សឿន សំណាង - La Reine Media

អាមេរិកាំងនឹងរំដោះអតីតទាហានពិសេសដែលត្រូវវ៉េណេស៊ុយអេឡាចាប់ខ្លួន

រដ្ឋមន្ត្រីការបរទេសអាមេរិកាំង លោក Mike Pompeo បានអះអាងថា សហរដ្ឋអាមេរិកនឹងប្រើគ្រប់មធ្យោបាយដើម្បីរំដោះអតីតទាហានពិសេសអាមេរិកាំង2រូបដែលសង្ស័យថាត្រូវបានវ៉េណេស៊ុយអេឡាចាប់ខ្លួននាពេលថ្មីៗនេះ។

>ព័ត៌មានទាក់ទង: អតីតទាហានពិសេសអាមេរិកាំងសារភាពថា លោក Trump នៅពីក្រោយ “ផែនការចាប់ជំរឹត” ប្រធានាធិបតីវ៉េណេស៊ុយអេឡា

“យើងនឹងចាប់ផ្ដើមធ្វើការកំណត់យុទ្ធសាស្ត្រដើម្បីរំដោះ បើសិនជាជនជាតិអាមេរិកាំងត្រូវវ៉េណេស៊ុយអេឡាចាប់ខ្លួន”។ លោក Mike Pompeo ថ្លែងបែបនេះនៅក្នុងសន្និសីទសារព័ត៌មានមួយដែលនិយាយអំពីការប្រកាសរបស់ទីក្រុង Caracas ដែលថា ពួកគេកំពុងឃុំខ្លួនអតីតទាហានពិសេសអាមេរិកាំង2រូប ដែលបានចូលរួមក្នុងការវាយឆ្មក់មិនបានសម្រេចមួយនៅឆ្នេរសមុទ្រប្រទេសនេះកាលពីថ្ងៃទី4ឧសភា។

លោក Mike Pompeo អះអាងថា សហរដ្ឋអាមេរិកចង់នាំពលរដ្ឋទាំងអស់របស់ខ្លួនត្រឡប់មកស្រុកវិញ។ លោកថា “បើសិនជារដ្ឋាភិបាលរបស់លោក Maduro សម្រេចចិត្តឃាត់ខ្លួនពួកគេ សហរដ្ឋអាមេរិកនឹងប្រើគ្រប់មធ្យោបាយដែលមានស្រាប់ ដើម្បីនាំពួកគេត្រឡប់មកប្រទេសវិញឱ្យបាន”។

ប្រធានាធិបតីវ៉េណេស៊ុយអេឡា លោក Nicolas Maduro កាលពីថ្ងៃទី4ឧសភា បានប្រកាសថា កងកម្លាំងប្រដាប់អាវុធរបស់ប្រទេសនេះបានទប់ស្កាត់ “ការឈ្លានពាន” ពីដែនសមុទ្រ ហើយបានកម្ទេចទាហានស៊ីឈ្នួល8នាក់ និងចាប់ខ្លួនខ្មាន់កាំភ្លើងជាច្រើននាក់ រួមទាំងពលរដ្ឋអាមេរិកាំង2នាក់ ក្នុងនោះម្នាក់ឈ្មោះ Luke Denman អាយុ34ឆ្នាំ និងម្នាក់ទៀតឈ្មោះ Airan Berry អាយុ41ឆ្នាំ។

ទូរទស្សន៍វ៉េណេស៊ុយអេឡា កាលពីម្សិលមិញបានចាក់ផ្សាយវីដេអូមួយដែលមានឈ្មោះ Luke Denman កំពុងសារភាពកំហុសរបស់ខ្លួន។ នៅក្នុងវីដេអូនោះ Denman បានឱ្យដឹងថា ខ្លួនត្រូវបានអតីតទាហានពិសេសអាមេរិកាំងឈ្មោះ Jordan Goudreau ជ្រើសរើសកាលពីខែធ្នូ2019 ដោយសន្យាថា នឹងឱ្យប្រាក់ឈ្នួល100,000ដុល្លារដើម្បីបង្វឹកខ្មាន់កាំភ្លើងរាប់សិបនាក់ ក្នុងបំណងវាយដណ្ដើមព្រលានយន្តហោះមួយនៅទីក្រុង Caracas ដើម្បីចាប់ជំរឹត និងនាំខ្លួនប្រធានាធិបតីវ៉េណេស៊ុយអេឡា លោក Nicolas Maduro ទៅកាន់សហរដ្ឋអាមេរិក។ Denman ក៏បាននិយាយថា “ប្រធានាធិបតី Donald Trump” នៅពីក្រោយការវាយឆ្មក់នេះ។

រដ្ឋមន្ត្រីក្រសួងយុត្តិធម៌នៃប្រទេសវ៉េណេស៊ុយអេឡា Tarek William Saab មុននោះបានចោទប្រកាន់បក្សប្រឆាំងដែលមានលោក Juan Guaido ជាដើមថា បានចុះកិច្ចសន្យាជួលទាហានស៊ីឈ្នួល ដោយប្រើប្រាស់ខ្ទង់ប្រាក់ពីគណនីរបស់បណ្ដាក្រុមហ៊ុនប្រេងរបស់រដ្ឋដែលកំពុងត្រូវបានសហរដ្ឋអាមេរិកកាន់កាប់។ លោករដ្ឋមន្ត្រីក៏បានបង្ហាញអំពីរូបភាពនៃកិច្ចសន្យារវាង Guaido និង Goudreau ដើម្បីជាភ័ស្ដុតាងទៀតផង។

ភាគីអាមេរិកាំង មានប្រធានាធិបតី Donald Trump និងរដ្ឋមន្ត្រីក្រសួងការពារជាតិ Mark Esper រួមនឹងរដ្ឋមន្ត្រីការបរទេស Mike Pompeo សុទ្ធតែបានច្រានចោលការចោទប្រកាន់ពីភាគីប្រទេសវ៉េណេស៊ុយអេឡា ដែលថា សហរដ្ឋអាមេរិកនៅពីក្រោយខ្នងការវាយឆ្មក់របស់ក្រុមទាហានស៊ីឈ្នួល៕

