អន្តរជាតិ - La Reine Media

តាលីបង់ ប្រមូលទាហាន ឆ្ពោះទៅវាយប្រហារមូលដ្ឋានទ័ព Panjshir របស់ក្រុមដែលមិនព្រមចុះចាញ់

ក្រុម តាលីបង់ បានប្រកាសថា ទាហានរាប់រយនាក់របស់ខ្លួន កំពុងឆ្ពោះទៅកាន់ជ្រលងភ្នំ Panjshir ជាទីដែលអតីតមន្ត្រីយោធា អាហ្វហ្គានីស្ថាន កំពុងបង្កើតចលនាប្រឆាំង តាលីបង់។

«ក្រុម មូចាហ៊ីឌីន (ជាក្រុមប្រយុទ្ធដើម្បីសាសនាអ៊ីស្លាម) រាប់រយនាក់ របស់រដ្ឋអ៊ីស្លាមអេមីរ៉ាតអាហ្វហ្គានីស្ថាន កំពុងឆ្ពោះទៅកាន់ Panjshir ដើម្បីដណ្ដើមកាន់កាប់ជ្រលងភ្នំ បន្ទាប់ពីក្រុមមន្ត្រីមូលដ្ឋាន មិនព្រមប្រគល់អំណាចដោយសន្តិវិធី» តាលីបង់ បានបង្ហោះសារដូច្នេះនៅលើ Twitter កាលពីថ្ងៃទី 22 សីហា។ មូចាហ៊ីឌីន (Mujahideen) គឺជាពាក្យដែល តាលីបង់ ប្រើប្រាស់ សំដៅលើទាហានខ្លួន។

ចាប់តាំងពី តាលីបង់ បានគ្រប់គ្រង អាហ្វហ្គានីស្ថាន គេឃើញមានចលនាប្រឆាំងនានា កំពុងផ្ទុះឡើង នៅពេលទាហានរបស់រដ្ឋាភិបាលដែលបានដួលរលំ ប្រមូលផ្ដុំគ្នានៅជ្រលងភ្នំ Panjshir ជាទីតាំងដែលត្រូវបានគេហៅថា មូលដ្ឋានប្រឆាំងនឹង តាលីបង់។ លោក Amrullah Sahel អតីតអនុប្រធានាធិបតី អាហ្វហ្គានីស្ថាន ក៏បានប្រកាសបង្កើតចលនាប្រឆាំងនឹង តាលីបង់ នៅជ្រលងភ្នំនេះផងដែរ។

លោក Ahmad Massoud អតីតរដ្ឋមន្ត្រីការពារជាតិស្ដីទីរបស់ អាហ្វហ្គានីស្ថាន ជាអ្នកប្រយុទ្ធចុងក្រោយដែលនៅប្រឆាំងនឹង តាលីបង់ បានឱ្យដឹងថា ពួកគេសង្ឃឹមថា អាចចរចាដោយសន្តិភាព ប៉ុន្តែ បញ្ជាក់ថា កងកម្លាំងរបស់ខ្លួននៅ Panjshir បានត្រៀមប្រយុទ្ធរួចរាល់ហើយ។

«យើងចង់ប្រាប់ តាលីបង់ ឱ្យដឹងថា ផ្លូវដែលត្រូវដើរបន្តគឺ ការចរចា។ យើងមិនចង់បង្កើតសង្គ្រាម» Ahmad Massoud ថ្លែងដូច្នេះ។ កងកម្លាំងរបស់ Massoud រួមមាន ក្រុមទាហាននៃកងទ័ពរដ្ឋាភិបាល និងកម្លាំងពិសេស របស់ អាហ្វហ្កានីស្ថាន រួមទាំងកងជីវពលក្នុងតំបន់ផងដែរ។

Ahmad Massoud គឺជាកូនប្រុសរបស់ Ahmad Shah Massoud ជាមេបញ្ជាការម្នាក់ក្នុងចំណោមមេដឹកនាំសំខាន់ៗរបស់សម្ព័ន្ធយោធាខាងជើង ដែលធ្លាប់ប្រឈមមុខជាមួយ តាលីបង់ រហូតដល់ឆ្នាំ 2001។ Ahmad Massoud អះអាងថា អ្នកគាំទ្ររបស់លោក បានត្រៀមខ្លួនរួចរាល់ហើយក្នុងការប្រយុទ្ធ បើសិទ្ធជា តាលីបង់ ព្យាយាមចូលមកគ្រប់គ្រងជ្រលងភ្នំ Panjshir។

យ៉ាងនេះក្ដី មិនទាន់ច្បាស់ថា យុទ្ធនាការចូលដណ្ដើមកាន់កាប់ Panjshir របស់ តាលីបង់ បានចាប់ផ្ដើមហើយ ឬនៅ។ មន្ត្រី តាលីបង់ ម្នាក់ និយាយថា តាលីបង់ បានចេញបញ្ជាឱ្យវាយប្រហារ ខណៈដែលជំនួយការម្នាក់របស់ Massoud ឱ្យដឹងថា មិនទាន់មានសញ្ញាបង្ហាញថា ក្រុមប្រដាប់អាវុធ តាលីបង់ ឆ្លងកាត់ផ្លូវនៅលើភ្នំដើម្បីចូលទៅកាន់ជ្រលងភ្នំ ហើយក៏មិនទាន់មានរបាយការណ៍ស្ដីពីការប្រយុទ្ធគ្នានៅឡើយដែរ។

Masoud ប្រកាសថា មិនធ្វើការវាយប្រហារដោយប្រើប្រាស់កងជីវពលក្នុងតំបន់នេះ ប៉ុន្តែ បានអំពាវនាវឱ្យបង្កើតរដ្ឋាភិបាលពេញលេញមួយនៅ កាប៊ុល ដែលតំណាងឱ្យគ្រប់ជាតិសាសន៍ របស់ អាហ្វហ្គានីស្ថាន។

តាលីបង់ បានចូលគ្រប់គ្រងរដ្ឋធានីកាប៊ុល កាលពីថ្ងៃទី 15 សីហា ដោយស្ទើរតែមិនមានការប្រយុទ្ធគ្នា បន្ទាប់ពី សហរដ្ឋអាមេរិក ដកទ័ពចេញពី អាហ្វហ្គានីស្ថាន ទៅតាមបំណងរបស់ប្រធានាធិបតី សហរដ្ឋអាមេរិក លោក Joe Biden ក្រោយរយៈពេល 20 ឆ្នាំ ដែលពួកគេមានវត្តមាននៅប្រទេសនេះ៕

August 23, 2021

អ៊ីស្រាអែល បញ្ជាក់ថា វ៉ាក់សាំងដូសបន្ថែម កាត់បន្ថយហានិភ័យឆ្លងវីរុស COVID-19

ក្រសួងសុខាភិបាល អ៊ីស្រាអែល កាលពីថ្ងៃទី 22 សីហា បានប្រកាសអំពីលទ្ធផលនៃការចាក់វ៉ាក់សាំង Pfizer ដូសទីបី និងបានបញ្ជាក់ថា ដូសបន្ថែមនេះ បានជួយលើកកម្ពស់ប្រសិទ្ធភាពនៃការទប់ស្កាត់ការឆ្លងរាលដាលរបស់ COVID-19។

