វល័ក្ខ - La Reine Media

ប្រទេសចិនបង្កើនការនាំចេញអង្ករពីកម្ពុជា ខណៈទីផ្សារអឺរ៉ុបកាន់តែតឹងតែង

អង្ករកំពុងក្លាយជាទំនិញកសិកម្មតែមួយមុខគត់ដែលនាំមកនូវប្រាក់ចំណេញខ្លះក្នុងការជួយរួមចំណែកដល់កំណើនសេដ្ឋកិច្ចរបស់កម្ពុជា ខណៈផលិតផលកសិកម្មដទៃទៀតកំពុងប្រឈមនឹងការលំបាកដ៏ខ្លាំងក្នុងអំឡុងពេលក្រោយៗនេះ។

ប្រទេសចិនដែលមានប្រជាជនច្រើនជាងគេបំផុតលើពិភពលោក បានបញ្ជាទិញផលិតផលអង្ករពីកម្ពុជារហូតដល់ 30ម៉ឺនតោននៅក្នុងឆ្នាំ2018នេះ ដោយមានកំណើនរហូតដល់ 10ម៉ឺនតោន ធៀបនឹងកូតាឆ្នាំ2016 និង2017កន្លងទៅ ដែលមានត្រឹមតែ 20ម៉ឺនតោនប៉ុណ្ណោះ ស្របពេលដែលទីផ្សារអង្ករកម្ពុជាហាក់កំពុងប្រឈមខ្លាំងនៅតំបន់អឺរ៉ុប។

អនុស្សរណៈយោគយល់គ្នាស្តីពីពាណិជ្ជកម្មអង្ករ ត្រូវបានចុះហត្ថលេខារវាង ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា និងលោកអុី ស៊ីប៉ ប្រធានក្រុមហ៊ុនសាជីវកម្មនាំចេញ-នាំចូលផ្នែកធញ្ញជាតិ ប្រេងឥន្ធនៈ និងចំណីអាហារ (COFCO)ដើម្បីនាំចូលអង្កររហូតដល់ 30ម៉ឺនតោនពីប្រទេសកម្ពុជាក្នុងឆ្នាំ2018នេះទៅកាន់ប្រទេសចិន។

ការសន្យានាំចូលផលិតផលអង្ករពីប្រទេសកម្ពុជាដោយបង្កើនចំនួនកូតាជាបន្តបន្ទាប់ គឺជាឱកាសសម្រាប់ផលិតផលអង្ករកម្ពុជាក្នុងការពង្រីកទីផ្សារទៅកាន់ប្រទេសដែលមានប្រជាជនច្រើនជាងគេក្នុងពិភពលោកមួយនេះ ហើយក៏ជាឱកាសបង្កើននូវជញ្ជីងពាណិជ្ជកម្មឱ្យកាន់តែមានភាពប្រសើរជាងមុនសម្រាប់ផលិតផលនាំចេញរបស់កម្ពុជា ខណៈដែលប្រទេសទាំងពីរមានគម្លាតពាណិជ្ជកម្មរហូតដល់ជិត 4ពាន់លានដុល្លារអាមេរិក។

ក្នុងឆ្នាំ2017 កន្លងទៅ កម្ពុជាបាននាំចេញអង្ករទៅកាន់ទីផ្សារចិនជាង 21ម៉ឺនតោន ហើយចំនួនកូតាថ្មីសម្រាប់ឆ្នាំថ្មី2018នេះនឹងបង្កើនឱកាសដល់រោងម៉ាស៊ីន និងកសិកររបស់កម្ពុជាបន្ថែមទៀត។ នេះបើតាមការលើកឡើងរបស់សហព័ន្ធស្រូវអង្ករកម្ពុជា ក្រោយការចុះហត្ថលេខារបស់ភាគីកម្ពុជានឹងសាធារណរដ្ឋប្រជាមានិតចិន។

កាលពីថ្ងៃទី15 ខែមករា កន្លងទៅនេះ ក្រសួងពាណិជ្ជកម្មបានរៀបចំជំនួបពិភាក្សាការងារជាមួយប្រធានផ្នែកកិច្ចសហប្រតិបត្តិការបច្ចេកទេស និងក្របខ័ណ្ឌសមាហរណកម្មនៃសន្និសីទអង្គការសហប្រជាជាតិស្តីពីពាណិជ្ជកម្ម និងអភិវឌ្ឍន៍ (UNCTAD) ដើម្បីពិភាក្សាអំពីការធ្វើពាណិជ្ជកម្មអង្ករទៅកាន់ទីផ្សារនៃសហភាពអឺរ៉ុប បន្ទាប់ពីមានការតវ៉ារបស់ប្រទេសអុីតាលី ដើម្បីកំណត់កូតានាំចូលអង្ករពីប្រទេសកម្ពុជា ក៏ដូចជាប្រទេសមួយចំនួនទៀតតាមរយៈប្រព័ន្ធអនុគ្រោះពន្ធ EBA (Everything But Arms) ដែលអនុញ្ញាតឱ្យទំនិញអង្កររបស់កម្ពុជារួចពន្ធនាំចូលរហូតដល់ជាង 100ដុល្លារក្នុងមួយតោន។

ក្នុងជំនួបពិភាក្សាដោយមានវត្តមានឯកឧត្តម វ៉ា រុតសាន្ត ប្រធានក្រុមទីប្រឹក្សាក្រសួងពាណិជ្ជកម្ម ឯកឧត្តម សុខ ពុទ្ធីវុធ ប្រធានសហព័ន្ធស្រូវអង្ករកម្ពុជា និងលោក Stefano INAMA ប្រធានផ្នែកប្រតិបត្តិការបច្ចេកទេស និងផ្នែកលើកកម្ពស់គម្រោងសមាហរណកម្មពាណិជ្ជកម្ម និងភាពក្រីក្រនៃ UNCTAD។ ជំនួបនេះត្រូវបានរៀបចំឡើងដើម្បីពិភាក្សាលើការឆ្លើយតបចំពោះការតវ៉ារបស់ប្រទេសអុីតាលីដែលតែងស្នើឱ្យគណៈកម្មការអឺរ៉ុបប្រើប្រាស់វិធានការការពារ(Safeguard Measures) ក្នុងការទប់ស្កាត់ការនាំចូលអង្ករពីប្រទេសកម្ពុជា។

នៅក្នុងកិច្ចប្រជុំនោះ លោក Stefano INAMA បានពន្យល់លម្អិតអំពីស្ថានភាពដាំដុះនៅប្រទេសអុីតាលី និង មូលហេតុធ្លាក់ថ្លៃអង្ករនៅក្នុងប្រទេសអុីតាលី ដែលនាំទៅដល់ការតវ៉ានោះ។ ជាមួយគ្នានោះ លោកក៏បានបង្ហាញឱ្យឃើញថា ការនាំចេញអង្ករពីកម្ពុជាទៅកាន់ប្រទេសអុីតាលីក៏បានថយចុះ 51តោន ចន្លោះឆ្នាំ 2015 / 2016 និងឆ្នាំ2016 / 2017 ពី 320តោន មកនៅត្រឹម 269តោន។

