អន្តរជាតិ - La Reine Media

ឆេះមន្ទីរពេទ្យព្យាបាលជំងឺ COVID-19 បណ្ដាលឱ្យមានអ្នកស្លាប់យ៉ាងតិច 42 នាក់

អ៊ីរ៉ាក់៖ មន្ទីរពេទ្យមួយដែលមានជំនាញក្នុងការព្យាបាលជំងឺ COVID-19 នៅទីក្រុង Nassiriya បានជួបគ្រោះអគ្គិភ័យ បណ្ដាលឱ្យមនុស្សយ៉ាងហោចណាស់ 100 នាក់ ត្រូវរងរបួស និងបាត់បង់ជីវិត។

អគ្គិភ័យដែលបានកើតឡើងកាលពីថ្ងៃទី 12 ខែកក្កដា នៅមន្ទីរពេទ្យ al-Hussain នាទីក្រុង Nassiriya ស្ថិតនៅភាគខាងត្បូងប្រទេសអ៊ីរ៉ាក់នេះ បានបណ្ដាលឱ្យមនុស្សយ៉ាងតិច 42 នាក់ បានស្លាប់ និងជាង 60 នាក់ រងរបួស។ មូលហេតុនៃអគ្គិភ័យនេះ ត្រូវបានគេជឿថា កើតឡើងដោយសារការផ្ទុះបំពង់អុកស៊ីហ្សែន។ ចំនួនអ្នកស្លាប់ អាចកើនឡើងបន្តទៀត ដោយសារមានមនុស្សជាច្រើនកំពុងបាត់ខ្លួននៅឡើយ។

ក្រុមមន្ត្រីមូលដ្ឋាន បានឱ្យដឹងថា សកម្មភាពជួយសង្គ្រោះ ត្រូវបានធ្វើឡើងមិនឈប់ឈរ ក្រោយពីអគ្គិភ័យត្រូវបានគ្រប់គ្រង ប៉ុន្តែ ដោយសារផ្សែងក្រាស់ខ្លាំង ដំណើរការជួយសង្គ្រោះ ក៏ត្រូវជួបការលំបាក។

របាយការណ៍បឋមរបស់ប៉ូលិស បានឱ្យដឹងថា បំពង់អុកស៊ីហ្សែនសម្រាប់ព្យាបាលអ្នកជំងឺ COVID-19 បានផ្ទុះ និងបណ្ដាលឱ្យកើតមានអគ្គិភ័យនេះ។

នេះគឺជាករណីឆេះមន្ទីរពេទ្យទីពីរនៅប្រទេសនេះ ក្នុងរយៈពេល 3 ខែកន្លង។ កាលពីខែមេសា មន្ទីរពេទ្យ Ibn Khatib នៅរដ្ឋធានី បាកដាដ ក៏ជួបគ្រោះអគ្គិភ័យ ដោយសារតែផ្ទុះបំពង់អុកស៊ីហ្សែន បណ្ដាលឱ្យមនុស្សចំនួន 82 នាក់ បានស្លាប់ និង 110 នាក់រងរបួស៕

ប្រភព៖ Reuters
ប្រែសម្រួល៖ បុត្រា

July 13, 2021

វ៉ាក់សាំង COVID-19 ៖ WHO ព្រមានចំពោះការចាក់វ៉ាក់សាំងលាយឡំគ្នា

អង្គការសុខភាពពិភពលោក (WHO) បានព្រមានដល់បណ្ដាប្រទេសថា មិនគួរប្រញាប់ចាក់វ៉ាក់សាំងលាយឡំគ្នា រវាងវ៉ាក់សាំងប្រភេទផ្សេងគ្នា ដោយសារតែមិនទាន់មានទិន្នន័យវិទ្យាសាស្ត្រជាក់លាក់ដែលបញ្ជាក់ថា មានប្រសិទ្ធភាព។

ពិភពលោក បានរកឃើញអ្នកវិជ្ជមាននឹង COVID-19 សរុបជាង 188 លាននាក់ ក្នុងនោះមានជាង 4 លាននាក់បានស្លាប់, ជាង 171 លាននាក់បានជា និងជាង 12 លាននាក់កំពុងព្យាបាល។ នេះបើតាមគេហទំព័រ Worldometers។

Soumya Swaminathan ដែលជាប្រធានក្រុមអ្នកវិទ្យាសាស្ត្ររបស់ WHO មានយោបល់ថា មិនគួរយកវ៉ាក់សាំងរបស់ក្រុមហ៊ុនមួយ មកចាក់លាឡំជាមួយវ៉ាក់សាំងរបស់ក្រុមហ៊ុនផ្សេង លើមនុស្សម្នាក់នៅឡើយ។ លោកស្រី Soumya Swaminathan ថ្លែងថា នេះគឺជា «ប្រការគ្រោះថ្នាក់» ព្រោះថា មិនទាន់ដឹងច្បាស់អំពីផលប៉ះពាល់ដល់សុខភាព។

ប្រធាន WHO លោក Tedros Adhanom Ghebreyesus ក៏បានអំពាវនាវដល់បណ្ដាប្រទេសថា មិនគួរប្រញាប់បញ្ជាទិញ និងផ្ដើមយុទ្ធនាការចាក់វ៉ាក់សាំងដូសបន្ថែម ទៅលើអ្នកដែលបានទទួលការចាក់វ៉ាក់សាំងរួចរាល់ ក្នុងគ្រាដែលប្រទេសជាច្រើន មិនទាន់មានវ៉ាក់សាំង។