លទ្ធផលនៃការស្រាវជ្រាវនេះ ត្រូវបានលើកឡើងនៅក្នុងកិច្ចប្រជុំមួយរបស់ក្រុមប្រឹក្សាគ្រប់គ្រងការចាក់វ៉ាក់សាំង កាលពីថ្ងៃទី 19 សីហា និងត្រូវបានចុះផ្សាយនៅលើគេហទំព័ររបស់ក្រសួងសុខាភិបាល អ៊ីស្រាអែល កាលពីថ្ងៃទី 23 សីហា ក៏ប៉ុន្តែ បច្ចុប្បន្ននេះ សេចក្ដីលម្អិតនៃការស្រាវជ្រាវនេះ មិនទាន់ត្រូវបានធ្វើឡើងពេញលេញនៅឡើយ។

ការរកឃើញនេះគឺត្រូវទៅនឹងស្ថិតិដែលត្រូវបានលើកឡើងកាលពីសប្ដាហ៍មុន ដោយ Maccabi ដែលជាអ្នកផ្ដល់សេវាកម្មសុខាភិបាល របស់ អ៊ីស្រាអែល និងជាស្ថាប័នមួយក្នុងចំណោមស្ថាប័នដែលចាក់វ៉ាក់សាំងដូសបន្ថែម ដើម្បីទប់ស្កាត់វ៉ារ្យ៉ង់ Delta។

ក្រោយការពិនិត្យទៅលើទិន្នន័យដែលបានដកស្រង់ពីស្ថិតិ របស់វិទ្យាស្ថាន Gertner និងវិទ្យាស្ថាន KI ក្រុមមន្ត្រីសុខាភីបាល អ៊ីស្រាអែល ឱ្យដឹងថា ក្នុងចំណោមមនុស្សដែលមានវ័យលើសពី 60 ឆ្នាំ លទ្ធភាពនៃការទប់ស្កាត់ការឆ្លងវីរុស បន្ទាប់ពីបានចាក់ម្ជុលទីបី បាន 10 ថ្ងៃ គឺខ្ពស់ជាង 4 ដង ធៀបនឹងអ្នកចាក់តែពីរម្ជុល។

ការចាក់ដូសទីបីដល់ពលរដ្ឋវ័យលើសពី 60 ឆ្នាំ ក៏ជួយកាត់បន្ថយហានិភ័យនៃការចូលពេទ្យ និងអាការធ្ងន់ធ្ងរ ចាប់ពី 5 ដល់ 6 ដងឯណោះ។ នេះគឺជាក្រុមដែលងាយរងគ្រោះដោយសារ COVID-19 និងជាក្រុមពលរដ្ឋដែលទទួលបានការចាក់វ៉ាក់សាំងដំបូងគេនៅ អ៊ីស្រាអែល កាលពីខែធ្នូ ឆ្នាំ 2020។

អ៊ីស្រាអែល គិតមកដល់បច្ចុប្បន្ន បានរកឃើញអ្នកឆ្លង COVID-19 សរុបចំនួន 990,428 នាក់ ក្នុងនោះមាន 6,830 នាក់ បានស្លាប់៕

August 23, 2021

វិធីសាស្ត្រដែល សិង្ហបុរី ប្រើប្រាស់ដើម្បីធ្វើឱ្យទីក្រុង «ចុះត្រជាក់» (វីដេអូ)

ដើម្បីបញ្ចុះកម្ដៅដល់ទីក្រុង សិង្ហបុរី បានរចនាប្រព័ន្ធបញ្ចុះកម្ដៅក្រោមដីក្នុងអគារនានា ដាំដើមឈើ និងការពារប្រភពទឹកក្រោមដី។

សិង្ហបុរី តែងមានសីតុណ្ហភាពលើសពី 32 អង្សាសេ។ នៅលើផ្ទៃដីនៃទីក្រុងរបស់ សិង្ហបុរី ស្ទើរតែទាំងអស់គឺជាប៊េតុង នាំឱ្យសីតុណ្ហភាពកើនឡើងពីមួយថ្ងៃទៅមួយថ្ងៃ។ នេះក៏ជាមូលហេតុដែលធ្វើឱ្យកម្ដៅនៅជនបទ និងនៅទីក្រុងរបស់ប្រទេសនេះ ខុសគ្នារហូតដល់ 7 អង្សាសេ។

រដ្ឋាភិបាល កំពុងចាត់វិធានការនានាដើម្បីចញ្ចុះកម្ដៅ។ សួន Garden by the Bay ដែលជាទីប្រមូលផ្ដុំនៃសំណង់មួយកន្លែង ធ្លាប់ទទួលបានពានរង្វាន់ International Garden Tourism ដោយសីតុណ្ហភាពក្នុងអគារកញ្ចក់ខាងក្នុងសួននេះ មានកម្ដៅត្រឹមតែ 24 អង្សាសេ ប៉ុណ្ណោះ។

ដោយសារតែមានប្រព័ន្ធបញ្ចុះកម្ដៅក្រោមដី ទើបអគារជាច្រើននៅជុំវិញសួននេះ ទទួលបានផលចំណេញ។ ប្រព័ន្ធបញ្ចុះកម្ដៅនេះ នឹងផ្គត់ផ្គង់ទឹកត្រជាក់ដល់អគារនានា តាមរយៈបណ្ដាញទូយោទឹកក្រោមដីដែលមិនអាចចម្លងកម្ដៅ។

ប្រទេសនេះ ប្រើប្រាស់មជ្ឈមណ្ឌលរោងចក្រដ៏ធំមួយ ដើម្បីបញ្ចុះកំដៅរបស់ទឹក។ ទឹកត្រជាក់នឹងត្រូវបាននាំឆ្លងកាត់ប្រព័ន្ធផ្លាស់ប្ដូរកម្ដៅដែលរត់ទៅតាមទូយោក្នុងអគារ មជ្ឈមណ្ឌលពិព័រណ៍ មជ្ឈមណ្ឌលពាណិជ្ជកម្ម និងមជ្ឈមណ្ឌលបដិសណ្ឋារកិច្ច Marina Bay Sand។

ប្រព័ន្ធបញ្ចុះកម្ដៅរបស់ទឹក អាចសំច័យថាមពលអគ្គិសនីបាន 40% ធៀបនឹងម៉ាស៊ីនត្រជាក់។ ក្រៅពីនេះ វាក៏ជួយកាត់បន្ថយការបំភាយឧស្ម័នដែលស្មើនឹងការដំណើរការរបស់រថយន្តចំនួន 10,000 គ្រឿងឯណោះ។

បើសិនត្រូវបានប្រើប្រាស់ទូទាំងពិភពលោក បច្ចេកទេសនេះរបស់ សិង្ហបុរី អាចសំច័យថាមពលអគ្គិសនីបាន 1/3 នៃអគ្គិសនីដែលបាន ប្រើប្រាស់នាបច្ចុប្បន្ន សម្រាប់បញ្ចុះកម្ដៅទៅលើអគារ និងរថយន្ត នាឆ្នាំ 2050។

