អន្តរជាតិ - La Reine Media

ចន្ទ្រគ្រាសដែលមានរយៈពេលវែងបំផុតក្នុងអំឡុងជិត 600 ឆ្នាំ នឹងកើតឡើងសប្ដាហ៍ក្រោយ

ចន្ទ្រគ្រាសនេះនឹងកើតឡើងនៅថ្ងៃទី 18 ឬ 19 វិច្ឆិកា ហើយអាចមើលឃើញនៅតំបន់ជាច្រើនក្នុងពិភពលោក រួមមាន ទ្វីបអាម៉េរិក អូស្ត្រាលី អឺរ៉ុប និងទ្វីបអាស៊ី។

យោងតាមស្ថិតិនៃការស្រាវជ្រាវរបស់ទីភ្នាក់ងារអវកាសអាម៉េរិក NASA គិតពីឆ្នាំ 2001 ដល់ឆ្នាំ 2100 ចន្ទ្រគ្រាសដែលនឹងកើតឡើងនៅសប្ដាហ៍ក្រោយនេះនឹងជាចន្ទ្រគ្រាសមួយផ្នែកដែលយូរជាងគេបង្អស់ក្នុងរយៈពេលមួយសតវត្សរ៍ ដោយវានឹងអូសបន្លាយពេលរហូតដល់ 3 ម៉ោង 28 នាទី និង 23 វិនាទី។ វាក៏នឹងយូរជាងឆ្ងាយ បើធៀបនឹងចន្ទ្រគ្រាសទាំងស្រុងដែលយូរជាងគេបំផុតក្នុងមួយសតវត្សរ៍ ដែលបានកើតឡើងកាលពីឆ្នាំ 2018 ជាមួយពេលវេលា 1 ម៉ោង និង 43 នាទី។ យោងតាមស្ថានីយតារាសាស្ត្រ Holcomb នៅរដ្ឋ Indiana សហរដ្ឋអាម៉េរិក នេះក៏ជាចន្ទគ្រាសមួយផ្នែកដែលយូរជាងគេក្នុងអំឡុង 580 ឆ្នាំផងដែរ។

ចន្ទ្រគ្រាសនេះនឹងចាប់ផ្ដើមកើតឡើងនៅវេលាម៉ោង 14 និង 19 នាទី ហើយឡើងដល់កម្រិតកំពូលនៅវេលាម៉ោងប្រហែល 16 រួចបញ្ចប់នៅម៉ោង 17 និង 47 នាទី ថ្ងៃទី 19 វិច្ឆិកា (ម៉ោងនៅភ្នំពេញ)។ ក្នុងព្រឹត្តិការណ៍ចន្ទ្រគ្រាសលើកនេះ ស្រមោលរបស់ផែនដីនឹងគ្របដណ្ដប់លើព្រះចន្ទស្ទើរតែទាំងស្រុង (97%)។

អ្នកដែលចូលចិត្តវិស័យតារាសាស្ត្រនៅតំបន់ជាច្រើនក្នុងទ្វីបអាម៉េរិក អូស្ត្រាលី ទ្វីបអឺរ៉ុប និងទ្វីបអាស៊ី អាចគយគន់ចន្ទ្រគ្រាសលើកនេះនៅថ្ងៃទី 18 វិច្ឆិកា ឬ 19 វិច្ឆិកា ដោយពេលវេលាជាក់ស្ដែងគឺអាស្រ័យទៅតាមតំបន់។

ព្រឹត្តិការណ៍ចន្ទ្រគ្រាសកើតឡើងនៅពេលផែនដីគោចរទៅដល់ចន្លោះព្រះអាទិត្យ និងព្រះចន្ទ។ ពេលនោះ ស្រមោលផែនដីនឹងជះទៅលើព្រះចន្ទ។ ផែនដីអាចបាំងពន្លឺព្រះអាទិត្យដែលចាំងទៅលើព្រះចន្ទមួយផ្នែក ឬទាំងស្រុង ដែលបណ្ដាលឱ្យផ្ទៃព្រះចន្ទត្រូវងងឹត៕

November 12, 2021

ស្ថាបនិករបស់ WikiLeaks ត្រូវបានអនុញ្ញាតឱ្យរៀបការក្នុងពន្ធនាគារ

Julian Assange ដែលជាស្ថាបនិករបស់គេហទំព័រ WikiLeaks ត្រូវបានក្រុមមន្ត្រីនៃប្រទេសអង់គ្លេស អនុញ្ញាតឱ្យធ្វើពិធីរៀបការជាមួយមិត្តស្រី Stella Morris នៅក្នុងពន្ធនាគារ Belmarsh។

«ខ្ញុំមានអារម្មណ៍ធូរស្រាលក្នុងចិត្ត និងមានសង្ឃឹមថា អាពាហ៍ពិពាហ៍របស់ពួកយើងនឹងមិនជួបឧបសគ្គអ្វីទៀតទេ» Stella Morris បានប្រាប់សារព័ត៌មាន PA របស់ អង់គ្លេស កាលពីថ្ងៃទី 11 វិច្ឆិកា។

