អន្តរជាតិ - La Reine Media

នាវាមុជទឹកឥណ្ឌូនេស៊ី លិចក្នុងជម្រៅ 700ម៉ែត្រ៖ អាចបណ្ដាលមកពីបញ្ហាដាច់ភ្លើង

នាវាមុជទឹក KRI Nanggala-402 របស់កងទ័ពជើងទឹកឥណ្ឌូនេស៊ី ត្រូវបានគេសង្ស័យថា ដាច់ភ្លើងទាំងស្រុងនៅពេលកំពុងមុជក្រោមទឹកសមុទ្រនៃតំបន់ Bali កាលពីថ្ងៃទី21 ខែមេសា ឆ្នាំ2021 មុនពេលត្រូវបាត់បាត់បង់ការគ្រប់គ្រង និងលិចក្នុងជម្រៅប្រមាណ 600-700ម៉ែត្រ។

សេចក្ដីប្រកាសព័ត៌មានមួយរបស់កងទ័ពជើងទឹកឥណ្ឌូនេស៊ី បានឱ្យដឹងថា៖ «ទំនងជាបញ្ហាដាច់ភ្លើងបានកើតឡើងនៅក្នុងពេលមុជទឹក បណ្ដាលឱ្យបាត់បង់ការគ្រប់គ្រង និងមិនអាចប្រកាសអាសន្នបាន»។

វាគួរណាស់តែត្រូវបានចុចប៊ូតង់បន្ទាន់ដើម្បីឱ្យនាវាផុសឡើងលើផ្ទៃទឹកភ្លាមៗ នៅពេលមានបញ្ហាដាច់ភ្លើង។ ប៉ុន្តែ ដោយសារដំណើរការនេះមិនត្រូវបានអនុវត្ត ដូច្នេះ នាវា KRI Nanggala ក៏ត្រូវលិចក្នុងជម្រៅ 600-700ម៉ែត្រ។

ក្រៅពីនេះ កងទ័ពជើងទឹកឥណ្ឌូនេស៊ី ក៏បានរកឃើញប្រេងនៅជុំវិញតំបន់ដែលនាវាលិច។ ដូច្នេះ អាចមានការខូចខាតចំពោះឧបករណ៍ដាក់ប្រេង ដោយសារតែសម្ពាធទឹកសមុទ្រ។

បច្ចុប្បន្ន កងទ័ពឥណ្ឌូនេស៊ី បានបញ្ជូនកប៉ាល់ចំនួនពីរគ្រឿងដែលមានសមត្ថភាពរុករកនាវាពុជទឹក ដើម្បីចូលរួមបេសកកម្មជួយសង្គ្រោះ។ ទន្ទឹមនឹងនេះ ឥណ្ឌូនេស៊ី ក៏បានស្នើសុំជំនួយពីប្រទេសអូស្ត្រាលី និងសិង្ហបុរីផងដែរ។

អ្នកនាំពាក្យនៃកងទ័ពជើងទឹកឥណ្ឌូនេស៊ី Julius Widjojono បានឱ្យដឹងថា នាវាមុជទឹក KRI Nanggala 402 ដែលមាននាវិកចំនួន 53នាក់ បានចូលរួមក្នុងការហ្វឹកហាត់បាញ់មីស៊ីលទឹកនៅតំបន់សមុទ្រភាគខាងជើងនៃកោះ Bali ប៉ុន្តែ មិនបានប្រកាសលទ្ធផលនៃសមយុទ្ធនេះទេ។ នាវាមុជទឹក KRI Nanggala 402 បានបាត់ទំនាក់ទំនងនៅវេលាម៉ោង 4និង30នាទីព្រឹក។

នាវាមុជទឹក KRI Nanggala 402 ត្រូវបានផលិតនៅប្រទេសអាល្លឺម៉ង់ កាលពីឆ្នាំ1978 ហើយការជួសជុល និងថែទាំ ក្នុងរយៈពេលពីរឆ្នាំនៅកូរ៉េខាងត្បូង ត្រូវបានធ្វើរួចរាល់កាលពីឆ្នាំ2012៕

ប្រភព៖ NYTimes, Xinhuanet
ប្រែសម្រួល៖ បុត្រា

April 22, 2021

រុស្ស៊ី រៀបទ័ពពេញកម្លាំងសឹក នាវាចម្បាំង 20គ្រឿង យន្តហោះប្រដេញ 50គ្រឿង បាញ់មីស៊ីល សម្លុតស្មារតីប្រទេសអ៊ុយក្រែន

ថ្ងៃទី20 មេសា ទីភ្នាក់ងារព័ត៌មាន Daily mail បានរាយការណ៍ស្ថានការណ៍តានតឹង រវាងរុស្ស៊ីនឹងអ៊ុយក្រែនថា នាវាចម្បាំងរុស្ស៊ីច្រើនជាង 20គ្រឿង បានចូលរួមធ្វើសមយុទ្ធ ជាមួយយន្តហោះប្រដេញរបស់កងទ័ពអាកាសរុស្ស៊ីនៅក្នុងមហាសមុទ្រខ្មៅ។

នាវាចម្បាំងទាំងនោះ ប្រកបដោយ នាវាពិឃាត នាវាចម្បាំងផ្ទុកកាំជ្រួចមីស៊ីល និងនាវាប្រឆាំងនាវាមុជទឹក រួមទាំងហ្វូងយន្តហោះប្រដេញ ដែលហោះបានក្នុងកម្ពស់ទាបបំផុត ក្នុងស្ថានភាពធាតុអាកាសអាក្រក់ខ្លាំង។

ក្រសួងការពារប្រទេសរុស្ស៊ី បានថ្លែងថា យន្តហោះប្រដេញ ច្រើនជាង 50គ្រឿង បានចល័តកម្លាំងចូលទៅក្នុងឈូងសមុទ្រគ្រីមៀ និងបានបង្ហាញភ័ស្តុតាងអះអាង ជារូបភាពផ្កាយរណបរបស់មូលដ្ឋានទ័ពអាកាសឈូងសមុទ្រគ្រីមៀ 2កន្លែង គឺ រ៉ូហ្វស្កូយេ និងសាគី។

យន្តហោះប្រដេញរបស់រុស្ស៊ី យ៉ាងតិច 26គ្រឿង នៅមូលដ្ឋានទ័ពអាកាស Saki Airbase

ក្រៅពីនេះ កងទ័ពជើងទឹកសមុទ្រខ្មៅរបស់រុស្ស៊ី បានធ្វើសមយុទ្ធប្រឆាំងការបង្កភេរវកម្ម បាញ់កាំជ្រួញមីស៊ីល និងប្រតិបត្តិភារកិច្ចហ្វឹកហាត់ការប្រយុទ្ធក្រោមទឹកទៀតផង។