ចាប់តាំងពីឆ្នាំ 2017 ក្រុមអ្នកស្រាវជ្រាវនៃគម្រោងបញ្ចុះកម្ដៅ (Cooling) សិង្ហបុរី បានដំណើរការគម្រោងនេះ។ គម្រោងនេះ បានអនុវត្តដំណោះស្រាយ ដើម្បីកាត់បន្ថយតម្រូវការប្រើប្រាស់ម៉ាស៊ីនត្រជាក់។

ទន្ទឹមនឹងនេះ សិង្ហបុរី ក៏មានគម្រោងអភិវឌ្ឍតំបន់បៃតងផងដែរ។ ឧទាហរណ៍៖ Parkroyal on Pickering ត្រូវបានរចនាតាមបែប «សណ្ឋាគារកណ្ដាលសួនរុក្ខជាតិ»។ ពួកគេបង្កើនទ្វេដងនូវសក្ដានុពលអភិវឌ្ឍតំបន់តៃបងរបស់ខ្លួន។ បច្ចុប្បន្ន សណ្ឋាគារនេះ មានសួននៅក្នុងទីខ្ពស់ ទំហំ 15,000 ម៉ែត្រក្រឡា បឹង ជ្រោះ ដំបូលមានដាំរុក្ខជាតិ រួមនឹងជញ្ជាំងបៃតង។

សិង្ហបុរី បានរៀបចំផែនការដាំរុក្ខជាតិចំនួន 1 លានដើរបន្ថែមទៀត និងបង្កើតតំបន់បៃតងជាច្រើនផ្សេងទៀត ក្នុងរយៈពេល 10 ឆ្នាំខាងមុខ។ ប៉ុននេះ មិនទាន់គ្រប់គ្រាន់នៅឡើយ។ សិង្ហបុរី នៅតែកំពុងប្រឈមនឹងការឡើងកម្ដៅទ្វេដង ធៀបនឹងកម្រិតមធ្យមរបស់ពិភពលោក ក្នុងរយៈពេល 60 ឆ្នាំកន្លង។ ដូច្នេះ Cooling Singapore បានបង្កើតតារាងស្ថិតិមួយដែលរៀបរាប់អំពីដំណោះស្រាយទាំងឡាយដែលមានសក្ដានុពលក្នុងការបញ្ចុះកម្ដៅ។

ការការពារប្រភពទឹកក្រោមដី មានតួនាទីដូចទៅនឹងស្រទាប់បញ្ចុះកម្ដៅយ៉ាងមានប្រសិទ្ធភាព។ ធានាឱ្យបានប្រាកដថា ទីក្រុងមិនមានការប្រើប្រាស់ម៉ាស៊ីនចំហេះក្នុង ទាំងក្នុងរយៈពេលខ្លី មធ្យម ឬរយៈពេលវែង។ ផ្លាស់ទីរោងចក្រផលិតអគ្គិសនី ទៅតាំងនៅជាយក្រុង និងនាំយកប្រភពអគ្គិសនីស្អាតចូលទីក្រុង។ ផ្លាស់ប្ដូរដំបូលផ្ទះនៅក្នុងទីក្រុង ទៅជាតំបន់ដែលអាចផលិតថាមពលដែលអាចប្រើប្រាស់ឡើងវិញបាន ជាជំហាន។

បើសិនជាគ្រប់ដំបូលផ្ទះ និងផ្ទៃខាងក្រៅរបស់ផ្ទះ ត្រូវបានអនុវត្តតាមវិធីសាស្ត្រនេះ ក្នុងរយៈពេលវែង គេអាចផលិតបានអគ្គិសនី ចាប់ពី 20-25% នៃបរិមាណអគ្គិសនីចាំបាច់ នៅ សិង្ហបុរី៕

August 21, 2021

Putin ស្នើឱ្យលោកខាងលិច ឈប់ធ្វើអន្តរាគមន៍ លើ អាហ្វហ្គានីស្ថាន

លោក Putin បានស្នើឱ្យក្រុមប្រទេសលោកខាងលិច ឈប់ជ្រៀតជ្រែកកិច្ចការផ្ទៃក្នុងរបស់ប្រទេស អាហ្វហ្គានីស្ថាន និងថា លោកខាងលិច «ត្រូវតែបញ្ចប់គោលនយោបាយគ្មានការទទួលខុសត្រូវ» របស់ពួកគេ។

«មិនអាចហៅវាថាជាជោគជ័យ» ប្រធានាធិបតី រុស្ស៊ី Vladimir Putin និយាយដូច្នេះនៅក្នុងជំនួបជាមួយនាយករដ្ឋមន្ត្រី អាល្លឺម៉ង់ Angel Merkel នៅវិមានក្រឹមឡាំង កាលពីថ្ងៃទី 20 សីហា ពេលត្រូវបានសួរដល់អន្តរាគមន៍ដែលដឹកនាំដោយ សហរដ្ឋអាមេរិក នៅ អាហ្វហ្គានីស្ថាន បន្ទាប់ពីករណីភេរវកម្ម ថ្ងៃទី 11 កញ្ញា ឆ្នាំ 2001។

«ប៉ុន្តែ ការយកចិត្តទុកដាក់នាបច្ចុប្បន្នរបស់យើង គឺមិនមែនវាយតម្លៃអំពីបញ្ហានេះ ឬចាត់ទុកជាបរាជ័យ។ យើងចង់ឱ្យស្ថានករណ៍នៅ អាហ្វហ្គានីស្ថាន មានស្ថេរភាព» លោក Putin បន្ថែម។

ប្រធានាធិបតី រុស្ស៊ី ក៏បានសម្ដែងការព្រួយបារម្ភ ចំពោះក្រុមប្រដាប់អាវុធពី អាហ្វហ្គានីស្ថាន ដែលអាចព្យាយាមចូលក្នុងទឹកដីនៃប្រទេសជិតខាង ក្រោមរូបភាពជាជនភៀសខ្លួន។

លោក Putin ក៏បានរិះគន់លើការគាំទ្ររបស់ប្រទេសលោកខាងលិច ចំពោះរដ្ឋាភិបាល អាហ្វហ្គានីស្ថាន ផងដែរ ដោយបញ្ជាក់ថា ការព្យាយាម «កសាងមូលដ្ឋានគ្រឹះប្រជាធិបតេយ្យនៅក្នុងប្រទេសដទៃ ទៅតាមគំរូរបស់បរទេស» នឹងទទួលបានឥទ្ធិពលបញ្ច្រាស។ លោកស្នើឱ្យបណ្ដាប្រទេសលោកខាងលិច មិនធ្វើអន្តរាគមន៍លើ អាហ្វហ្គានីស្ថាន ក្រោយពីរដ្ឋធានីកាប៊ុល ត្រូវបានកាន់កាប់ដោយ តាលីបង់។ លោក Putin សង្កត់ធ្ងន់ថា លោកខាងលិច «ត្រូវតែបញ្ចប់គោលនយោបាយគ្មានការទទួលខុសត្រូវ» ទាក់ទិននឹងការដាក់តម្លៃពីបរទេស ខ្ពស់ហួរហេតុ។