ប្រភព៖ សារព័ត៌មានបរទេស

May 7, 2020

ក្រោយវិបត្តិកូវីដ-19 ធុរកិច្ចជាច្រើននឹងត្រូវផ្លាស់ប្ដូរ…

មិនអាចបដិសេធបានឡើយថា វិបត្តិការឆ្លងរាតត្បាតនៃមេរោគកូវីដ-19 បានធ្វើឱ្យជីវិតរបស់មនុស្សទូទៅផ្លាស់ប្ដូរ និងមិនត្រឹមតែប៉ុណ្ណោះទេ បណ្ដាអ្នកទីផ្សារ អ្នកសេដ្ឋសាស្ត្រ និងអ្នកធុរកិច្ចផ្សេងៗ សុទ្ធតែបានសន្និដ្ឋានទុកថា ក្រោយវិបត្តិកូវីដ-19 បញ្ចប់ទៅ ធុរកិច្ចផ្សេងៗនៅក្នុងប្រទេស ក៏នឹងប្រែប្រួលផ្លាស់ប្ដូរទៅតាមនោះដែរ ដូច្នេះហើយទើបគ្រប់ផ្នែកត្រូវត្រៀមខ្លួនជាស្រេច ដើម្បីទប់ទល់នឹងភាពផ្លាស់ប្ដូរដែលបម្រុងនឹងកើតឡើងនៅពេលខាងមុខ។

សម្រាប់ធុរកិច្ច ដែលត្រូវកែសម្រួល មានដូចជា…

1. ការលក់ទំនិញផ្សេងៗ និងធុរកិច្ចលក់រាយ៖ ត្រូវបន្ថែមសេវាកម្មតាមប្រព័ន្ធអនឡាញ ត្រូវនាំយកប្រព័ន្ធ ITមកប្រើ ព្រោះដោយសារតែវិបត្តិកូវីដ-19 បានធ្វើឱ្យមនុស្សនាំគ្នាងាកមកទិញទំនិញតាមអនឡាញច្រើនឡើង។

2. ខ្សែចង្វាក់ផ្គត់ផ្គង់៖ ដូចជាការចាត់ចែងរកវត្ថុធាតុដើម ការផលិត រហូតដល់ការលក់ទំនិញទៅដល់ដៃអតិថិជន នឹងផ្លាស់ប្ដូរ ដោយប្រទេសផ្សេងៗទូទាំងពិភពលោក នឹងងាកមកផ្ដល់ភាពសំខាន់ចំពោះការផលិត ការបញ្ជាទិញវត្ថុធាតុដើម និងទំនិញនៅក្នុងប្រទេស ឬបញ្ជាទិញទំនិញពីប្រទេសជិតខាងវិញម្ដង ដើម្បីការពារបញ្ហាការដឹកជញ្ជូន ដែលបណ្ដាលមកពីផលប៉ះពាល់របស់វិបត្តិផ្សេងៗ ដូចដែលបានកើតមានក្នុងអំឡុងវិបត្តិកូវីដ-19។ ក្រៅពីនោះ ឧស្សាហកម្មមួយចំនួន ក៏នឹងមានការផ្លាស់ប្ដូរមូលដ្ឋានផលិតផងដែរ។

3. ការវិនិយោគទុនក្នុងធុរកិច្ចហិរញ្ញវត្ថុ នឹងចែកចាយទៅក្នុងក្រុមធុរកិច្ចផ្សេងៗទៀតកាន់តែច្រើនឡើង៖ ដោយអ្នកវិនិយោគនឹងចែកចាយភាពប្រថុយប្រថាន ដោយការជ្រើសរើសវិនិយោគក្នុងធុរកិច្ចដែលសម្បូរបែប(ច្រើនមុខ) ខ្លាំងជាងវិនិយោគតែក្នុងធុរកិច្ចណាមួយតែ1មុខ ព្រោះវិបត្តិកូវីដ-19 បានធ្វើឱ្យអ្នកវិនិយោគដឹងថា ធុរកិច្ចមួយចំនួន ដែលមើលទៅស្ថិតស្ថេរគង់វង្ស និងមានកម្រៃល្អនោះ បើសិនជាជួបនឹងសភាវវិបត្តិអ្វីមួយ ក៏អាចនឹងដួលរលំគ្រាំងភ្លាមៗតែម្ដងដែរ។

4. ធនាគារ និងគ្រឹះស្ថានហិរញ្ញវត្ថុ នឹងកាត់បន្ថយចំនួនសាខា និងកាត់បន្ថយចំនួនបុគ្គលិក លឿនជាងផែនការដែលបានរៀបចំទុក ដោយសារតែវិបត្តិកូវីដ-19 បានធ្វើឱ្យអតិថិជននាំគ្នាងាកមកប្រើប្រាស់សេវាកម្ម E-Banking យ៉ាងច្រើនវិញម្ដង។

ធុរកិច្ចដែលធំធាត់ឡើង មានដូចជា…

1.ធុរកិច្ច IT ផ្សេងៗ ដូចជា ការធ្វើវេបសាយ អ៊ែបភ្លីខេស្សិន ប្លុកឆេន (បណ្ដាញការរក្សាទុកព័ត៌មាន) ដោយសារតែវិបត្តិកូវីដ-19 បានធ្វើឱ្យធុរកិច្ចផ្សេងៗ ងាកមកប្រើប្រាស់សេវាកម្មអៃធីទាំងនេះច្រើនឡើង និងក្លាយជាផ្នែកមួយរបស់ធុរកិច្ច។

2. ធុរកិច្ចបញ្ជូនទំនិញ និងអាហារ…ដោយសារតែវិបត្តិកូវីដ-19 ដែលមនុស្សម្នាត្រូវស្ថិតនៅក្នុងផ្ទះ ធ្វើឱ្យមានការបញ្ជាទិញម្ហូបអាហារ និងទំនិញតាមអនឡាញកាន់តែច្រើនឡើង និងក្លាយជារបៀបរបបជីវិតថ្មីមួយដែលមនុស្សមានទម្លាប់ ទើបបណ្ដាលឱ្យធុរកិច្ចបញ្ជូនអាហារ និងទំនិញ មានសញ្ញាថា នឹងរីកធំធាត់ឡើងយ៉ាងឆាប់រហ័ស។

ធុរកិច្ចដែលកើតថ្មី មានដូចជា…

បង្រៀនតាមប្រព័ន្ធអនឡាញផ្សេងៗ៖ ដោយសារតែវិបត្តិកូវីដ-19 មនុស្សបាននាំគ្នាងាកមកចាប់អារម្មណ៍សិក្សារៀនសូត្ររឿងផ្សេងៗដោយខ្លួនឯងតាមរយៈប្រព័ន្ធអនឡាញច្រើនឡើង មិនថាតែការរៀនធ្វើម្ហូបអាហារ រៀនជំនាញការងារសិល្បៈផ្សេងៗ ការរៀនច្រៀង ការហាត់ប្រាណ ឬការរៀនតាមអនឡាញ ដើម្បីប្រកបអាជីពផ្សេងៗ ទើបធ្វើឱ្យមានធុរកិច្ចបង្រៀនកួរតាមអនឡាញថ្មីៗកើតឡើងជាច្រើន។

