អន្តរជាតិ - La Reine Media

យន្តហោះចម្បាំងរបស់ អ៊ីស្រាអែល វាយប្រហារលើតំបន់ ហ្គាហ្សា ទៀតហើយ

អ៊ីស្រាអែល ប្រកាសថា បានវាយប្រហារតាមផ្លូវអាកាសទៅលើទីតាំងផលិតរ៉ុក្កែត របស់ក្រុម ហាម៉ាស នៃចលានា ប៉ាលេស្ទីន បន្ទាប់ពីកងជីវពលនេះបង្ហោះប៉ោងប៉ោងបំពាក់ជាតិផ្ទុះចូលទៅភាគខាងត្បូងប្រទេសអ៊ីស្រាអែល។

ក្រសួងការពារជាតិអ៊ីស្រាអែល បានប្រកាសថា កងទ័ពប្រទេសនេះបានវាយប្រហារទៅលើទីតាំងជាច្រើន ក្នុងនោះមានទាំងមូលដ្ឋានអភិវឌ្ឍរ៉ុក្កែតរបស់ក្រុមប្រដាប់អាវុធ ហាម៉ាស នៅទីក្រុង Khan Younis ក្នុងតំបន់ ហ្គាហ្សា កាលពីយប់ថ្ងៃទី 6 កញ្ញា និងបានបន្ថែមថា នេះគឺជាការសងសឹកទៅនឹងករណីបង្ហោះប៉ោងប៉ោងភ្ជាប់ជាតិផ្ទុះបង្កអគ្គិភ័យចំនួនបីលើកទៅលើតំបន់ភាគខាងត្បូងរបស់ អ៊ីស្រាអែល។

វីដេអូក្នុងបណ្ដាញសង្គមបង្ហាញថា ករណីផ្ទុះជាច្រើន រួមជាមួយនឹងអណ្ដាតភ្លើង បានកើតឡើងដោយសារការបាញ់ប្រហារពីយន្តហោះចម្បាំងរបស់ អ៊ីស្រាអែល។ សាក្សីមួយចំនួននិយាយថា ស្របពេលនោះក៏មានសំឡេងកាំភ្លើងធំបន្លឺឡើង ទំនងជាបាញ់សំដៅយន្តហោះចម្បាំងដែលកំពុងហោះពីលើតំបន់ ហ្គាហ្សា។

អ៊ីស្រាអែល បានវាយប្រហារតាមអាកាសជាច្រើនលើកទៅលើតំបន់ ហ្គាហ្សា រាប់ចាប់ពីមានកិច្ចព្រមព្រៀងឈប់បាញ់ជាមួយ ហាម៉ាស ក្រោយការប្រយុទ្ធគ្នា 11 ថ្ងៃ ដែលបានបណ្ដាលឱ្យជនជាតិប៉ាលេស្ទីន 260 និងជនជាតិអ៊ីស្រាអែល 13 បានស្លាប់កាលពីខែឧសភា។

មូលហេតុដែលនាំឱ្យ អ៊ីស្រាអែល បើកការវាយប្រហារសងសឹក ត្រូវបាន អ៊ីស្រាអែល អះអាងថា មកពីការបង្ហោះប៉ោងប៉ោងដែលមានភ្ជាប់ជាតិផ្ទុះ និងការបាញ់រ៉ុក្កែត ចូលទឹកដី អ៊ីស្រាអែល ពីសំណាក់កងជីវពល ហាម៉ាស៕

September 7, 2021

មេរដ្ឋប្រហារយោធានៅ ហ្គីណេ ស្បថថា មិនធ្វើបាបសមាជិករដ្ឋាភិបាលចាស់ ខណៈរងការថ្កោលទោសពីអន្តរជាតិ

Mamady Doumbouya មេបញ្ជាការកងទ័ពរដ្ឋប្រហាររបស់ ហ្គីណេ សន្យាថា បង្កើតរដ្ឋាភិបាលរួបរួមជាតិ និងមិនធ្វើបាបសមាជិករដ្ឋាភិបាលចាស់ ខណៈសហគមន៍អន្តរជាតិថ្កោលទោស និងគំរាមដាក់ទណ្ឌកម្ម។

«នឹងមានការចរចាមួយដើម្បីបង្កើតបទបញ្ជាសម្រាប់ដំណើរការនៃការប្រគល់អំណាច ក្រោយមកបង្កើតរដ្ឋាភិបាលបង្រួបបង្រួមជាតិ» Mamady Doumbouya មេបញ្ជាការកងកម្លាំងពិសេសរបស់ ហ្គីណេ បានឱ្យដឹងដូច្នេះកាលពីម្សិលមិញ ប៉ុន្តែ មិនបានបញ្ជាក់លម្អិតអំពីពេលវេលានៃការចរចា ឬកាលកំណត់នៃការប្រគល់អំណាច។

