វល័ក្ខ - La Reine Media

វត្តមានកំពូលតារាបាល់ទាត់ RUUD VAN NISTELROOY 3ថ្ងៃនៅកម្ពុជា បានធ្វើឱ្យកក្រើកអ្នកគាំទ្រ

ភ្នំពេញ៖ កាលថ្ងៃទី 2 ខែមេសា លោក Ruud van Nistelrooy វីរបុរសបាល់ទាត់សញ្ជាតិហូឡង់ និងជាអតីតៈខ្សែប្រយុទ្ធរបស់ក្រុម Manchester United និងក្រុម Real Madrid បានមកដល់ព្រះរាជាណាចក្រកម្ពុជាដើម្បីចូលរួមជាអធិបតីភាពក្នុងកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ឆ្នាំ 2018 ដែលនាំជូនដោយស្រាបៀរ Heineken® ចាប់ពីថ្ងៃទី 2 ដល់ថ្ងៃទី 4 ខែមេសា ឆ្នាំ 2018។

លោកត្រូវបានស្វាគមន៍យ៉ាងកក់ក្តៅនៅអាកាសយានដ្ឋានអន្តរជាតិភ្នំពេញ ដោយគណៈប្រតិភូស្វាគមន៍ពិសេសមួយដែលរាប់បញ្ចូលទាំងអ្នកសារព័ត៌មានសំខាន់ៗមួយចំនួន ដែលលោកបានផ្តល់បទសម្ភាសន៍អំពីសកម្មភាពផ្សេងៗនៃកម្មវិធីដំណើរទេសចរណ៍នេះដែលគ្រោងនឹងធ្វើឡើងខាងមុខនេះ។

តារាបាល់ទាត់រូបនេះមានអារម្មណ៍រំភើបរីករាយខ្លាំងណាស់ចំពោះដំណើរទស្សនកិច្ចនៅព្រះរាជាណាចក្រកម្ពុជា ជាពិសេសឱកាសជួបជាមួយអ្នកគាំទ្រ និងកីឡាករបាល់ទាត់កម្ពុជា ដោយកីឡាករកម្ពុជាមួយចំនួននឹងមានឱកាសចូលរួមក្នុងវគ្គបង្វឹកពិសេសជាមួយលោក Ruud van Nistelrooy ។

ដោយសារមានទំនាក់ទំនងជាប្រវត្តិសាស្ត្រជាមួយនឹងក្របខ័ណ្ឌ UEFA Champions League លោក Ruud van Nistelrooy បានកាន់តួនាទីជាទូតសុឆន្ទៈដើម្បីចែករំលែកនូវមហិច្ឆិតាចំពោះកម្មវិធីប្រកួតនេះ ហើយនិងចែករំលែកនូវការគាំទ្រ និងចំណេះដឹងរបស់លោកដើម្បីជួយណែនាំអ្នកមានទេពកោសល្យខាងបាល់ទាត់ជំនាន់ក្រោយឲ្យសម្រេចបាននូវគោលដៅរបស់ពួកគេ។

ដំណើរទស្សនកិច្ចរយៈពេលបីថ្ងៃនេះត្រូវបានរៀបចំឡើងដោយស្រាបៀរ Heineken® ហើយនឹងជំរុញផ្តល់ឲ្យអ្នកគាំទ្រទូទាំងពិភពលោកនូវឱកាសផ្ទាល់ក្នុងការចូលរួមទទួលបានភាពរំភើបរីករាយនៃការទស្សនាកម្មវីធីប្រកួតនេះតាមរយៈយុទ្ធនាការរបស់ស្រាបៀរ Heineken® ដែលមានឈ្មោះថា “ចែករំលែកភាពរំភើបរីករាយ ចែករំលែកពានរង្វាន់”។

ចំពោះព័ត៌មានលម្អិតបន្ថែមអំពីកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® សូមចូលមើលគេហទំព័រ៖ www.facebook.com/Heineken

សូមរីករាយទទួលទានស្រាបៀរ Heineken ដោយទទួលខុសត្រូវ

April 5, 2018

ស្អែកនេះ អ្នកភ្នំពេញអាចជិះកាណូត-ដ ព្រែកព្នៅ-តាខ្មៅបានហើយ!

ក្រសួងសាធារណការ និងដឹកជញ្ជូន បានប្រកាសជាផ្លូវការនៅថ្ងៃទី5 ខែមេសា ឆ្នាំ2018នេះថា ស្អែកនេះ(ថ្ងៃទី6)ប្រជាពលរដ្ឋក្នុងរាជធានីភ្នំពេញអាចជិះកាណូតដពីព្រែកព្នៅ ឆ្លងកាត់រាជធានីភ្នំពេញ ទៅក្រុងតាខ្មៅ ដែលជាការដាក់ឱ្យដំណើរការបណ្តោះអាសន្ននៅមុនពេលចូលឆ្នាំ្មថ្មីប្រពៃណីខ្មែរនេះបានហើយ។

ការដាក់ឱ្យដំណើរការសាកល្បងនេះ គឺធ្វើឡើងតាមការសន្យារបស់ក្រសួងសាធារណការ និងដឹកជញ្ជូន ដែលធ្លាប់បានអះអាងថា នឹងបើកដំណើរការកាណូតដដឹកជញ្ជូនអ្នកដំណើរតាមផ្លូវទឹកពីព្រែកព្នៅ ទៅតាខ្មៅឱ្យបានមុនថ្ងៃចូលឆ្នាំខ្មែរខាងមុខនេះ ដើម្បីជួយសម្រួលដល់ការធ្វើដំណើរទៅមកពីជាយក្រុងមកក្នុងទីក្រុង ឬពីតំបន់ជាយក្រុងម្ខាង ទៅជាយក្រុងម្ខាងទៀត បន្ថែមពីលើសេវារថយន្តក្រុងដែលកំពុងដំណើរការស្រាប់ហើយរបស់ប្រជាពលរដ្ឋ និងរួមចំណែកកាត់បន្ថយការកកស្ទះចរាចរណ៍ផ្លូវគោកក្នុងទីក្រុងសម្រាប់អ្នករស់នៅរាជធានីភ្នំពេញ ព្រែកព្នៅ និងក្រុងតាខ្មៅផងដែរ។

ក្រសួងសាធារណការ និងដឹកជញ្ជូនបានបញ្ចាក់ថា កាណូតដដឹកអ្នកដំណើរនេះមានកំពង់ផែ(ចំណតដ)ចំនួន 15កន្លែងគឺៈ