លោក Stefano INAMA បានស្នើឱ្យភាគីកម្ពុជាគោរពឱ្យបានខ្ជាប់ខ្ជួននូវលក្ខខណ្ឌតម្រូវនានារបស់សហភាពអឺរ៉ុប ដើម្បីចៀសផុតពីការកំណត់កូតាសម្រាប់អង្ករពីប្រទេសកម្ពុជា។

យោងតាមទិន្នន័យនាំអង្ករចេញក្នុងឆ្នាំ2017 អង្កររបស់កម្ពុជាត្រូវបាននាំទៅកាន់ទីផ្សារតំបន់អឺរ៉ុបស្មើនឹង 43% ដែលមានបរិមាណ 275.557 តោន នៃការនាំចេញសរុបទៅកាន់ទីផ្សារពិភពលោកទាំង 63ប្រទេស។

ឯកឧត្តម វ៉ា រុតសាន្ត ប្រធានក្រុមទីប្រឹក្សាក្រសួងពាណិជ្ជកម្ម បានបញ្ជាក់ប្រាប់ដល់អ្នកជំនាញការ UNCTAD ថា សហព័ន្ធស្រូវអង្ករកម្ពុជាបានចុះបញ្ជីវិញ្ញាតកម្ម (Certification Mark) (ម្លិះអង្គរ Malys Angkor) ក្នុងនាមសហព័ន្ធសម្រាប់ការប្រើប្រាស់ទៅថ្ងៃអនាគត ដែលជាការបញ្ជាក់ថា គុណភាពអង្ករកម្ពុជា នឹងត្រូវបានធានានៅលើទីផ្សារអន្តរជាតិ ដែលជាផ្នែកនៃការអនុវត្តតាមការចង់បានរបស់គណៈកម្មការអឺរ៉ុប៕

January 27, 2018

វិស័យសំណង់នៅតែកើនឡើង តែមានការប្រកួតប្រជែងខ្លាំង

មកទល់បច្ចុប្បន្នវិស័យសំណង់នៅកម្ពុជានៅតែបន្តកើនឡើងជាលំដាប់ បើប្រៀបធៀបនឹងឆ្នាំ 2016 និងឆ្នាំ2017កន្លងទៅ វិស័យសំណង់មានការកើនឡើងប្រមាណជាជាង 22%។ ដូច្នេះគេសួរថា តើការកើនឡើងនៃវិស័យសំណង់នេះ អាចមានការប្រកួតប្រជែងខ្លាំងទៅលើអ្វីដែរ?

លោក លី សុភារិទ្ធិ អ្នកគ្រប់គ្រងផ្នែកវិស្វកម្មនៃក្រុមហ៊ុន Camtrust Engineering មានប្រសាសន៍ថា គិតត្រឹមដំណាច់ឆ្នាំ2017កន្លងទៅ ក្រុមហ៊ុនរបស់លោកបានទទួលគម្រោងម៉ៅការសាងសង់កើនឡើងប្រមាណជា 15% បើធៀបនឹងឆ្នាំ2016 ដោយភាគច្រើនម៉ៅការសាងសង់លើគម្រោងអគារខុនដូ និងអគារខ្ពស់។ លោកបន្តថា តួលេខនៃការកើនឡើងនេះបង្ហាញថា វិស័យសំណង់នៅកម្ពុជាក៏មានការកើនឡើងដូចគ្នា ដោយសារប្រជាពលរដ្ឋឮខ្មែរចាប់ផ្តើមមានទម្លាប់រស់នៅក្នុងអគារផ្ទះល្វែងទំនើបៗ ពិសេសរស់នៅតាមបុរីបែបស៊ីវិល័យ មានគុណភាព សោភ័ណភាព ផាសុកភាព និងសុវត្ថិភាពសម្រាប់ក្រុមគ្រួសារគាត់ទាំងមូល។

លោកបានបន្តថា ការហូរចូលនៃវិនិយោគិនមកពីក្រៅប្រទេសក៏ជាចំណែកមួយដ៏ធំដែលធ្វើឱ្យវិស័យសំណង់នៅកម្ពុជាមានការកើនឡើងខ្លាំងពិសេសវិនិយោគិនជនជាតិចិនដែលបោះទុនវិនិយោគសាងសង់អគារខ្ពស់ៗនៅកម្ពុជាដើម្បីលក់ ឬជួលទៅឱ្យអ្នកវិនិយោគផ្សេងៗដែលចូលមកបណ្តាក់ទុនរកស៊ីនៅកម្ពុជា។ ជាមួយគ្នានេះដែរ លោក ឃឹម ពៅ ប្រធានក្រុមហ៊ុន KP Decor & Construction បានមានប្រសាសន៍ថា បច្ចុប្បន្នក្រុមហ៊ុនរបស់លោកកំពុងទទួលបានការគាំទ្រច្រើនពីក្រុមហ៊ុនសំណង់ផ្សេងៗ ទាំងក្នុង និងក្រៅស្រុកពិសេសក្រុមហ៊ុនចិនតែម្តង។

លោកទទួលស្គាល់ថា វិស័យសំណង់នៅកម្ពុជានៅតែបន្តរឹងមាំទៅមុខជានិច្ច ហើយថា ដើម្បីឱ្យមានការគាំទ្រខ្លាំងពីអតិថិជន លុះត្រាតែក្រុមហ៊ុនសំណង់នីមួយៗត្រូវគិតលើគុណភាព សោភ័ណភាព សុវត្ថិភាពជាចម្បង និងតម្លៃក៏ត្រូវមានការប្រកួតប្រជែងផងដែរ។

លោកបន្ថែមទៀតថា “ដើម្បីឱ្យមានការគាំទ្រច្រើនពីអតិថិជន មុននឹងសាងសង់ ក្រុមហ៊ុនត្រូវគិតពីអតិថិជនគោលដៅជាមុនថា តើការសាងសង់ត្រូវលក់ទៅឱ្យអតិថិជនកម្រិតណា? កម្រិតA អ្នកមានចំណូលខ្ពស់ កម្រិតB អ្នកមានចំណូលមធ្យម និងកម្រិតC សម្រាប់អ្នកមានចំណូលទាប។ សម្រាប់ក្រុមហ៊ុន KP Decor & Construction បច្ចុប្បន្នបានទទួលការសហការជាមួយក្រុមហ៊ុនចិនក្នុងការបណ្តាក់ទុនរួមគ្នាសាងសង់សំណង់លំនៅឋានសម្រាប់អ្នកមានចំណូលទាបនៅតាមបណ្តោយផ្លូវជាតិលេខ 3 ជិតបុរីសន្តិភាពនៅក្រោយចូលឆ្នាំចិនខាងមុខ ដែលមានតម្លៃត្រឹមតែចន្លោះពី 2ម៉ឺនដុល្លារ ទៅ 3ម៉ឺនដុល្លារប៉ុណ្ណោះ។