ទីភ្នាក់ងារព័ត៌មានរុស្ស៊ី បានយោងតាមក្រសួងការពារប្រទេសរាយការណ៍កាលពីសប្ដាហ៍កន្លងទៅថា ក្រុងម៉ូស្គូ មានចេតនាក្នុងការបិទផ្នែកខ្លះរបស់សមុទ្រខ្មៅ មិនឱ្យកងយោធាបរទេស និងនាវាគ្រប់ប្រភេទឆ្លងកាត់រយៈពេល 6ខែ។

សកម្មភាពទាំងនេះ អាចនឹងបង្កផលប៉ះពាល់ដល់ការចូលទៅដល់កំពង់ផែរបស់ប្រទេសអ៊ុយក្រែន នៅក្នុងសមុទ្រអាសូហ្វ ដែលតភ្ជាប់ទៅនឹងសមុទ្រខ្មៅ តាមរយៈច្រកសមុទ្រឃើចឆ៍ ភាគខាងកើតរបស់គ្រីមៀ។

កាលពីថ្ងៃចន្ទកន្លងទៅ ក្រសួងការបរទេសសហរដ្ឋអាមេរិក បានអធិប្បាយពីផែនការទាំងនោះថា ជាការលើកកម្ពស់ ដែលបានពិសោធ ឱ្យឃើញពីការជំរុញជាបន្តបន្ទាប់របស់ក្រុងម៉ូស្គូ ដើម្បីវាយកម្ទេច និងធ្វើឱ្យប្រទេសអ៊ុយក្រែនគ្មានស្ថិរភាព។

សហភាពអឺរ៉ុប បានហៅទាំងអស់នេះថា “ការវិវឌ្ឍ ដែលគួរឱ្យព្រួយបារម្ភបំផុត” ក្នុងខណៈដែលអង្គការសន្ធិសញ្ញាការពារទ្វីបអាត្លង់ទិកខាងជើង ឬ NATO បានសម្ដែងក្ដីកង្វល់ និងអំពាវនាវឱ្យប្រទេសរុស្ស៊ីធានា “ការចូលទៅដល់យ៉ាងសេរី” ទៅកាន់កំពង់ផែរបស់ប្រទេសអ៊ុយក្រែន។

សកម្មភាពខាងកងទ័ពជើងទឹក បានបង្កើនភាពតានតឹងខាងកងទ័ពជើងគោក ដោយសារតែទាហានរុស្ស៊ី 150,000នាក់ បានកសាងមូលដ្ឋានកងទ័ពនៅក្នុងបន្ទាយទាហាន ប្រកៀកជាប់ព្រំដែនប្រទេសអ៊ុយក្រែន និងឈូងសមុទ្រគ្រីមៀ ដែលស្ថិតក្នុងកម្រិតខ្ពស់មួយ ដែលមិនធ្លាប់មានពីមុនមក កាលពីមិនប៉ុន្មានសប្ដាហ៍កន្លងទៅ តាំងពីប្រទេសរុស្ស៊ីឈ្លានពាន ដណ្ដើមយកឈូងសមុទ្រគ្រីមៀ ធ្វើជាផ្នែកមួយរបស់រុស្ស៊ី ក្នុងឆ្នាំ2014 មក។

ខណៈដែលរដ្ឋបាលរុស្ស៊ី បានថ្លែងថា កងទាហានរបស់ខ្លួន ដែលចូលប្រកៀកព្រំដែនអ៊ុយក្រែននេះ គឺជាការធ្វើសមយុទ្ធ ដើម្បីឆ្លើយតបនឹងគ្រោះថ្នាក់រុករានណាមួយពីអង្គការណាតូ ចំណែកឯការបិទដែនទឹកនៅក្នុងសមុទ្រខ្មៅនោះ គឺជាការប្រតិបត្តិតាមប្រក្រតី រវាងប្រទេសនីមួយ។

ចំណែកលោក ដមីត្រូ ឃូលេបា រដ្ឋមន្ត្រីការបរទេសអ៊ុយក្រែន បានជំរុញឱ្យសហភាពអឺរ៉ុប ឬ EU ដាក់ទណ្ឌកម្មសេដ្ឋកិច្ចលើប្រទេសរុស្ស៊ីជាថ្មីម្ដងទៀត ក្រោយពីបានពិភាក្សាជាមួយរដ្ឋមន្ត្រីការបរទេស 27ប្រទេសក្នុង EU រួចមក ប៉ុន្តែលោក យូសេហ្វ បារេលល៍ អគ្គនាយកនយោបាយអន្តរជាតិរបស់ EU បានប្រាប់ថា ពេលនេះ មិនទាន់មានវិធានការដាក់ទណ្ឌកម្មសេដ្ឋកិច្ចបន្ថែម ក្នុងការស្នើ ឬពិចារណាណាមួយអំពីរឿងនេះនៅឡើយ៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 21, 2021

កម្ពុជាមានអ្នកស្លាប់សរុប 54នាក់ដោយសារឆ្លងវីរុសCovid-19 ខណៈពិភពលោកមានអ្នកស្លាប់រហូតដល់ 3,058,550នាក់ គិតត្រឹមថ្ងៃនេះ

នាថ្ងៃទី 21មេសា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 303នាក់ទៀត ក្នុងអំឡុង 24ម៉ោងនៃថ្ងៃទី 20មេសា ឆ្នាំ2021។

គិតមកដល់បច្ចុប្បន្ន (21មេសា) ទូទាំងប្រទេសកម្ពុជា អ្នកឆ្លងCovid-19 សរុបបានកើនដល់ 7,747នាក់ ក្នុងនោះមានអ្នកជាសះស្បើយសរុប 2,794នាក់, អ្នកស្លាប់ 54នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 4,893នាក់។

នៅទូទាំងពិភពលោក អ្នកឆ្លងវីរុសCovid-19 សរុប បានកើនដល់ 143,586,744នាក់ ក្នុងនោះមាន 3,058,550នាក់បានស្លាប់, 121,961,265នាក់បានជាសះស្បើយ និង 18,566,929នាក់កំពុងព្យាបាល។

បណ្ដាប្រទេសដែលមានតួលេខអ្នកវិជ្ជមានច្រើនជាង 10លាននាក់ រួមមាន សហរដ្ឋអាមេរិក (32,536,470នាក់), ប្រទេសឥណ្ឌា (15,616,130នាក់) និងប្រទេសប្រេស៊ីល (14,050,885នាក់)។

ចំណែកបណ្ដាប្រទេសដែលមានអ្នកស្លាប់ដោយសារឆ្លងវីរុស Covid-19 ច្រើនជាង 100,000នាក់ រួមមាន 8ប្រទេសគឺ សហរដ្ឋអាមេរិក (582,456នាក់), ប្រទេសប្រេស៊ីល (378,530នាក់), ម៉ិកស៊ិក (213,048នាក់), ឥណ្ឌា (182,570នាក់), អង់គ្លេស (127,307នាក់), អ៊ីតាលី (117,633នាក់), រុស្ស៊ី (106,307នាក់) និងបារាំង (101,597នាក់)៕

