សឿន សំណាង - La Reine Media

ក្នុងចំណោមមនុស្ស1លាននាក់នៅលើពិភពលោក គឺមានជាង50នាក់បានស្លាប់ដោយសារ COVID-19

ពិភពលោកបានរកឃើញអ្នកឆ្លងវីរុសCOVID-19 សរុបជិត7.6លាននាក់ ក្នុងនោះមានជិត423,000នាក់បានបាត់បង់ជីវិត។

ប្រទេសនិងដែនដីចំនួន221 ក្នុងពិភពលោក បានរាយការណ៍ថា មានអ្នកជំងឺCOVID-19 ចំនួន 7,578,973នាក់ និងអ្នកជំងឺដែលបានស្លាប់ក៏បានឡើងដល់ 422,0928នាក់។ អ្នកជំងឺកើន138,005នាក់ និងអ្នកស្លាប់កើន4,937នាក់បើធៀបនឹងម្សិលមិញ។ ជាសរុប មានអ្នកជំងឺ3,832,706នាក់បានជាសះស្បើយ។

ទ្វីបអាមេរិកមានអ្នកជំងឺ COVID-19 សរុបជិត 3.7លាននាក់ ខណៈទ្វីបអឺរ៉ុបមានជាង2.1លាននាក់ និងអាស៊ីមានជិត1.5លាននាក់ និងទ្វីបអាហ្វ្រិកមានជាង219,000នាក់។

មកដល់បច្ចុប្បន្ន បើសិនគិតទៅតាមចំនួនប្រជាជនសរុបរបស់ពិភពលោក គេរកឃើញថា ក្នុងចំណោមមនុស្ស 1,000,000នាក់ គឺមាន973នាក់បានឆ្លងវីរុសCOVID-19។ ចំណែកតួលេខអ្នកស្លាប់វិញគឺមាន54.3នាក់ក្នុងចំណោមមនុស្ស1,000,000នាក់។

ប្រទេសដែលមានអ្នកជំងឺលើសពី100,000នាក់ បានកើនដល់16ប្រទេស រួមមាន សហរដ្ឋអាមេរិក ប្រេស៊ីល រុស្ស៊ី អង់គ្លេស អេស្ប៉ាញ់ ឥណ្ឌា អ៊ីតាលី ប៉េរូ អាល្លឺម៉ង់ អ៊ីរ៉ង់ ទួរគី បារាំង ឈីលី ម៉ិកស៊ិក ប៉ាគីស្ថាន និងអារ៉ាប់ប៊ីសាអ៊ូឌីត៕

June 12, 2020

ឆ្នេរខ្សាច់កោះដ៏ស្រស់ស្អាតដែលកកើតឡើងដោយសារ “លាមក” របស់ត្រី Parrot (វីដេអូ)

ឆ្នេរសមុទ្រដ៏ស្រស់ស្អាតនៅលើកោះ Vakkaru បានកកើតឡើងដោយសារលាមកដ៏ច្រើនសន្ធឹករបស់ពពួកត្រីមួយប្រភេទដែលមានឈ្មោះថា Parrot ក្រោយពីពួកវាស៊ីផ្កាថ្ម និងជុះខ្សាច់ចេញមកក្រៅ។

ប្រទេស Maldives មានឈ្មោះល្បីល្បាញខ្លាំងដោយមានឆ្នេរខ្សាច់ដ៏ស្រស់ស្អាត។ ប៉ុន្តែ យ៉ាងតិចមានកោះចំនួនមួយក្នុងចំណោមកោះដ៏ច្រើននៅទីនេះ បានកកើតឡើងតាមរយៈវិធីដ៏មហាកំពូលចម្លែក។

ចំណុចពណ៌ក្រហមគឺជាទីតាំងនៃប្រទេស Maldives

ខ្សាច់នៅលើកោះ Vakkaru របស់ប្រទេស Maldives តាមពិតគឺមានផ្ទុកទៅដោយលាមកត្រីយ៉ាងច្រើនមិនគួរឱ្យជឿ។ ជាក់ស្ដែង ខ្សាច់នៅលើឆ្នេរកោះ Vakkaru នេះគឺជាកាកសំណល់លាមករបស់ត្រី Parrot ពីរប្រភេទ។ ត្រី Parrot មានពណ៌សម្បូរបែប និងមានប្រវែងប្រមាណពី 0.3 ទៅ 1.2ម៉ែត្រ។

ត្រី Parrot ប្រើប្រាស់ធ្មេញខាងក្រៅដ៏រឹងមាំដើម្បីខាំបំបែកផ្កាថ្ម និងស៊ីប៉ូលិបរបស់ផ្កាថ្ម (Coral Polyps) រួមនឹងសារ៉ាយ។ល។ ដោយសារតែមានប្រព័ន្ធធ្មេញមួយផ្សេងទៀតនៅក្នុងបំពង់ករបស់ពួកវា បំណែកផ្កាថ្មដែលវាបានលេបចូលដល់បំពង់ក ក៏ត្រូវបានធ្មេញនៅត្រង់នោះទំពាជាកម្ទេចល្អិតជាងមុន។ បន្ទាប់មក ពួកវាក៏ជុះចេញមកក្រៅក្រោមរូបភាពជាខ្សាច់។

ប្រការខាងលើនេះបានកើតឡើងក្នុងទំហំច្រើនឡើងៗ និងឆ្លងកាត់ពេលវេលាដ៏យូរអង្វែង ខ្សាច់ដែលជាលាមករបស់ត្រី Parrot ក៏បង្កើតបានជាឆ្នេរសមុទ្រដ៏ស្រស់ស្អាតនៅលើកោះ Vakkaru រហូតមកដល់សព្វថ្ងៃ។

ត្រី Parrot ដែលមានធ្មេញរឹងមាំ អាចខាំកម្ទេចផ្កាថ្មធ្វើជាចំណី

ប្រភព៖ GeoBeats/Youtube

June 11, 2020

ក្រុមជនជាតិស្បែកខ្មៅដែលជំទាស់នឹងបាតុកម្មប្រឆាំងការរើសអើងពូជសាសន៍នៅអាមេរិក បានបង្ហាញខ្លួនហើយ!

ស្ត្រីស្បែកខ្មៅពីររូប គឺ Bevelyn និង Edmee នៅទីក្រុង Chicago សហរដ្ឋអាមេរិក យល់ថា ចលនា “ជីវិតជនជាតិស្បែកខ្មៅមានតម្លៃ” គឺជារឿងបោកប្រាស់ និងមិនតំណាងឱ្យពួកគេនោះទេ។

នៅពេលដែលក្រុមបាតុករកំពុងស្ថិតនៅខាងក្រៅភោជនីយដ្ឋាន Nini’s Deli នៅក្នុងទីក្រុង Chicago រដ្ឋ Illinois សហរដ្ឋអាមេរិកចាប់ផ្ដើមតិចទៅៗនារសៀលថ្ងៃទី7មិថុនា Justin Starns ក៏មានវត្តមាននៅទីនោះ និងមើលមិត្តរបស់ខ្លួនបាញ់ថ្នាំជាអក្សរ BLM (Black Lives Matter-ជីវិតជនជនជាតិស្បែកខ្មៅសំខាន់) នៅលើផ្ទាំងឈើខាងក្រៅភោជនីយដ្ឋាន។ ទាំងនេះសុទ្ធតែជាអក្សរក្បាច់ពណ៌ផ្ទៃមេឃ។

ភ្លាមនោះស្រាប់តែមានស្ត្រីស្បែកខ្មៅម្នាក់ឈានជើងឡើង និងនិយាយយ៉ាងឮៗថា “អូ! ប្រការទាំងនេះសម្រាប់ខ្ញុំមែន? ជីវិតរបស់ខ្ញុំក៏មានតម្លៃដែរមែនទេ?”។

