អន្តរជាតិ - La Reine Media

អាហ្វហ្គានីស្ថាន៖ ព្រលានយន្តហោះ កាប៊ុល កំពុងច្របូកច្របល់ខ្លាំង (វីដេអូ)

មនុស្សរាប់ពាន់នាក់ បាននាំគ្នាឆ្ពោះទៅកាន់ព្រលានយន្តហោះ Hamid Karzai នៅពេលឧទ្ទាម តាលីបង់ ចូលគ្រប់គ្រងរដ្ឋធានី បង្កឱ្យមានភាពវឹកវរ ច្របូកច្របល់ខ្លាំង បណ្ដាលឱ្យយន្តហោះស៊ីលវិលដែលដឹកជនភៀសខ្លួន មិនអាចហោះឡើងបាន។

វីដេអូដែលត្រូវបានចែករំលែកក្នុងបណ្ដាញសង្គម កាលពីថ្ងៃទី 15 សីហា បានបង្ហាញអំពីភាពច្របូកច្របល់ខ្លាំងនៅឯព្រលានយន្តហោះអន្តរជាតិ Hamid Karzai ខណៈដែលប្រជាជន អាហ្វហ្គានីស្ថាន រកវិធីដើម្បីបានឡើងយន្តហោះ ភៀសខ្លួនទៅបរទេស ក្នុងគ្រាដែលក្រុម តាលីបង់ ចូលគ្រប់គ្រងរដ្ឋធានីកាប៊ុល។ ព្រលានយន្តហោះ Hamid Karzai ដែលបច្ចុប្បន្ន គ្រប់គ្រងដោយសហរដ្ឋអាមេរិក គឺជាទីតាំងចុងក្រោយមួយដែលមិនទាន់ត្រូវបានគ្រប់គ្រងដោយ តាលីបង់។

ស្ថានការណ៍ច្របូកច្របល់ដល់ថ្នាក់ កងទ័ពអាមេរិក ត្រូវសម្រេចពន្យារការហោះហើរទៅ-មក នៃជើងយន្តហោះស៊ីវិល ដើម្បីបើកផ្លូវឱ្យយន្តហោះយោធាជាអ្នកជម្លៀស។ «ស្ត្រី កុមារ និងបុគ្គលិករដ្ឋាភិបាល មិនអាចចាកចេញពីប្រទេស ព្រោះតែសហរដ្ឋអាមេរិក មិនបើកផ្លូវ» នេះបើតាមមន្ត្រីម្នាក់របស់រដ្ឋាភិបាល អាហ្វហ្គានីស្ថាន។

New York Times ឱ្យដឹងថា នៅលើផ្លូវយន្តហោះក្នុងព្រលាន Hamid Karzai មានសម្លៀកបំពាក់ជាឯកសណ្ឋានគ្រប់ប្រភេទ រួមមានឯកសណ្ឋានយោធារបស់មនុស្សជាច្រើនដែលមកពីបណ្ដាប្រទេស។ «ក្រុមអ្នកការទូត អ្នកវិនិយោគផ្នែកយោធា និងពលរដ្ឋសាមញ្ញ សុទ្ធតែរកវិធីដើម្បីបានឡើងយន្តហោះ បំណងចាកចេញពី កាប៊ុល។ អ្នកដែលមានសិទ្ធិឡើងយន្តហោះ សុទ្ធតែត្រូវបានគេផ្ដល់ខ្សែដៃពិសេសដើម្បីជាសញ្ញា»។

នៅពេល តាលីបង់ សម្រុកចូលរដ្ឋធានីកាប៊ុល ប្រធានាធិបតី អាហ្វហ្គានីស្ថាន Ashraf Ghani បានប្រញាប់ចាកចេញពីប្រទេស ក្រោមមូលហេតុថា «ដើម្បីបញ្ចៀសការបង្ហូរឈាម» បណ្ដាលឱ្យរដ្ឋាភិបាលដែលគាំទ្រដោយក្រុមប្រទេសលោកខាងលិច ត្រូវដួលរលំ។

តាលីបង់ បានចាប់ផ្ដើមយុទ្ធនាការវាយសម្រុកតាំងពីខែឧសភា បន្ទាប់ពី សហរដ្ឋអាមេរិក និងសម្ព័ន្ធមិត្ត ដកទ័ពភាគច្រើនចេញពី អាហ្វហ្គានីស្ថាន ទៅតាមការសម្រេចចិត្តរបស់ប្រធានាធិបតី Joe Biden ក្នុងការបញ្ចប់វត្តមានយោធាអាមេរិក រយៈពេល 20 ឆ្នាំនៅក្នុងប្រទេសនេះ។