ប្រភព៖ ក្រសួងសុខាភិបាល, Worldometers
ដកស្រង់ និងប្រែសម្រួល៖ បុត្រា

April 21, 2021

George Floyd! តុលាការអាមេរិក ប្រកាសសាលក្រមផ្ដន្ទាទោសអតីតមន្ត្រីប៉ូលិស ទាក់ទងនឹងរឿងក្ដីនេះ

កាលពីថ្ងៃទី20មេសា (ម៉ោងនៅអាមេរិក) អតីតមន្ត្រីនគរបាលឈ្មោះ Derek Chauvin ជាអ្នកដែលបានធ្វើឱ្យមានករណីស្លាប់ចំពោះបុរសជនជាតិស្បែកខ្មៅម្នាក់ឈ្មោះ George Floyd និងនាំឱ្យសហរដ្ឋអាមេរិក ធ្លាក់ទៅក្នុងអំពើហិង្សាប្រឆាំងនឹងការរើសអើងពូជសាសន៍អស់ជាច្រើនខែក្នុងឆ្នាំ2020 ពេលនេះត្រូវបានតុលាការសម្រេចថា មានទោសចំនួនបី គឺទោសសម្លាប់មនុស្សកម្រិតពីរ, ទោសសម្លាប់មនុស្សកម្រិតបី និងទោសសម្លាប់មនុស្សដោយអចេតនា។

បុគ្គលដែលមានទោសមនុស្សឃាតកម្រិតពីរ ត្រូវប្រឈមនឹងការជាប់ពន្ធនាគារយ៉ាងយូរ 40ឆ្នាំ ចំណែកទោសមនុស្សឃាតកម្រិតបីនឹងត្រូវជាប់ពន្ធនាគារយ៉ាងយូរ 25ឆ្នាំ រីឯទោសមនុស្សឃាតដោយអចេតនា នឹងត្រូវជាប់ពន្ធនាគារយ៉ាងយូរត្រឹម10ឆ្នាំ។ ចៅក្រម Peter Cahill បានឱ្យដឹងថា សាលក្រមនេះនឹងត្រូវបានអនុវត្តជាផ្លូវការ ក្រោយរយៈពេល 8សប្ដាហ៍ទៀត។

អ្នកទោស Derek Chauvin ត្រូវបានដាក់ខ្នោះ និងនាំខ្លួនចេញពីតុលាការ

នៅក្នុងសេចក្ដីប្រកាសមួយ មេធាវី Ben Crump តំណាងឱ្យគ្រួសារជនរងគ្រោះ Floyd បានឱ្យដឹងថា ករណីនេះគឺជារបត់ថ្មីមួយក្នុងប្រវត្តិសាស្ត្រនៃយុត្តិធម៌របស់សហរដ្ឋអាមេរិក។

សវនាការកាត់ទោសមន្ត្រីប៉ូលិសឈ្មោះ Chauvin បានចាប់ផ្ដើមតាំងតែពីចុងខែមីនា ហើយបានបញ្ចប់នៅថ្ងៃទី19មេសា។ នេះគឺជាករណីដែលបាននាំឱ្យមានចលនាបាតុកម្មទូទាំងប្រទេស ប្រឆាំងនឹងការរើសអើងពូជសាសន៍នៅសហរដ្ឋអាមេរិក កាលពីខែឧសភា ឆ្នាំ2020 បន្ទាប់ពីមហារោគរាតត្បាត Covid-19 បានបង្ហាញខ្លួននៅទីនេះ។

ក្រោយពីតុលាការប្រកាសសាលក្រមបញ្ជាក់ថា ជនសង្ស័យ Chauvin មានទោស មនុស្សរាប់ពាន់នាក់ ពិសេសនៅក្នុងតំបន់ Minneapolis ជាកន្លែងកើតហេតុ បានប្រមូលផ្ដុំគ្នានៅលើដងផ្លូវដើម្បីសំដែងការសាទរ។ នៅចំពោះក្រុមអ្នកយកព័ត៌មាន មិត្តស្រីរបស់ជនរងគ្រោះ Floyd នាង Courteney Batya Ross បានថ្លែងថា នាងជឿថា Floyd មានមូលហេតុដើម្បីរស់។

ពលរដ្ឋរាប់ពាន់នាក់ សាទរចំពោះការផ្ដន្ទាទោសនេះ

ចំណែកប្រធានាធិបតី Joe Biden វិញ ក៏បានសម្រេចពន្យារពេលការធ្វើសេចក្ដីថ្លែងការណ៍អំពីបញ្ហាហេដ្ឋារចនាសម្ព័ន្ធ ដែលលោកកំពុងមានបំណងបញ្ចុះបញ្ចូលសភាឱ្យធ្វើការអនុម័តយល់ព្រម ដើម្បីបានថ្លែងការណ៍នៅចំពោះសាធារណជនអំពីករណីផ្ដន្ទាទោសលើអ្នកទោស Derek Chauvin។

សវនាការកាត់ទោសអតីតមន្ត្រីប៉ូលិសចំនួន 3នាក់ផ្សេងទៀត ដែលជាប់ពាក់ព័ន្ធនឹងការស្លាប់របស់ Georg Floyd គឺឈ្មោះ Thomas Lane, J. Alexander Kueng និង Tou Thao នឹងត្រូវបានធ្វើឡើងនៅខែសីហាខាងមុខ។

បងប្រុសរបស់ George Floyd ជូតទឹកភ្នែក បន្ទាប់ពីសាលក្រមតុលាការត្រូវបានប្រកាស

សូមរំលឹកថា ជនរងគ្រោះឈ្មោះ George Floyd បានស្លាប់ដោយសារ “បេះដូង និងសួតលែងដំណើរការ ព្រោះតែត្រូវប៉ូលីសចាប់ផ្ដួល និងសង្កត់កដោយជង្គង់” កាលពីថ្ងៃទី25ឧសភា ឆ្នាំ2020 នៅពេលត្រូវបានចាប់ខ្លួនពីបទចាយលុយក្លែងក្លាយ។ ហេតុការណ៍នេះបាននាំឱ្យមានបាតុកម្មជាច្រើនកើតឡើងនៅក្នុងទីក្រុងយ៉ាងតិចចំនួន140 នៅសហរដ្ឋអាមេរិក ដើម្បីទាមទារយុត្តិធម៌ជូន Floyd។ បាតុកម្មទាំងនោះ បាននាំឱ្យមានអំពើហិង្សា ការឆក់ប្លន់ និងការបំផ្លិចបំផ្លាញទ្រព្យជាច្រើនកើតឡើង ហើយមនុស្សប្រមាណជាជាង 4,400នាក់ត្រូវបានចាប់ខ្លួន៕