Starns រៀបរាប់ឡើងវិញថា “នាង និងស្ត្រីម្នាក់ផ្សេងទៀតនិយាយថា ពួកគេទទួលបានប្រាក់ខែពី George Soros ហើយថា ពួកគេគឺជា House Negro (ពាក្យសម្រាប់ប្រើសំដៅទៅលើទាសចរស្បែកខ្មៅរស់នៅជាមួយម្ចាស់របស់ខ្លួន)”។ George Soros គឺជាមហាសេដ្ឋី និងជាសប្បុរសជនអាមេរិកាំងដើម្បីកំណើតហុងគ្រី។

Starns ដែលជាជនជាតិស្បែកខ្មៅម្នាក់ បានឱ្យដឹងថា នោះគឺជាទិដ្ឋភាពចម្លែក នៅពេលដែលមានស្ត្រីស្បែកខ្មៅពីរនាក់អះអាងថា ពួកគេគឺជា Bevelyn និង Edmee និងបានចោទចលនា “Black Live Matter” ថា “ជាបីសាចដ៏កាចសាហាវ និងបោកប្រាស់” នៅចំពោះមុខក្រុមបាតុករដែលភាគច្រើនជាជនជាតិស្បែកស និងជនជាតិអាមេរិកឡាទីន នៅក្នុងតំបន់ West Town នៃទីក្រុង Chicago សហរដ្ឋអាមេរិក។

Edmee និយាយថា “ខ្ញុំបានឃើញបាតុកម្ម “Black Live Matter” ជាច្រើនមកហើយ។ ប្រការនេះមិនតំណាងឱ្យយើងខ្ញុំទេ។ វាជាការបង្កអស្ថិរភាព។ ព្រះអើយ!”។

Nini’s Deli (ស្ដាំ) កំពុងប្រកែកតវ៉ានឹងប៉ូលិសនៅខាងក្រៅភោជនីយដ្ឋាន Nini’s Deli

បាតុកម្មកាលពីថ្ងៃទី7មិថុនាកន្លងទៅ ត្រូវបានធ្វើឡើងនៅពេលភោជនីយដ្ឋាន Nini’s Deli កំពុងបិទទ្វារ។ ម្ចាស់ហាងនេះត្រូវបានគេជឿថាជាមនុស្សមានទស្សនៈជ្រុលនិយមទៅលើបញ្ហាស្រលាញ់ភេទដូចគ្នា និងប្រឆាំងចំពោះចលនា “Black Live Matter”។ បុគ្គលិក4នាក់បានឈប់ធ្វើការដើម្បីប្រឆាំងថៅកែរបស់ពួកគេដែលជាម្ចាស់ភោជនីយដ្ឋាននេះ។

Bevelyn និង Edmee ដែលបាននិយាយថា ពួកគេមកទីនេះដើម្បីគាំទ្រ Nini’s Deli បានឈរអស់រយៈពេលជាច្រើនម៉ោងនៅខាងមុខភោជនីយដ្ឋានដែលខណ្ឌចែកពីក្រុមបាតុករដោយក្រុមប៉ូលិសដែលមានពាក់មួកសុវត្ថិភាព និងកញ្ចក់បាំងមុខ។

Bevelyn ដែលមានរូបរាងទាបបន្តិច និងពោរពេញដោយថាមពល បានទាត់ចោលបំពង់បាញ់ថ្នាំពណ៌ និងហែកក្រដាសដែលបិទជាប់នឹងបន្ទះឈើនៅខាងមុខភោជនីយដ្ឋាន។ នាងបានថ្កោលទោសចំពោះអំពើបំផ្លិចបំផ្លាញ និងបក្សប្រជាធិបតេយ្យ រួមនឹងក្រុមបាតុនានាដែលទាមទារសិទ្ធិស្មើភាពគ្នារវាងជាតិសាសន៍។ នៅពេលដែលក្រុមបាតុករស្រែកប្រឆាំង នាង Bevelyn ក៏ចាប់ផ្ដើមលោត និងបញ្ចេញទឹកមុខដូចជាចំអកឱ្យក្រុមបាតុករ។

ចំណែក Edmee ដែលមានរូបរាងខ្ពស់ និងមាំមួន បាននិយាយដោយប្រើសម្លេងម៉ឺងម៉ាត់តាមរបៀបគ្រូអាចារ្យ ឬអ្នកផ្សាយសាសនាដែលពេញដោយបទពិសោធន៍។ នាង Edmee និយាយថា “នេះគឺជាសកម្មភាពបីសាចដ៏កាចសាហាវ។ អ្នករាល់គ្នាកំពុងតែត្រូវបានគេបោកប្រាស់ និងកេងចំណេញ។ ព្រះយ៉េស៊ូត្រូវបានក្រុមមនុស្សធុននេះក្បាត់ហើយ”។

ភាពតានតឹងបានកើតឡើងនៅពេលមានមនុស្សម្នាក់គប់ដបទឹកទៅលើ Bevelyn និងប៉ូលិសរាប់សិបនាក់ត្រូវបានដាក់ពង្រាយ។ Bevelyn ស្រែកខ្លាំងៗនៅចំពោះមុខក្រុមប៉ូលិសថា “ការធ្វើជំនួញរបស់បុរសនេះ (ម្ចាស់ភោជនីយដ្ឋាន) ត្រូវបានបំផ្លិចបផ្លាញគ្មានសល់ដោយសារតែចលនា “ជីវិតជនជាតិស្បែកខ្មៅសំខាន់”។ នាងបន្តថា “នេះគឺជារឿងឃោរឃៅ និងជារឿងដ៏រំខាន”។

នាង Edmee កំពុងហែកក្រដាសអក្សរដែលក្រុមបាតុករបានបិទនៅខាងក្រៅភោជនីយដ្ឋាន Nini’s Deli កាលពីថ្ងៃទី7មិថុនា

Bevelyn និង Edmee មានបំណងបង្ហាញការគាំទ្រចំពោះម្ចាស់ភោជនីយដ្ឋាន Nini ក្រោយពីបានជួបគ្រូគង្វាល (អាចារ្យ) របស់ខ្លួន កាលពីសប្ដាហ៍មុន។ Bevelyn ថ្លែងថា “យើងមានសិទ្ធិនិយាយថា សូម្បីតែម្ចាស់ភោជនីយដ្ឋាននេះជាមនុស្សប្រកាន់ពូជសាសន៍ ក៏គាត់នៅតែមានសិទ្ធិនិយាយថា គាត់មិនគាំទ្រការស្រលាញ់ភេទដូចគ្នាដែរ”។

ជិត3ម៉ោងក្រោយមក Bevelyn និង Edmee រួមនឹងអ្នកគាំទ្រមួយចំនួនបានប្រកាសចាកចេញពីកន្លែងកើតហេតុដែលមានសម្លេងហ៊ោកញ្ជ្រៀវពីក្រុមបាតុករ ក្នុងនោះមានមនុស្សម្នាក់ស្រែកឡើងថា “មានអ្នកណាចង់លាងបាបដែរទេ?” បាតុករក៏នាំគ្នាសើច ខណៈដែលក្រុមប៉ូលិសការពារក្រុមរបស់ Bevelyn ឆ្ពោះទៅទិសខាងត្បូងផ្លូវ Noble រហូតដល់បាត់ស្រមោលពីភ្នែក។

ការស្លាប់របស់ George Floyd បានបង្កើតឱ្យមានបាតុកម្មនៅពាសពេញសហរដ្ឋអាមេរិក ហើយបានរាលដាលដល់បណ្ដាប្រទេសជាច្រើនក្នុងពិភពលោក ដើម្បីទាមទារយុត្តិធម៌ជូនសពលោក Floyd និងប្រឆាំងចំពោះអំពើរើសអើងពូជសាសន៍។ បាតុកម្មនានានៅទីក្រុង Chicago ភាគច្រើនត្រូវបានធ្វើឡើងប្រកបដោយសន្តិវិធី ប៉ុន្តែក៏នៅតែមានអំពើឆក់ប្លន់ ការបំផ្លិចបំផ្លាញទ្រព្យសម្បត្តិជាច្រើនករណីផងដែរ បណ្ដាលឱ្យហាងទំនិញ ភោជនីយដ្ឋាន និងហាងលក់ថ្នាំពេទ្យជាច្រើនត្រូវបានបិទ៕