«ប្រទេស និងដែនដីមួយចំនួន កំពុងបញ្ជាទិញវ៉ាក់សាំងសម្រាប់ចាក់បន្ថែម (ដូសទីបី) ចំនួនរាប់លានដូស ខណៈប្រទេសដទៃជាច្រើន ពុំទាន់មានវ៉ាក់សាំងដើម្បីចាក់ឱ្យបុគ្គលិកសុខាភិបាល និងក្រុមពលរដ្ឋងាយរងគ្រោះ។ ជំនួសឱ្យការប្រើប្រាស់ Moderna និង Pfizer ជាដូសបន្ថែម នៅក្នុងប្រទេសដែលមានអត្រាការចាក់វ៉ាក់សាំងកម្រិតខ្ពស់ យើងស្នើឱ្យពួកគេបង្វែរកម្លាំងទាំងស្រុងមកឱ្យ COVAX ដែលជាកម្មវិធីផ្គត់ផ្គង់វ៉ាក់សាំងដល់បណ្ដាប្រទេសក្រីក្រ ប្រទេសដែលមានប្រាក់ចំណូលទាប និងមធ្យម ដែលមានអត្រានៃការចាក់វ៉ាក់សាំងទាប» លោក Tedros ថ្លែងដូច្នេះ។

COVAX បានឱ្យដឹងថា បានចុះកិច្ចព្រមព្រៀងទិញ-លក់វ៉ាក់សាំងចំនួន 550 លានដូស ជាមួយក្រុមហ៊ុនផលិតវ៉ាក់សាំងរបស់ ចិន ចំនួន 2 គឺ Sinopharm និង Sinovac ដើម្បីផ្ដល់ឱ្យបណ្ដាប្រទេសក្រីក្រ៕

ប្រភព៖ Reuters, CNN
ប្រែសម្រួល៖ បុត្រា

July 13, 2021

ទឹកជំនន់ “លេបយក” កប៉ាល់ និងផ្ទះជាច្រើន នៅប្រទេសចិន

ជំនន់ទឹកភ្លៀង បានគួច និងវាយពន្លិចកប៉ាល់ជាច្រើនគ្រឿង នៅពេលមេឃមានភ្លៀងធ្លាក់ខ្លាំង ដែលបានវាយប្រហារលើទីក្រុង Bazhong នៃខេត្ត Sichuan ភាគឦសានប្រទេសចិន។

ក្នុងវីដេអូ ដែលបានបង្ហោះនៅលើបណ្ដាញសង្គម បង្ហាញថា ទឹកជំនន់ កំពុងហូរគួចយ៉ាងខ្លាំងក្លានៅក្នុងតំបន់ភ្នំមួយនៃទីក្រុង Bazhong កាលពីថ្ងៃទី 10 កក្កដា បន្ទាប់ពីភ្លៀងចាប់ផ្ដើមធ្លាក់កាលពីដើមខែនេះ។ កប៉ាល់ជាច្រើនគ្រឿងត្រូវបានទឹកជំនន់គួចយកទៅទម្លាក់ចូលទៅក្នុងទីជ្រៅនៃទន្លេ។

ភ្លៀងធ្លាក់ខ្លាំងនៅក្នុងខេត្ត Sichuan ចាប់ពីថ្ងៃទី 9 កក្កដា បានបណ្ដាលឱ្យទឹកទន្លេចំនួន 14 នៅប្រទេសចិន ត្រូវឡើងខ្ពស់ និងគួចយកទាំងស្ពាន កប៉ាល់ និងផ្ទះជាច្រើន ហើយនាំឱ្យមនុស្សជាង 4,600 នាក់ ត្រូវជម្លៀសខ្លួនទៅកាន់ទីសុវត្ថិភាព។

https://www.youtube.com/watch?v=H25xs3dN4LQ

មិនទាន់មានរបាយការណ៍អំពីការស្លាប់ ប៉ុន្តែ សារព័ត៌មានចិន បានឱ្យដឹងថា ជំនន់ទឹកភ្លៀងបានប៉ះពាល់ដល់មនុស្សជាង 120,000 នាក់ និងបង្កការខូចខាតជាង 176 លានយុន (ប្រហែល 27 លានដុល្លារអាមេរិក)។

មជ្ឈមណ្ឌលជាតិឧតុនិយមរបស់ចិន កាលពីថ្ងៃទី 11 កក្កដា បានបន្តប្រកាសអាសន្ន ដោយប្រាប់ថា ភ្លៀងធំនឹងធ្លាក់នៅពាសពេញផ្ទៃប្រទេស ពិសេសគឺនៅភាគខាងជើង និងភាគកណ្ដាល៕

ប្រភព៖ Reuters, Global Times
ប្រែសម្រួល៖ បុត្រា

July 12, 2021

Covid-19 នៅ វៀតណាម ៖ អ្នកវិជ្ជមានជាង 1,700 នាក់ ត្រូវបានរកឃើញ ចាប់ពីព្រឹក ដល់ថ្ងៃត្រង់ នៃថ្ងៃទី 12 ខែកក្កដា

វៀតណាម នាល្ងាចថ្ងៃទី 12 ខែកក្កដា ឆ្នាំ 2021 នេះ បានឱ្យដឹងថា បានរកឃើញករណីឆ្លង Covid-19 ចំនួន 1,112 នាក់បន្ថែមទៀត ក្នុងនោះមាន 1,105 នាក់ ជាករណីឆ្លងក្នុងស្រុក និង 7 នាក់ ជាករណីនាំចូលពីបរទេស។

ក្នុងចំណោមអ្នកជំងឺថ្មីខាងលើ មាន 879 នាក់ ត្រូវបានរកឃើញនៅទីក្រុងហូជីមិញ ខណៈរដ្ឋធានីហាណូយ មានតែ 82 នាក់ប៉ុណ្ណោះ។ រាប់ចាប់ពីព្រឹក រហូតដល់ម៉ោង 2 ល្ងាចថ្ងៃនេះ វៀតណាម បានរកឃើញអ្នកវិជ្ជមានសរុបចំនួន 1,764 នាក់ នៅទូទាំងប្រទេស។