https://www.youtube.com/watch?v=-upyPouRrB8

កាលពីម្សិលមិញ (15 សីហា) តាលីបង់ បានសម្រុកចូលរដ្ឋធានីកាប៊ុល ដោយពុំជួបប្រទះការរារាំងណាមួយគួរឱ្យកត់សម្គាល់។ ដូច្នេះ តាលីបង់ ប្រាកដជានឹងស្ដារឡើងវិញនូវអំណាចដែលត្រូវបានផ្ដួលរំលំកាលពី 20 ឆ្នាំមុន បានលឿនជាងឆ្ងាយ បើធៀបនឹងការព្យាករ 90 ថ្ងៃ របស់ក្រុមស៊ើបការណ៍សម្ងាត់ សហរដ្ឋអាមេរិក។ សមាជិករបស់ក្រុមឧទ្ទាម តាលីបង់ បានប្រកាសថា នឹងបង្កើតរដ្ឋ Islamic Emirate of Afghanistan (បកប្រែបណ្ដោះអាសន្នថា «រដ្ឋអ៊ីស្លាមរួបរួមនៃអាហ្វហ្កានីស្ថាន» នាពេលឆាប់ៗនេះ៕

August 16, 2021

តាលីបង់៖ សង្គ្រាមនៅ អាហ្វហ្គានីស្ថាន បានបញ្ចប់! តាលីបង់ ត្រៀមជាស្រេចក្នុងការចរចាជាមួយគ្រប់ភាគី

អ្នកនាំពាក្យការិយាល័យនយោបាយរបស់ តាលីបង់ កាលពីថ្ងៃទី 15 សីហា បានអះអាងប្រាប់ទូរទស្សន៍ Al-Jazeera Mubasher ថា សង្គ្រាមនៅ អាហ្វហ្គានីស្ថាន បានបញ្ចប់ ហើយរបៀបរបបដឹកនាំរបស់រដ្ឋាភិបាល នឹងត្រូវបានមើលឃើញច្បាស់ក្នុងពេលឆាប់។

អ្នកនាំពាក្យនៃ ការិយាល័យនយោបាយរបស់ តាលីបង់ Mohammad Naeem ឱ្យដឹងថា ស្ថាប័នការទូត ឬការិយាល័យទាំងឡាយណាដែលត្រូវបានកំណត់ជាគោលដៅ តាលីបង់ សូមធានាថា នឹងការពារសន្តិសុខគ្រប់បែបសព្វយ៉ាង។

លោក Naeem ក៏បានបញ្ជាក់ថា ក្រុមនេះ ត្រៀមខ្លួនជាស្រេចក្នុងការចរចាជាមួយគ្រប់ភាគីនៅ អាហ្វហ្គានីស្ថាន ហើយថា នឹងធានាសន្តិសុខដែលចាំបាច់។ អ្នកនាំពាក្យរូបនេះក៏សង្កត់ធ្ងន់ថា កងកម្លាំងរបស់ខ្លួន «នឹងធ្វើសកម្មភាពប្រកបដោយការទទួលខុសត្រូវតាមដំណាក់កាល និងធានាសន្តិភាពជាមួយគ្រប់ប្រទេស»។ តាលីបង់ ត្រៀមជាស្រេចដើម្បីដោះស្រាយរាល់បញ្ហាដែលនាំឱ្យសហគមន៍អន្តរជាតិមានការព្រួយបារម្ភ តាមរយៈការចរចា»។

ក្រុមប្រដាប់អាវុធ តាលីបង់ កំពុងគ្រប់គ្រងរដ្ឋធានីកាប៊ុល

ការប្រកាសរបស់ តាលីបង់ នេះ ត្រូវបានធ្វើឡើងក្នុងគ្រាដែលកងកម្លាំងប្រដាប់អាវុធរបស់ក្រុមឧទ្ទាមនេះ បានចូលគ្រប់គ្រងរដ្ឋធានីកាប៊ុល ចំណែកឯប្រធានាធិបតី Ashraf Ghani ក៏បានចាកចេញពីប្រទេស ដោយមូលហេតុថា «ដើម្បីបញ្ចៀសការបង្ហូរឈាម»។

តាលីបង់ បានចាប់ផ្ដើមយុទ្ធនាការវាយសម្រុកតាំងពីខែឧសភា បន្ទាប់ពី សហរដ្ឋអាមេរិក និងសម្ព័ន្ធមិត្ត ដកទ័ពភាគច្រើនចេញពី អាហ្វហ្គានីស្ថាន ទៅតាមការសម្រេចចិត្តរបស់ប្រធានាធិបតី Joe Biden ក្នុងការបញ្ចប់វត្តមានយោធាអាមេរិក រយៈពេល 20 ឆ្នាំនៅក្នុងប្រទេសនេះ។

កាលពីម្សិលមិញ (15 សីហា) តាលីបង់ បានសម្រុកចូលរដ្ឋធានីកាប៊ុល ដោយពុំជួបប្រទះការរារាំងណាមួយគួរឱ្យកត់សម្គាល់។ ដូច្នេះ តាលីបង់ ប្រាកដជានឹងស្ដារឡើងវិញនូវអំណាចដែលត្រូវបានផ្ដួលរំលំកាលពី 20 ឆ្នាំមុន បានលឿនជាងឆ្ងាយ បើធៀបនឹងការព្យាករ 90 ថ្ងៃ របស់ក្រុមស៊ើបការណ៍សម្ងាត់ សហរដ្ឋអាមេរិក៕