រាជធានីភ្នំពេញៈ
– ទី1: គល់ស្ពានព្រែកព្នៅត្រើយខាងកើត (កំពុងពិចារណា)
– ទី2: គីឡូម៉ែត្រលេខ៦
– ទី3: ខាងមុខឃ្លាំងសាំងឬស្សីកែវជាប់នឹងទីលានប្រជាធិបតេយ្យថ្មី
– ទី4: ផែបណ្ដែតទឹកមុខផ្សាររាត្រី
– ទី5: កំពង់ចម្លងកោះពេជ្រ-អរិយក្សត្រ
– ទី6: ភូមិដើមចាន់ ឬគល់ស្ពានក្បាលថ្នល់ខាងកើត
– ទី7: ចំណតរថយន្តចាក់អង្រែក្រោម
– ទី8: បាក់ខែង ត្រង់ផ្លូវបំបែកលី យ៉ុងផាត់
– ទី9: ទល់មុខផ្សារព្រែកលៀប (កំពង់ចម្លងព្រែកលៀប)
– ទី10: ជាប់សណ្ឋាគារសុខាភ្នំពេញ
– ទី11: ភូមិកោះនរា
– ទី12: កំពង់ចម្លងក្តីតាកុយ
– ទី13: កំពង់ចម្លងតាព្រហ្មមាត់ក្រសះ

ខេត្តកណ្តាលៈ
– ទី1: មុខវត្តព្រែកសំរោងក្រុងតាខ្មៅ (កំពុងពិចារណា)
– ទី2: កំពង់ចម្លងរោងចក្រក្តាបន្ទះផ្លូវត្រី៕

April 5, 2018

Salah រងរបួស ខណៈ Liverpool លត់ក្រុម Man City ចាស់ដៃ

Liverpool នឹងធ្វើការត្រួតពិនិត្យទៅលើ Mohamed Salah ក្រោយពីរូបគេត្រូវបានបង្ខំចិត្តប្តូរចេញនៅដើមតង់ទី2 ក្នុងពេលក្រុមខ្លួនដណ្តើមបានជ័យជម្នះយ៉ាងកក់ក្តៅក្នុងលទ្ធផល 3-0 លើក្រុម Manchester City ក្នុងក្របខ័ណ្ឌ Champions League វគ្គ 8ក្រុមចុងក្រោយ ជើងទី1 កាលពីថ្ងៃពុធ។

ខ្សែប្រយុទ្ធអន្តរជាតិអេហ្ស៊ីបរូបនេះបានរកគ្រាប់បាល់បើកឆាក ក្នុងពេលក្រុម Liverpool បានបង្ហាញពីទម្រង់លេងយ៉ាងល្អនាកីឡដ្ឋាន Anfield ប៉ុន្តែ ត្រូវបានប្តូរចេញនៅនាទីទី52 ដោយខ្សែបម្រើ Georginio Wijnaldum និងបានដើរទៅកាន់បន្ទប់ផ្លាស់សម្លៀកបំពាក់ជាមួយនឹងក្រុមគ្រូពេទ្យ។ លោក Jurgen Klopp ដែលជាអ្នកចាត់ការទូទៅ បានបញ្ជាក់ថា Salah មានការជឿជាក់លើខ្លួនឯងថា រូបគេមិនមានបញ្ហាអ្វីឡើយ ប៉ុន្តែតារាឆ្នើមកំពុងតែឡើងទម្រង់លេងរូបនេះអាចនឹងត្រូវអវត្តមានសម្រាប់ការប្រកួតរវាងក្រុមស្ថិតក្នុងតំបន់ Merseyside តែមួយគឺ Everton នៅថ្ងៃសៅរ៍នេះ។

លោក Klopp បានឱ្យដឹងថា៖ «ទាក់ទងនឹង Mo ខ្ញុំមិនដឹងឡើយ។ រូបគេអាចនឹងអវត្តមាន ប៉ុន្តែរូបគេបានប្រាប់ខ្ញុំថា រូបគេមិនអីទេ ប៉ុន្តែយើងត្រូវតែពិនិត្យមើលជាមុនសិន»។ ប៉ុន្តែ ទោះបីជាយ៉ាងណា ក្រុម Liverpool កំពុងតែស្ថិតយ៉ាងប្រកៀកក្នុងការឈានទៅវគ្គពាក់កណ្តាលផ្តាច់ព្រ័ត្រ បន្ទាប់ពីការប្រកួតនេះ ហើយពួកគេនឹងឈានទៅកាន់ការប្រកួតជើងទី2 នាកីឡដ្ឋាន Etihad នៅសប្តាហ៍ក្រោយទាំងការជឿជាក់។ ក្រុមម្ចាស់ផ្ទះ បានចាប់ផ្តើមយ៉ាងល្អ និងបានបង្ហាញពីទម្រង់លេងយ៉ាងមុតស្រួច ខណៈដែលពួកគេបានស៊ុតបាល់បញ្ចូលទីដល់ទៅ 3គ្រាប់ក្នុងចន្លោះពេលត្រឹមតែ 19នាទីប៉ុណ្ណោះក្នុងតង់ទី1៕

ប្រភពពី៖ Sky Sports

April 5, 2018

ជម្រើសម៉ាស៊ីនត្រជាក់សម្រាប់រដូវក្តៅនេះ LG Dual Cool Smart Inverter របស់ក្រុមហ៊ុន LG

សីតុណ្ហភាពក្តៅបំផុតប្រចាំឆ្នាំខិតជិតមកដល់ហើយខណៈ ពេលដែលបចេ្ចកវិទ្យាថ្មីរបស់ LG បានមកដល់ដើម្បីត្រៀមខ្លួនដោះស្រាយបញ្ហាអាកាសធាតុក្តៅជូនលោកអ្នកជាមួយនឹងម៉ាស៊ីនត្រជាក់ LG Dual Cool smart inverter ដែលមានលក្ខណះពិសេសជាច្រើន ជួយអោយអ្នកប្រើប្រាស់ទាំងអស់សន្សំសំចៃភ្លើង ត្រជាក់កាន់តែលឿន ងាយស្រួលប្រើ និងផ្តល់នូវផាសុភាពជូនលោកអ្នក។

ថាមពលដ៏មានប្រសិទ្ធិភាព រួមជាមួយនិងអនុភាពដ៏ត្រជាក់

ម៉ាស៊ីនត្រជាក់ LG Dual Cool បានភ្ជាប់មកជាមួយនៅបច្ចេកវិទ្យា Smart inverter Compressor និងDual inverter Compressor ដែលកាត់បន្ថយនូវការប្រើប្រាស់ថាមពលអគ្គីសនីរហូតដល់ 70%។ ម៉ាស៊ីនត្រជាក់ LG Dual Inverter Compressor មានប្រេកង់បង្វិលខ្ពស់ និងលឿនជាងម៉ាស៊ីនត្រជាក់ធម្មតា ដែលធ្វើអោយត្រជាក់លឿន ត្រជាក់បានយូរ ដំណើរការបានស្ងាត់ល្អ មិនថាស្ថិតក្នុងសីតុណ្ហភាពក្តៅប៉ុណ្ណាក៏ដោយ និងម៉ាស៊ីនត្រជាក់អាចភាយខ្យល់ត្រជាក់ភ្លាមៗទៅដល់គ្រប់កន្លែងទាំងអស់នៅក្នុងបន្ទប់។ វាមានកង្ហារធំជាងមុន 25% ដែលអាចបញ្ចេញខ្យល់យ៉ាងខ្លាំងតាមបំពង់ខ្យល់ ដែលបានរចនាឡើងដ៏ល្អឥតខ្ចោះដើម្បីអោយត្រជាក់សព្វពេញបន្ទប់។