គិតមកដល់បច្ចុប្បន្ន វៀតណាម បានរកឃើញអ្នកវិជ្ជមាននឹង Covid-19 សរុបចំនួន 27.259 នាក់ ក្នុងនោះមាន 19.125 នាក់ កំពុងព្យាបាល, 8.025 នាក់បានជា និង 105 នាក់ បានបាត់បង់ជីវិត៕

ប្រភព៖ ក្រសួងសុខាភិបាលវៀតណាម
ប្រែសម្រួល៖ បុត្រា

July 12, 2021

វ៉ាក់សាំង Sinovac របស់ ចិន មានប្រសិទ្ធភាពពិត ដល់កម្រិតណា?

វ៉ាក់សាំងរបស់ក្រុមហ៊ុន ចិន ស៊ីណូវ៉ាក់ (Sinovac) ជួយទប់ស្កាត់ការឆ្លង Covid-19 ការត្រូវចូលពន្យាបាលនៅមន្ទីរពេទ្យ និងអត្រានៃការស្លាប់ ប៉ុន្តែ កម្រិតនៃប្រសិទ្ធភាពរបស់វា ថយចុះទៅតាមពេលវេលា និងខ្សោយ នៅចំពោះមុខ វ៉ារ្យ៉ង់ (វីរុសបំប្លែងខ្លួន) ឈ្មោះ Delta។

វ៉ាក់សាំងរបស់ក្រុមហ៊ុន ចិន Sinovac Biotech គឺជាវ៉ាក់សាំងប្រឆាំង Covid-19 ដែលត្រូវបានប្រើប្រាស់ច្រើនបំផុតក្នុងពិភពលោក ដោយមានជាង 943 លានដូស ត្រូវបានផ្គត់ផ្គង់។ នេះបើតាមសារព័ត៌មាន South China Morning Post។

ទិន្នន័យនៃការចាក់វ៉ាក់សាំងខាងលើ នៅប្រទេស ឈីលី ដែលត្រូវបានចុះផ្សាយលើគេហទំព័រវេជ្ជសាស្ត្រ New England Journal of Medicine កាលពីសប្ដាហ៍មុន បានបង្ហាញថា វ៉ាក់សាំង Sinovac មានប្រសិទ្ធភាព 65.9% ក្នុងការទប់ស្កាត់ការឆ្លងនៃវីរុស Covid-19, 87.5% ក្នុងការទប់ស្កាត់ការចូលពេទ្យ និង 86.3% ក្នុងការទប់ស្កាត់មិនឱ្យអ្នកជំងឺបាត់បង់ជីវិត។

បច្ចុប្បន្ន នៅមានកង្វះខាតច្រើន ទាក់ទិននឹងការសិក្សាស្រាវជ្រាវអំពីប្រសិទ្ធភាពរបស់វ៉ាក់សាំង នៅចំពោះមុខឥទ្ធិពលរបស់ វ៉ារ្យ៉ង់ Delta នៃវីរុស Covid-19។ Feng Zijian អនុប្រធាននៃមជ្ឈមណ្ឌលគ្រប់គ្រង និងបង្ការជំងឺឆ្លងរបស់ ចិន កាលពីខែមិថុនា បានននិយាយថា អង្គបដិប្រាណដែលបង្កើតឡើងដោយសារវ៉ាក់សាំង Covid-19 ចំនួន 2 ប្រភេទរបស់ ចិន មានប្រសិទ្ធភាពតិច នៅចំពោះមុខ វ៉ារ្យ៉ង់ Delta បើធៀបនឹង វ៉ារ្យ៉ង់ ដទៃ ប៉ុន្តែ វ៉ាក់សាំងនេះនៅតែជួយការពារបាន។ លោក Feng Zijian មិនបានបង្ហើបឱ្យដឹងអំពីឈ្មោះរបស់វ៉ាក់សាំងទាំង 2 ខាងលើនេះទេ។

ក្រុមមន្ត្រីសុខាភិបាល កំពុងស្នើឱ្យមានការសិក្សាបន្ថែមអំពីប្រសិទ្ធភាពរបស់វ៉ាក់សាំងខាងលើ នៅចំពោះមុខវីរុសបំប្លែងខ្លួន Delta និងថា តើចាំបាច់ត្រូវចាក់ម្ជុលទីបីដែរ ឬទេ ដើម្បីបង្កើនកម្លាំងការពាររាងកាយ។

ឥណ្ឌូនេស៊ី គឺជាប្រទេសមួយ ក្នុងចំណោមប្រទេសដែលប្រើប្រាស់វ៉ាក់សាំង Sinovac ច្រើនជាងគេ។ ទិន្នន័យរបស់ក្រុមស្រាវជ្រាវឯករាជ្យ LaporCovid-19 បង្ហាញថា បុគ្គលិកសុខាភិបាលរបស់ ឥណ្ឌូនេស៊ី ជាង 130 នាក់ បានស្លាប់ដោយសារ Covid-19 រាប់ចាប់ពីខែមិថុនា ក្នុងនោះមាន 58 នាក់ បានស្លាប់ក្នុងខែកក្កដា។ ក្រុមស្រាវជ្រាវ មិនបានឱ្យដឹងថា មានជនរងគ្រោះប៉ុន្មាននាក់បានទទួលការចាក់វ៉ាក់សាំងរួចរាល់នោះទេ ប៉ុន្តែ មានបុគ្គលិកសុខាភិបាល ឥណ្ឌូនេស៊ី ចំនួនប្រហែល 95% បានទទួលការចាក់វ៉ាក់សាំង។