ប្រភព៖ Chicago Tribune

June 11, 2020

វិធីសាស្ត្រចម្បងៗសម្រាប់ជំរុញការទិញដូររបស់ពលរដ្ឋដែលអាជ្ញាធរចិនកំពុងអនុវត្តដើម្បីសង្គោះសេដ្ឋកិច្ចក្រោយវិបត្តិ COVID-19

ដើម្បីអាចជួយសង្គ្រោះសេដ្ឋកិច្ចរបស់ខ្លួន ប្រទេសចិនបាននិងកំពុងចែកជូនប័ណ្ណទិញទំនិញដល់ពលរដ្ឋ បើកបន្ថែមផ្សាររាត្រីនិងហាងទំនិញអនុគ្រោះពន្ធ ព្រមទាំងអនុញ្ញាតឱ្យមានការលក់ទំនិញចល័តក្នុងក្រុងទៀតផង។ល។

កាលពីចុងសប្ដាហ៍កន្លងទៅ មនុស្សម្នានាំគ្នាទៅកាន់វិថីណានជីងខាងកើត (Nanjing Dong) ដែលជាតំបន់ទិញដូរដ៏ធំមួយរបស់ទីក្រុងសៀងហៃ។ តូបលក់ទំនិញប្រមាណជា20 ត្រូវបានសង់ឡើងនៅក្នុងតំបន់ក្បែរផ្លូវ Nanjing Dong ដើម្បីលក់អាហារ ផ្កា និងទំនិញផ្សេងៗ។ ស្ត្រីវ័យ25ឆ្នាំម្នាក់បានអះអាងថា “ប្រទេសចិនបានយកឈ្នះលើ COVID-19ហើយ។ ខ្ញុំបានជាប់នៅក្នុងផ្ទះអស់រយៈពេលជាច្រើនសប្ដាហ៍ ដូច្នេះ ព្រឹត្តិការណ៍បែបនេះគឺពិតជាគួរឱ្យចាប់អារម្មណ៍ខ្លាំងណាស់”។

ព្រឹត្តិការណ៍នៅតំបន់ក្បែរផ្លូវ Nanjing Dong នេះគ្រាន់តែជាផ្សាររាត្រីមួយក្នុងចំណោមផ្សាររាត្រីជាច្រើនដែលទីក្រុងសៀងហៃបានចាប់ផ្ដើមបង្កើតឡើងតាំងពីដើមខែមិថុនានេះ។ អាជ្ញាធរទីក្រុងសហការជាមួយបណ្ដាក្រុមហ៊ុនលក់រាយ និងក្រុមហ៊ុនបច្ចេកវិទ្យាដើម្បីបង្កើតព្រឹត្តិការណ៍ទិញដូរទ្រង់ទ្រាយធំជាបន្តបន្ទាប់។ អាជ្ញាធរទីក្រុងសៀងហៃក៏បានលើកទឹកចិត្តឱ្យមជ្ឈមណ្ឌលពាណិជ្ជកម្មនានា អូសបន្លាយពេលវេលានៃការបើកទ្វារនៅចុងសប្ដាហ៍ផងដែរ។

ទន្ទឹមនឹងការបើកបន្ថែមផ្សាររាត្រី សកម្មភាពចែកប័ណ្ណទិញទំនិញបញ្ចុះតម្លៃ coupon និងប័ណ្ណប្ដូរយកទំនិញឬទិញទំនិញបញ្ចុះតម្លៃ voucher ក៏ជាជម្រើសដ៏ពេញនិយមនៅតំបន់ផ្សេងៗទៀតរបស់ប្រទេសចិន។ ទីក្រុងសៀងហៃបានចែកប័ណ្ណ coupon ដែលមានតម្លៃសរុបឡើងដល់2ពាន់លានដុល្លារអាមេរិក និងបានសហការជាមួយក្រុមហ៊ុន Alibaba ដើម្បីចែកប័ណ្ណ voucher ដែលមានតម្លៃសរុប13ពាន់លានយន់ (1.84ពាន់លានដុល្លារអាមេរិក) ចាប់ពីខែឧសភាដល់ខែមិថុនា2020។ ពលរដ្ឋចិនអាចប្រើប្រាស់ប័ណ្ណ voucher ដើម្បីទិញទំនិញនៅលើគេហទំព័រនានា ផ្សារលក់ទំនិញចាបហួយ ផ្សារទំនើប ភោជនីយដ្ឋាន និងទីតាំងពាណិជ្ជកម្មផ្សេងៗទៀត។

ដូចគ្នានេះដែរ រដ្ឋធានីប៉េកាំង ក៏បានសម្រេចចិត្តចែកប័ណ្ណ voucher ដែលមានតម្លៃ12.3ពាន់លានយន់ (1,742,000,000 ដុល្លារអាមេរិក) ទៅឱ្យពលរដ្ឋរបស់ខ្លួន ដោយមានកិច្ចសហការពីក្រុមហ៊ុនលក់រាយ។ នៅឯទីក្រុង Wuhan វិញ ក្រុមហ៊ុន Alibaba និង Tencent Holdings បានផ្ដល់ជំនួយជាប័ណ្ណ voucher ដែលមានតម្លៃសរុប 500លានយន់ (70,825,812ដុល្លារអាមេរិក) នៅក្នុងចំណោម voucher ដែលមានតម្លៃ 2.3ពាន់លានយន់ (325,798,739) ដែលទីក្រុងនេះបានបោះផ្សាយចែកជូនពលរដ្ឋ។

ដើម្បីជំរុញការទិញដូរ តំបន់ខ្លះរបស់ប្រទេសចិន ក៏បានលុបចោលបម្រាមដែលទាក់ទងនឹងការលក់ទំនិញចល័ត។ កន្លងមក រាប់ចាប់ពីឆ្នាំ2000 សកម្មភាពលក់ដូរចល័តត្រូវបានចាត់ទុកថាជាអំពើខុសច្បាប់នៅក្នុងតំបន់មួយចំនួន ដោយមូលហេតុថា ដើម្បីសុខភាពសាធារណៈ និងដើម្បីរួមចំណែកក្នុងការកែលម្អសោភ័ណភាពរបស់ទីក្រុង។ ក្រុមអ្នកលក់ទំនិញចល័ត កោះណោះត្រូវប្រឈមនឹងដេញចាប់របស់ក្រុមប៉ូលិស និងសន្តិសុខ។ល។

យុវវ័យកំពុងដើរឆ្លងកាត់មជ្ឈមណ្ឌលពាណិជ្ជកម្មមួយរបស់ Wangfujing

ប៉ុន្តែ បច្ចុប្បន្ន តំបន់ជាច្រើនបានផ្អាក ឬបន្ធូរបន្ថយបញ្ហាខាងលើនេះហើយ ដើម្បីជួយសង្គ្រោះបណ្ដាក្រុមហ៊ុន សហគ្រាសខ្នាតតូច។ នៅទីក្រុងក្វាងចូវ (Guangzhou) ទីលាននានាក្នុងមជ្ឈមណ្ឌលពាណិជ្ជកម្ម និងចំណតរថយន្ត កំពុងត្រូវបានប្រើប្រាស់ដើម្បីជួលទៅឱ្យក្រុមអ្នកលក់ទំនិញចល័ត។

ចំណែកការពង្រីកសកម្មភាពលក់ទំនិញអនុគ្រោះពន្ធក៏ជាជម្រើសមួយផ្សេងទៀតដើម្បីជំរុញការទិញដូរនៅទីក្រុងប៉េកាំង។ កាលពីថ្ងៃទី10មិថុនាកន្លងទៅ Wangfujing Group ដែលជាក្រុមហ៊ុនលក់រាយធំជាងគេមួយនៅប្រទេសចិន បានឱ្យដឹងថា ខ្លួនបានទទួលលិខិតអនុញ្ញាតឱ្យលក់ទំនិញអនុគ្រោះពន្ធពីក្រសួងហិរញ្ញវត្ថុរួចហើយ។ នេះគឺជាលិខិតអនុញ្ញាតលើកទី8 ដែលក្រសួងនេះបានផ្ដល់ឱ្យក្រុមហ៊ុនផ្សេងៗ ហើយលើកនេះគឺដើម្បីជំរុញការទិញដូរក្រោយសម័យ COVID-19។