មេបញ្ជាការកងទ័ពរដ្ឋប្រហាររូបនេះបានសន្យាថា នឹងមិនធ្វើបាបសមាជិកទាំងឡាយរបស់រដ្ឋាភិបាលចាស់ ទន្ទឹមនឹងនេះ លោកក៏បានសន្យាជាមួយក្រុមអ្នកវិនិយោគថា សកម្មភាពជំនួញនឹងមិនរងផលប៉ះពាល់។

ហ្គីណេ ជាប្រទេសក្រីក្របំផុតមួយក្នុងពិភពលោក បើទោះជាមានធនធានធម្មជាតិសម្បូរបែប។ កន្លងមក ប្រទេសនេះតែងតែជួបបញ្ហាអស្ថិរភាពនយោបាយ។ ភាពតានតឹងបានផ្ទុះឡើងកាលពីឆ្នាំមុន បន្ទាប់ពីយុទ្ធនាការឃោសនាបោះឆ្នោតអាណត្តិទីបីដ៏ចម្រូងចម្រាសរបស់ប្រធានាធិបតី Alpha Conde។ មួយថ្ងៃមុនការបោះឆ្នោតប្រធានាធិបតីឆ្នាំ 2020 កងទ័ពបានបិទច្រកចូលក្នុងខណ្ឌ Kaloum បន្ទាប់ពីមានរបាយការណ៍អំពីការបះបោរនៅភាគខាងកើតរដ្ឋធានី។

វរសេនីយឯក Mamaby Doumbouya មេរដ្ឋប្រហារយោធានៅ ហ្គីណេ លើកដៃស្វាគមន៍ហ្វូងមនុស្ស នៅពេលលោកមកដល់វិមានប្រជាជន (Palais du Peuple/Palace of the People) នៅក្នុងរដ្ឋធានី Conakry កាលពីថ្ងៃទី 6 កញ្ញា ឆ្នាំ 2021សារព័ត៌មាន AFP បានរាយការណ៍ថា Doumbouya មេបញ្ជាការកងកម្លាំងពិសេសរបស់ ហ្គីណេ ជាអ្នកនៅពីក្រោយរដ្ឋប្រហារកាលពីថ្ងៃទី 5 កញ្ញា ដែលបានចាប់ខ្លួនប្រធានាធិបតី Conde វ័យ 83 ឆ្នាំ បានប្រកាសរំលាយរដ្ឋធម្មនុញ្ញ ដាក់បម្រាមគោចរ រំលាយរដ្ឋាភិបាល និងផ្លាស់ប្ដូរអភិបាលខេត្ត និងក្រុមមន្ត្រីជាន់ខ្ពស់ ជំនួសដោយមនុស្សរបស់កងទ័ព។

ប្រទេសជាច្រើនបានថ្កោលទោសចំពោះរដ្ឋប្រហារនេះ។ «អំពើហិង្សា និងច្បាប់ទាំងឡាយណាក្រៅពីរដ្ឋធម្មនុញ្ញ សុទ្ធតែធ្វើឱ្យប៉ះពាល់ដល់ក្ដីសង្ឃឹមដែលថា ហ្គីណេ នឹងប្រកបដោយសន្តិភាព ស្ថិរភាព និងរីកចម្រើន» អ្នកនាំពាក្យរបស់ក្រសួងការបរទេស សហរដ្ឋអាមេរិក Ned Price និយាយដូច្នេះ និងបានអំពាវនាវឱ្យគ្រប់ភាគីគោរពច្បាប់។

សហភាពអាហ្វ្រិក និងអង្គការសហប្រជាជាតិ សុទ្ធតែបានអំពាវនាវឱ្យដោះលែងប្រធានាធិបតី Conde។ សហគមន៍សេដ្ឋកិច្ចនៃបណ្ដារដ្ឋអាហ្វ្រិកខាងលិច (Economic Community of West African States) បានគំរាមថានឹងដាក់ទណ្ឌកម្ម បើសិន ហ្គីណេ មិនស្ការរដ្ឋធម្មនុញ្ញឡើងវិញ៕

September 7, 2021

តំណាងរាស្ត្រ អាមេរិក ថា តាលីបង់ កំពុងឃាត់យន្តហោះ 6 គ្រឿងដែលដឹកពលរដ្ឋអាមេរិក

កងកម្លាំង តាលីបង់ កំពុងឃាត់យន្តហោះចំនួន 6 គ្រឿង ដែលដឹកពលរដ្ឋអាមេរិកាំង និងជនភៀសខ្លួន អាហ្វហ្គានីស្ថាន នៅឯព្រលានយន្តហោះក្រុង Mazar-i-Sharif ដើម្បីធ្វើជាចំណាប់ខ្មាំង នេះបើតាមសម្ដីរបស់តំណាងរាស្ត្រ សហរដ្ឋអាមេរិក។

