អន្តរជាតិ - La Reine Media

អាមេរិក សម្លាប់អ្នកយុទ្ធសាស្ត្ររបស់ IS ដើម្បីសងសឹកចំពោះករណីបំផ្ទុះគ្រាប់បែកនៅព្រលានយន្តហោះកាប៊ុល

យន្តហោះចម្បាំងគ្មានមនុស្សបើករបស់ សហរដ្ឋអាមេរិក សម្លាប់បានមន្ត្រីយុទ្ធសាស្ត្រម្នាក់របស់ក្រុមរដ្ឋអ៊ីស្លាមសាខា IS-K នៅ អាហ្វហ្គានីស្ថាន ដើម្បីឆ្លើយតបនឹងអំពើវាយប្រហារភេរវកម្មដែលបានសម្លាប់មនុស្សយ៉ាងហោច 170 នាក់ នៅឯព្រលានយន្តហោះអន្តរជាតិ Hamid Karzai ក្នុងរដ្ឋធានីកាប៊ុល។

«ការវាយប្រហារតាមអាកាសដោយយន្តហោះគ្មានមនុស្សបើក ត្រូវបានធ្វើឡើងនៅក្នុងខេត្ត Nangahar នៃប្រទេសអាហ្វហ្គានីស្ថាន។ សញ្ញាដំបូងបង្ហាញថា យើងបានកម្ទេចគោលដៅដោយពុំបង្កផលប៉ះពាល់ដល់ពលរដ្ឋ» Bill Urban អ្នកនាំពាក្យរបស់បញ្ជាការដ្ឋានកងទ័ពអាមេរិក ឱ្យដឹងកាលពីថ្ងៃទី 27 សីហា។ ការវាយប្រហារត្រូវបានធ្វើឡើងពីខាងក្រៅដែនដីរបស់ អាហ្វហ្គានីស្ថាន។

យោងតាម Urban គោលដៅនៃការវាយប្រហារនេះគឺអ្នកយុទ្ធសាស្ត្រដែលទទួលបន្ទុកក្នុងការរៀបផែនការសម្រាប់ក្រុមសកម្មប្រយុទ្ធនៃកងកម្លាំងរដ្ឋអ៊ីស្លាម Khorasan (IS-K) ដែលជាសាខាដ៏មហាជ្រុលនិយមរបស់ IS ធ្វើសកម្មភាពនៅ អាហ្វហ្គានីស្ថាន។ IS-K មុននេះបានចេញមុខទទួលខុសត្រូវចំពោះករណីបំផ្ទុះគ្រាប់បែកនៅព្រលានយន្តហោះក្នុងរដ្ឋធានីកាប៊ុលកាលពីថ្ងៃទី 26 សីហា ដែលបានសម្លាប់មនុស្សយ៉ាងតិច 170 នាក់ ក្នុងនោះមានទាំងទាហាន អាមេរិក ចំនួន 13 នាក់ផងដែរ។

ក្រុមអ្នកជួយសង្គ្រោះ កំពុងនាំយកជនរងគ្រោះក្នុងករណីបំផ្ទុះគ្រាប់បែកនៅកាប៊ុល កាលពីថ្ងៃទី 26 សីហា ទៅកាន់មន្ទីរពេទ្យ

Urban មិនបានលើកឡើងអំពីអត្តសញ្ញាណរបស់អ្នកយុទ្ធសាស្ត្រនៃក្រុម IS-K ដែលត្រូវបានសម្លាប់នោះទេ ហើយក៏មិនបានបញ្ជាក់ថា នេះពិតជាអ្នកដែលបានរៀបផែនការវាយប្រហារភេរវកម្មនៅព្រលានយន្តហោះកាប៊ុល ឬយ៉ាងណានោះដែរ។

ប្រធានាធិបតី សហរដ្ឋអាមេរិក លោក Joe Biden បានប្រកាសថា នឹងតាមប្រមាញ់ ក៏ដូចជាបង្ខំឱ្យក្រុមដែលនៅពីក្រោយអំពើបំផ្ទុះគ្រាប់បែកនៅព្រលានយន្តហោះ Hamid Karzai នារដ្ឋធានីកាប៊ុល សងនូវអ្វីដែលពួកគេបានប្រព្រឹត្ត។ លោក Biden ក៏បានចេញបញ្ជាឱ្យកងទ័ព អាមេរិក វាយប្រហារលើមូលដ្ឋាន និងក្រុមមេដឹកនាំរបស់ IS-K ផងដែរ៕

August 28, 2021

អាមេរិក ផ្ដាច់ទំនាក់ទំនងជាមួយរណសិរ្សជាតិប្រឆាំងនឹង តាលីបង់ នៅជ្រលងភ្នំ Panjshir

រដ្ឋាភិបាលរបស់លោក Joe Biden មិនបានឆ្លើយតបទៅនឹងការទាក់ទងពីកងកម្លាំងប្រឆាំងនឹង តាលីបង់ នៅជ្រលងភ្នំ Panjshir បន្ទាប់ពី តាលីបង់ បានចូលកាន់កាប់ អាហ្វហ្គានីស្ថាន បានជិតពីរសប្ដាហ៍។

Ali Nazary ទទួលបន្ទុកផ្នែកទំនាក់ទំនងការទូតរបស់រណសិរ្សតស៊ូជាតិ ដែលជាក្រុមប្រឆាំងនឹង តាលីបង់ នៅជ្រលងភ្នំ Panjshir កាលពីថ្ងៃទី 27 សីហា ឱ្យដឹងថា លោកបាន «ស្វែងរកការទាក់ទង» ប៉ុន្តែ មិនទាន់ទទួលបានការឆ្លើយតបណាមួយពីរដ្ឋាភិបាលរបស់លោក Biden នៅឡើយ។

«យើងមិនឃើញមានការចាប់អារម្មណ៍ចំពោះចលនាប្រឆាំងនៅក្នុងគ្រានេះ» លោក Nazary ថ្លែង និងបន្ថែមថា តំបន់ការពារដ៏រឹងមាំនៅជ្រលងភ្នំ Panjshir នៅភាគឦសាន អាហ្វហ្គានីស្ថាន អាចត្រូវបានប្រើប្រាស់ដើម្បីការពារសន្តិសុខសម្រាប់ក្រុមមនុស្សដែលកំពុងជាប់គាំងនៅរដ្ឋធានីកាប៊ុល។ «ពួកគេបានដឹងថា យើងនៅទីនេះ ប៉ុន្តែ យើងមិនទាន់ទទួលបានការយកចិត្តទុកដាក់នៅឡើយ»។

Nazary បង្ហើបឱ្យដឹងថា លើកចុងក្រោយបង្អស់ដែលលោកបានទាក់ទងទៅកាន់សេតវិមានគឺប៉ុន្មានខែមុន។ បច្ចុប្បន្ន ពួកគេមិនទាន់ទទួលបានការអញ្ជើញ ឬការស្នើណាមួយពី សហរដ្ឋអាមេរិក។