Wangfujing Group គឺជាម្ចាស់គ្រប់គ្រងនៃមជ្ឈមណ្ឌលពាណិជ្ជកម្មប៉េកាំងដ៏ល្បីឈ្មោះនៅក្នុងរដ្ឋធានីរបស់ប្រទេសចិន។ ក្រុមហ៊ុននេះមានមជ្ឈមណ្ឌលពាណិជ្ជកម្មយ៉ាងតិច54នៅក្នុងទីក្រុងចំនួន33របស់ចិន។

អ្នកវិភាគ Fan Junhao និង Xu Zhuonan មកពីក្រុមហ៊ុន China International Capital Corp (CICC) កាលពីថ្ងៃទី10មិថុនា បានឱ្យដឹងថា “ការចាយវាយនឹងងើបឡើងវិញក្រោយពីគោលនយោបាយបើកទូលាយសកម្មភាពលក់ទំនិញអនុគ្រោះពន្ធនៅលើកបណ្ដាកោះ និងនៅតាមតំបន់ទីក្រុង”។

លោក Li Keqiang នាយករដ្ឋមន្ត្រីចិន (រូបខាងស្ដាំ)

កាលពីខែមេសា រដ្ឋមន្ត្រីក្រសួងពាណិជ្ជកម្មចិនក៏បានឱ្យដឹងថា នឹងកែលម្អគោលនយោបាយ និងជួយបង្កើនចំនួនហាងលក់ទំនិញអនុគ្រោះពន្ធនៅតាមអាកាសយានដ្ឋាននិងនៅទីក្រុងនានា ដើម្បីជាផ្នែកមួយនៃផែនការជំរុញការទិញដូរ។ ថ្មីៗនេះ ទីក្រុងក្វាងចូវក៏កំពុងតែដាក់ពាក្យសុំបង្កើតហាងទំនិញអនុគ្រោះពន្ធជាច្រើនផងដែរ។

យោងតាម SCMP ការបង្កើនចំនួនផ្សារ និងហាងលក់ទំនិញអនុគ្រោះពន្ធក៏នឹងជួយឱ្យទីក្រុងប៉េកាំង ឆ្លើយតប បានល្អទៅនឹងការសន្យាបើកទ្វារសេដ្ឋកិច្ចសម្រាប់បណ្ដាក្រុមហ៊ុនបរទេស នៅក្នុងស្ថានភាពដែលដៃគួពាណិជ្ជកម្មធំៗ កំពុងតវ៉ាអំពីភាពអយុត្តិធម៌ដែលអាជ្ញាធរចិនបានធ្វើចំពោះបណ្ដាក្រុមហ៊ុនបរទេសដែលកំពុងរកស៊ីនៅប្រទេសនេះ។

ក្នុងរយៈពេល4ខែដើមឆ្នាំ2020 ចំណូលបានមកពីការលក់រាយនៅប្រទេសចិន បានថយចុះ 16.2% បើធៀបជាមួយនឹងអំឡុងពេលដូចគ្នាកាលពីឆ្នាំ2019 ខណៈដែល GDP បានធ្លាក់ចុះ 6.8% នៅក្នុងត្រីមាសដំបូង។ នៅក្នុងរបាយការណ៍ស្ដីអំពីការងាររបស់រដ្ឋាភិបាលនៅចំពោះសភាជាតិកាលពីខែមុន នាយករដ្ឋមន្ត្រីចិន Li Keqiang បានអះអាងថា សកម្មភាពជំរុញការទិញដូរក្នុងប្រទេសនឹងជួយរក្សាលំនឹងសេដ្ឋកិច្ច និងជាកម្លាំងជំរុញចម្បងសម្រាប់ជួយដល់កំណើនសេដ្ឋកិច្ចក្នុងឆ្នាំនេះ៕

ប្រភព៖ SCMP/Nikkei

June 11, 2020

សំណួរសាកល្បងភាពឆ្លាតវៃលំដាប់ភ្នាក់ងារ FBI…ដើម្បីសាកល្បងសមត្ថភាពក្នុងការសង្កេតរបស់លោកអ្នក

ភ្នាក់ងារ FBI របស់អាមេរិក គឺជាអាជីពមួយ ដែលពិបាកក្នុងការប្រឡងចូលទៅបម្រើការខ្លាំងបំផុតលើពិភពលោក តាមរយៈស្ថិតិដែលមានមិនដល់ 5%ផង របស់អ្នកចូលប្រឡង ដែលអាចឆ្លងផុតការសាកល្បង…។

ខាងក្រោមនេះ គឺជាសំណួរមួយ ដែលឡារ៉ែន បានចម្រាញ់យកមកសាកល្បងសមត្ថភាពក្នុងការសង្កេត និងប្រើហេតុផលរបស់មិត្តអ្នកអាន ថាតើលោកអ្នកអាចឆ្លងផុតសំណួរសាកល្បងក្នុងការប្រឡងចូលធ្វើជាភ្នាក់ងារ FBI បានដែរឬទេ?

សំណួរ៖ ឃាតកររោគចិត្តដ៏ឃោរឃៅម្នាក់ ដែលចូលចិត្តចាប់ពង្រត់មនុស្សយកមកសម្លាប់ បានបង្ខំឱ្យជនរងគ្រោះជ្រើសរើសលេបថ្នាំ 1គ្រាប់ ក្នុងចំណោមថ្នាំ 2គ្រាប់។ គេប្រាប់ថា 1គ្រាប់ ជាថ្នាំពុល(លេបទៅស្លាប់ភ្លាម) និង 1គ្រាប់ទៀត ជាថ្នាំធម្មតា(មិនពុល)។ រៀងរាល់លើក ឃាតករនឹងឱ្យជនរងគ្រោះជាអ្នកជ្រើសរើសយកថ្នាំមុនជានិច្ច បន្ទាប់ពីនោះគេនឹងលេបថ្នាំ ដែលជនរងគ្រោះមិនជ្រើសយកនោះ ហើយគេមិនដែលស្លាប់ឡើយ។

សំណួរសួរថា តើហេតុអ្វីបានជារៀងរាល់លើក គេមិនលេបចំថ្នាំពុល?

ចម្លើយ៖ ការពិតទៅ ថ្នាំទាំង 2គ្រាប់នោះ មិនមែនជាថ្នាំពុលទាំងអស់ តែទឹកនៅក្នុងកែវរបស់ជនរងគ្រោះទៅវិញទេ ដែលមានជាតិពុល ព្រោះគ្រប់ពេលដែលជនរងគ្រោះលេបថ្នាំ គឺត្រូវតែលេបជាមួយទឹកជាធម្មតា…ដូច្នេះប្រាកដណាស់ ជនរងគ្រោះនឹងស្លាប់ យ៉ាងមិនបាច់សង្ស័យឡើយ៕

ប្រែសម្រួលពីឯកសារបរទេសដោយ ទិទីតំតាតូ

June 11, 2020

នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ

ផែនឧបាយកលដែលលោកប្រធានាធិបតី ដូណាល់ ត្រាំ បានត្រៀមទុក ដើម្បីវាយប្រហារចិន ក្នុងប្រធានបទផ្សេងៗនោះ ត្រូវបានដួលរលំខ្ទេចខ្ទីអស់កាលពីអំឡុងចុងខែឧសភា និងតរហូតមកដល់ដើមខែមិថុនាកន្លងទៅ នៅពេលដែលផ្ទៃក្នុងរបស់សហរដ្ឋអាមេរិកខ្លួនឯង កើតមានករណីការស្លាប់របស់ ចច ហ្វ្លយដ៍ បានបង្កឱ្យកើតចរន្តដ៏ធំមហាសាលក្នុងការប្រឆាំងតវ៉ានឹងការរើសអើងពូជសាសន៍ពណ៌សម្បុរ និងការដែលប៉ូលិសប្រើអំពើហិង្សាដាក់ក្រុមបាតុករ ខណៈដែលសម្ព័ន្ធភាពរវាងប្រទេសវិញនោះ អឺរ៉ុប ជាពិសេសបំផុត អាល្លឺម៉ង់ ក៏បានបង្ហាញខ្លួនយ៉ាងច្បាស់ថា មិនឯកភាពជាមួយនយោបាយចំពោះចិន របស់លោក ត្រាំឡើយ។