ធុរកិច្ចដែលបាត់ទៅ មានដូចជា…

ធុរកិច្ចដែលបានទទួលផលប៉ះពាល់ពីវិបត្តិកូវីដ-19 បានធ្វើឱ្យអ្នកខ្លះដែលដើមទុនវិនិយោគមិនច្រើនគ្រប់គ្រាន់ ត្រូវបិទដំណើរការ ដូចជា ភោជនីយដ្ឋាន សណ្ឋាគារ កន្លែងម៉ាស្សា និងស្ប៉ា រោងចក្រឧស្សាហកម្ម ជាដើម៕

ប្រភព៖ សារព័ត៌មានបរទេស

May 7, 2020

អតីតទាហានពិសេសអាមេរិកាំងសារភាពថា លោក Trump នៅពីក្រោយ “ផែនការចាប់ជំរឹត” ប្រធានាធិបតីវ៉េណេស៊ុយអេឡា

អតីតទាហានពិសេសរបស់សហរដ្ឋអាមេរិក Denman បានសារភាពនៅលើទូរទស្សន៍វ៉េណេស៊ុយអេឡាថា ខ្លួនត្រូវបានគេសន្យាផ្ដល់ប្រាក់100,000ដុល្លារអាមេរិក ដើម្បីដឹកនាំទាហានស៊ីឈ្នួលមួយក្រុមធ្វើសកម្មភាពចាប់ជំរឹត និងនាំខ្លួនលោកប្រធានាធិបតី Maduro ទៅកាន់សហរដ្ឋអាមេរិក។

ទូរទស្សន៍ TeleSUR របស់វ៉េណេស៊ុយអេឡា កាលពីថ្ងៃទី6ឧសភា បានចេញផ្សាយវីដេអូស្ដីអំពីការសារភាពរបស់ Luke Denman អាយុ34ឆ្នាំ ដែលជាអតីតទាហានពិសេសរបស់សហរដ្ឋអាមេរិកដែលត្រូវបានចាប់ខ្លួននៅក្នុងសកម្មភាពលុកចូលឆ្នេរសមុទ្រវ៉េណេស៊ុយអេឡាមិនបានសម្រេចកាលពីថ្ងៃទី4ឧសភាកន្លងទៅ។

នៅក្នុងវីដេអូនោះ Denman បានឱ្យដឹងថា ខ្លួនត្រូវបានអតីតទាហានពិសេសអាមេរិកាំងឈ្មោះ Jordan Goudreau ជ្រើសរើសកាលពីខែធ្នូ2019 ដោយសន្យាថា នឹងឱ្យប្រាក់ឈ្នួល100,000ដុល្លារដើម្បីបង្វឹកខ្មាន់កាំភ្លើងរាប់សិបនាក់ ក្នុងបំណងវាយដណ្ដើមព្រលានយន្តហោះមួយនៅទីក្រុង Caracas ដើម្បីចាប់ជំរឹត និងនាំខ្លួនប្រធានាធិបតីវ៉េណេស៊ុយអេឡា លោក Nicolas Maduro ទៅកាន់សហរដ្ឋអាមេរិក។

Luke Denman អាយុ34ឆ្នាំ ជាអតីតទាហានពិសេសរបស់សហរដ្ឋអាមេរិក

Denman និយាយថា “ខ្ញុំជួយជនជាតិវ៉េណេស៊ុយអេឡា ក្នុងការដណ្ដើមអំណាចគ្រប់គ្រងប្រទេសរបស់ពួកគេ ដោយការវាយដណ្ដើមព្រលានយន្តហោះ បង្កើតព្រំដែនខាងក្រៅ និងទាក់ទងជាមួយមជ្ឈមណ្ឌលគ្រប់គ្រងអាកាសចរណ៍ ដើម្បីនាំយន្តហោះចូល ក្នុងនោះមានមួយគ្រឿងសម្រាប់ដឹកលោក Maduro ឆ្ពោះទៅសហរដ្ឋអាមេរិក”។

នៅពេលត្រូវបានសួរអំពីអ្នកដែលបានចេញបញ្ជាឱ្យ Jordan Goudreau លោក Denman និយាយថា “ប្រធានាធិបតី Donald Trump”។ បុរសនេះឱ្យដឹងថា បទបញ្ជាដែលទទួលបានពី Jordan Goudreau គឺតម្រូវឱ្យគ្រប់គ្រងព្រលានយន្តហោះឱ្យបាន ដើម្បីនាំលោក Maduro ចាកចេញពីវ៉េណេស៊ុយអេឡា ក៏ដូចជាដើម្បីទទួលអាវុធ។

Denman និយាយថា ខ្លួនរស់នៅក្នុងទីក្រុង Austin រដ្ឋ Texas នៃសហរដ្ឋអាមេរិក។ Denman រួមជាមួយអតីតទាហានពិសេសអាមេរិកាំងម្នាក់ទៀតគឺ Airan Berry អាយុ41ឆ្នាំ បានជិះយន្តហោះមកដល់កូឡុំប៊ីកាលពីថ្ងៃទី16មករា ដើម្បីបង្វឹកទាហានស៊ីឈ្នួល60នាក់ ដែលក្រោយមក ទាហានទាំងនេះត្រូវបានបញ្ជូនទៅកាន់ទីក្រុង Riohacha នៅភាគខាងជើងប្រទេសកូឡុំប៊ី ហើយស្នាក់នៅក្នុងផ្ទះ2ខ្នង ដើម្បីរៀបផែនការវាយលុក។

Denman ឱ្យដឹងថា ខ្លួនបានធ្វើការ5ឆ្នាំនៅក្នុងជួរកងកម្លាំងពិសេសអាមេរិកាំង ក្រោយមកបានចាកចេញពីកងទ័ព និងចូលរួមក្នុងវិស័យសន្តិសុខឯកជន ឬហៅថាទាហានស៊ីឈ្នួល។

Denman និង Berry ត្រូវបានចាប់ខ្លួនដោយកងកម្លាំងប្រដាប់អាវុធវ៉េណេស៊ុយអេឡា បន្ទាប់ពីបានធ្វើសកម្មភាពវាយឆ្មក់បរាជ័យនៅទីក្រុង La Guaira របស់ប្រទេសវ៉េណេស៊ុយអេឡេ។ អតីតទាហានពិសេស Jordan Goudreau ក្រោយមកក៏បានទទួលស្គាល់ថា បានរៀបផែនការសម្រាប់វាយឆ្មក់នេះមែន។

