អន្តរជាតិ - La Reine Media

ហាម៉ាស បាញ់រ៉ុក្កែត 1,500គ្រាប់ ចូលទឹកដីអ៊ីស្រាអែល! គ្រាប់ខ្លះបានធ្លាក់ក្បែររោងចក្រនុយក្លេអែរ

កងជីវពលអ៊ីស្លាម ហាម៉ាស (Hamas) បានផ្លោងរ៉ុក្កែត រាប់ពាន់គ្រាប់ ទៅលើទីក្រុង និងទីរួមស្រុកជាច្រើនរបស់ប្រទេសអ៊ីស្រាអែល ក្នុងនោះ មានគ្រាប់រ៉ុក្កែតខ្លះ បានធ្លាក់ក្បែរតំបន់រោងចក្រនុយក្លេអែរ Dimona ផងដែរ។

កងពលតូច Al-Qassam របស់ ហាម៉ាស នៅប៉ាលេស្ទីន កាលពីថ្ងៃទី12 ឧសភា បានប្រកាសថា ពួកគេបានបាញ់រ៉ុក្កែត 15គ្រាប់ ពីតំបន់ ហ្គាហ្សា តម្រង់ទៅកាន់ទីរួមស្រុក Dimona ភាគខាងលិចប្រទេសអ៊ីស្រាអែល ក្បែររោងចក្រនុយក្លេអែរ Shimon Peres Negev របស់ប្រទេសនេះ។ រ៉ុក្កែត 50គ្រាប់ផ្សេងទៀត ក៏ត្រូវបានបាញ់សំដៅទីក្រុង Ashdod របស់អ៊ីស្រាអែលផងដែរ។

សាក្សីមួយចំនួនបាននិយាយថា ពួកគេបានឮសំឡេងផ្ទុះជាច្រើនលើក នៅលើអាកាស នៅពេលគ្រាប់រ៉ុក្កែតមួយចំនួន ត្រូវបានប្រព័ន្ធខែលដែក Iron Dome របស់អ៊ីស្រាអែល បាញ់ស្កាត់។ ពុំទាន់មានរបាយការណ៍អំពីការខូចខាតនៅក្នុងការវាយប្រហាររបស់ក្រុមហាម៉ាសនេះនៅឡើយ។

កងកម្លាំងការពារជាតិរបស់អ៊ីស្រាអែល (IDF) បញ្ជាក់ថា «រ៉ុក្កែត ជាច្រើនគ្រាប់ ដែលបាញ់ចេញពីតំបន់ហ្គាហ្សា» បានហោះចូលក្នុងតំបន់ភាគខាងត្បូងប្រទេសនេះ កាលពីថ្ងៃទី12 ខែឧសភា ក្នុងនោះមាន 1,050គ្រាប់ បានហោះចូលទឹកដីអ៊ីស្រាអែល និងប្រហែល 350គ្រាប់ជួបបញ្ហាបច្ចេកទេស បន្ទាប់ពីត្រូវបានបាញ់។

ក្នុងរយៈពេលប៉ុន្មានថ្ងៃកន្លងទៅ គ្រាប់រ៉ុក្កែត របស់ក្រុម ហាម៉ាស បានសម្លាប់ជនជាតិអ៊ីស្រាអែលចំនួន 7នាក់ ក្នុងនោះមានកុមារអាយុ 6ឆ្នាំម្នាក់ និងទាហានម្នាក់ផងដែរ។

ជាការសងសឹក IDF ក៏បានបើកការវាយការប្រហារជាច្រើនលើក តម្រង់គោលដៅ ហាម៉ាស នៅតំបន់ ហ្គាហ្សា។ រដ្ឋមន្ត្រីការពារប្រទេសអ៊ីស្រាអែល Benny Gantz ប្រកាសថា IDF នឹងបន្តវាយប្រហារតាមផ្លូវអាកាស ទៅលើគោលដៅរបស់ ហាម៉ាស នៅ ហ្គាហ្សា រហូតដល់ «ស្ថានការណ៍ស្ងប់ស្ងាត់ទាំងស្រុង»។

https://www.youtube.com/watch?v=I599cDoIjmY

ក្រសួងសុខាភិបាលប៉ាលេស្ទីន ឱ្យដឹងថា ពលរដ្ឋប្រទេសនេះចំនួន 53នាក់បានស្លាប់ ក្នុងនោះមានកុមារចំនួន 14នាក់ផងដែរ ខណៈដែល 320នាក់ផ្សេងទៀត បានរងរបួស នៅក្នុងការវាយប្រហារពីសំណាក់យន្តហោះចម្បាំងរបស់អ៊ីស្រាអែល នៅតំបន់ហ្គាហ្សា នាសប្ដាហ៍នេះ។

មូលហេតុនៃការប៉ះទង្គិចនេះ កើតឡើង បន្ទាប់ពី អ៊ីស្រាអែល កាត់បន្ថយការចូលទៅកាន់តំបន់ទីក្រុងបុរាណ យេរូសាឡឹម ក្នុងរដូវបុណ្យ Ramadan និងគំរាមបណ្ដេញជនជាតិប៉ាលេស្ទីនចំនួន 4គ្រួសារ ដែលកំពុងរស់នៅភាគខាងត្បូងនៃតំបន់ យេរូសាឡឹម ដើម្បីទុកកន្លែងឱ្យជនជាតិជ្វីហ្វ។

បញ្ហាខាងលើ បាននាំឱ្យប្រជាជនប៉ាលេស្ទីន ធ្វើបាតុកម្មប្រឆាំងតវ៉ា ហើយក៏មានការប៉ះទង្គិចជាមួយប៉ូលិសអ៊ីស្រាអែល អស់ជាច្រើនថ្ងៃ នៅខាងក្រៅវិហារ Al-Aqsa នៅតំបន់ យេរូសាឡឹមខាងត្បូង ដែលជាកន្លែងពិសិដ្ឋរបស់សាសនិកអ៊ីស្លាម បណ្ដាលឱ្យមនុស្សរាប់រយនាក់ត្រូវរងរបួស។ តុលាការ អ៊ីស្រាអែល បានផ្អាកការជំនុំជម្រះលើការបណ្ដេញចេញខាងលើ ប៉ុន្តែ នៅតែមិនអាចកាត់បន្ថយភាពតានតឹងបាន៕

ប្រភព៖ RT, Times of Israel
ប្រែសម្រួល៖ បុត្រា

May 13, 2021

(វីដេអូ)-អ៊ីស្រាអែល សម្លាប់មេបញ្ជាការហាម៉ាស របស់ប៉ាលេស្ទីន ប្រចាំទីក្រុង ហ្គាហ្សា