អ្នកនាំពាក្យនៃស្ថាប័នគ្រប់គ្រងពន្ធនាគាររបស់ អង់គ្លេស ឱ្យដឹងថា លិខិតស្នើសុំរៀបការក្នុងពន្ធនាគាររបស់ស្ថាបនិក WikiLeaks ត្រូវបានទទួលយក និងចាត់ការដូចករណីធម្មតា។ Morris មិនទាន់ប្រកាសថ្ងៃរៀបមង្គលការនៅឡើយ។

Assange និង Morris បានស្គាល់គ្នាក្នុងអំឡុងស្ថាបនិក WikiLeaks កំពុងជ្រកកោននៅក្នុងស្ថានទូតប្រទេសអេក្វាឌ័រ នៅទីក្រុងឡុងដ៍។ ពួកគេមានកូនពីរនាក់ដែលសុទ្ធតែមានសញ្ញាអង់គ្លេស។

Assange បានលាក់ខ្លួនក្នុងស្ថានទូត អេក្វាឌ័រ នៅទីក្រុងឡុងដ៍អស់រយៈពេល 5 ឆ្នាំ ដើម្បីគេចពីដីកាធ្វើបត្យាប័នត្រលប់ទៅកាន់ប្រទេសស៊ុយអែត ដោយត្រូវបានចោទប្រកាន់ពីបទរំលោភផ្លូវភេទ។ Assange យល់ថា រឿងក្ដីនេះគឺគ្រាន់តែជាការបិទបាំងដើម្បីអាចនាំខ្លួនលោកទៅទទួលទោសនៅ សហរដ្ឋអាម៉េរិក ប៉ុណ្ណោះ ទាក់ទិននឹងសកម្មភាពកាលពីច្រើនឆ្នាំមុនរបស់ WikiLeaks។

តុលាការរបស់ អង់គ្លេស កាលពីខែមករា បានបដិសេធសំណើរបស់ សហរដ្ឋអាម៉េរិក ដែលចង់នាំខ្លួន Assange ទៅកាត់ទោស។ បច្ចុប្បន្ន Assange កំពុងរង់ចាំសេចក្ដីសម្រេចរបស់តុលាការកំពូល៕

November 12, 2021

សហរដ្ឋអាម៉េរិក ប្រកាសថា នឹង «បញ្ចេញស្នាដៃ» បើសិន កោះតៃវ៉ាន់ រងការវាយប្រហារ

រដ្ឋមន្ត្រីការបរទេស Blinken ប្រកាសថា សហរដ្ឋអាម៉េរិក រួមជាមួយនឹងសម្ព័ន្ធមិត្ត នឹងចាត់ការ បើសិនជា ប្រទេសចិន ប្រើកម្លាំងបាយក្នុងការផ្លាស់ប្ដូរស្ថានការណ៍នៅ តៃវ៉ាន់ ប៉ុន្តែ មិនបានលើកឡើងលម្អិតនោះទេ។

«មានប្រទេសជាច្រើននៅក្នុង និងក្រៅតំបន់ ចាត់ទុកថា រាល់សកម្មភាពឯកតោភាគីដែលប្រើប្រាស់កម្លាំងបាយដើម្បីបំផ្លាញស្ថានការណ៍បច្ចុប្បន្នគឺជាការគំរាមកំហែងធ្ងន់ធ្ងរដល់សន្តិភាព សន្ដិសុខ» រដ្ឋមន្ត្រីការបរទេសសហរដ្ឋអាម៉េរិក Antony Blinken ថ្លែងដូច្នេះកាលពីម្សិលមិញ នៅពេលត្រូវបានសួរថា តើ សហរដ្ឋអាម៉េរិក អាចចូលរួមការពារ តៃវ៉ាន់ ដែរទេ បើសិនត្រូវ ចិនដីគោក វាយប្រហារ។

លោក Blinken បន្ថែមថា៖ «ពួកគេក៏ដូចជា សហរដ្ឋអាម៉េរិក នឹងបញ្ចេញសកម្មភាព បើសិនបញ្ហានោះកើតឡើង» ប៉ុន្តែ មន្ត្រីរូបនេះមិនបានលើកឡើងសេចក្ដីលម្អិតថា ប្រទេសនេះ និងសម្ព័ន្ធមិត្តនឹងធ្វើអ្វីខ្លះនៅក្នុងសេណារីយោ «ចិន វាយប្រហារ តៃវ៉ាន់»។

ប្រកាសរបស់លោក Blinken ត្រូវបានលើកឡើងនៅមុនជំនួបកំពូលរវាងប្រធានាធិបតីអាម៉េរិក Joe Biden និងប្រធានាធិបតីចិន Xi Jinping ដែលត្រូវបានគេជឿថា នឹងធ្វើឡើងនៅសប្ដាហ៍ក្រោយ។ នេះនឹងជាជំនួបដំបូងរវាងមេដឹកនាំទាំងពីរ បន្ទាប់ពីលោក Joe Biden ឡើងកាន់អំណាច។