«យើងមានយន្តហោះចំនួន 6 គ្រឿង នៅឯព្រលានយន្តហោះ Mazar-i-Shari ដែលមានពលរដ្ឋអាមេរិកាំង នៅលើនោះ។ តាលីបង់ កំពុងឃាត់ខ្លួនពួកគេធ្វើជាចំណាប់ខ្មាំងនៅពេលនេះ» តំណាងរាស្ត្របក្សសាធារណៈរដ្ឋ Michael McCaul ដែលជាសមាជិកនៃគណៈកម្មការកិច្ចការបរទេសរបស់សាភាជាន់ទាប បានអះអាងដូច្នេះនៅក្នុងកិច្ចសម្ភាសកាលពីថ្ងៃទី 5 កញ្ញា។ ទីរួមខេត្ត Mazar-i-Shari របស់ខេត្ត Balkh គឺជាទីក្រុងធំទីបួនរបស់ អាហ្វហ្គានីស្ថាន។

McCoul អះអាងថា ជើងយន្តហោះនានា ត្រូវបានក្រសួងការបរទេស អាមេរិក អនុញ្ញាតឱ្យចេញដំណើរ ប៉ុន្តែ «តាលីបង់ នឹងមិនអនុញ្ញាតឱ្យហោះចេញពីព្រលានយន្តហោះ»។

«យន្តហោះទាំងនេះមិនត្រូវបានអនុញ្ញាតឱ្យចាកចេញ។ យើងដឹងអំពីមូលហេតុ តាលីបង់ ចង់ដោះដូរអ្វីមួយ។ នេះពិតជាករណីចាប់ជាចំណាប់ខ្មាំង។ ពួកគេនឹងមិនអនុញ្ញាតឱ្យពលរដ្ឋអាមេរិកាំង ចាកចេញ រហូតទាល់តែ អាមេរិក ទទួលស្គាល់ទាំងស្រុង» លោក McCaul ឱ្យដឹងដូច្នេះ។

តំណាងរាស្ត្របក្សសាធារណៈរដ្ឋ លោក Michael McCaul

ក្រសួងការបរទេស សហរដ្ឋអាមេរិក មុននោះបានរាយការណ៍ប្រាប់សភាថា បណ្ដាជើងហោះហើរជួលពីឯកជនដែលបានត្រៀមរួចរាល់ក្នុងការដឹកពលរដ្ឋអាមេរិកាំង និងពលរដ្ឋដែលមានប័ណ្ឌបៃតង ពី អាហ្វហ្គានីស្ថាន ទៅកាន់ Doha ប្រទេសកាតា កំពុងត្រូវបាន តាលីបង់ រារាំង នៅឯ Mazar-i-Sharif។ ប្រភពព័ត៌មានពីសភានិយាយថា «ជាមូលដ្ឋាន តាលីបង់ កំពុងចាប់ឃាត់ខ្លួនពួកគេជាចំណាប់ខ្មាំង ដើម្បីទាមទារអ្វីច្រើនទៀតពីពលរដ្ឋអាមេរិកាំង»។

Ascend ជាអង្គការក្រៅរដ្ឋាភិបាលមួយដែលបណ្ដុះបណ្ដាលជំនាញដឹកនាំរបស់ស្ត្រីវ័យក្មេង បានឱ្យដឹងថា យន្តហោះពីរគ្រឿងបានស្ថិតនៅក្នុងព្រលានយន្តហោះអស់រយៈពេល 6 ថ្ងៃមកហើយ ដើម្បីរង់ចាំការអនុញ្ញាតឱ្យចាកចេញពីសំណាក់ក្រុម តាលីបង់។ ពលរដ្ឋនានាកំពុងរង់ចាំនៅខាងក្រៅព្រលានយន្តហោះ។

តំណាងរាស្ត្រ McCaul និយាយថា «ពលរដ្ឋអាមេរិកាំង រាប់រយនាក់» កំពុងរង់ចាំជម្លៀសពី អាហ្វហ្គានីស្ថាន ចាប់តាំងពី សហរដ្ឋអាមេរិក ដកទ័ពទាំងស្រុងចេញពីប្រទេសនេះកាលពីថ្ងៃទី 30 សីហា។ ចំណែកប្រធានការិយាល័យសេតវិមាន Ron Klain ឱ្យដឹងថា «ពលរដ្ឋអាមេរិកាំង ប្រមាណ 100 នាក់» កំពុងស្ថិតនៅក្នុងប្រទេស អាហ្វហ្គានីស្ថាន ហើយអាជ្ញាធរកំពុងប្រឹងប្រែងជម្លៀសពួកគេ៕

September 6, 2021

តាលីបង់ រងការចោទថា បានសម្លាប់ស្ត្រីមានផ្ទៃពោះជានគរបាល

ក្រុមតាលីបង់ ថ្មីៗនេះ រងការចោទប្រកាន់ បន្ទាប់ពីបានចូលគ្រប់គ្រងប្រទេស អាហ្វហ្គានីស្ថាន ក្នុងនោះក៏មានទាំងករណីសម្លាប់ស្ត្រីមានផ្ទៃពោះជានគរបាលនៃរដ្ឋាភិបាលចាស់ផងដែរ។