ក្រុមជីវពល ហាម៉ាស (Hamas) ដែលជាក្រុមប្រយុទ្ធ និងជាតិនិយម កាន់សាសនាអ៊ីស្លាម និកាយស៊ុននី នៃប្រទេសប៉ាលេស្ទីន បានទទួលស្គាល់ថា មេបញ្ជាការជាន់ខ្ពស់មួយចំនួនរបស់ខ្លួន បានបាត់បង់ជីវិត ក្នុងការវាយប្រហារតាមផ្លូវអាកាសរបស់អ៊ីស្រាអែល ក្នុងនោះមានទាំងមេបញ្ជាកងទ័ពប្រចាំទីក្រុងហ្គាហ្សា (Gaza) ផងដែរ។

អង្គភាពសន្តិសុខ Shin Bet របស់អ៊ីស្រាអែល កាលពីម្សិលមិញ (12ឧសភា) បានឱ្យដឹងថា មេបញ្ជាការកងពលតូច ប្រចាំទីក្រុងហ្គាហ្សា Bassem Issa ស្ថិតក្នុងចំណោមសមាជិកជាន់ខ្ពស់ 4រូប របស់កងជីវពលអ៊ីស្លាម ហាម៉ាស ដែលត្រូវបានសម្លាប់។ នាយករដ្ឋមន្ត្រី Benjamin Netanyahu ប្រកាសថា៖ «នេះគ្រាន់តែជាជំហានដំបូង។ យើងនឹងវាយប្រហារពួកគេរហូតដល់ថ្នាក់ ពួកគេមិនអាចនឹកស្មានដល់»។

https://www.youtube.com/watch?v=OIXB5fEd5Ks

ហាម៉ាស បានទទួលស្គាល់អំពីការស្លាប់របស់មេបញ្ជាការកងពលតូចខាងលើ និង «ក្រុមមេទ័ព រួមនឹងទាហានជាច្រើនរូបទៀត»។ «មេបញ្ជាការ និងទាហានរាប់រយនាក់ នឹងបន្តវេនរបស់ពួកគេ» សេចក្ដីប្រកាសរបស់ក្រុម ហាម៉ាស មានឃ្លាសរសេរដូច្នេះ។

យោងតាម Shin Bet ក្រៅពី Issa ពួកគេក៏បានសម្លាប់ Jumaa Tahle ជាអ្នកទទួលខុសត្រូវលើការកែលម្អលើប្រព័ន្ធកំណត់ទិសរបស់មីស៊ីល, Jamal Zibde ប្រធានអង្គភាពស្រាវជ្រាវ និងគ្រាប់រំសេវ រួមនឹង Hazem Hatib ជាប្រធានក្រុមវិស្វករ។

បន្ទាប់ពីការប្រកាសរបស់ Shin Bet ទីក្រុង Ashdod របស់អ៊ីស្រាអែល ត្រូវរងគ្រាប់រ៉ុក្កែត ជាបន្តបន្ទាប់។ សារព័ត៌មានរបស់អ៊ីស្រាអែល បានរាយការណ៍ថា កងទ័ពប្រទេសនេះ កំពុងត្រៀមទប់ទល់នឹងការវាយប្រហារថ្មី នៅទូទាំងទីក្រុង តែល អាវីវ (Tel Aviv)។

អ៊ីស្រាអែល ក៏បានឱ្យដឹងដែរថា ទាហាន 3នាក់របស់ប្រទេសនេះ បានរងគ្រោះដោយសារការវាយប្រហារដោយគ្រាប់រ៉ុក្កែតពីក្រុម ហាម៉ាស ក្នុងនោះមានម្នាក់បានបាត់បង់ជីវិត៕

ប្រភព៖ AFP
ប្រែសម្រួល៖ បុត្រា

May 13, 2021

អតីតបវរកញ្ញារបស់មីយ៉ានម៉ា ចូលធ្វើទាហាននៃទ័ពព្រៃ ដើម្បីប្រឆាំងរបបសឹក

Htet ស្តីស្អាតរបស់ប្រទេសភូមា ដែលធ្លាប់បានចូលរួមប្រលងបវរកញ្ញាអន្តរជាតិ បានបង្ហោះរូបថតស្ពាយកាំភ្លើង និងប្រកាសចូលរួមជាមួយកងកម្លាំងឧទ្ទាម ដើម្បីប្រឆាំងរបបសឹករបស់ឧត្តមសេនីយ៍ Min Aung Hlaing។

Htar Htet Htet អតីតបវរកញ្ញា វ័យ 32ឆ្នាំ របស់ប្រទេសភូមា កាលពីថ្ងៃទី11 ខែឧសភា បានបង្ហោះរូបថតរបស់ខ្លួននៅលើបណ្ដាញសង្គម Facebook។ ក្នុងរូបថតនេះ នាងស្លៀកឯកសណ្ឋានពណ៌ខ្មៅ និងស្ពាយកាំភ្លើងវែងនៅលើស្មា ជាមួយនឹងសំនេរមួយឃ្លា «ដល់ពេលដែលត្រូវប្រយុទ្ធប្រឆាំងនឹង» របបយោធាហើយ។

«បើទោះជាអ្នក កាន់កាំភ្លើង កាន់ប៊ិក ចុចកុំព្យូទ័រ ឬផ្ដល់ជំនួយជាប្រាក់កាសដល់ចលនាប្រជាធិបតេយ្យ យើងទាំងអស់គ្នាក៏សុទ្ធតែត្រូវប្រឹងប្រែងឱ្យអស់ពីកម្លាំងកាយចិត្ត ដើម្បីដណ្ដើមបានជោគជ័យ។ ខ្ញុំនឹងប្រយុទ្ធឱ្យអស់ពីសមត្ថភាព តាមដែលអាចធ្វើទៅបាន។ ខ្ញុំបានត្រៀមខ្លួនជាស្រេចក្នុងការបោះបង់គ្រប់យ៉ាង សូម្បីតែជីវិត» នាង Htar Htet Htet បានសរសេរដូច្នេះ។

ស្រីស្អាតរបស់មីយ៉ានម៉ា រូបនេះ ធ្លាប់បានធ្វើជាតំណាងរបស់ប្រទេស ទៅចូលរួមប្រលងបវរកញ្ញាសន្តិភាពអន្តរ ជាតិ នៅប្រទេសថៃ កាលពីឆ្នាំ2013។ នាងត្រូវបានគេជឿថា បានចូលរួមជាមួយទ័ពព្រៃ និងកំពុងស្ថិតនៅក្នុងតំបន់ព្រំដែន ដែលគ្រប់គ្រងដោយក្រុមបះបោរ។