ផាសុខភាព និងរក្សាសុខភាពដ៏ប្រសើរ

ភាពត្រជាក់ដ៏ខ្លាំងក្លាមិនធ្វើអោយអ្នកប្រើប្រាស់ទាស់ចិត្តទេដោយគ្រាន់តែចុចបញ្ជាលើប៊ូតុង “Comfort Air” ម៉ាស៊ីនត្រជាក់ LG Dual Cool បានកែតម្រូវមុំរបស់កង្ហារខ្យល់ ដើម្បីអោយប្រាកដថាខ្យល់បញ្ចេញមិនបានបក់ទៅប៉ះអ្នកប្រើប្រាស់ដោយផ្ទាល់បណ្តាលអោយសីតុណ្ហភាពក្នុងខ្លួនធ្លាក់ចុះនោះទេ។ ម៉ាស៊ីនត្រជាក់នេះដំណើរការក្នុងកំរិតសំលេងស្ងាត់ជាងគេលំដាប់ពិភពលោក ដោយសារតែបច្ចេកវិទ្យាថ្មី LG’s Unique BLCD motor, Skew Fan Technology និងលក្ខណះពិសេសរបស់ Active low vibration (ALV) ។ ហើយវាក៏មានសមត្ថភាពក្នុងការរក្សាសំណើមដ៏មិនគួរអោយជឿដើម្បីផ្តល់នូវបរិយាកាសដ៏មានផាសុខភាពផងដែរ។

សុខភាព គឺជាចំណុចសំខាន់បំផុតដែលក្រុមហ៊ុន LG គិតគូរនៅពេលដែលបង្កើតផលិតផលថ្មី។ ម៉ាស៊ីនត្រជាក់ LG Dual Cool ផ្តល់ជូននូវគុណប្រយោជន៍ដល់សុខភាព និងផាសុកភាពដល់អ្នកប្រើប្រាស់:

Plasmaster lonizer plus ដែលសាបព្រួសអ៊ីយ៉ុងជាងបីលាន ដើម្បីកំចាត់មេរោគអាក្រក់ មិនមែនតែខ្យល់ដែលចូលទៅក្នុងម៉ាស៊ីនត្រជាក់តែប៉ណ្ណោះទេ ប៉ុន្តែសារធាតុទាំងអស់ដែលនៅជុំវិញបន្ទប់អ្នក។
ចម្រោះធូលីបានល្អ លំហូរខ្យល់ សំលេងស្ងាត់ល្អ និងស្រទាប់ស្រទះ 3M ដ៏រឹងមាំដែលស្រួបយក លុបបំបាត់មេរោគដែលបង្កគ្រោះថ្នាក់ និងផ្តល់មកវិញនូវខ្យល់ស្រស់ស្អាត។
ការសំអាតដោយស្វ័យប្រវត្តិ៖ មុខងារសំអាតដ៏ល្អ ដែលការពារការកើតឡើងនៃបាក់តេរីនៅលើឧបករណ៍កំដៅ។ ដោយបំបាត់សំណើម និងមេរោគចេញពីក្នុងម៉ាស៊ីនត្រជាក់មុខងារសំអាតស្វ័យប្រវត្តិ កំចាត់សារធាតុទាំងឡាយណាដែលធ្វើអោយប៉ះពាល់ដល់រាងកាយ រក្សបរិយាកាសក្នុងផ្ទះ និងរក្សាភាពត្រជាក់បានយូរ ទោះបីម៉ាស៊ីនត្រជាក់ប្រើអស់រយៈពេល១០ឆ្នាំហើយក៏ដោយ។

អតិថិជនទាំងអស់អាចអញ្ជើញមកទស្សនានៅការដាក់តាំងបង្ហាញម៉ាស៊ីនត្រាជាក់ LG Dual Cool ស៊េរីថ្មីនេះបាននៅគ្រប់ហាងលក់គ្រឿងអេឡិចត្រូនិចដែលជាអ្នកចែកចាយលក់បន្តរបស់ក្រុមហ៊ុន G Gear និងហាង LG BrandShop គ្រប់សាខាទាំងអស់៕

April 5, 2018

ហានិភ័យនៃការដាក់ប្រាក់បញ្ញើដែលប្រជាពលរដ្ឋត្រូវប្រុងប្រយ័ត្ន

កន្លងមកមានប្រតិបត្តិករឥណទានជនបទមួយចំនួនបានដើរផ្សព្វផ្សាយបំផុសបំផុលដល់ពលរដ្ឋឱ្យដាក់ប្រាក់បញ្ញើនៅស្ថាប័នរបស់ខ្លួនជាថ្នូរនឹងការទទួលបានការប្រាក់ខ្ពស់ត្រឡប់វិញ ដែលធ្វើឱ្យមានភាពឥតសណ្ដាប់ធ្នាប់ និងធនាគារជាតិមានការពិបាកគ្រប់គ្រង ដូច្នេះដើម្បីឱ្យប្រជាពលរដ្ឋបានស្គាល់ច្បាស់អំពីគ្រឹះស្ថានហិរញ្ញវត្ថុទាំងនោះ និងចៀសវាងការភាន់ច្រឡំ ធនាគារជាតិនៃកម្ពុជាបានចេញសេចក្តីប្រកាសព័ត៌មានមួយបង្ហាញថាក្នុងចំណោមគ្រឹះស្ថានមីក្រូហិរញ្ញវត្ថុចំនួនជាង 50ស្ថាប័ននៅក្នុងប្រទេសកម្ពុជា មានស្ថាប័នចំនួនតែ 7ប៉ុណ្ណោះ ដែលមានអាជ្ញាប័ណ្ណទទួលប្រាក់បញ្ញើ។

គ្រឹះស្ថានមីក្រូហិរញ្ញវត្ថុទាំង 7នោះរួមមាន៖

1.គ្រឹះស្ថានមីក្រូហិរញ្ញវត្ថុ ប្រាសាក់(PRASAC)

2.គ្រឹះស្ថានមីក្រូហិរញ្ញវត្ថុ វីស៊ិនហ្វាន់(ខេមបូឌា)(VISIONFUND (CAMBODIA) LTD)

3.គ្រឹះស្ថានមីក្រូហិរញ្ញវត្ថុ ហត្ថាកសិករ លីមីធីត (HATTHA KAKSEKAR LIMITED)

4.គ្រឹះស្ថានហិរញ្ញវត្ថុ អេ អឹម ខេ (AMK PLC.)