August 16, 2021

អាហ្វហ្គានីស្ថាន៖ ប្រធានាធិបតី Ghani ប្រកាសពីមូលហេតុចាកចេញពីប្រទេស

កាលពីថ្ងៃទី 15 សីហា ប្រធានាធិបតី អាហ្វហ្គានីស្ថាន លោក Ashraf Ghani បានប្រកាសអំពីមូលហេតុដែលនាំឱ្យលោកចាកចេញពីប្រទេស ក្នុងពេលដែលក្រុមឧទ្ទាមតាលីបង់ បានសម្រុកចូលកាន់កាប់រដ្ឋធានីកាប៊ុល។

នៅក្នុងសារដែលបង្ហោះលើបណ្ដាញសង្គម Facebook ប្រធានាធិបតី Ghani ឱ្យដឹងថា បើសិនជាលោកនៅក្នុងប្រទេសបន្តទៀត នោះ «នឹងមានមនុស្សជាច្រើនត្រូវបាត់បង់ជីវិត ហើយរដ្ឋធានីកាប៊ុល នឹងត្រូវបានកម្ទេច»។ លោក Ghani ទទួលស្គាល់ថា៖ «តាលីបង់ បានទទួលជ័យជំនះ ហើយបច្ចុប្បន្ន កងកម្លាំងនេះមានភារកិច្ចការពារទ្រព្យសម្បត្តិ និងពលរដ្ឋ អាហ្វហ្គានីស្ថាន»។

ប៉ុន្តែ ក្នុងសារនេះ ប្រធានាធិបតី Ghani មិនបាននិយាយដល់ទីតាំងដែលលោកត្រូវទៅនោះទេ បន្ទាប់ពីបានចាកចេញពីប្រទេស។ មុននោះ សារព័ត៌មានអាហ្វហ្គានីស្ថាន បានរាយការណ៍ថា ប្រធានាធិបតី Ghani បានទៅកាន់ប្រទេសតាហ្ស៊ីគីស្ថាន។

ក្នុងថ្ងៃដដែលនោះ មេបញ្ជាការពីររូបរបស់ តាលីបង់ បានឱ្យដឹងថា ពួកគេបានគ្រប់គ្រងវិមានប្រធានាធិបតី អាហ្វហ្គានីស្ថាន។ មន្ត្រីម្នាក់របស់ក្រុម តាលីបង់ បានបញ្ជាក់ថា ក្រុមនេះគ្រោងនឹងប្រកាសបង្កើតរដ្ឋាភិបាលអ៊ីស្លាមអាហ្វហ្គានីស្ថាន នៅក្នុងវិមាននេះ៕

August 16, 2021

តាលីបង់ គ្រប់គ្រងរដ្ឋធានីកាប៊ុល ខណៈប្រធានាធិបតី រត់ចោលប្រទេស

ក្រុមឧទ្ទាម តាលីបង់ សម្រុកចូលក្នុងរដ្ឋធានីកាប៊ុល ចំណែកប្រធានាធិបតីអាហ្វហ្គានីស្ថាន Ghani ក៏ត្រូវរត់ចេញពីប្រទេស ធ្វើឱ្យស្ថានការណ៍កាន់តែច្របូកច្របល់។

«ក្រុមប្រដាប់អាវុធ តាលីបង់ ត្រូវបានបញ្ជាឱ្យសម្រុកចូលរដ្ឋធានីកាប៊ុល ដើម្បីទប់ស្កាត់បញ្ហាឆក់ប្លន់ទ្រព្យសម្បត្តិរបស់ក្រុមប៉ុលិសដែលរត់ចោលជួរ» Zabihullah Mujahid អ្នកនាំពាក្យរបស់ក្រុមឧទ្ទាមតាលីបង់ បានឱ្យដឹងដូច្នេះ ទន្ទឹមនឹងការអំពាវពាវដល់ក្រុមមន្ត្រីរដ្ឋាភិបាល កុំចាកចេញពីមូលដ្ឋាន។

មេបញ្ជាការពីររូបរបស់ តាលីបង់ បានឱ្យដឹងថា ពួកគេបានគ្រប់គ្រងវិមានប្រធានាធិបតី អាហ្វហ្គានីស្ថាន។ មន្ត្រីម្នាក់របស់ក្រុម តាលីបង់ បានបញ្ជាក់ថា ក្រុមនេះគ្រោងនឹងប្រកាសបង្កើតរដ្ឋាភិបាលអ៊ីស្លាមអាហ្វហ្គានីស្ថាន នៅក្នុងវិមាននេះ។