គួររំលឹកថា ស្រីស្អាត Han Lay អាយុ 22ឆ្នាំ តំណាងឱ្យប្រទេសមីយ៉ានម៉ា នៅព្រឹត្តិការណ៍ប្រលងបវរកញ្ញាសន្តិភាពអន្តរជាតិនាឆ្នាំនេះ កន្លងមកក៏បាន «អំពាវនាវឱ្យសហគមន៍អន្តរជាតិ ជួយដល់ប្រទេសនេះ ក្នុងគ្រាដែលមនុស្សរាប់រយនាក់បានស្លាប់ ក្រោយរដ្ឋប្រហារយោធា របស់ឧត្តមសេនីយ៍ Min Aung Hlaing។

Htar Htet Htet អតីតបវរកញ្ញារបស់ប្រទេសភូមា

សារព័ត៌មាន Global New Light ដែលគ្រប់គ្រងដោយយោធាមីយ៉ានម៉ា ក្រោយមកក៏បានចុះផ្សាយដំណឹងតាមចាប់ខ្លួន Han Lay រួមនឹងបុគ្គលល្បីឈ្មោះប្រហែល 100នាក់ផ្សេងទៀត ដែលបានបញ្ចេញមតិគាំទ្របាតុកម្មប្រឆាំងរដ្ឋប្រហារ។ Han Lay ត្រូវបានគេដឹងថា កំពុងស្ថិតនៅប្រទេសថៃ ក្រោយការប្រលងបវរកញ្ញា។

រដ្ឋប្រហារយោធានៅប្រទេសភូមា បានកើតឡើងជាង 100ថ្ងៃមកហើយ ប៉ុន្តែ ស្ថានការណ៍នៅតែតានតឹងដដែល។ សមាគមគាំពារអ្នកទោសនយោបាយ (AAPP) បានឱ្យដឹងថា កងកម្លាំងប្រដាប់អាវុធនៃរបបយោធាភូមា បានបាញ់សម្លាប់បាតុករយ៉ាងតិច 781នាក់ ក្នុងនោះមាន 52នាក់ជាក្មេងតូចៗ និងបានចាប់ឃុំខ្លួនមនុស្សប្រមាណ 3,843នាក់។ ក៏ប៉ុន្តែ ភាគីរបបសឹកភូមា និយាយថា តួលេខអ្នកស្លាប់ ទាបជាងនេះឆ្ងាយ៕

ប្រភព៖ AFP
ប្រែសម្រួល៖ បុត្រា

May 12, 2021

អ៊ីស្រាអែល រងការវាយប្រហារដោយរ៉ុក្កែត ជិត 900គ្រាប់ ពីក្រុមហាម៉ាស ក្នុងរយៈពេលតែបីថ្ងៃប៉ុណ្ណោះ

កងទ័ពអ៊ីស្រាអែល បានឱ្យដឹងថា កងជីវពលហាម៉ាស (Hamas) នៅតំបន់ហ្គាហ្សា (Gaza) បានបាញ់ផ្លោងរ៉ុក្កែតជាង 1,000គ្រាប់ ចាប់តាំងពីថ្ងៃទី10 ខែឧសភា ឆ្នាំ2021 ក្នុងនោះមាន 850គ្រាប់ បានហោះចូលទឹកដីរបស់អ៊ីស្រាអែល។

វរសេនីយ៍ទោ Jonathan Conricus អ្នកនាំពាក្យនៃកងទ័ពការពារជាតិអ៊ីស្រាអែល (IDF) កាលពីថ្ងៃទី12 ខែឧសភា បាននិយាយថា កងជីវពលហាម៉ាស ចាប់ផ្ដើមបាញ់ផ្លោងរ៉ុក្កែតសំដៅតំបន់យេរូសាឡឹម (Jerusalem) តាំងពីម៉ោង18 នៃថ្ងៃទី10 ខែឧសភា ឆ្នាំ2021 និងបានធ្វើសកម្មភាពវាយប្រហារនេះក្នុងរយៈពេល 2ថ្ងៃជាប់ៗគ្នា។

ក្នុងអំឡុងពេលនោះ គ្រាប់រ៉ុក្កែតសរុប 850គ្រាប់ ដែលបាញ់ចេញពីតំបន់ហ្គាហ្សា បានហោះចូលទឹកដីអ៊ីស្រាអែល និងត្រូវប្រព័ន្ធការពារដែនអាកាស Iron Dome បាញ់កម្ទេច ឬធ្លាក់លើទឹកដីនេះ។ ចំណែករ៉ុក្កែតចំនួន 200គ្រាប់ទៀត ដែលបានធ្លាក់នៅក្នុងតំបន់ហ្គាហ្សា អាចបណ្ដាលមកពីមានបញ្ហា បន្ទាប់ពីបានបាញ់។ IDF បានបាញ់ទម្លាក់យន្តហោះគ្មានមនុស្សបើកមួយគ្រឿងរបស់ក្រុមហាម៉ាស កាលពីព្រឹកព្រលឹមថ្ងៃទី12 ខែឧសភា។

ប្រទេសអ៊ីស្រាអែល ក្រោយមកក៏បានសងសឹក ដោយយុទ្ធនាការយោធាដែលមានឈ្មោះថា «អ្នកការពារជញ្ជាំង» និងបានវាយប្រហារតាមផ្លូវអាកាសរាប់រយលើក ប្រឆាំងនឹងកងជីវពលហាម៉ាស នៅតំបន់ហ្គាហ្សា។

ការវាយប្រហារដោយរ៉ុក្កែតពីសំណាក់ក្រុម ហាម៉ាស បានសម្លាប់ជនជាតិអ៊ីស្រាអែលចំនួន 5នាក់ ខណៈដែលការវាយប្រហារសងសឹករបស់អ៊ីស្រាអែលវិញ បានសម្លាប់ជនជាតិប៉ាលេស្ទីន ចំនួន35នាក់ រាប់ចាប់ពីថ្ងៃទី10 ខែឧសភា ឆ្នាំ2021។

វរសេនីយ៍ទោ Jonathan Conricus និយាយថា អ៊ីស្រាអែល វាយប្រហារទៅលើតែគោលដៅយោធាប៉ុណ្ណោះ ហើយ IDF «នឹងប្រឹងប្រែងឱ្យអស់ពីសមត្ថភាព ដើម្បីកាត់បន្ថយផលប៉ះពាល់ដល់ជនស៊ីវិល» ប៉ុន្តែ ដោយសារក្រុម ហាម៉ាស បោះទីតាំងនៅក្នុងតំបន់ប្រជាជនរស់នៅ ដូច្នេះ ផលប៉ះពាល់ដោយអចេតនា ត្រូវបានគេចាត់ទុកថា មិនអាចគេចរួច។