អ្នកជំនាញផ្នែករោគឆ្លង ជនជាតិ ឥណ្ឌូនេស៊ី Dicky Budiman មកពីសាកលវិទ្យាល័យអូស្ត្រាលី Griffith និយាយថា បុគ្គលិកសុខាភិបាលជាច្រើននាក់ បើទោះបានឆ្លងវីរូស ប៉ុន្តែ នៅតែគេចផុតពីការស្លាប់ និងមានរោគសញ្ញាស្រាល។ «ប្រការនេះនាំឱ្យយើងជឿថា វ៉ាក់សាំង Sinovac មានប្រសិទ្ធភាពក្នុងកម្រិតណាមួយ ក្នុងការប្រឆាំងនឹងវ៉ារ្យ៉ង់ថ្មី។ នេះជាមូលហេតុដែលយើងលើកទឹកចិត្តឱ្យពលរដ្ឋ ទទួលយកការចាក់វ៉ាក់សាំងនេះ» លោក Budiman បញ្ជាក់បន្ថែម។

ករណីដែលបុគ្គលិកសុខាភិបាលបាត់បង់ជីវិតដោយសារ Covid-19 ត្រូវបានលោក Budiman អះអាងថា អាចបណ្ដាលមកពីការចុះថយនៃប្រសិទ្ធភាពរបស់វ៉ាក់សាំង ទៅតាមពេលវេលា និងថមថយឥទ្ធិពល នៅចំពោះមុខវ៉ារ្យ៉ង់ Delta។

នៅឯប្រទេស ទួរគី វិញ ការស្រាវជ្រាវលើបុគ្គលិកសុខាភិបាលចំនួន 1,053 នាក់ បានបង្ហាញថា ក្រោយការចាក់វ៉ាក់សាំង Sinovac រួចរាល់បាន 3 ខែ 23% ក្នុងចំណោមនេះ មានអង្គបដិប្រាណតិចជាងមុន និងក្រោមកម្រិតនៃប្រសិទ្ធភាព។ ក៏ប៉ុន្តែ ក្នុងចំណោមបុគ្គលិកសុខាភិបាលដែលបានចាក់វ៉ាក់សាំង គឺមាន ត្រឹមតែ 2.8% ប៉ុណ្ណោះ ដែលបានឆ្លងវីរុស និងពុំមានអ្នកណាម្នាក់ត្រូវចូលពេទ្យនោះឡើយ ក្រោយការចាក់វ៉ាក់សាំង ចន្លោះពី 1 ដល់ 3 ខែ។

សាស្ត្រាចារ្យមួយរូប មកពីមហាវិទ្យាល័យជីវវេជ្ជសាស្ត្រ នៃសាកលវិទ្យាល័យហុងកុង យល់ថា ប្រសិទ្ធភាពរបស់ Sinovac ប្រាកដជានឹងថយចុះនៅចំពោះមុខវីរុសបំប្លែងខ្លួន Delta ប៉ុន្តែ ថយចុះប៉ុន្មានភាគរយ គេមិនទាន់ដឹងច្បាស់នៅឡើយ។ លោកយល់ថា ត្រូវការកែសម្អប្រសិទ្ធភាព និងសាកល្បងចាក់ម្ជុលទីបី សម្រាប់ក្រុមមនុស្សដែលមានហានិភ័យខ្ពស់ ឬចាក់លាយជាមួយវ៉ាក់សាំងដទៃ។

ចំណែក Yin Weidong ដែលជាប្រធានប្រតិបត្តិរបស់ក្រុមហ៊ុន Sinovac បាននិយាយថា លទ្ធផលនៃការពិសោធលើមនុស្ស បង្ហាញថា អ្នកដែលបានចាក់វ៉ាក់សាំងដូសទីបី បន្ទាប់ពីបានចាក់ដូសទីពីរបានពី 3 ដល់ 6 ខែ មានអង្គបដិប្រាណកើនឡើងច្រើនជាងមុន 10 ដង ដោយប្រើពេលត្រឹមតែ 10 ថ្ងៃ ក្រោយពីបានចាក់៕

ប្រភព៖ SCMP
ប្រែសម្រួល៖ បុត្រា

July 12, 2021

វេជ្ជបណ្ឌិតជនជាតិអាមេរិក ត្រូវគេសង្ស័យថា នៅពីក្រោយករណីធ្វើឃាតប្រធានាធិបតី ហៃទី

ពលរដ្ឋអាមេរិក ដើមកំណើត ហៃទី ទីបី ដែលជាប់ទាក់ទិននឹងករណីធ្វើឃាតប្រធានាធិបតី Moise គឺ Sanon ដោយបានសារភាពថា ជាវេជ្ជបណ្ឌិត និង «មានផែនការក្លាយជាប្រធានាធិបតី ហៃទី»។

«Christian Emmanuel Sanon ដែលបានរស់នៅក្នុងរដ្ឋ Florida សហរដ្ឋអាមេរិក បានជាង 20 ឆ្នាំ ត្រូវបានគេសង្ស័យថាជា បុគ្គលម្នាក់ ក្នុងចំណោមមេដឹកនាំក្រុមប្រដាប់អាវុធ ដែលបានធ្វើឃាតប្រធានាធិបតី ហៃទី លោក Jovenel Moise» នេះបើតាមសារព័ត៌មាន Miami Herald ដែលបានចុះផ្សាយកាលពីថ្ងៃទី11 ខែកក្កដា។ Sanon មានក្រុមហ៊ុនជាង 10 ដែលបានចុះបញ្ជីនៅក្នុងរដ្ឋ Florida ក្នុងពេលកន្លង រួមមានបណ្ដាក្រុមហ៊ុនផ្ដល់សេវាកម្មផ្នែកវេជ្ជសាស្ត្រ ថាមពល និងអចលនទ្រព្យ ប៉ុន្តែ ក្រុមហ៊ុនទាំងនេះ ភាគច្រើនត្រូវបានគេរកឃើញថា លែងដំណើរការ។