បច្ចុប្បន្ន សេតវិមាន មិនទាន់មានការអធិប្បាយអ្វីទាក់ទងនឹងព័ត៌មានខាងលើនេះនៅឡើយ ក្នុងគ្រាដែល សហរដ្ឋអាមេរិក កំពុងពន្លឿនយុទ្ធនាការដកទ័ពចេញពី អាហ្វហ្គានីស្ថាន ពេលដែលថ្ងៃផុតកំណត់ចុងក្រោយជិតមកដល់។

ចំពោះអ្នកដែលមិនអាចចាកចេញពី អាហ្វហ្គានីស្ថាន មុនកាលកំណត់ លោក Nazary ស្នើឱ្យនាំពួកគេទៅកាន់ជ្រលងភ្នំ Panjshir ដើម្បីទទួលបានការការពារសន្តិសុខ។

ចាប់ពីថ្ងៃទី 14 សីហា ដល់ 27 សីហា សហរដ្ឋអាមេរិក បានឈ្លៀសមនុស្សប្រហែល 105,000 នាក់ ក្នុងនោះមានទាំងពលរដ្ឋអាមេរិក និងដៃគូ អាហ្វហ្គានីស្ថាន នេះបើតាមមន្ត្រីសេតវិមាន។ ពលរដ្ឋអាមេរិក ប្រមាណ 1,500 នាក់ ប្រហែលកំពុងជាប់ក្នុងប្រទេសអាហ្វហ្គានីស្ថាន ប៉ុន្តែទិន្នន័យនេះមិនទាន់ត្រូវបានផ្ទៀងផ្ទាត់នៅឡើយ៕

August 28, 2021

អតីតរដ្ឋមន្ត្រីរបស់ អាហ្វហ្គានីស្ថាន ក្លាយជា អ្នកដឹកជញ្ជូនទំនិញ នៅប្រទេសអាល្លឺម៉ង់

Sadaat ធ្លាប់ជារដ្ឋមន្ត្រីក្រសួងទំនាក់ទំនងនិងព័ត៌មានវិទ្យារបស់ អាហ្វហ្គានីស្ថាន មុនពេលទៅកាន់ប្រទេសអាល្លឺម៉ង់ កាលពីឆ្នាំ 2020 ហើយបច្ចុប្បន្ន លោកគឺជាបុគ្គលិកផ្នែកដឹកជញ្ជូនទំនិញមួយរូបនៅទីក្រុង Leipzig។

Syed Ahmed Shah Sadat អាយុ 49 ឆ្នាំ បានឱ្យដឹងថា មនុស្សមួយចំនួននៅឯ អាហ្វហ្គានីស្ថាន រិះគន់លោក ដោយសារតែធ្វើការជាអ្នកប្រគល់ទំនិញដោយជិះកង់។ ប៉ុន្តែ អតីតរដ្ឋមន្ត្រីរបស់ អាហ្វហ្គានីស្ថាន ដែលបានចប់អាណត្តិកាលពីឆ្នាំ 2018 រូបនេះ យល់ថា ការងារប្រគល់ទំនិញគឺជាការងារធម្មតាដូចទៅនឹងការងារផ្សេងៗទៀត។

«ខ្ញុំពុំមានអារម្មណ៍ថាខុសឆ្គងអ្វីនោះទេ» លោក Sadaat និយាយកាលពីថ្ងៃទី 26 សីហា នៅពេលលោកស្លៀកពាក់ឈុតពណ៌ទឹកក្រូច អង្គុយក្បែរកង់មួយគ្រឿង។ «ខ្ញុំសង្ឃឹមថា អ្នកនយោបាយផ្សេងទៀត ក៏ធ្វើតាមរបៀបខ្ញុំ ជំនួសឱ្យការលាក់ខ្លួន ពួនអាត្មា»។

សារព័ត៌មាន Bild បានរាយការណ៍ថា អតីតរដ្ឋមន្ត្រី Sadaat បានមកកាន់ប្រទេសអាល្លឺម៉ង់ គឺដើម្បីគេចចេញពីក្រុម តាលីបង់។ រឿងរ៉ាវរបស់ Sadaat កាន់តែទទួលបានចំណាប់អារម្មណ៍ ពិសេសគឺនៅពេល អាហ្វហ្គានីស្ថាន ស្ថិតក្នុងភាពវឹកវរ ក្រោយពី តាលីបង់ បានចូលគ្រប់គ្រងប្រទេស។ គ្រួសារ មិត្តភក្ដិរបស់ Sadaat រួមនឹងជនជាតិ អាហ្វហ្គានីស្ថាន រាប់ម៉ឺននាក់ មានបំណងចាកចេញពីប្រទេស តាមរយៈយន្តហោះដឹកជនភៀសខ្លួននៅរដ្ឋធានីកាប៊ុល។

នៅសល់តែ 4 ថ្ងៃទៀតប៉ុណ្ណោះ ពោលគឺនៅថ្ងៃទី 31 សីហា ខាងមុខ កាលបរិច្ឆេទចុងក្រោយនៃការដកទ័ពរបស់ សហរដ្ឋអាមេរិក នឹងត្រូវបានបញ្ចប់ជាស្ថាពរ។ ចំនួនមនុស្សដែលបានសុំសិទ្ធិជ្រកកោននៅប្រទេសអាល្លឺម៉ង់ បានកើន 130% រាប់ចាប់ពីដើមឆ្នាំ។ នេះបើតាមការិយាល័យជាតិទទួលបន្ទុកលើបញ្ហាជនភៀសខ្លួនរបស់ អាល្លឺម៉ង់។

អតីតរដ្ឋមន្ត្រីរបស់ អាហ្វហ្គានីស្ថាន មានសញ្ញាបត្រផ្នែកព័ត៌មានវិទ្យា និងទូរគមនាគមន៍ ហើយលោកក៏ធ្លាប់មានសង្ឃឹមថា នឹងរកបានការងារសមស្របនៅ អាល្លឺម៉ង់។ ប៉ុន្តែ ឱកាសមានតិចតួចណាស់ ដោយសារតែលោកមិនចេះភាសាអាល្លឺម៉ង់។

Sadaat រៀនភាសាអាល្លឺម៉ង់ 4 ម៉ោងក្នុងមួយថ្ងៃ នៅឯសាលាភាសាមួយ មុនពេលចេញទៅប្រគល់ទំនិញតាមវេនដែលអូសបន្លាយពេល 6 ម៉ោង នៅពេលល្ងាច។ អតីតរដ្ឋមន្ត្រីរូបនេះ បានចាប់ផ្ដើមការងាររបស់ខ្លួនតាំងពីរដូវក្ដៅឆ្នាំនេះ។

លោក Syed Ahmed Shah Sadat រៀបរាប់អំពីការងារប្រគល់ទំនិញដោយការជិះកង់របស់លោក នៅក្នុងទីក្រុងថា៖ «ការងារប៉ុន្មានថ្ងៃដំបូងគឺពិតជារឿងលំបាក ប៉ុន្តែ សប្បាយ។ ការងារបង្រៀនយើង»៕

August 28, 2021

IS-K ដែលទទួលខុសត្រូវលើការបំផ្ទុះគ្រាប់បែកនៅព្រលានយន្តហោះកាប៊ុល ថ្ងៃទី 26 សីហា ត្រូវជាអ្វីនឹង តាលីបង់?