ប្រភព៖ CNN
ប្រែសម្រួល៖ បុត្រា

April 21, 2021

សញ្ញាតានតឹង!! រុស្ស៊ី បញ្ជូនទាហានជាង 150,000នាក់ ចូលប្រកៀកព្រំដែន អ៊ុយក្រែន

លោក ចូសេហ្វ បារេលល៍ ប្រធានផ្នែកនយោបាយអន្តរជាតិរបស់សហភាពអឺរ៉ុប បានឱ្យដឹងកាលពីថ្ងៃម្សិលមិញ (ទី19មេសា) ថា កងទ័ពរុស្ស៊ី បានដាក់កម្លាំងទាហានជាង 150,000នាក់ ចូលប្រកៀកព្រំដែនប្រទេសអ៊ុយក្រែន ដែលនេះជាចំនួនមួយ ច្រើនជាងកាលពីគ្រាដែល រុស្ស៊ីវាយចូលកាន់កាប់ឈូងសមុទ្រគ្រីមៀ នៅឆ្នាំ2014 ទៅទៀត ខណៈដែលអ្នកនាំពាក្យក្រសួងការពារប្រទេសសហរដ្ឋអាមេរិក ទទួលស្គាល់ថា ជាស្ថានការណ៍ ដែល “គួរឱ្យព្រួយបារម្ភយ៉ាងខ្លាំង។

“ពេលនេះ មានទាហានរុស្ស៊ីកំពុងត្រៀមកម្លាំងនៅបរិវេណព្រំដែនអ៊ុយក្រែន និងគ្រីមៀ ច្រើនជាង 150,000នាក់ ភាពប្រឈមក្នុងការកើតការប៉ះទង្គិចគ្នា ហាក់ដូចជាកាន់តែលេចច្បាស់ឡើងហើយ” លោកបារេលល៍ បានថ្លែងក្នុងបទសម្ភាស និងបានបដិសេធបង្ហើបឱ្យដឹង ពីប្រភពព័ត៌មាននេះ។

តែយ៉ាងណាក្ដី លោកបារេលល៍ បានអះអាងថា EU (សហភាពអឺរ៉ុប) មិនទាន់មានផែនការក្នុងការប្រកាសដាក់ទណ្ឌកម្មសេដ្ឋកិច្ច ឬបណ្ដេញអ្នកការទូតរុស្ស៊ីនៅឡើយទេ ទោះជាការបន្ថែមកម្លាំងយោធានៅតាមព្រំដែនប្រទេសអ៊ុយក្រែន ក្នុងគ្រានេះ ដែលអាចនិយាយបានថា ច្រើនជាប្រវត្តិសាស្ត្រក៏ដោយ។

ចំណែកក្រសួងការពារប្រទេសសហរដ្ឋអាមេរិក បានបញ្ជាក់ថា ចំនួនទាហានរុស្ស៊ីនៅឯព្រំដែនអ៊ុយក្រែន នាពេលនេះ អាចនិយាយបានថា ច្រើនជាងកាលពីឆ្នាំ2014 និងមិនទាន់ប្រាកដច្បាស់នៅឡើយថា តើមានគោលបំណង ដើម្បីធ្វើសមយុទ្ធ ឬយ៉ាងណានៅឡើយ។

“វាជាការដាក់កម្លាំងយោធា ដែលច្រើនបំផុត ចាប់តាំងពីឆ្នាំ2014 ដែលរុស្ស៊ីបានល្មើសអធិបតេយ្យ និងបូរណភាពដែនដីរបស់អ៊ុយក្រែន” លោកចន ឃើប៊ីយ៍ អ្នកនាំពាក្យមន្ទីរបញ្ចកោណ បានបន្តទៀតថា “តែយើងមើលឃើញយ៉ាងច្បាស់ថា ច្រើនជាងកាលពីឆ្នាំ2014 ទៅទៀត”

“យើងយល់ឃើញថា ការបន្កើនកម្លាំងទាហានបែបនេះ គឺជារឿងដែលគួរឱ្យព្រួយបារម្ភមែនទែន”

ខណៈពេលជាមួយគ្នា លោក និដ ផ្រៃស៍ អ្នកនាំពាក្យក្រសួងការពារប្រទេសសហរដ្ឋអាមេរិក បានបញ្ជាក់ថា ក្រុងវ៉ាស៊ីនតោន “ព្រួយបារម្ភយ៉ាងខ្លាំង” ចំពោះផែនការរបស់ប្រទេសរុស្ស៊ី ក្នុងការហាមមិនឱ្យនាវាចម្បាំងបរទេស និងនាវាប្រភេទផ្សេងៗទៀត ឆ្លងកាត់ចូលទៅកាន់ទីតាំងមួយចំនួនរបស់មហាសមុទ្រខ្មៅ រយៈពេល 6ខែ។

លោកផ្រៃស៍ បានថ្លែងថា “នេះ គឺម្ដងទៀតហើយ ដែលក្រុងម៉ូស្គូ លើកកម្ពស់ភាពតានតឹងជាឯកតោភាគី ដើម្បីចង់កាត់បន្ថយស្ថិរភាពរបស់ប្រទេសអ៊ុយក្រែន”

ឯរដ្ឋាភិបាលអ៊ុយក្រែនវិញ ព្រួយបារម្ភថា ប្រទេសរុស្ស៊ី ដែលផ្ដល់ការគាំទ្រ ទាំងខាងនយោបាយ និងយោធាទៅក្រុមឧទ្ទាមបែងចែកទឹកដី នៅក្នុងភូមិភាគ ដុងបាស់ (Donbass) ភាគខាងកើត អាចកំពុងរកលេស ដើម្បីចាប់ផ្ដើមធ្វើការវាយប្រហារ ខណៈដែលក្រុងម៉ូស្គូ អះអាងថា “មិនដែលគំរាមអ្នកណាឡើយ” ព្រមទាំងចោទប្រកាន់ ក្រុងគៀវ ថា សម្ដែងអាកប្បកិរិយាញុះញង់។

សង្គ្រាមក្នុងភូមិភាគ ដុងបាស់ភាគខាងកើតរបស់ប្រទេសអ៊ុយក្រែន បានឆក់យកជីវិតពលរដ្ឋអស់ច្រើនជាង 13,000នាក់ទៅហើយ និងធ្វើឱ្យមនុស្សជិត 1.5លាននាក់ទៀត ត្រូវឃ្លាតចាកពីទីលំនៅ ក្រោយពីទំនាស់បានផ្ទុះឡើងកាលពី 7ឆ្នាំមុន ដោយសារការដែលប្រទេសរុស្ស៊ីនាំកម្លាំងទាហាន ចូលដណ្ដើមយកឈូងសមុទ្រគ្រីមៀ ពីប្រទេសអ៊ុយក្រែន។

