អន្តរជាតិ - La Reine Media

អតីតប្រធានាធិបតីនៃប្រទេសហ្សកហ្ស៊ី ត្រូវបានប៉ូលិសចាប់ខ្លួន

លោក Saakashvili អតីតប្រធានាធិបតីនៃ ប្រទេសហ្សកហ្ស៊ី ត្រូវបានក្រុមប៉ូលិស ចាប់ខ្លួនភ្លាមៗ បន្ទាប់ពីលោកត្រលប់មកប្រទេសកំណើតវិញ ដោយសារលោកធ្លាប់ត្រូវបានកាត់ទោសកំបាំងមុខឱ្យជាប់ពន្ធនាគាររយៈពេល 6 ឆ្នាំ ទាក់ទិននឹងទោសរំលោភអំណាច។

«ប្រធានាធិបតីទីបីរបស់ ប្រទេសហ្សកហ្ស៊ី លោក Mikheil Saakashvili ថ្ងៃនេះ ត្រូវបានចាប់ខ្លួន និងបញ្ជូនទៅកាន់ពន្ធនាគារ» នាយករដ្ឋមន្ត្រី Irakli Garibashvili បានប្រាប់អ្នកយកព័ត៌មាននា រដ្ឋធានី ប៊ីលីស៊ី (Tbilisi) កាលពីថ្ងៃទី 1 តុលា។ ក្នុងវីដេអូមួយ ដែលត្រូវបានបញ្ចេញដោយក្រសួងមហាផ្ទៃ ហ្សកហ្ស៊ី បង្ហាញថា លោក Saakashvili ញញឹម ខណៈដែលដៃជាប់ខ្នោះ ហើយត្រូវប៉ូលិសបញ្ជូនចូលទៅខាងក្នុងពន្ធនាគារ។

លោក Saakashvili កំពុងស្ថិតក្នុងពន្ធនាគារក្នុងទីរួមស្រុក Rustavi ដែលមានចម្ងាយ 30 គីឡូម៉ែត្រ ពី រដ្ឋធានី Tbilisi។ មន្ត្រីការពារសិទ្ធិមនុស្សរបស់ ហ្សកហ្ស៊ី លោក Nino Lomjaria បានទៅសួរសុខទុក្ខលោក Saakashvili នៅក្នុងពន្ធនាគារ ហើយបានឱ្យដឹងថា អតីតប្រធានាធិបតីរូបនេះ កំពុងធ្វើកូដកម្មអត់អាហារ។

មុននេះ គូប្រជែងនានារបស់លោក Saakashvili នៅក្នុងបក្សសុបិនហ្សកហ្ស៊ី (Georgian Dream) បានព្រមានថា អតីតប្រធានាធិបតីនឹងត្រូវបានចាប់ខ្លួន និងជាប់ពន្ធនាគារ 6 ឆ្នាំ បើសិនជាត្រលប់មកប្រទេស ក្រោយពីត្រូវបានកាត់ទោសកំបាំងមុខកាលពីឆ្នាំ 2018។ ប្រធានាធិបតី ហ្សកហ្ស៊ី លោក Salome Zurabishvili ដែលជាគូប្រជែងរបស់ Saakashvili បានឱ្យដឹងថា ខ្លួននឹងមិនលើកលែងទោសឱ្យអតីតប្រធានាធិបតីរូបនេះជាដាច់ខាត។

លោក Saakashvili ដែលជាប្រធានាធិបតីនៃប្រទេស ហ្សកហ្ស៊ី ចាប់ពីឆ្នាំ 2004-2007 និង 2008-2013 នៅតែទទួលបានការគាំទ្រយ៉ាងច្រើនពីប្រជាជន។ លោក បានអំពាវនាវដល់អ្នកគាំទ្រ ឱ្យចេញធ្វើបាតុកម្មនៅ រដ្ឋធានីប៊ីលីស៊ី ក្នុងថ្ងៃទី 3 តុលា។

អតីតប្រធានាធិបតីរូបនេះ ត្រូវបានកាត់ទោសកំបាំងមុខ ពីបទរំលោភតួនាទីកាលពីឆ្នាំ 2018 និងជាប់ពន្ធនាគារ 6 ឆ្នាំ។ ប៉ុន្តែ Saakashivili បានបដិសេធ ដោយចោទថា ជារឿងនយោបាយ។ ការចាប់ខ្លួនលោក Saakashivili ត្រូវបានក្រុមអ្នកវិភាគព្យាករថា នឹងបង្កឱ្យមានភាពវឹកវរ នៅក្នុងប្រទេសដែលធ្លាប់ស្ថិតក្រោម សហភាពសូវៀត មួយនេះ៕

October 2, 2021

យន្តហោះយោធាចិន រាប់សិបគ្រឿង ទៅបំភ័យ កោះតៃវ៉ាន់ ក្នុងថ្ងៃតែមួយ

ប្រទេសចិន បានបញ្ជូនយន្តហោះចម្បាំង យន្តហោះទម្លាក់គ្រាប់បែក និងយន្តហោះឈ្លបយកការណ៍សរុបចំនួន 38 គ្រឿង ទៅក្បែរដែនកោះតៃវ៉ាន់ នៅក្នុងមួយថ្ងៃ ដែលនេះគឺជាតួលេខច្រើនបំផុតមិនធ្លាប់មានពីមុនមក។

ស្ថាប័នការពារកោះតៃវ៉ាន់ កាលពីជិតពាក់កណ្ដាលយប់នៃថ្ងៃទី 1 តុលា បានប្រកាសនៅលើទំព័រ Twitter ថា ក្រុមយន្តហោះយោធាចិន រួមមាន យន្តហោះចម្បាំង J-16 ចំនួន 10 គ្រឿង, យន្តហោះទម្លាក់គ្រាប់បែក H-6 ចំនួន 2 គ្រឿង និងយន្តហោះព្រមានរហ័ស Kj-500 ចំនួន 1 គ្រឿង ហោះចូលក្បែរ កោះតៃវ៉ាន់ នៅក្នុងពេលយប់។