ក្រុមរដ្ឋអ៊ីស្លាមនៃប្រទេសអ៊ីរ៉ាក់ និងតំបន់ Levant និង Khorasan (Islamic State of Iraq and the Levant – Khorasan Province) ដែលហៅកាត់ថា ISIL–KP ឬ ISKP (សារព័ត៌មានខ្លះហៅថា IS-K, ISISK, IS–KP, ISIS–K ឬ Daesh–Khorasan)។ IS–K គឺជាក្រុមមហាជ្រុលនិយមដែលបានបំបែកខ្លួនចេញពី តាលីបង់ ហើយក៏បានក្លាយជាសត្រូវសួពូជនឹងគ្នា សូម្បីតែនៅពេល តាលីបង់ បានគ្រប់គ្រង អាហ្វហ្គានីស្ថាន។

តាលីបង់ ថ្ងៃទី 27 សីហា នេះ បានបញ្ជាក់ថា សមាជិករបស់ខ្លួនចំនួន 28 នាក់ ក៏បានស្លាប់ក្នុងហេតុការណ៍បំផ្ទុះគ្រាប់បែកពីរលើកនៅខាងក្រៅព្រលានយន្តហោះក្រុងកាប៊ុល កាលពីថ្ងៃទី 26 សីហា។ ក្រុមរដ្ឋអ៊ីស្លាមសាខា Khorasan (IS-K) បានចេញមុខទទួលខុសត្រូវលើការវាយប្រហារភេរវកម្មនេះ។

ក្រុមអ្នកតាមដានស្ថានការណ៍យល់ថា ហេតុការណ៍បំផ្ទុះគ្រាប់បែកនៅព្រលានយន្តហោះកាប៊ុល នឹងធ្វើឱ្យបំណុលឈាមរវាង តាលីបង់ និង IS-K កាន់តែគរលើគ្នាច្រើនឡើង។ ករណីវាយប្រហារដោយការបំផ្ទុះគ្រាប់បែកកាលពីម្សិលមិញ ប្រៀបបានទៅនឹងការរំលឹកឱ្យចាំថា សង្គ្រាមរវាង តាលីបង់ និង IS-K (ក្រុមភេរវករដែលត្រូវគេចាត់ទុកដូចជា «កូនឥតខាន់ស្លា» របស់ តាលីបង់) មិនទាន់ចប់នៅឡើយ។

ក្នុងកិច្ចសម្ភាសមួយកាលពីថ្ងៃទី 13 សីហា នៅពន្ធនាគារកាប៊ុល Abu Omar Khorasani អតីតមេបញ្ជាការរបស់ IS-K យល់ថា ការរុលទៅមុខរបស់ តាលីបង់ នៅពាសពេញប្រទេសអាហ្វហ្គានីស្ថាន គឺជាសញ្ញានៃការផ្លាស់ប្ដូរ។ ទាំង តាលីបង់ ទាំង IS-K ធ្លាប់មានគោលដៅរួមមួយ នោះគឺការដេញ «ជនក្រៅសាសនា» ឱ្យចេញពី អាហ្វហ្គានីស្ថាន។ Khorasani និយាយថា៖ «ពួកគេនឹងដោះលែងខ្ញុំ បើសិនពួកគេជាអ៊ីស្លាមសាសនិកល្អ»។

ពីរថ្ងៃក្រោយមក ក្រុម តាលីបង់ បានចូលកាន់កាប់រដ្ឋធានីកាប៊ុល គ្រប់គ្រងពន្ធនាគារ និងដោះលែងអ្នកទោសរាប់រយនាក់ ប៉ុន្តែ បានសម្លាប់ Khorasani រួមនឹងសមាជិក 8 នាក់ផ្សេងទៀតរបស់ IS-K។

កាលពី 6 ឆ្នាំមុន សមាជិកជនជាតិប៉ាគីស្ថានដែលមិនពេញចិត្តនឹង តាលីបង់ បានផ្ដាច់ខ្លួនចេញពីក្រុមនេះ ហើយបង្កើតក្រុម IS-K។ នេះគឺជាសាខាមួយក្នុងចំណោមសាខាជាច្រើនរបស់ IS ដែលបានបង្កើតឡើងបន្ទាប់ពីក្រុមឧទ្ទាមនេះបង្ហាញវត្តមាននៅភាគខាងជើងអ៊ីរ៉ាក់ កាលពីឆ្នាំ 2014 និងមានឥទ្ធិពលយ៉ាងខ្លាំងក្លា។

សមាជិករបស់ក្រុម IS-K ភាគច្រើនធ្វើសកម្មភាពនៅភាគខាងកើតនៃប្រទេសអាហ្វហ្គានីស្ថាន ក្នុងតំបន់ដែលគេស្គាល់ថា «ខេត្ត Khorasan» ដោយមានមហិច្ឆតាទាញយក អាហ្វហ្គានីស្ថាន ឱ្យមករួបរួមជាមួយតំបន់ដែលស្ថិតក្រោមការគ្រប់គ្រងរបស់ IS។

Hafiz Saeed Khan មេភេរវករដែលជាអ្នកបង្កើត IS-K ត្រូវបាន អាមេរិក សម្លាប់កាលពីឆ្នាំ 2016 ហើយត្រូវជំនួសដោយ Shahab Muhajir ដែលជាពលរដ្ឋ អ៊ីរ៉ាក់។ តាំងពីដំបូង តាលីបង់ និង IS-K បានចាត់ទុកគ្នាជាសត្រូវទៅហើយ ដោយសារតែមានគំនិតផ្ទុយគ្នា ក៏ដូចជាការប្រជែងគ្នាខ្លាំងក្លាក្នុងការដណ្ដើមទឹកដី។

តាលីបង់ កាលណោះ ត្រូវប្រឈមនឹងកងទ័ពដែលដឹកនាំដោយ សហរដ្ឋអាមេរិក នៅ អាហ្វហ្គានីស្ថាន ប៉ុន្តែក៏ត្រូវធ្វើសង្គ្រាមប្រឆាំងនឹងគូសត្រូវសួពូជមួយទៀត នោះគឺ IS-K។