ស្ត្រីជានគរបាល ដែលត្រូវបានសារព័ត៌មានក្នុងស្រុករាយការណ៍ថាឈ្មោះ Banu Negar ត្រូវបានបាញ់សម្លាប់នៅចំពោះមុខសមាជិកគ្រួសារ នៅខាងក្រៅផ្ទះរបស់ពួកគេ ដែលស្ថិតក្នុងទីក្រុង Firozhah ជាទីរួមខេត្តរបស់ខេត្ត Ghor នៅភាគកណ្ដាលប្រទេស អាហ្វហ្គានីស្ថាន នេះបើតាមការចុះផ្សាយក្នុងថ្ងៃនេះ របស់ BBC។

សារព័ត៌មាន BBC ដកស្រង់ប្រភពព័ត៌មានចំនួនបី ឱ្យដឹងថា សមាជិកក្រុម តាលីបង់ បានវាយតប់ និងបាញ់សម្លាប់ Negar។ អ្នកផ្ទះរបស់ Negar ក៏បានផ្ដល់រូបថតបង្ហាញអំពីស្នាមឈាមប្រឡាក់ពាសពេញបន្ទប់ រួមមានទាំងសាកសពដែលផ្ទៃមុខត្រូវខ្ទេចខ្ទីមើលមិនយល់។

សមាជិកគ្រួសារស្ត្រីរងគ្រោះនិយាយថា Negar ធ្វើការនៅឯមន្ទីរឃុំឃាំងក្នុងតំបន់ និងកំពុងមានផ្ទៃពោះ 8 ខែ។

តាលីបង់ បានច្រានចោលរាល់ការចោទប្រកាន់ទាក់ទងនឹងការស្លាប់របស់ Negar និងថា ពួកគេកំពុងស្រាវជ្រាវលើរឿងនេះ។

ក្រុមមន្ត្រីតាលីបង់ កាលពីខែមុន បានសន្យាថានឹងគោរពសិទ្ធិរបស់ស្ត្រីនៅក្នុងក្របខណ្ឌច្បាប់សាសនាអ៊ីស្លាម Sharia ដ៏តឹងរ៉ឹង។ ពួកគេក៏បានអំពាវនាវឱ្យក្មេងស្រីចូលរៀន និងស្ត្រីត្រលប់ចូលធ្វើការវិញផងដែរ៕

September 6, 2021

កងទ័ព ហ្គីណេ ប្រកាសថា «រដ្ឋប្រហារយោធា ត្រូវបានរំលត់»

ប្រទេសហ្គីណេ៖ ក្រសួងការពារជាតិ ហ្គីណេ ប្រកាសថា ការវាយប្រហារចូលគ្រប់គ្រងវិមានប្រធានាធិបតី ពីសំណាក់កងកម្លាំងបះបោរ ត្រូវបានកម្ចាត់រួចហើយ។

សារព័ត៌មាន Al Jazeera បានរាយការណ៍ថា ក្រុមយោធាបះបោរដែលបានធ្វើរដ្ឋប្រហារ ត្រូវបានរំសាយ៖ «កងកម្លាំងការពារប្រធានាធិបតី ដែលទទួលបានការគាំទ្រពីកងកម្លាំងការពារជាតិ និងក្រុមសន្តិសុខដែលមានភក្ដីភាព បានទប់ស្កាត់ការគំរាមកំហែង និងរុញច្រានក្រុមរដ្ឋប្រហារ»។

យោងតាមក្រសួងការពារជាតិ ហ្គីណេ កងទ័ពប្រទេសនេះកំពុងតែអនុវត្ត «សកម្មភាពធានាសន្តិសុខ ស្ការស្ថិរភាព និងសន្តិភាព»។ ក្រសួងនេះបានបញ្ជាក់ថា ខ្លួនកំពុងគ្រប់គ្រងស្ថានការណ៍។ ក្រសួងការពារជាតិកំពុងដាក់ពង្រាយទាហាននៅទីក្រុង Conakry និងចេញបទបញ្ជាហាមមិនឱ្យប្រជាជនចេញក្រៅផ្ទះ។

ក៏ប៉ុន្តែ មកដល់បច្ចុប្បន្ន គេនៅមិនទាន់ដឹងច្បាស់ថា ក្រុមណាមួយកំពុងគ្រប់គ្រងប្រទេសនៅ អាហ្វ្រិកខាងលិចនេះនៅឡើយ។ មុននោះ វីដេអូលើបណ្ដាញសង្គម បានបង្ហាញថា វិមានប្រធានាធិបតី Alpha Conde ត្រូវបានឡោមព័ទ្ធដោយកងទ័ពរដ្ឋប្រហារ ហើយប្រធានាធិបតី Conde រួមជាមួយនឹងក្រុមមន្ត្រីជាន់ខ្ពស់ ត្រូវបានចាប់ខ្លួន។