ថ្មីៗនេះ ការិយាល័យគ្រប់គ្រងការហោះហើរនៃសហរដ្ឋអាមេរិក (FAA) បានប្រកាសព្រមានពីភាពប្រឈមចំពោះអាកាសយាន និងបានជូនដំណឹងទៅក្រុមហ៊ុនអាកាសចរណ៍ផ្សេងៗ ឱ្យ “មានការប្រុងប្រយ័ត្នខ្ពស់បំផុត” បើចាំបាច់ត្រូវហោះកាត់ពីលើដែនអាកាសព្រំដែនរុស្ស៊ី-អ៊ុយក្រែន ក្នុងអំឡុងពេលនេះ៕

ប្រភព៖ ទីភ្នាក់ងារព័ត៌មាន Reuters, AFP
ប្រែសម្រួលដោយ តាវ៉ែនតា

April 20, 2021

WHO អះអាងថា ពិភពលោកអាចគ្រប់គ្រងស្ថានការណ៍ Covid-19 បាន នៅក្នុងរយៈពេលប៉ុន្មានខែទៀតប៉ុណ្ណោះ

កាលពីថ្ងៃទី19មេសាកន្លងទៅ ប្រធានអង្គការសុខភាពពិភពលោក (WHO) លោក Tedros Adhanom Ghebreyesus បានប្រកាសថា ពិភពលោកមានឧបករណ៍នានាដើម្បីនាំមហារោគរាតត្បាត Covid-19 នៅទូទាំងពិភពលោក ចូលទៅក្នុងរង្វង់ដែលអាចគ្រប់គ្រងបាន នាប៉ុន្មានខែខាងមុខ។

ក្នុងសន្និសីទសារព័ត៌មាន មេដឹកនាំ WHO បានលើកឡើងថា៖ «យើងមានមធ្យោបាយមួយចំនួនដើម្បីគ្រប់គ្រងមហារោគរាតត្បាតបាន នៅក្នុងរយៈពេលប៉ុន្មានខែខាងមុខ បើសិនយើងប្រើប្រាស់មធ្យោបាយទាំងនេះប្រកបដោយឯកភាព និងសមភាព»។

ក្នុងថ្ងៃដដែលនោះ គណៈកម្មការគ្រប់គ្រងស្ថានការណ៍បន្ទាន់របស់ WHO ក៏បានផ្ដល់អនុសាសន៍ថា មិនចាំបាច់ប្រើប្រាស់លិខិតបញ្ជាក់ការចាក់វ៉ាក់សាំងសម្រាប់ការដើរហើរលក្ខណៈអន្តរជាតិនោះទេ។ ប្រការនេះធ្វើឱ្យបញ្ហាចម្រូងចម្រាសដែលមានស្រាប់នេះ កាន់តែមានភាពស្មុគស្មាញ។

គណៈកម្មការខាងលើយល់ថា ប្រទេសនានាគួរតែទទួលស្គាល់ថា ការតម្រូវឱ្យមានលិខិតបញ្ជាក់អំពីការចាក់វ៉ាក់សាំង ធ្វើឱ្យបញ្ហាមិនស្មើភាពគ្នារបស់ពិភពលោក កាន់តែធ្ងន់ធ្ងរឡើងៗ ព្រមទាំងជំរុញឱ្យសិទ្ធិដើរហើរប្រែទៅជារឿងអយុត្តិធម៌ទៅវិញ។

យោងតាម worldometers.info គិតមកដល់ល្ងាចថ្ងៃទី20 ខែមេសា (នៅភ្នំពេញ) ពិភពលោកទាំងមូលមានអ្នកឆ្លងវីរុស Covid-19 សរុបចំនួន 142,723,918នាក់ ក្នុងនោះ មានអ្នកស្លាប់រហូតដល់ 3,043,595នាក់, អ្នកជំងឺបានជាសះស្បើយ 121,240,304នាក់ និងអ្នកកំពុងព្យាបាលចំនួន 18,440,019នាក់៕

ប្រភព៖ CNA
ប្រែសម្រួល៖ បុត្រា

April 20, 2021

ជប៉ុន ស៊ូកូវីដលែងបាន ត្រៀមប្រកាសស្ថានការណ៍អាសន្នលើកទី3 “ខ្លាំង” ជាងមុន

អភិបាលក្រុងតូក្យូ និងខេត្តអូសាកា នឹងសំណូមពរឱ្យរដ្ឋាភិបាលជប៉ុន ពិចារណាពីការប្រកាសស្ថានការណ៍អាសន្ន ដើម្បីគ្រប់គ្រងការឆ្លងរាលដាលរបស់ជំងឺកូវីដ-19 ជុំទី3 ដោយវិធានការដែលតឹងរ៉ឹង ម៉ឺងម៉ាត់ខ្លាំងបំផុត គឺបិទភោជនីយដ្ឋាន ហាងលក់ទំនិញ និងកន្លែងកម្សាន្តទាំងអស់។

លោក ហ៊ីរ៉ូហ្វ៊ូមិ យ៉ូស៊ីមូរ៉ាក់ អភិបាលខេត្តអូសាកា បានថ្លែងថា លោកនឹងសំណូមពរ សុំឱ្យរដ្ឋបាលជប៉ុនប្រកាសស្ថានការណ៍អាសន្ន នៅក្នុងខេត្តអូសាកា ក្រោយពីចំនួនអ្នកឆ្លងមេរោគថ្មីនៅក្នុងខេត្តមួយនេះកាលពីសប្ដាហ៍កន្លងទៅ មានច្រើនជាង 1,000នាក់ជាបន្តបន្ទាប់ជាប់គ្នា 6ថ្ងៃ ចំណែកកាលពីថ្ងៃចន្ទ ទី19 មេសា ដែលជាធម្មតា នឹងមានលទ្ធផលត្រួតពិនិត្យតិចតួច ក្រោយពីការឈប់សម្រាកចុងសប្ដាហ៍នោះ ក៏នៅតែមានអ្នកឆ្លងមេរោគច្រើនដល់ទៅ 719នាក់ដែរ ដែលនេះ ជាតួលេខខ្ពស់ជាប្រវត្តិសាស្ត្រ របស់ខេត្តអូសាកា សម្រាប់ថ្ងៃចន្ទ។

ប្រព័ន្ធការព្យាបាល នៅក្នុងខេត្តអូសាកា កំពុងតែរងបន្ទុកយ៉ាងធ្ងន់ធ្ងរបំផុត គ្រែអ្នកជំងឺកំពុងតែជិតពេញអស់ រហូតដល់ត្រូវសុំខាងខេត្ត ស៊ីង៉ៈ ដែលស្ថិតនៅជិតគ្នានោះ ឱ្យជួយទទួលអ្នកជំងឺ បញ្ជូនក្រុមគ្រូពេទ្យមកជួយ និងផ្ដល់ការគាំទ្រផ្សេងៗទៀតផង។

Caption ស្ដូប ស៊ឹថេនកាគុ ក្នុងទីក្រុងអូសាកា បើកភ្លើងពណ៌ក្រហម ដើម្បីបង្ហាញពីសញ្ញាវិបត្តិកូវីដធ្ងន់ធ្ងរ

