍គឺជាមជ្ឈមណ្ឌលកម្លាំងប្រដាប់អាវុធបម្រុងវរសេនីយត្រី Joesph R. (Beau) Biden III ដែលត្រូវបានដាក់ឈ្មោះទៅតាមកូនប្រុសម្នាក់របស់លោក Joe Biden ដែលធ្លាប់ធ្វើជាអគ្គរដ្ឋអាជ្ញានៃរដ្ឋ Delaware ដែលបានស្លាប់កាលពីឆ្នាំ 2015 ដោយសារមហារីកខួរក្បាល។

Biden ចាកចេញពីរដ្ឋ Delaware មកកាន់រដ្ឋធានីវ៉ាស៊ីងតោនជាមួយនឹងភរិយា Jill Biden។ ពួកគេនឹងសម្រាកនៅក្នុងអគារ Blair ដែលជាទីសម្រាប់ទទួលមេដឹកនាំបណ្ដាប្រទេស និងភ្ញៀវសំខាន់ៗ និងមានទីតាំងស្ថិតនៅទល់មុខសេតវិមាន៕

ប្រភព៖ NBC News

January 20, 2021

ប្រធានាធិបតី Donald Trump ផ្ញើសារលាសេតវិមាន

នៅក្នុងសារលាសេតវិមាន លោក Trump បានអំពាវនាវឱ្យពលរដ្ឋអាមេរិកាំង «ចាកចេញផុតពីការចងគំនុំរវាងបក្សនឹងបក្ស» រួមនឹងការកោតសរសើរចំពោះសមិទ្ធផលក្រោមការដឹកនាំរបស់លោក ក៏ដូចជាជូនពរដល់រដ្ឋាភិបាលថ្មីជួបសំណាងល្អ។

«បានបម្រើការងារក្នុងនាមជាប្រធានាធិបតីរបស់គ្រប់គ្នាគឺជាកិត្តិយសដែលមិនអាចអធិប្បាយបាន។ សូមអរគុណគ្រប់គ្នាចំពោះឧបការគុណដ៏ពិសេសនេះ» ប្រធានាធិបតី Donald Trump បានថ្លែងនៅក្នុងវីដេអូមួយមានថេរវេលាជិត 20 នាទី ដែលត្រូវបានសេតវិមានចេញផ្សាយកាលពីថ្ងៃទី 19 មករា។

លោក Trump ក៏មិនភ្លេចកោតសរសើរចំពោះកិច្ចខិតខំក្នុងការកាត់បន្ថយពន្ធ កិច្ចព្រមព្រៀងពាណិជ្ជកម្ម និងគោលនយោបាយសេដ្ឋកិច្ចក្រៅប្រទេសរបស់រដ្ឋាភិបាលលោក ជាមួយនឹងការលើកកម្ពស់សេដ្ឋកិច្ចក្នុងស្រុក ស្ថានភាពទីផ្សារមូលបត្រ និងការដែលវ៉ាក់សាំង Covid-19 ត្រូវបានអភិវឌ្ឍយ៉ាងឆាប់រហ័ស។

«ពួកគេបានហៅប្រការនេះថាជាមន្តអាគមផ្នែកវេជ្ជសាស្ត្រ។ រដ្ឋាភិបាលដទៃនឹងត្រូវចំណាយពេល 3 ឆ្នាំ, 4 ឆ្នាំ, 5 ឆ្នាំ ឬ 10 ឆ្នាំ ដើម្បីអភិវឌ្ឍវ៉ាក់សាំងមួយប្រភេទ ប៉ុន្តែយើងបានធ្វើវាក្នុងរយៈពេលត្រឹមតែ 9 ខែប៉ុណ្ណោះ» លោក Trump បានឱ្យដឹងដូច្នេះ និងថែមទាំងបានវាយតម្លៃខ្ពស់ទៅលើការប្រឹងប្រែងរបស់រដ្ឋាភិបាលក្នុងការស្ដារសេដ្ឋកិច្ចនៅក្នុងវិបត្តិសុខភាព និងធានាសន្តិសុខនៅតាមបន្ទាត់ព្រំដែនភាគខាងត្បូងផងដែរ។

លោក Trump បន្តថា៖ «នៅពេលខ្ញុំត្រៀមប្រគល់អំណាចជូនដល់រដ្ឋាភិបាលថ្មីនៅថ្ងៃត្រង់ ទី 20 មករា ខ្ញុំចង់ប្រាប់គ្រប់គ្នាថា ចលនារបស់យើងទើបតែបានចាប់ផ្ដើមដំណើរការប៉ុណ្ណោះ»។

«ខ្ញុំមានមោទកភាពជាខ្លាំងដោយសារជាប្រធានាធិបតីដំបូងក្នុងអំឡុងជាច្រើនទសវត្សរ៍ដែលមិនបានបញ្ឆេះសង្គ្រាមណាមួយ។ យើងបានបញ្ជាក់ជាថ្មីថា នៅសហរដ្ឋអាមេរិក រដ្ឋាភិបាលបានឆ្លើយតបនឹងការចង់បានរបស់ពលរដ្ឋ» លោក Trump បន្ថែម។

ប្រធានាធិបតី Trump ឱ្យដឹងថា៖ «សប្ដាហ៍នេះ រដ្ឋាភិបាលថ្មីមួយនឹងចូលកាន់អំណាច ហើយយើងបួងសួងឱ្យពួកគេទទួលបានជោគជ័យក្នុងការរក្សាទឹកដីអាមេរិកឱ្យនៅមានសុវត្ថិភាព និងរីកចម្រើន។ យើងសូមផ្ញើពាក្យជូនពរបវរប្រសើរបំផុត និងប្រាថ្នាឱ្យពួកគេជួបសំណាងល្អ ដែលជាប្រការមួយដ៏មានសារសំខាន់»។

លោក Trump កន្លងមកបានប្រកាសថា នឹងមិនចូលរួមពិធីស្បថចូលកាន់តំណែងរបស់លោក Biden នៅថ្ងៃទី 20 មករានេះ។ លោក Trump មានគម្រោងចូលរួមពិធីលាគ្នាជាមួយនឹងកងកម្លាំងប្រដាប់អាវុធនៅមូលដ្ឋានទ័ពអាកាស Andrews នាព្រឹកថ្ងៃទី 20 មករា មុនពេលឡើងយន្តហោះត្រលប់ទៅកាន់ Florida ក្នុងគ្រាប្រធានាធិបតីជាប់ឆ្នោត Joe Biden ស្បថចូលកាន់តំណែង។

នៅក្នុងព្រឹត្តិការណ៍ចុងក្រោយនៃអាណត្តិរបស់លោក Trump លោកស្រី Melania Trump ក៏បានថ្លែងសារលាសេតវិមានផងដែរ។

ពិធីស្បថចូលកាន់តំណែងរបស់លោក Biden នឹងមានការចូលរួមពីក្រុមមន្ត្រីក្នុងចំនួនតិចបំផុត រាប់ចាប់ពីឆ្នាំ 1945 ពោលគឺប្រមាណជា 1,000 នាក់ប៉ុណ្ណោះ។ ប្រការនេះគឺដោយសារអាជ្ញាធរកាត់បន្ថយទំហំនៃព្រឹត្តិការណ៍ ដោយសារឥទ្ធិពលរបស់ Covid-19។

ប្រភព៖ Fox News, Reuters

January 20, 2021

Category: អន្តរជាតិ