5.គ្រឹះស្ថានមីក្រូហិរញ្ញវត្ថុ ក្រេឌីត ភីអិលស៊ី (KREDIT PLC)

6.គ្រឹះស្ថានមីក្រូហិរញ្ញវត្ថុ អម្រឹត ខូ អិល ធី ឌី

7.គ្រឹះស្ថានមីក្រូហិរញ្ញវត្ថុ អិលអូអិលស៊ី(ខេមបូឌា)ភីអិលស៊ី (LOLC (CAMBODIA) PLC)។

ខ្លឹមសារនៃសេចក្តីប្រកាសព័ត៌មានធ្វើឡើងក្នុងគោលបំណងជូនដំណឹងទៅដល់សាធារណជន និងអាជ្ញាធរមានសមត្ថកិច្ចពាក់ព័ន្ធឱ្យបានដឹងថា កន្លងមកធនាគារជាតិនៃកម្ពុជាបានទទួលព័ត៌មានមួយចំនួន និងគ្រឹះស្ថានឥណទានជនបទមួយចំនួនតូចដែលបានក្លាយខ្លួនពីអង្គការមិនមែនរដ្ឋាភិបាលបាននិងកំពុងអូសទាញប្រជាពលរដ្ឋតាមរយៈការប្រមូលប្រាក់បញ្ញើពីសាធារណជន ក្រោមរូបភាព “កិច្ចសន្យាខ្ចីប្រាក់” និងផ្តល់អត្រាការប្រាក់ខ្ពស់ព្រមទាំងការផ្តល់ប្រាក់កម្ចីក្រៅច្បាប់។ ដូច្នេះក្រៅពីគ្រឹះស្ថានហិរញ្ញវត្ថុទាំង7ខាងលើ មិនមានគ្រឹះស្ថានផ្សេងណាទៀតដែលមានសិទ្ធិទទួលប្រាក់បញ្ញើពីសាធារណជនឡើយ។

ពាក់ព័ន្ធករណីនេះលោកឧកញ៉ា ហួត អៀងតុង ប្រធានអគ្គនាយកគ្រឹះស្ថានមីក្រូហិរញ្ញវត្ថុហត្ថាកសិករ លីមីធីត មានប្រសាសន៍ថា កន្លងមកពិតជាមានប្រតិបត្តិករឥណទានជនបទមួយចំនួនដើរផ្សព្វផ្សាយបំផុសបំផុលដល់ពលរដ្ឋឱ្យដាក់ប្រាក់បញ្ញើនៅស្ថាប័នរបស់ខ្លួនជាថ្នូរនឹងការទទួលបានការប្រាក់ខ្ពស់ត្រឡប់មកវិញដូច្នេះមែន ហើយដោយសារមើលឃើញពីភាពអសកម្មទាំងនេះ ទើបធនាគារជាតិចេញសេចក្ដីប្រកាសថ្មីមួយទៀតដើម្បីដាស់ស្មារតីពលរដ្ឋកុំឱ្យជឿតាមការផ្សព្វផ្សាយរបស់គេ ចៀសវាងកើតមានបញ្ហាហានិភ័យណាមួយដែលនាំឱ្យខាតបង់ប្រាក់។

ក្នុងនាមជាថ្នាក់ដឹកនាំគ្រឹះស្ថានឈានមុខមួយ លោកឧកញ៉ាសូមអំពាវនាវទៅដល់សាធារណជន ពិសេសពលរដ្ឋនៅតាមជនបទកុំឱ្យចាញ់បោកគេ និងមុននឹងសម្រេចចិត្តដាក់ប្រាក់បញ្ញើ គឺត្រូវរកស្ថាប័នណាដែលមានទំនុកចិត្ត ពិសេសមានតែស្ថាប័នទាំង7 ខាងលើប៉ុណ្ណោះដែលទទួលបានអាជ្ញាប័ណ្ណពីធនាគារជាតិដែលមានសិទ្ធិទទួលប្រាក់បញ្ញើពីពលរដ្ឋ។

លោកឧកញ៉ាបានបន្ថែមទៀតថា គ្រឹះស្ថានរបស់លោកក៏ជាគ្រឹះស្ថានមួយក្នុងចំណោម គ្រឹះស្ថានទាំង7 ដែលមានសិទ្ធិទទួលប្រាក់បញ្ញើសន្សំពីសាធារណជន ដែលមកទល់បច្ចុប្បន្ន មានអតិថិជនដាក់ប្រាក់ប្រមាណជាង 2ម៉ឺននាក់ដែលមានប្រាក់បញ្ញើសរុបចំនួនជាង370លានដុល្លារ។

ជាមួយគ្នានេះដែរលោក សាយ សូនី ប្រធាននាយកប្រតិបត្តិការទីផ្សារនៃគ្រឹះស្ថានមីក្រូហិរញ្ញវត្ថុប្រាសាក់មានប្រសាសន៍ថា ប្រកាសនេះគឺជាការរំឭកទៅដល់ប្រជាពលរដ្ឋនៅតាមជនបទ ឱ្យពួកគាត់មានការប្រុងប្រយ័ត្ន និងត្រូវស្គាល់ពីគ្រឹះស្ថានហិរញ្ញវត្ថុនោះឱ្យច្បាស់មុននឹងដាក់ប្រាក់បញ្ញើ ដើម្បីចៀសវាងការកើតមានហានិភ័យនាំឱ្យខាតបង់ប្រាក់របស់ខ្លួននៅពេលក្រោយ ដែលករណីនេះកន្លងមកធ្លាប់កើតមាននៅជនបទដាច់ស្រយាលរួចមកហើយ ប៉ុន្តែមិនទាន់កើតមាននៅក្នុងទីក្រុងឬទីប្រជុំជនធំនៅឡើយ ដោយសារតែពលរដ្ឋនៅទីក្រុងមានការយល់ដឹងច្បាស់ពីការដាក់ប្រាក់បញ្ញើនេះ។