ខេត្តជុំវិញអូសាកា គឺ ក្យូតូ, ណារ៉ា និងទីក្រុងកូបេ ក៏មានអ្នកឆ្លងមេរោគកូវីដកើនឡើងច្រើនដូចគ្នា ដោយសារតែមានអ្នកធ្វើដំណើរឆ្លងកាត់ទៅ-មកជាប្រចាំ។

ចំណែកខាងទីក្រុងតូក្យូវិញ លោកស្រី យូរីកូ ខូអ៊ីកេះ អភិបាលក្រុង ក៏បានប្រាប់ដែរថា លោកស្រីនឹងអំពាវនាវឱ្យរដ្ឋបាលជប៉ុន ប្រកាសស្ថានការណ៍អាសន្ន ជាថ្មីម្ដងទៀត។ ក្រុងតូក្យូ បានអះអាងពីអ្នកឆ្លងមេរោគថ្មីចំនួន 405នាក់កាលពីថ្ងៃចន្ទ ទី19 មេសា កើនឡើងពីសប្ដាហ៍មុន 99នាក់ និងជាលើកដំបូងក្នុងជុំ 3ខែហើយ ដែលចំនួនអ្នកឆ្លងមេរោគថ្មី ក្នុងថ្ងៃចន្ទ ឡើងខ្ពស់ជាង 400នាក់។

អភិបាលក្រុងតូក្យូ បានសម្ដែងក្ដីព្រួយបារម្ភ ដែលមនុស្សវ័យកំលោះក្រមុំចំនួនដ៏ច្រើន នៅតែចេញទៅក្នុងទីតាំងដែលមានមនុស្សអ៊ូអរច្រើន ហើយ 42ភាគរយនៃចំនួនអ្នកឆ្លងមេរោគថ្មីក្នុងទីក្រុងតូក្យូ គឺជាមនុស្សក្នុងអំឡុងអាយុ 20-29ឆ្នាំ និង 30-39ឆ្នាំ។

ត្រៀមប្រើ “ធម៌ក្ដៅ” បញ្ជាឱ្យបិទហាង មិនមែនគ្រាន់តែកាត់បន្ថយពេលលក់ដូរនោះទេ

រដ្ឋបាលខេត្តអូសាកា នឹងជួបប្រជុំគ្នា ដើម្បីដាក់សំណូមពរទៅរដ្ឋាភិបាល សុំឱ្យប្រកាសស្ថានការណ៍អាសន្ន នៅថ្ងៃនេះ(ទី20មេសា) ចំណែកទីក្រុងតូក្យូ នឹងសរុបរឿងនេះ នៅថ្ងៃទី22 ខែមេសា។

ទាំង ២ខេត្ត នឹងស្នើសុំឱ្យប្រើវិធានការដែលតឹងរ៉ឹងម៉ឺងម៉ាត់ជាងមុន សម្រាប់ការប្រកាសស្ថានការណ៍អាសន្នលើកនេះ គឺ ឱ្យភោជនីយដ្ឋាន ហាងលក់ទំនិញ កន្លែងកម្សាន្ត បិទដំណើរការទាំងស្រុង។ វិធានការលើកនេះ នឹងខុសប្លែកពីស្ថានការណ៍អាសន្នគ្រាមុនៗ និងជា “វិធានការគ្រប់គ្រងពិសេស។

ចំនួនអ្នកឆ្លងមេរោគកូវីដ-19 នៅក្នុងប្រទេសជប៉ុន ក្នុងខណៈពេលនេះ កើនឡើងច្រើនជាប្រវត្តិសាស្ត្រ ខ្លាំងជាងពេលណាៗទាំងអស់ អ្នកឆ្លងមេរោគទូទាំងប្រទេស កើនឡើង 1ថ្ងៃជាង 3,000នាក់ និងចំនួនអ្នកស្លាប់ដែលធ្លាប់តែបន្តិចបន្តួចនោះ ខណៈនេះកើនឡើងដល់ 1ថ្ងៃប្រមាណ 30នាក់ និងដែលសំខាន់នោះគឺ អ្នកឆ្លងមេរោគ ភាគច្រើន គឺវីរុសកូវីដក្លាយពូជបែបអង់គ្លេស ដែលអាចចម្លងសាយភាយ ងាយជាងមុនប្រមាណជា 1.7ដង(ឆ្លងលឿនជាងមុន ជិត ២ដង)។

បើរដ្ឋបាលជប៉ុន សម្រេចចិត្តប្រកាសស្ថានការណ៍អាសន្ន ដើម្បីគ្រប់គ្រងការឆ្លងរាលដាលរបស់ជំងឺកូវីដ-19នោះ លើកនេះគឺជាលើកទី3 ហើយ ដោយលើកដំបូងបានកើតឡើងក្នុងអំឡុងខែមេសា-ឧសភា ឆ្នាំទៅ ចំណែកលើកទី២ ធ្វើឡើងក្នុងអំឡុងខែមករា-កុម្ភៈ ឆ្នាំនេះឯង៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 20, 2021

អ្នកស្លាប់ដោយសារវីរុសCovid-19 នៅកម្ពុជា កើនដល់49នាក់ ខណៈពិភពលោកមានអ្នកស្លាប់សរុបជាង 3,043,000នាក់

នាព្រឹកថ្ងៃទី20មេសានេះ ក្រសួងសុខាភិបាលកម្ពុជាបានឱ្យដឹងថា អ្នកស្លាប់ថ្មី (ក្នុងថ្ងៃទី19មេសា) ដោយសារវីរុសCovid-19 មានចំនួន 4នាក់ ដែលនាំឱ្យអ្នកស្លាប់សរុបដោយសារវីរុសនេះនៅកម្ពុជា កើនដល់49នាក់។

អ្នកស្លាប់ខាងលើ សុទ្ធតែជាជនជាតិខ្មែរ ដែលរួមមាន បុរសជនជាតិខ្មែរ អាយុ 65ឆ្នាំ, បុរសជនជាតិខ្មែរ អាយុ 72ឆ្នាំ, ស្ត្រីជនជាតិខ្មែរ អាយុ 48ឆ្នាំ និងស្ត្រីជនជាតិខ្មែរ អាយុ 40ឆ្នាំ។ ក្នុងនោះដែរ មានពីរករណី ស្លាប់នៅក្នុងមន្ទីរពេទ្យមិត្តភាពខ្មែរ-សូវៀត (ពេទ្យរុស្ស៊ី នៅទីក្រុងភ្នំពេញ), មួយករណី ស្លាប់នៅឯមជ្ឈមណ្ឌលសុខភាពចាក់អង្រែ (ភ្នំពេញ) និងមួយករណីទៀត ស្លាប់នៅឯមន្ទីរពេទ្យបង្អែកខេត្តព្រះសីហនុ។