របាយការណ៍ស៊ើបអង្កេតដែលត្រូវបានសារព័ត៌មាន AP ចេញផ្សាយកាលពីថ្ងៃទី2ឧសភា បានឱ្យដឹងថា Denman ធ្លាប់ចូលរួមក្នុងការប្រយុទ្ធជាមួយ Berry នៅមជ្ឈិមបូព៌ាផងដែរ។

ប្រធានាធិបតី Maduro ដែលជាអ្នកបង្ហាញវីដេអូនៅលើ TeleSUR បានប្រកាសថា សម្ដីសារភាពរបស់ Denam បង្ហាញថាសេតវិមានជាអ្នកនៅពីក្រោយអំពើវាយឆ្មក់បរាជ័យខាងលើនេះ។

ក៏ប៉ុន្តែ កាលពីថ្ងៃទី6ឧសភា ប្រធានាធិបតី Donald Trump បានប្រកាសថា ករណីវាយឆ្មក់នៅវ៉េណេស៊ុយអេឡា មិនជាប់ទាក់ទិននឹងរដ្ឋាភិបាលអាមេរិកាំងនោះទេ។ មន្ត្រីជាន់ខ្ពស់ម្នាក់របស់សហរដ្ឋអាមេរិក បានថ្លែងថា ការចោទប្រកាន់របស់វ៉េណេស៊ុយអេឡាគឺជារឿង “កំប្លែង” ហើយអះអាងថា សកម្មភាពយោធាដែលអាមេរិកាំងធ្វើឡើង “នឹងមានភាពខុសគ្នាច្រើន”៕

ប្រភព៖ សារព័ត៌មានបរទេស

May 7, 2020

អ្នកនាំពាក្យប្រធានាធិបតីប្រេស៊ីល ឆ្លងវីរុសCOVID-19! ប្រធានាធិបតីក៏ត្រូវគេសង្ស័យថាឆ្លងមេរោគនេះដែរ

ឧត្ដមសេនីយ៍ Otavio Rego Barros ដែលជាអ្នកនាំពាក្យរបស់ប្រធានាធិបតីប្រេស៊ីល គឹជាមន្ត្រីថ្មីបំផុតនៅក្នុងរដ្ឋាភិបាលរបស់លោក Bolsonaro ត្រូវឆ្លង COVID-19 ដែលវីរុសនេះ ត្រូវបានប្រធានាធិបតីចាត់ទុកថា គ្រាន់តែជាគ្រុនផ្ដាសាយរដូវ (Seasonal influenza) តែប៉ុណ្ណោះ។

ឧត្ដមសេនីយ៍ Otavio Rego Barros មានអាយុ59ឆ្នាំ ដែលជាមន្ត្រីជាន់ខ្ពស់ម្នាក់របស់រដ្ឋាភិបាលលោក Bolsonaro “កំពុងនៅឯផ្ទះ ទៅតាមការណែនាំរបស់ក្រសួងសុខាភិបាល” បន្ទាប់ពីទទួលបានលទ្ធផលវិជ្ជមានជាមួយ COVID-19 កាលពីថ្ងៃទី5ឧសភាកន្លងទៅ។ នេះបើតាមការិយាល័យប្រធានាធិបតីប្រេស៊ីល ដែលបានឱ្យដឹងកាលពីថ្ងៃទី6ឧសភា។

គិតមកដល់បច្ចុប្បន្ន មន្ត្រីរដ្ឋាភិបាលរបស់លោក Bolsonaro ជាង20រូបហើយដែលបានឆ្លងវីរុសកូរ៉ូណា ក្នុងនោះក៏មានជំនួយការផ្នែកសារព័ត៌មាន Fabio Wajngarten និងរដ្ឋមន្ត្រីក្រសួងសន្តិសុខជាតិ Augusto Heleno ផងដែរ។ ប្រធានាធិបតី Bolsonaro បានថ្លែងថា លោកបានធ្វើតេស្ត និងទទួលបានលទ្ធផលអវិជ្ជមាន ប៉ុន្តែ លោកមិនបានប្រកាសជាសាធារណៈអំពីលទ្ធផលនៃការពិនិត្យសុខភាពនេះនោះទេ។

ទីភ្នាក់ងារសារព័ត៌មាន Estado de Sao Paulo របស់ប្រទេសប្រេស៊ីល បានដាក់ពាក្យបណ្ដឹងទៅតុលាការ ដើម្បីបង្ខំឱ្យប្រធានាធិបតី Bolsonaro ប្រកាសអំពីលទ្ធផលនៃការធ្វើតេស្តរកវីរុសកូរ៉ូណារបស់លោក ដោយយល់ថា សុខភាពរបស់ប្រធានាធិបតីគឺជាបញ្ហាដែលសាធារណជនមានការចាប់អារម្មណ៍។ ចៅក្រមនៃតុលាការសហព័ន្ធ កាលពីថ្ងៃទី6ឧសភា បានចេញសាលក្រមមួយ គាំទ្រដល់កាសែតខាងលើ និងបានច្រានចោលបណ្ដឹងឧទ្ធរណ៍របស់រដ្ឋាភិបាលផងដែរ។ ក៏ប៉ុន្តែ រដ្ឋបាលរបស់លោក Bolsonaro ត្រូវបានគេជឿថានឹងប្ដឹងទៅតុលាការថ្នាក់លើបន្តទៀត។

ប្រធានាធិបតីប្រេស៊ីល បានចាត់ទុក COVID-19 ថាដូចទៅនឹងជំងឺផ្ដាសាយរដូវ ហើយក៏ធ្លាប់បានប្រកាសថា ឥទ្ធិពលអាក្រក់របស់វីរុសនេះ ត្រូវបានគេបំផ្លើសហួសហេតុដោយសារតែនយោបាយ។ លោកប្រធានាធិបតីរូបនេះ ក៏តែងតែបង្ហាញភាពខ្វះអំណត់ចំពោះបម្រាមគោចរដែលត្រូវបានដាក់ចេញដោយអភិបាលរដ្ឋនានានៅក្នុងប្រទេសនេះ និងបានថ្កោលទោសទៅលើ “ភាពស្លន់ស្លោ” ជុំវិញ COVID-19 ព្រមទាំងបានតឿនអភិបាលរដ្ឋនានា ឱ្យបើកដំណើរការសេដ្ឋកិច្ចឡើងវិញទៀតផង។