ទោះជាយ៉ាងណា បើគេក្រឡេកទៅមើលគម្រោងសាងសង់ខុនដូ និងអគារខ្ពស់ៗនៅរាជធានីភ្នំពេញវិញ ឃើញថាមានការកើនឡើងខ្លាំង ខណៈដែលតម្រូវការបានថយចុះ។ យោងតាមរបាយការណ៍ក្រសួងដែនដី នគរូបនីយកម្ម និងសំណង់បានឱ្យដឹងថា ក្នុងឆ្នាំ2017 កន្លងទៅ គម្រោងសាងសង់នៅទូទាំងប្រទេសមានចំនួន 3,052គម្រោង ដែលមានតម្លៃប៉ាន់ស្មានទឹកប្រាក់វិនិយោគប្រមាណជាជាង 6ពាន់លានដុល្លារអាមេរិក បើប្រៀបធៀបរយៈពេលដូចគ្នាក្នុងឆ្នាំ2016 កើនឡើងប្រមាណជា 22.3% ដែលក្នុងនោះក្រុមហ៊ុនអាជីវកម្មសិក្សាគម្រោងប្លង់សាងសង់មានចំនួន 275ក្រុមហ៊ុនដែលបានចុះបញ្ជីនៅក្រសួងក្នុងឆ្នាំ2017 ក្នុងចំនួននេះមានក្រុមហ៊ុនបរទេសចំនួន 102ក្រុមហ៊ុន។ ចាប់តាំងពីការអនុវត្តរហូតដល់ដំណាច់ឆ្នាំ2017 មានក្រុមហ៊ុនចំនួន 1,047 កំពុងប្រតិបត្តិការសាងសង់នៅកម្ពុជា។

ដោយឡែកការវិនិយោគលើវិស័យសំណង់ អគារខ្ពស់ៗ និងអគារលំនៅឋានជាលក្ខណៈបុរី នៅរាជធានីភ្នំពេញចាប់ពីឆ្នាំ2000 ដល់2017 គឺមានអគារខ្ពស់ៗចំនួន 979អគារ ក្នុងនោះអគារខ្ពស់ចាប់ពី5 ទៅ9ជាន់មានចំនួន 579អគារ។ កម្ពស់ចាប់ពី10 ទៅ19ជាន់មានចំនួន 290អគារ។ កម្ពស់ពី20 ទៅ29ជាន់មានចំនួន 70អគារ។ កម្ពស់ពី30 ទៅ39ជាន់មានចំនួន 29អគារ និងកម្ពស់ពី40ជាន់ឡើងទៅមាន11អគារ។

វិស័យសំណង់ត្រូវបានគេមើលឃើញថា បានបង្កើតការងារជាច្រើនប្រភេទដល់ប្រជាពលរដ្ឋខ្មែរ គិតជាមធ្យមតម្រូវការពលកម្មចន្លោះពី 25ម៉ឺនទៅ26ម៉ឺននាក់ក្នុងមួយថ្ងៃ ក្នុងនោះនៅរាជធានីភ្នំពេញត្រូវការកម្លាំងពលកម្មចន្លោះពី 12 ទៅ13ម៉ឺននាក់។ សម្រាប់តម្លៃកម្មករគ្មានជំនាញទទួលបានបៀវត្សរ៍ចន្លោះពី 260ដុល្លារដល់ 300ដុល្លារ ចំណែកម្មករមានជំនាញទទួលបានចំណូលចាប់ពី 375 ទៅ 560ដុល្លារក្នុងមួយខែ រីឯវិស្វករ ស្ថាបត្យករ និងអ្នកជំនាញទទួលបានចន្លោះពី 400 ទៅ 2500ដុល្លារក្នុងមួយខែ៕

January 26, 2018

ខេម ត្រៀមខ្លួនថតកុនជាលើកដំបូង

តារាចម្រៀងប្រុស ដែលមហាជនបានដាក់រហស្សនាមថា “អធិរាជសំនៀងស្អក” ដ៏ពីរោះរណ្តំដួងចិត្ត មានឈ្មោះពិតលោក ប៉ុន សុណារិនហៅលោក ខេម បានបង្ហើបប្រាប់ឱ្យដឹងថា នៅពេលដ៏ខ្លីខាងមុខនេះ លោកនឹងបង្ហាញវត្តមាននៅក្នុងខ្សែភាពយន្តដែលផលិតឡើងដោយផលិតកម្មថោន ក្នុងតំណែងជាតួឯក។

តារាចម្រៀងរូបនេះ ក៏បានបង្ហើបប្រាប់ពីចំណាប់អារម្មណ៍ផ្ទាល់ខ្លួនលើការថតកុនដែរថា “ចំពោះរឿងថតកុននេះ កន្លងមកមានខាងផលិតករជាច្រើនដែរបានមកទាក់ទងហៅខ្ញុំទៅថតជាហូរហែ តែដោយសារខ្ញុំ និងផលិតករ ចរចាគ្នាមិនត្រូវលើតម្លៃ ពេលវេលា និងសាច់រឿងមិនត្រូវចិត្តខ្ញុំជាដើម។ ចំណែកឯផលិតកម្មថោនវិញ ប្រសិនបើផលិតកម្មតម្រូវឱ្យថតកុនវិញនោះ ខ្ញុំក៏ត្រូវតែថតតាមការចាត់ចែងរបស់គេដែ។

គួរកត់សម្គាល់ផងដែរថា លោក ខេម តារាចម្រៀងប្រចាំផលិតកម្មថោន ដែលមានឈ្មោះដើមលោក ប៉ុន សុណារិន មានស្រុកកំណើតនៅស្រុកកំពង់ឆ្នាំង ខេត្តកំពង់ឆ្នាំង បានប្រឡូកចូលវិថីសិល្បៈនាអំឡុងពេលឆ្នាំ2007 តាមរយៈការចូលរួមប្រកួតប្រជែងក្នុងកម្មវិធី Boy Band របស់ស្ថានីយទូរទស្សន៍ CTN និងបានធ្វើជាតារាចម្រៀងឱ្យស្ថានីយទូរទស្សន៍មួយនេះរយៈពេលមួយឆ្នាំផងដែរ។ កាលពីឆ្នាំ2008 លោក ខេមបានចូលច្រៀងនៅផលិតកម្មថោន ខណៈតារាចម្រៀងសំឡេងស្អករូបនេះ មិនសូវទទួលបានប្រជាប្រិយភាព និងការចាប់អារម្មណ៍ពីទស្សនិកជនប៉ុន្មាននោះទេនាពេលនោះ៕

January 26, 2018

ថ្ងៃបុណ្យជាតិរបស់អូស្ត្រាលី រំឭកមនុស្សទូទៅឱ្យចេះការពារស្បែកបញ្ចៀសជំងឺមហារីក

ជារៀងរាល់ឆ្នាំ នៅថ្ងៃទី 26 ខែ មករា ជនជាតិអូស្ត្រាលីទាំងអស់ក្នុងពិភពលោក តែងតែប្រារព្ធពិធីបុណ្យជាតិរបស់ខ្លួន ដែលហៅថា Australia Day ដោយក្នុងនោះ ក្រុមហ៊ុនសាន់ស្តុប ប្រចាំនៅកម្ពុជា (Sunstop Cambodia) ដែលជាក្រុមហ៊ុនរបស់ប្រទេសអូស្ត្រាលី ក៏ចូលរួមអបអរសារទថ្ងៃបុណ្យជាតិ ប្រទេសអូស្ត្រាលីដែរ។