ការថ្លែងដូច្នេះ ទំនងជាចង់សំដៅទៅលើការខ្វែងគំនិតគ្នារវាង រុស្ស៊ី និងលោកខាងលិច ទាក់ទិននឹងបញ្ហាប៉ះទង្គិចគ្នានៅ ស៊ីរី និង លីប៊ី ឬបាតុកម្មនៅ រុស្ស៊ី ពេលដែលលោក Putin បានចោទលោកខាងលិចថា គាំទ្រក្រុមប្រឆាំងនៅ មូស្គូ។

លោក Putin និយាយថា លោកសង្ឃឹមថា តាលីបង់ នឹង «ធានាសន្តិសុខដល់ពលរដ្ឋក្នុងស្រុក និងក្រុមអ្នកការទូតបរទេស» ហើយ អាហ្វហ្គានីស្ថាន នឹងមិនដួលរលំ បន្ទាប់ពី អាមេរិក ដកទ័ព៕

August 21, 2021

វ៉ាក់សាំង COVID-19! ប្រទេសឥណ្ឌា អនុញ្ញាតឱ្យប្រើប្រាស់វ៉ាក់សាំង DNA ដំបូងគេក្នុងពិភពលោក

ក្រុមមន្ត្រី ឥណ្ឌា បានអនុម័តបន្ទាន់លើ វ៉ាក់សាំងរបស់ក្រុមហ៊ុន Zydus Cadila ជាវ៉ាក់សាំង DNA ដំបូងគេបង្អស់ក្នុងពិភពលោក ដែលប្រើសម្រាប់មនុស្សពេញវ័យ និងក្មេងចាប់ពីអាយុ 12 ឆ្នាំ។

ក្រសួងបច្ចេកវិទ្យាជីវសាស្ត្រ ឥណ្ឌា កាលពីថ្ងៃទី 20 សីហា បានចេញលិខិតអនុញ្ញាតបន្ទាន់ដល់វ៉ាក់សាំងបង្ការ COVID-19 ឈ្មោះ ZyCoV-D ដែលអភិវឌ្ឍ និងផលិតដោយក្រុមហ៊ុន Zydus Cadila។ «នេះគឺជាវ៉ាក់សាំងបង្ការវីរុស COVID-19 ប្រភេទ DNA ដំបូងគេក្នុងពិភពលោក ដែលត្រូវបានផលិតដោយ ឥណ្ឌា» ស្ថាប័ននេះបានប្រកាសដូច្នេះ។

វ៉ាក់សាំង ZyCoV-D នេះ អាចត្រូវបានបញ្ចូលទៅក្នុងរាកាយ ដោយឧបករណ៍ដែលពុំមានម្ជុល។ ក្រសួងបច្ចេកវិទ្យាជីវសាស្ត្រ ឥណ្ឌា បានបន្ថែមថា ZyCoV-D ត្រូវចាក់ជាបីដូស ហើយនៅពេលចូលដល់ក្នុងរាងកាយ វានឹងបង្កើតប្រូតេអ៊ីនបន្លារបស់ COVID-19 និងបង្កើតអង្គបដិប្រាណ។

វ៉ាក់សាំង DNA ផ្ទុកកូដ DNA នៃអង់ទីហ្សែនជាក់លាក់មួយខ្សែ ដើម្បីចាប់ផ្ដើមដំណាក់កាលនៃដំណើរការរបស់អង្គបដិប្រាណ។ បច្ចេកវិទ្យានេះ ត្រូវបានវាយតម្លៃថា លើកកម្ពស់ស្ថិរភាព កម្រិតនៃការទុកចិត្ត និងធានាសុវត្ថិភាព ដោយសារមិនមានកត្តាបង្កជំងឺណាមួយ និងមានការចំណាយទាបនៅពេលផលិតក្នុងបរមាណច្រើន។

ZyCoV-D គឺជាវ៉ាក់សាំង COVID-19 ទី 6 ដែលត្រូវបាន ឥណ្ឌា អនុម័តឱ្យប្រើប្រាស់ បន្ទាប់ពី Moderna, Johnson & Johnson (អាមេរិក), AstraZeneca (អង់គ្លេស), Covaxin (ឥណ្ឌា) និង Sputnik V (រុស្ស៊ី)។

បណ្ដាវ៉ាក់សាំងដែលអភិវឌ្ឍដោយ ឥណ្ឌា មិនចាំបាច់រក្សាទុកដោយឧបករណ៍ពិសេសនោះទេ ដែលនេះគឺជាដំណោះស្រាយល្អសម្រាប់ការដឹកជញ្ជូន និងប្រើប្រាស់នៅទូទាំងប្រទេស៕

August 21, 2021

អាហ្វហ្គានីស្ថាន៖ តាលីបង់ វាយដំពលរដ្ឋអាមេរិកាំង នៅ កាប៊ុល

រដ្ឋមន្ត្រីក្រសួងការពារជាតិ សហរដ្ឋអាមេរិក បានប្រាប់ក្រុមសមាជិកសភាថា ពលរដ្ឋជាច្រើននាក់របស់ប្រទេសនេះ នៅ កាប៊ុល ត្រូវបានក្រុមប្រដាប់អាវុធ តាលីបង់ វាយធ្វើបាប។

ប្រភពព័ត៌មាននានាបានឱ្យដឹងថា រដ្ឋមន្ត្រីការពារជាតិ Lloyd Austin បានប្រាប់អំពីដំណឹងខាងលើ នៅក្នុងការហៅទូរស័ព្ទកាលពីថ្ងៃទី 20 សីហា ហើយបានហៅបញ្ហានេះថាជា រឿងដែលមិនអាចទទួលយកបាន។ ប៉ុន្តែរដ្ឋមន្ត្រីរូបនេះក៏មិនបានអះអាងអំពីលទ្ធភាពដែលថា ទាហាន អាមេរិក អាចចេញពី កាប៊ុល ដើម្បីចុះទៅការពារពលរដ្ឋរបស់ខ្លួនដែលឆ្លងកាត់កន្លែងត្រួតពិនិត្យរបស់ តាលីបង់ ដែរ ឬយ៉ាងណានោះទេ។

លោក Austin ក្រោយមកក៏បានបញ្ជាក់ថា តាលីបង់ ជារួម ពុំបានរារាំងពលរដ្ឋអាមេរិកាំង ធ្វើដំណើរទៅកាន់ព្រលានយន្តហោះអន្តរជាតិ Hamid Karzai ក្នុងរដ្ឋធានីកាប៊ុល នោះដែរ។

នៅពេលសួរអំពីព័ត៌មានដែលថា ពលរដ្ឋអាមេរិកាំង ត្រូវ តាលីបង់ វាយដំ ជំនួយការផ្នែកសារព័ត៌មានរបស់សេតវិមាន John Kirby ឱ្យដឹងថា ស្ថាប័ននេះ «ប្រាកដជាយកចិត្តទុកដាក់ដល់ដំណឹងដូច្នេះ។ បញ្ហានេះពិតជាគួរឱ្យព្រួយបារម្ភខ្លាំង»។