បណ្ដាយន្តហោះចម្បាំង J-16 អមដំណើរហោះហើររបស់យន្តហោះទម្លាក់គ្រាប់បែក H-6 បានហោះទៅដល់តំបន់ភាគអាគ្នេយ៍នៃ កោះតៃវ៉ាន់ ខណៈដែលយន្តហោះព្រមានរហ័ស KJ-500 ធ្វើសកម្មភាពក្បែរប្រជុំកោះ Pratas ដែលគ្រប់គ្រងដោយ តៃវ៉ាន់។

នេះគឺជាលើកទីពីរហើយ ដែល ប្រទេសចិន បញ្ជូនក្រុមយន្តហោះយោធា ចូលទៅក្បែរ កោះតៃវ៉ាន់ នៅក្នុងអំឡុងពេលតែមួយថ្ងៃ។ មុននេះ យន្តហោះយោធារបស់ ចិន មួយក្រុម បានចូលទៅកាន់តំបន់កំណត់អត្តសញ្ញាណការពារដែនអាកាស (ADIZ) របស់ កោះតៃវ៉ាន់ នៅល្ងាចថ្ងៃទី 1 តុលា ផងដែរ។ យន្តហោះទាំងនេះ រួមមាន យន្តហោះចម្បាំង J-16 ចំនួន 18 គ្រឿង, Su-30 ចំនួន 4 គ្រឿង, យន្តហោះទម្លាក់គ្រាប់បែក H-6 ចំនួន 2 គ្រឿង និងយន្តហោះប្រមាញ់នាវាមុជទឹក Y-8 ចំនួន 1 គ្រឿង។

ប្រជុំកោះ Pratas ឬ ហៅថា កោះ Dongsha (ក្នុងរង្វង់មូល)

យន្តហោះខាងលើ ហោះជុំវិញតំបន់ចន្លោះ កោះតៃវ៉ាន់ និងប្រជុំកោះ Pratas ហើយក្រោយមកក៏ត្រលប់ទៅកាន់ ចិនដីគោក។ នេះបើតាមស្ថាប័នការពារជាតិរបស់ កោះតៃវ៉ាន់។

តៃវ៉ាន់ បានបញ្ជូនយន្តហោះចម្បាំងជាច្រើនគ្រឿងទៅបណ្ដេញយន្តហោះយោធារបស់ ចិន ទន្ទឹមនឹងនេះក៏បានដំណើរការប្រព័ន្ធមីស៊ិលការពារដែនអាកាស ដើម្បីត្រៀមបាញ់ទម្លាក់យន្តហោះ ចិនដីគោក ទាំងនោះផងដែរ។

ការដែល ប្រទេសចិន បញ្ជូនយន្តហោះយោធារបស់ខ្លួនចំនួន 38 គ្រឿង ទៅបំភ័យ តៃវ៉ាន់ នៅក្នុងថ្ងៃតែមួយនេះ គឺជាប្រការដែលមិនធ្លាប់មានពីមុនមក។ សកម្មភាពនេះក៏ត្រូវបានធ្វើឡើងនៅក្នុងថ្ងៃដែល ប្រទេសចិន ប្រារព្ធពិធីគម្រប់ខួប 72 ឆ្នាំ នៃទិវាឯករាជ្យជាតិ។

ក្រសួងការពារជាតិរបស់ ប្រទេសចិន មិនទាន់បញ្ចេញមតិអ្វីជុំវិញការបញ្ជូនយន្តហោះយោធាដ៏ច្រើនទៅក្បែរ តៃវ៉ាន់ នៅឡើយ។ ប៉ុន្តែ កន្លងមក ក្រសួងនេះធ្លាប់បានអះអាងថា ការហោះហើរទៅក្បែរ កោះតៃវ៉ាន់ គឺដើម្បីការពារអធិបតេយ្យ បូរណភាពទឹកដី ទន្ទឹមនឹងនេះមានបំណងសំដៅលើសកម្មភាព «សមគំនិតគ្នា» របស់ក្រុមមន្ត្រីនៃ កោះតៃវ៉ាន់ ជាមួយនឹង សហរដ្ឋអាម៉េរិក ផងដែរ ដែលជាអ្នកនៅពីក្រោយ កោះតៃវ៉ាន់៕

October 2, 2021

«Putin ប្រើប្រាស់សម្រស់ស្រីស្អាត ដាក់អន្ទាក់ស្នេហ៍លើ Trump»! សៀវភៅរបស់អតីតលេខានៅសេតវិមាន សរសេរដូច្នេះ

អតីតជំនួយការផ្នែកសារព័ត៌មានប្រចាំសេតវិមាន យល់ថា Putin មានចេតនាជ្រើសរើសនារីបកប្រែដ៏ស្រស់ស្អាតមួយរូប នៅពេលជួបពិភាក្សាជាមួយលោក Trump កាលពីឆ្នាំ 2019 ប៉ុន្តែ ភាគី រុស្ស៊ី បានបដិសេធការចោទប្រកាន់នេះ។

Daria Boyarskaya អាយុ 36 ឆ្នាំ ជាស្រីស្អាតដែលមានសក់ពណ៌ប្រផេះ និងដងខ្លួនដ៏ទាក់ទាញ បង្ហាញវត្តមាននៅក្នុងរូបថតនៃជំនួបរវាង ប្រធានាធិបតីរុស្ស៊ី លោក Vladimir Putin និងលោក Donald Trump ដែលកាលណោះគឺជា ប្រធានាធិបតីអាម៉េរិក នៅក្រៅក្របខ័ណ្ណនៃកិច្ចប្រជុំកំពូល G20 នាទីក្រុង Osaka ប្រទេសជប៉ុន កាលពីឆ្នាំ 2019។

នៅក្នុងអារម្ភកថានៃសៀវភៅដែលនឹងចេញលក់នៅថ្ងៃទី 05 តុលា និងមានចំណងជើងថា «ពេលនេះខ្ញុំនឹងឆ្លើយនឹងសំនួររបស់អ្នក» អតីតលេខាផ្នែកសារព័ត៌មាននៅសេតវិមាន Stephanie Grisham បានឱ្យដឹងថា Fiona Hill ដែលកាលណោះគឺជាមន្ត្រីទទួលបន្ទុកលើបញ្ហាស្ដីពី រុស្ស៊ី និង អឺរ៉ុប ប្រចាំក្រុមប្រឹក្សាសន្តិសុខជាតិ សហរដ្ឋអាម៉េរិក បានសម្ដែងការមន្ទិល នៅពេលឃើញ Boyarskaya បង្ហាញខ្លួននៅក្នុងព្រឹត្តិការណ៍។