ប៉ុន្តែ ប្រភពព័ត៌មានមួយចំនួនបានឱ្យដឹងថា ប្រធានាធិបតី Alpha Conde នៅមានសុវត្ថិភាពនៅឡើយ។ កងកម្លាំងស្មោះត្រង់នឹងប្រធានាធិបតី Alpha Conde ក្រោយមកក៏បានចាប់ខ្លួនទាហាន 25 នាក់ដែលបានចូលរួមធ្វើរដ្ឋប្រហារយោធា។

រដ្ឋប្រហារយោធានេះ ត្រូវធ្វើឡើងកាលពីថ្ងៃទី 5 កញ្ញា ដោយកងកម្លាំងពិសេសរបស់កងទ័ព ហ្គីណេ ក្រោមការដឹកនាំរបស់វរសេនីយឯក Mamady Doubouya។ ក្រោយរដ្ឋប្រហារ ក្រុមបះបោរបានប្រកាសលើកញ្ចក់ទូរទស្សន៍ជាតិថា រដ្ឋាភិបាលត្រូវបានរំសាយ ចំណែករដ្ឋធម្មនុញ្ញក៏ត្រូវបានរំលាយ ព្រមទាំងបានចេញបម្រាមគោចរទូទាំងប្រទេស «រហូតដល់មានប្រកាសថ្មី»។ កងកម្លាំងរដ្ឋប្រហារក៏បានឱ្យដឹងថា នឹងកោះហៅរដ្ឋមន្ត្រីនានា និងក្រុមមន្ត្រីជាន់ខ្ពស់ដទៃទៀត នៅថ្ងៃទី 6 កញ្ញានេះ។

វរសេនីយឯក Mamady Doumbouya និយាយថា សកម្មភាពរដ្ឋប្រហារនេះគឺដើម្បីផលប្រយោជន៍ល្អបំផុតសម្រាប់ប្រទេស ហ្គីណេ ដោយសង្កត់ធ្ងន់ថា សេដ្ឋកិច្ចនៅប្រទេសដែលមានប្រជាជនជាង 12.7 លាននាក់នេះ នៅតែមិនរីកចម្រើន ចាប់តាំងពីដណ្ដើមបានឯករាជ្យពីបារាំង កាលពីឆ្នាំ 1958៕

September 6, 2021

តាលីបង់ ចេញបទបញ្ជា បង្ខំឱ្យស្ត្រីគោរពច្បាប់សាសនាអ៊ីស្លាមដ៏តឹងរ៉ឹង

អាហ្វហ្គានីស្ថាន៖ ក្រុមកាន់អំណាច តាលីបង់ បានស្នើឱ្យនារីដែលកំពុងសិក្សានៅតាមសាកលវិទ្យាល័យឯកជន ប្រើប្រាស់កន្សែង niqab បិទមុខទុកតែភ្នែក ហើយសិក្សប្រុស និងសិស្សស្រី ត្រូវរៀនក្នុងបន្ទប់ដាច់ដោយឡែកពីគ្នា។

បទបញ្ជាដែលត្រូវបានធ្វើឡើងកាលពីចុងសប្ដាហ៍មុន បានហាមមិនឱ្យសិស្សប្រុស-ស្រី រៀនក្នុងបន្ទប់រួមគ្នា ឬយ៉ាងហោចក៏ត្រូវមានវាំងននឃាំងសិស្សប្រុស និងសិស្សស្រីដាច់ដោយឡែក។

គ្រូបង្រៀននៅក្នុងថ្នាក់រៀនដែលមានសិស្សស្រី គឺត្រូវតែជាអ្នកគ្រូ ឬលោកគ្រូដែលមានវ័យចំណាស់ប្រកបដោយ «ភាពចាស់ទុំ» ក្នុងករណីខ្វះគ្រូបង្រៀន។

ស្ត្រីអាហ្វហ្គានីស្ថាន ក្នុងសម័យ តាលីបង់ (1996-2001)

ក្នុងបទបញ្ជានោះ សិស្សស្រីត្រូវតែចេញពីថ្នាក់រៀនមុនសិស្សប្រុស 5 នាទី ចៀសវាងជួបមុខគ្នាពេលចេញក្រៅ។ សិស្សស្រីត្រូវតែអង្គុយរង់ចាំនៅក្នុងបន្ទប់រង់ចាំ រហូតដល់សិស្សប្រុសចេញអស់ពីសាលារៀន។