កាលពីថ្ងៃទី11 ខែឧសភា IDF បានវាយប្រហារដោយយន្តហោះចម្បាំង លើអគារកម្ពស់ 12ជាន់ ដែលស្ថិតនៅក្បែរសមុទ្រនៅទីក្រុងហ្គាហ្សា។ ហាម៉ាស បានឱ្យដឹងថា នេះគឺជាអគារស្នាក់នៅរបស់ជនស៊ីវិល។ ក៏ប៉ុន្តែ វរសេនីយ៍ទោ Conricus ថ្លែងថា កងជីវពលហាម៉ាស ប្រើប្រាស់អគារនេះ «សម្រាប់កិច្ចការយោធា ដូច្នេះ វាមានលក្ខខណ្ឌគ្រប់គ្រាប់ ដែលត្រូវក្លាយជាគោលដៅ»។

IDF បានប្រើប្រាស់មធ្យោបាយជាច្រើន ក្នុងនោះក៏មានការហៅទូរស័ព្ទ ដើម្បីព្រមានដល់មនុស្សដែលកំពុងស្ថិតនៅក្នុងអគារខាងលើ អំពីការវាយប្រហារដែលខ្លួនជិតនឹងធ្វើឡើង។ ក្រោយការវាយប្រហារ ពុំមានពលរដ្ឋស៊ីវិលណាម្នាក់បានស្លាប់នោះឡើយ។

ការវាយប្រហារសងសឹកគ្នា រវាងអ៊ីស្រាអែល និងកងជីវពលហាម៉ាស របស់ប៉ាលេស្ទីន ក្នុងរយៈពេលប៉ុន្មានថ្ងៃកន្លងទៅនេះ ត្រូវបានគេអះអាងថា មានភាពខ្លាំងក្លាបំផុត រាប់ចាប់ពីសង្គ្រាមកាលពីឆ្នាំ2014 នៅតំបន់ហ្គាហ្សា នាំឱ្យសហគមន៍អន្តរជាតិ មានការបារម្ភ ខ្លាចឈានដល់ការគ្រប់គ្រងលែងបាន។ Tor Wennesland ប្រេសិតពិសេសនៃអង្គការសហប្រជាជាតិ ទទួលបន្ទុកសន្តិភាពនៅមជ្ឈិមបូព៌ា បានព្រមានអំពីលទ្ធភាពនៃការផ្ទុះសង្គ្រាមគ្រប់វិស័យរវាងភាគីទាំងពីរ។

នាយករដ្ឋមន្ត្រីអ៊ីស្រាអែល Benjamin Netanyahu បានព្រមានដល់ក្រុមប្រដាប់អាវុធនានារបស់ប៉ាលេស្ទីន ថា នឹងត្រូវ «ទទួលផលអាក្រក់យ៉ាងធ្ងន់ធ្ងរ» ខណៈដែលតំណាងរបស់ក្រុមហាម៉ាស ក៏បាននិយាយស្រដៀងគ្នានេះដែរ ដោយចោទទីក្រុង តែល អាវីវ ថា ជាអ្នកបង្កើតឱ្យមានការប៉ះទង្គិច៕

ប្រភព៖ AFP, Telegraph
ប្រែសម្រួល៖ បុត្រា

May 12, 2021

(វីដេអូ)-សាសនិកអ៊ីស្លាមរាប់ពាន់នាក់ ប្រជ្រៀតគ្នា ដង្ហែសពអាចារ្យដ៏ល្បីឈ្មោះមួយរូប នៅឥណ្ឌា ដោយមិនខ្ចីអើពើដល់ COVID-19!

បើទោះជា Covid-19 កំពុងតែរាតត្បាតយ៉ាងខ្លាំងក្លា និងយ៉ាងស្មុគស្មាញក៏ដោយ ក៏ក្រុមពលរដ្ឋនៅប្រទេសឥណ្ឌា ចំនួនរាប់ពាន់នាក់ នៅតែទៅចូលរួមពិធីបុណ្យសពរបស់អាចារ្យមួយរូបនៃប្រទេសនេះ។

ប៉ូលិសស្រុក Budaun នៃរដ្ឋ Uttar Pradesh បង្កើតក្រុមស្រាវជ្រាវមួយដើម្បីស៊ើបអង្កេតករណីមនុស្សរាប់ពាន់នាក់ប្រមូលផ្ដុំគ្នានៅលើដងផ្លូវ កាលពីថ្ងៃអាទិត្យ (9/ឧសភា) ដើម្បីធ្វើពិធីបុណ្យសពជូនអាចារ្យ Abdul Hamid Mohammad Salimul Qadri ដែលនេះ បានរំលោភលើវិធានការទប់ស្កាត់ Covid-19 របស់ប្រទេសឥណ្ឌា។

វីដេអូដែលត្រូវបានបង្ហោះលើបណ្ដាញសង្គម បានបង្ហាញឱ្យឃើញថា អ្នកចូលរួមពិធីបុណ្យសពនេះ ភាគច្រើនមិនបានពាក់ម៉ាសនោះទេ។ នៅពេលមើលពីលើអាកាស ហ្វូងមនុស្សប្រជ្រៀតគ្នា ហើយហាក់មិនមានបរិយាកាសដែលអាចដកដង្ហើមបានស្រួល។

មន្ត្រីនគរបាលមួយរូប ដែលស្ថិតក្នុងក្រុមស៊ើបអង្កេត បាននិយាយថា៖ «ហ្វូងមនុស្សរាប់ពាន់នាក់ បានដង្ហែក្បួនតាមដងផ្លូវក្នុងតំបន់ Budaun។ មនុស្សជាច្រើន មិនបានពាក់ម៉ាស»។

ពលរដ្ឋម្នាក់នៅក្នុងតំបន់ខាងលើ បាននិយាយថា៖ «សមត្ថកិច្ចក្នុងតំបន់ មិនបានដាក់របងរាំងខ្ទប់នោះទេ ក្នុងរយៈពេលប៉ុន្មានថ្ងៃចុងក្រោយនេះ។ បើសិនជាមានការគ្រប់គ្រងបានល្អ និងទាន់ពេល នោះហេតុការណ៍នេះនឹងមិនអាចកើតឡើងបានឡើយ»។