មន្ត្រីការពារជាតិ អាមេរិក ឱ្យដឹងថា តាលីបង់ ពេលខ្លះ ទទួលបានការគាំទ្រពីប្រទេសមួយចំនួន ក្នុងនោះមានទាំង សហរដ្ឋអាមេរិក ផងដែរ ក្នុងការប្រយុទ្ធតតាំងប្រឆាំង IS-K។ IS-K ត្រូវបានវាយឱ្យខ្ចាត់ខ្ចាយពី អាហ្វហ្គានីស្ថាន ឬត្រូវលាក់ខ្លួនពួនអាត្មា។ តាលីបង់ ជួបឧបសគ្គតិចតួចបំផុតពីការប្រឆាំងរបស់ IS-K នៅក្នុងសង្គ្រាមដណ្ដើមទឹកដី អាហ្វហ្គានីស្ថាន បន្ទាប់ពី អាមេរិក ប្រកាសដកទ័ព។

ក្រុមទាហាន តាលីបង់ នៅ កាប៊ុល កាលពីថ្ងៃទី 19 សីហា

ពេល អាមេរិក បើកការវាយប្រហារកាន់កាប់ អាហ្វហ្គានីស្ថាន ក្រោយករណីភេរវកម្មថ្ងៃទី 11 កញ្ញា ឆ្នាំ 2001 តាលីបង់ មានសម្ព័ន្ធមិត្តតិចតួចណាស់។ តាលីបង់ ត្រូវលោកខាងលិចរិះគន់ ព្រោះតែទទួលយកសមាជិក al-Qaeda ដែលធ្លាប់ត្រូវគេចាត់ទុកជាក្រុមភេរវករ។

ទំនាក់ទំនងរវាង តាលីបង់ និង al-Qaeda កាលណោះក៏មិនល្អប៉ុន្មានដែរ។ សមាជិក តាលីបង់ ជាច្រើន ខឹងខ្លាំងនៅពេល Osama bin Laden ប្រើប្រាស់ អាហ្វហ្គានីស្ថាន ជាមូលដ្ឋាន ចាប់ពីចុងទសវត្សរ៍ 1990។ ករណីភេរវកម្មថ្ងៃទី 11 កញ្ញា និងយុទ្ធនាការសង្គ្រាមលុកលុយរបស់ អាមេរិក នៅ អាហ្វហ្គានីស្ថាន ធ្វើឱ្យ តាលីបង់ និង al-Qaeda ត្រូវលាក់ខ្លួន។

ស្ថាបនិករបស់ តាលីបង់ Mullah Omar ទំនងជាមិនបានដឹងមុនអំពីការវាយប្រហារភេរវកម្មថ្ងៃទី 11 កញ្ញា ហើយទំនាក់ទំនងរវាងលោក និង លោក bin Laden ក្រោយមកក៏មានការប្រេះឆា។ ក្រោយពី អាមេរិក បានកម្ចាត់ bin Laden កាលពីឆ្នាំ 2011 ឯកសារដែលប្រមូលបាន បង្ហាញថា មេដឹកនាំ al-Qaeda កាលណោះមានទំនាក់ទំនងតិចតួចបំផុតជាមួយនឹងមេដឹកនាំ តាលីបង់ Omar។

«IS មានផែនការសកល។ នៅពេលគ្រប់គ្នាសួរថា អ្នកណាពិតជាអាចតំណាងឱ្យសាសនាអ៊ីស្លាម និងសហគមន៍អ៊ីស្លាមទាំងមូល ពិតណាស់ យើងនឹងទាក់ទាញបានចំណាប់អារម្មណ៍ច្រើនជាង» Abu Omar Khorasani អតីតមេបញ្ជាការរបស់ IS-K និយាយមុនពេលត្រូវគេសម្លាប់។

ប្រទេសមួយចំនួន បានចាប់ផ្ដើមចាត់ទុក តាលីបង់ ជាកងកម្លាំងដែលមានសក្ដានុពលក្នុងការទប់ស្កាត់មហិច្ឆតាសកលរបស់ IS។ Bruce Hoffman អ្នកជំនាញផ្នែកសន្តិសុខមកពីសាកលវិទ្យាល័យ Georgetown និយាយថា៖ «គ្រប់គ្នាចាប់ផ្ដើមនិយាយថា តាលីបង់ អាចជាក្រុមដែលយើងបញ្ចុះបញ្ចូលបាន»។

មូលហេតុទាំងឡាយខាងលើ កំពុងរុញច្រាន IS-K និង តាលីបង់ ឱ្យធ្លាក់ទៅក្នុងសង្គ្រាមយូរអង្វែងទៅមុខទៀត…

August 27, 2021

ទាហាន តាលីបង់ ជិត 30 នាក់ ស្លាប់ក្នុងការបំផ្ទុះគ្រាប់បែកនៅកាប៊ុល! តាលីបង់ ថា «គ្មានហេតុផលណាដែលត្រូវរក្សាវត្តមានទាហានបរទេសនៅ អាហ្វហ្គានីស្ថាន»

មន្ត្រី តាលីបង់ បានឱ្យដឹងថា ជិតពាក់កណ្ដាលនៃអ្នកស្លាប់ក្នុងករណីបំផ្ទុះគ្រាប់បែកនៅព្រលានយន្តហោះអន្តរជាតិ Hamid Karzai គឺជាសមាជិករបស់ក្រុមនេះ។

«យ៉ាងហោចណាស់ ក៏មានសមាជិករបស់ តាលីបង់ ចំនួន 28 នាក់ បានស្លាប់ក្នុងករណីបំផ្ទុះគ្រាប់បែកនៅខាងក្រៅព្រលានយន្តហោះក្រុងកាប៊ុល។ យើងបាត់បង់មនុស្សច្រើនជាង អាមេរិក» មន្ត្រី តាលីបង់ សុំមិនបញ្ចេញឈ្មោះ បាននិយាយនៅថ្ងៃនេះ និងបន្ថែមថា ពុំមានហេតុផលអ្វីដែលត្រូវពន្យារពេលចំពោះការរក្សាវត្តមានរបស់កងកម្លាំងបរទេសនៅ អាហ្វហ្គានីស្ថាន ក្រោយថ្ងៃទី 31 សីហា។