នាង Daria Boyarskaya បង្ហោះរូបថតដើម្បីអបអរឆ្នាំថ្មី កាលពីថ្ងៃទី 31 ធ្នូ 2020

«នៅពេលជំនួបបានចាប់ផ្ដើម Fliona Hill ផ្អៀងខ្លួនងាកមកសួរខ្ញុំថា មានចាប់អារម្មណ៍អ្នកបកប្រែរបស់ Putin ឬទេ។ នាងនោះមានសក់ពណ៌ប្រផេះដ៏ទាក់ទាញ រង្វង់មុខស្រស់សោភាមានមន្តស្នេហ៍ និងដងខ្លួនដ៏អស្ចារ្យ» Grisham សរសេរដូច្នេះ។ «លោកស្រីបន្តនិយាយជាមួយខ្ញុំថា លោកស្រីសង្ស័យថា Putin ជ្រើសរើសអ្នកបកប្រែនេះដើម្បីធ្វើឱ្យ ប្រធានាធិបតីអាម៉េរិក ញាប់ញ័រ»។

អធិប្បាយតបនឹងព័ត៌មានដែលលើកឡើងដោយ Grisham លោក Dmitry Peskov អ្នកនាំពាក្យរបស់ប្រធានាធិបតី Putin បានច្រានចោលការចោទប្រកាន់ដែលថា នារីបកប្រែ Boyarskaya គឺជា «អាវុធសម្រស់» ដែលប្រើប្រាស់សំដៅលើ Trump។

Daria Boyarskaya (ទីពីរ រាប់ពីឆ្វេង) នៅក្នុងជំនួបរវាង លោក Trump និងលោក Putin នៅ ជប៉ុន កាលពីឆ្នាំ 2019

«អ្នកបកប្រែ ត្រូវបានជ្រើសរើសដោយក្រសួងការបរទេស ដោយយោងទៅតាមការស្នើរបស់វិមានក្រឹមឡាំង។ លោក Putin មិនបានចូលរួមក្នុងការជ្រើសរើសអ្នកបកប្រែនោះទេ» សារព័ត៌មាន East2West ដកស្រង់សម្ដីរបស់ Peskov ចុះផ្សាយដូច្នេះ។

ស្រីស្អាត Boyarskaya បានបញ្ចប់ការសិក្សានៅសាលាបណ្ដុះបណ្ដាលអ្នកបកប្រែ St.Peterburg ហើយនាងក៏ជាអ្នករបាំ salsa និង bachata ផងដែរ។

ស្រីស្អាត Boyarskaya ក៏ជាអ្នករបាំ salsa និង bachata ផងដែរ

លោក Trump កាលពីថ្ងៃទី 29 កញ្ញា បានរិះគន់ដល់ការបោះពុម្ភសៀវភៅរបស់ Grisham ដោយបាននិយាយថា អតីតលេខាសារព័ត៌មាននៃសេតវិមានរូបនេះ បាន «ខឹងខ្លាំង» ក្រោយពីបញ្ចប់មុខនាទីនៅក្នុងរដ្ឋការរបស់លោក។

«នាងជាប់ទាក់ទិននឹងបញ្ហាធ្ងន់ធ្ងរជាច្រើនដែលយើងយល់ថា នាងគួរតែដោះស្រាយដោយខ្លួនឯង។ ពេលនេះ ដូចទៅនឹងមនុស្សដទៃ នាងយកប្រាក់ពីម្ចាស់រោងពុម្ភឆ្វេងនិយមជ្រុល ដើម្បីនិយាយអំពីរឿងមិនល្អ និងប្រឌិត» លោក Trump អះអាងការពារខ្លួនដូច្នេះ៕

October 1, 2021

ស្ដេចប្រដាល់របស់ ហ្វ៊ីលីពីន ឈរឈ្មោះជាបេក្ខភាពប្រធានាធិបតីជាផ្លូវការ

កំពូលអ្នកប្រដាល់ដែលទើបតែចូលនិវត្តន៍ លោក Manny Pacquiao បានក្លាយជាមនុស្សដំបូងគេដែលដាក់ពាក្យឈរឈ្មោះជាបេក្ខភាពប្រធានាធិបតីរបស់ ប្រទេសហ្វ៊ីលីពីន សម្រាប់អាណត្តិថ្មី។

«អាទិភាពរបស់ខ្ញុំគឺ ការដោះស្រាយបញ្ហាវិបត្តិ COVID-19 ដើម្បីអាចស្ដារសេដ្ឋកិច្ចឡើងវិញ» លោក Pacquiao ថ្លែងនៅចំពោះមុខក្រុមអ្នកកាសែតនាថ្ងៃនេះ នៅពេលរួមដំណើរជាមួយភរិយា និងសហការី Lito Atienza ទៅដាក់ពាក្យឈរឈ្មោះជាផ្លូវការដើម្បីក្លាយជាបេក្ខភាពសម្រាប់ការបោះឆ្នោតជ្រើសរើសប្រធានាធិបតី ហ្វ៊ីលីពីន ដែលនឹងត្រូវបានធ្វើឡើងនៅខែឧសភា ឆ្នាំ 2022។

នៅតាមបណ្ដោយផ្លូវឆ្ពោះទៅកាន់ការិយាល័យទទួលឯកសារឈរឈ្មោះបោះឆ្នោតនៅ រដ្ឋធានីម៉ានិល លោក Pacquiao ទទួលបានការគាំទ្រ ការស្រែកហ៊ោលើកទឹកចិត្តពីហ្វូងមនុស្ស ក្នុងនោះមានអ្នកខ្លះលើកបដាដែលសរសេរថា «ឆ្ពោះទៅមុខ Pacman» ។ល។ Pacman គឺជាសហ័សនាមរបស់ស្ដេចប្រដាល់រូបនេះ។

លោក Pacquiao មានអាយុ 42 ឆ្នាំ បានឱ្យដឹងថា លោកមិនយកចិត្តទុកដាក់នឹងលទ្ធផលនៃការស្ទង់មតិសាធារណជន ដែលបានបង្ហាញថា លោកឈរលំដាប់ទីបួននោះទេ។ លោកបន្ថែមថា៖ «សំឡេងរបស់អ្នកក្រ មិនត្រូវបានគេស្ដាប់»។