យោងតាមសារព័ត៌មាន The Print (ឥណ្ឌា) Qadri ដែលជាអាចារ្យមួយរូបដ៏ល្បីឈ្មោះប្រចាំតំបន់ Budaun បានទទួលមរណភាពកាលពីព្រឹកថ្ងៃទី6 ខែឧសភា បន្ទាប់ពីបានព្យាបាលជំងឺអស់មួយរយៈពេលយូរ។ មុនពេលពិធីបុណ្យសពត្រូវបានធ្វើឡើង សាកសពរបស់លោកត្រូវបានតម្កល់នៅក្នុងវិហារអ៊ីស្លាមមួយកន្លែង។ ក្រោយពីមានដំណឹងស្ដីពីមរណភាពនេះ អ៊ីស្លាមសាសនិកពីតំបន់ជាច្រើនរបស់ Budaun និងតំបន់ក្បែរខាង បាននាំគ្នាមកចូលរួមជូនដំណើរជាលើកចុងក្រោយ។

មន្ត្រីស៊ើបអង្កេតនៃក្រុមស្រាវជ្រាវរបស់ប៉ូលិសឥណ្ឌា បានឱ្យដឹងថា បច្ចុប្បន្ន ក្រុមស្រាវជ្រាវ «កំពុងពិនិត្យមើលវីដេអូបង្ហាញពីពិធីបុណ្យសព ដើម្បីកំណត់អត្តសញ្ញាណក្រុមមនុស្សដែលបានចូលរួម»។

តួលេខអ្នកវិជ្ជមាននឹង Covid-19 នៅក្នុងរដ្ឋ Uttar Pradesh បានថយចុះក្នុងអំឡុងច្រើនថ្ងៃចុងក្រោយនេះ ប៉ុន្តែ នៅតែមានកម្រិតខ្ពស់ ពោលគឺជាង 20,000នាក់ ក្នុងមួយថ្ងៃ។ ទូទាំងប្រទេសឥណ្ឌា បច្ចុប្បន្ន មានអ្នកវិជ្ជមាននឹងវីរុសនេះ សរុបចំនួន 23,340,426នាក់ ក្នុងនោះមានអ្នកស្លាប់សរុប 254,225នាក់ និងអ្នកជំងឺកំពុងព្យាបាល មានចំនួន 3,709,551នាក់៕

ប្រភព៖ The Print
ប្រែសម្រួល៖ បុត្រា

May 12, 2021

វីដេអូ-ក្រុម ហាម៉ាស បាញ់ស្រោចរ៉ុក្កែត 130គ្រាប់បន្ថែមទៀត ដើម្បីសងសឹក ក្រោយយន្តហោះចម្បាំងអ៊ីស្រាអែល កម្ទេចអគារ 13ជាន់

សំឡេងស៊ីរ៉ែន ប្រកាសអាសន្ន បានបន្លឺឡើងនៅទីក្រុង តែល អាវីវ (Tel Aviv) នៅពេលក្រុមហាម៉ាស បាញ់រ៉ុក្កែត 130គ្រាប់ សំដៅទឹកដីអ៊ីស្រាអែល ដើម្បីជាការសងសឹកទៅនឹងករណីអគារកម្ពស់ 13ជាន់របស់ខ្លួននៅ ហ្គាហ្សា (Gaza) ត្រូវបានបាញ់កម្ទេច។

សារព័ត៌មាន Al Jazeera បានឱ្យដឹងថា កងទ័ពអ៊ីស្រាអែល បន្តវាយប្រហារតាមផ្លូវអាកាស សំដៅតំបន់ហ្គាហ្សា ក្នុងថ្ងៃទី11 ខែឧសភា។ អគារដែលមានកម្ពស់ 13ជាន់ មួយកន្លែង បានដួលរលំ បន្ទាប់ពីត្រូវគ្រាប់រ៉ុក្កែតពីយន្តហោះចម្បាំងរបស់អ៊ីស្រាអែល។

https://www.youtube.com/watch?v=dWyUeI4Kq4w

ក្រុមមន្ត្រីសុខាភិបាលនៅតំបន់ហ្គាហ្សា បានឱ្យដឹងថា យ៉ាងហោចណាស់ មានជនជាតិប៉ាលេស្ទីនចំនួន 32នាក់ ក្នុងនោះមានកុមារចំនួន 10នាក់ បានស្លាប់ នៅក្នុងការវាយប្រហាររបស់អ៊ីស្រាអែល នៅតំបន់ហ្គាហ្សា ចាប់ពីយប់ថ្ងៃទី10 ខែឧសភា។

ទីបញ្ជាការកងទ័ពហាម៉ាស បានព្រមានអ៊ីស្រាអែល អំពីលទ្ធភាពនៃការពង្រីកការវាយប្រហារសំដៅតំបន់ យេរូសាឡឹមខាងកើត (East Jerusalem) និងស្នើឱ្យអ៊ីស្រាអែល ដកកម្លាំងចេញពីវិហារ Al-Aqsa។ ហាម៉ាស ក៏បានប្រកាសថា បានបាញ់ស្រោចរ៉ុក្កែត 130គ្រាប់ទៅលើទឹកដីអ៊ីស្រាអែលផងដែរ កាលពីយប់ថ្ងៃទី11 ខែឧសភា ដើម្បីសងសឹកចំពោះការវាយប្រហារតាមផ្លូវអាកាសពីសំណាក់អ៊ីស្រាអែល។

នេះគឺជាលើកដំបូងក្នុងអំឡុង 2ឆ្នាំកន្លង ដែលហាម៉ាស បើកការវាយប្រហារដោយរ៉ុក្កែត សំដៅទីក្រុង តែល អាវីវ ដែលជាមជ្ឈមណ្ឌលសេដ្ឋកិច្ចរបស់អ៊ីស្រាអែល។ ក្រុមហាម៉ាស ក៏បានឱ្យដឹងថា ខ្លួនបានប្រើប្រាស់រ៉ុក្កែតថ្មីមួយប្រភេទដែលមានឈ្មោះថា Sijeel ដើម្បីឆ្លងកាត់ប្រព័ន្ធការពារដែនអាកាស Iron Dome របស់អ៊ីស្រាអែល។

យោងតាមសារព័ត៌មាន Al Jazeera រដ្ឋាភិបាលអ៊ីស្រាអែល បានប្រកាសអាសន្ននៅទីក្រុងឡូដ (Lod) ភាគអាគ្នេយ៍នៃទីក្រុង តែល អាវីវ ក្នុងគ្រាអំពើហិង្សាផ្ទុះឡើង បន្ទាប់ពីជនជាតិប៉ាលេស្ទីនម្នាក់ ត្រូវបានជនជាតិជ្វីហ្វសម្លាប់។