អំឡុងសប្ដាហ៍ចុងក្រោយរបស់ខែឧសភា អាចហៅបានថា ជាអំឡុងពេល 7ថ្ងៃនៃសេចក្ដីវិនាស ដែលចាប់អង្រួនប្រទេសអាមេរិក ឱ្យញ័ររញ្ជួយខ្លាំងក្លាបំផុត ដោយកម្ទេចបំណែកបាក់បែកមួយចំនួន ថែមទាំងអាចនឹងធ្លាក់មកលើលោកប្រធានាធិបតី ដូណាល់ ត្រាំ ខ្លួនឯងទៀតផង ហើយអ្វីដែលសំខាន់បំផុតនោះគឺ គណៈគ្រប់គ្រងរបស់លោក ត្រាំ ត្រូវបាត់បង់ផែនឧបាយកលដែលបានត្រៀមទុកក្នុងរឿងដែលពាក់ព័ន្ធនឹងចិនទៀតផង។

អំពើឃាតកម្មលើបុរសស្បែកខ្មៅ ចច ហ្វ្លយដ៍ ដ៏គួរឱ្យសោកសៅរំជួលចិត្តនៅក្នុងទីក្រុងមីននិអាប៉ូលិស ក្នុងថ្ងៃទី25 ឧសភា ដែលត្រូវនឹងថ្ងៃទិវាអតីតយុទ្ធជន របស់សហរដ្ឋអាមេរិកនោះ គឺជាការសង្កត់បន្ថែម ឱ្យឃើញពីអំពើហិង្សា របស់ការរើសអើងពូជសាសន៍ពណ៌សម្បុរ និងការតម្រង់គោលដៅចាត់ការ មនុស្សដែលមិនមែនជាជនស្បែកស ក្នុងហេតុការណ៍ប្រើអំពើហិង្សា ម្ដងហើយ ម្ដងទៀតរបស់ប៉ូលិស។ វាគឺជាសញ្ញានៃការផ្ទុះឡើងរបស់ជនវណ្ណៈទាប ដែលបុរាណបំផុត និងជាប្រតិកម្មប្រឆាំងភាពឈានមុខជាទីបំផុតក្នុងសង្គមជនអាមេរិកាំង ខណៈពេលជាមួយគ្នា វាក៏ក្លាយជាការបកអាក្រាតឱ្យមើលឃើញយ៉ាងច្បាស់អំពីការជិះជាន់ខាងវណ្ណៈ ដែលបង្កប់នៅក្រោមពាក្យភូតកុហកបោកប្រាស់របស់របបប្រធានាធិបតី របស់លោក ត្រាំ ទៀតផង។

ទាំងអស់នេះ ជនរងគ្រោះនៃការប្រើអំពើហិង្សារបស់ប៉ូលិស មិនថាតែជនស្បែកខ្មៅ ជនស្បែកស ជនហ៊ិស្ប៉ានិក(អ្នកដែលនិយាយភាសាអេស្ប៉ាញ នៅក្នុងសហរដ្ឋអាមេរិក ដែលភាគច្រើន គឺពួកដែលភៀសខ្លួនមកពីតំបន់អាមេរិកឡាទីន) ឬជនកុលសម្ព័ន្ធអាមេរិក ក៏ដោយ សុទ្ធតែជាអ្នកទីទ័លក្រ និងជាចំណែករបស់ប្រជាជនដែលទន់ខ្សោយផុយស្រួយបំផុតដូចគ្នាទាំងអស់។

ក្នុងកម្រិតអន្តរជាតិ មានការបង្ហាញឡើងនូវភាពសាមគ្គីគ្នាជាធ្លុងមួយដោយការប្រឆាំងតវ៉ា ដែលផ្ទុះឡើងយ៉ាងច្រើនបន្ទាប់ពីការសម្លាប់ ចច ហ្វ្លយដ៍។ ការជួបជុំគ្នាដើរជាក្បួនបានកើតឡើង ទាំងនៅក្នុងទីលាន ថ្រាហ្វាល់ការ របស់ក្រុងឡុងដ្រ៍ និងខ្លោងទ្វារ ប្រ៊ែនដេនប៊ើក ក្នុងក្រុងប៊ែរឡាំង ហើយក្រសួងការបរទេសរុស្ស៊ី ក៏បានបញ្ចេញយោបល់ពាក់ព័ន្ធនឹងរឿងនេះដែរ។

អឺរ៉ុប មានអារម្មណ៍ចម្លែកប្លែកចំពោះអាមេរិក របស់លោកត្រាំស្រាប់ទៅហើយ ហើយក្នុងពេលនេះ មានតែនឹងចាក់ឫសជ្រៅចុះទៅទៀត ដែលការពិតទៅ ក្នុងអំឡុងសប្ដាហ៍ចុងក្រោយរបស់ខែឧសភានោះ មានហេតុការណ៍ជាច្រើនយ៉ាង ដែលរឹតតែសង្កត់បន្ថែម ឱ្យឃើញពីភាពបែកបាក់រ៉ៅឆាន ដែលកំពុងបង្ហាញខ្លួនឡើងនៅក្នុងក្រុមសម្ព័ន្ធមិត្ត នៃត្រើយទាំង 2ខាងរបស់មហាសមុទ្រអាត្លង់ទិក។

ទិសដៅដែលគួរឱ្យចាប់អារម្មណ៍ ដែលបង្ហាញខ្លួនឡើង មាន 3ទិសដៅ…

លោកត្រាំ មើលទៅហាក់ដូចជាបានរំពឹងប៉ាន់ប្រមាណទុកយ៉ាងប្រយ័ត្នប្រយែង ក្នុងរឿងចង្វាក់ពេលវេលាដែលលោកចេញមកប្រកាសផែនការ ចាប់ផ្ដើមធ្វើជាម្ចាស់ផ្ទះរៀបចំការប្រជុំ សាំមិត របស់ក្រុមប្រទេស G7 បែបជំនួបទល់មុខគ្នាក្នុងក្រុងវ៉ាស៊ីនតោន អំឡុងថ្ងៃទី25-26 មិថុនាខាងមុខ ដោយនឹកសង្ឃឹមក្នុងការអួតអាងឱ្យឃើញទាំងអស់គ្នាថា ខ្លួនបានត្រៀមរួចរាល់ហើយក្នុងការឈានរំលងឱ្យហួសផុតពីជំងឺឆ្លងរាតត្បាតកូវីដ-19 តែផែនការរបស់លោកទាំងអស់នោះ បែរជាដួលរលំបោកទៅនឹងដីបែកបាក់ខ្ទេចខ្ទីអស់ ដោយសារតែខ្វះការចាប់អារម្មណ៍ក្លៀវក្លាស្វាហាប់ ពីពួកប្រទេសសម្ព័ន្ធមិត្តលោកខាងលិចរបស់សហរដ្ឋអាមេរិកហ្នឹងឯង។

លោកស្រី មើរកែល ប្រកាសគោលជំហរ

រឿងនេះត្រូវបានបង្ហាញចេញមកឱ្យឃើញយ៉ាងច្បាស់ គួរឱ្យភ្ញាក់ផ្អើលជាពិសេសតែម្ដង តាមរយៈការដែលលោកស្រីនាយករដ្ឋមន្ត្រីនៃប្រទេសអាល្លឺម៉ង់ អ៊ែងជើឡា មើរកែល សម្រេចចិត្តប្រកាស មិនទទួលយកការអញ្ជើញរបស់លោកត្រាំ ដោយលើកហេតុផលដ៏គួរឱ្យកើតអារម្មណ៍បញ្ជោះបន្សោកថា លោកស្រីនៅត្រូវរវល់ វីវក់នឹងការគ្រប់គ្រងជំងឺរាតត្បាតឱ្យបានសិន។