នៅទូទាំងពិភពលោកវិញ បច្ចុប្បន្នមានអ្នកស្លាប់ជាង 3,043,210នាក់, ជាសះស្បើយជាង121,222,470នាក់ ខណៈ 18,441,228នាក់កំពុងព្យាបាល នៅក្នុងចំណោមអ្នកជំងឺ Covid-19 សរុបជាង 142,706,910នាក់ ដែលពិភពលោកបានរកឃើញ៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

April 20, 2021

មិនទាន់ចប់ងាយៗទេ!! វិបត្តិកូវីដ-19 ទូទាំងពិភពលោក នៅតែអាក្រក់ រកឃើញអ្នកឆ្លងថ្មីប្រចាំសប្ដាហ៍ច្រើនបំផុត

រកឃើញអ្នកឆ្លងមេរោគកូវីដ-19 ថ្មីទូទាំងពិភពលោក ក្នុងអំឡុង 7ថ្ងៃកន្លងមក ច្រើនដល់ទៅជាង 5.2លាននាក់ ច្រើនជាងសប្ដាហ៍ណាៗទាំងអស់ គិតចាប់តាំងពីរោគរាតត្បាតដ៏ធំនេះចាប់ផ្ដើមឡើង ដោយស្ថានការណ៍ការឆ្លងរាលដាល កាន់តែតែអាក្រក់ឡើងៗ យ៉ាងឆាប់រហ័សនៅក្នុងប្រទេសទាំងឡាយ ដែលខ្វះខាតឧបករណ៍ និងសម្ភារ សម្រាប់ចាត់ការជាមួយវីរុសកូរ៉ូណាប្រភេទថ្មីដ៏សាហាវនេះ។

សញ្ញាអាក្រក់ ដែលគួរឱ្យភ័យខ្លាចនេះ បានចាប់ផ្ដើមឡើង តែប៉ុន្មានថ្ងៃ ក្រោយពីចំនួនអ្នកស្លាប់ដោយសារកូវីដ-19 ទូទាំងពិភពលោក បានហក់ឡើងដល់ជាង 3លាននាក់ និងកើតឡើងក្នុងខណៈដែលប្រទេសផ្សេងៗជាច្រើន កំពុងដំណើរការគ្រោងការចាក់វ៉ាក់សាំង ក្នុងក្ដីព្យាយាមគ្រប់គ្រងការឆ្លងរាលដាលរបស់វីរុសកូរ៉ូណាប្រភេទថ្មីនេះឱ្យបាន។

យ៉ាងណាក្ដី ទិន្នន័យពីមហាវិទ្យាល័យ ចន ហប់គីនស៍ ដែលរកឃើញអ្នកឆ្លងមេរោគ កើនឡើង កាលពី ១សប្ដាហ៍មុនហ្នឹង ដល់ទៅ 12%នោះ បានបំផ្លាញសេចក្ដីសង្ឃឹមដែលថា ទីបញ្ចប់របស់ជំងឺរាលដាលដ៏ធំនេះ អាចស្ថិតនៅមិនឆ្ងាយប៉ុន្មាននោះ ខ្ទេចខ្ទីអស់រលីង។

តួលេខអ្នកឆ្លងមេរោគថ្មីប្រចាំសប្ដាហ៍ទាំងនោះ បានបំបែកឯកទគ្គកម្មចាស់ ដែលធ្លាប់កើតឡើងកាលពីអំឡុងពាក់កណ្ដាលខែធ្នូ កន្លងទៅ ដែលទោះជាងអត្រាការឆ្លងមេរោគ បានបង្អង់ល្បឿនភាគច្រើននៅក្នុងសហរដ្ឋអាមេរិកហើយក៏ដោយ តែ បណ្ដាប្រទេសកំពុងអភិវឌ្ឍន៍ទាំងឡាយ ជាពិសេសបំផុត ឥណ្ឌា និងប្រេស៊ីល បែរជាកំពុងប្រឈមនឹងចំនួនអ្នកឆ្លងមេរោគ ដែលកើនឡើងខ្ពស់ យ៉ាងឥតឈប់ឈរទៅវិញ។

ចំនួនអ្នកស្លាប់ទូទាំងពិភពលោក ក៏វិលត្រឡប់មករកស្ថានការណ៍ដ៏អាក្រក់ម្ដងទៀតដូចគ្នាដែរ ក្រោយពីរកឃើញអ្នកស្លាប់ កើនឡើងកាលពីខែកន្លងទៅ និងចំនួនអ្នកស្លាប់ក្នុងជុំ 7ថ្ងៃ គិតត្រឹមថ្ងៃទី18 មេសា ស្ថិតក្នុងតួលេខជាង 82,000នាក់ គិតជាមធ្យម ជិត 12,000នាក់ ក្នុង 1ថ្ងៃ។ កើនឡើងយ៉ាងច្រើន ពីកម្រិតប្រមាណជា 60,000នាក់ ក្នុង 1សប្ដាហ៍ គិតត្រឹមថ្ងៃទី14 មីនា ឬគិតជាមធ្យម ប្រមាណ 8,600នាក់ ក្នុង ១ថ្ងៃ។

ឥណ្ឌា និងប្រេស៊ីល ជាប្រទេសយក្ស2 ដែលបានក្លាយជាកត្តាជំរុញ ឱ្យចំនួនអ្នកឆ្លងមេរោគប្រចាំថ្ងៃកើនឡើងខ្ពស់ទូទាំងពិភពលោក…គឺជាការប្រកួតប្រជែង ដែលគ្មានអ្នកណាចង់ឈ្នះ។ ទាំងអស់នេះ ក្រោយពីប្រឈមនឹងការកើនឡើងនៃអ្នកឆ្លងមេរោគកូវីដ-19 យ៉ាងឆាប់រហ័សនោះ ប្រទេសឥណ្ឌា បានវិលមកវ៉ាដាច់ នាំមុខប្រទេសប្រេស៊ីល ក្លាយជាប្រទេសដែលបានរងផលប៉ះពាល់ពីការឆ្លងរាលដាលខ្លាំងជាងគេបំផុត លំដាប់លេខ2 របស់ពិភពលោកជាថ្មីម្ដងទៀត ក្រោយបាត់បង់តំណែងនេះទៅឱ្យប្រទេសប្រេស៊ីលកាលពីខែមីនា។

រហូតមកដល់ពេលនេះ ឥណ្ឌា និងប្រេស៊ីល មានប្រជាជនចូលទទួលការចាក់វ៉ាក់សាំងរួចហើយ គិតជាភាគរយ 4.5% និង 8.3% នៃចំនួនប្រជាជនតាមលំដាប់ ដែលនេះ អាចនិយាយបានថា នៅតិចតួចណាស់ បើធៀបនឹងសហរដ្ឋអាមេរិក 33% និងចក្រភពអង់គ្លេស 32%។