មុននេះ ក្រុមប៉ូលិសអ៊ីស្រាអែល បានបង្ក្រាបការប្រមូលផ្ដុំគ្នានៅវិហារ Al Aqsa ក្នុងក្រុងចាស់ យេរូសាឡឹម ក្នុងថ្ងៃទីបី ដោយការបាញ់គ្រាប់ដែកស្រោបជ័រកៅស៊ូ និងគ្រាប់បែកផ្សែងបង្ហូរទឹកភ្នែក សំដៅអ្នកដែលបានចូលរួមពិធីហែក្បួនប៉ាលេស្ទីន នៅខាងក្នុងវិហារ ក្នុងអំឡុងប៉ុន្មានថ្ងៃចុងក្រោយនៃរដូវបុណ្យ រ៉ាម៉ាដាន (Ramadan)។

ជនជាតិប៉ាលេស្ទីនជាង 700នាក់ បានរងរបួសនៅតំបន់ យេរូសាឡឹម និងតំបន់វែស បែង (West Bank) ក្នុងអំឡុងពេលថ្មីៗនេះ។

នៅចំពោះមុខអំពើហិង្សា ដែលចេះតែកើនឡើង រវាងជនជាតិអ៊ីស្រាអែល និងប៉ាលេស្ទីន ប្រទេសជាច្រើន រួមនឹងអង្គការអន្តរជាតិនានា បានបន្តអំពាវនាវឱ្យគ្រប់ភាគីអត់ធ្មត់ និងចៀសវាងការសម្លាប់គ្នា ខណៈអង្គការសហប្រជាជាតិ កំពុងដោះស្រាយបញ្ហានេះ៕

ប្រភព៖ Reuters, AFP
ប្រែសម្រួល៖ បុត្រា

May 12, 2021

ក្រុមហ៊ុន NOVAVAX អភិវឌ្ឍវ៉ាក់សាំងមួយប្រភេទ ដែលអាចទប់ស្កាត់ទាំងវីរុសCOVID-19 ទាំងវីរុសគ្រុនផ្ដាសាយ

ក្រុមហ៊ុនបច្ចេកវិទ្យាជីវសាស្ត្រ Novavax របស់សហរដ្ឋអាមេរិក កាលពីថ្ងៃទី10 ខែឧសភា បានឱ្យដឹងថា ការពិសោធវ៉ាក់សាំងបង្ការទាំងវីរុសCovid-19 ទាំងវីរុសផ្ដាសាយ នៅលើសត្វ បានទទួលលទ្ធផលល្អ។

យោងតាមក្រុមហ៊ុន Novavax ការស្រាវជ្រាវខាងលើបង្ហាញថា វ៉ាក់សាំងប្រភេទរួមផ្សំនេះ បង្កើតអង្គបដិប្រាណខ្លាំងក្លា អាចទប់ស្កាត់ការឆ្លងវីរុសទាំងពីរប្រភេទដែលបាននិយាយខាងដើម នៅពេលអ្នកវិទ្យាសាស្ត្រពិសោធនៅលើកណ្ដុរ និងកញ្ជ្រោង។

មន្ត្រីជាន់ខ្ពស់ម្នាក់របស់ Novavax យល់ថា ក្នុងវិបត្តិ Covid-19 បើទោះជាអត្រានៃការឆ្លងវីរុសផ្ដាសាយមានកម្រិតទាប ប៉ុន្តែនេះនៅតែជាហានិភ័យគួរឱ្យបារម្ភ សម្រាប់ប្រព័ន្ធសុខាភិបាលពិភពលោក និងតម្រូវការស្ដីពីវ៉ាក់សាំងដែលមានប្រសិទ្ធភាពខ្ពស់ជាង អាចបង្ការវីរុសច្រើនប្រភេទ ក្នុងនោះមានវីរុសផ្ដាសាយផងដែរ គឺជាប្រការសំខាន់ជាងពេលណាៗទាំងអស់។

វ៉ាក់សាំងដែលកំពុងត្រូវបានក្រុមហ៊ុន Novavax អភិវឌ្ឍនេះគឺជាប្រភេទវ៉ាក់សាំងដែលរួមផ្សំរវាងវ៉ាក់សាំងបង្ការវីរុសផ្ដាសាយ NanoFlu និងវ៉ាក់សាំងបង្ការវីរុសCovid-19។ ក្រុមអ្នកវិទ្យាសាស្ត្រ បានចាក់វ៉ាក់សាំងនេះទៅលើសត្វកណ្ដុរ ហើយក្រោយមក ឱ្យពួកវាប៉ះពាល់ Covid-19។ លទ្ធផលបានបង្ហាញថា កណ្ដុរទាំងនេះនៅតែរក្សាបាននូវទម្ងន់ដើមរបស់ពួកវា បើធៀបនឹងកណ្ដុរដែលត្រូវបានចាក់ថ្នាំ placebo (ថ្នាំដែលមិនមានសារធាតុសកម្ម)។ ពេលពិនិត្យសំណាកសួតរបស់សត្វដែលត្រូវបានចាក់វ៉ាក់សាំង ក្រុមអ្នកវិទ្យាសាស្ត្ររកឃើញថា ពួកវាមិនបានឆ្លង Covid-19 ឡើយ។

Novavax អះអាងថា វ៉ាក់សាំងទប់ស្កាត់ Covid-19 ឈ្មោះ NVX-CoV2373 របស់ពួកគេ មានប្រសិទ្ធភាព 100% ក្នុងការទប់ស្កាត់មិនឱ្យមានករណីឈឺធ្ងន់ ក្នុងដំណាក់កាលទីបីនៃការពិសោធលើមនុស្សនៅអង់គ្លេស និងមានប្រសិទ្ធភាពទូទៅក្នុងកម្រិត 89.7%។ ចំណែក NanoFlu វិញគឺជាវ៉ាក់សាំងបង្ការវីរុសផ្ដាសាយ ដែលត្រូវបានអភិវឌ្ឍដោយក្រុមហ៊ុន Novavax ដូចគ្នា។ វ៉ាក់សាំងទាំងពីរនេះ សុទ្ធតែកំពុងត្រូវបានពិសោធដាច់ដោយឡែក នៅលើមនុស្ស ក្នុងដំណាក់កាលចុងក្រោយ និងមិនទាន់ត្រូវបានរដ្ឋាភិបាលអនុម័តនៅឡើយ៕

ប្រភព៖ AFP, France24
ប្រែសម្រួល៖ បុត្រា

May 11, 2021

ស្ថានភាពវីរុស Covid-19 នៅបណ្ដាប្រទេសក្បែរខាងកម្ពុជា

ក្រសួងសុខាភិបាលកម្ពុជា នាព្រឹកថ្ងៃទី11 ខែឧសភា ឆ្នាំ2021 នេះ ឱ្យដឹងថា បានរកឃើញអ្នកវិជ្ជមានថ្មីចំនួន 480នាក់, ស្លាប់ 5នាក់ និងជាសះស្បើយចំនួន 350នាក់ នៅក្នុងអំឡុងថ្ងៃទី10 ខែឧសភា ឆ្នាំ2021។