សាស្ត្រាចរ្យមួយរូបសុំមិនបញ្ចេញឈ្មោះ បាននិយាយថា៖ «ជាក់ស្ដែង នោះគឺជាបទបញ្ជាដែលបង្កការលំបាកច្រើន។ យើងមិនមានគ្រូបង្រៀន និងបន្ទប់រៀនគ្រប់គ្រាន់ដើម្បីបែងចែកសិស្សប្រុស និងសិស្សស្រី»។ ប៉ុន្តែ សាស្ត្រាចារ្យរូបនេះបន្ថែមថា ការដែល តាលីបង់ អនុញ្ញាតឱ្យស្ត្រីភេទទៅសាលារៀនគឺជា «ជំហានល្អមួយ»។

ក្នុងអំឡុងពេលកាន់អំណាច ចាប់ពីឆ្នាំ 1996 ដល់ 2001 តាលីបង់ បានអនុវត្តច្បាប់សាសនាអ៊ីស្លាម Sharia ដ៏តឹងរ៉ឹង ដោយបង្ខំឱ្យស្ត្រីត្រូវបិទមុខ មិនអនុញ្ញាតឱ្យស្ត្រីទៅរៀន និងមិនឱ្យចេញទៅខាងក្រៅផ្ទះបើសិនមិនមានញាតិជាបុរសដើរជាមួយ។ ប៉ុន្តែ ពេលនេះ តាលីបង់ បានអះអាងថា នឹងផ្លាស់ប្ដូរ ហើយសន្យាថាគោរពសិទ្ធិស្ត្រីនៅក្នុងក្របខណ្ឌច្បាប់សាសនាអ៊ីស្លាម បើទោះជាមនុស្សជាច្រើននៅតែមិនទុកចិត្តនឹងការសន្យានេះ។

ស្ត្រី អាហ្វហ្កានីស្ថាន ក្នុងសម័យគាំទ្រដោយ សហរដ្ឋអាមេរិក មានសិទ្ធិស្ទើរតែគ្រប់យ៉ាងក្នុងការងារសង្គម និងការរស់នៅ

មុនពេល តាលីបង់ បានឡើងកាន់អំណាចនៅ អាហ្វហ្គានីស្ថាន កាលពីថ្ងៃទី 15 សីហា ក្នុងអំឡុង 20 ឆ្នាំកន្លង អត្រានៃការចូលសិក្សានៅមហាវិទ្យាល័យនៃប្រទេសនេះ បានកើនឡើងគួរឱ្យកត់សម្គាល់ ពិសេសគឺសិស្សជាស្ត្រីភេទ។ ក្នុងអំឡុង អាហ្វហ្គានីស្ថាន ស្ថិតក្រោមការគាំទ្ររបស់ សហរដ្ឋអាមេរិក និងសម្ព័ន្ធមិត្ត ស្ត្រីនៅប្រទេសនេះក៏មានសិទ្ធិចូលរួមការស្រាវជ្រាវ និងចូលរួមកិច្ចពិភាក្សានានាជាមួយមិត្តរួមការងារជាបុរសផងដែរ៕

September 6, 2021

រដ្ឋប្រហារយោធានៅប្រទេស ហ្គីណេ! ប្រធានាធិបតី ត្រូវបានចាប់ខ្លួន

ហ្គីណេ (Guinea) ដែលជាប្រទេសមួយនៅទ្វីបអាហ្វ្រិកខាងលិច កំពុងប្រឈមនឹងវិបត្តិនយោបាយដ៏ធំ នៅពេលកងទ័ពប្រកាសធ្វើរដ្ឋប្រហារយោធា ចាប់ខ្លួនប្រធានាធិបតី និងរំសាយរដ្ឋាភិបាល។

«ក្រោយពីចាប់ខ្លួនប្រធានាធិបតី យើងសម្រេចរំសាយរដ្ឋាភិបាល» Mamadi Doumbouya មេបញ្ជាការកងកម្លាំងពិសេសក្នុងជួរកងទ័ពរបស់ ហ្គីណេ បានប្រកាសតាមកញ្ចក់ទូរទស្សន៍ជាតិ កាលពីម្សិលមិញដូច្នេះ។ Doumbouya ក៏បានប្រកាសថា ព្រំដែនគោក និងអាកាសរបស់ប្រទេសនេះ ក៏ត្រូវបានបិទផងដែរ។

បន្ទាប់ពីចូលកាន់កាប់ស្ថានីយទូរទស្សន៍ជាតិ កងកម្លាំងរបស់ Doumbouya បានសន្យាថា នឹងស្ការប្រជាធិបតេយ្យឡើងវិញ និងបានហៅខ្លួនឯងថាជា គណៈកម្មការបង្រួបបង្រួម និងអភិវឌ្ឍជាតិ។

យ៉ាងនេះក្ដី វរសេនីយឯក Doumbouya មិនបានឱ្យដឹងថា ប្រធានាធិបតី កំពុងស្ថិតនៅទីណានោះទេ បន្ទាប់ពីត្រូវបានចាប់ខ្លួន។