យ៉ាងណាក៏ដោយ មិនមែនត្រឹមតែប្រទេសកំពុងអភិវឌ្ឍន៍ប៉ុណ្ណោះទេ ដែលជួបនឹងបញ្ហាក្នុងការព្យាយាមគ្រប់គ្រងជំងឺរាតត្បាតដ៏ធំនេះឱ្យបាននោះ តែករណីរកឃើញបញ្ហាដុំឈាមញ៉ុកណែនក្នុងសរសៃឈាម នៅក្នុងប្រជាជន ដែលចាក់វ៉ាក់សាំងរបស់ ចនសុន អ៊ែន ចនសុន និងអ៊ែស្ត្រាហ្សេនេកា កំពុងធ្វើឱ្យរដ្ឋបាលប្រទេសផ្សេងៗទូទាំងពិភពលោក កើតមានក្ដីស្រពេចស្រពិល និងសង្ស័យចំពោះប្រសិទ្ធភាពរបស់វ៉ាក់សាំងទាំងនោះ។

មេរោគក្លាយពូជថ្មីរបស់កូវីដ-19 ក៏ជាបច្ច័យ 1ទៀត ដែលធ្វើឱ្យតួលេខអ្នកឆ្លងមេរោគ ហក់ខ្ពស់ឡើងដូចគ្នា ដោយប្រទេសប្រេស៊ីល បានរកឃើញមេរោគក្លាយពូជ P.1 ដែលគេជឿថា គឺជាមេរោគក្លាយពូជ ដែលមានភាពខ្លាំងក្លាបំផុត កាលពីខែធ្នូ កន្លងទៅ ខណៈដែលលទ្ធផលនៃការសិក្សាស្រាវជ្រាវ បានបញ្ជាក់ថា មេរោគក្លាយពូជ 1នេះ ដូចគ្នានឹងមេរោគក្លាយពូជ ដែលរកឃើញដំបូងនៅក្នុងប្រទេសអាហ្វ្រិកខាងត្បូង និងចក្រភពអង់គ្លេស ដែលអាចចម្លងសាយភាយបានងាយជាង និងលឿនជាងមេរោគចាស់ច្រើនដងណាស់៕

ប្រភព៖ ទីភ្នាក់ងារព័ត៌មាន Bloomberg
ប្រែសម្រួលដោយ តាវ៉ែនតា

April 19, 2021

ចិនប្រកាសថា បានត្រៀមខ្លួនរួចជាស្រេចសម្រាប់ការបង្រួបបង្រួមកោះតៃវ៉ាន់

អនុរដ្ឋមន្ត្រីការបរទេសចិន Le Yucheng បានប្រកាសថា ប្រទេសនេះមិនអនុញ្ញាតឱ្យតៃវ៉ាន់ឯករាជ្យ ហើយថា បានត្រៀមខ្លួនជាស្រេច ដើម្បីបម្រួបបង្រួម ដោយមិនបោះបង់ជម្រើសណាមួយឡើយ។

«ការបង្រួបបង្រួមប្រទេស រវាងកោះតៃវ៉ាន់ និងចិនដីគោក គឺជាដំណើរការប្រវត្តិសាស្ត្រមួយ ដែលមិនត្រូវបានរារាំងដោយបុគ្គល និងកម្លាំងណាមួយ។ យើងមិនទុកឱ្យតៃវ៉ាន់ឯករាជ្យ» លោក Le Yucheng បានថ្លែងប្រាប់អ្នកសារព័ត៌មាន កាលពីថ្ងៃទី16មេសា។

នៅពេលត្រូវបានសួរអំពីពេលវេលាជាក់លាក់សម្រាប់ការបង្រួបបង្រួម លោក Le Yucheng បញ្ជាក់ថា «នោះគឺជាដំណើរការនៃប្រវត្តិសាស្ត្រ» ហើយថា ចិនប្ដេជ្ញាជំរុញយុទ្ធនាការបង្រួបបង្រួមប្រទេស។

«យើងបានត្រៀមខ្លួនជាស្រេចដើម្បីធ្វើគ្រប់យ៉ាងដែលអាចបង្រួបបង្រួម និងសន្តិភាព។ ប្រការនេះមានន័យថា យើងមិនសន្យាថានឹងបោះបង់ជម្រើសផ្សេងៗឡើយ» នេះបើតាមសម្ដីរបស់អនុរដ្ឋមន្ត្រីការបរទេសចិន Le Yucheng។

ការលើកឡើងរបស់លោក Le Yucheng ត្រូវបានធ្វើឡើងបន្ទាន់ពីប្រធានាធិបតីអាមេរិក Joe Biden និងនាយករដ្ឋមន្ត្រីជប៉ុន Yoshihide Suga ចេញសេចក្ដីប្រកាសរួមស្ដីអំពីបញ្ហាកោះតៃវ៉ាន់។ ចិនយល់ថា នេះគឺជាការជ្រៀតជ្រែកកិច្ចការផ្ទៃក្នុងរបស់ប្រទេសចិន និងបញ្ជូនសញ្ញាថា សហរដ្ឋអាមេរិក-ជប៉ុន កំពុងព្យាយាមរារាំងសកម្មភាពរបស់ទីក្រុងប៉េកាំងដែលមានបំណងបង្រួបបង្រួមប្រទេស។

លោក Le Yucheng សង្កត់ធ្ងន់ថា គោលការណ៍ «ចិនតែមួយ» គឺជាបន្ទាត់ក្រហមរបស់ប្រទេសចិន ហើយគ្មាននរណាម្នាក់គួរឆ្លងកាត់វានោះទេ បើទោះជានៅថ្នាក់ទាប ឬថ្នាក់ខ្ពស់។ «បញ្ហាតៃវ៉ាន់ គឺត្រូវយោងទៅលើផលប្រយោជន៍ស្នូលរបស់ប្រទេសចិន។ ជាសាមញ្ញគឺថា ពុំមានកន្លែងសម្រាប់កិច្ចព្រមព្រៀងណាមួយឡើយ»។

ចិនដីគោក តែងតែចាត់ទុកកោះតៃវ៉ាន់ជាខេត្តមួយរបស់ខ្លួន ដោយរង់ចាំតែពេលវេលាបង្រួបបង្រួមប៉ុណ្ណោះ បើទោះជាត្រូវប្រើប្រាស់កម្លាំងបាយ។ ភាពតានតឹងបានកើនឡើងនៅលើតំបន់ប្រទាញប្រទង់នេះ នៅពេលចិនដីគោក បានបង្កើនវត្តមាន និងធ្វើសកម្មភាពយោធានៅក្បែរកោះតៃវ៉ាន់ បង្ខំឱ្យកោះនេះបង្កើនការវិនិយោគទៅលើវិស័យយោធាដើម្បីពង្រឹងកម្លាំងការពារខ្លួន៕

ប្រភព៖ Global Times
ប្រែសម្រួល៖ បុត្រា

April 19, 2021

Category: អន្តរជាតិ