បច្ចុប្បន្ន COVID-19 បានសម្លាប់មនុស្សជាង365,000នាក់ ក្នុងចំណោមអ្នកជំងឺកូរ៉ូណាជាង3.8លាននាក់នៅក្នុងពិភពលោក។ ប្រេស៊ីលគឺជាសម្បុកមេរោគធំជាងគេបង្អស់នៅតំបន់ខាងត្បូងនៃទ្វីបអាមេរិក ដោយមានអ្នកជំងឺជាង8,500នាក់ ក្នុងនោះមានជាង126,000នាក់បានបាត់បង់ជីវិត៕

ប្រភព៖ សារព័ត៌មានបរទេស

May 7, 2020

ក្វាងទុង បិទស្ពានឆ្លងសមុទ្រ ដោយសារឃើញ “ញ័ររំពើករំពើន” ខុសប្រក្រតី (មានឃ្លីប)

ទីភ្នាក់ងារព័ត៌មានស៊ីនហួរបស់រដ្ឋចិន បានរាយការណ៍ថា កាលពីថ្ងៃអង្គារ(ទី5ឧសភា) អាជ្ញាធរនៃមណ្ឌលក្វាងទុង ភាគខាងត្បូងរបស់ចិន បានបិទស្ពានឆ្លងកាត់សមុទ្រមួយកន្លែងជាបណ្ដោះអាសន្ន ដោយសារតែរកឃើញការញ័ររំពើករំពើនយ៉ាងខុសប្រក្រតី។

មន្ត្រីប៉ូលិសក្នុងតំបន់ បានបញ្ជាក់ឱ្យដឹងថា មានការចេញបញ្ជា ហាមការធ្វើចរាចរណ៍ទាំង 2ខាងរបស់ស្ពាន ហ៊ូមឹន(Humen Bridge) ដែលភ្ជាប់ទីក្រុងក្វាងចូវ ទីក្រុងចម្បងរបស់ក្វាងទុង និងទីក្រុងតុងកួន។

អាជ្ញាធរក្នុងតំបន់បានបន្ថែមថា ការបញ្ជាឱ្យបិទស្ពានមួយនេះ គឺជាវិធានការសុវត្ថិភាពមួយ ក្រោយពីកំណាត់ស្ពានមួយកន្លែងកើតមានការញ័ររំពើករំពើនឡើង-ចុះ ក្រោមកម្លាំងខ្យល់បក់បោកខ្លាំង៕

ប្រភព៖ សាព័ត៌មានបរទេស

May 7, 2020

លោក ត្រាំ ទទួលស្គាល់វិបត្តិកូវីដ-19 ថា ពិតជាអាក្រក់ខ្លាំងជាង “ភើល ហាប៊ើរ និង 9/11” និងក្រឡាស់សម្ដី មិនលុបចោលក្រុមប្រយុទ្ធប្រឆាំងវីរុស…

លោកប្រធានាធិបតី ដូណាល់ ត្រាំ នៃសហរដ្ឋអាមេរិក កាលពីថ្ងៃពុធ(ទី6 ឧសភា)ម្សិលមិញ បានទទួលស្គាល់ថា រោគរាតត្បាតដ៏ធំកូវីដ-19 បានធ្វើឱ្យកើតមានផលប៉ះពាល់ដល់ប្រទេសអាមេរិក ធ្ងន់ធ្ងរជាងហេតុការណ៍វាយប្រហារកោះ ភើល ហាប៊ើរ កាលពីសម័យសង្គ្រាមលោកទី2 ឬសូម្បីតែសោកនាដកម្ម 9/11 ទៅទៀត ព្រមទាំងបានបដិសេធព័ត៌មានដែលថា លោកត្រៀមរំលាយចោលក្រុមចំពោះកិច្ចប្រយុទ្ធប្រឆាំងវីរុសកូរ៉ូណារបស់សេតវិមាន និងតាំងគោលដៅ រីស្តាតសេដ្ឋកិច្ច។

លោកថ្លែងប្រាប់អ្នកយកព័ត៌មាននៅឯសេតវិមានថា “យើងកំពុងជួបប្រទះនឹងការវាយប្រហារក៏អាក្រក់បំផុត តាមដែលធ្លាប់កើតមានកន្លងមកនៅក្នុងប្រទេសរបស់យើង វាជាពិតជាការវាយប្រហារដ៏អាក្រក់បំផុត តាមដែលយើងធ្លាប់ប្រឈមកន្លងមក” លោកបន្តថា “វាអាក្រក់ជាង ភើល ហាប៊ើរ វាអាក្រក់ជាងហេតុការណ៍ វើលថ្រេដ សេនធើរ ទៅទៀត”

យុទ្ធនាការ ភើល ហាប៊ើរ គឺជាការវាយប្រហារខាងយោធាដ៏គួរឱ្យចម្លែកចិត្ត របស់កងកម្លាំងពិសេស(ស្ម័គ្រស្លាប់)ខាងផ្លូវអាកាស នៃកងទ័ពជើងទឹកចក្រពត្តិជប៉ុន ទៅលើមូលដ្ឋានកងទ័ពជើងទឹកសហរដ្ឋអាមេរិកនៅកំពង់ផែ ភើល ហាប៊ើរ កោះហាវ៉ៃ ក្នុងឆ្នាំ1941 ដែលហេតុការណ៍នេះ បានក្លាយជាការអូសប្រទេសអាមេរិកឱ្យធ្លាក់ចូលសង្គ្រាមលោកលើកទី2។

ខណៈដែលហេតុការណ៍វាយប្រហារភេរវកម្ម ថ្ងៃទី11 ខែកញ្ញា(ខែ9) ឆ្នាំ2001 ដែលបានសម្លាប់ជីវិតមនុស្សនៅក្នុងសហរដ្ឋអាមេរិកប្រមាណជា 3,000នាក់ ភាគច្រើនស្ថិតនៅក្នុងអគារ វើលថ្រេដ សេនធើរ ក្នុងទីក្រុងនីវយ៉ក គឺមានមូលហេតុមកពីសង្គ្រាមផ្សេងៗរបស់អាមេរិក និងប្រតិបត្តិការតតាំងប្រឆាំងការបង្កវិនាសកម្មនៅក្នុងប្រទេសអ៊ីរ៉ាក់ អាហ្វហ្គានីស្ថាន និងប្រទេសផ្សេងៗទៀត។