គិតមកដល់ថ្ងៃទី11 ខែឧសភានេះ កម្ពុជា មានអ្នកវិជ្ជមាននឹងវីរុសCovid-19 សរុបចំនួន 20,223នាក់ ក្នុងនោះមានអ្នកស្លាប់សរុប 131នាក់ និង 11,922នាក់ កំពុងទទួលការព្យាបាល។

ដោយឡែក ប្រទេសជិតខាងរបស់កម្ពុជា គឺ ប្រទេសវៀតណាម បច្ចុប្បន្នមានអ្នកឆ្លងសរុប 3,489នាក់ ក្នុងនោះ មានអ្នកស្លាប់សរុបចំនួន 35នាក់ និងកំពុងព្យាបាល 836នាក់។ ប្រទេសនេះក៏ទើបរកឃើញអ្នកវិជ្ជមានថ្មីចំនួន 28នាក់។

ប្រទេសថៃ ដែលនៅជាប់នឹងកម្ពុជាដែរនោះ បច្ចុប្បន្ន អ្នកវិជ្ជមាននឹង Covid-19 សរុប កើនឡើងដល់ 86,924នាក់ ក្នុងនោះក៏មានអ្នកស្លាប់ចំនួន 452នាក់ និងកំពុងព្យាបាល 29,435នាក់។ ប្រទេសថៃ ក៏ទើបតែរកឃើញករណីឆ្លងថ្មីចំនួន 1,919នាក់។

ចំណែកប្រទេសឡាវវិញ មានអ្នកវិជ្ជមានសរុប 1,327នាក់ ក្នុងនោះមានអ្នកស្លាប់តែ 1នាក់គត់ និងកំពុងព្យាបាលចំនួន 1,088នាក់។ ករណីឆ្លងថ្មីនៅប្រទេសឡាវ ក្នុងអំឡុង 24ម៉ោងនៃថ្ងៃទី10 ខែឧសភា មិនទាន់ត្រូវបានប្រកាសឱ្យដឹងនៅឡើយ៕

ប្រភព៖ ក្រសួងសុខាភិបាល, Worldometers
ដកស្រង់ និងប្រែសម្រួល៖ បុត្រា

May 11, 2021

(វីដេអូ)-ទិដ្ឋភាពរ៉ុក្កែតអ៊ីស្រាអែល បាញ់ស្ទាក់កាំជ្រួចហ្វូងរាប់រយដើមរបស់ក្រុមហាម៉ាស ដែលកំពុងសំដៅមកលើតំបន់យេរូសាឡិម

ប្រព័ន្ធការពារដែនអាកាសអ៊ីស្រាអែល បានដំណើរការស្រុះគ្នា នៅពេលរ៉ុក្កែតចំនួន 150គ្រាប់ ត្រូវបានកម្លាំងប្រដាប់អាវុធហាម៉ាស (Hamas) បាញ់សំដៅមកកាន់ប្រទេសនេះ ក្នុងអំឡុងភាពតានតឹងរវាងអ៊ីស្រាអែល និងប៉ាលេស្ទីន កំពុងកើនឡើងខ្ពស់។

ក្រសួងការពារជាតិអ៊ីស្រាអែល បានប្រកាសថា កងកម្លាំងប្រដាប់អាវុធប៉ាលេស្ទីន បានបាញ់កាំជ្រួចហ្វូលចំនួន 150គ្រាប់ ស្រោចមកលើទឹកដីរបស់អ៊ីស្រាអែល ក្នុងយប់ថ្ងៃទី10 ខែឧសភា ក្នុងនោះ រាប់សិបគ្រាប់ត្រូវបានប្រព័ន្ធការពារដែនអាកាស Iron Dome របស់អ៊ីស្រាអេល រាំងខ្ទប់។

រូបភាពដែលត្រូវបានសារព័ត៌មាននានាចុះផ្សាយ បង្ហាញថា រ៉ុក្កែតជាច្រើនគ្រាប់ ត្រូវបានបាញ់ចេញពីប្រព័ន្ធ Iron Dome ផ្សេងៗគ្នា តម្រង់ទៅកាន់គ្រាប់កាំជ្រួចហ្វូង នាពេលរាត្រី ដើម្បីទប់ស្កាត់កាំជ្រួចហ្វូងរបស់សត្រូវ ដែលកំពុងសំដៅមក។ Iron Dome ជាធម្មតា តែងបាញ់កម្ទេចរ៉ុក្កែតទាំងឡាយណាដែលសំដៅមកកាន់តំបន់ទីក្រុង និងបោះបង់គ្រាប់រ៉ុក្កែតដែលត្រូវបានកំណត់ដឹងថា នឹងធ្លាក់ទៅលើតំបន់ដាច់ស្រយាល។

Abu Ubaida អ្នកនាពាក្យរបស់ក្រុមហាម៉ាស បានឱ្យដឹងថា កម្លាំងរបស់ខ្លួនបានបាញ់រ៉ុក្កែតសំដៅលើសត្រូវដែលកំពុងគ្រប់គ្រងតំបន់ យេរូសាឡិម (Jerusalem) ដើម្បីឆ្លើយតបនឹងអំពើឧក្រិដ្ឋ និងភាពកោងកាចសំដៅលើតំបន់ពិសិដ្ឋ ក៏ដូចជាប្រជាជននៅវិហារ Sheikh Jarrah និង Al-Aqsa»។

នាយករដ្ឋមន្ត្រីអ៊ីស្រាអែល Benjamin Netanyahu បានប្រកាសថា កងកម្លាំងប៉ាលេស្ទីន បានឆ្លងកាត់ «បន្ទាត់ក្រហម» នៅពេលបាញ់រ៉ុក្កែត ស្រោចមកលើតំបន់យេរូសាឡិម ជាលើកដំបូង ចាប់តាំងពីឆ្នាំ2014។ កងទ័ពអ៊ីស្រាអែល ក្រោយមកក៏បានវាយប្រហារតាមផ្លូវអាកាស សំដៅលើទីតាំងជាច្រើននៅទីក្រុងហ្គាហ្សា (Gaza) របស់ប៉ាលេស្ទីន បណ្ដាលឱ្យមនុស្សយ៉ាងតិច 20នាក់ បានបាត់បង់ជីវិត។

ហេតុការណ៍បាញ់ប្រហារគ្នានេះ កើតឡើងនៅពេលប្រជាជនប៉ាលេស្ទីន ប៉ះទង្គិចជាមួយក្រុមប៉ូលិសអ៊ីស្រាអែល អស់ជាច្រើនថ្ងៃ នៅខាងក្រៅវិហារ Al-Aqsa ភាគខាងកើតតំបន់យេរូសាឡិម ជាទីតាំងពិសិដ្ឋរបស់សាសនិកអ៊ីស្លាម ដែលនាំឱ្យមានអ្នករងរបួសរាប់រយនាក់។