Sanon ប្រាប់ថា ខ្លួនជាវេជ្ជបណ្ឌិត ប៉ុន្តែ សារព័ត៌មាន Miami Herald មិនអាចបញ្ជាក់បានថា បុគ្គលនេះមានឈ្មោះ ឬមិនមាន នៅក្នុងបញ្ជីរាយនាមដែលទទួលបានលិខិតអនុញ្ញាតឱ្យរកស៊ីផ្នែកវេជ្ជសាស្ត្រនៅ Florida នោះទេ។

រថយន្តមួយគ្រឿងរបស់ក្រុមជនសង្ស័យ ត្រូវគេដុតចោល នៅក្បែរការិយាល័យប៉ូលិស ជាកន្លែងដែលពួកគេត្រូវបានឃុំខ្លួន កាលពីថ្ងៃទី 9 ខែកក្កដា

ឯកសារបានបង្ហាញថា Sanon បានដាក់ពាក្យសុំក្ស័យធនកាលពីឆ្នាំ 2013 នៅក្នុងទីក្រុង Tampa រដ្ឋ Florida និងត្រូវរឹបអូសយកផ្ទះមួយខ្នងនៅក្នុងក្រុង Hillsborough ដោយជាប់បំណុលជាង 400,000 ដុល្លារអាមេរិក។

ប្រភពព័ត៌មាននានា បានឱ្យដឹងថា Sanon គឺជាពលរដ្ឋអាមេរិក ដើមកំណើត ហៃទី ទីបី ដែលត្រូវបានចាប់ខ្លួន ព្រោះជាប់ទាក់ទងនឹងករណីឃាតកម្មលើប្រធានាធិបតី ហៃទី។ ចំណែកបុគ្គល 2 នាក់ទៀត គឺ James Solages អាយុ 35 ឆ្នាំ និង Joseph Vincent អាយុ 55 ឆ្នាំ បានសារភាពនៅពេលត្រូវបានសួរនាំថា ករណីឃាតកម្មនេះគឺជាផ្នែកមួយនៅក្នុងផែនការដើម្បីជួយឱ្យ Sanon ក្លាយជាប្រធានាធិបតី ហៃទី។

ពួកគេបាននិយាយថា តាមផែនការ គឺ មិនមែនដើម្បីធ្វើឃាត Moise នោះទេ ប៉ុន្តែ គ្រាន់តែចាប់ខ្លួនលោក ទៅតាមបទបញ្ជាកាលពីឆ្នាំ 2019 និងនាំខ្លួនលោកទៅកាន់វិមានប្រធានាធិបតី ជាកន្លែងដែល Sanon នឹងចូលមកជំនួស។

ប្រធានាធិបតីរបស់ប្រទេស ហៃទី លោក Jovenel Moise ត្រូវបានធ្វើឃាតនៅក្នុងផ្ទះរបស់លោក កាលពីថ្ងៃទី 7 ខែកក្កដា

មេដឹកនាំប៉ូលិសជាតិ ហៃទី លោក Leon Charles កាលពីថ្ងៃទី 10 ខែកក្កដា បានឱ្យដឹងដែរថា ផែនការធ្វើឃាត មានជាប់ទាក់ទិននឹងពលរដ្ឋអាមេរិក ដើមកំណើត ហៃទី ចំនួន 2 នាក់ និងវេជ្ជបណ្ឌិតល្បីឈ្មោះម្នាក់នៅ សហរដ្ឋអាមេរិក ប៉ុន្តែ មិនបានលើកឡើងអំពីឈ្មោះ Sanon នេះទេ។

«ខ្ញុំអាចនិយាយបានថា វេជ្ជបណ្ឌិតដើមកំណើត ហៃទី បានជួល» ក្រុមឃាតករ។ ក្រុមនេះ បានចុះឈ្មោះជាពលរដ្ឋរបស់ កូឡុំប៊ី ដើម្បីធ្វើសកម្មភាព។

សូមរំលឹកថា លោក Jovenel Moise អាយុ 53 ឆ្នាំ ត្រូវបានធ្វើឃាតនៅក្នុងផ្ទះរបស់លោក កាលពីថ្ងៃទី 7 ខែកក្កដា ដោយក្រុមប្រដាប់អាវុធមួយក្រុមដែលបន្លំខ្លួនជាកម្លាំងពិសេស នៃអង្គភាពប្រឆាំងគ្រឿងញៀនរបស់ សហរដ្ឋអាមេរិក។ ក្រុមមន្ត្រី ហៃទី បានអធិប្បាយថា ក្រុមឃាតករនេះ គឺជា «ទាហានស៊ីឈ្នួលបរទេស» ដែលត្រូវបានបណ្ដុះបណ្ដាលយ៉ាងស្ទាត់ជំនាញ»៕

ប្រភព៖ NY Post
ប្រែសម្រួល៖ បុត្រា

July 12, 2021

សារមន្ទីរតារាសាស្ត្រធំជាងគេក្នុងពិភពលោក ចាប់ផ្ដើមបើកដំណើរការហើយ!