នៅលើពិភពលោក ប្រទេសដែលទទួលរងគ្រោះដោយជំងឺមហារីកស្បែកខ្ពស់ជាងគេ គឺប្រទេសអូស្ត្រាលី ដោយសារតែឥទ្ធិពលនៃ ពន្លឺព្រះអាទិត្យ និងកាំរស្មីយូវី ដូច្នេះហើយក្រុមហ៊ុន សាន់ស្តុប នៅឯប្រទេសអូស្ត្រាលី បានផលិតនូវឡេការពារកំដៅថ្ងៃ សាន់ស្តុប (Sunstop) ដែលមានគុណភាពខ្ពស់ ដើម្បីបំពេញតម្រូវការដល់ប្រជាជនអូស្ត្រាលី ដែលចង់ការពារស្បែកពីកាំរស្មីយូវី ដែលអាចបណ្តាលឱ្យមានជំងឺមហារីកស្បែក។ ក្រុមហ៊ុនសាន់ស្តុប មិនត្រឹមតែផលិត ឡេការពារកំដៅថ្ងៃ សម្រាប់តែប្រទេសអូស្ត្រាលីប៉ុណ្ណោះទេ ប៉ុន្តែ Sunstop ក៏ត្រូវបាននាំចូល មកកាន់ទីផ្សាប្រទេសកម្ពុជាផងដែរ ដើម្បីបំពេញតម្រូវការប្រជាជនកម្ពុជា ដែលចង់ការពារស្បែកពីកាំរស្មីយូវី ក៏ដូចជា ការពារស្បែកពីជំងឺមហារីក ជាមួយនឹងផលិតផលដែលមានគុណភាពខ្ពស់ និងត្រូវបានណែនាំដោយវេជ្ជបណ្ឌិតផ្នែកសើស្បែក។

គួរបញ្ចាក់ផងដែរថា ឡេការពារកំដៅថ្ងៃ Sunstop បានបំពេញតម្រូវការរបស់ប្រជាជនអូស្ត្រាលី ក៏ដូចជាប្រជាជនទូទាំងពិភពលោក អស់រយៈពេលប្រហែលជា 3 ទសវត្សរ៍មកហើយ ដោយសាន់ស្តុប មានលក់នៅក្នុងប្រទេសចំនួន 25 ទូទាំងពិភពលោក ហើយសាន់ស្តុប ត្រូវបានចុះក្នុងបញ្ជីនៃស្ថាប័ន TGA តាំងពីឆ្នាំ 1985 មកម្ល៉េះ (ដែលស្ថាប័ន TGA គឺជាផ្នែកមួយនៃនាយកដ្នានសុខាភិបាលនៃប្រទេសអូស្ត្រាលី)។ ចំណែកឯប្រទេសកម្ពុជាវិញ សាន់ស្តុប មានវត្តមានជាង 2 ទសវត្សរ៍មកហើយដែរ ដោយទទួលបានការគាំទ្រខ្លាំងពីសំណាក់ប្រជាជនខ្មែរគ្រប់វ័យ ព្រោះថា សាន់ស្តុប គឺជាផលិតផលដែលមានគុណភាពខ្ពស់ មានសារធាតុផ្សំភាគច្រើនគឺជាសារធាតុថ្នាំពេទ្យ ដូច្នេះវាការពារកំដៅថ្ងៃបានល្អ ។

ផលិតផលឡេការពារកំដៅថ្ងៃ សាន់ស្តុប ចែកចេញជា2ប្រភេទ គឺ ប្រភេទ SPF 30+ និង SPF 50+។ សម្រាប់ឡេការពារកំដៅថ្ងៃ សាន់ស្តុប SPF 30+ គឺជាឡេការពារកំដៅថ្ងៃសម្រាប់មនុស្សទូទៅ ដែលចង់ការពារស្បែកពីកំដៅថ្ងៃជារៀងរាល់ថ្ងៃ។ ដោយឡែកចំពោះប្រភេទ SPF 50+ វិញ គឺសម្រាប់អ្នកដែលចង់ទទួលបានការការពារខ្លាំង ជាពិសេសសម្រាប់អ្នកដែលធ្វើការក្រោមពន្លឺថ្ងៃយូរលើសពី 4 ម៉ោង ឬ អ្នកដែលមានស្បែកស ហើយងាយនឹងប្រតិកម្មនៅពេលត្រូវពន្លឺថ្ងៃ។ ម្យ៉ាងទៀតអ្វីដែលល្អសម្រាប់ឡេការពារកំដៅថ្ងៃទាំង2នេះគឺ អាចប្រើបានទាំងដងខ្លួន និងផ្ទៃមុខ ហើយកូនក្មេងក៏អាចប្រើបានដែរ។ ឡេការពារកំដៅថ្ងៃ សាន់ស្តុប ក៏អាចប្រើជំនួសម្សៅទ្រនាប់ មុនពេលតុបតែងមុខក៏បាន។ ឡេលាបការពារកំដៅថ្ងៃ Sunstop SPF 30+ មាន2ចំណុះ – ដបតូច ចំណុះ 45ml (រាងតូចល្មម ងាយស្រួលយកទុកដាក់តាមខ្លួន) ។ ដបធំ ចំណុះ 120ml (ដបធំប្រើបានយូរ)។

ឡេលាបការពារកំដៅថ្ងៃ Sunstop SPF 50+ មានតែមួយចំណុះប៉ុណ្ណោះគឺ ចំណុះ 50ml។

សាន់ស្តុប គឺជាជម្រើសដ៏ល្អបំផុតសម្រាប់ប្រជាជនកម្ពុជា ដែលចង់ការពារស្បែកពីកាំរស្មី យូវី ក៏ដូចជាជំងឺមហារីកស្បែក សូម្បីតែកញ្ញា ពេជ្រ សោភា ដែលជាតារាចំរៀងដ៏ល្បី ក៏ប្រើប្រាស់ ឡេការពារកំដៅថ្ងៃ Sunstop ជារៀងរាល់ថ្ងៃដែរ។ សាន់ស្តុប មានលក់នៅគ្រប់ ឱសថស្ថានតូចធំនានាទូទាំងប្រទេសកម្ពុជា។ ប្រសិនបើអ្នករស់នៅទីក្រុងភ្នំពេញ អ្នកអាចរកជាវនៅតាមបណ្តាលផ្សារទំនើប តូចធំ ឱសថស្ថានម្តុំផ្សាអូឡាំពិក ឬ ឱសថស្ថានម្តុំផ្សាតាប៉ាង ចំណែកឯអ្នករស់នៅបណ្តាលខេត្តផ្សេងៗ លោកអាចរកជាវបាននៅតាមបណ្តាល ផ្សារម៉ាត ឬ ឱសថស្ថាននៅក្នុងតំនប់ដែលអ្នករស់នៅ។ សំរាប់ពត៌មានបន្ថែម សូមទំនាក់ទំនងតាមរយៈបណ្តាញសង្គមហ្វេសបុកផ្ទាល់ www.facebook.com/SunstopCambodia ។

សាន់ស្តុប គឺជាផលិតផលពិតរបស់ប្រទេសអូស្ត្រាលី!