លោកថា កន្លងមកលោកក៏ធ្លាប់បានឮព័ត៌មានអំពីភ្នាក់ងារឥណទានជនបទដើរបំផុសឱ្យពលរដ្ឋដាក់ប្រាក់បញ្ញើនៅស្ថាប័នរបស់ខ្លួន ដោយសន្យាថានឹងផ្តល់ការប្រាក់ខ្ពស់ត្រឡប់ទៅវិញដែរ។ ប៉ុន្តែក្រោយពីកើតមានបញ្ហាមិនសមទំនងនេះមកធនាគារជាតិនៃកម្ពុជា បានសហការជាមួយក្រសួងពាក់ព័ន្ធ ដើម្បីបញ្ឈប់បញ្ហាអសកម្មនេះ ហើយឃើញថាទទួលបានចំណុចវិជ្ជមានស្ទើរទាំងស្រុងដោយមកទល់បច្ចុប្បន្ននៅមានភ្នាក់ងារឥណទានជនបទតិចតួចបំផុតដែលនៅតែធ្វើសកម្មភាពបែបនេះ។

លោកបានបន្តថា មកទល់ពេលបច្ចុប្បន្ន ស្ថាប័នរបស់លោកទទួលបានការទុកចិត្តពីអតិថិជនជាច្រើន ដែលដាក់ប្រាក់បញ្ញើដល់ទៅ 55,000នាក់ និងមានប្រាក់បញ្ញើសរុបដល់ទៅ 978លានដុល្លារសហរដ្ឋអាមេរិក៕

April 5, 2018

កំពូលតារាបាល់ទាត់ RUUD VAN NISTELROOY៖ ខ្ញុំចង់ទៅលេងប្រាសាទ អង្គរវត្តខ្លាំងណាស់

ភ្នំពេញ៖ ក្នុងឱកាសជួបជាមួយអ្នកគាំទ្រ របស់ខ្លួនក្នុងថ្ងៃចុងក្រោយ នៃដំណើរទស្សនកិច្ច ទេសចរណ៍នៅលើទឹកដីកម្ពុជា នាត្រីថ្ងៃទី4 ខែមេសា ឆ្នាំ2018 នៅកោះពេជ្រ លោក Ruud van Nistelrooy បានបង្ហាញនូវចំណាប់អារម្មណ៍ផ្ទាល់ខ្លួន និងសម្តែង នូវក្តីសប្បាយរីករាយយ៉ាងខ្លាំង ដល់អ្នកគាំទ្រ ហើយប្រកាសថា នឹងទៅទស្សនា ប្រាសាទអង្គរវត្ត ដែលជាប្រាសាទ មានកេរិ៍ឈ្មោះល្បីល្បាញ លើពិភពលោក ។

លោក Ruud van Nistelrooy ដែលជាអតីតខ្សែប្រយុទ្ធ បាល់ទាត់របស់ក្រុម Manchester United និងក្រុម Real Madrid បានធ្វើការដង្ហែពាន UEFA Champions League ឆ្នាំ2018 និងបានជួបអ្នកគាំទ្រ ដែលរៀបចំដោយស្រាបៀរ Heineken ។

ក្នុងឱកាសជួបជាមួយ អ្នកគាំទ្ររបស់ខ្លួន លោក Ruud van Nistelrooy បានថ្លែងថា លោកមានដំណឹងល្អមួយ សម្រាប់បងប្អូនទាំងអស់គ្នា ហើយនឹងធ្វើឲ្យបងប្អូន មានភាពរំភើបរីករាយ ជាខ្លាំងផងដែរ នោះគឺរង្វាន់ដ៏ធំ ពីរូបលោកផ្ទាល់តែម្តង ។ នៅពេលដែលសួរថា តើលោក Ruud van Nistelrooy មានអារម្មណ៍យ៉ាងណា ដែលមកដល់ប្រទេសកម្ពុជា? លោក Ruud បានបញ្ជាក់យ៉ាងខ្លីថា ” លោកមានភាពសប្បាយរីករាយ ដែលមានឱកាស ជួបជាមួយពលរដ្ឋកម្ពុជា និងស្វែងយល់ពីប្រទេសកម្ពុជា ក៏ដូចជាស្វែងយល់បន្ថែមពីប្រជាជនកម្ពុជា ដោយក្នុងថ្ងៃទី 4ខែមេសានេះ ខ្ញុំបានធ្វើដំណើរទៅទស្សនាព្រះបរមរាជវាំង ហើយនៅថ្ងៃស្អែក ខ្ញុំនឹងទៅទស្សនា ប្រាសាទអង្គរវត្ត”។ ខ្ញុំចង់ទៅលេងឯខេត្តសៀមរាបអង្គរ ព្រោះខេត្តនេះសម្បូរទៅដោយ ប្រាងប្រាសាទជាច្រើន ដែលសុទ្ធសឹងតែជាប្រាសាទ ដែលមានកេរិ៍ឈ្មោះល្បី ជាពិសេសប្រាសាទអង្គរវត្ត ដែលមានភាពល្បីល្បាញ នៅទូទាំងសាកលលោក ខ្ញុំចង់ទៅលេងប្រាសាទ អង្គរវត្តខ្លាំងណាស់។

នារាត្រីចុងក្រោយនេះ កំពូលកីឡាករបាល់ទាត់ លោក Ruud van Nistelrooy បានចុះហត្ថលេខា ជាមួយអ្នកគាំទ្ររបស់ខ្លួន នៅលើអាវ វត្ថុអនុស្សាវរីយ៍ និងបាល់ទាត់ និងមានការថតរូប ជាមួយកំពូលកីឡាករ បាល់ទាត់អន្តរជាតិ និងថតរូបជាមួយពានរង្វាន់ UEFA CHAMPIONS LEAGUE ជាដើម។

អមជាមួយវត្តមាន របស់លោក Ruud van Nistelrooy ស្រាបៀរ Heineken ក៏បាន អញ្ជើញតារាចម្រៀងល្បីៗ ដែលប្រចាំ ព្រះរាជាណាចក្រកម្ពុជា ដើម្បីចូលរួមច្រៀង កំដអារម្មណ៍ភ្ញៀវកិត្តិយសជាតិ និងអន្តរជាតិ នៅក្នុងរាត្រីនោះមានដូចជា៖កញ្ញារ៉េត ស៊ូស្ស៉ាណា ក្រុមក្មេងខ្មែរ កញ្ញាឡូ រ៉ាម៉មនិងក្រុមរាំប្រចាំស្រាបៀ Heineken ផងដែរ។សូមរំលឹកថា កម្មវិធីដំណើរទេសចរណ៍ រយៈពេលបីថ្ងៃ ត្រូវបានរៀបចំឡើង ដោយស្រាបៀរ Heineken ហើយកម្មវិធីនេះ នឹងជំរុញផ្តល់ឲ្យអ្នកគាំទ្រ ទូទាំងពិភពលោក នូវឱកាសផ្ទាល់ ក្នុងការចូលរួម ទទួលបានភាពរំភើបរីករាយ នៃការទស្សនាការប្រកួតនេះ តាមរយៈយុទ្ធនាការ របស់ស្រាបៀរ Heineken ដែលមានឈ្មោះថា “ចែករំលែកភាពរំភើបរីករាយ ចែករំលែកពានរង្វាន់”៕