ការប៉ះទង្គិចខាងលើ ដែលបាននាំឱ្យមានភាពតានតឹង ក្រោយពីអ៊ីស្រាអែល បានរឹតបន្តឹងលើការចូលទៅកាន់តំបន់ យេរូសាឡិម នៅក្នុងរដូវ Ramadan និងគំរាមបណ្ដេញជនជាតិប៉ាលេស្ទីនចំនួន 4គ្រួសារ ដើម្បីទុកទីតាំងឱ្យជនជាតិជ្វីហ្វរស់នៅ។

ការបាញ់ប្រហារដាក់គ្នា រវាងអ៊ីស្រាអែល និងប៉ាលេស្ទីន កំពុងធ្វើឱ្យប្រទេសជាច្រើនមានការព្រួយបារម្ភ។ សហរដ្ឋ អាមេរិក បានអំពាវនាវឱ្យបញ្ឈប់ការបាញ់ផ្លោងរ៉ុក្កែត មកលើអ៊ីស្រាអែល និងស្នើឱ្យគ្រប់ភាគី បន្ថយភាពតានតឹងជាបន្ទាន់។ អង្គការសហប្រជាជាតិ កាលពីថ្ងៃទី7 ខែឧសភា ក៏បានអំពាវនាវឱ្យមានការអត់ធ្មត់ ខណៈរុស្ស៊ី និងបណ្ដាប្រទេសនៅមជ្ឈិមបូព៌ា ថ្កោលទោសលើការបណ្ដេញជនជាតិប៉ាលេស្ទីន ពីសំណាក់រដ្ឋាភិបាលអ៊ីស្រាអែល៕

ប្រភព៖ Reuters
ប្រែសម្រួល៖ បុត្រា

May 11, 2021

សាកសពមនុស្សរាប់សិបនាក់ ដែលសង្ស័យថាជា អ្នកជំងឺ Covid-19 អណ្ដែតដេរដាសលើផ្ទៃទន្លេនៅឥណ្ឌា

ឥណ្ឌា៖ សាកសពយ៉ាងតិច ចំនួន 40នាក់ ដែលបានអណ្ដែតចូលក្បែរឆ្នេរទន្លេគង្គា ស្ថិតនៅកណ្ដាលរដ្ឋ Biha និងរដ្ឋ Uttar Pradesh ត្រូវបានក្រុមមន្ត្រីសង្ស័យថា គឺជាអ្នកជំងឺ Covid-19 ដែលមិនបានបូជា។

«ហេតុការណ៍នេះបានកើតឡើងនៅឯទន្លេគង្គា ក្នុងស្រុក Buxar ក្បែរបន្ទាត់ខណ្ឌចែករដ្ឋ Bihar និង Uttar Pradesh។ យើងបានស្នើឱ្យអាជ្ញាធរ ដោះស្រាយបញ្ហានេះ ដោយការបូជាភ្លើង និងបញ្ចុះ» Ashok Kumar ជាមន្ត្រីនៅមូលដ្ឋាន បាននិយាយដូច្នេះ កាលពីថ្ងៃទី10 ខែឧសភា។

ប្រភពព័ត៌មានពីស្រុក Buxar បានឱ្យដឹងថា ចំនួនសាកសពដែលអណ្ដែតមកក្បែរច្រាំងទន្លេ អាចឡើងដល់ 100នាក់ ក្នុងនោះសាកសពជាច្រើនកំពុងស្អុយរលួយ និងប្រហែលជាបានស្ថិតនៅក្រោមទឹកទន្លេអស់ជាច្រើនថ្ងៃមកហើយ។ មន្ត្រីមួយចំនួនបានសំដែងការព្រួយបារម្ភខ្លាំង ដោយសង្ស័យថា សាកសពទាំងនោះអាចជាអ្នកដែលបានស្លាប់ដោយសារ Covid-19។

អ្នកស្រុកជឿថា សាកសពអាចត្រូវបានគេបណ្ដែតចូលទន្លេ ព្រោះតែទីតាំងបូជាសពកំពុងពេញណែន ឬគ្រួសារសពមិនមានប្រាក់គ្រប់គ្រាន់ដើម្បីទិញឧស។ Kameshwar Pandey ដែលជាអ្នករស់នៅក្បែរទន្លេ បាននិយាយថា៖ «នេះគឺជាអ្វីដែលធ្វើឱ្យយើងរន្ធត់ខ្លាំង»។

មហារោគ Covid-19 នៅតែរាតត្បាតប្រទេសឥណ្ឌា និងកំពុងឆ្លងរាលដាលយ៉ាងលឿនក្នុងតំបន់ជនបទដ៏ធំរបស់ប្រទេសនេះ បណ្ដាលឱ្យប្រព័ន្ធសុខាភិបាល ក៏ដូចជាទីតាំងបូជាសព និងទីបញ្ចុះសព ត្រូវលើសចំណុះ។ រដ្ឋ Bihar និង រដ្ឋ Uttar Pradesh ស្ថិតក្នុងចំណោមរដ្ឋដែលក្រីក្របំផុតរបស់ប្រទេសឥណ្ឌា។

យោងតាមស្ថិតិរបស់រដ្ឋាភិបាលឥណ្ឌា អ្នកជំងឺ Covid-19 ប្រមាណ 4,000នាក់ បានស្លាប់ជារៀងរាល់ថ្ងៃ ក្នុងគ្រាដែលករណីស្លាប់សរុប បានកើនដល់ជាង 250,000នាក់ នៅក្នុងចំណោមអ្នកវិជ្ជមាននឹងវីរុសCovid-19 ជិត 23លាននាក់។ ប៉ុន្តែ ក្រុមអ្នកជំនាញ ជឿថា តួលេខពិតអាចខ្ពស់ជាងនេះច្រើនដង។

រលកទីពីររបស់ Covid-19 បានរុញច្រានប្រព័ន្ធសុខាភិបាលឥណ្ឌា ឱ្យប្រឈមនឹងការដួលរលំ បណ្ដាលឱ្យអ្នកជំងឺត្រូវស្លាប់ដោយសារខ្វះអុកស៊ីសែន មិនបានចូលព្យាបាលនៅមន្ទីរពេទ្យ និងខ្វះថ្នាំសង្កូវ៕

ប្រភព៖ AFP
ប្រែសម្រួល៖ បុត្រា

May 11, 2021

Category: អន្តរជាតិ