January 26, 2018

ការវិនិយោគដែលធូរថ្លៃជាងគេលើពិភពលោក គឺការអាន

ការអានជារឿងសំខាន់ណាស់សម្រាប់មនុស្សទាំងអស់លើពិភពលោក ព្រោះថា ប្រភពចំណេះដឹងទាំងអស់ត្រូវបានគេកត់ត្រាទុកនៅក្នុងក្បួនច្បាប់នានា ដែលក្នុងនោះសៀវភៅក៏ជាប្រភពនៃចំណេះដឹងដែលមនុស្សពូកែៗជាច្រើនបានចងក្រងទុកសម្រាប់អប់រំមនុស្សជំនាន់ក្រោយដែរ។

សហស្ថាបនិកបណ្ណាល័យបញ្ញវន្ត លោក សុខ ឡាក់ បានលើកឡើងថា នៅលើពិភពលោកនាពេលបច្ចុប្បន្ននេះគឺ សៀវភៅមានដល់ទៅ 130 លានចំណងជើង បើតាមការស្រាវជ្រាវរបស់ក្រុមហ៊ុន Google ហើយប្រភពចំណេះដឹងទាំងអស់នោះសុទ្ធតែជាទ្រព្យសម្បត្តិដ៏សំខាន់ដែលអាចធ្វើឱ្យមនុស្សបង្កើតលុយបានរាប់លានដុល្លារ។

លោក សុខ ឡាក់ បាននិយាយថា៖ “ មានមនុស្សពូកែៗច្រើនណាស់នៅលើពិភពលោកនេះដែលបានបន្សល់ទុកស្នាដៃដ៏ច្រើន ដែលយើងទាំងអស់គ្នាអាចយកមកប្រើបានដោយគ្រាន់តែចំណាយពេលវេលាដើម្បីអានឯកសារដែលគាត់ខិតខំចងក្រងទុកប៉ុណ្ណោះ។ ស្ថាបនិកបណ្ណាល័យខាងលើបានលើកឡើងផងដែរថា ការអាន គឺជាការវិនិយោគដ៏ឆ្លាតវៃ ដែលទទួលបានទាំងចំណេះដឹង ការកម្សាន្ត និងអាចប្រើប្រាស់វាសម្រាប់ជាប្រយោជន៍ដល់ជីវិតបាន ព្រោះថា បើអ្នកទាំងអស់គ្នាប្រៀបធៀបជាមួយការវិនិយោគបែបផ្សេងវិញ យើងនឹងមើលឃើញថា ការអាន គឺជាការវិនិយោគដែលចំណាយតិច តែទទួលបានផលច្រើន។

លោកបានបញ្ជាក់ផងដែរថា បណ្ណាល័យនៅកម្ពុជានាពេលបច្ចុប្បន្ន គឺមានដល់ទៅជាង 1ម៉ឺនបណ្ណាល័យ គឺច្រើនជាងប្រទេសអភិវឌ្ឍន៍មួយចំនួន ដូចជាប្រទេសសិង្ហបុរីជាដើម តែជាអកុសលប្រជាជនឮខ្មែរជាច្រើនមិនទាន់បានដឹងច្បាស់ហើយក៏មិនទាន់បានយកចិត្តទុកដាក់ខ្លាំងលើការងារអានដែរ។

លោក សុខ ឡាក់ បាននិយាយថា៖ “បើចង់ឱ្យប្រជាជនខ្មែរចាប់ផ្តើមអាន ហើយទទួលបានព័ត៌មានគ្រប់ជ្រុងជ្រោយ លុះត្រាតែយើងធ្វើឱ្យបណ្ណាល័យទាំងអស់នោះដំណើរការ។ លោកបានសង្កត់ធ្ងន់ថា នាពេលបច្ចុប្បន្ននេះ មានបណ្ណាល័យមួយចំនួនមិនសូវត្រូវបានគេយកចិត្តទុកដាក់នោះទេ ដែលពេលខ្លះវាបណ្តាលមកពីយើងខ្វះអ្នកជំនាញនៅបណ្ណាល័យ។ តាមពិតនៅបណ្ណាល័យគឺត្រូវការអ្នកជំនាញច្រើនដើម្បីប្រឹក្សាយោបល់ ជ្រើសរើសសៀវភៅដែលត្រូវនឹងស្ថានភាពរបស់អ្នកអាន ដើម្បីកុំឱ្យអ្នកដែលចង់អានមានការហត់នឿយខ្លាំងក្នុងពេលចាប់ផ្តើម

ដំបូង ឬផ្តល់នូវប្រភពដែលសំខាន់ខ្លាំងសម្រាប់អ្នកស្រាវជ្រាវ។ ម្យ៉ាងវិញទៀត អ្នកជំនាញបណ្ណាល័យក៏ជាអ្នកដែលអាចជួយឱ្យអ្នកទាំងអស់គ្នាចំណាយថវិកាតិចក្នុងការស្វែងរកឯកសារនានាដែលខ្លួនចង់បានដើម្បីដោះស្រាយបញ្ហានានាដែលកំពុងប្រឈមក្នុងការរស់នៅ ក្នុងការងារ ឬក្នុងអាជីវកម្មជាដើម៕

January 26, 2018

ជ្រលងកោងរបស់ LG OLED បានបង្ហាញនូវភាពភ្ញាក់ផ្អើលក្នុងព្រឹត្តិការណ៍តាំងពិព័រណ៍គ្រឿងអេឡិចត្រូនិក CES 2018

បច្ចេកវិទ្យាអេក្រង់ LG OLED បានធ្វើអោយអថិតិជន និងអ្នកទស្សនានៅក្នុងព្រឹត្តិការណ៍ CES ភ្លឺភ្នែក នៅឯរដ្ឋឡាវេហ្ហ្រាស (Las Vegas) សហរដ្ឋអាមេរិច។ ឧត្តមភាពបច្ចេកវិទ្យារបស់ LG ត្រូវបាលេចរូបរាងឡើងនៅក្នុងអេក្រង់រាងកោង និងប៉ោងរបស់ទូរទស្សន៍ OLED។