សមាជិកនៃក្រុមឧទ្ទាម តាលីបង់ បានចូលកាន់កាប់វិមានប្រធានាធិបតី អាហ្វហ្គានីស្ថាន កាលពីថ្ងៃសៅរ៍កន្លងទៅ

Abdullah Abdullah អ្នកដឹកនៃក្រុមប្រឹក្សាផ្សះផ្សារជាតិអាហ្វហ្គានីស្ថាន ទទួលស្គាល់ថា ប្រធានាធិបតី Ashraf Ghani បានចាកចេញពីប្រទេស ប៉ុន្តែ មិនទាន់ដឹងអំពីគោលដៅនៅឡើយ។

ក្រុម តាលីបង់ បានសម្រុកចូលកាន់កាប់រដ្ឋធានីកាប៊ុល ដោយពុំជួបឧបសគ្គអ្វីនោះឡើយ។ ពលរដ្ឋភាគច្រើននៅក្នុងផ្ទះ ខណៈដែលមនុស្សជាច្រើននាំគ្នាទៅកាន់ព្រលានយន្តហោះកាប៊ុល។ មន្ទីរពេទ្យមួយនៅរដ្ឋធានីឱ្យដឹងថា មនុស្សជាង 40 នាក់រងរបួសនៅក្នុងការប៉ះទង្គិចគ្នានៅជាយក្រុង ក្នុងខណ្ឌ Qarabagh ប៉ុន្តែពុំបានបង្ហើបឱ្យដឹងអំពីព័ត៌មានលម្អិតនោះទេ។

August 16, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 14 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 598 នាក់, អ្នកជាចំនួន 682 នាក់ និងអ្នកស្លាប់ចំនួន 12 នាក់បន្ថែមទៀត នៅក្នុងថ្ងៃទី 13 ខែសីហា ឆ្នាំ 2021។

គិតត្រឹមព្រឹកថ្ងៃទី 14 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 84,860 នាក់ ក្នុងនោះមានអ្នកជាសះស្បើយជាង 79,654 នាក់ និងអ្នកស្លាប់ 1,666។

ការចាក់វ៉ាក់សាំងនៅកម្ពុជា គិតត្រឹមព្រឹកព្រលឹមថ្ងៃទី 14 ខែសីហា ឆ្នាំ 2021 នេះ រួមមាន៖ អាយុ 18 ឆ្នាំឡើងទៅ (ពលរដ្ឋគោលដៅ 10 លាននាក់) ចាក់បាន 82.68% ចំណែកពលរដ្ឋ អាយុ 12-17 ឆ្នាំ (ពលរដ្ឋគោលដៅ ជិត 2 លាននាក់) ចាក់បាន 24.52%។ ជាសរុប ការចាក់វ៉ាក់សាំងជូនពលរដ្ឋគោលដៅ 16 លាននាក់ នៅទូទាំងប្រទេស សម្រេចបាន 54.69%។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 206,974,880 នាក់ ត្រូវបានរកឃើញ ក្នុងនោះមានជាង 185,599,210 នាក់បានជា, ជាង 4,358,470 នាក់បានស្លាប់ និងជាង 17,017,197 នាក់ កំពុងព្យាបាល៕

August 14, 2021

កប៉ាល់ទម្ងន់ជិត 34,000 តោន ជាប់គាំង និងបាក់ជាពីរកំណាត់

កប៉ាល់ Crimson Polaris ដែលដឹកកម្ទេចឈើ និងមានទម្ងន់ 33,910 តោន បានជាប់គាំងនៅលំហសមុទ្រជប៉ុន ហើយក៏បានបាក់ជាពីរកំណាត់ បង្កើតបានជាជ្រលងប្រេងយ៉ាងវែងលើផ្ទៃសមុទ្រ។

កប៉ាល់ដោតទង់ជាតិ ប៉ាណាម៉ា ដែលមានសមាជិកក្រុមនាវិក 21 នាក់នេះ បានជួបគ្រោះថ្នាក់កាលពីវេលាម៉ោងប្រហែល 7 កន្លះ ថ្ងៃទី 11 សីហា នៅពេលវាស្ថិតនៅក្នុងចម្ងាយ 2.4 គីឡូម៉ែត្រ ពីកំពង់ផែ Hachinohe នៅភាគខាងជើងប្រទេសជប៉ុន។ កប៉ាល់នេះ ដឹកកម្ទេចឈើពីប្រទេសថៃ និងបានជាប់គាំង ហើយក៏បានបាក់ជាពីរកំណាត់ គ្រាដែលវាជិតទៅដល់គោលដៅ។ ប្រេងរបស់កប៉ាល់ បានអណ្ដែតលើផ្ទៃសមុទ្រ ប្រវែងជិត 5 គីឡូម៉ែត្រ។

Nippon Yusen ដែលជាអ្នកគ្រប់គ្រងកប៉ាល់ Crimson Polaris បានឱ្យដឹងថា កប៉ាល់នេះត្រូវបានសាងសង់កាលពីឆ្នាំ 2008 ហើយវាជួបគ្រោះថ្នាក់ដោយសារខ្យល់បោកបក់ខ្លាំង។