កាលពីខែមុន ប្រធានាធិបតី Biden ក៏ធ្លាប់បានថ្លែងដូចលោក Blinken ដែលប្រការនេះគឺផ្ទុយទៅនឹងគោលនយោបាយតាំងពីយូរមកហើយរបស់ សហរដ្ឋអាម៉េរិក ដែលទទួលស្គាល់ប្រទេសចិនតែមួយ។

ប្រទេសចិន តែងចាត់ទុក កោះតៃវ៉ាន់ ជាផ្នែកមួយនៃទឹកដីរបស់ខ្លួនដែលរង់ចាំតែថ្ងៃបម្រួបបម្រួមប៉ុណ្ណោះ ហើយថា នឹងប្រើកម្លាំងទ័ពបើសិនជាចាំបាច់៕

November 11, 2021

ប្រជាជនឥណ្ឌា ងូតទឹកទន្លេទេពដែលគ្របដណ្ដប់ដោយពពុះពុលក្នុងពិធីបុណ្យសាសនា (វីដេអូ)

ពលរដ្ឋឥណ្ឌា ដែលកាន់សាសនាហិណ្ឌូ នាំគ្នាទៅងូតទឹកទន្លេ Yamuna ដើម្បីសម្ដែងអំណរគុណដល់ព្រះអាទិត្យ បើទោះជាផ្ទៃទឹកទន្លេគ្របដណ្ដប់ដោយពពុះមានជាតិពុល ដោយសារតែទឹកសំណល់មិនទាន់ឆ្លងកាត់ប្រព័ន្ធប្រព្រឹត្តកម្ម។

ពពុះទឹកមានផ្ទុកជាតិពុល គ្របដណ្ដប់លើផ្ទៃទឹកទន្លេ Yamuna ជាច្រើនកន្លែងដែលហូរឆ្លងកាត់រដ្ឋធានី New Delhi របស់ប្រទសឥណ្ឌា កាលពីថ្ងៃទី 9 វិច្ឆិកា ភាគច្រើនត្រូវបានគេយល់ថា កើតឡើងដោយសារទឹកសំណល់ឧស្សាហកម្មខុសច្បាប់ ហើយទឹកមានផ្ទុកជាតិពុលមិនទាន់ឆ្លងកាត់ប្រព័ន្ធប្រព្រឹត្តកម្មទឹកកខ្វក់។ នេះបើតាមសកម្មជនបរិស្ថាន Varun Gulati។

យោងតាម Gulati រោងចក្រកាត់ដេរ ដែលស្ទើរតែទាំងអស់ត្រូវបានបង្កើតឡើងដោយមិនស្របច្បាប់នៅក្នុងតំបន់ប្រជុំជននៅរដ្ឋធានី កំពុងបញ្ចេញទឹកសំណល់ពុលចូលទៅក្នុងបណ្ដារោងចក្រប្រព្រឹត្តកម្មទឹកកខ្វក់ច្រើនជាងកម្រិតអនុញ្ញាត ហើយការរំលោភបំពាននៅតែបន្តដោយមិនទាន់ត្រូវបានត្រួតពិនិត្យ និងគ្រប់គ្រងឱ្យបានល្អ។

ពពុះពុលត្រូវបានគេដឹងច្រើននៅពេលក្រុមអ្នកកាន់សាសនាហិណ្ឌូ ចុះលុបលាងខ្លួនក្នុងទឹកទន្លេ Yamuna នៅក្នុងពិធីបុណ្យ Chhath Puja ដែលជាបុណ្យអំណរគុណព្រះអាទិត្យដែលបានបង្កើតជីវិតនៅលើផែនដី។ ពួកគេងូតទឹក និងបួងសួងនៅកណ្ដាលលំហូរពពុះទឹកពណ៌សក្បុស ហាក់បីដូចជាកំពុងស្ថិតនៅលើពពក នៅលើអាកាស។

របាយការណ៍មួយរបស់រដ្ឋាភិបាលឥណ្ឌា កាលពីឆ្នាំ 2020 បានឱ្យដឹងថា គុណភាពទឹកនៅក្នុងទន្លេ Yamuna កាន់តែអាក្រក់ទៅៗនៅក្នុងរយៈពេល 5 ឆ្នាំកន្លង៕

November 11, 2021

សហរដ្ឋអាម៉េរិក សម្រេចបន្តអនុវត្តបទបញ្ជារបស់ Trump ដែល «ហាមការវិនិយោគទៅលើបណ្ដាក្រុមហ៊ុនចិន»

សហរដ្ឋអាម៉រិក នឹងបន្តរក្សាបម្រាមលើការវិយោគទៅក្នុងក្រុមហ៊ុនចិនមួយចំនួនដែលទីក្រុង វ៉ាស៊ីងតោន យល់ថា ជាកម្មសិទ្ធិ ឬមានទំនាក់ទំនងជាមួយនឹងកងទ័ពរំដោះប្រជាជនចិន។

ប្រធានាធិបតីសហរដ្ឋអាម៉េរិក និងបក្សប្រជាធិបតេយ្យ បាននិយាយថា លោក Joe Biden នឹងបន្តអនុវត្តការរឹតបន្តឹងនៅក្នុងបទបញ្ជាដែលបានដាក់ចេញដោយអតីតប្រធានាធិបតី សហរដ្ឋអាម៉េរិក លោក Donald Trump កាលពីខែវិច្ឆិកា 2020។