មកដល់ពេលនេះ មានពលរដ្ឋអាមេរិកាំងជាង 70,000នាក់ហើយ ដែលត្រូវអស់ជីវិតក្នុងអំឡុងការឆ្លងរាលដាលរបស់រោគរាតត្បាតដ៏ធំ ដែលមានអាការស្រដៀងនឹងជំងឺគ្រុនផ្ដាសាយធំ ក្នុងខណៈដែលការលុបចោលវិធានការរក្សាគម្លាតឆ្ងាយពីគ្នាខាងសង្គម អាចនឹងធ្វើឱ្យពលរដ្ឋអាមេរិកាំងកាន់តែស្លាប់ច្រើនឡើង…យ៉ាងណាក៏ដោយ កាលពីថ្ងៃពុធ(ទី6ឧសភា) មើលទៅលោក ត្រាំ ហាក់ដូចជាក្រឡាស់សម្ដីពីផែនការដែលបានថ្លែងកាលពីពេលមុននេះ។

កាលពីមុន សេតវិមានបានចង្អុលបង្ហាញថា ក្រុមការងារលំដាប់ខ្ពស់មួយ អាចនឹងត្រូវរំលាយចោលក្នុងអំឡុងប្រមាណជាដើមខែមិថុនា ខណៈដែលលោកត្រាំ បានបញ្ជូនសញ្ញាឱ្យដឹងថា វាដល់ពេលហើយ ដែលនឹងត្រូវងាកចេញពីវិបត្តិផ្នែកសាធារណៈសុខាភិបាល និងបែរតម្រង់ឆ្ពោះទៅរកការបើកសេដ្ឋកិច្ចឡើងវិញ។

តែយ៉ាងណាក៏ដោយ លោកត្រាំបានសរសេរនៅក្នុងធ្វីតធើរជាដំណាក់ៗ នៅក្នុងថ្ងៃពុធ(ទី6ឧសភា) ក្នុងអំឡុងពេលដែលក្រុមការងារចំពោះកិច្ចប្រយុទ្ធប្រឆាំងនឹងវីរុសកូរ៉ូណា បានទទួលជោគជ័យយ៉ាងធំធេង ថា “នឹងធ្វើការបន្តទៅមុខទៀតយ៉ាងគ្មានពេលកំណត់ ព្រមជាមួយគោលដៅបើកប្រទេសរបស់យើងឡើងវិញយ៉ាងមានសុវត្ថិភាព”។

…និងទោះជាយ៉ាងនេះក្ដី លោកប្រធានាធិបតីរូបនេះ បានប្រាប់ថា លោកអាចនឹង “បន្ថែម ឬបន្ថយចំនួនមនុស្ស” ក្នុងក្រុមការងារឈុតនេះ ដែលរឿងនេះបានបង្ហាញឱ្យឃើញថា ស្ថានការណ៍មិនទាន់នឹងនរនៅឡើយទេ…៕

ប្រភព៖ សាព័ត៌មានបរទេស

May 7, 2020

ប្រវត្តិសាស្ត្រ ដែលមនុស្សគួរតែដឹង…តើកូវីដ-19 និងការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញកាលពីអតីតកាល ផ្លាស់ប្ដូរពិភពលោកយ៉ាងណា?(តចប់)

រោគរាតត្បាតដែលត្រូវបានបំភ្លេចចោល?

ទោះជាបានផ្ដល់មេរៀនដល់មនុស្សក្នុងពិភពលោកយ៉ាងច្រើនហើយក៏ដោយ តែមើលទៅហាក់ដូចជាជំងឺគ្រុនផ្ដាសាយធំអេស្ប៉ាញ បានក្លាយជាជំងឺមួយដែលត្រូវបានគេបំភ្លេចចោល។

ដូចគ្នានឹងកូវីដ-19ដែរ ជំងឺគ្រុនផ្ដាសាយធំអេស្ប៉ាញបានធ្វើឱ្យកើតមានផលប៉ះពាល់ដល់បុគ្គលដែលមានកេរ្តិ៍ឈ្មោះល្បីល្បាញជាច្រើន ដូចជា ប្រធានាធិបតី អ៊ែនឌ្រូ វីលសុន របស់សហរដ្ឋអាមេរិក និងលោកនាយករដ្ឋមន្ត្រី ឡយដ៍ ចច របស់អង់គ្លេស ដែលទាំង 2នាក់សុទ្ធតែធ្លាក់ខ្លួនឈឺដោយសារជំងឺគ្រុនផ្ដាសាយធំអេស្ប៉ាញដូចគ្នា ខណៈដែលលោកប្រធានាធិបតី រូឌ្រីហ្គេស អាល់វីស របស់ប្រទេសប្រេស៊ីល បានស្លាប់ដោយសារជំងឺដ៏សាហាវនេះ។

យ៉ាងណាក៏ដោយ ជំងឺគ្រុនផ្ដាសាយធំអេស្ប៉ាញ បែរជាត្រូវបិទបាំងចំណាប់អារម្មណ៍របស់មនុស្សម្នាក្នុងពិភពលោកដោយសារសង្គ្រាមលោកលើកទី1…1ផ្នែក គឺដោយសារតែខណៈពេលនោះ រដ្ឋបាលនៃប្រទេសជាច្រើនបានប្រើវិធានការសិនស៊ើរ ឬកាត់ចោល មិនឱ្យសារព័ត៌មានរាយការណ៍អំពីផលប៉ះពាល់ដោយសារជំងឺរាតត្បាតនៅគ្រានោះក្នុងអំឡុងពេលសង្គ្រាម។

ក្រៅពីត្រូវបានរារាំងការរាយការណ៍ព័ត៌មានហើយ ការឆ្លងរាតត្បាតរបស់ជំងឺគ្រុនផ្ដាសាយធំអេស្ប៉ាញ ថែមទាំងស្ទើរតែមិនត្រូវបានកត់ត្រាទុកនៅក្នុងសៀវភៅប្រវត្តិសាស្ត្រ ឬវប្បធម៌សម័យនិយមផ្សេងៗ ដូចជា បទចម្រៀង ឬស្នាដៃសិល្បៈផ្សេងៗឡើយ។

តែមានម្នាក់ ក្នុងចំណោមសិល្បករដែលបានបង្កើតស្នាដៃទុកក្នុងអំឡុងពេលនោះគឺ លោក អ៊ែដវើដ មុនហ្ស៍ វិចិត្រករជនជាតិន័រវេយ៍ ដែលបានគូររូបរបស់ខ្លួនឯង ក្នុងខណៈពេលកំពុងឈឺដោយសារជំងឺគ្រុនផ្ដាសាយធំអេស្ប៉ាញ។

ទោះជាការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញ អាចត្រូវបានបំភ្លេច ឬរលុបបាត់ពីការចងចាំរបស់មនុស្សម្នា ឬបាត់ពីក្នុងទំព័រប្រវត្តិសាស្ត្រពិភពលោកក៏ពិតមែន តែការឆ្លងរាលដាលដ៏ធំរបស់មេរោគកូវីដ-19 ដែលកំពុងកើតឡើងនៅពេលនេះ បានរើកកាយការចងចាំ ដាស់ស្មារតី និងដាស់តឿនមនុស្សលោក ឱ្យដឹងពីភាពធ្ងន់ធ្ងររបស់រោគរាតត្បាតដែលបាននាំមហាហាយនៈមកឱ្យពិភពលោកកាលពីជាង 100ឆ្នាំមុនដែរ៕

ប្រភព៖ សារព័ត៌មានបរទេស

ប្រែសម្រួលដោយ តាវ៉ែនតា

May 7, 2020

កងទ័ពអាមេរិកាំងដកខ្លួនចូល “ពួនក្រោមដី” ដើម្បីគេចពីCOVID-19 បំណងការពារកម្លាំង ត្រៀមសម្រាប់ករណីអាក្រក់បំផុត

ឧត្តមសេនីយ៍ Pete Fesler កាលពីចុងខែកុម្ភៈ បានត្រៀមឱ្យទាហានរបស់ខ្លួនប្រមាណជា130នាក់ ចូលរួមក្នុងយុទ្ធនាការទាក់ទិននឹងវិធានការទប់ស្កាត់វីរុសCOVID-19 ដោយការដកថយចូលទៅធ្វើការក្រោមដី ដើម្បីការពារខ្លួន និងរក្សាកម្លាំងស្នូលរបស់ខ្លួន។

Pete Fesler គឺជាមេបញ្ជាការជាន់ខ្ពស់នៃបញ្ជាការដ្ឋានកងទ័ពការពារអវកាស និងដែនអាកាសអាមេរិកភាគខាងជើង ដែលហៅថា NORAD (North American Aerospace Defense Command) ដែលមានមូលដ្ឋាននៅតំបន់ Colorado Spring ក្នុងរដ្ឋ Colorado សហរដ្ឋអាមេរិក។ កងកម្លាំងរបស់ឧត្តមសេនីយ៍រូបនេះ កំពុងដកថយចូលទៅនៅក្រោមដី ដើម្បីបង្ខាំងខ្លួនពីពិភពខាងក្រៅ ក្នុងបំណងទប់ស្កាត់ការឆ្លងវីរុសCOVID-19។ NORAD មានភារកិច្ចការពារសហរដ្ឋអាមេរិកពីការវាយប្រហារដោយកាំជ្រួចផ្លោង ឬការគំរាមពីដែនអាកាស និងអវកាស។

មន្ទីរបញ្ចកោណសង្ឃឹមថា កាយវិការដូចជានៅបញ្ជាការដ្ឋានរបស់ Fesler នឹងជួយទប់ស្កាត់COVID-19 មិនឱ្យវាយលុកចូលក្នុងជួរកងទ័ពដែលត្រូវបានហ្វឹកហាត់ជាពិសេសរបស់កងទ័ពសហរដ្ឋអាមេរិក។

បើទោះជាមន្ទីរបញ្ចកោណដែលជាអគ្គបញ្ជាការដ្ឋាននៃកងទ័ពសហរដ្ឋអាមេរិក បានបញ្ចេញទាហានរាប់ម៉ឺននាក់ដើម្បីជួយដល់ការប្រយុទ្ធប្រឆាំងនឹងវីរុសកូរ៉ូណាក្នុងប្រទេស ប៉ុន្តែ COVID-19នេះ នៅតែបង្កឧបសគ្គដល់ការបំពេញភារកិច្ចស្នូលរបស់កងទ័ពអាមេរិកាំង។ វីរុសនេះបានធ្វើឱ្យនាវាផ្ទុកយន្តហោះចម្បាំងមួយគ្រឿងរបស់សហរដ្ឋអាមេរិកត្រូវគាំងដំណើរការដោយសារមានទាហានជាច្រើនបានឆ្លងមេរោគ ចំណែកទាហានថ្មីក៏ត្រូវថយចុះច្រើន បណ្ដាលឱ្យសមយុទ្ធអន្តរជាតិនានាត្រូវពន្យារពេល ឬកាត់បន្ថយទំហំ។ គិតមកដល់បច្ចុប្បន្ន ទាហានអាមេរិកាំងជិត5,000នាក់បានឆ្លងវីរុសCOVID-19 ក្នុងនោះមានទាហាន2នាក់បានបាត់បង់ជីវិត។

ដើម្បីកាត់បន្ថយឥទ្ធិពលរបស់វីរុសCOVID-19 មន្ទីរបញ្ចកោណបានចេញបញ្ជា ហាមមិនឱ្យកងទ័ពអាមេរិកាំងផ្លាស់ទីទូទាំងសកលលោក និងបានបញ្ចេញវិធានការផ្សេងៗទៀត។ ចំពោះអង្គភាពពិសេសដូចជា NORAD ជាដើម ថ្នាក់ដឹកនាំមានប្រតិកម្មដោយឡែក និងជាពិសេស។

បុគ្គលិកមួយផ្នែករបស់អង្គភាពដែលគ្រប់គ្រងដោយឧត្តមសេនីយ៍ Fesler ត្រូវបានបញ្ជូនទៅ “លាក់ខ្លួន” និងធ្វើការនៅក្នុងបន្ទប់ក្រោមដីនៅតំបន់ភ្នំ Cheyenne ដែលត្រូវបានសាងសង់ឡើងកាលពីសម័យសង្គ្រាមត្រជាក់ ដើម្បីគេចពីវីរុសកូរ៉ូណា។ ពួកគេត្រូវបានបញ្ជុនមកកាន់ទីនេះកាលពី2ខែមុខ ដើម្បីត្រៀមក្នុងករណីវីរុសបានធ្វើឱ្យគាំងដំណើរការនៅមូលដ្ឋាន Peterson ក្នុងរដ្ឋ Colorado។

លោក Fesler ថ្លែងថា “បន្ទាប់ពីបានដឹងថា COVID-19 ឆ្លងរាលដាលខ្លាំង យើងយល់ថា ត្រូវតែមានវិធានការដើម្បីត្រៀម និងការពារកម្លាំងក្នុងករណីធ្លាក់ចូលក្នុងស្ថានភាពអាក្រក់បំផុត”៕

ប្រភព៖ សារព័ត៌មានបរទេស

May 7, 2020

COVID-19 បានសម្លាប់មនុស្សជាង264,000នាក់នៅទូទាំងពិភពលោក

វីរុសកូរ៉ូណាប្រភេទថ្មី បានធ្វើឱ្យមនុស្សជាង3.8លាននាក់នៅពាស់ពេញសកលលោកត្រូវកើតជំងឺ ក្នុងនោះ វាបានសម្លាប់មនុស្សជាង264,000នាក់។