តែការមិនយល់ស្របជាមួយលោកត្រាំ របស់លោកស្រីមើរកែល នៅមានទៅឆ្ងាយជាងហ្នឹង នៅមានចាក់ចូលជ្រៅខ្លាំងជាងហ្នឹងទៅទៀត…លោកស្រីបានដាក់ការសង្កេតយ៉ាងបើកចំហចំពោះសាធារណជនថា បើសិនមានការប្រជុំ សាំមិតប្រទេសG7 កើតឡើង មិនថាក្នុងរូបបែបណាក៏ដោយ “មិនថាតែបែបវីដេអូ ខន់ហ្វ៊ើរេនស៍ ឬបែបណាក៏ដោយ ខ្ញុំក៏នឹងតស៊ូដើម្បី “ដំណើរផ្លូវបែបពហុភាគីនិយម” យ៉ាងពិតប្រាកដ នេះគឺជាអ្វីដែលច្បាស់លាស់បំផុត ទាំងក្នុងG7 ទាំងក្នុង G20”។

នៅពេលមានអារម្មណ៍ដឹងថា ភាពជាអ្នកដឹកនាំរបស់ខ្លួនត្រូវបានគេសាកល្បងយ៉ាងធ្ងន់ធ្ងរហើយនៅក្នុងប្រទេសលោកខាងលិចនោះ លោកត្រាំ ក៏ប្រញាប់ប្រញាល់ប្ដូរទិសដៅ ដោយងាកទៅស្នើឡើងថា ក្រុមG7 ដែលប្រកបដោយពួកប្រទេសដែលមានសេដ្ឋកិច្ចឈានមុខនោះ បានក្លាយជារឿងដែល “ហួសសម័យខ្លាំងណាស់” បាត់ទៅហើយក្នុងពិភពលោកដែលកំពុងផ្លាស់ប្ដូរបែបនេះ និងគួរតែកែសម្រួលឱ្យក្លាយជា “G10 ឬ G11 ដើម្បីតស៊ូជាមួយ G1(គឺចិន)”។

នោះ គឺមានន័យថា លោកត្រាំត្រូវការឱ្យមានការពង្រីកវង់ G7 ដោយនាំយកប្រទេសរុស្ស៊ី ឥណ្ឌា អូស្ត្រាលី និងកូរ៉េខាងត្បូង មកចូលរួមដែរ ហើយក្រុមដែលកែសម្រួលថ្មីនេះ នឹងសាមគ្គីគ្នាតតាំង និងចាត់ការចិន។

…នៅមានត…

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 11, 2020

ក្រុមហ៊ុនអាកាសចរណ៍ រកបានចំណូលច្រើនសន្ធឹក ដោយសារដឹកជ្រូកនិងម៉ាស់ នៅក្នុងវិបត្តិសុខភាព

ប្រាក់ចំណូល4ខែដើមឆ្នាំរបស់ក្រុមហ៊ុន Volg-Dnepr បានកើនជាង30% ឡើងដល់630លានដុល្លារ ដោយសារសេវាកម្មដឹកជ្រូកទៅកាន់ប្រទេសចិន និងដឹកម៉ាស់ទៅកាន់អឺរ៉ុប។

COVID-19 បានបំផ្លាញវិស័យអាកាសចរណ៍ពិភពលោកស្ទើរតែទាំងស្រុងទៅហើយ ប៉ុន្តែសម្រាប់ក្រុមហ៊ុន Volga-Dnepr Group វិញ ជើងហោះហើរនានានៅតែដំណើរការជាធម្មតា។

Volga-Dnepr បានដឹកជ្រូកពូជជាង3,000ក្បាលពីប្រទេសបារាំងទៅកាន់ប្រទេសចិននៅក្នុងដើមឆ្នាំនេះ ដើម្បីប៉ះប៉ូវប្រភពផ្គត់ផ្គង់នៅក្នុងទីផ្សារដែលមានតម្រូវការសាច់ជ្រូកធំជាងគេក្នុងពិភពលោក (ចិន) ក្រោយពីការវាយប្រហារពីរោគរាតត្បាតគ្រុនផ្តាសាយជ្រូកអាហ្វ្រិក។ ជ្រូកដែលនាំចូលប្រទេសចិនត្រូវបានដាក់នៅក្នុងទ្រុងឈើ ក្នុងកាប៊ីនរបស់យន្តហោះ Boeing 747 និងត្រូវឆ្លងកាត់រយៈចម្ងាយ 10,400គីឡូម៉ែត្រ។

លោក Alexey Isaikin ប្រធានក្រុមហ៊ុន Volga-Dnepr Group

វិធានការដើម្បីទប់ស្កាត់ការឆ្លងរាលដាលរបស់វីរុសCOVID-19 បានបង្កើនកង្វះខាតសាច់ជ្រូក ធ្វើឱ្យប្រទេសចិនត្រូវបន្ថែមល្បឿន និងទំហំក្នុងការបង្កាត់ពូជជ្រូក និងចិញ្ចឹមជ្រូក។ ក្នុងរយៈពេល4ខែដើមឆ្នាំនេះ ប្រទេសចិនបាននាំចូលសាច់ជ្រូកពីសហរដ្ឋអាមេរិកជាង250,000តោន ខណៈដែលពេញមួយឆ្នាំ2019កន្លងទៅ តួលេខនេះមានត្រឹមតែ245,000តោនតែប៉ុណ្ណោះ។

COVID-19 បានផ្លាស់ប្ដូររូបភាពនៃការដឹកជញ្ជូនទំនិញតាមផ្លូវអាកាស។ Alexey Isaikin ប្រធានក្រុមហ៊ុន Volga-Dnepr Group បានឱ្យដឹងថា ដើមឡើយ ទំនិញដែលដឹកជញ្ជូនតាមផ្លូវអាកាសប្រមាណជាជាងពាក់កណ្ដាល ត្រូវបានដឹកដោយយន្តហោះពាណិជ្ជកម្ម (យន្តហោះដឹកអ្នកដំណើរ)។ ប៉ុន្តែ ចាប់តាំងពី COVID-19 បានរាតត្បាតខ្លាំង ក្រុមហ៊ុនអាកាសចរណ៍ពាណិជ្ជកម្មនានាក៏បានផ្អាកដំណើរការ ដែលនេះបានធ្វើឱ្យតម្រូវការនៃការដឹកជញ្ជូនតាមយន្តហោះដឹកទំនិញកើនឡើងច្រើន ហើយនាំឱ្យថ្លៃដឹកជញ្ជូនកើនឡើងខ្ពស់ជាងទ្វេដងផងដែរ។

ក្រៅពីជ្រូក ក្រុមហ៊ុនអាកាសចរណ៍ Volga-Dnepr ក៏ថែមទាំងដឹកម៉ាស់ សម្ភារការពារមេរោគ ឧបករណ៍វេជ្ជសាស្ត្រ និងមធ្យោបាយសម្រាប់កម្ចាត់មេរោគទៅកាន់ប្រទេសជាច្រើនក្នុងពិភពលោក ដូចជារុស្ស៊ី បារាំង អាល្លឺម៉ង់។ល។ មុននោះ ក្រុមហ៊ុនរបស់លោក Alexey Isaikin ផ្ដោតទៅលើតែការដឹកទំនិញដែលទាក់ទងនឹងអាកាសចរណ៍ប៉ុណ្ណោះ ដែលវាជាប្រភពចំណូលចម្បងរបស់ក្រុមហ៊ុននេះ។ ក្នុងឆ្នាំនេះ ប្រភពចំណូលនេះបានថយចុះជាង30% ប៉ុន្តែចំណូលសរុបរបស់ Volga-Dnepr នៅតែកើនឡើងខ្ពស់។ ក្នុងរយៈពេល4ខែដើមឆ្នាំ2020នេះ ចំណូលរបស់ក្រុមហ៊ុន Volga-Dnepr បានកើន32% ធៀបនឹងរយៈពេលដូចគ្នាក្នុងឆ្នាំ2019 ដែលនេះបានជួយឱ្យ Volga-Dnepr រកបាន630លានដុល្លារនៅត្រីមាសទី1នៃឆ្នាំ2020។