ស្ដេចប្រដាល់រូបនេះ ធ្លាប់ក្លាយជាជើងឯកផ្នែកប្រដាល់ពិភពលោករហូតដល់ 8 លើក ដោយឈ្នះ 56 ប្រកួត, ចាញ់ 3 ប្រកួត និងស្មើ 2 ប្រកួត

លទ្ធផលនៃការស្ទង់មតិថ្មី ដែលត្រូវបានធ្វើឡើងចំពោះជនជាតិហ្វ៊ីលីពីន ចំនួន 2,400 នាក់ បង្ហាញថា អត្រានៃការគាំទ្រចំពោះ Pacquiao បានកើនពី 8% ឡើងដល់ 12% ប៉ុន្តែ នៅតែឈរលំបាប់ទីបួន។ បុគ្គលនាំមុខគេនៅក្នុងលទ្ធផលនៃការស្ទង់មតិនេះគឺ Sara Duterte ដែលជាអភិបាលក្រុង Davao និងជាកូនស្រីរបស់ប្រធានាធិបតី Rodrigo Duterte ដោយមានអត្រាគាំទ្រ 20%។

ស្ដេចប្រដាល់របស់ ហ្វ៊ីលីពីន បានចូលប្រលូកក្នុងវិស័យនយោបាយចាប់ពីឆ្នាំ 2010 ក្នុងនាមជាតំណាងរាស្ត្រ មុនពេលត្រូវបានបោះឆ្នោតចូលសភាជាន់ខ្ពស់។ លោក Pacquiao ទទួលបានការស្រលាញ់ចូលចិត្តខ្លាំងនៅ ហ្វ៊ីលីពីន ដោយសារតែមានសន្ដានចិត្តល្អ និងប្រឹងប្រែងរលាស់ខ្លួនចេញពីភាពក្រីក្រ និងក្លាយជាអ្នកប្រដាល់ដែលមានទ្រព្យច្រើនជាងគេមួយរូបនៅក្នុងពិភពលោក។ ស្ដេចប្រដាល់រូបនេះ ធ្លាប់ក្លាយជាជើងឯកផ្នែកប្រដាល់ពិភពលោករហូតដល់ 8 លើក ដោយឈ្នះ 56 ប្រកួត, ចាញ់ 3 ប្រកួត និងស្មើ 2 ប្រកួត។

ក្រោយពីយល់ព្រមតាមសំណើធ្វើជាបេក្ខភាពប្រធានាធិបតីរបស់ក្រុមដែលលោកដឹកនាំនៅក្នុងបក្សកាន់អំណាច PDP-Laban កាលពីថ្ងៃទី 19 កញ្ញា Pacquiao បានសន្យាថា ប្រឆាំងនឹងអំពើពុករលួយនៅក្នុងរដ្ឋាភិបាល។ ស្ដេចប្រដាល់រូបនេះ កាលពីថ្ងៃទី 29 កញ្ញា បានប្រកាសចូលនិវត្តន៍ ដើម្បីផ្ដោតការយកចិត្តទុកដាក់ទៅលើយុទ្ធនាការឃោសនាបោះឆ្នោត។

ក្រុមអ្នកវិភាគអះអាងថា ស្នាដៃ និងជោគជ័យនៅក្នុងវិស័យប្រដាល់ រួមនឹងគោលដៅប្រឆាំងភាពក្រីក្រ និងអំពើពុករលួយ អាចជាប្រធានបទស្នូលនៅក្នុងយុទ្ធនាការឃោសនារកសំឡេងឆ្នោតនាពេលខាងមុខ របស់ Paquiao៕

October 1, 2021

«ពិធីរៀបអភិសេក» របស់រាជវង្ស លើកដំបូងនៅ ប្រទេសរុស្ស៊ី ក្រោយរយៈពេលមួយសតវត្សរ៍

(រុស្ស៊ី)-ពិធីរៀបអភិសេករបស់សមាជិកជំនាន់ក្រោយនៃរាជវង្សរុស្ស៊ី នឹងត្រូវបានធ្វើឡើងនៅអតីតរាជធានី St.Petersburg (Saint Petersburg) ដែលបច្ចុប្បន្នគឺជាទីក្រុងកំពង់ផែរបស់ រុស្ស៊ី ដែលនេះគឺជារបត់ថ្មីមួយ និងជាពិធីអភិសេករបស់រាជវង្ស រុស្ស៊ី លើកដំបូងបង្អស់ ក្នុងរយៈពេលជាងសតវត្សរ៍មកនេះ។

មហាឧបរាជ George Mikhailovich Romanov នឹងរៀបអភិសេកជាមួយគូដណ្ដឹងជាជនជាតិអ៊ីតាលី ឈ្មោះ Victoria Romanovna (Bettarini) នៅឯវិហារ St. Isaac នៅទីក្រុង St.Petersburg នាថ្ងៃទី 01 ខែតុលា។ ពិធីរៀបអភិសេកនេះ ត្រូវបានរៀបចំយ៉ាងម៉ត់ចត់ និងមានការអញ្ជើញភ្ញៀវបរទេសរាប់រយនាក់ផងដែរ។

«នេះគឺជាកន្លែងដំបូងនៅ ប្រទេសរុស្ស៊ី ដែលយើងបានត្រលប់មកវិញ» George Mikhailovich Romanov អាយុ 40 ឆ្នាំ ប្រាប់សារព័ត៌មាន Fontanka.ru អំពីការជ្រើសរើស St.Petersburg ដើម្បីធ្វើពិធីរៀបការ។ «ទីនេះនៅជិតគ្រួសារ»។

George Mikhailovich Romanov ចាប់កំណើតនៅ ប្រទេសអេស្ប៉ាញ។ ម្ដាយរបស់លោកគឺ ព្រះនាង Maria Vladimirovna ដែលធ្លាប់បានប្រកាសដោយអង្គឯងថាជារាជទាយាទនៅ រុស្ស៊ី ចំណែកឪពុករបស់លោកគឺជាមហាឧបរាជ Mikhail Pavlovich។ ជីវិតរបស់លោក George Mikhailovich Romanov ភាគច្រើន រស់នៅ ប្រទេសបារាំង និង អេស្ប៉ាញ។