Abdul Qahar Balkhi មេដឹកនាំក្រុមប្រឹក្សាវប្បធម៌របស់ តាលីបង់ បានឱ្យដឹងកាលពីថ្ងៃទី 26 សីហា មុនហេតុការណ៍បំផ្ទុះគ្រាប់បែកនៅខាងក្រៅព្រលានយន្តហោះក្រុងកាប៊ុល ដែលបានសម្លាប់មនុស្ស 70 នាក់ ក្នុងនោះមាន 13 នាក់ជាទាហាន អាមេរិក និងអ្នករងរបួសចំនួន 140 នាក់ ថា៖ «យើងបានទទួលព័ត៌មានថា ក្រុមជនព្រៃផ្សៃ កំពុងរៀបគម្រោងវាយប្រហារភេរវកម្មសំដៅលើពលរដ្ឋសាមញ្ញ។ យើងកំពុងធ្វើគ្រប់យ៉ាងដើម្បីរារាំងហេតុការណ៍នេះ»។

សហរដ្ឋអាមេរិក បានចោទក្រុមរដ្ឋអ៊ីស្លាម Khorasan (ISIS-K) ដែលជាសាខាប្រកបដោយអំពើហិង្សា របស់ក្រុម រដ្ឋអ៊ីស្លាម (IS) ថា ជាអ្នកនៅពីក្រោយអំពីភេរវកម្មនេះ។

ISIS-K បានចេញមុខទទួលខុសត្រូវ និងអះអាងថា គោលដៅរបស់ពួកគេគឺទាហាន អាមេរិក និងសម្ព័ន្ធមិត្ត។ ប្រធានាធិបតីអាមេរិក លោក Joe Biden ប្រកាសថា នឹងសងសឹក៕

August 27, 2021

ករណីបំផ្ទុះគ្រាប់បែកនៅព្រលានយន្តហោះក្រុងកាប៊ុល ត្រូវបាន តាលីបង់ ព្រមានជាមុន

អាហ្វហ្គានីស្ថាន៖ មេដឹកនាំម្នាក់របស់ តាលីបង់ បានព្រមានថា «ជនព្រៃផ្សៃមួយចំនួន» កំពុងត្រៀមវាយប្រហារភេរវកម្ម តែប៉ុន្មានម៉ោងម៉ោងប៉ុណ្ណោះ មុននឹងហេតុការណ៍បំផ្ទុះគ្រាប់បែកដែលបានសម្លាប់មនុស្ស 70 នាក់ស្លាប់នៅ កាប៊ុល ត្រូវបានធ្វើឡើង។

«យើងបានទទួលព័ត៌មានថា ក្រុមជនព្រៃផ្សៃ កំពុងរៀបគម្រោងវាយប្រហារភេរវកម្មសំដៅលើពលរដ្ឋសាមញ្ញ។ យើងកំពុងធ្វើគ្រប់យ៉ាងដើម្បីរារាំងហេតុការណ៍នេះ» Abdul Qahar Balkhi មេដឹកនាំក្រុមប្រឹក្សាវប្បធម៌របស់ តាលីបង់ បានឱ្យដឹងកាលពីថ្ងៃទី 26 សីហា មុនហេតុការណ៍បំផ្ទុះគ្រាប់បែកនៅខាងក្រៅព្រលានយន្តហោះក្រុងកាប៊ុល។

Abdul Qahar Balkhi មេដឹកនាំក្រុមប្រឹក្សាវប្បធម៌របស់ តាលីបង់

ក្រុមមន្ត្រីរបស់ តាលីបង់ មិនបានបញ្ជាក់ឱ្យដឹងច្បាស់អំពីការគំរាមកំហែងនេះនោះទេ។

ហេតុការណ៍បំផ្ទុះគ្រាប់បែកចំនួនពីរលើក នៅព្រលានយន្តហោះអន្តរជាតិ Hamid Karzai ក្នុងរដ្ឋធានីកាប៊ុល កាលពីថ្ងៃទី 26 សីហា បណ្ដាលឱ្យមានមនុស្សស្លាប់ជាង 70 នាក់ ក្នុងនោះមាន 13 នាក់ជាទាហាន អាមេរិក ខណៈអ្នករងរបួសបានកើនដល់ 140 នាក់។

សហរដ្ឋអាមេរិក បានចោទក្រុមរដ្ឋអ៊ីស្លាម Khorasan (ISIS-K) ដែលជាសាខាប្រកបដោយអំពើហិង្សា របស់ក្រុម រដ្ឋអ៊ីស្លាម (IS) ថា ជាអ្នកនៅពីក្រោយអំពីភេរវកម្មនេះ។

ISIS-K បានចេញមុខទទួលខុសត្រូវ និងអះអាងថា គោលដៅរបស់ពួកគេគឺទាហាន អាមេរិក និងសម្ព័ន្ធមិត្ត។ ប្រធានាធិបតីអាមេរិក លោក Joe Biden ប្រកាសថា នឹងសងសឹក។

ចាប់តាំងពី តាលីបង់ ដណ្ដើមបានអំណាចក្នុងការគ្រប់គ្រងរដ្ឋធានីកាប៊ុល ព្រលានយន្តហោះ Hamid Karzai តែងស្ថិតក្នុងភាពវឹកវរ ដោយសារតែមនុស្សរាប់ម៉ឺននាក់នាំគ្នាមកកាន់ទីនេះដើម្បីរកផ្លូវចាកចេញពីប្រទេស៕

August 27, 2021

ដុតសម្លាប់ខ្លួនឯង ក្រោយចោទតំណាងរាស្ត្រថា បានរំលោភផ្លូវភេទ

ឥណ្ឌា៖ នារីវ័យ 24 ឆ្នាំម្នាក់ នៅ Uttar Pradesh បានដុតខ្លួនឯង ក្រោយរយៈពេលពីរឆ្នាំដែលនាងបានចោទតំណាងរាស្ត្រម្នាក់ថា បានរំលោភលើរូបនាង ដោយសារយល់ថា ប៉ូលិស និងចៅក្រម «សងសឹក» ចំពោះនាង។

នារីរូបនេះ និងមិត្តប្រុសម្នាក់ កាលពីថ្ងៃទី 16 សីហា បានផ្សាយផ្ទាល់លើ Facebook មុនពេលចាក់សាំងដុតខ្លួនឯង។ ពួកគេត្រូវបាននាំទៅកាន់មន្ទីរពេទ្យក្នុងស្ថានភាពត្រូវរលាកភ្លើងធ្ងន់ធ្ងរ។ បុរសជាមិត្តប្រុសបានស្លាប់នៅថ្ងៃទី 21 សីហា ចំណែកនារីជាមិត្តស្រី បានស្លាប់បីថ្ងៃក្រោយមក។

អ្នកទាំងពីរខាងលើ បានធ្វើដំណើរពីភាគខាងជើងនៃរដ្ឋ Uttar Pradesh មកកាន់រដ្ឋធានី នីវដេលី និងបានដុតខ្លួនឯងនៅខាងក្រៅតុលាការកំពូលឥណ្ឌា ដើម្បីទាក់ទាញចំណាប់អារម្មណ៍របស់សាធារណជន ចំពោះស្ថានភាពរបស់ពួកគេ។