ប្រទេសចិនបានចាប់ផ្ដើមបើកដំណើរការសាកល្បងនូវ សារមន្ទីរតារាសាស្ត្រធំជាងគេបង្អស់ក្នុងពិភពលោក ដែលមានទីតាំងនៅក្នុងទីក្រុងសៀងហៃ ជាមួយនឹងបទពិសោធន៍មិនធ្លាប់មាន ដោយការប្រើប្រាស់បច្ចេកវិទ្យាទំនើបចុងក្រោយ។

ស្ថិតនៅភាគខាងកើតនៃប្រទេសចិន សារមន្ទីរតារាសាស្ត្រ សៀងហៃ ដែលជាវិមានតារាសាស្ត្រធំជាងគេបំផុតក្នុងពិភពលោក បានចាប់ផ្ដើមដំណើរការសាកល្បងកាលពីថ្ងៃទី 5 ខែកក្កដា ឆ្នាំ 2021។

ដោយមានទំហំ 58,600 ម៉ែត្រការ៉េ សារមន្ទីរនេះ នាំមកនូវបទពិសោធន៍ដ៏អស្ចារ្យ ដោយមានជំនួយពីបច្ចេកវិទ្យាអន្តរកម្ម និងរូបភាពដ៏សែនទំនើប។

ភ្ញៀវដែលចូលមកទស្សនា មានសិទ្ធិទទួលយកបទពិសោធន៍ទាក់ទងនឹងការដើរនៅលើដីនៃឋានព្រះចន្ទ តាមរយៈបច្ចេកវិទ្យាពិភពនិម្មិត (Virtual Reality) ឬដើរចូលទៅខាងក្នុងបន្ទប់ស្នូលនិម្មិត Tianhe (Tianhe core module) នៃស្ថានីអវកាសចិន Tiangong ដើម្បីស្វែងយល់អំពីរបៀបដែលក្រុមអ្នកអវកាសរស់នៅ និងធ្វើការក្នុងទីអវកាស។ គំរូយានស្រាវជ្រាវនៃ Chang’e 5 និង Yutu-2 ក៏ត្រូវបានដាក់តាំងបង្ហាញក្នុងវិមានតារាសាស្ត្រនេះ។

នៅក្នុងសារមន្ទីរនេះ មានការតាំងពិព័រណ៍ជាង 300 កន្លែង ក្នុងនោះមាន 50% គឺជាការពិព័រណ៍បែបអន្តរកម្ម។ អាចម៍ផ្កាយល្បីឈ្មោះ ប្រមាណ 70 ដុំ, វត្ថុជាបេតិកភណ្ឌវប្បធម៌ជាង 120 បំណែក/ឈុត រួមនឹងឯកសារដើមរបស់ក្រុមអ្នកវិទ្យាសាស្ត្រល្បីឈ្មោះ ដូចជា Newton, Kepler និង Galileo ជាដើម ក៏ត្រូវបានដាក់តាំងបង្ហាញនៅទីនេះផងដែរ៕

ប្រភព៖ CNS
ប្រែសម្រួល៖ បុត្រា

July 10, 2021

អាមេរិក និង កូឡុំប៊ី បញ្ជូនក្រុមជំនួយទៅស៊ើបអង្កេត ករណីឃាតកម្មលើប្រធានាធិបតី ហៃទី

សហរដ្ឋអាមេរិក និងប្រទេស កូឡុំប៊ី បានបញ្ជូនមន្ត្រីអនុវត្តច្បាប់ រួមនឹងកម្លាំងពិសេសផ្នែកស៊ើបការណ៍សម្ងាត់ ទៅកាន់ប្រទេស ហៃទី ដើម្បីស៊ើបអង្កេតករណីឃាតកម្មលើប្រធានាធិបតី Moise បន្ទាប់ពីពលរដ្ឋរបស់ពួកគេ ត្រូវបានប៉ូលិស ហៃទី ចាប់ខ្លួន។

សហរដ្ឋអាមេរិក បានសន្យាថា នឹងបញ្ជូនក្រុមមន្ត្រីជាន់ខ្ពស់ នៃអង្គភាពស៊ើបអង្កេតសហព័ន្ធ (FBI) និងអង្គភាពសន្តិសុខផ្ទៃក្នុងជាតិ (DHS) ទៅកាន់ប្រទេស ហៃទី ឆាប់ៗនេះ ដើម្បីវាយតម្លៃស្ថានការណ៍ និងពិនិត្យមើលថា តើពួកគេអាចជួយប្រទេស ហៃទី ដោយរបៀបណា។ សេតវិមាន បានឱ្យដឹងដូច្នេះ កាលពីថ្ងៃទី 8 ខែកក្កដា ឆ្នាំ 2021។

ចំណែកប្រធានាធិបតី Ivan Duque នៃប្រទេស កូឡុំប៊ី ឱ្យដឹងថា មេដឹកនាំនៃអង្គភាពស៊ើបការណ៍សម្ងាត់របស់ប្រទេស កូឡុំប៊ី និងប្រធានផ្នែកស៊ើបការណ៍របស់ប៉ូលិសប្រទេសនេះ ក៏នឹងទៅកាន់ ហៃទី ក្នុងបំណងរួមចំណែកជាមួយប៉ូលិសអន្តរជាតិ (Interpol) ដើម្បីជួយដល់ ហៃទី សម្រាប់ការស៊ើបអង្កេតលើករណីធ្វើឃាតប្រធានាធិបតី Moise។

ក្រុមជនសង្ស័យទាក់ទិនករណីធ្វើឃាតប្រធានាធិបតី Moise ត្រូវបានចាប់ខ្លួនកាលពីថ្ងៃទី 9 កក្កដា

ឧត្តមសេនី Luis Fernando Navarro អគ្គមេបញ្ជាការកងទ័ព កូឡុំប៊ី និយាយថា ជនសង្ស័ងចំនួន 17 នាក់ ទាក់ទិននឹងករណីធ្វើឃាតប្រធានាធិបតី Moise គឺជាអតីតទាហានរបស់ប្រទេសនេះ ហើយពួកគេបានឈប់ធ្វើទាហានក្នុងឆ្នាំ 2018-2020។