ប្រទេសនិងដែនដីចំនួន212ក្នុងពិភពលោក ត្រូវបានរាយការណ៍ថា មានអ្នកជំងឺCOVID-19 សរុប3,812,513នាក់ និងអ្នកស្លាប់ដោយសារវីរុសកូរ៉ូណានេះចំនួន264,109នាក់ ដោយនៅក្នុងអំឡុង24ម៉ោងចុងក្រោយនេះមានអ្នកជំងឺថ្មី91,120នាក់ និងអ្នកស្លាប់ថ្មីមាន6,242នាក់។ ក្នុងចំណោមអ្នកជំងឺសរុប មានអ្នកជំងឺ1,288,726នាក់បានជាសះស្បើយ។ នេះបើតាមស្ថិតិរបស់ WourldeMeters។

ទ្វីបអាមេរិកមានអ្នកជំងឺCOVID-19ច្រើនជាងទ្វីបណាៗទាំងអស់ ក្នុងនោះតំបន់អាមេរិកខាងជើងមានអ្នកជំងឺសរុប1,375,502នាក់ អាមេរិកខាងត្បូងមាន253,597នាក់ ខណៈទ្វីបអឺរ៉ុបមាន1,524,884នាក់ ទ្វីបអាស៊ីមាន603,065នាក់ និងទ្វីបអាហ្វ្រិកមាន52,341នាក់។

ប្រទេសដែលមានអ្នកស្លាប់ដោយសារជំងឺកូរ៉ូណាសរុបលើសពី25,000នាក់ មាន5ប្រទេស រួមមានសហរដ្ឋអាមេរិក អង់គ្លេស អ៊ីតាលី អេស្ប៉ាញ និងបារាំង។

ប្រទេសចំនួន10ដែលមានអ្នកជំងឺកូរ៉ូណាសរុបលើសពី100,000នាក់ រួមមានសហរដ្ឋអាមេរិក អេស្ប៉ាញ អ៊ីតាលី អង់គ្លេស បារាំង អាល្លឺម៉ង់ រុស្ស៊ី ទួរគី ប្រេស៊ីល និងប្រទេសអ៊ីរ៉ង់៕

ប្រភព៖ សារព័ត៌មានបរទេស

May 7, 2020

ប្រទេសចិន “បញ្ចេញលក្ខខណ្ឌ” បើសិនជាចង់ស៊ើបអង្កេតរកប្រភពCOVID-19

ឯកអគ្គរដ្ឋទូតចិនប្រចាំអង្គការសហប្រជាជាតិបានឱ្យដឹងថា ប្រទេសចិននឹងមិនអញ្ជើញអ្នកជំនាញអន្តរជាតិណាមួយមកស៊ើបអង្កេតបញ្ហាប្រភពរបស់វីរុសកូរ៉ូណានោះទេ រហូតដល់ប្រទេសនេះទទួលបាន “ជ័យជំនះចុងក្រោយ”។

WHO កាលពីចុងសប្ដាហ៍កន្លងបានឱ្យដឹងថា អង្គការនេះសង្ឃឹមថានឹងត្រូវបានអញ្ជើញឱ្យចូលរួមក្នុងការស្រាវជ្រាវលើប្រភពរបស់ COVID-19។ នៅពេលត្រូវបានសួរអំពីបញ្ហានេះ ឯកអគ្គរដ្ឋទូតចិន Chen Xu ថ្ងៃនេះបានឆ្លើយនៅក្នុងសន្និសីទសារព័ត៌មានតាមអនឡាញពីទីក្រុងហ្សឺណែវថា “អាទិភាពបច្ចុប្បន្នគឺផ្ដោតទៅលើការប្រយុទ្ធប្រឆាំងនឹងវីរុស រហូតដល់យើងបានទទួលជោគជ័យចុងក្រោយ”។

លោក Chen Xu បន្តថា “យើងត្រូវការផ្ដោតចំបញ្ហា និងបែងចែកកម្លាំងសមស្រប។ យើងមិនខ្លាចនឹងការស៊ើបអង្កេត និងវាយតម្លៃណាមួយនោះទេ ព្រោះថាវាអាចជួយដល់ការប្រឹងប្រែងរបស់ពិភពលោកដើម្បីត្រៀមសម្រាប់ទប់ទល់នឹងករណីបន្ទាន់អំពីសុខភាពសាធារណៈក្នុងពេលអនាគត”។

ក្រុមអ្នកវិទ្យាសាស្ត្រមួយចំនួនយល់ថា វីរុសCOVID-19 មានប្រភពពីសត្វប្រចៀវ និងបានឆ្លងពីសត្វមកមនុស្សនៅឯផ្សារលក់សត្វព្រៃរស់នៅក្នុងទីក្រុង Wuhan កាលពីចុងឆ្នាំ2019។ ប៉ុន្តែលោក Trump និងរដ្ឋមន្ត្រីការបរទេសសហរដ្ឋអាមេរិក លោក Mike Pompeo រួមនឹងមន្ត្រីអាមេរិកាំងជាច្រើនផ្សេងទៀត កំពុងតែជំរុញឱ្យស៊ើបអង្កេតលើសម្មតិកម្មដែលថា COVID-19 បានរួចចេញពីបន្ទប់ពិសោធន៍នៅទីក្រុង Wuhan ប្រទេសចិន។ អង្គភាពស៊ើបការណ៍សម្ងាត់អាមេរិកាំងកំពុងស្រាវជ្រាវលើបញ្ហានេះ បើទោះជាមានការអះអាងថា វីរុសនេះ “មិនមែនបង្កើតឡើងដោយមនុស្ស”។

ប្រទេសចិនបានអះអាងថា រដ្ឋមន្ត្រីការបរទេសអាមេរិកាំងមិនអាចបញ្ជាក់អំពីបញ្ហាដែលថា វីរុសCOVID-19 បានរួចចេញពីបន្ទប់ពិសោធន៍នៅ Wuhan នោះឡើយ ព្រោះថា លោក “មិនមានភ័ស្ដុតាំងណាមួយបញ្ជាក់អំពីរឿងនេះ”។

COVID-19 បានបង្ហាញខ្លួនក្នុងប្រទេសនិងដែនដីចំនួន210ក្នុងពិភពលោក បណ្ដាលឱ្យមនុស្សជិត3.8លាននាក់បានឆ្លងមេរោគ ក្នុងនោះមានជាង259,000នាក់បានបាត់បង់ជីវិត៕

ប្រភព៖ សារព័ត៌មានបរទេស

May 6, 2020

Author: សឿន សំណាង