មូលហេតុនៃរដ្ឋប្រហារយោធានេះ ត្រូវបាន Doumbouya និយាយថា គឺដើម្បីផលប្រយោជន៍ជាតិ និងប្រជាជនជាង 12.7 លាននាក់នៅ ហ្គីណេ និងបានចោទប្រកាន់ប្រធានាធិបតី Conde ថា មិនបានប្រឹងប្រែងស្ដារសេដ្ឋកិច្ច ហើយស្ថានភាពប្រទេសជាតិមិនបានកែលម្អ ក្រោយ 72 ឆ្នាំដែលដណ្ដើមបានឯករាជ្យពីបារាំង។

September 6, 2021

តាលីបង់ ថា បន្ទាយចុងក្រោយរបស់ក្រុមប្រឆាំងដែលនៅសេសសល់ បានទទួលបរាជ័យ

ប្រភពព័ត៌មានពី តាលីបង់ បានប្រកាសថា ក្រុមនេះបានចូលកាន់កាប់ជ្រលងភ្នំ Panjshir ដែលជាបន្ទាយចុងក្រោយរបស់ រណសិរ្យតស៊ូជាតិ អាហ្វហ្គានីស្ថាន ប៉ុន្តែ ក្រុមប្រឆាំងនឹង តាលីបង់ បានច្រានចោលការប្រកាសនេះ។

ប្រភពព័ត៌មានចំនួនបី ពី តាលីបង់ បាននិយាយថា កងកម្លាំងនេះ កាលពីថ្ងៃទី 3 កញ្ញា បានគ្រប់គ្រងជ្រលងភ្នំ Panjshir ដែលស្ថិតនៅភាគខាងជើងរដ្ឋធានីកាប៊ុល បញ្ចប់ដំណាក់កាលវាយកាន់កាប់ប្រទេស អាហ្វហ្គានីស្ថាន ទាំងស្រុង។

«ដោយព្រះគុណពីព្រះអាល់ឡោះដ៏ខ្ពង់ខ្ពស់ យើងកំពុងគ្រប់គ្រង អាហ្វហ្គានីស្ថាន ទាំងស្រុង។ ក្រុមជនបង្កភាពវឹកវរ ត្រូវបានកម្ចាត់ ហើយ Panjshir បច្ចុប្បន្ន ស្ថិតក្រោមបញ្ជារបស់យើង» មេបញ្ជាការម្នាក់របស់ តាលីបង់ និយាយដូច្នេះ។

គណនី Facebook នានា កំពុងចែករំលែកព័ត៌មានអំពីបរាជ័យរបស់ រណសិរ្សតស៊ូជាតិ អាហ្វហ្គានីស្ថាន (NRFA) នៅ Panjshir ខណៈដែលស្នូរកំភ្លើងអបអរជ័យជំនះរបស់ តាលីបង់ ក៏កំពុងលាន់កងរំពងនៅពាសពេញរដ្ឋធានីកាប៊ុល។

ក៏ប៉ុន្តែ អតីតអនុប្រធានាធិបតី អាហ្វហ្គានីស្ថាន លោក Amrullah Saleh ដែលជាមេដឹកនាំកងទ័ព NRFA មួយរូប បានឱ្យដឹងថា កងកម្លាំងរបស់ខ្លួន មិនបានចុះចាញ់នោះឡើយ។

«ពិតហើយដែលថា យើងកំពុងស្ថិតក្នុងស្ថានភាពលំបាក។ យើងកំពុងត្រូវបាន តាលីបង់ វាយដណ្ដើមទឹកដី។ ប៉ុន្តែ យើងនៅតែប្រឹងប្រែងការពារខ្លួន និងតតាំងប្រឆាំងតបត» លោក Saleh ថ្លែងដូច្នេះ។

មេបញ្ជាការមួយចំនួនផ្សេងទៀតរបស់ក្រុម NRFA ក៏បានច្រានចោលព័ត៌មានដែលថា ជ្រលងភ្នំ Panjshir បានធ្លាក់ក្នុងដៃ តាលីបង់។ «ព័ត៌មានអំពីការប្រយុទ្ធដណ្ដើមគ្រប់គ្រង Panjshir កំពុងត្រូវបានចែករំលែកនៅលើប្រព័ន្ធផ្សព្វផ្សាយនៅ ប៉ាគីស្ថាន។ នោះគឺជារឿងកុហក» Ahmad Massoud មេដឹកនាំសង្គ្រាមប្រឆាំង តាលីបង់ នៅ Panjshir អះអាងដូច្នេះ។

មុននោះ មានព័ត៌មានផ្សាយថា មានមនុស្សស្លាប់ និងរបួសជាច្រើននាក់ បន្ទាប់ពីមានការប្រយុទ្ធគ្នានៅជ្រលងភ្នំ Panjshir។ Panjshir គឺជាតំបន់ដែលត្រូវបានកងកម្លាំងប្រឆាំង តាលីបង់ NRFA យកមកធ្វើជាបន្ទាយ និងទឹកដីចុងក្រោយសម្រាប់តតាំងនឹង តាលីបង់។ កំពូលភ្នំទាំងឡាយដែលព័ទ្ធជុំវិញជ្រលងភ្នំ Panjshir គឺឧបសគ្គធំដែលរារាំងរាល់កម្លាំងទាំងឡាយណាដែលចង់វាយដណ្ដើមកាន់កាប់តំបន់នេះ៕