តាទួតរបស់ George Mikhailovich គឺមហាឧបរាជ Kirill Vladimirovich បានទៅកាន់ ប្រទេសហ្វាំងឡង់ កាលពីឆ្នាំ 1917 ហើយក្រោយមកក៏បាននាំគ្រួសារទៅរស់នៅក្នុងតំបន់អឺរ៉ុបខាងលិច។

George Mikhailovich ត្រលប់មកលេង ប្រទេសរុស្ស៊ី លើកដំបូងកាលពីឆ្នាំ 1992 ហើយបច្ចុប្បន្នរស់នៅក្នុង រដ្ឋធានីមូស្គូ ជាទីដែលលោកដឹកនាំគម្រោងមនុស្សធម៌មួយចំនួន។

កូនក្រមុំ Bettarini អាយុ 39 ឆ្នាំ បានចូលសាសនាគ្រិស្តអថូដុករុស្ស៊ី កាលពីឆ្នាំ 2020 និងប្រើប្រាស់ឈ្មោះ Victoria Romanvna។

ស្ដេចចុងក្រោយបង្អស់របស់ ប្រទេសរុស្ស៊ី គឺព្រះអង្គម្ចាស់ Nicholas II រួមនឹងមហេសី និងបុត្រ 5 អង្គ ត្រូវបានកងទ័ពបដិវត្តប្រហារជីវិតនៅក្នុងបន្ទប់ក្រោមដីរបស់គ្រួសារអ្នកជំនួញម្នាក់នៅ Yekaterinburg ជាទីក្រុងដែលមានចម្ងាយប្រហែល 1,450 គីឡូម៉ែត្រ ពី រដ្ឋធានីមូស្គូ កាលពីខែកក្កដា ឆ្នាំ 1918។

រាជវង្ស Romanov គ្រប់គ្រង ប្រទេសរុស្ស៊ី អស់រយៈពេល 300 ឆ្នាំ មុនពេលស្ដេច Nicholas II ដាក់រាជកាលពីឆ្នាំ 1917។ វិហារសាសនាគ្រិស្តអថូដុក របស់ រុស្ស៊ី (Russian Orthodox Church) បានតែងតាំងស្ដេច Nicholas II ជាអាទិទេពមួយអង្គ កាលពីឆ្នាំ 2000៕

October 1, 2021

រដ្ឋធានីឡាហាវ៉ាន់ (Havana) បើកដំណើរការឆ្នេរសមុទ្រ និងអាងហែលទឹកមួយចំនួនឡើងវិញហើយ

នាថ្ងៃទី 30 កញ្ញា ឆ្នេរសមុទ្រ និងអាងហែលទឹកទាំងឡាយនៅ រដ្ឋធានីឡាហាវ៉ាន របស់ ប្រទេសគុយបា ក៏ដូចជាមហាវិថី El Malecon ដ៏ល្បីល្បាញ នៅក្បែរឆ្នេរសមុទ្រ ត្រូវបានបើកទ្វារទទួលអ្នកទេសចរណ៍ឡើងវិញ ក្រោយបិទទ្វារអស់រយៈពេល 9 ខែ ដោយសារតែ COVID-19។

សារព័ត៌មានគុយបា ដកស្រង់ប្រកាសផ្លូវការរបស់អភិបាលក្រុងឡាហាវ៉ាន លោក Reynaldo Garcia ឱ្យដឹថា បណ្ដាឆ្នេរសមុទ្រ និងអាងហែលទឹក ត្រូវបានអនុញ្ញាតឱ្យបើកដំណើរការ 50% នៃលទ្ធភាព ប៉ុន្តែ ត្រូវធានាអនុវត្តគ្រប់ជំហាននៃវិធានការទប់ស្កាត់ និងប្រឆាំង COVID-19។ អ្នកទេសចរណ៍ដែលស្ថិតនៅលើតំបន់ឆ្នេរសមុទ្រ និងអាងហែលទឹកនានា ត្រូវតែពាក់ម៉ាសជាកំហិត។ ក្រៅពីនេះ អាជ្ញាធរក៏បានអនុញ្ញាតឱ្យពលរដ្ឋដើរហាត់ប្រាណនៅទីសាធារណៈផងដែរ។

កាលពីសប្ដាហ៍មុន អាជ្ញាធរគុយបា ក៏បានអនុញ្ញាតឱ្យភោជនីយដ្ឋាន ក្លឹបកម្សាន្ត និងទីតាំងសាធារណៈនានាដែលនៅក្នុងខេត្តចំនួន 8/15 របស់ប្រទេសនេះ បើកទ្វារឡើងវិញ ប៉ុន្តែ ក៏ត្រូវកាត់បន្ថយសកម្មភាព។

រដ្ឋាភិបាលគុយបា បានឱ្យដឹងថា ប្រទេសនេះនឹងបើកទ្វារព្រំដែនសម្រាប់ទទួលភ្ញៀវទេសចរណ៍បរទេស ចាប់ពីថ្ងៃទី 15 វិច្ឆិកា ខណៈសាលារៀននឹងត្រូវបើកឡើងវិញនៅក្នុងខែតុលា និងវិច្ឆិកា។

ការសម្រេចខាងលើនេះ ត្រូវបានអាជ្ញាធរពន្យល់ថា ដោយសារតែតួលេខនៃករណីឆ្លង COVID-19 បានថយចុះជាបន្តបន្ទាប់នៅក្នុងរយៈពេល 8 ខែកន្លងទៅ ក៏ដូចជាមានការរីកចម្រើននៅក្នុងយុទ្ធនាការចាក់វ៉ាក់សាំង។

គុយបា កំពុងតែប្រឹងប្រែងបង្កើនល្បឿនដើម្បីសម្រេចបានគោលដៅចាក់វ៉ាក់សាំងឱ្យបានជាង 90% នៃចំនួនប្រជាជនសរុប នៅពាក់កណ្ដាលខែវិច្ឆិកាខាងមុខ ដោយប្រើប្រាស់វ៉ាក់សាំងក្នុងស្រុក។ បច្ចុប្បន្ន រដ្ឋធានីឡាហាវ៉ាន ចាក់វ៉ាក់សាំងជូនពលរដ្ឋបានជាង 70% នៃគោលដៅសរុប។ កាលពីដើមខែនេះ គុយបា ក៏បានស្នើឱ្យអង្គការសុខភាពពិភពលោក (WHO) ចាប់ផ្ដើមវាយតម្លៃ និងទទួលស្គាល់វ៉ាក់សាំងដែលប្រទេសនេះបានអភិវឌ្ឍដោយផ្ទាល់៕