លោក Alexey Isaikin ថ្លែងថា “ក្រុមហ៊ុនអាកាសចរណ៍កំពុងតែឆ្លងកាត់ដំណាក់កាលលំបាកបំផុតមិនធ្លាប់មានពីមុនមក។ ប៉ុន្តែ ចំពោះក្រុមហ៊ុនអាកាសចរណ៍ដឹកទំនិញដូចយើងខ្ញុំវិញ នេះគឺជាឱកាសល្អមួយ”។

លោក Alexey Isaikin បានព្យាករថា ប្រាក់ចំណូលឆ្នាំនេះរបស់ Volga-Dnepr អាចឡើងដល់2ពាន់លានដុល្លារ។ យោងតាម Bloomberg Billionaires Index (សន្ទស្សន៍មហាសេដ្ឋីដែលស្រង់ស្ថិតិដោយសារព័ត៌មាន Bloomberg) ចំនួនភាគហ៊ុនដែល Isaikin កំពុងកាន់កាប់នៅក្នុងក្រុមហ៊ុនអាកាសចរណ៍ដឹកទំនិញរបស់រុស្ស៊ីនេះ បច្ចុប្បន្នមានតម្លៃប្រមាណជា 700លានដុល្លារអាមេរិក។

ប្រភេទទំនិញដែលទាក់ទងនឹងសុខាភិបាល មានចំនួនជាងពាក់កណ្ដាលនៃទំនិញសរុបដែលត្រូវបានដឹកតាមយន្តហោះនៅទូទាំងពិភពលោក។ វិសាលភាពនៃសកម្មភាពដឹកជញ្ជូនរបស់ Volga-Dnepr ក៏កំពុងតែរីកធំឡើងៗ ដោយសារតែ COVID-19។ លោក Isaikin ថ្លែងថា “ដំបូងឡើយ យើងដឹកតែទំនិញជាសម្ភារសុខាភិបាលពីប្រទេសចិនទៅកាន់ទ្វីបអាហ្វ្រិកតែប៉ុណ្ណោះ ប៉ុន្តែពេលនេះយើងកំពុងតែទទួលបានសំណើដំបូងពីតំបន់អាមេរិកឡាទីន។ ខ្ញុំគិតថា នាពេលដ៏ខ្លីខាងមុខ យើងនឹងពង្រីកការហោះហើរទៅកាន់ឥណ្ឌា”។

អ្នកជំនួញជនជាតិរុស្ស៊ីរូបនេះយល់ថា ទីផ្សារដឹកជញ្ជូនសម្ភារសុខាភិបាលនឹងត្រូវរួមតូចមកវិញក្នុងពាក់កណ្ដាលចុងឆ្នាំ2020នេះ ខណៈដែលថ្លៃដឹកជញ្ជូនចាប់ផ្ដើមធ្លាក់ចុះ។ ទោះជាយ៉ាងនេះក្ដី លោក Isaikin នៅតែព្យាករថា ទំហំនិងថ្លៃដឹកជញ្ជូននឹងនៅតែស្ថិតក្នុងកម្រិតខ្ពស់ជាងដំណាក់កាលមុនវិបត្តិសុខភាព ព្រោះថាយន្តហោះដឹកអ្នកដំណើរនៅតែធ្វើសកម្មភាពតិចតួចនៅឡើយ៕

ប្រភព៖ Bloomberg

June 11, 2020

តើការឆ្លងរាលដាលរបស់មេរោគវីរុសកូរ៉ូណាប្រភេទថ្មីនៅតំបន់អាមេរិកឡាទីន កាចសាហាវប៉ុនណា?

ខណៈដែលស្ថានការណ៍ការឆ្លងរាលដាលរបស់មេរោគវីរុសកូរ៉ូណាប្រភេទថ្មីនៅក្នុងតំបន់ជាច្រើនក្នុងពិភពលោក កំពុងចាប់ផ្ដើមល្អប្រសើរឡើងវិញជាបណ្ដើរៗ មិនថាតែទ្វីបអាស៊ី ឬអឺរ៉ុបនោះ អង្គភាពសាធារណៈសុខាភិបាល បានបញ្ជាក់ថា តំបន់អាមេរិកឡាទីន បានក្លាយជាចំណុចកណ្ដាលនៃការឆ្លងរាលដាលថ្មីមួយរបស់ពិភពលោកហើយ។

ប្រេស៊ីលមានអ្នកឆ្លងមេរោគនេះជិត 8សែននាក់ហើយ ដែលនេះអាចនិយាយបានថា ច្រើនបំផុតលំដាប់លេខ2 របស់ពិភពលោក ឯប្រទេសជិតខាងផ្សេងទៀត ដូចជា មិកស៊ិក និងប៉េរូ ជាដើម ក៏កំពុងព្យាយាមទប់ទល់នឹងការឆ្លងរាលដាលដ៏ធំនេះយ៉ាងវីវក់ដែរ។

ខណៈដែលតួលេខអ្នកឆ្លងថ្មីនៅសហរដ្ឋអាមេរិក កំពុងចាប់ផ្ដើមនៅនឹង ហើយប្រទេសជាច្រើននៅក្នុងទ្វីបអឺរ៉ុប ក៏កំពុងចាប់ផ្ដើមបន្ធូរបន្ថយវិធានការបិទប្រទេសដែរនោះ តែស្ថានការណ៍នៅក្នុងចំណុចកណ្ដាលនៃការឆ្លងរាលដាលកូវីដ-19 ថ្មី របស់ពិភពលោក បែរជាកំពុងតែធ្ងន់ធ្ងរឡើងៗទៅវិញ។

សាកសពត្រូវបានទុកចោលនៅតាមចិញ្ចើមថ្នល់ក្នុងទីក្រុង ក្វាយអាគីល ទីក្រុងធំបំផុតរបស់ប្រទេសអេក្វាដ័រ

អ្នកឆ្លងមេរោគដែលបានទទួលការអះអាងដំបូងគេនៅក្នុងតំបន់អាមេរិកឡាទីន គឺនៅក្នុងប្រទេសប្រេស៊ីល កាលពីថ្ងៃទី26 កុម្ភៈ បើទោះជាអ្នកស្រាវជ្រាវបានប្រាប់ថា មានសញ្ញាបង្ហាញថា ចាប់ផ្ដើមមានអ្នកឆ្លងមេរោគនេះ តាំងពីខែមករា មកម្ល៉េះក៏ដោយ។

បន្ទាប់ពីនោះមក មេរោគវីរុសកូរ៉ូណាប្រភេទថ្មីនេះ ក៏ឆ្លងរាលដាលទៅគ្រប់ប្រទេសក្នុងតំបន់អាមេរិកឡាទីន ដោយមជ្ឈមណ្ឌលគ្រប់គ្រង និងការពាររោគអឺរ៉ុប(European Centre for Disease Control and Prevention) បានកត់ត្រាទុកថា មកដល់ថ្ងៃនេះ មានអ្នកឆ្លងមេរោគច្រើនជាង 1.26លាននាក់ និងមានអ្នកស្លាប់ច្រើនជាង 6ម៉ឺននាក់ហើយ។

ទោះបីជាតួលេខនេះ តិចជាងនៅក្នុងអឺរ៉ុប និងសហរដ្ឋអាមេរិកមែន តែការត្រួតពិនិត្យនៅក្នុងអាមេរិកឡាទីនមិនទូលំទូលាយឡើយ និងក៏អាចមានការស្លាប់ដែលមិនបានរាយការណ៍ជាផ្លូវការ ជាច្រើននាក់ទៀតផង។

ប្រេស៊ីល មានអ្នកឆ្លងមេរោគជិត 7សែននាក់ហើយ នេះជាចំនួនដែលច្រើនបំផុតលំដាប់លេខ2 ក្នុងពិភពលោក

ប្រទេសដែលមានប្រជាជនច្រើនបំផុត 2ប្រទេស ដូចជាប្រេស៊ីល និងមិកស៊ិក មានអ្នកស្លាប់ច្រើនបំផុត ដោយមានចំនួនច្រើនជាង 3.4ម៉ឺននាក់ និង 1.2ម៉ឺននាក់ តាមលំដាប់។