អគ្គស្នងការប៉ូលិសជាតិ កូឡុំប៊ី Jorge Luis Vargas ឱ្យដឹងថា ជនសង្ស័យចំនួន 11 នាក់ បានទៅកាន់ទីក្រុង Punta Cana នៃប្រទេស ដូមីនិក (Dominica) ដែលគ្រប់គ្រងកោះ Hispaniola ជាមួយនឹង ហៃទី ហើយក៏បានឆ្លងដែនចូលទឹកដី ហៃទី។ ជនសង្ស័យ 2 នាក់ផ្សេងទៀត បានជិះយន្តហោះទៅកាន់ប្រទេស ប៉ាណាម៉ា និងបន្តដំណើរទៅកាន់រដ្ឋធានី Santo Domigo របស់ ដូមីនិក មុននឹងចូលដល់រដ្ឋធានី Port-au-Prince របស់ ហៃទី។

ប្រធានាធិបតីនៃប្រទេស ហៃទី លោក Jovenel Moise ដែលត្រូវបានក្រុមប្រដាប់អាវុធ បាញ់សម្លាប់

សូមរំលឹកថា ប្រធានាធិបតីរបស់ប្រទេស ហៃទី លោក Jovenel Moise ត្រូវបានក្រុមប្រដាប់អាវុធមួយក្រុម បាញ់សម្លាប់ កាលពីថ្ងៃទី 7 ខែកក្កដា នៅក្នុងភូមិគ្រឹះរបស់លោក។ ប៉ូលិស ហៃទី ឱ្យដឹងថា ក្រុមឃាតករមានគ្នាចំនួន 16 នាក់ ដែលជាទាហានស៊ីឈ្នួល ជនជាតិ កូឡុំប៊ី និង 2 នាក់ទៀតជាពលរដ្ឋអាមេរិក ដើមកំណើត ហៃទី ក្នុងនោះមានម្នាក់ឈ្មោះ James Solages អាយុ 35 ឆ្នាំ និងម្នាក់ទៀតឈ្មោះ Joseph Vincent អាយុ 55 ឆ្នាំ មកពីរដ្ឋ Florida សហរដ្ឋអាមេរិក៕

ប្រភព៖ Reuters
ប្រែសម្រួល៖ បុត្រា

July 10, 2021

ហៃទី ជ្រើសតាំងលោក Joseph Lambert ជាប្រធានាធិបតីស្ដីទី

កាលពីថ្ងៃទី 9 ខែកក្កដា (ម៉ោងក្នុងស្រុក) សភាជាន់ខ្ពស់របស់ ហៃទី បានបោះឆ្នោតជ្រើសរើសប្រធានសភាជាន់ខ្ពស់ លោក Joseph Lambert ឱ្យធ្វើជាប្រធានាធិបតីស្ដីទី ក្រោយប្រធានាធិបតី Jovenel Moise ត្រូវគេធ្វើឃាត។

នេះគឺជាជំហានដែលអាចបង្កឧបសគ្គផ្ទាល់ដល់នាយករដ្ឋមន្ត្រីស្ដីទី លោក Claude Joseph ដែលចាត់ទុកខ្លួនឯងថាជាមេដឹកនាំបច្ចុប្បន្នរបស់ ហៃទី និងកំពុងទទួលបានការគាំទ្រពី សហរដ្ឋអាមេរិក និងអង្គការសហប្រជាជាតិ។

សភាជាន់ខ្ពស់ ហៃទី បានប្រកាសថា លោក Joseph Lambert នឹងកាន់តំណែងប្រធានាធិបតី រហូតដល់ថ្ងៃចន្ទដំបូងនៃខែមករា ឆ្នាំ 2022 ឬក៏រហូតដល់មានប្រធានាធិបតីថ្មី ក្រោយការបោះឆ្នោតនៅថ្ងៃទី 7 ខែកុម្ភៈ ឆ្នាំ 2022។

ក៏ប៉ុន្តែ នាយករដ្ឋមន្ត្រីស្ដីទី លោក Claude Joseph បានចោទក្រុមជាគូប្រជែងថា កំពុងប្រើប្រាស់ករណីឃាតកម្មលើប្រធានាធិបតី Moise ដើម្បីក្ដោបក្ដាប់អំណាចផ្នែកនយោបាយ ដែលនេះគឺចង់សំដៅលើក្រុមតំណាងរាស្ត្រដែលបានគាំទ្រលោក Joseph Lambert។ «ជាក់ស្ដែង សភាជាន់ខ្ពស់ ហៃទី លែងមានសុពលភាពហើយ ដោយសារតែកៅអីសភាជាច្រើន កំពុងនៅទំនេរ» នេះបើយោងតាមលោក Claude Joseph។

កាលពីថ្ងៃទី 8 ខែកក្កដា ក្រុមប៉ូលិស ហៃទី ឱ្យដឹងថា យ៉ាងហោចណាស់ មានបុគ្គលចំនួន 28 នាក់ បានចូលរួមក្នុងការធ្វើឃាតប្រធានាធិបតី Jovenel Moise ក្នុងនោះមាន 26 នាក់គឺជាជនជាតិ កូឡុំប៊ី និង 2 នាក់ ជាជនជាតិ អាមេរិក ដើមកំណើត ហៃទី។

នៅក្នុងសន្និសីទសារព័ត៌មានមួយ អគ្គស្នងការប៉ូលិសជាតិ ហៃទី លោក Leon Charles ឱ្យដឹងថា សមត្ថកិច្ច បានចាប់ខ្លួនជនសង្ស័យចំនួន 15 ជាជនជាតិ កូឡុំប៊ី និង 2 នាក់ ជាជនជាតិអាមេរិក ដើមកំណើត ហៃទី។ ប៉ូលិសកំពុងតាមចាប់ខ្លួនជនសង្ស័យចំនួន 8 នាក់ផ្សេងទៀត។