September 30, 2021

មេទ័ពចិន ណាត់ជាមួយទ័ពអាម៉េរិក៖ «ជួបគ្នានៅលើអាកាស បើមិនខ្លាច»

មេបញ្ជាការរងនៃកងទ័ពអាកាសចិន អះអាងថា ប្រទេសនេះមានសមត្ថភាព និងជឿជាក់នៅក្នុងការការពារខ្លួន ទន្ទឹមនឹងនេះ លោកក៏បានណាត់ជួបកងទ័ពអាម៉េរិក នៅលើអាកាសផងដែរ បើសិនជាមិនភ័យខ្លាច។

«ថ្មីៗនេះ សមាសភាគីរបស់ខ្ញុំម្នាក់មកពីប្រទេសធំមួយ ប្រកាសថា ចង់ធ្វើឱ្យប្រទេសចិន ភ័យខ្លាច» មេបញ្ជាការរងកងទ័ពអាកាសចិន លោក Wang Wei និយាយដូច្នេះនៅក្នុងព្រឹត្តិការណ៍តាំងពិព័រណ៍អាកាសចរណ៍ចិនលើកទី 13 «The 13th China International Aviation and Aerospace Exhibition» ឬហៅថា Airshow China 2021 កាលពីថ្ងៃទី 29 កញ្ញា។

«ប្រទេសចិន មានសមត្ថភាពគ្រប់គ្រាន់ និងជឿជាក់ក្នុងការការពារសន្តិសុខជាតិ ព្រមទាំងការពារទឹកដីទាំងមូល ទន្ទឹមនឹងការរួមចំណែកសម្រាប់សន្តិភាពរបស់ពិភពលោក» ឧត្តមសេនីយ Wang Wei អះអាងដូច្នេះ។ «ខ្ញុំចង់និយាយថា បើសិនជាពួកគេមិនភ័យខ្លាចនៅចំពោះមុខសមត្ថភាពរបស់កងទ័ពចិនទេ នោះចូរយើងជួបគ្នានៅលើអាកាស»។

យន្តហោះគ្មានមនុស្សបើក (UAV) របស់ ចិន នៅក្នុងពិព័រណ៍យន្តហោះ ចិន 2021

ការអធិប្បាយរបស់មេទ័ពចិនរូបនេះ ទំនងជាត្រូវបានធ្វើឡើងដើម្បីឆ្លើយតបនឹងការប្រកាសរបស់លេខាធិការនៃកងទ័ពអាកាស សហរដ្ឋអាម៉េរិក Frank Kendall កាលពីខែសីហា ដែលបាននិយាយថា អាម៉េរិក ត្រូវតែឈានមុខគេជាមួយនឹងបច្ចេកវិទ្យាលំដាប់កំពូល ដែលអាច «ធ្វើឱ្យ ចិន ខ្លបខ្លាច»។ លោក Kendall ទទួលស្គាល់ថា កម្មវិធីធ្វើទំនើបកម្មយោធារបស់ ចិន ដំណើរការលឿនជាងការព្យាកររបស់ អាម៉េរិក។

អាម៉េរិក និង ចិន ត្រូវបានគេមើលឃើញថា កំពុងប្រណាំងប្រជែងគ្នា ក្នុងការធ្វើទំនើបកម្មសព្វាវុធ។ ប្រទេសចិន កាលពីខែសីហា បានឱ្យដឹងថា បានបាញ់សាកល្បងមីស៊ីលរយៈចម្ងាយខ្លីចំនួន 2 គ្រាប់ ដែលត្រូវបានអភិវឌ្ឍឡើងដើម្បីកម្ទេចប្រព័ន្ធទំនាក់ទំនងរបស់សត្រូវ។

លេខាធិការនៃកងទ័ព សហរដ្ឋអាម៉េរិក លោក Kendall កាលពីថ្ងៃទី 13 សីហា បានអះអាងថា ការដែល ចិន ធ្វើទំនើបកម្មយោធា ពិតជាជះឥទ្ធិពលដល់សន្តិសុខរបស់ អាម៉េរិក។ លោក Kendall ក៏បានលើកឡើងអំពីកម្មវិធីអាវុធទំនើបរបស់ អាម៉េរិក ដែលអាចកំញើញដល់សត្រូវ ក្នុងនោះមានដូចជា យន្តហោះទម្លាក់គ្រាប់បែក B-21 និង យន្តហោះចម្បាំងបំបាំងកាយ F-35 ផងដែរ៕

September 30, 2021

ក្រុមបងធំអុកឡុកពន្ធនាគារ បណ្ដាលឱ្យមនុស្សស្លាប់ 100 នាក់! អ្នកខ្លះត្រូវគេកាត់ក្បាល!

(អេក្វាទ័រ)-ហេតុការណ៍ប្រយុទ្ធគ្នាយ៉ាងសាហាវរវាងក្រុមបងធំនៅក្នុងពន្ធនាគារ Guayaqui បណ្ដាលឱ្យមានអ្នកស្លាប់យ៉ាងតិច 100 នាក់ និងរបួស 52 នាក់។

SNAI ដែលជាស្ថាប័នគ្រប់គ្រងពន្ធនាគាររបស់ ប្រទេសអេក្វាទ័រ កាលពីថ្ងៃទី 29 កញ្ញា បានឱ្យដឹងថា ហេតុការណ៍ប្រយុទ្ធគ្នារវាងអ្នកទោសដែលមានកាំភ្លើង និងគ្រាប់បែកដៃ កើតឡើងនៅក្នុងបរិវេណរបស់ពន្ធនាគារ Guayaqui។ ជម្លោះនេះត្រូវបានគេជឿថា មានជាប់ទាក់ទងនឹងក្រុមបងធំគ្រឿងញៀននៅ ប្រទេសម៉ិកស៊ិក ក្នុងនោះមានក្រុម Sinaloa និងក្រុម Jalisco។

