អ៊ុយក្រែន ប្រកាសថា ទាហានរបស់ប្រទេសនេះ បានដកថតពីទីក្រុង Lysychansk បន្ទាប់ពី រុស្ស៊ី ប្រកាសថា «គ្រប់គ្រងបានទាំងស្រុង» លើទីក្រុង និងខេត្ត Lugansk។
«ការបន្តការពារទីក្រុង នឹងនាំឱ្យមានការបាត់បង់ជីវិត។ ការសម្រេចចិត្តដកថយត្រូវបានធ្វើឡើងដើម្បីការពារអាយុជីវិតរបស់យុទ្ធជន» កងទ័ពអ៊ុយក្រែន បានប្រកាសកាលពីថ្ងៃទី ៣ កក្កដា ស្ដីពីការសម្រេចចិត្តដកកងទ័ពចេញពី Lysychansk ដែលជាតំបន់ការពារចុងក្រោយរបស់ពួកគេនៅក្នុងខេត្តភាគខាងកើត Lugansk (Luhansk)។
មុននោះមួយថ្ងៃ ក្រសួងការពារជាតិរុស្ស៊ី បានប្រកាសថា កងទ័ពប្រទេសនេះ និងក្រុមផ្ដាច់ខ្លួន «បានរំដោះសាធារណរដ្ឋប្រជាមានិត Lugansk (LPR)»។ យុទ្ធនាការយោធាប្រព្រឹត្តឡើងដោយជោគជ័យ កងកម្លាំងប្រដាប់អាវុធរបស់ សហព័ន្ធរុស្ស៊ី និងបណ្ដាអង្គភាពរបស់ LPR កំពុងគ្រប់គ្រងទីក្រុង Lysychansk និងបណ្ដាតំបន់ប្រជុំជននៅក្បែរនោះ» ប្រកាសរបស់ ក្រសួងការពារជាតិរុស្ស៊ី មានឃ្លាសរសេរដូច្នេះ។
អ្នកជំនាញផ្នែកយោធានៅ បស្ចិមលោក យល់ថា ការគ្រប់គ្រងបាន Lysychansk គឺជាជ័យជម្នះរបស់ រុស្ស៊ី។ ប្រការនេះមានន័យថា រុស្ស៊ី និងក្រុមផ្ដាច់ខ្លួន កំពុងគ្រប់គ្រងមួយភាគធំនៃតំបន់ Donbass ដែលមាន ២ ខេត្ត គឺ Lugansk និង Donetsk ជាតំបន់ដែលមានអណ្ដូងរ៉ែច្រើន និងវាលស្រែធំធេង។
ការិយាល័យឧត្តមស្នងការសិទ្ធិមនុស្សនៃ អង្គការសហប្រជាជាតិ (OHCHR) បានឱ្យដឹងថា ក្នុងរយៈពេលជាង ៤ ខែ នៃសង្គ្រាមនៅ អ៊ុយក្រែន ជនស៊ីវិលចំនួន ៤,៧៣១ នាក់បានស្លាប់ និងជាង ៥,៩០០ នាក់បានរងរបួស។
ឧត្តមស្នងការទទួលបន្ទុកជនភៀសខ្លួនរបស់ អង្គការសហប្រជាជាតិ (UNHCR) ក៏បានឱ្យដឹងដែរថា មនុស្សជាង ៨.៤ លាននាក់ បានចាកចេញពី ទឹកដីអ៊ុយក្រែន រាប់ចាប់តាំងពីសង្គ្រាមបានផ្ទុះឡើង ខណៈដែលមនុស្សជាង ៧ លាននាក់ដែលកំពុងស្ថិតនៅក្នុងប្រទេស បានចាកចោលផ្ទះសំបែង៕