បច្ចេកវិទ្យាអេក្រង់ LG OLED អាចបង្កើតភិចសែល (Pixels) ដោយខ្លួនឯងសម្រាប់ត្រួតពិនិត្យភាពភ្លឺច្បាស់នៃរូបភាព និងកម្រិតគុណភាពរូបភាព ដោយគ្មានបែងចែកនូវប្រភពពន្លឺ ដែលធ្វើឱ្យការបង្ហាញមានលក្ខណៈច្បាស់ ស្រាល ស្តើង និងផ្លាស់ប្តួរបានយ៉ាងល្អ។ ជាមួយនិងបច្ចេកវិទ្យាដ៏អស្ចារ្យមួយនេះ LG អាចផ្តល់ជូននូវ Frame OLED ដែលអាចបត់បែនគ្រប់រូបភាពទៅលើការងារអាជីវកម្ម B2B និងអាចផ្លាស់ប្តូរតាមការចង់បានសម្រាប់ការងារដូចជា៖ ការងារសិល្បៈ និងមុខងារឌីជីថលផងដែរ។

នៅក្នុងព្រឹត្តិការណ៍តាំងពិពរណ៍កគ្រឿងអេឡិចត្រូនិក CES 2018, អតិថិជនអាចទទួលបានបទពិសោធន៍ក្នុងការដើរទស្សនាក្នុងជ្រលងដែលមានប្រវែង 28 មែត្រ ជាមួយផ្ទាំង LG OLED ដែលមានរូបរាងច្រើនជាង 90 ខោងផត និងមាន Frame អេក្រង់ប៉ោងរហូតដល់ទៅ 156។

បច្ចេកវិទ្យា LG OLED បានបង្កើតអេក្រង់របស់ទួរទស្សន៍ប្រភេទថ្មី និងចុងក្រោយដ៏មហិមាដែលអាចផ្តល់ជូននូវរូបភាពយ៉ាងត្រចេះត្រចង់ ជាមួយនិងពណ៌រូបភាពខ្មៅដិតច្បាស់ ដែលមើលទៅហាក់បីដូចជាការទស្សនាខាងក្រៅផ្ទាល់ សូម្បីតែមើលពីចំហៀងក៏ដោយ។ នេះជាមោទនភាពរបស់ LG ដែលបច្ចេកវិទ្យា OLED របស់ខ្លួនមានសមត្ថភាពក្នុងការបើក ឬបិទភិចសែលដោយខ្លួនឯង ផ្តល់ជូននូវការទស្សនារូបភាពពិតៗ ដែលពុំធ្លាប់មានពីមុនមក៕

https://youtu.be/vUUgGhtpR1o

January 26, 2018

វីតាមីនសំខាន់ 8យ៉ាង ដែលគួរបានទទួលមុនពេលតាំងគភ៌ និងក្នុងពេលមានគភ៌

តើអ្នកគិតយ៉ាងណាដែរ នៅពេលជិតមានសមាជិកថ្មីម្នាក់កើតឡើងនៅក្នុងជីវិត និងក្នុងគ្រួសាររបស់អ្នក? អ្នកប្រហែលជាត្រេកអរខ្លាំងណាស់និងប្រាកដក្នុងចិត្តបានតែម្ដងថា អ្នកត្រូវតែបំប៉នគភ៌មួយនេះយ៉ាងល្អបំផុត ហើយអ្វីដែលអ្នកនឹងធ្វើចំពោះកូនសម្លាញ់របស់អ្នកក្នុងអំឡុងពេលតាំងគភ៌នោះគឺ ការទទួលទានអាហារដែលល្អ និងមានប្រយោជន៍ដល់រាងកាយរបស់កូនដែលនៅក្នុងគភ៌។ អាហារគឺសំខាន់មិនអាចខ្វះបានឡើយ បើអ្នកមានផែនការចង់បានបុត្រ នោះគឺការទទួលទានវីតាមីន ហើយបើចង់ឱ្យល្អបំផុតនោះ អ្នកគួរតែទទួលទានតាំងពីមុនពេលតាំងគភ៌ និងក្នុងអំឡុងពេលមានគភ៌ ហើយវីតាមីនដែល ឡារ៉ែន ចង់ណែនាំឱ្យទទួលទាន មានដូចតទៅ ៖

1/ អាស៊ីតហ្វូលិក

អាស៊ីតហ្វូលិក មានភាពសំខាន់ខ្លាំងណាស់សម្រាប់ស្ត្រីមានគភ៌គ្រប់រូប។ ស្ត្រីដែលមានផែនការចង់បានកូនគួរទទួលទានអាស៊ីតហ្វូលិកយ៉ាងតិចមុនពេលមានគភ៌1-3ខែ ហើយបើដឹងថា ខ្លួនតាំងគភ៌ហើយ គួរតែទទួលទានភ្លាមតែម្ដងព្រោះអាស៊ីតហ្វូលិកនឹងជួយកាត់បន្ថយភាពពិការតាំងពីពេលកើតដំបូងរបស់ទារកបាន។ ស្ត្រីអាចទទួលទានអាស៊ីតហ្វូលិកក្នុងរូបបែបជាថ្នាំ ឬអាហារក៏បាន អាស្រ័យលើភាពងាយស្រួល។ បើត្រូវការទទួលទានជាអាហារក៏មានដូចជា គ្រាប់សណ្ដែកខ្មៅ បន្លែស្លឹកបៃតង ស្លឹកផ្ទី និងថ្លើម ជាដើម។

2/ វីតាមីន C

បើស្ត្រីដែលចាប់ផ្ដើមតាំងគភ៌បានទទួលទានវីតាមីន C យ៉ាងត្រឹមត្រូវ នឹងជួយការពារការរលូតបុត្របាន ហើយបើចំពោះបុរសៗដែលត្រូវការចង់ឱ្យភរិយារបស់ខ្លួនមានកូនវិញនោះ ក៏គួរតែទទួលទានវីតាមីនឱ្យច្រើនៗដែរ ព្រោះវានឹងជួយបង្កើនបរិមាណទឹកអសុចិ និងធ្វើឱ្យមេជីវិតរឹងមាំទៀតផង។

3/ វីតាមីន E

វីតាមីន E សំខាន់ខ្លាំងណាស់ ទាំងស្ត្រី ទាំងបុរស។ សម្រាប់បុរស វីតាមីន E នឹងធ្វើឱ្យទឹកមេជីវិតរឹងប៉ឹង ហើយសម្រាប់មនុស្សស្រីនឹងធ្វើឱ្យចរន្តនៃការទម្លាក់ស៊ុតញីដំណើរការយ៉ាងប្រក្រតី។

4/ ជាតិស័ង្កសី

សំខាន់សម្រាប់ទាំងបុរស និងទាំងស្ត្រីគ្រប់រូបដូចគ្នា ព្រោះនឹងធ្វើឱ្យប្រព័ន្ធបន្តពូជធ្វើការបានល្អ និងការបំបែកខ្លួនរបស់កោសិកាធ្វើការបានយ៉ាងមានប្រសិទ្ធភាព។ ប្រភពអាហារដែលសម្បូរដោយសារធាតុសំខាន់មួយនេះរួមមានដូចជា ទឹកដោះគោជូរ យ៉ាអួ សណ្ដែកខៀវ អយស្ទ័រ សាច់មាន់ បង្គាស្រស់ សាច់គោ គ្រាប់ល្ង និងគ្រាប់ល្ពៅជាដើម។