«Nippon Yusen កំពុងស្រង់ស្ថិតិនៃបរិមាណទំនិញ និងផលប៉ះពាល់នៃគ្រោះថ្នាក់នេះ ចំពោះបរិស្ថានលើផ្ទៃសមុទ្រ។ ក្រុមហ៊ុនក៏បានបញ្ជូនបុគ្គលិកទៅកាន់កន្លែងកើតហេតុ និងជួយដល់ម្ចាស់កប៉ាល់ រួមនឹងក្រុមហ៊ុនគ្រប់គ្រងកប៉ាល់» នេះបើតាមការឱ្យដឹងពីក្រុមហ៊ុន Nippon Yusen។

សមាជិកចំនួន 21 រូបនៃក្រុមនាវិកលើកប៉ាល់ Crimson Polaris ដែលក្នុងនោះមានជនជាតិចិន 8 នាក់ និងជនជាតិហ្វីលីពីន 13 នាក់ ត្រូវបាននាំឡើងច្រាំងដោយសុវត្ថិភាព ក្រោយការជួយសង្គ្រោះរយៈពេលប្រហែល 5 ម៉ោង៕

August 14, 2021

ឥណ្ឌូនេស៊ី ប្រែក្លាយកប៉ាល់ខ្នាតយក្ស ទៅជាមជ្ឈមណ្ឌលព្យាបាល COVID-19

កប៉ាល់មួយគ្រឿងមានឈ្មោះថា KM Umsini ដែលធ្លាប់ដឹកភ្ញៀវ 2,000 នាក់ក្នុងមួយជើង ទៅតាមពេលវេលាទៀងទាត់ រវាងបណ្ដាទីក្រុងកោះនានារបស់ ឥណ្ឌូនេស៊ី។

ពេលនេះ KM Umsini បានក្លាយជាមជ្ឈមណ្ឌលចត្តាឡីស័ក និងព្យាបាលអ្នកជំងឺ COVID-19 កម្រិតស្រាល ដោយវាចតនៅកំពង់ផែនៃទីក្រុង Makassar ក្នុងគ្រាដែលវ៉ារ្យ៉ង់ Delta កំពុងឆ្លងរាលដាលខ្លាំងនៅ ឥណ្ឌូនេស៊ី។

យោងតាមសារព័ត៌មាន Reuters នៅក្នុងកប៉ាល់នេះ គ្រែចំនួនជាង 800 ត្រូវបានរៀបចំជាស្រេច ព្រមទាំងមានបុគ្គលិកសុខាភិបាលចំនួន 60 នាក់ ធ្វើការតាមវេន ដើម្បីជួយគាំទ្រដល់ការព្យាបាលអ្នកជំងឺ។

អ្នកដែលបានឆ្លង COVID-19 នឹងត្រូវធ្វើចត្តាឡីស័ករយៈពេល 10 ថ្ងៃ។ ក្នុងអំឡុងពេលនោះ ពួកគេនឹងត្រូវពិនិត្យសុខភាពជាប្រចាំ ក៏ដូចជាអាចហាត់ប្រាណ ស្ដាប់តន្ត្រី ឬស្ទូចត្រី។ល។

«ខ្ញុំជ្រើសរើសការធ្វើចត្តាឡីស័កលើកប៉ាល់ ពីព្រោះខ្ញុំគិតថា ជារឿងគ្មានពីរ នៅ Makassar នេះ។ ហើយដោយសារតែកប៉ាល់ ចតឆ្ងាយពីទីក្រុង ដូច្នេះ យើងនឹងមិនអាចចម្លងវីរុសទៅអ្នកដទៃបាន» អ្នកជំងឺ Mitha Andriyanti ថ្លែងដូច្នេះ។

ឥណ្ឌូនេស៊ី ដែលជាសម្បុកវីរុស COVID-19 ដ៏ធំមួយនៅក្នុងពិភពលោក បានចាត់វិធានការរឹតបន្តឹងលើការធ្វើដំណើររវាងកោះចំនួនពីរគឺ Java និង Bali នៅដើមខែកក្កដា ដើម្បីទប់ស្កាត់ការឆ្លងរាលដាលរបស់ Delta។ ចាប់តាំងពីពេលនោះមក ប្រទេសនេះក៏បានចាប់ផ្ដើមពង្រីកការកាត់បន្ថយការធ្វើដំណើរនៅក្នុងតំបន់ផ្សេងៗទៀតដែលមានអត្រាឆ្លងវីរុសខ្ពស់។