«មនុស្សជាង 100 នាក់បានស្លាប់ និង 52 នាក់រងរបួស» SNAI បង្ហោះនៅលើ Twitter ដូច្នេះ ខណៈដែលក្រុមមន្ត្រីបានឱ្យដឹងថា មនុស្សយ៉ាងតិច 6 នាក់ ក្នុងចំណោមអ្នកស្លាប់ 100 នាក់ ត្រូវបានគេកាត់ក្បាល។ សមត្ថកិច្ចយ៉ាងតិច 2 នាក់ ក៏រងរបួស នៅក្នុងការដណ្ដើមគ្រប់គ្រងពន្ធនាគារឡើងវិញ។

អ្នកទោសប្រយុទ្ធគ្នាដោយប្រើកាំភ្លើង និងគ្រាប់បែកដៃ

ប្រធានាធិបតី Gullermo Lasso ប្រកាសថា នឹងអនុញ្ញាតឱ្យប្រើកម្លាំងបាយដើម្បីស្ដារស្ថិរភាព។ លោកថា នឹងដឹកនាំគណៈកម្មការសន្តិសុខមួយនៅ Guayaquil ដើម្បីគ្រប់គ្រងស្ថានការណ៍អាសន្ន ប៉ុន្តែ ធានា «សិទ្ធិមនុស្សដល់គ្រប់គ្នាដែលជាប់ពាក់ព័ន្ធ»។

ប្រព័ន្ធពន្ធនាគារនៅ អេក្វេទ័រ បានក្លាយជា «សមរភូមិ» របស់អ្នកទោសរាប់ពាន់នាក់ដែលជាប់ទាក់ទិននឹងក្រុមបងធំគ្រឿងញៀននៅ ប្រទេសម៉ិកស៊ិក។ កាលពីថ្ងៃទី 23 កុម្ភៈ ប្រទេសអេក្វាទ័រ ក៏កើតមានហេតុការណ៍ប្រយុទ្ធគ្នានៅក្នុងពន្ធនាគារចំនួន 4 ក្នុងនោះក៏មាន Guayaquil ផងដែរ ដែលបានធ្វើឱ្យមនុស្សចំនួន 79 នាក់ បាត់បង់ជីវិត ហើយអ្នកទោសខ្លះក៏មានអ្នកត្រូវគេកាត់ក្បាល។

យោងតាមអង្គការគាំពារសិទ្ធិមនុស្ស តាំងពីយូរមកហើយ ប្រព័ន្ធពន្ធនាគារនៅ ប្រទេសអេក្វាទ័រ បានប្រឈមនឹងស្ថានភាពលើសចំណុះ ខណៈដែលចំនួនបុគ្គលិកសន្តិសុខគ្រប់គ្រងពន្ធនាគារក៏នៅមានកម្រិត មិនអាចគ្រប់គ្រងអ្នកទោសបានល្អ។ ស្ថាប័នការពារសិទ្ធិមនុស្សបានអំពាវនាវឱ្យ រដ្ឋាភិបាលអេក្វាទ័រ បង្កើនចំនួនបុគ្គលិកផ្នែកសន្តិសុខនៅពន្ធនាគារ និងអនុវិធានការត្រួតពិនិត្យឱ្យមានប្រសិទ្ធភាពដើម្បីទប់ស្កាត់សកម្មភាពនាំចូលអាវុធខុសច្បាប់ និងសកម្មភាពរបស់បណ្ដាញឧក្រិដ្ឋជន នៅខាងក្នុងពន្ធនាគារ៕

September 30, 2021

លោកស្រី Merkel អបអរមេដឹកនាំបក្សប្រឆាំង ដែលបានជាប់ឆ្នោត

(អាល្លឺម៉ង់)-នាយករដ្ឋមន្ត្រីនៃ ប្រទេសអាល្លឺម៉ង់ លោកស្រី Angela Merkel ផ្ញើសារអបអរសាទរដល់ប្រធានគណបក្សសង្គមប្រជាធិបតេយ្យអាល្លឺម៉ង់ (Social Democratic Party of Germany/SPD) លោក Olaf Scholz បន្ទាប់ពីដណ្ដើមបានជោគជ័យក្នុងការបោះឆ្នោតជ្រើសរើសនាយករដ្ឋមន្ត្រី កាលពីថ្ងៃទី 27 កញ្ញាកន្លងទៅ ដែលព័ត៌មាននេះ ត្រូវបានប្រកាសកាលពីថ្ងៃទី 29 កញ្ញា ដោយការិយាល័យរដ្ឋាភិបាលអាល្លឺម៉ង់។

Armin Laschet ជាប្រធាន និងជាបេក្ខភាពនាយករដ្ឋមន្ត្រីនៃបក្សសហភាពប្រជាធិបតេយ្យគ្រិស្តសាសនិកនៃអាល្លឺម៉ង់ (Christian Democratic Union of Germany) ដែលជាបក្សរបស់លោកស្រី Merkel បានផ្ញើសារអបអរជ័យជំនះក្នុងការបោះឆ្នោតរបស់ SPD ផងដែរ។

ក្រៅពីនេះ ក៏នៅមានអ្នកនយោបាយសំខាន់ៗជាច្រើនផ្សេងទៀត ដែលបានអបអរសាទរដល់លោក Scholz ក្នុងនោះក៏មានលោក Markus Soder ប្រធានបក្ស Christian Social Union នៃរដ្ឋ Bavaria ដែលនេះ បានបង្ហាញអំពីការបែកបាក់កាន់តែធ្ងន់ធ្ងររវាងបណ្ដាសម្ព័ន្ធមិត្តរបស់ Laschet។

យោងតាមលទ្ធផលនៃការរាប់សន្លឹកឆ្នោតបឋមកាលពីថ្ងៃទី 27 កញ្ញា បក្ស SPD ដណ្ដើមបានជ័យជំនះ ដោយមានសំឡេងគាំទ្រ 25.7% ខ្ពស់ជាង CDU ដែលមាន 24.1%។ លទ្ធផលនៃការរាប់សន្លឹកឆ្នោតផ្លូវការ តាមគម្រោង នឹងត្រូវបានប្រកាសនៅប៉ុន្មានសប្ដាហ៍ខាងមុខ។