នារីខាងលើ បានចោទប្រកាន់តំណាងរាស្ត្រម្នាក់ឈ្មោះ Atul Rai នៃបក្ស Bahujan Samaj (BSP) ថា បានចាប់នាងរំលោភនៅឯផ្ទះរបស់តំណាងរាស្ត្រម្នាក់នេះ ដែលស្ថិតក្នុងទីក្រុង Varanasi។ នាងបានដាក់ពាក្យបណ្ដឹងកាលពីខែឧសភា ឆ្នាំ 2019។

តំណាងរាស្ត្រឈ្មោះ Rai ដែលបានច្រានចោលការចោទប្រកាន់ ត្រូវបានចាប់ខ្លួនមួយខែក្រោយមក និងបានជាប់ពន្ធនាគារពីរឆ្នាំរួចមកហើយ។

ខែវិច្ឆិកា ឆ្នាំ 2020 បងប្រុសរបស់ Rai បានដាក់ពាក្យបណ្ដឹងទៅកាន់ប៉ូលិស ដោយចោទថា នារីខាងលើបានមួលបង្កាច់ ហើយតុលាការក៏បានចេញដីកាចាប់ខ្លួនដោយមិនអនុញ្ញាតឱ្យមានការធានាចំពោះនារីរងគ្រោះ កាលពីដើមខែនេះ។ នារីរូបនេះ បានបដិសេធការចោទប្រកាន់ពីសំណាក់បងប្រុសរបស់ Rai។

ក្នុងវីដេអូដែលបានផ្សាយផ្ទាល់មុនពេលដុតខ្លួនឯង នារីនេះបានចោទប្រកាន់តំណាងរាស្ត្រ Rai ថា បានប្រើប្រាស់ឥទ្ធិពលរបស់ខ្លួនដើម្បីសងសឹកលើរូបនាង។ នាង និងមិត្តប្រុសបានលើកយកឈ្មោះមន្ត្រីនគរបាលមួយចំនួន រួមទាំងក្រុមចៅក្រមផងដែរ ដោយបានចោទពួកគេថា បានរួមគំនិតជាមួយ Rai ដើម្បីធ្វើបាបនាង។

«យើងបានដើរដល់ជំហានដែលពួកគេចង់បាន។ ពួកគេបានប្រឹងប្រែងអស់រយៈពេលមួយឆ្នាំកន្លះ ដើម្បីរុញពួកខ្ញុំឱ្យដល់ដំណាក់កាលនេះ» នារីរងគ្រោះនិយាយដូច្នេះ។

មិត្តរបស់នារីខាងលើនិយាយថា៖ «ក្រុមមន្ត្រីបានបង្ខំឱ្យពួកយើងស្លាប់ចាប់តាំងពីខែវិច្ឆិកា ឆ្នាំ 2020។ យើងខ្ញុំចង់ឱ្យមិត្តទាំងអស់ ពលរដ្ឋនៅ Uttah និងនៅទូទាំងប្រទេស ដឹងអំពីហេតុការណ៍នេះ»។ ជំហានដែលពួកយើងជិតដើរដល់គឺពិតជាឈឺចាប់ និងគួរឱ្យខ្លាច។ យើងក៏មានការភ័យខ្លាច ប៉ុន្តែការភ័យខ្លាចនេះមិនជាអ្វីទាំងអស់»។

អាជ្ញាធររដ្ឋ Uttar Pradesh បានឱ្យដឹងថា បានផ្អាកការងាររបស់ប៉ូលិសពីរនាក់ ហើយថា កំពុងស៊ើបអង្កេតលើរឿងក្ដីនេះ។ ក្រុមសកម្មជនសិទ្ធិមនុស្សយល់ថា ការអនុវត្តច្បាប់នៅធូររលុង ពិសេសនៅក្នុងករណីជនជាប់ចោទគឺជាអ្នកមានអំណាច មានលុយ ដែលនេះនាំឱ្យជនរងគ្រោះមិនអាចទទួលបានយុត្តិធម៌៕

August 26, 2021

តាលីបង់៖ «មិនមានភ័ស្ដុតាងបញ្ជាក់ថា bin Laden ជាមេភេរវកម្មថ្ងៃទី 11 កញ្ញា»

តាលីបង់ បានអះអាងថា ពុំមានអ្វីដែលអាចបញ្ជាក់បានថា Osama bin Laden គឹជាមេដឹកនាំភេរវកម្មក្នុងករណីវាយប្រហារនៅ សហរដ្ឋអាមេរិក កាលពីថ្ងៃទី 11 ខែកញ្ញា ឆ្នាំ 2001 បើទោះជាមេភេរវកររូបនេះ ធ្លាប់បានទទួលស្គាល់នៅក្នុងខ្សែអាត់សំឡេង។

«ពេល Osama bin Laden ក្លាយជាបញ្ហាសម្រាប់ សហរដ្ឋអាមេរិក គាត់កំពុងស្ថិតនៅ អាហ្វហ្គានីស្ថាន។ ពុំមានភ័ស្ដុតាងណាមួយបង្ហាញថា គាត់ជាប់ទាក់ទិន ប៉ុន្តែ ពេលនេះ យើងសន្យាថា ទឹកដី អាហ្វហ្គានីស្ថាន នឹងមិនត្រូវបានប្រើប្រាស់ដើម្បីប្រឆាំងនឹងអ្នកណាទាំងអស់» អ្នកនាំពាក្យរបស់ តាលីបង់ លោក Zabihullah Mujahid បានប្រាប់ NBC News ពី អាហ្វហ្គានីស្ថាន កាលពីថ្ងៃទី 25 សីហា។

អធិប្បាយខាងលើ ត្រូវបានលើកឡើងបន្ទាប់ពីអ្នកយកព័ត៌មានសួរថា តើ អាហ្វហ្គានីស្ថាន អាចក្លាយជាមូលដ្ឋានរបស់ក្រុមភេរវករដែរ ឬទេ នៅក្នុងគ្រាដែល សហរដ្ឋអាមេរិក នឹងបញ្ចប់យុទ្ធនាការដកទ័ព នៅថ្ងៃទី 31 សីហា។ លោក Mujahid ថ្លែងថា ការចោទប្រកាន់របស់ សហរដ្ឋអាមេរិក «គ្រាន់តែជាលេសដើម្បីបង្កសង្គ្រាម»។