បញ្ហានេះ បានប៉ះពាល់ដល់មនុស្សជិត 9 លាននាក់នៅខេត្ត Sulawesi ខាងត្បូង ជាតំបន់ដែលមានទីក្រុង Makassar។ Makassar បានប្រទះនឹងការកើនឡើងនៃករណីវិជ្ជមាននឹង COVID-19 ចាប់តាំងពីដើមខែកក្កដា និងកំពុងដោះស្រាយបញ្ហាខ្វះខាតប្រភពផ្គត់ផ្គង់នានា។

អភិបាលក្រុង Makassar លោក Mohammad Ramdhan Pomanto កាលពីថ្ងៃទី 12 សីហា បានឱ្យដឹងថា៖ «ថ្ងៃនេះ យើងបានរកឃើញអ្នកវិជ្ជមាននឹង COVID-19 ថ្មី យ៉ាងតិច 3,000 នាក់ ដែលពួកគេកំពុងធ្វើចត្តាឡីស័កនៅតាមផ្ទះ ហើយយើងក៏មិនអាចគ្រប់គ្រងបានទាំងអស់។ បញ្ហានេះពិតជាគ្រោះថ្នាក់ ដូច្នេះ យើងបានសម្រេចបង្កើតមជ្ឈមណ្ឌលចត្តាឡីស័កនៅលើកប៉ាល់ Umsini ដើម្បីតាមដានសុខភាពរបស់អ្នកជំងឺ ឱ្យបានដិតដល់ជាងមុន»៕

August 14, 2021

ស្ថានទូត អាមេរិក នៅ អាហ្វហ្គានីស្ថាន កម្ទេចឯកសារសម្ងាត់ ក្នុងគ្រា តាលីបង់ វាយសម្រុកជិតដល់រដ្ឋធានី

អាហ្វហ្គានីស្ថាន៖ ស្ថានទូតរបស់ សហរដ្ឋអាមេរិក នៅរដ្ឋធានី កាប៊ុល បានចេញបញ្ជាឱ្យបុគ្គលិក កម្ទេចចោលឯកសារសម្ងាត់ ដែលអាចត្រូវបានប្រើប្រាស់ដើម្បីឃោសនា ក្នុងគ្រាដែលកម្លាំងនៃចលនា តាលីបង់ កំពុងវាយសម្រុកចូលជិតដល់រដ្ឋធានី។

ក្នុងកំណត់ហេតុមួយ អ្នកគ្រប់គ្រងមួយរូបប្រចាំស្ថានទូត អាមេរិក កាលពីថ្ងៃទី 13 សីហា បានបញ្ជាឱ្យបុគ្គលិកស្ថានទូត យកឯកសារទៅកាន់ឡនានា ដើម្បីដុតកម្ទេចឯកសារ និងឧបករណ៍មួយចំនួន។ «ចូរយកវត្ថុនានាដែលមានស្ថាកសញ្ញានៃស្ថានទូត ឬស្ថាប័ន ទង់ជាតិអាមេរិក ឬវត្ថុទាំងឡាយដែលអាចត្រូវបានប្រើប្រាស់ក្នុងបំណងឃោសនា» កំណត់ហេតុបានឱ្យដឹងដូច្នេះ។ នេះបើតាមសារព័ត៌មានបារាំង AFP។

កំណត់ហេតុនេះគឺជាសញ្ញាថ្មីបំផុតដែលស្ដែងអំពីការព្រួយបារម្ភកាន់តែខ្លាំងចំពោះសុវត្ថិភាពរបស់ស្ថានទូតមួយក្នុងចំណោមស្ថានទូតធំបំផុតក្នុងពិភពលោក បន្ទាប់ពីប្រធានាធិបតីអាមេរិក Joe Biden បានចេញបញ្ជាឱ្យដងកងទ័ពអាមេរិក ចេញពី អាហ្វហ្គានីស្ថាន ក្រោយរយៈ 20 ឆ្នាំ ដែលបានគ្រប់គ្រងប្រទេសនេះ។

រដ្ឋាភិបាលរបស់លោក Biden គ្រោងនឹងអនុវត្តវិធានការការពារពិសេស ដើម្បីការពារក្រុមអ្នកការទូតអាមេរិក ប្រចាំរដ្ឋធានី កាប៊ុល ដោយសារធ្លាប់រងការវាយប្រហារពីក្រុមប្រដាប់អាវុធអ៊ីស្លាមជ្រុលនិយម នៅឯស្ថានកុងស៊ុល ក្នុងទីក្រុង Benghazi នៃប្រទេសលីប៊ី កាលពីឆ្នាំ 2012។

តាលីបង់ បានចាប់ផ្ដើមវាយប្រហារខ្លាំងក្លាកាលពីខែឧសភា ក្រោយពី សហរដ្ឋអាមេរិក និងសម្ព័ន្ធមិត្ត បានដកទ័ពចេញពី អាហ្វហ្គានីស្ថាន នៅពេលប្រធានាធិបតី Joe Biden ប្ដេជ្ញាចិត្ត បញ្ចប់យុទ្ធនាការយោធារយៈពេល 20 ឆ្នាំ នៅប្រទេសអាស៊ីកណ្ដាលមួយនេះ។