រដ្ឋមន្ត្រីការពារជាតិ សហរដ្ឋអាមេរិក Lloyd Austin

អ្នកនាំពាក្យរបស់មន្ទីរបញ្ចកោណ បាននិយាយថា កងកម្លាំង សហរដ្ឋអាមេរិក រកឃើញពលរដ្ឋបរទេសចំនួន 169 នាក់ កំពុងលាក់ខ្លួននៅក្នុងសណ្ឋាគារ Baron ក្បែរតំបន់ភាគខាងត្បូងនៃព្រលានយន្តហោះនៅ កាប៊ុល ក្រោយពីប្រទេសមួយបានរាយការណ៍ដល់មេបញ្ជាការរបស់កងទ័ព អាមេរិក។ ឧទ្ធម្ភាគចក្រ CH-47 Chinook ក៏បានហោះចេញពីព្រលានយន្តហោះ Hamid Karzai ទៅទទួលពួកគេ។ បេសកកម្មមត្រូវបានធ្វើឡើងយ៉ាងលឿន និងដោយសុវត្ថិភាព។

លោក Kerby និយាយថា ខាងលើនេះគឺជាករណីតែមួយគត់ដែលឧទ្ធម្ភាកចក្រ អាមេរិក ចាកចេញពីព្រលានយន្តហោះក្រុងកាប៊ុល ដើម្បីទៅទទួលពលរដ្ឋ។

សូមរំលឹកថា តាលីបង់ បានវាយកាន់កាប់រដ្ឋធានីកាប៊ុល ក្រោយ អាមេរិក ដកទ័ពចេញពី អាហ្វហ្គានីស្ថាន។ តាលីបង់ កាលពីថ្ងៃទី 15 សីហា បានចូលគ្រប់គ្រងរដ្ឋធានីកាប៊ុល ដោយស្ទើរតែពុំមានឧបសគ្គអ្វីទាំងអស់។

ក្រោយមក មនុស្សរាប់ពាន់នាក់ដែលជាពលរដ្ឋ អាហ្វហ្គានីស្ថាន ក៏នាំគ្នាសម្រុកទៅកាន់ព្រលានយន្តហោះ Hamid Karzai ដើម្បីរកវិធីចាកចេញពីប្រទេស។ ដោយមានមនុស្សច្រើនពេក ព្រលានយន្តហោះនេះក៏ធ្លាក់ទៅក្នុងភាពច្របូកច្របល់អស់ជាច្រើនថ្ងៃ។ កងទ័ព អាមេរិក កំពុងគ្រប់គ្រងព្រលានយន្តហោះខាងលើ ហើយនេះក៏ជាទីតាំងចុងក្រោយនៅ អាហ្វហ្គានីស្ថាន ដែល មិនទាន់ត្រូវបានកាន់កាប់ដោយ តាលីបង់៕

August 21, 2021

សំខាន់ ថ្មី! វ៉ាក់សាំង mRNA បន្ទាន់សម័យថ្មី អាចទប់ស្កាត់រាល់វីរុសបំប្លែងខ្លួន របស់ COVID-19

ក្រុមអ្នកវិទ្យាសាស្ត្រកំពុងប្រឹងប្រែងក្នុងការអភិវឌ្ឍវ៉ាក់សាំង COVID-19 ដែលអាចទប់ស្កាត់រាល់វ៉ារ្យ៉ងបំប្លែងថ្មីដ៏គ្រោះថ្នាក់នៃវីរុស COVID-19 ហើយពួកគេកំពុងតែឈានជិតដល់គោលដៅនៃការផលិតបានវ៉ាក់សាំងប្រភេទនេះ។

ការធ្វើតេស្តលើមនុស្ស ចំពោះវ៉ាក់សាំង COVID-19 សកល («universal» COVID-19 vaccine)

សារព័ត៌មាន Fortune បានចេញផ្សាយថា សម្ព័ន្ធសម្រាប់ការច្នៃប្រឌិតលើការត្រៀមបង្ការរោគរាតត្បាត CEPI (Coalition for Epidemic Preparedness Innovations) ថ្មីៗនេះ បានយល់ព្រមផ្ដល់ប្រាក់ឧបត្ថម្ភ 20.6 លានដុល្លារ ដល់ក្រុមហ៊ុនបច្ចេកវិទ្យាជីវសាស្ត្រ Gritstone ដែលមានទីស្នាក់ការកណ្ដាលនៅក្នុងទីក្រុង Emeryville រដ្ឋ California (សហរដ្ឋអាមេរិក) ដើម្បីជួយឱ្យពួកគេពិសោធវ៉ាក់សាំងបង្ការ COVID-19 ថ្មីមួយប្រភេទដែលហៅថា វ៉ាក់សាំងបង្ការ COVID-19 សកល (universal COVID-19 vaccine)។

CEPI គឺជាស្ថាប័នសហប្រតិបត្តិរវាងបណ្ដាប្រទេសក្នុងពិភពលោក និងបណ្ដាអង្គការក្រៅរដ្ឋាភិបាល ក្នុងបំណងបង្កើតបានយន្តការទប់ទល់រហ័សនឹងរោគរាតត្បាត។ COVID-19 គឺជាការពិសោធជាក់ស្ដែងដំបូងរបស់អង្គការដែលត្រូវបានបង្កើតឡើងកាលពីឆ្នាំ 2016 នេះ។

លោក Richard Hatchett នាយកប្រតិបត្តិរបស់ CEPI ឱ្យដឹងថា៖ «បណ្ដាវ៉ារ្យ៉ង់របស់ COVID-19 ធ្វើឱ្យវ៉ាក់សាំងមួយចំនួនរបស់យើង មានប្រសិទ្ធភាពតិចតូច ដូច្នេះ ប្រការសំខាន់គឺយើងមិនត្រូវបណ្ដែតបណ្ដោយ។ យើងត្រូវបន្តវិនិយោគទៅលើការស្រាវជ្រាវ និងអភិវឌ្ឍវ៉ាក់សាំង បើសិនជាចង់ដើរឱ្យបានមុនវីរុសកាចសាហាវនេះ»។

ខ្ទង់ប្រាក់ឧបត្ថម្ភថ្មីបំផុតនេះ នឹងជួយឱ្យក្រុមហ៊ុន Gritstone ធ្វើការពិសោធដំបូងនៅលើមនុស្ស នៅក្នុងទ្វីបអាហ្វ្រិក ដោយប្រើប្រាស់វ៉ាក់សាំងបង្ការ COVID-19 ដែលក្រុមហ៊ុននេះបានអភិវឌ្ឍ។ នៅក្នុងប្រកាសមួយកាលពីថ្ងៃទី 18 សីហា Gritstone ឱ្យដឹងថា ការពិសោធលើមនុស្សនេះនឹងចាប់ផ្ដើមនៅមុនដំណាច់ឆ្នាំ 2021។