អ្នកនាំពាក្យរបស់ តាលីបង់ លោក Zabihullah Mujahid

នៅក្នុងខ្សែអាត់សំឡេងដែលបានប្រកាសកាលពីឆ្នាំ 2004 លោក bin Landen ទទួលស្គាល់ថា បានចេញបញ្ជាឱ្យអនុវត្តករណីវាយប្រហារភេរវកម្មថ្ងៃទី 11 កញ្ញា ឆ្នាំ 2001 ក្នុងនោះមានភេរវករ 19 នាក់ បានប្លន់យន្តហោះពាណិជ្ជកម្មរបស់ អាមេរិក ចំនួន 4 គ្រឿង និងបានបញ្ជាឱ្យហោះទៅបុកអគារពាណិជ្ជកម្មពិភពលោកនានា នៅទីក្រុងនីវយ៉ក និង មន្ទីរបញ្ចកោណ។ អ្នកដំណើរក្នុងយន្តហោះមួយគ្រឿង បានតដៃប្រឆាំងនឹងក្រុមភេរវករ បណ្ដាលឱ្យយន្តហោះត្រូវធ្លាក់ទៅលើវាលនៅក្នុងរដ្ឋ Pennsylvania។

សហរដ្ឋអាមេរិក បានផ្ដើមយុទ្ធនាការយោធានៅ អាហ្វហ្គានីស្ថាន បន្ទាប់ពីចោទថា តាលីបង់ បានបដិសេធការប្រគល់ខ្លួនក្រុមមេភេរវករ al-Qaeda ឱ្យ សហរដ្ឋអាមេរិក ក្នុងនោះក៏មានលោក bin Landen ផងដែរ។ មេភេរវកររូបនេះ ត្រូវបានកម្លាំងពិសេស SEAL របស់ អាមេរិក បាញ់សម្លាប់នៅ ប៉ាគីសស្ថាន កាលពីថ្ងៃទី 1 ឧសភា ឆ្នាំ 2011។

របាយការណ៍មួយរបស់ «ក្រុមប្រឹក្សា 11 កញ្ញា» បានបញ្ជាក់ថា «ករណីភេរវកម្មថ្ងៃទី 11 កញ្ញាគឺត្រូវបានដឹកនាំដោយ Osama bin Laden»។

«នៅពេលដំណាក់កាលត្រៀមចុងក្រោយកំពុងត្រូវបានធ្វើឡើងនារដូវក្ដៅឆ្នាំ 2001 ក្រុមមេដឹកនាំរបស់ al-Qaeda នៅ អាហ្វហ្គានីស្ថាន មានទំនាស់ផ្ទៃក្នុង ទាក់ទងនឹងបញ្ហាដែលថា គួរតែវាយប្រហារភេរវកម្មលើ សហរដ្ឋអាមេរិក ឬអត់» របាយការណ៍ខាងលើ សរសេរដូច្នេះ។ «មេបញ្ជាការរបស់ តាលីបង់ Mullah Omar បានជំទាស់នឹងការវាយប្រហារលើ អាមេរិក។ ទោះជាត្រូវជួបនឹងការប្រឆាំងពីមេដឹកនាំកំពូលៗជាច្រើនរូប ប៉ុន្តែ bin Laden នៅតែសម្រេចចិត្តវាយប្រហារ»។

យុទ្ធនាការយោធាឆ្នាំ 2001 របស់ សហរដ្ឋអាមេរិក បានបណ្ដាលឱ្យ តាលីបង់ ត្រូវដួលរលំ។ ប៉ុន្តែ តាលីបង់ វាយដណ្ដើមយកបានអំណាចនៅ អាហ្វហ្គានីស្ថាន មកវិញ កាលពីថ្ងៃទី 15 សីហា ឆ្នាំ 2021 បន្ទាប់ពី អាមេរិក សម្រេចដកទ័ពចេញពីប្រទេសនេះ។ យុទ្ធនាការជម្លៀសពលរដ្ឋ កំពុងត្រូវបាន អាមេរិក ធ្វើឡើងនៅរដ្ឋធានីកាប៊ុល ក្នុងគ្រាដែលពលរដ្ឋ អាហ្វហ្គានីស្ថាន ជាច្រើនម៉ឺននាក់ កំពុងរកវិធីចាកចេញពីប្រទេស។

អ្នកនាំពាក្យរបស់ តាលីបង់ លោក Zabihullah Mujahid ថ្លែងថា៖ «នេះគឺជាកាលៈទេសៈដែលយើងសប្បាយរីករាយជាទីបំផុត»៕

August 26, 2021

ទារក អាហ្វហ្គានីស្ថាន ដាក់ឈ្មោះតាមយន្តហោះដឹកជនភៀសខ្លួន

មន្ត្រី សហរដ្ឋអាមេរិក បានឱ្យដឹងថា ទារិកា ជនជាតិ អាហ្វហ្គានីស្ថាន មួយរូប ដែលបានចាប់កំណើតលើយន្តហោះយោធា អាមេរិក ដឹកជនភៀសខ្លួនពី កាប៊ុល ត្រូវបានឪពុកម្ដាយដាក់ឈ្មោះទៅតាមឈ្មោះយន្តហោះ។

ស្ត្រីជាម្ដាយចាប់ផ្ដើមឈឺពោះកាលពីថ្ងៃទី 21 សីហា ក្នុងដំណើរពី កាប៊ុល ទៅកាន់មូលដ្ឋានទ័ព សហរដ្ឋអាមេរិក នៅប្រទេសអាល្លឺម៉ង់។ ក្នុងពេលកំពុងចុះចត បុគ្គលិកពេទ្យយោធា បានជួយដល់ការសម្រាលកូននៅក្នុងបន្ទប់យន្តហោះ។ បន្ទាប់មក ទាំងម្ដាយ ទាំងកូន ត្រូវបានបញ្ជូនទៅ កាន់មន្ទីរពេទ្យនៅក្បែរនោះ។

គ្រប់យន្តហោះរបស់កងទ័ពអាកាស អាមេរិក សុទ្ធតែមានឈ្មោះ និងលេខកូដ ដើម្បីងាយស្រួលដល់ការទាក់ទងទៅកាន់យន្តហោះដទៃ និងទីបញ្ជាការដែនអាកាស។ យន្តហោះដឹកជញ្ជូន C-17 មានឈ្មោះថា «Reach» បូកជាមួយនឹងលេខកូដនៅខាងក្រោយ។ លេខកូដនៃយន្តហោះដែលបានដឹកគ្រួសាររបស់ទារិកា ជនជាតិ អាហ្វហ្គានីស្ថាន ទៅដល់កន្លែងដោយសុវត្ថិភាព គឺ «828» ហើយនេះគឺជាមូលហេតុដែលឪពុកម្ដាយបានសម្រេចដាក់ឈ្មោះឱ្យកូនស្រីរបស់ខ្លួនថា Reach។ នេះបើតាមការឱ្យដឹងកាលពីថ្ងៃទី 25 សីហា ពីមេបញ្ជាការកងទ័ពរបស់ សហរដ្ឋអាមេរិក ប្រចាំទ្វីបអឺរ៉ុប។