កងទ័ពរដ្ឋាភិបាល អាហ្វហ្គានីស្ថាន បច្ចុប្បន្ន នៅគ្រប់គ្រងរដ្ឋធានី កាប៊ុល និងតំបន់មួយចំនួនទៀតប៉ុណ្ណោះ។ ក្រុមមន្ត្រី និងអ្នកស្រុក Kandahar បានឱ្យដឹងថា កងទ័ពរដ្ឋាភិបាល បានដកថយទៅកាន់មូលដ្ឋានយោធានៅជាយភាគខាងត្បូងនៃទីក្រុង មុនពេល តាលីបង់ បានចូលមកគ្រប់គ្រង Kandahar។

បរិវេណមួយកន្លែងនៅខាងក្នុងស្ថានទូតអាមេរិក ប្រចាំ អាហ្វហ្គានីស្ថាន

តាលីបង់ ទំនងជាមានបំណងប្រើប្រាស់កម្លាំងទ័ព ដើម្បីស្ការអំណាចដែលត្រូវបានផ្ដួលរំលំកាលពី 20 ឆ្នាំមុន ក្រោយពី សហរដ្ឋអាមេរិក និងកម្លាំងបរទេស បានដកទ័ព។ មន្ត្រីការពារជាតិអាមេរិកម្នាក់ កាលពីថ្ងៃទី 11 សីហា បានបង្ហើបឱ្យដឹងថា ចារកម្មរបស់ អាមេរិក បានវាយតម្លៃថា តាលីបង់ អាចចូលមកឡោមព័ទ្ធរដ្ឋធានីកាប៊ុល ក្នុងរយៈពេល 30 ថ្ងៃទៀត ហើយអាចដណ្ដើមបានរដ្ឋធានីនេះ ក្នុងរង្វង់ 90 ថ្ងៃទៀត៕

August 14, 2021

តាលីបង់ ចូលកាន់តែជិតរដ្ឋធានីរបស់ អាហ្វហ្គានីស្ថាន មែនទែនហើយ!

អាហ្វហ្គានីស្ថាន៖ ក្រុមប្រដាប់អាវុធ តាលីបង់ គ្រប់គ្រងបានទីរួមខេត្តរបស់ Logar ចម្ងាយ 50 គីឡូម៉ែត្រ ពីរដ្ឋធានី កាប៊ុល ដែលនេះត្រូវបានគេជឿថា បានបើកផ្លូវសម្រាប់ការឆ្ពោះត្រង់ទៅកាន់រដ្ឋធានីដោយចំណាយពេលខ្លីបំផុត។

«តាលីបង់ គ្រប់គ្រងខេត្ត Logar បាន 100% និងពុំមានការប្រយុទ្ធគ្នាទៀតទេ នៅក្នុងខេត្តនេះ។ ក្រុមមន្ត្រីរដ្ឋាភិបាលភាគច្រើន បានរត់ទៅកាន់រដ្ឋធានី កាប៊ុល» នេះបើតាមសម្ដីរបស់តំណាងរាស្ត្រ អាហ្វហ្គានីស្ថាន Saeed Qaribullah Sadat ដែលបានឱ្យដឹងកាលពីម្សិលមិញ។ តំណាងរាស្ត្រនេះបានបញ្ជាក់ថា ទីរួមខេត្ត Puli Alam ក៏បានធ្លាក់ទៅក្នុងដៃរបស់ក្រុម តាលីបង់។

កងទ័ពរដ្ឋាភិបាល អាហ្វហ្គានីស្ថាន បច្ចុប្បន្ន នៅគ្រប់គ្រងរដ្ឋធានី កាប៊ុល និងតំបន់មួយចំនួនទៀតប៉ុណ្ណោះ។ ក្រុមមន្ត្រី និងអ្នកស្រុក Kandahar បានឱ្យដឹងថា កងទ័ពរដ្ឋាភិបាល បានដកថយទៅកាន់មូលដ្ឋានយោធានៅជាយភាគខាងត្បូងនៃទីក្រុង មុនពេល តាលីបង់ បានចូលមកគ្រប់គ្រង Kandahar។

ក្រោយដណ្ដើមបាន Kandahar ក្រុម តាលីបង់ ក៏បានប្រកាសថា ដណ្ដើមបានក្រុង Lashkar Gah ដែលជាទីរួមខេត្តរបស់ Helmand។

កងទ័ពរដ្ឋាភិបាល អាហ្វហ្គានីស្ថាន បានធ្វើឱ្យបាត់បង់ទឹកដីភាគច្រើនទៅក្នុងដៃក្រុមប្រដាប់អាវុធ តាលីបង់ បន្ទាប់ពីរយៈពេល 8 ថ្ងៃ ដែលក្រុមនេះបានចាប់ផ្ដើមវាយប្រហារលើទីក្រុងនានា ក្រោយការសម្រេចដកទ័ពរបស់ សហរដ្ឋអាមេរិក កាលពីខែឧសភា ដើម្បីបញ្ចប់វត្តមាន 20 ឆ្នាំនៃកងទ័ពអាមេរិក នៅលើទឹកដីនេះ៕