ប្រភព៖ Detroitnews
ប្រែសម្រួល៖ បុត្រា

July 10, 2021

ក្រុមប្រដាប់អាវុធដែលធ្វើឃាតប្រធានាធិបតី ហៃទី លាក់ខ្លួនក្នុង “ការិយាល័យតំណាងតៃវ៉ាន់”

ក្រុមមនុស្សចំនួន 11 នាក់ ដែលត្រូវគេសង្ស័យថាជា ឃាតករបាញ់សម្លាប់ប្រធានាធិបតីនៃប្រទេស ហៃទី លោក Jovenel Moise បានចូលលាក់ខ្លួនក្នុងការិយាល័យតំណាងកោះតៃវ៉ាន់ ប្រចាំរដ្ឋធានី Port-au-Prince ហើយក៏ត្រូវបានប៉ូលិសចាប់ខ្លួន។

Joanne Ou អ្នកនាំពាក្យក្រសួងការបរទេសតៃវ៉ាន់ ថ្ងៃនេះ បានឱ្យដឹងថា ការិយាល័យតំណាងរបស់កោះនេះប្រចាំនៅរដ្ឋធានីនៃប្រទេស ហៃទី បានបិទទ្វារ ដោយសារតែបញ្ហាអសន្តិសុខ ក្រោយប្រធានាធិបតី Moise ត្រូវគេធ្វើឃាត។

លោកស្រី Ou បានឱ្យដឹងថា បុគ្គលិកសន្តិសុខរបស់ការិយាល័យតំណាងតៃវ៉ាន់ បានឃើញជនប្រដាប់អាវុធមួយក្រុម សម្រុកចូលការិយាល័យនេះ។ បុគ្គលិកសន្តិសុខក៏បានរាយការណ៍ប្រាប់ប៉ូលីស ហៃទី។ ការិយាល័យតំណាងតៃវ៉ាន់ បានអនុញ្ញាតឱ្យប៉ូលិស ហៃទី ចូលទៅខាងក្នុង ដើម្បីចាប់ខ្លួនជនសង្ស័យទាំងនោះ ក្រោយមានការស្នើពីរដ្ឋាភិបាល ហៃទី។

ក្នុងសេចក្ដីប្រកាសមួយដែលបង្ហោះនៅលើគេហទំព័រ ការិយាល័យតំណាង តៃវ៉ាន់ ប្រចាំទីក្រុង Port-au-Prince សរសេរថា ក្រុមខ្មាន់កាំភ្លើងនេះគឺជា «ទាហានស៊ីឈ្នួល» និងជាក្រុមជនសង្ស័យដែលទាក់ទិននឹងអំពើឃាតកម្មលើប្រធានាធិបតី Moise។

ប្រកាសរបស់ការិយាល័យតំណាង តៃវ៉ាន់ ឱ្យដឹងថា «ប៉ូលិសបានចាប់ផ្ដើមធ្វើការនៅម៉ោងប្រហែល 16 នៃថ្ងៃទី 8 ខែកក្កដា និងបានចាប់ខ្លួនជនសង្ស័យចំនួន 11នាក់។ ការចូលចាប់ខ្លួននេះ ដំណើរការដោយរលូន»។ ការិយាល័យនេះ អធិប្បាយថា ករណីឃាតកម្មលើប្រធានាធិបតី Moise គឺពិតជា «ឃោរឃៅ និងគួរឱ្យភ័យខ្លាច»។

ហៃទី គឺជាប្រទេសមួយ ក្នុងចំណោម 15 ប្រទេស ដែលនៅរក្សាទំនាក់ទំនងការទូតផ្លូវការជាមួយកោះតៃវ៉ាន់។ ការិយាល័យតំណាងរបស់ តៃវ៉ាន់ ស្ថិតនៅក្បែរភូមិគ្រឹះលើជម្រាលភ្នំ របស់ប្រធានាធិបតី ហៃទី ជាទីដែលលោក Moise ត្រូវគេធ្វើឃាត។

ប៉ូលិស ហៃទី ឱ្យដឹងថា ជនជាតិ កូឡុំប៊ី ចំនួន 26 នាក់ រួមនឹងជនជាតិអាមេរិកដើមកំណើត ហៃទី ចំនួន 2 នាក់ គឺជាអ្នកនៅពីក្រោយករណីឃាតកម្មលើប្រធានាធិបតី Moise។ «យើងបានចាប់ខ្លួនជនជាតិ កូឡុំប៊ី ចំនួន 15 នាក់ និងជនជាតិអាមេរិក ដើមកំណើត ហៃទី ចំនួន 2 នាក់។ ជនជាតិ កូឡុំប៊ី ចំនួន 3 នាក់ ត្រូវបានសម្លាប់ ខណៈ 8 នាក់ផ្សេងទៀត កំពុងរត់គេចខ្លួន» នេះបើតាមអគ្គស្នងការប៉ូលិសជាតិ ហៃទី លោក Leon Charles។

ក្រសួងការបរទេសរបស់ សហរដ្ឋអាមេរិក បានឱ្យដឹងថា បច្ចុប្បន្ន មិនទាន់អាចបញ្ជាក់បានអំពីករណីពលរដ្ឋអាមេរិកណាខ្លះ ត្រូវបានចាប់ខ្លួន ឬយ៉ាងណានៅឡើយ៕

ប្រភព៖ AFP
ប្រែសម្រួល៖ បុត្រា

July 9, 2021

Category: អន្តរជាតិ