ទន្ទឹមនឹងទារិកា Reach នៅមានទារកពីរនាក់ផ្សេងទៀត ក៏បានចាប់កំណើត ក្រោយពីម្ដាយរបស់ពួកគេបានចុះចតនៅមូលដ្ឋានទ័ព Ramstein។ បច្ចុប្បន្ន Reach និងឪពុកម្ដាយ រួមជាមួយជនភៀសខ្លួនជនជាតិ អាហ្វហ្គានីស្ថាន ដទៃទៀត កំពុងឆ្ពោះទៅកាន់ សហរដ្ឋអាមេរិក៕

August 26, 2021

ចិន បង្កើតក្រុមហ៊ុនសោធននិវត្តន៍ជាតិ ដែលមានទុនជាង 1.7 ពាន់លានដុល្លារ

ប្រទេសចិន មានផែនការបង្កើតក្រុមហ៊ុនសោធននិវត្តន៍ជាតិ ដែលមានទុនជិត 11.2 ពាន់លានយុន (ជាង 1.7 ពាន់លានដុល្លារអាមេរិក) ក្នុងគ្រាដែលប្រជាជនរបស់ប្រទេសនេះ កំពុងចាស់យ៉ាងលឿន។

សមាគមធានារ៉ាប់រងចិន ឱ្យដឹងថា ស្ថាប័នចំនួន 17 នឹងបណ្ដាក់ទុនទៅក្នុងក្រុមហ៊ុននេះ។ ក្នុងនោះ ផ្នែកគ្រប់គ្រងទ្រព្យសម្បត្តិនៃធនាគារធំបំផុតចំនួន 5 នៅប្រទេសចិន មួយស្ថាប័នៗ វិនិយោគ 1 ពាន់លានយុន ស្មើនឹង 8.97% នៃមូលបត្រសរុបរបស់ក្រុមហ៊ុនសោធននិវត្តន៍ជាតិ។ ក្រៅពីនេះ ក្រុមហ៊ុនជើងសាធំជាងគេប្រចាំប្រទេសចិន គឺ Citic Securities, Taikang Life Insurance រួមនឹងក្រុមហ៊ុនវិនិយោគដែលស្ថិតក្រោមគណៈកម្មការគ្រប់គ្រងទ្រព្យសាធារណៈ ក៏នឹងចូលរួមធ្វើសកម្មភាពផងដែរ។

ប្រទេសចិន ជិតត្រូវប្រឈមនឹងវិបត្តិចូលនិវត្តន៍ នៅពេលល្បឿននៃភាពចាស់ជរារបស់ប្រជាជន កំពុងកើនឡើង ខណៈក្រុមដែលស្ថិតក្នុងវ័យធ្វើការ និងអត្រានៃការបង្កើតកូន កំពុងធ្លាក់ចុះ។ នេះបើតាមលទ្ធផលនៃការស្រាវជ្រាវលើប្រជាជន ដែល 10 ឆ្នាំ ប្រកាសម្ដង បានឱ្យដឹងកាលពីខែឧសភា ឆ្នាំ 2021។

ដើម្បីដោះស្រាយបញ្ហានេះ រដ្ឋាភិបាលចិន នឹងពង្រីកវិសាលភាពរបស់វិស័យធានារ៉ាប់រងការចូលនិវត្តន៍ជាមូលដ្ឋាន ដែលគ្រប់គ្រងដោយអាជ្ញាធរមូលដ្ឋាន ទន្ទឹមនឹងនេះក៏លើកទឹកចិត្តឱ្យអភិវឌ្ឍវិស័យធានារ៉ាប់រងលើការចូលនិវត្តន៍ឯកជន បង្កើនអាយុចូលនិវត្តន៍ផងដែរ។ នេះបើតាមគម្រោងដែលត្រូវបានប្រកាសកាលពីខែកក្កដា។

ឯកសាររបស់ Citic Securities កន្លងមក បានផ្ដល់តម្រុយខ្លះអំពីផែនការនេះ របស់រដ្ឋាភិបាល ទៅឱ្យក្រុមអ្នកវិភាគ។ ជាក់ស្ដែង ក្រុមហ៊ុនចំនួន 2 បានតភ្ជាប់ជាមួយនឹងស្ថាប័នជើងសា Citic Securities ដើម្បីចុះកិច្ចព្រមព្រៀងជាមួយស្ថាប័នចំនួន 15 ផ្សេងទៀត ក្នុងបំណងបង្កើតសម្ព័ន្ធក្រុមហ៊ុនធានារ៉ាប់រង។

ឯកសារខាងលើបានឱ្យដឹងថា ក្រុមហ៊ុនដែលកំពុងរង់ចាំការអនុម័តពីរដ្ឋាភិបាលនេះ នឹងគ្រប់គ្រងបណ្ដាមូលនិធិសោធននិវត្តន៍ពាណិជ្ជកម្ម, ធានារ៉ាប់រងសុខភាពរយៈពេលខ្លី និងរយៈពេលមធ្យម, ធានារ៉ាប់រងអាយុជីវិត និងមូលនិធិទំនុកចិត្តនានាសម្រាប់គោលដៅចូលនិវត្តន៍។

ក្រុមអ្នកវិភាគព្យាករថា ក្រុមហ៊ុនសោធននិវត្តន៍ជាតិ របស់ចិន នឹងដើរតួនាទីសំខាន់នៅលើទីផ្សារសោធននិវត្តន៍ដែលប្រកបដោយការប្រកួតប្រជែងខ្ពស់។

ប្រទេសចិន កំពុងដំណើរការប្រព័ន្ធសោធននិវត្តន៍ ដោយប្រើប្រាស់មូលដ្ឋានធំៗចំនួន 3 ក្នុងនោះ មូលដ្ឋានចម្បងជាងគេគឺត្រូវបានគ្រប់គ្រងដោយរដ្ឋ ដែលកាន់កាប់ 82.9% នៃទ្រព្យសរុបរបស់មូលនិធិសោធននិវត្តន៍នៅប្រទេសនេះ។ មូលដ្ឋានទី 2 គឺមូលនិធិនានាដែលអ្នកប្រើប្រាស់ពលករ បានចូលរួមជាប្រចាំឆ្នាំ ក្នុងនោះរួមមានធនាគារ និងក្រុមហ៊ុនធានារ៉ាប់រងចំនួន 13 ផងដែរ។ មូលដ្ឋានទី 3 កំពុងស្ថិតក្នុងដំណាក់កាលក្មេងខ្ចី ប៉ុន្តែ មានសក្ដានុពលខ្លាំង នៅពេលប្រទេសចិន ជំរុញ និងលើកទឹកចិត្តយ៉ាងខ្លាំងក្លា ដល់វិស័យសោធននិវត្តន៍ឯកជន៕

August 23, 2021

Category: អន្តរជាតិ