បទបញ្ជានេះ ដើមឡើយត្រូវបានបង្កើតឡើងដើម្បីទប់ស្កាត់បណ្ដាក្រុមហ៊ុនវិនិយោគរបស់ សហរដ្ឋអាម៉េរិក មូលនិធិសោធននិវត្តន៍ និងស្ថាប័នផ្សេងៗ ទិញមូលបត្របំណុលរបស់ក្រុមហ៊ុនចិន ដែលត្រូវបានមន្ទីរបញ្ចកោណកំណត់ថា មានជាប់ទាក់ទងនឹងកងទ័ពចិន។

ប្រធានាធិបតី Biden កាលពីខែមិថុនា ធ្លាប់បានកែសម្រួលបញ្ហាមួយចំនួនដែលត្រូវបានចាត់ទុកថាជា «កំហុសឆ្គងផ្នែកច្បាប់» នៅក្នុងបទបញ្ជានាសម័យលោក Trump ដោយស្នើឱ្យក្រសួងហិរញ្ញវត្ថុអាម៉េរិក អនុវត្ត និងធ្វើបច្ចុប្បន្នភាពបញ្ជីឈ្មោះថ្មីដែលមានក្រុមហ៊ុនចំនួន 59 ជំនួសឱ្យបញ្ជីឈ្មោះមុននោះពីមន្ទីរបញ្ចកោណ។ ក្នុងបញ្ជីឈ្មោះនេះ មានទាំងក្រុមហ៊ុនផលិតឈីបលំដាប់កំពូលរបស់ចិន SMIC និងក្រុមហ៊ុនប្រេង CNOOC ផងដែរ។

ក្រុមប្រកាន់តឹងចំពោះចិនដីគោក នៅទីក្រុង វ៉ាស៊ីងតោន បានសាទរ នៅពេលប្រធានាធិបតី Biden សម្រេចបន្តអនុវត្តបទបញ្ជា ប៉ុន្តែ ពួកគេនៅតែរិះគន់រដ្ឋបាលរបស់លោក Biden ដោយសារតែមិនទាន់បានបន្ថែមក្រុមហ៊ុនចិនណាមួយចូលក្នុងបញ្ជីឈ្មោះថ្មី បន្ទាប់ពីមានការកែសម្រួលកាលពីខែមិថុនា៕

November 10, 2021

NASA ពន្យារពេលនាំមនុស្សត្រលប់ទៅកាន់ឋានព្រះចន្ទ ក្នុងបេសកកម្ម Artemis

ប្រធានអង្គការ NASA កាលពីថ្ងៃទី 9 វិច្ឆិកា បានឱ្យដឹងថា ជើងហោះហើរនាំមនុស្សឡើងទៅកាន់ឋានព្រះចន្ទជាលើកដំបូងក្រោយរយៈពេល 50 ឆ្នាំ នឹងមិនអាចធ្វើទៅបានមុនឆ្នាំ 2055 ឡើយ។

ប្រការនេះមានន័យថា បេសកកម្ម Artemis 3 ត្រូវបានពន្យារពេលយ៉ាងតិចមួយឆ្នាំ ធៀបនឹងថ្ងៃកំណត់ដំបូងដែលរដ្ឋាភិបាលរបស់អតីតប្រធានាធិបតី Donald Trump បានដាក់ចេញ។ មូលហេតុដែលនាំឱ្យមានការពន្យារពេលនេះ កើតឡើងដោយសារបញ្ហាផ្លូវច្បាប់ ទាក់ទិននឹងកិច្ចសន្យាក្នុងការអភិវឌ្ឍយានចុះចតលើឋានព្រះចន្ទ។

ថ្មីៗនេះ ក្រុមហ៊ុន Blue Origin របស់មហាសេដ្ឋី Jeff Bezos បានដាក់ពាក្យប្ដឹង ដោយយល់ថា NASA និងរដ្ឋាភិបាល «លម្អៀង» ទៅរក SpaceX ទាក់ទិននឹងការប្រគល់កិច្ចសន្យាអភិវឌ្ឍប្រព័ន្ធបាញ់បង្ហោះ និងចុះចត។ ប៉ុន្តែ ក្រោយមក NASA បានឈ្នះក្ដី។

«យើងខាតពេលអស់ជិត 7 ខែ ដោយសាររឿងក្ដី ហើយប្រការនេះបានធ្វើឱ្យបេសកកម្មចុះចតដំបូងរបស់មនុស្ស លើឋានព្រះចន្ទ (រាប់ចាប់ពីឆ្នាំ 1972) ត្រូវថយទៅក្រោយឆ្នាំ 2025» ប្រធានទីភ្នាក់ងារអវកាសអាម៉េរិក (NASA) លោក Bill Nelson បកស្រាយដូច្នេះ។ លោកបន្តថា នឹងមានការចុះចតដោយគ្មានមនុស្សបើកបរ នៅក្នុងពេលណាមួយមុនពេលមនុស្សឈានជើងជាន់ដីឋានព្រះចន្ទជាថ្មី។