April 5, 2018

ពាន UEFA Champions League បង្ហាញវត្តមានលើកដំបូង លើឆាកស្រាបៀរ Heineken នៅកម្ពុជា

ភ្នំពេញ៖ បន្ទាប់ពី វត្តមានអតីតកំពូលកីឡាករ ដ៏ល្បីល្បាញ នៃក្រុម Manchester United កីឡាករ Ruud Van Nistelrooy បានមកដល់កម្ពុជា នៅយប់ថ្ងៃទី២ ខែមេសា ឆ្នាំ២០១៨នេះ ក្រុមហ៊ុន ស្របៀរ Heineken បាននាំយក ការភ្ញាក់ផ្អើលមួយ ដល់អ្នកគាំទ្រ នោះគឺ កាបង្ហាញ ពាន UEFA Champions League នៅលើឆាកស្រាបៀរ Heineken ហើយក៏ជាលើកដំបូង និងអស្ចារ្យ ផងដែលនៅកម្ពុជា ។

ដើម្បីស្វាគមន៍នៅកម្មវិធី ដំណើរទេសចរណ៍ ពានរង្វាន់ក្របខ័ណ្ឌ UEFA Champions League ដែលក្រុមហ៊ុនស្រាបៀរ Heineken ប្រចាំកម្ពុជា បានប្រកួតប្រជែង ជាមួយបណ្តាប្រទេសជាង ១៩២ ដើម្បីដណ្តើមយក ឱកាសធ្វើជាម្ចាស់ផ្ទះ នៃកម្មវិធីនេះ ដោយបានធ្វើការដង្ហែលពាន UEFA Champions League មកកាន់ ឆាកស្រាបៀរ Heineken និងផ្តល់ឱកាស ដល់អ្នកគាំទ្រ ថតរូបទុកជាអនុស្សាវរីយ៍ ព្រមជាមួយការរៀបចំតន្ត្រី និងការទទួលទានស្រាបៀរ Heineken ដែលជាស្រាបៀរលំដាប់ពិភពលោក ។

សូមរំលឹកថា លោក Ruud Van Nistelrooy ត្រូវបានចាត់ទុកថា ជាកីឡាករដ៏ឆ្នើមបំផុតម្នាក់ ក្នុងជំនាន់របស់គាត់ ដោយស៊ុតបញ្ចូលទីបាន ១៥០គ្រាប់ ក្នុង ២១៩ប្រកួត សម្រាប់ក្រុម Manchester United និងជាកីឡាករស៊ុតបញ្ចូលទី ច្រើនជាងគេ ក្នុងកំណត់ត្រាបាល់ទាត់អឺរ៉ុប របស់ក្លិបនេះ និងជាកីឡាករស៊ុតបាល់ បញ្ចូលទីច្រើនជាងគេបី សម័យកាល ក្នុងក្របខ័ណ្ឌ UEFA Champions League និងបានមកកាន់ប្រទេសកម្ពុជា ក្នុងគោលបំណង ទស្សនកិច្ច ៣ថ្ងៃ និងចូលរួមក្នុងកម្មវិធី ដំណើរទេសចរណ៍ ពានរង្វាន់ក្របខ័ណ្ឌ UEFA Champions Leagueនៅកម្ពុជា ។

អតីតកីឡាករ Ruud van Nistelrooy នឹងធ្វើការចែករំលែកបទពិសោធន៍ ដល់អ្នកគាំទ្រ និងចំណេះដឹង របស់លោក ដើម្បីជួយណែនាំ អ្នកមានទេពកោសល្យ ខាងបាល់ទាត់ ជំនាន់ក្រោយ ឲ្យសម្រេចបាននូវ គោលដៅរបស់ពួកគេ ។

គួរបញ្ជាក់ថា កម្មវិធីដំណើរទេសចរណ៍ រយៈពេលបីថ្ងៃ ត្រូវបានរៀបចំឡើង ដោយស្រាបៀរ Heineken ហើយកម្មវិធីនេះ នឹងជំរុញផ្តល់ឲ្យអ្នកគាំទ្រ ទូទាំងពិភពលោក នូវឱកាសផ្ទាល់ ក្នុងការចូលរួម ទទួលបានភាពរំភើបរីករាយ នៃការទស្សនាការប្រកួតនេះ តាមរយៈយុទ្ធនាការ របស់ស្រាបៀរ Heineken ដែលមានឈ្មោះថា “ចែករំលែកភាពរំភើបរីករាយ ចែករំលែកពានរង្វាន់”៕

April 4, 2018

បើគ្មានអ្វីប្រែប្រួល ធនាគារ SMEs នឹងកើតនៅឆ្នាំ2019

ភាពបរាជ័យលើការដោះស្រាយឧបសគ្គក្នុងការអភិវឌ្ឍសហគ្រាសខ្នាតតូច និងមធ្យមអស់រយៈពេលជាច្រើនឆ្នាំ ដោយម្ចាស់សហគ្រាសក្នុងស្រុកបានត្អូញត្អែរឥតល្ហែអំពីការខ្វះលទ្ធភាពពង្រីកអាជីវកម្មរបស់ខ្លួននោះ រាជរដ្ឋាភិបាលកម្ពុជាទំនងជាអាចនឹងបង្កើតធនាគារសម្រាប់សហគ្រាសធុនតូច និងមធ្យមនេះជាផ្លូវការនៅឆ្នាំ2019។ “ដំណើរការកសាងនីតិវិធីកំពុងត្រូវបានរៀបចំ…” នេះតាមការអះអាងរបស់ ឯកឧត្តមវង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។

ការបង្ហាញពីជំហរបង្កើតធនាគារ SMEs នេះ ត្រូវបានថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុអះអាងថា បន្ទាប់ពីមើលឃើញពីគម្លាតខ្លាំងនៃការអភិវឌ្ឍអាជីវកម្មនៅក្នុងប្រទេសកម្ពុជា ដែលខ្វះការផ្សារភ្ជាប់រវាងសហគ្រាសតូច និងសហគ្រាសធំនោះ។ ការបង្ហាញពីដំណើរការបង្កើតធនាគារនេះ បានធ្វើឡើងក្រោយពីប្រមុខរាជរដ្ឋាភិបាលកម្ពុជា សម្តេចនាយករដ្ឋមន្ត្រី ហ៊ុនសែន បានប្រកាសជាសាធារណៈលើកដំបូងកាលពីចុងឆ្នាំ2017។