យោងតាមផ្នែកខ្លះនៃកិច្ចព្រមព្រៀងថ្មីរវាង CEPI និងក្រុមហ៊ុន Gritstone បានចែងថា បើសិនពួកគេទទួលបានជោគជ័យក្នុងការអភិវឌ្ឍវ៉ាក់សាំង COVID-19 មួយប្រភេទដែលអាចទប់ស្កាត់រាល់វីរុសបំប្លែងថ្មីរបស់ COVID-19 នោះវ៉ាក់សាំងនេះនឹងត្រូវបានផ្គត់ផ្គង់ដល់ពិភពលោកទាំងមូល តាមរយៈយន្តការ COVAX ដែលជាស្ថាប័នផ្គត់ផ្គង់វ៉ាក់សាំងសកល របស់ CEPI, GAVI និង WHO។ ប្រការនេះមានន័យថា បណ្ដាប្រទេសកំពុងអភិវឌ្ឍ មានឱកាសក្នុងការទទួលយកវ៉ាក់សាំងនេះផងដែរ។

Gritstone មិនមែនជាក្រុមហ៊ុនតែមួយដែលកំពុងអភិវឌ្ឍ «វ៉ាក់សាំង COVID-19 សកល» ដែលប្រើប្រាស់បច្ចេកវិទ្យាជីវសាស្ត្រនោះទេ។ ក្រុមហ៊ុនជាច្រើនផ្សេងទៀត ក៏កំពុងញាប់ដៃ ញាប់ជើងក្នុងការស្រាវជ្រាវរកវ៉ាក់សាំងប្រភេទនេះ ក្នុងនោះមានដូចជា ក្រុមហ៊ុន myNEO របស់ បែលហ្ស៊ិក ក៏ដូចជាក្រុមជំនាញដាច់ដោយឡែក មកពីវិទ្យាស្ថានស្រាវជ្រាវយោធា Water Reed (សហរដ្ឋអាមេរិក), សាកលវិទ្យា Duke និងសាកលវិទ្យាល័យ Carolina ខាងជើង (សហរដ្ឋអាមេរិក) ផងដែរ។

ភាពខុសគ្នារវាងបច្ចេកវិទ្យារបស់ Gritstone និងបណ្ដាក្រុមហ៊ុនផលិតវ៉ាក់សាំងក្នុងពិភពលោក

បច្ចេកវិទ្យា messenger ribonucleic acid (mRNA) របស់ Gritstone គឺដូចទៅនឹងបច្ចេកវិទ្យាដែលត្រូវបានក្រុមហ៊ុន Pfizer/BioNTech និង Moderna ប្រើប្រាស់ក្នុងការអភិវឌ្ឍវ៉ាក់សាំងបង្ការ COVID-19 របស់ពួកគេ។ ប៉ុន្តែ មានភាពខុសគ្នាមួយចំនួនដ៏សំខាន់៖ បណ្ដាវ៉ាក់សាំង mRNA ដែលមានបច្ចុប្បន្ន ជំរុញឱ្យកោសិការបស់រាងកាយ ផលិតតែ ប្រូតេអ៊ីន មួយមុខប៉ុណ្ណោះ (ប្រូតេអ៊ីនបន្លាដែលវីរុស COVID-19 ប្រើប្រាស់ដើម្បីវាយប្រហារទៅលើកោសិកា)។ ប្រការនេះ បានធ្វើឱ្យវ៉ាក់សាំងដែលមានបច្ចុប្បន្ន ងាយរងរបួសនៅចំពោះមុខការវិវឌ្ឍរបស់ប្រូតេអ៊ីនបន្លា ដូចដែលបានឃើញនៅក្នុងបណ្ដាវ៉ារ្យ៉ង់ថ្មីរបស់វីរុស COVID-19 ក្នុងនោះមាន Delta ជាដើម។

ទន្ទឹមនឹងប្រូតេអ៊ីនបន្លាខាងលើ វ៉ាក់សាំងរបស់ Gritstone នឹងណែនាំឱ្យកោសិកា ផលិតបណ្ដាប្រូតេអ៊ីនផ្សេងៗដែលមានទំនាក់ទំនងជាមួយវីរុស ដើម្បីជួយការពារវ៉ាក់សាំងពីប្រូតេអ៊ីនបន្លាដែលបានវិវឌ្ឍ។

ចំនុចខុសប្លែកពិសេសជាងនេះ នោះគឺ Gritstone កំពុងស្រាវជ្រាវលើការប្រើប្រាស់ធាតុមួយដែលត្រូវបានហៅថា វ៉ាក់សាំង «mRNA ស្វ័យបង្កើន» (SAM)។ ក្នុងគ្រាដែលវ៉ាក់សាំង mRNA បច្ចុប្បន្ន គ្រាន់តែអាចជំរុញឱ្យកោសិកាផលិតប្រូតេអ៊ីនវីរុសក្នុងចំនួនកំណត់ វ៉ាក់សាំង SAM របស់ Gritstone នឹង «បញ្ឆោត» ឱ្យកោសិកាផលិតកំណែចម្លងជាច្រើននៃប្រូតេអ៊ីនជាក់លាក់ណាមួយ។ ប្រការនេះមានន័យថា វ៉ាក់សាំងតិចតួចប៉ុណ្ណោះ អាចបង្កើតបានអង្គបដិប្រាណដ៏ខ្លាំងក្លាជាងបច្ចុប្បន្ន ហើយអាចកាត់បន្ថយតម្រូវការនៃការចាក់វ៉ាក់សាំងដូសទីពីរ និងដូសរំលឹក។

បញ្ហាប្រឈមរបស់ក្រុមហ៊ុន Gritstone

ក្រុមអ្នកវិទ្យាសាស្ត្រមួយចំនួន មានការព្រួយបារម្ភចំពោះវិធីដែល Gritstone កំពុងប្រើប្រាស់ដើម្បីផលិតវ៉ាក់សាំង។ វ៉ាក់សាំងរបស់ Gritstone អាចបង្ខំឱ្យកោសិកាបញ្ចេញអង្គបដិប្រាណច្រើនហួសក្នុងពេលតែមួយ ប្រការនេះអាចកាត់បន្ថយកម្លាំងនៃយន្តការ mRNA ក៏ដូចជាដំណើរការនៃការផលិតប្រូតេអ៊ី របស់កោសិកា នាំឱ្យវ៉ាក់សាំងមានប្រសិទ្ធភាពទាប ហើយប្រព័ន្ធភាពស៊ាំរបស់រាងកាយ មានលក្ខណៈស្ដើងជាងមុន។

យ៉ាងណាក៏ដោយ ឡារ៉ែន (Lareine) សង្ឃឹមថា វ៉ាក់សាំង SAM របស់ Gritstone នឹងទទួលបានជោគជ័យឆាប់ៗ ដើម្បីជួយលុបបំបាត់វីរុស COVID-19 ឱ្យអស់ពីផែនដី៕