NASA កំពុងតែមានគោលដៅនាំមនុស្សឡើងទៅកាន់ឋានព្រះចន្ទជាថ្មី ក្រោយរយៈពេល 5 ទសវត្សរ៍ រាប់ចាប់ពីព្រឹត្តិការណ៍ឡើងជាន់ដីព្រះចន្ទតាមរយៈកម្មវិធី Apollo 17 កាលពីឆ្នាំ 1972។ គម្រោងថ្មី (Artemis) នេះ រួមមាន បេសកកម្ម Artemis 1, 2, 3 ដែលគ្រោងអនុវត្តជាបន្តបន្ទាប់ចាប់ពីឆ្នាំ 2022។

កាលពីថ្ងៃទី 5 វិច្ឆិកា NASA បានឱ្យដឹងថា ពួកគេសម្រេចបានការងារសំខាន់ៗមួយចំនួន នៅពេលដំឡើងយានអវកាស Orion ទៅលើក្បាលរ៉ុក្កែត SLS Block 1 ដែលមានកម្ពស់ 98 ម៉ែត្រ ខាងក្នុងរោងចក្រដំឡើងនៅឯមជ្ឈមណ្ឌលអវកាស Kennedy របស់ NASA ដែលមានទីតាំងនៅរដ្ឋ Florida សហរដ្ឋអាម៉េរិក។

Artemis 3 នឹងប្រើប្រាស់ប្រព័ន្ធ Starship របស់ក្រុមហ៊ុន SpaceX ដើម្បីនាំយាន Orion ចុះចតលើដីឋានព្រះចន្ទ

បេសកកម្មដំបូង (Artemis 1) គឺជាការហោះហើរគ្មានមនុស្សបើកបរ ដើម្បីពិនិត្យស្ថានភាពហោះហើរក្នុងទីអវកាសជ្រៅរបស់យាន Orion ហើយនឹងចុះចតលើផែនដីវិញ ដោយប្រើឆត្រយោង។ បើសិនជាអ្វីៗដំណើរការដោយរលូន នោះ Artemis 1 នឹងត្រូវបានបាញ់បង្ហោះនៅថ្ងៃទី 12 ខែកុម្ភៈ ឆ្នាំ 2022។

ចំណែកបេសកកម្ម Artemis 2 និង Artemis 3 វិញគឺ សុទ្ធតែមានអវកាសយានិកទៅជាមួយ។ តាមផែនការ Artemis 2 នៅតែប្រើប្រាស់រ៉ុក្កែត SLS Block 1 របស់ NASA ដើម្បីនាំយាន Orion ទៅហោះហើរជុំវិញឋានព្រះចន្ទ ខណៈ Artemis 3 នឹងប្រើប្រាស់ប្រព័ន្ធ Starship របស់ក្រុមហ៊ុន SpaceX ដើម្បីនាំយាន Orion ចុះចតលើដីឋានព្រះចន្ទ៕

November 10, 2021

យន្តហោះចម្បាំង 6 គ្រឿងរបស់ ចិន ចូលទៅជិតកោះ តៃវ៉ាន់ ក្នុងគ្រាដែលតំណាងរាស្ត្រ សហរដ្ឋអាមេរិក 6 រូប ធ្វើទស្សនកិច្ចកោះនេះ

កងទ័ពចិនដីគោក បានប្រកាសថា បានបញ្ជូនកងកម្លាំងល្បាត និងប្រយុទ្ធទៅក្បែរកោះ តៃវ៉ាន់ ក្រោយពីតំណាងរាស្ត្រ អាមេរិក 6 រូប ធ្វើទស្សនកិច្ចកោះនេះ កាលពីវេលាម៉ោងប្រហែល 18 ថ្ងៃទី 9 វិច្ឆិកា។

«ការល្បាតដែលត្រៀមជាស្រេចសម្រាប់ប្រយុទ្ធនៅច្រកសមុទ្រ តៃវ៉ាន់ នេះ ត្រូវបានធ្វើឡើងដើម្បីឆ្លើយតបទៅនឹងសម្ដី និងសកម្មភាពខុសឆ្គងធ្ងន់ធ្ងររបស់ប្រទេសមួយចំនួនដែលទាក់ទិននឹងបញ្ហា តៃវ៉ាន់ ក៏ដូចជាសកម្មភាពរបស់កងកម្លាំងប្រឆាំងនៅកោះនេះ» ក្រសួងការពារជាតិចិន បានចេញប្រកាសនាថ្ងៃនេះ។

ភាគីតៃវ៉ាន់ បានឱ្យដឹងថា យន្តហោះយោធាចិន រួមមាន យន្តហោះចម្បាំង J-16 ចំនួន 4 គ្រឿង និងយន្តហោះឈ្លបការណ៍ 2 គ្រឿង បានហោះហើរចូលមកកាន់តំបន់កំណត់អត្តសញ្ញាណការពារដែនអាកាសភាគនិរតីរបស់ តៃវ៉ាន់។

