វរសេនីយ៍ទោ Damiba ត្រូវបានតែងតាំងជាមេបញ្ជាការភូមិភាគមួយក្នុងចំណោម ៣ របស់កងទ័ព បួគីណា ហ្វាសូ ២ ខែមុនអំពើរដ្ឋប្រហារទម្លាក់ប្រធានាធិបតី Karobe។
វរសេនីយ៍ទោ Paul-Henri Sandaogo Damiba រួមនឹងក្រុមមន្ត្រីយោធាជាច្រើនរូប កាលពីថ្ងៃទី ២៤ មករា បានបង្ហាញខ្លួនលើកញ្ចក់ទូរទស្សន៍ជាតិ ប្រកាសថា ពួកគេបានទម្លាក់ប្រធានាធិបតី Karobe និងកំពុងកាន់កាប់អំណាច។
Damiba ធ្លាប់ជាទាហានមួយរូបនៃកងអង្គរក្សផ្ទាល់របស់អតីតប្រធានាធិបតី Blaise Compaore។ នេះគឺជាអង្គភាពសន្តិសុខស្នូលរបស់លោក Compaore ប៉ុន្តែត្រូវបានរំសាយ បន្ទាប់ពីលោកបានចាកចេញពីកៅអីប្រធានាធិបតី កាលពីឆ្នាំ ២០១៤។
ក្រោយមក Damiba ក៏ត្រូវបានបញ្ចូលទៅក្នុងជួរកងទ័ពជាតិ ហើយក្រោយមកទៀតក៏ត្រូវបានដំឡើងឋានន្តរសក្ដិ។ កាលពីខែវិច្ឆិកា ២០២១ ពោលគឺមុនរដ្ឋប្រហារ ២ ខែ លោកវរសេនីយ៍ទោ Damiba ត្រូវបានប្រគល់តំណែងជាមេបញ្ជាការភូមិភាគមួយក្នុងចំណោម ៣ របស់ ប្រទេស បួគីណា ហ្វាសូ ទទួលបន្ទុកសន្តិសុខរបស់រដ្ឋធានី អួហ្គាឌូហ្គូ (Ouagadougou) ដែលនេះបានជួយឱ្យលោកមានអំណាចកាន់តែខ្លាំង។
ការប្រឹងប្រែងរបស់ប្រធានាធិបតី នៃប្រទេស បួគីណា ហ្វាសូ ដើម្បីស្វែងរកការគាំទ្របន្ថែមពីកងទ័ព ក្រោយករណីវាយប្រហាររបស់ក្រុមប្រដាប់អាវុធអ៊ីស្លាម សំដៅលើបន្ទាយទាហាននៅទីរួមស្រុក Inata ដែលបានសម្លាប់ទាហាន ៤៩ និងប្រជាជន ៤ នាក់ បានបង្កឱ្យមានរលកនៃការប្រឆាំងរដ្ឋាភិបាល និងការអំពាវនាវឱ្យលោក Karobe ចុះចេញពីតំណែង។
Damiba កម្របង្ហាញខ្លួនជាសាធារណៈ និងធ្លាប់ទទួលការបណ្ដុះបណ្ដាលផ្នែកយោធានៅ ប្រទេសបារាំង ទទួលបានសញ្ញាបត្រអនុបណ្ឌិតផ្នែកឧក្រិដ្ឋកម្មវិទ្យា នៅ វិទ្យាស្ថានជាតិសិល្បៈ និងវិជ្ជាជីវៈរបស់ប្រទេសនេះ។ កាលពីឆ្នាំមុន លោក Damiba បានបញ្ចេញសៀវភៅមួយក្បាលវិភាគអំពី «ចំណុចពិសេសរបស់លទ្ធិភេរវកម្មនៅ អាហ្វ្រិកខាងលិច»។
ប្រធានវិទ្យាស្ថានយុទ្ធសាស្ត្រ និងទំនាក់ទំនងអន្តរជាតិ នៅរដ្ឋធានី អៅហ្គាឌូហ្គូ លោក Paul Koalaga ឱ្យដឹងថា វរសេនីយ៍ទោ Damiba ទំនងជានៅតែមានភក្ដីភាពចំពោះអតីតប្រធានាធិបតី Compaore រួមនឹងសម្ព័ន្ធមិត្តរបស់លោក ក្នុងនោះមានឧត្តមសេនីយ៍ Gilbert Diendere ផងដែរ។
ឧត្តមសេនីយ៍ Diendere ធ្លាប់ដឹកនាំរដ្ឋប្រហារមិនបានសម្រេចកាលពីឆ្នាំ ២០១។ លោកកំពុងត្រូវបានកាត់ទោសទាក់ទងនឹងមរណភាពរបស់លោក Thomas Sankara ដែលជាអតីតប្រធានាធិបតី កាន់អំណាចមុនលោក Compaore។
ក្រោយរដ្ឋប្រហារ ដំណឹងអំពីប្រធានាធិបតី Karobe មិនទាន់ត្រូវបានគេបង្ហើបឱ្យដឹងនៅឡើយ។ មន្ត្រីសន្តិសុខ ២ រូប បាននិយាយថា លោក Karobe និងសមាជិកមួយចំនួននៃគណៈរដ្ឋមន្ត្រី កំពុងត្រូវបានឃាត់ខ្លួននៅក្នុងបន្ទាយ Sangoule Lamizana ក្នុងរដ្ឋធានី អៅហ្គាឌូហ្គូ។ ចំណែកប្រភពព័ត៌មានពីរដ្ឋាភិបាលនិយាយថា លោក Kabore ត្រូវបាននាំចេញពីភូមិគ្រឹះកាលពីយប់ថ្ងៃទី ២៣ មករា មុនពេលក្រុមប្រដាប់អាវុធមកដល់ និងបាញ់រះទៅលើរថយន្តនានានៃក្បួនរថយន្តរបស់លោក។
សហគមន៍សេដ្ឋកិច្ចអាហ្វ្រិកខាងលិច (ECOWAS) បានថ្កោលទោសចំពោះរដ្ឋប្រហារនៅ បួគីណា ហ្វាសូ ដោយយល់ថា កងទ័ពប្រទេសនេះ ទទួលខុសត្រូវក្នុងការការពារសន្តិសុខជូនប្រធានាធិបតី Kabore៕