5/ វីតាមីន B6

ជួយគ្រប់គ្រងប្រព័ន្ធការទម្លាក់ស៊ុតឱ្យដំណើរការប្រក្រតីសម្រាប់ស្ត្រី និងចំពោះស្ត្រីមានផ្ទៃពោះដែលមានអាការចាញ់កូន អាចទទួលទានវីតាមីន B6 ដើម្បីជួយសម្រាលអាការនេះបាន។ អាហារដែលមានវីតាមីន B6 ច្រើន មានដូចជា បន្លែផ្ទី មើមស្ពៃ ម្ទេស ខ្ទឹមស ទំពាំងបារាំង ប្រូខូលី ត្រីធូណា បន្លែខាត់ណា សាច់ត្រី ថ្លើម ស្ពៃក្ដោប និងជីបារាំង។

6/ អាហារដែលសម្បូរទៅដោយសារធាតុប្រឆាំងអនុមូលឥស្សរៈ

អាហារពពួកនេះនឹងជួយឃុំគ្រងស៊ុតញីរបស់ស្ត្រី និងមេជីវិតរបស់បុរសពីភាពខុសប្រក្រតីរបស់ប្រព័ន្ធក្រូម៉ូហ្សូម។ ប្រភពអាហារដែលសំខាន់គឺ បង្គាស្រស់ ផ្សិត ថ្លើម សាច់ត្រី សាច់ត្រីធូណា សាច់ត្រីសាល់ម៉ុន និងសាច់ត្រីឆ្ពង់។

7/ សារធាតុដែក

សារធាតុដែក ជាប្រភពអាហារសំខាន់ក្នុងការមិនធ្វើឱ្យលោកអ្នកកើតជំងឺលោហិតស្លេក និងសំខាន់ខ្លាំងណាស់សម្រាប់ស្ត្រីមានគភ៌។ ប្រភពអាហារដែលយើងរកសារធាតុនេះបានគឺ តៅហ៊ូ គ្រាប់សណ្ដែក បន្លែត្រកួន និងគ្រាប់ល្ពៅ។ល។

8/ អាស៊ីតខ្លាញ់ចាំបាច់ផ្សេងៗ

ដូចជា អូមេហ្កា 3 ជាដើម វានឹងជួយគ្រប់គ្រងកម្រិតអ័រម៉ូនរបស់ស្ត្រីមានគភ៌ ធ្វើឱ្យស្បូនរឹងមាំ ជួយដល់ប្រព័ន្ធឈាមរត់ កាត់បន្ថយសភាវប្រសូតមុនកំណត់ និងធ្វើឱ្យទម្ងន់ខ្លួនកូនល្អ។ ប្រភពអាហារសំខាន់ដែលសម្បូរទៅដោយអាស៊ីតខ្លាញ់ល្អ មានដូចតទៅ សណ្ដែកវ៉លណាត់ បង្គាស្រស់ ត្រីសាឌីន ត្រីធូ-ណា ត្រីសាល់ម៉ុន គ្រាប់ហ្វ្លែកស៍ និងត្រីឆ្ពង់។

ស្ត្រីដែលកំពុងតាំងគភ៌ហើយ ឬកំពុងត្រៀមខ្លួនជិតមានគភ៌ បើចង់មានសុខភាពល្អ ក្រៅពីការទទួលទានអាហារហើយ នៅត្រូវហាត់ប្រាណគួបផ្សំផងដែរ។ សម្រាប់ស្ត្រីកំពុងមានគភ៌គួរប្រឹក្សាជាមួយគ្រូពេទ្យសិនមុននឹងចាប់ផ្ដើមទទួលទានអាហារបំប៉នណាមួយ និងមិនគួរទទួលទានច្រើនជ្រុលពេកនោះទេ។ អ្វីដែលសំខាន់ គួរចៀសវាងសភាវជ្រៀតជ្រែកពីរោគផ្សេងៗដែលអាចកើតឡើងបាន ដូចជា ការទទួលសារធាតុពុល ឬការប្រើថ្នាំប្រភេទខ្លះដែលមានផលប៉ះពាល់ជាមួយអ័រម៉ូនក្នុងរាងកាយ៕

January 26, 2018

Apple អាចនឹងឈប់ផលិត និងលក់ iPhone X ព្រោះតែបញ្ហានេះ…

អាមេរិក៖ នៅពេលដែលក្រុមហ៊ុន Apple បានប្រកាសបង្ហាញ iPhone X មានអតិថិជន Apple ជាច្រើនមានការចាប់អារម្មណ៍ជាមួយនឹង iPhone មួយនេះ ជាពិសេសគឺនៅថ្ងៃចេញលក់តែម្ដង ប៉ុន្តែអ្វីដែលគេមើលឃើញជាក់ស្ដែងក្រោយពេលចេញលក់បានប៉ុន្មានខែកន្លងមកនេះ គឺត្រូវការ iPhone X មានចំនួនតិចបំផុត រហូតធ្វើឲ្យ Apple បង្ខំចិត្តកាត់បន្ថយការផលិត។

ក្រុមអ្នកវិភាគជាច្រើន បាននាំគ្នាធ្វើព្យាករណ៍ថា ក្រុមហ៊ុន Apple ទំនងជាបញ្ឈប់ការផលិត iPhone X នៅមុនពេលប្រកាសបង្ហាញវត្តមាន iPhone ជំនាន់ថ្មី។ អ្នកខ្លះទៀតបានលើកឡើងថា ក្រុមហ៊ុន Apple អាចនឹងឈប់ផលិត ព្រមទាំងឈប់លក់ iPhone X នៅលើទីផ្សារថែមទៀតផង ដែលទាំងនេះមកពីតម្រូវការទីផ្សារទាប់ និងធ្លាក់ចុះយ៉ាងខ្លាំង។

KGI Securities ដែលជាស្ថាប័នវិភាគ និងស្រាវជ្រាវទៅលើក្រុមហ៊ុន Apple បានបង្ហាញរបាយការណ៍ស្រាវជ្រាវមួយ និងបានព្យាករណ៍ថា ការលក់ចេញ iPhone X ទៅក្នុងទីផ្សារនាត្រីមាសទី1 ដើមឆ្នាំ 2018 គឺមានចំនួន 18លានគ្រឿង ហើយបើសិនជាធៀបនឹងម៉ូដែលមុនៗ ឃើញថាតួលេខនេះធ្លាក់ចុះគួរឱ្យគត់សម្គាល់ ដែលជាហេតុនាំឱ្យ Apple អាចនឹងឈប់ផលិត ព្រមទាំងឈប់លក់នៅលើទីផ្សារ។

ប្រភពដដែលបានបន្តទៀតថា ការកង្វះនៃតម្រូវការ នឹងធ្វើឱ្យក្រុមហ៊ុន Apple ឈប់ផលិត iPhone X ហើយមូលហេតុធំមួយទៀតដែល Apple មិនចង់ចេញលក់នៅលើទីផ្សារនោះគឺដោយសារតែ មិនចង់លក់ iPhone X ក្នុងតម្លៃថោក៕

https://www.youtube.com/watch?v=K4wEI5zhHB0

January 26, 2018

Southampton បំពេញការផ្ទេរខ្សែប្រយុទ្ធ Carrillo ពីក្លិប Monaco ក្នុងតម្លៃ 19,2លានផោន