សារព័ត៌មានរបស់ តៃវ៉ាន់ បានរាយការណ៍ថា តំណាងរាស្ត្រ 4 រូប នៃសភាជាន់ខ្ពស់ និង 4 រូប នៃសភាជាន់ទាបរបស់ សហរដ្ឋអាម៉េរិក រួមនឹងជំនួយការ 7 រូប បានឡើងយន្តហោះ C-40A របស់កងទ័ព សហរដ្ឋអាម៉េរិក នៅទីក្រុង ម៉ានីល នៃប្រទេស ហ្វ៊ីលីពីន ហើយបានចុះចតនៅព្រលានយន្តហោះ Taipei Songshan នៃកោះ តៃវ៉ាន់ កាលពីវេលាម៉ោងប្រហែល 18 ម្សិលមិញ។

ស្ថាប័នការទូតរបស់ តៃវ៉ាន់ បានឱ្យដឹងថា ដំណើរទស្សនកិច្ចនេះគឺជាលទ្ធផលនៃការពិភាក្សារវាងក្រុមមន្ត្រីរបស់ តៃវ៉ាន់ និង សហរដ្ឋអាម៉េរិក។ ក្នុងគ្រានេះដែរ ក្រសួងការពារជាតិចិន បានចោទថា ទស្សនកិច្ចនេះគឺជា «ទង្វើជ្រៀតជ្រែកកិច្ចការផ្ទៃក្នុងរបស់ ចិន»។

កាលពីខែមិថុនា ដំណើរទស្សនកិច្ចរយៈពេល 3 ម៉ោង នៃតំណាងរាស្ត្រ 3 រូប របស់ សហរដ្ឋអាម៉េរិក បានធ្វើឱ្យ ចិនដីគោក ខឹងយ៉ាងខ្លាំងម្ដងរួចមកហើយ។

យន្តហោះរបស់កងទ័ព ចិនដីគោក (PLA) បានចូលទៅក្បែរតំបន់កំណត់អត្តសញ្ញាណការពារដែនអាកាសភាគអាគ្នេយរបស់ តៃវ៉ាន់ ចំនួន 554 លើក រាប់ចាប់ពីពាក់កណ្ដាលខែកញ្ញា ឆ្នាំ 2020 ដល់ចុងខែសីហា ឆ្នាំ 2021។ នេះបើតាមប្រកាសកាលពីថ្ងៃទី 9 វិច្ឆិកា របស់កងទ័ព តៃវ៉ាន់៕

November 10, 2021

ក្រុមតំណាងរាស្ត្រសហរដ្ឋអាម៉េរិក ជាច្រើនរូប មកធ្វើទស្សនកិច្ចកោះតៃវ៉ាន់ ទៀតហើយ!

តំណាងរាស្ត្រចំនួន 6 រូប របស់ សហរដ្ឋអាម៉េរិក បានធ្វើឱ្យមានការភ្ញាក់ផ្អើលខ្លាំង នៅពេលមកធ្វើទស្សនកិច្ចកោះ តៃវ៉ាន់ ដែលជាឥរិយាបថមួយធ្វើឱ្យទីក្រុង ប៉េកាំង ប្រតិកម្មខ្លាំងក្លា និងចោទថា ទីក្រុង វ៉ាស៊ីងតោន «ជ្រៀតជ្រែកកិច្ចការផ្ទៃក្នុង»។

សារព័ត៌មានរបស់ តៃវ៉ាន់ បានរាយការណ៍ថា តំណាងរាស្ត្រ 4 រូប នៃសភាជាន់ខ្ពស់ និង 4 រូប នៃសភាជាន់ទាបរបស់ សហរដ្ឋអាម៉េរិក រួមនឹងជំនួយការ 7 រូប បានឡើងយន្តហោះ C-40A របស់កងទ័ព សហរដ្ឋអាម៉េរិក នៅទីក្រុង ម៉ានីល នៃប្រទេស ហ្វ៊ីលីពីន ហើយបានចុះចតនៅព្រលានយន្តហោះ Taipei Songshan នៃកោះ តៃវ៉ាន់ កាលពីវេលាម៉ោងប្រហែល 18 ម្សិលមិញ។

ស្ថាប័នការទូតរបស់ តៃវ៉ាន់ បានឱ្យដឹងថា ដំណើរទស្សនកិច្ចនេះគឺជាលទ្ធផលនៃការពិភាក្សារវាងក្រុមមន្ត្រីរបស់ តៃវ៉ាន់ និង សហរដ្ឋអាម៉េរិក។ ពួកគេនឹងប្រកាសព័ត៌មានដែលទាក់ទងនៅក្នុងពេលវេលាសមស្រប ដើម្បីគោរពដល់ការសម្រេចចិត្តរបស់ក្រុមមន្ត្រីដែលមកធ្វើទស្សនកិច្ច។ ការិយាល័យមេដឹកនាំកោះ តៃវ៉ាន់ ក៏មិនបានផ្ដល់ព័ត៌មានអ្វីបន្ថែមនោះដែរ ទាក់ទិននឹងដំណើរទស្សនកិច្ចនេះ។