ឯកឧត្តម វង្សី វិស្សុត បានថ្លែងថា រដ្ឋមិនចង់លួកដៃចូលក្នុងការបង្កើតធនាគារមួយនេះទេ ប៉ុន្តែក្នុងល្បឿននៃការអភិវឌ្ឍសង្គមរយៈពេលប្រមាណ 20ឆ្នាំកន្លងមកនេះ វិស័យឯកជន និងវិស័យហិរញ្ញវត្ថុឯកជនមិនបានបំពេញគម្លាតនៃការអភិវឌ្ឍនេះទេ ដែលបណ្តាលឱ្យមានវិស័យសហគ្រាសខ្នាតតូចបំផុតច្រើន និងសហគ្រាសធំៗក៏មានច្រើនដែរ។

ឯកឧត្តម វង្សី វិស្សុត បានបញ្ជាក់ថា៖ “ប្រព័ន្ធធនាគារយើងសព្វថ្ងៃនេះ មានតែធំបំផុត និងតូចបំផុត ប៉ុន្តែធនាគារថ្នាក់កណ្តាលបែជាអត់មាន ក្នុងផ្នែកសេដ្ឋកិច្ចក៏បែបហ្នឹង ក្នុងវិស័យហិរញ្ញវត្ថុក៏បែបហ្នឹង។

បើតាមប្រសាសន៍ ឯកឧត្តម វង្សី វិស្សុត ធនាគារ SMEs នឹងត្រូវបង្កើតឡើងនៅឆ្នាំ2019 បើសិនគ្មានអ្វីប្រែប្រួលទេនោះ ហើយធនាគារនេះនឹងនាំមុខក្នុងការជំរុញការអភិវឌ្ឍ ដើម្បីទាក់ទាញការចូលរួមពីផ្នែកហិរញ្ញវត្ថុឯកជន។ “អត្រាការប្រាក់ និងលក្ខខណ្ឌត្រូវតែពិសេសជាងធនាគារ និងគ្រឹះស្ថានមីក្រូហិរញ្ញវត្ថុដែលមាននាពេលបច្ចុប្បន្ន។

កាលពីថ្ងៃទី20 ខែធ្នូ ឆ្នាំ2017 សម្តេច ហ៊ុន សែនធ្លាប់បានប្រកាសថា រាជរដ្ឋាភិបាលកម្ពុជានឹងឈានទៅបង្កើតធនាគារថ្មីមួយទៀតសម្រាប់ផ្តល់ឥណទានដល់សហគ្រាសធុនតូច និងមធ្យម ដោយចាប់ផ្តើមពីដើមទុន 100លានដុលា្លរអាមេរិក។

ប្រមុខរដ្ឋាភិបាលបានអះអាងនៅពេលនោះថា គម្រោងបង្កើតធនាគារថ្មីមួយទៀតនេះ គឺដើម្បីបង្កើនការផលិតក្នុងស្រុក បម្រើសេចក្តីត្រូវការរបស់ប្រជាពលរដ្ឋ និងជំរុញការនាំចេញ ព្រមទាំងបង្កើនឱកាសការងារកាន់តែច្រើនទៀតសម្រាប់ប្រជាពលរដ្ឋ។

យោងតាមប្រកាសរបស់ក្រសួងឧស្សាហកម្ម និងសិប្បកម្ម សហគ្រាសធុនតូច គឺជាសហគ្រាសដែលមានកម្លាំងពលកម្មចាប់ពី 10នាក់រហូតដល់ 49នាក់ ជាមួយដើមទុនចាប់ពី 1ម៉ឺនដុល្លាររហូតដល់ 19.9ម៉ឺនដុល្លារ រីឯសហគ្រាសធុនមធ្យម គឺជាសហគ្រាសដែលមានកម្លាំងពលកម្មចាប់ពី 50នាក់រហូត 199នាក់ ជាមួយដើមទុនចាប់ពី 20ម៉ឺនដុល្លារ រហូតដល់ជិត 1លានដុល្លារ។

យោងរបាយការណ៍របស់ធនាគារជាតិនៃកម្ពុជា ការផ្តល់កម្ចីដល់ផ្នែកសិប្បកម្ម ឬឧស្សាហកម្មកែច្នៃ (កម្មន្តសាល) មានត្រឹមតែ 6.3%ប៉ុណ្ណោះនៃកម្ចីឥណទានសរុបដែលបានផ្តល់ដល់ផ្នែកជាច្រើនដូចជា ការជួញដូររាយស្មើការជួញដូរដុំ កសិកម្ម រុក្ខាប្រមាញ់ និងនេសាទ សំណង់ ការទិញផ្ទះផ្ទាល់ខ្លួន ការជួញដូរអចលនទ្រព្យ សណ្ឋាគារ និងភោជនីយដ្ឋាន និង វិស័យលម្អិតជាច្រើនទៀត៕

April 4, 2018

អ្នកវិទ្យាសាស្ត្រទទួលស្គាល់ថា ភាពឯកាអាចជះផលអាក្រក់ដល់សុខភាព

ដោយសារតែការវិវឌ្ឍរបស់ពិភពលោក មនុស្សម្នាក់ៗបានចាប់ផ្តើមមានការរវល់ខ្លាំងជាមួយនឹងការងារ ការសិក្សា អាជីវកម្ម និងបច្ចេកវិទ្យា ធ្វើឱ្យពួកគេកាន់តែឃ្លាតឆ្ងាយពីទំនាក់ទំនងដោយផ្ទាល់ជាមួយមនុស្សដទៃ ខណៈគ្រួសារខ្លះទៀតមានការជួបជុំគ្នាតិចបំផុត។

Share of adults reporting they felt lonely some/all of the time in the United Kingdom (UK) in November 2014, by age group

ជាឧទាហរណ៍ជាក់ស្តែង អ្នកស្រាវជ្រាវបាននាំអ្នកទាំងអស់គ្នាឱ្យមើលទៅលើជីវិតស្ត្រីម្នាក់ដែលមានអាយុ 60ឆ្នាំដែលកំពុងមានបញ្ហាផ្នែកផ្លូវកាយ ហើយធ្លាក់ចុះទ្រុឌទ្រោមយ៉ាងឆាប់រហ័ស។ គាត់ប្រហែលជាអាចចាប់ផ្តើមពីអាការឈឺឆ្អឹងខ្នង បន្ទាប់មកឈឺក្បាលម្តងម្កាល ហើយមានអារម្មណ៍ថា សុខភាពរាងកាយចុះទ្រុឌទ្រោមជាបន្តបន្ទាប់។ ពេលខ្លះគាត់បានទៅធ្វើតេស្តសុខភាព ហើយវេជ្ជបណ្ឌិតបែរជារកមិនឃើញអាការដែលខុសប្លែក ឬបញ្ហាផ្នែកសុខភាពរាងកាយនោះទេ តែគាត់នៅតែមានបញ្ហាសុខភាព។