ក្លិប Southampton បានបំពេញការចុះហត្ថលេខាជាមួយនឹងខ្សែប្រយុទ្ធសញ្ជាតិអាហ្សង់ទីន Guido Carrillo ក្នុងតម្លៃខ្លួន 19,2លានផោន (ស្មើនឹង 27លានដុល្លារអាមេរិក)។ ក្លិបកំពុងត្រដាបត្រដួសក្នុងក្របខ័ណ្ឌ Premier League មួយនេះ សង្ឃឹមថា នឹងបន្ថែមភាពមុតស្រួចក្នុងតំបន់ប្រយុទ្ធរបស់ពួកគេ ក្រោយពីបានជួបការលំបាកនៅដំណាក់កាលទី1នៃរដូវកាលនេះ ក្រោមការដឹកនាំរបស់លោក Mauricio Pellegrino។

ការនាំយក Carrillo គឺជាការចំណាយប្រាក់ជាលើកទី1ពីកញ្ចប់ថវិកាដែលបានមកពីការលក់ខ្សែការពារ Virgil van Dijk ទៅឱ្យក្លិប Liverpool ក្នុងតម្លៃខ្លួន 75លានផោន ខណៈដែលការទិញកីឡាករថ្មីបន្ថែមទៀតដើម្បីពង្រឹងក្រុម នឹងត្រូវធ្វើឡើងបន្តទៀត។ ក្លិប Southampton ក៏បានចាប់អារម្មណ៍ទៅលើខ្សែបម្រើស្លាបអន្តរជាតហូឡង់ Quincy Promes របស់ក្លិប Spartak Moscow ផងដែរ ខណៈដែលរូបគេអាចនឹងមានតម្លៃខ្លួន៣០លានផោន។

Carrillo ដែលបានចុះហត្ថលេខាជាមួយនឹងក្លិប Southampton រហូតដល់ខែមិថុនា ឆ្នាំ2021នោះ ភាគច្រើនត្រូវបានប្រើប្រាស់ជាកីឡាករបម្រុងនៅរដូវកាលនេះ ដោយបានចូលលេងក្នុងជម្រើសទាំង11នាក់ដំបូងក្នុងការប្រកួតក្របខ័ណ្ឌលីត្រឹមតែ2លើកគត់ ប៉ុន្តែ បានស៊ុតបាល់បញ្ចូលទី5គ្រាប់សម្រាបក្រុមម្ចាស់ជើងឯក Ligue 1 មួយនេះ។

Southampton បានសង្ឃឹមថា នឹងអាចទិញយកខ្សែប្រយុទ្ធវ័យ 26ឆ្នាំរូបនេះ ក្នុងតម្លៃខ្លួនប្រមាណជា15លានផោន ប៉ុន្តែ សំណើរបស់ពួកគេ ត្រូវបានច្រានចោល មុននឹងសម្រេចចិត្តបំពេញការផ្ទេរមួយនេះ ដើម្បីបន្ថែមភាពមុតស្រួចលើតំបន់ប្រយុទ្ធរបស់ពួកគេ។ Carrillo បានឲ្យដឹងក្នុងសេចក្តីថ្លែងការណ៍មួយថា៖ ខ្ញុំពិតជារីករាយណាស់។ វាជាអារម្មណ៍ដ៏អស្ចារ្យក្នុងការចូលរួមជាមួយនឹងក្លិបនេះ៕

ប្រភពពី៖ The Guardian

January 26, 2018

Laporte ស្ថិតកាន់តែកៀកក្នុងការបំពេញការផ្ទេរទៅ Man City ពី Bilbao

ក្លិប Manchester City កំពុងតែស្ថិតយ៉ាងប្រកៀកក្នុងការចុះហត្ថលេខាជាមួយនឹងខ្សែការពារ Aymeric Laporte របស់ក្លិប Athletic Bilbao។ នេះបើយោងទៅតាមការចេញផ្សាយរបស់បណ្តាញសារព័ត៌មាន Sky Sports News។

BILBAO, SPAIN – SEPTEMBER 29: Aymeric Laporte of Athletic Club competes for the ball with Stefan Schwab of SK Rapid Wien during the UEFA Europa League Group F match between Athletic Club and SK Rapid Wien at San Mames stadium on September 29, 2016 in Bilbao, Spain. (Photo by David Ramos/Getty Images)

Man City ត្រូវបានគេយល់ឃើញថា យល់ព្រមក្នុងការចំណាយប្រាក់រំលាយកិច្ចសន្យាចំនួន 57លានផោន (ស្មើនឹង 80,5លានដុល្លារអាមេរិក) ហើយការចរចាផ្សេងៗជាមួយនឹងខ្សែការពារកណ្តាលរូបនេះ កំពុងតែដំណើរការ។

ការនាំយកកីឡាករវ័យ 23ឆ្នាំរូបនេះ នឹងបំបែកំណត់ត្រាទិញចូលកីឡាកររបស់ Man City ក្រោយពីពួកគេបានចំណាយប្រាក់ដល់ទៅ 55លានផោនដើម្បីទិញយកខ្សែបម្រើអន្តរជាតិបែលហ្ស៊ិក Kevin De Bruyne កាលពីឆ្នាំ2015។

កាលពីដើមសប្តាហ៍នេះ បណ្តាញសារព័ត៌មាន Sky Sports News បានចេញផ្សាយថា ការពិភាក្សាផ្សេងៗបានចាប់ផ្តើមរវាងក្លិបទាំងពីរ ជុំវិញកីឡាករម្នាក់ដែល Man City ចុះហត្ថលេខាចាប់តាំងពីលោក Pep Guardiola បានទៅដល់ក្លិបនេះជាលើកដំបូងកាលពីឆ្នាំ2016មកម្ល៉េះ។

ទោះបីជាយ៉ាងណាក៏ដោយ លោក Jose Angel Ziganda គ្រូបង្វឹករបស់ Bilbao បានប្រកាសក្នុងសន្និសីទសារព័ត៌មានមួយថា Laporte ត្រូវបានរំពឹងទុកថា នឹងចូលរួមជាមួយនឹងក្រុមសម្រាប់ការប្រកួតក្របខ័ណ្ឌ La Liga ដោយបានលើកឡើងថា លោកមិនរំពឹងទុកថា ការផ្ទេររបស់គេទៅកាន់ Man City នឹងត្រូវបំពេញនៅចុងសប្តាហ៍នេះឡើយ។ Laporte បានក្លាយជាគោលដ៏ចម្បងសម្រាប់ក្រុម Man City ក្រោយពីពួកគេខកខានក្នុងការចុះហត្ថលេខាជាមួយនឹង Alexis Sanchez ដែលពួកគេបានត្រៀមផ្តល់ខ្លួន 20លានផោន៕

ប្រភពពី៖ Sky Sports

January 26, 2018

Author: វល័ក្ខ