ក្នុងគ្រានេះដែរ ក្រសួងការពារជាតិចិន បានចោទថា ទស្សនកិច្ចនេះគឺជា «ទង្វើជ្រៀតជ្រែកកិច្ចការផ្ទៃក្នុងរបស់ ចិន»។ «យើងចង់ព្រមានដោយភាពម៉ឺងម៉ាត់ ឱ្យ សហរដ្ឋអាម៉េរិក បញ្ឈប់ជាបន្ទាន់រាល់ឥរិយាបថបង្កហេតុ បញ្ឈប់រាល់សកម្មភាពដែលនាំឱ្យភាពតានតឹងកើនឡើងនៅច្រកសមុទ្រ តៃវ៉ាន់» អ្នកនាំពាក្យក្រសួងការពារជាតិចិន Tan Ke Fei បានថ្លែងដូច្នេះ។

ប្រទេស ចិន ធ្លាប់បានព្រមានជាច្រើនដងមកហើយថា មិនឱ្យ សហរដ្ឋអាម៉េរិក បញ្ជូនមន្ត្រីមកកាន់កោះ តៃវ៉ាន់ ឬទាក់ទងជាផ្លូវការជាមួយកោះនេះ។ ទីក្រុង ប៉េកាំង ចាត់ទុកថា កោះ តៃវ៉ាន់ គឺជាផ្នែកមួយនៃទឹកដីរបស់ខ្លួន និងរង់ចាំតែការបង្រួបបង្រួមប៉ុណ្ណោះ។ កាលពីខែមិថុនា ដំណើរទស្សនកិច្ចរយៈពេល 3 ម៉ោង នៃតំណាងរាស្ត្រ 3 រូប របស់ សហរដ្ឋអាម៉េរិក បានធ្វើឱ្យ ចិនដីគោក ខឹងយ៉ាងខ្លាំងម្ដងរួចមកហើយ។

នៅក្នុងប្រកាសកាលពីថ្ងៃទី 9 វិច្ឆិកា កងទ័ពរបស់ តៃវ៉ាន់ បានឱ្យដឹងថា យន្តហោះរបស់កងទ័ព ចិនដីគោក (PLA) បានចូលទៅក្បែរតំបន់កំណត់អត្តសញ្ញាណការពារដែនអាកាសភាគនិរតីរបស់ តៃវ៉ាន់ ចំនួន 554 លើក រាប់ចាប់ពីពាក់កណ្ដាលខែកញ្ញា ឆ្នាំ 2020 ដល់ចុងខែសីហា ឆ្នាំនេះ៕

November 10, 2021

ក្រោយពីភូមិគ្រឹះត្រូវយន្តហោះដ្រូនទម្លាក់គ្រាប់បែកលើ នាយករដ្ឋមន្ត្រីអ៊ីរ៉ាក់ ថា បានស្គាល់ច្បាស់អ្នកនៅពីក្រោយ

(អ៊ីរ៉ាក់)-នាយករដ្ឋមន្ត្រី Mustafa al-Kadhimi បានឱ្យដឹងថា លោកបានដឹងច្បាស់ក្រុមមនុស្សដែលនៅពីក្រោយអំពើលួចធ្វើឃាតរូបលោក ហើយថា នឹងនាំខ្លួនជនទាំងនេះឡើងតុលាការ។

«យើងនឹងតាមចាប់ខ្លួនពួនឧក្រិដ្ឋជន យើងបានដឹងច្បាស់ យើងនឹងវែកមុខពួកគេ» នាយករដ្ឋមន្ត្រីនៃ ប្រទេសអ៊ីរ៉ាក់ លោក Mustafa al-Kadhimi បានថ្លែងដូច្នេះ កាលពីថ្ងៃទី 7 វិច្ឆិកា ក្រោយពីភូមិគ្រឹះរបស់លោក ត្រូវបានយន្តហោះគ្មានមនុស្សបើក (drone) ទម្លាក់គ្រាប់បែក។

ភូមិគ្រឹះរបស់លោក Kadhimi មានទីតាំងនៅក្នុងតំបន់បៃតង នា រដ្ឋធានីបាកដាដ ត្រូវបានវាយប្រហារកាលពីថ្ងៃទី 7 វិច្ឆិកា ដោយ ដ្រូន ចំនួន 3 គ្រឿង ក្នុងនោះមាន 2 គ្រឿងត្រូវបានបាញ់ទម្លាក់។ លោក Kadhimi មានសុវត្ថិភាព ខណៈអង្គរក្ស 6 នាក់បានរងរបួស។

ការិយាល័យនាយករដ្ឋមន្ត្រីអ៊ីរ៉ាក់ បានហៅអំពើនេះថា ជាការវាយប្រហារភេរវកម្មដ៏កំសាក ក្នុងបំណងធ្វើឃាតរូបលោក។