August 14, 2021

កុមារវ័យ 11 ឆ្នាំ ដើរជាង 300 គីឡូម៉ែត្រ ដើម្បីសង្គ្រោះផែនដី

Jude Walker អាយុ 11 ឆ្នាំ បានធ្វើដំណើរដោយថ្មើរជើងក្នុងចម្ងាយផ្លូវជាង 330 គីឡូម៉ែត្រ ពីភាគខាងជើងប្រទេសអង់គ្លេស ទៅកាន់ទីក្រុងឡុងដ៍ ដើម្បីអំពាវនាវឱ្យមានការគាំទ្រដល់ការយកពន្ធការបំភាយឧស្ម័នកាបូន។

ក្រោយទទួលបានការលើកទឹកចិត្តពីសកម្មជនបរិស្ថានម្នាក់ឈ្មោះ Greta Thunberg កុមារា Walker មកពីតំបន់ Hebden Bridge នៃស្រុក Yorkshire បានបង្ហាញភាពក្លាហានរបស់ខ្លួន តាមរយៈការធ្វើដំណើរថ្មើរជើង ក្នុងចម្ងាយផ្លូវជាង 330 គីឡូម៉ែត្រ ឆ្លងកាត់ភ្នំតូច ភ្នំធំ ឆ្លងវាល កាត់ព្រៃ ក្រោមកំដៅថ្ងៃ ភ្លៀង ខ្យល់ ដើម្បីសម្រេចគោលដៅដ៏អស្ចារ្យ នោះគឺការឆ្ពោះទៅកាន់វិមានសភាអង់គ្លេស ដែលស្ថិតនៅក្នុងតំបន់ Westminster នៃទីក្រុងឡុងដ៍។ នេះបើតាមការចុះផ្សាយរបស់សារព័ត៌មាន Reuters។

កុមាររូបនេះ យល់ថា ការយកពន្ធលើសកម្មភាពបំភាយឧស្ម័នកាបូន គឺជាជំហានសំខាន់ដើម្បីទប់ស្កាត់ដំណើរការរុញច្រានមនុស្សលោក ធ្លាក់ទៅក្នុងស្ថានភាពដែលកុមារនេះហៅថា «ផុតពូជ»។

«ពេលនេះ យើងគ្រប់គ្នាបានដឹងច្រើនអំពីការប្រែប្រួលអាកាសធាតុ ហើយខ្ញុំគិតថា ពន្ធលើកាបូន ប្រាកដជាវិធីមួយក្នុងចំណោមដំណោះស្រាយដ៏មានប្រយោជន៍បំផុតសម្រាប់បញ្ហានេះ» កុមារ Walker និយាយនៅពេលដើរកាត់ទីរួមស្រុក Woburn Sands ដែលមានចម្ងាយប្រហែល 80 គីឡូម៉ែត្រពីក្រុងឡុងដ៍។

Walker សង្ឃឹមថា ដំណើរយាត្រារបស់ខ្លួននឹងទាក់ទាញការគាំទ្រពីគ្រប់គ្នា ហើយចុះហត្ថលេខាលើញត្តិមួយដែលស្នើឱ្យមានការយកពន្ធលើការបំភាយឧស្ម័នកាបូន។ ញត្តិរបស់កុមារនេះ ទទួលបានហត្ថលេខាចំនួន 57,000 នាក់រួចហើយ។ នៅពេលញត្តិនេះ មានហត្ថលេខាគ្រប់ 100,000 នាក់ នោះវានឹងត្រូវបានយកទៅពិនិត្យ ដើម្បីលើកជារបៀបវារៈ ក្នុងកិច្ចប្រជុំនៅសភាអង់គ្លេស។

Walker បានឱ្យដឹងថា៖ «ឥទ្ធិពលនៃការប្រែប្រួលអាកាសធាតុ បានបង្ហាញខ្លួនហើយ។ យើងពិតជាត្រូវការផ្លាស់ប្ដូរនៅពេលនេះ បើសិនជាចង់ចៀសវាងលទ្ធផលមហាសែនអាក្រក់នាពេលខាងមុខ»។

Walker ដើរដោយថ្មើរជើងប្រហែល 16 គីឡូម៉ែត្រ ក្នុង 1 ថ្ងៃ ជាមួយនឹងសមាជិកគ្រួសារ និងមិត្តភក្ដិ។ Walker នឹងបញ្ចប់ដំណើរយាត្រារយៈចម្ងាយជាង 330 គីឡូម៉ែត្រ របស់ខ្លួន នៅឯឧទ្យាន St James ក្នុងថ្ងៃទី 14 សីហា 2021៕

August 13, 2021

Category: អន្តរជាតិ