បញ្ហាទាំងអស់នេះប្រហែលជាអាចកើតមានឡើងចំពោះប្រជាជនខ្មែរយើងមួយចំនួនដូចគ្នា ដែលមានអាការមិនស្រួល ឬមិនស្រណុកក្នុងខ្លួន តែពេលទៅដល់មន្ទីរពេទ្យ បែរជារកមិនឃើញមានរោគសញ្ញាអ្វីគួរឱ្យកត់សម្គាល់នោះទេ។

បន្ទាប់ពីគេបានស្រាវជ្រាវលម្អិតពីប្រវត្តិរបស់អ្នកជំងឺរួចមក គេបានរកឃើញថា គាត់ធ្លាប់ជាមនុស្សដែលបានបាត់បង់ប្តីកាលពី 5ឆ្នាំមុន ហើយរស់នៅតែម្នាក់ឯងតាំងពីពេលនោះរហូតមក ខណៈដែលកូនរបស់គាត់ចំនួន 3នាក់សុទ្ធតែទៅរស់នៅឆ្ងាយពីគាត់ទាំងអស់។ អ្នកជំងឺបានជួបនឹងកូនចៅរបស់គាត់តែម្តងប៉ុណ្ណោះក្នុងមួយឆ្នាំ ហើយសម្រាប់មិត្តភ័ក្តិរបសគាត់វិញ គឺបានជួបគ្នាតែក្នុងឱកាសពិសេសៗម្ដងម្កាលតែប៉ុណ្ណោះ ដែលជាហេតុធ្វើឱ្យគាត់ចំណាយពេលនៅផ្ទះតែម្នាក់ឯងច្រើនជាងជួបមនុស្សដទៃ។

ជាការសន្និដ្ឋានក្នុងរឿងនេះ និងលទ្ធផលនៃស្រាវជ្រាវលើអ្នកជំងឺផ្សេងទៀត គេសង្កេតឃើញថា បញ្ហាចុះទ្រុឌទ្រោមខាងផ្លូវចិត្ត និងសុខភាពរាងកាយទាំងអស់នេះ បណ្តាលមកពីការបាត់បង់ទំនាក់ទំនងជាមួយមនុស្សដទៃ និងមានភាពតានតឹងធុញទ្រាន់ក្នុងអារម្មណ៍ (strees & boredom)។ ដោយក្នុងការស្រាវជ្រាវនោះបានបង្ហាញយ៉ាងច្បាស់ថា អ្នកដែលមានភាពឯកា ច្រើនមានបញ្ហាប្រឈមផ្នែកសុខភាពកាយ និងចិត្តខ្ពស់ជាងមនុស្សធម្មតា ហើយឆាប់ចុះទ្រុឌទ្រោមមុនអាយុ។

តាមរយៈការស្រាវជ្រាវនៅសាកលវិទ្យាល័យ Brigham Young University ដែលផ្តោតការសិក្សាលើមនុស្សជាច្រើននាក់ផ្សេងៗគ្នាដែលកំពុងរស់នៅក្នុងស្ថានភាពឯកា និងរស់នៅដាច់ពីគេនោះ បានបង្ហាញឱ្យឃើញថា 50%នៃពួកគេបានស្លាប់មុនអាយុកំណត់។ ភាពឯកា និងការរស់នៅឆ្ងាយពីសង្គម ក៏មានការពាក់ព័ន្ធនឹងបញ្ហាលើសឈាម ឡើងជាតិកូលេស្តេរ៉ូល និងជំងឺតានតឹងធុញថប់អារម្មណ៍ដែរ ប្រសិនបើពួកគេគេងសម្រាកមិនបានគ្រប់គ្រាន់ ដែលងាយនឹងធ្វើឱ្យសុខភាពធ្លាក់ដុនដាបយ៉ាងឆាប់រហ័សជាងមនុស្សដែលមានកម្លាំងចិត្តរឹងមាំទៅទៀត៕

April 4, 2018

តែមួយយប់ អាជ្ញាធរចិនចាប់ទូរស័ព្ទ iPhone រត់ពន្ធសរុប 80លានដុល្លារ

ចិន៖ ថ្មីៗនេះ អាជ្ញាធរចិនបានបង្ក្រាបករណីរត់ពន្ធទូរស័ព្ទ iPhone ចំនួនដ៏ច្រើនសន្ធឹកមួយ ពីទីក្រុងហុងកុងចូលទៅកាន់តំបន់ផ្សេងៗនៅក្នុងប្រទេសចិន ដែលសរុបជាទឹកប្រាក់មានរហូតដល់ 80លានដុល្លារអាមេរិក។ នេះបើយោងតាមការចេញផ្សាយរបស់ទីភ្នាក់ងារសារព័ត៌មានចិន ស៊ិនហួ។

យោងតាមការចេញផ្សាយរបស់ស៊ិនហួ បានឱ្យដឹងថា នេះជាករណីបង្ក្រាបការរត់ពន្ធទូរស័ព្ទ iPhoneក្នុងទ្រង់ទ្រាយដ៏ធំបំផុតមួយដែលមិនធ្លាប់មាន ពីមុនមកឡើយសម្រាប់ប្រទេសចិន ដែលនៅក្នុង នោះមានមនុស្ស 26នាក់ត្រូវបានឃាត់ខ្លួន។ ក្រុមអ្នករត់ពន្ធទូរស័ព្ទ iPhone បានប្រើប្រាស់យន្តហោះ Drone ដឹកទូរស័ព្ទ iPhone ឆ្លងកាត់ព្រំដែនហុងកុង-ចិន ដោយសកម្មភាពនេះត្រូវបានធ្វើឡើងនៅវេលាយប់ពាក់កណ្ដាលអាធ្រាត្រ ដោយក្នុងនោះមានទូរស័ព្ទ iPhone ប្រមាណជា 15,000គ្រឿង ត្រូវបានរត់ពន្ធក្នុងរយៈពេលតែមួយយប់ប៉ុណ្ណោះ។

គួរបញ្ជាក់ផងដែរថា ហុងកុងគឺ ជាទីផ្សារដ៏ធំបំផុតមួយដែលមានករណីរត់ពន្ធទូរស័ព្ទ iPhone ចូលទីផ្សារប្រទេស ចិនច្រើនជាងគេ ដោយកាលពីឆ្នាំ2015 មានបុរសម្នាក់ត្រូវបានឃាត់ខ្លួន ក្នុងករណីរត់ពន្ធទូរស័ព្ទ iPhone នេះដែរ ដោយនៅពេលនោះ ក្រោយពីធ្វើការឆែកឆេរលើខ្លួនគេរួចមក អាជ្ញាធរបានរកឃើញទូរស័ព្ទ iPhone ចំនួនដល់ទៅ 94គ្រឿង ឯណោះ៕

April 4, 2018

Author: វល័ក្ខ