ហេតុការណ៍នេះបានកើតឡើងនៅក្នុងគ្រាដែលមានភាពតានតឹងរវាងកងកម្លាំងសន្តិសុខអ៊ីរ៉ាក់ និងក្រុមជីវពលជនជាតិ Shiite ដែលគាំទ្រដោយ ប្រទេសអ៊ីរ៉ង់។ ក្រុមជីវពលជនជាតិ Shiite កាលពីប៉ុន្មានសប្ដាហ៍កន្លងទៅ បានធ្វើបាតុកម្មនៅក្បែរតំបន់បៃតង ដើម្បីប្រឆាំងនឹងលទ្ធផលនៃការបោះឆ្នោតកាលពីថ្ងៃទី 10 តុលា ដោយយល់ថា មានភាពមិនប្រក្រតីនៅក្នុងពេលបោះឆ្នោត និងរាប់សន្លឹកឆ្នោត ដែលនាំឱ្យក្រុមនេះបាត់បង់កៅអីជាច្រើននៅសភាអ៊ីរ៉ាក់។

ក្នុងបាតុកម្មកាលពីថ្ងៃទី 5 វិច្ឆិកា កម្លាំងសន្តិសុខ និងក្រុមជីវពលខាងលើ បានបាញ់ប្រហារគ្នា បណ្ដាលឱ្យបាតុករម្នាក់ស្លាប់ និងប៉ូលិសច្រើននាក់រងរបួស៕

November 8, 2021

ដំណឹងល្អមួយទៀត! Pfizer ប្រកាសបង្ហាញថ្នាំព្យាបាលជំងឺ COVID-19 ថ្មី «ប្រសិទ្ធភាព 89%»

ក្រុមហ៊ុនផលិតឱសថ Pfizer របស់ សហរដ្ឋអាម៉េរិក កាលពីថ្ងៃទី 5 វិច្ឆិកា បានឱ្យដឹងថា ថ្នាំគ្រាប់ព្យាបាលជំងឺ COVID-19 របស់ពួកគេ មានប្រសិទ្ធភាពរហូតដល់ 89% នៅក្នុងការកាត់បន្ថយអត្រាចូលពេទ្យ និងស្លាប់ ចំពោះអ្នកជំងឺដែលមានហានិភ័យខ្ពស់។

យោងតាមប្រកាសរបស់ Pfizer ការពិសោធលើមនុស្សរបស់ពួកគេបានបង្ហាញថា ថ្នាំគ្រាប់នេះ នាំមកនូវ «ប្រសិទ្ធភាពអស្ចារ្យជាងគេ»។

ក្រុមហ៊ុន Pfizer គ្រោងនឹងដាក់សំណើសុំការអនុម័តពីអាជ្ញាធរ សហរដ្ឋអាម៉េរិក ដើម្បីអាចប្រើប្រាស់បន្ទាន់។ មូលបត្ររបស់ Pfizer ក៏បានឡើងថ្លៃ 11% គិតមកដល់ម៉ោង ជិត 7 ព្រឹក ថ្ងៃទី 5 វិច្ឆិកា នៅទីក្រុងនីវយ៉ក។

Pfizer បានចាប់ផ្ដើមធ្វើការពិសោធថ្នាំនេះនៅលើអ្នកស្ម័គ្រចិត្តពេញវ័យចំនួន 1,219 នាក់ដែលមិនទាន់បានចាក់វ៉ាក់សាំង COVID-19។ យោងតាមទិន្នន័យរបស់ Pfizer ការព្យាបាលដោយប្រើប្រាស់ថ្នាំនេះនឹងមានរយៈពេល 5 ថ្ងៃ។ ថ្នាំនេះជួយកាត់បន្ថយអត្រាចូលពេទ្យបានយ៉ាងច្រើនបន្ទាប់ពីបានលេបរយៈពេលពី 3 ទៅ 5 ថ្ងៃ ក្រោយពីមានរោគសញ្ញា។

ថ្នាំគ្រាប់របស់ Pfizer នេះ មានឈ្មោះ ថា Paxlovid។ Paxlovid មានប្រសិទ្ធភាពក្នុងការទប់ស្កាត់ការកើតកូនចៅដោយស្វ័យប្រវត្តរបស់វីរុស។

Pfizer បញ្ជាក់ថា មានតែ 0.8% ប៉ុណ្ណោះ ដែលត្រូវចូលពេទ្យ នៅក្នុងចំណោមអ្នកជំងឺដែលបានលេបថ្នាំ Paxlovid រយៈពេល 3 ថ្ងៃ ក្រោយមានរោគសញ្ញា ហើយពុំមានករណីស្លាប់នោះដែរ ខណៈដែលអ្នកជំងឺចំនួន 7% ដែលបានប្រើថ្នាំបញ្ឆោត (placebo) ត្រូវចូលពេទ្យ ឬស្លាប់។

Pfizer ក៏កំពុងពិសោធប្រើប្រាស់ថ្នាំ Paxlovid នេះ ដើម្បីទប់ស្កាត់ការឆ្លងវីរុស ពោលគឺ អ្នកដែលមិនទាន់ឆ្លង COVID-19 អាចលេបថ្នាំនេះបាន ដើម្បីស្កាត់មិនឱ្យឆ្លងវីរុស។

November 6, 2021

Category: អន្តរជាតិ