September 4, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 04 ខែកញ្ញា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 03 កញ្ញា ឆ្នាំ 2021 រួមមាន៖ – ឆ្លងថ្មី = 422 នាក់, – ជាសះស្បើយថ្មី = 376 នាក់, – ស្លាប់ថ្មី = 13 នាក់។

គិតត្រឹមព្រឹកថ្ងៃទី 04 ខែកញ្ញា ឆ្នាំ 2021 តួលេខ COVID-19 សរុប នៅ កម្ពុជា រួមមាន៖ – ឆ្លងសរុប = 94,839 នាក់, – ជាសះស្បើយសរុប = 90,273 នាក់ និង – អ្នកស្លាប់សរុប = 1,950 នាក់។

តួលេខ COVID-19 នៅទូទាំងពិភពលោក គិតមកដល់ថ្ងៃនេះ រួមមាន៖ – អ្នកឆ្លងសរុប= 220,647,541 នាក់, – អ្នកជាសះស្បើយ= 197,149,966 នាក់, – អ្នកស្លាប់= 4,567,424 នាក់ និងកំពុងព្យាបាល = 18,930,151 នាក់៕

September 4, 2021

គុយបា ចាក់វ៉ាក់សាំង COVID-19 ដល់កុមារចាប់ពីអាយុ 2 ឆ្នាំឡើងទៅ

អាជ្ញាធរប្រទេសគុយបា បានចាប់ផ្ដើមយុទ្ធនាការចាក់វ៉ាក់សាំងបង្ការ COVID-19 ដល់កុមារចាប់ពីអាយុ 2 ឆ្នាំឡើងទៅ ដែលនេះគឺជាគន្លឹះមួយដើម្បីអាចបើកដំណើរការសាលារៀនឡើងវិញ នៅខែតុលាខាងមុខ។

កុមារ និងពលរដ្ឋដែលមានអាយុចាប់ពី 2 ឆ្នាំ ដល់ 18 ឆ្នាំ នឹងត្រូវបានចាក់វ៉ាក់សាំងមួយក្នុងចំណោមពីរប្រភេទដែលអភិវឌ្ឍដោយប្រទេសគុយបា នោះគឺវ៉ាក់សាំង Abdala និង Soberana ក្នុងនោះ ក្រុមគោលដៅដែលមានវ័យចាប់ពី 12 ដល់ 18 ឆ្នាំ នឹងត្រូវបានចាក់មុន បន្ទាប់មកគឺក្រុមកុមារវ័យក្រោម 12 ឆ្នាំ។

យុទ្ធនាការចាក់វ៉ាក់សាំងនេះត្រូវបានធ្វើឡើងក្នុងគ្រាដែលតួលេខអ្នកឆ្លង COVID-19 នៅ គុយបា បានកើនដល់ជាង 672,000 នាក់ និងស្លាប់ជាង 5,500 នាក់។

វីរុសបំប្លែងខ្លួនថ្មី Delta កំពុងរាតត្បាតប្រទេសកោះដែលមានប្រជាជន 11.2 លាននាក់នេះ។ ជិតពាក់កណ្ដាលក្នុងចំណោមជាង 5,500 នាក់ដែលបានស្លាប់ និងជិត 1/3 នៃករណីឆ្លងសរុបនៅ គុយបា ត្រូវបានរកឃើញនៅក្នុងខែសីហាកន្លងទៅ។

សាលារៀនស្ទើរតែទាំងអស់នៅ គុយបា បានបិទទ្វារចាប់ពីខែមីនា ឆ្នាំ 2020 ហើយសិស្សត្រូវតាមដានមេរៀនតាមរយៈទូរទស្សន៍ជាតិ។ ឆ្នាំសិក្សាថ្មីរបស់ គុយបា នឹងចាប់ផ្ដើមពីថ្ងៃទី 6 កញ្ញា ប៉ុន្តែ សិស្សសាលារបស់ប្រទេសនេះនឹងត្រូវបន្តរៀនពីចម្ងាយរហូតដល់ពួកគេបានទទួលការចាក់វ៉ាក់សាំងបង្ការ COVID-19 គ្រប់គ្នា។

រដ្ឋាភិបាល គុយបា ឱ្យដឹងថា ពួកគេមានផែនការបើកដំណើរការសាលារៀនឡើងវិញជាបណ្ដើរៗចាប់ពីខែតុលាតទៅ បន្ទាប់ពីយុទ្ធនាការចាក់វ៉ាក់សាំងដល់កុមារ និងក្មេងជំទង់បានបញ្ចប់៕

September 4, 2021

Category: អន្តរជាតិ