August 20, 2021

សហរដ្ឋអាមេរិក កំពុងហ៊ុមព័ន្ធប្រព័ន្ធហិរញ្ញវត្ថុរបស់ តាលីបង់

ប្រាក់បម្រុងរាប់ពាន់លានដុល្លារអាមេរិក របស់ធនាគារជាតិ អាហ្វហ្គានីស្ថាន រួមទាំងប្រភពជំនួយផ្នែកហិរញ្ញវត្ថុពីអន្តរជាតិ សុទ្ធតែត្រូវបាន សហរដ្ឋអាមេរិក បង្កក ក្រោយពី តាលីបង់ ឡើងកាន់អំណាច។

មុនពេលក្រុមឧទ្ទាម តាលីបង់ សម្រុកចូលរដ្ឋធានីកាប៊ុល ធនាគារកណ្ដាលរបស់ អាហ្វហ្គានីស្ថាន នៅមានប្រាក់បម្រុងជិត 9 ពាន់លានដុល្លារអាមេរិក។ ប៉ុន្តែ ក្នុងចំណោមនោះ មានប្រមាណ 7 ពាន់លានដុល្លារ ដែលផ្ញើក្នុងគណនីនៅ សហរដ្ឋអាមេរិក ត្រូវបានគ្រប់គ្រងដោយធនាគារជាតិក្នុងក្រុង New York។ ព័ត៌មាននេះ ត្រូវបានបង្ហើបឱ្យដឹងកាលពីថ្ងៃទី 18 សីហា ដោយអតីតអគ្គនាយកធនាគារជាតិ អាហ្វហ្គានីស្ថាន Ajmal Ahmady។

ភ្លាមៗនោះ រដ្ឋមន្ត្រីក្រសួងហិរញ្ញវត្ថុ អាមេរិក Janet Yellen និងការិយាល័យគ្រប់គ្រងទ្រព្យសម្បត្តិបរទេស (OFAC) នៃក្រសួងហិរញ្ញវត្ថុ អាមេរិក ក៏បានបង្កកគណនីធនាគារទាំងឡាយខាងលើ។ មិនត្រឹមតែប៉ុណ្ណោះ ក្រសួងហិរញ្ញវត្ថុ អាមេរិក ថែមទាំងអាចរឹតបន្តឹងការគ្រប់គ្រងលើប្រភពហិរញ្ញវត្ថុរបស់ក្រុម តាលីបង់ ទៀតផង។

ក្រុមមេដឹកនាំ តាលីបង់ ដែលបានចូលរួមកិច្ចចរចានៅប្រទេស កាកា កាលពីខែកញ្ញា ឆ្នាំ 2020

ដោយមានឥទ្ធិពលខ្លាំងលើប្រព័ន្ធហិរញ្ញវត្ថុអន្តរជាតិ ទីក្រុងវ៉ាស៊ីងតោន នៅមានលទ្ធភាពរារាំង តាលីបង់ ក្នុងការយកមកវិញនូវខ្ទង់ប្រាក់ 1.3 ពាន់លានដុល្លារ ដែលធនាគារជាតិ អាហ្វហ្គានីស្ថាន បានផ្ញើនៅក្នុងគណនីធនាគារអន្តរជាតិជាច្រើនផ្សេងទៀត ពិសេសគឺគណនីបញ្ញើជាប្រាក់អឺរ៉ូ និងប្រាក់ផោនអង់គ្លេស នៅក្នុងធនាគារមួយចំនួននៅអឺរ៉ុប។

ខ្ទង់ប្រាក់ក្រៅពីនេះរបស់ធនាគារជាតិ អាហ្វហ្គានីស្ថាន ដែលមានតម្លៃ 700 លានដុល្លារ កំពុងស្ថិតក្នុងធនាគារទូទាត់អន្តរជាតិ (BIS) នៅប្រទេសស្វីស។

«ខ្ទង់ប្រាក់ដែល តាលីបង់ អាចប្រើប្រាស់បានគឺ ប្រមាណជា ពី 0.1-0.2% នៃខ្ទង់ប្រាក់បម្រុងសរុបនៅបរទេស របស់ អាហ្វហ្គានីស្ថាន។ មិនច្រើនប៉ុន្មានទេ» អតីតអគ្គនាយកធនាគារជាតិ អាហ្វហ្គានីស្ថាន លោក Ajmal Ahmady បានអះអាងដូច្នេះ៕

August 20, 2021

អាហ្វហ្គានីស្ថាន៖ សហរដ្ឋអាមេរិក បោះចោលឧទ្ធម្ភាគចក្រជម្លៀសមនុស្សនៅកាប៊ុល

ឧទ្ធម្ភាគចក្រធុនធំ CH-46E ត្រូវបានបិទប្រព័ន្ធដំណើរការ និងទុកចោលក្នុងព្រលានយន្តហោះនៅរដ្ឋធានីកាប៊ុល បន្ទាប់ពីបានបញ្ចប់បេសកកម្មជម្លៀសបុគ្គលិកស្ថានទូត សហរដ្ឋអាមេរិក។

«ក្រសួងការបរទេស សហរដ្ឋអាមេរិក ទុកចោលឧទ្ធម្ភាគចក្រ CH-46 ចំនួន 7 គ្រឿងនៅ អាហ្វហ្គានីស្ថាន ក្នុងនោះប្រព័ន្ធដំណើរការរបស់ពួកវាត្រូវបានបិទ និងលែងហោះហើរបាន។ ឧទ្ធម្ភាគចក្រប្រភេទនេះ កំពុងត្រូវបានដាក់ឱ្យចូលនិវត្តន៍ជាបណ្ដើរៗហើយ» មន្ត្រីការបរទេស សហរដ្ឋអាំមេរិក សុំមិនបញ្ចេញឈ្មោះ បាននិយាយកាលពីថ្ងៃទី 19 សីហា។

ឧទ្ធម្ភាគចក្រ Boeing Vertol CH-46 Sea Knight ទាំងនេះ ត្រូវបានផលិតកាលពីឆ្នាំ 1960 និងដាក់ឱ្យប្រើនៅក្នុងជួរកងម៉ារីន សហរដ្ឋអាមេរិក។ ពួកវាត្រូវបានដំឡើងស្ដង់ដា ទៅជា CH-46E និងជួសជុលទាំងស្រុងដូចថ្មី ហើយក្រោយមកក៏ត្រូវបានប្រគល់ឱ្យក្រសួងការបរទេស អាមេរិក ចាប់ពីឆ្នាំ 2012។

ក្រុមឧទ្ធម្ភាគចក្រ CH-46E Sea Knight នៅ កាប៊ុល ដែលថតបានពីផ្កាយរណប កាលពីថ្ងៃទី 17 សីហា

ក្រុមហោះហើរ CH-46E ដែលត្រូវបានគ្រប់គ្រងដោយអ្នកម៉ៅការឯកជននេះ គឺជាមធ្យោបាយសំខាន់របស់បុគ្គលិកការទូត សហរដ្ឋអាមេរិក ក្នុងការផ្លាស់ទីរវាងស្ថានទូតនៅ កាប៊ុល និងព្រលានយន្តហោះអន្តរជាតិ Hamid Karzai ក៏ដូចទៅទីតាំងជាច្រើនទៀត នៅ អាហ្វហ្គានីស្ថាន។