ដោយសារតែមិនទទួលបានសំឡេងគាំទ្រលើសពី 50% បក្ស SPD របស់លោក Scholz នឹងត្រូវចាប់ផ្ដើមចរចាបង្កើតសម្ព័ន្ធមិត្តជាមួយបក្សផ្សេង ដើម្បីអាចបង្កើតរដ្ឋាភិបាលថ្មី។ ចំណែកបក្ស CDU របស់លោក Laschet ក៏មិនទាន់ចុះចាញ់ដែរ ដោយបញ្ជាក់ថានឹងប្រឹងប្រែងបង្កើតសម្ព័ន្ធមិត្តថ្មី ជាមួយនឹងបក្សប្រជាធិបតេយ្យសេរី (FDP) និង បក្សបៃតង Alliance 90/The Greens ដើម្បីបង្កើតរដ្ឋាភិបាល។ បក្សបៃតង ឈរលំដាប់ទីបីនៅក្នុងការបោះឆ្នោតជាតិ ដោយទទួលបានសំឡេងគាំទ្រ 14.8%។

លទ្ធផលនៃការបោះឆ្នោតនេះគឺជាការខកចិត្តដ៏ធំរបស់លោកស្រី Merkel ដែលលោកស្រីធ្លាប់បានដឹកនាំ ប្រទេសអាល្លឺម៉ង់ ឆ្លងផុតវិបត្តិហិរញ្ញវត្ថុសកល, វិបត្តិបំណុលសាធារណៈ, វិបត្តិជនចំណាកស្រុក និងការប្រយុទ្ធប្រឆាំងនឹង COVID-19 ក្នុងរយៈពេល 16 ឆ្នាំ នៃការកាន់អំណាចរបស់ខ្លួន។

លោកស្រី Markel ថ្មីៗនេះ បានប្រឈមនឹងការរិះគន់ច្រើន ទាក់ទិននឹងបញ្ហា «ខ្វះការគិតគូរ» ក្នុងការប្រឈមមុខដាក់ រុស្ស៊ី, ចិន និងបញ្ហាលទ្ធិជាតិនិយម ដែលបានកើនឡើងនៅ ប្រទេសអាល្លឺម៉ង់៕

September 30, 2021

អាម៉េរិក បង្កើតក្រុមនាវាពិឃាដ ជំនាញក្នុងការប្រមាញ់នាវាមុជទឹករបស់ រុស្ស៊ី

កងទ័ពជើងទឹករបស់ សហរដ្ឋអាម៉េរិក បង្កើតក្រុមប្រយុទ្ធថ្មីមួយ ដែលរួមមានទាំងក្រុមនាវាពិឃាត ជំនាញខាងតាមប្រមាញ់នាវាមុជទឹករបស់ ប្រទេសរុស្ស៊ី ក្នុងបំណងការពារប្រទេសជាតិឱ្យបានល្អជាងមុន នៅចំពោះមុខការគំរាមកំហែងនានាផ្នែកសន្តិសុខលើផ្ទៃសមុទ្រ។

ក្រុមទទួលខុសត្រូវ Greyhound នឹងរួមមានទាំងនាវាពិឃាតដែលមានជំនាញខាងប្រមាញ់នាវាមុជទឹក មកពីកងនាវាអាត្លង់ទិក ដែលបោះទ័ពនៅឆ្នេរខាងកើតរបស់ សហរដ្ឋអាម៉េរិក ដោយមានលទ្ធភាពទប់ទល់នឹងការគំរាមកំហែងក្នុងរយៈពេលខ្លី។ នេះបើតាមការឱ្យដឹងពី ឧត្តមនាវីទោ Brendan McLane មេបញ្ជាការកងទ័ពជើងទឹកប្រចាំមហាសមុទ្រអាត្លង់ទិក។

ឧត្តមនាវីខាងលើបញ្ជាក់ថា មូលហេតុដែលនាំឱ្យមានការបង្កើតក្រុមថ្មីនេះ ក៏ដោយសារតែ «គូប្រជែងសំខាន់របស់យើង បានដាក់ពង្រាយ និងបន្តធ្វើទំនើបកម្មប្រកបដោយភាពបត់បែន និងសក្ដានុពល នាំឱ្យប្រទេសជាតិរបស់យើង ប្រឈមនឹងគ្រោះថ្នាក់»។ លោកបន្តថា ក្រុម Greyhound នេះ នឹងពង្រីកសមត្ថភាពលេចធ្លោរបស់កងទ័ព ដោយការអភិវឌ្ឈជំនាញជាយុទ្ធសាស្ត្រក្នុងការប្រមាញ់នាវាមុជទឹក និងប្រើប្រាស់ក្រុមអ្នកជំនាញដើម្បីដឹកនាំសង្គ្រាមប្រមាញ់នាវាមុជទឹក។

លោក McLane ឱ្យដឹងថា បើសិនជានាវាបរទេសរុលចូលដល់តំបន់ធ្វើដែលក្រុម Greyhound កំពុងធ្វើសកម្មភាព ភ្លាមនោះនាវាពិឃាដ 2 គ្រឿងរបស់ក្រុមនេះនឹងត្រៀមជាស្រេចសម្រាប់ទប់ទល់។ នាវាពិឃាដ USS Thomas Hudner និង USS Donald Cook ត្រូវបានជ្រើសរើសឱ្យបំពេញភារកិច្ចនេះ ដោយសារមានបទពិសោធន៍ច្រើនក្នុងការប្រមាញ់នាវាមុជទឹក។ នាវាពិឃាដ USS Cole និង USS Gravely តាមផែនការ ក៏នឹងត្រូវចូលរួមជាមួយក្រុម Greyhound នេះដែរ។

នាវាមុជទឹករបស់ រុស្ស៊ី Boreas តែ NATO ដាក់ឈ្មោះឱ្យថា Borei

កងទ័ពជើងទឹក អាម៉េរិក បានទទួលស្គាល់ថា នាវាមុជទឹករបស់ រុស្ស៊ី ច្រើនឆ្នាំមកនេះ កាន់តែធ្វើសកម្មភាពនៅក្នុងតំបន់សមុទ្រចន្លោះ ហ្គ្រីនឡែន-អ៊ីស្លង់-អង់គ្លេស ដែលស្ថិតនៅភាគខាងជើងនៃមហាសមុទ្រអាត្លន់ទិក៕

September 29, 2021

Category: អន្តរជាតិ