ចាប់តាំងពី អាមេរិក ដកទ័ពចេញពី អាហ្វហ្គានីស្ថាន កាលពីខែឧសភា ក្រុម តាលីបង់ ក៏បានចាប់ផ្ដើមការវាយប្រហារ និងបានសម្រុកចូលកាន់កាប់រដ្ឋធានីកាប៊ុល ហើយបានគ្រប់គ្រង អាហ្វហ្គានីស្ថាន ចាប់ពីថ្ងៃទី 15 សីហា ដោយស្ទើរតែពុំជួបឧបសគ្គ។ ប្រការនេះ ធ្វើឱ្យ អាមរិក ត្រូវប្រមូលឧទ្ធម្ភាគចក្រ និងប្រញាប់ជម្លៀសបុគ្គលិកការទូតនៅ កាប៊ុល។

ក្រុមហោះហើរ CH-46E រួមនឹងឧទ្ធម្ភាគចក្រយោធាជាច្រើន ត្រូវបានប្រើប្រាស់ដើម្បីជម្លៀសក្រុមមនុស្សដែលមិនមែនជាអ្នកចូលរួមប្រយុទ្ធផ្ទាល់ (NEO) នៅ កាប៊ុល។ មន្ទីរបញ្ចកោណ និយាយថា នេះគឺជាបេសកកម្មជម្លៀសធំបំផុតមួយក្នុងប្រវត្តិសាស្ត្រ ហើយក៏អាចជាភារកិច្ចធំចុងក្រោយនៃក្រុមឧទ្ធម្ភាគចក្រ Sea Knight របស់រដ្ឋាភិបាល សហរដ្ឋអាមេរិក នេះផងដែរ៕

August 20, 2021

តាលីបង់ បាញ់សម្លាប់បាតុករដែលលើទង់ជាតិ អាហ្វហ្គានីស្ថាន

ក្រុមទាហាន តាលីបង់ បាញ់ប្រហារទៅលើហ្វូងមនុស្ស នៅក្នុងទីក្រុង Asadabad បណ្ដាលឱ្យមនុស្សជាច្រើននាក់បាត់បង់ជីវិត នៅពេលបាតុកម្មកំពុងត្រូវបានធ្វើឡើងនៅក្នុងទីក្រុង ដើម្បីអបអរថ្ងៃឯករាជ្យរបស់ អាហ្វហ្គានីស្ថាន។

ក្រុមបាតុករដែលកាន់ទង់ជាតិ អាហ្វហ្គានីស្ថាន បានចេញដើរតាមដងផ្លូវក្នុងក្រុងជាច្រើននៅ អាហ្វហ្គានីស្ថាន កាលពីថ្ងៃទី 19 សីហា ដើម្បីអបអរថ្ងៃឯករាជ្យពី អង់គ្លេស ឆ្នាំ 1919 ក្នុងគ្រាដែលការតវ៉ាពីសំណាក់ប្រជាជន ចំពោះក្រុម តាលីបង់ កំពុងរាលដាល។

«ទង់ជាតិរបស់យើង អត្តសញ្ញាណរបស់យើង» ហ្វូងមនុស្ស រួមមានទាំងបុរស និងស្ត្រី គ្រវីទង់ជាតិពណ៌ខ្មៅ ក្រហម និងបៃតង ព្រមទាំងបានស្រែកហ៊ោ នៅក្នុង រដ្ឋធានីកាប៊ុល។

សាក្សីឈ្មោះ Mohammed Salim ឱ្យដឹងថា នៅទីក្រុង Asadabad នៃខេត្ត Kunar ភាគខាងកើត អាហ្វហ្គានីស្ថាន មនុស្សជាច្រើននាក់បានស្លាប់នៅក្នុងហ្វូងបាតុករ។ សាក្សីឈ្មោះ Mohammed Salim ឱ្យដឹងថា នៅទីក្រុង Asadabad នៃខេត្ត Kunar ភាគខាងកើត អាហ្វហ្គានីស្ថាន មនុស្សជាច្រើននាក់បានស្លាប់នៅក្នុងហ្វូងបាតុករ។ «មនុស្សរាប់រយនាក់នាំគ្នាចេញដើរតាមដងផ្លូវ។ ដំបូងខ្ញុំខ្លាចណាស់ និងមិនចង់ដើរទៅជាមួយ ប៉ុន្តែ នៅពេលឃើញអ្នកភូមិចូលរួម ខ្ញុំក៏បានហូតយកទង់ជាតិក្នុងផ្ទះ ហើយដើរទៅតាមពួកគេ។ មនុស្សមួយចំនួនបានស្លាប់ និងរងរបួស ដោយសារតាលីបង់ បានបាញ់ប្រហារ និងរត់ជាន់គ្នា»។

បាតុកម្មក៏បានកើតឡើងនៅទីក្រុង Jalalabad និងស្រុកមួយរបស់ខេត្ត Paktia។ កាលពីថ្ងៃទី 18 សីហា ទាហាន តាលីបង់ បានបាញ់ប្រហារលើហ្វូងបាតុករដែលកំពុងលើកគ្រវីទង់ជាតិនៅទីក្រុង Jalalabad បណ្ដាលឱ្យមានមនុស្សស្លាប់ចំនួនបីនាក់។

អ្នកនាំពាក្យរបស់ក្រុម តាលីបង់ មកដល់បច្ចុប្បន្ន មិនទាន់មានការអធិប្បាយអ្វីអំពីព័ត៌មាននេះនៅឡើយ។

នៅកន្លែងមួយចំនួន ក្រុមបាតុករបានយកទង់ពណ៌សរបស់ តាលីបង់ មកហែកចោល។ ទិដ្ឋភាពដូចគ្នានេះ ក៏បានកើតឡើងនៅ Asadabad រួមនឹងទីក្រុងមួយចំនួននៅភាគខាងកើតផងដែរ។

អនុប្រធានាធិបតីទីមួយ Amrullah Saleh ដែលកំពុងប្រឹងប្រែងដឹកនាំការប្រឆាំង តាលីបង់ ក៏បានគាំទ្របាតុកម្មទាំងនេះ។ «គោរពដល់ក្រុមមនុស្សដែលលើកទង់ ដែលតំណាងឱ្យភាពថ្លៃថ្នូររបស់ប្រទេសជាតិ» លោក Amrullah Saleh បានបង្ហោះសារនៅលើ Twitter ដូច្នេះ។ លោក Saleh មុននោះបានឱ្យដឹងថា លោកកំពុងនៅ អាហ្វហ្កានីស្ថាន និងជា «ប្រធានាធិបតីបណ្ដោះអាសន្នស្របច្បាប់» ក្រោយពីប្រធានាធិបតី Ashraf Ghani បានចាកចេញពីប្រទេស នៅពេល តាលីបង់ ចូលមកកាន់កាប់រដ្ឋធានី៕

August 20, 2021

Category: អន្តរជាតិ