កាលពីថ្ងៃទី4 មិថុនា ប្រេស៊ីលមានរបាយការណ៍អ្នកស្លាប់ 1,349នាក់ ក្នុងរង្វង់ 24ម៉ោង ដែលនេះជាចំនួនខ្ពស់បំផុតជាប្រវត្តិសាស្ត្រ តែយ៉ាងណាក៏ដោយ ក៏ប្រេស៊ីល នៅមិនទាន់មានរដ្ឋមន្ត្រីក្រសួងសុខាភិបាល ដែលបំពេញតួនាទីយ៉ាងស្ថិតស្ថេរដែរ។

កន្លងមក លោកប្រធានាធិបតី សាអ៊ី បូលសូណារ៉ូ របស់ប្រទេសប្រេស៊ីល បានប្រាប់ជាប់រហូតថា កូវីដ-19 មិនមែនជារឿងធ្ងន់ធ្ងរទេ និងក្នុងអំឡុងសប្ដាហ៍កន្លងទៅ លោកទើបតែប្រាប់ទៀតថា ចំនួនអ្នកស្លាប់ដែលកើនឡើងជារឿយៗនៅក្នុងប្រេស៊ីលនោះ គឺជា “កម្មវាសនា” របស់មនុស្សគ្រប់រូប និងបានបន្ទោសបណ្ដាញសារព័ត៌មានថា ជាអ្នកធ្វើឱ្យពលរដ្ឋប្រេស៊ីលភ័យភ្ញាក់ផ្អើល។

រដ្ឋាភិបាលមិកស៊ិក ត្រូវរងការរិះគន់យ៉ាងខ្លាំង ដែលបានចាប់ផ្ដើមបន្ធូរបន្ថយការបិទប្រទេស និងឱ្យធុរកិច្ចមួយផ្នែកត្រឡប់ទៅបើកដំណើរការឡើងវិញ

នៅប្រទេសមិកស៊ិក ក៏ដូចគ្នា កាលពីថ្ងៃទី4 មិថុនា មានចំនួនអ្នកស្លាប់ក្នុងរង្វង់ 24ម៉ោង ខ្ពស់បំផុតជាប្រវត្តិសាស្ត្រ 1,092នាក់ ចំណែកតួលេខអ្នកឆ្លងមេរោគប្រចាំថ្ងៃ ក៏ខ្ពស់បំផុតជាប្រវត្តិសាស្ត្រដូចគ្នា គឺ 3,912នាក់។

យ៉ាងណាក៏ដោយ អាជ្ញាធររដ្ឋបាលបានប្រាប់ថា តួលេខអ្នកឆ្លងមេរោគ និងអ្នកស្លាប់មែនទែន ប្រហែលជាខ្ពស់ជាងនេះច្រើន។ ចំណែករដ្ឋាភិបាល ត្រូវទទួលរងការរិះគន់យ៉ាងខ្លាំង ដែលចាប់ផ្ដើមបន្ធូរបន្ថយវិធានការបិទប្រទេស ឱ្យធុរកិច្ចមួយផ្នែកវិលមកដំណើរការវិញ ធ្វើឱ្យអង្គការសុខភាពប្រចាំភូមិភាគអាមេរិក(Pan American Health Organisation ឬ PAHO) ចេញមកព្រមាន មិនឱ្យរដ្ឋាភិបាល ឆាប់បន្ធូរបន្ថយវិធានការបិទប្រទេសជ្រុលពេក ព្រោះអាចនឹងធ្វើឱ្យស្ថានការណ៍ឆ្លងរាលដាលកាន់តែអាក្រក់ខ្លាំងឡើង។

លោកប្រធានាធិបតី សាអ៊ី បូលសូណារ៉ូ របស់ប្រទេសប្រេស៊ីល ប្រាប់ថា ចំនួនអ្នកស្លាប់ដែលកើនឡើងជារឿយៗនោះ គឺជា “កម្មវាសនា” របស់មនុស្សគ្រប់រូប និងបន្ទោសសារព័ត៌មានថា ជាអ្នកធ្វើឱ្យពលរដ្ឋប្រេស៊ីលភ័យភ្ញាក់ផ្អើល

ប្រទេសប៉េរូ មានចំនួនអ្នកឆ្លងមេរោគខ្ពស់បំផុតលំដាប់ទី10 ក្នុងពិភពលោក ដោយមានអ្នកស្លាប់ប្រមាណជា 5ពាន់នាក់ ចំណែកប្រទេសឈីលី មានអ្នកឆ្លងមេរោគថ្មី រាប់ពាន់នាក់ក្នុង 1ថ្ងៃៗ។

ប្រទេសអេក្វាដ័រ មានអត្រាការស្លាប់ ទល់នឹងចំនួនប្រជាជនខ្ពស់បំផុត ដោយមានអ្នកស្លាប់ប្រមាណជា 20នាក់ ក្នុងចំនួនប្រជាជន 1សែននាក់។

ធៀបជាមួយសហរដ្ឋអាមេរិក និងអឺរ៉ុប

ខុសពីសហរដ្ឋអាមេរិក និងប្រទេសភាគច្រើននៅក្នុងទ្វីបអឺរ៉ុប ចំនួនអ្នកស្លាប់ក្នុងបណ្ដាប្រទេសក្នុងអាមេរិកឡាទីន នៅតែកើនខ្ពស់ឡើងជារឿយៗ។ តួលេខអ្នកស្លាប់នៅក្នុងប្រទេសប្រេស៊ីល មិកស៊ិក និងប៉េរូ កើនឡើង 2ដង រៀងរាល់ 2-3សប្ដាហ៍ ក្នុងខណៈដែលចំនួននេះ ត្រូវប្រើពេល 3ខែសម្រាប់ចក្រភពអង់គ្លេស 8ខែសម្រាប់ប្រទេសអ៊ីតាលី និង11ខែសម្រាប់ប្រទេសបារាំង។

ចំណែកសហរដ្ឋអាមេរិកវិញ មានអ្នកស្លាប់កើនឡើង 2ដង រៀងរាល់ 2ខែ។

ការងារសិក្សាស្រាវជ្រាវ ដោយមហាវិទ្យាល័យវ៉ាស៊ីនតោន បានបង្ហាញថា ចំនួនអ្នកស្លាប់ក្នុងប្រទេសប្រេស៊ីល អាចខ្ពស់ដល់ 1.25សែននាក់ ក្នុងអំឡុងដើមខែសីហា ដែលនឹងកើនឡើង 4ដង ពីចំនួនដែលកំពុងខ្ពស់ឡើងក្នុងខណៈនេះ។

វេជ្ជបណ្ឌិត ខារីសា អេតៀង ប្រធានអង្គការសុខភាពពិភពលោកភូមិភាគអាមេរិក បានប្រាប់ថា “គ្មានអ្វីគួរសង្ស័យសោះឡើយថា ខណៈនេះភូមិភាគរបស់យើង បានក្លាយជាមណ្ឌលកណ្ដាលនៃការឆ្លងរាលដាលដ៏ធំថ្មីមួយរបស់ពិភពលោកទៅហើយ”

អ្នកជំនាញការប្រាប់ថា ច្រើនសប្ដាហ៍ទៀត ទម្រាំតែការឆ្លងរាលដាលនៅក្នុងប្រទេសខ្លះក្នុងអាមេរិឡាទីន នឹងទៅដល់ចំណុចវិបត្តិខ្ពស់បំផុត។

តើត្រូវទប់ទល់យ៉ាងណា?

មិកស៊ិក និងប្រេស៊ីល នៅតែមិនប្រើវិធានការបិទប្រទេសដែលម៉ឺងម៉ាត់ ដូចប្រទេសដទៃទៀត។ ទាំង 2ប្រទេស សុទ្ធតែបានចេញការណែនាំថា ប្រជាជនគួរតែប្រតិបត្តិខ្លួនយ៉ាងណា តែក៏មិនបានចេញច្បាប់ហាមឃាត់កម្រិតជាតិដែរ ហើយលោកប្រធានាធិបតី សាអ៊ី បូលសូណារ៉ូ របស់ប្រេស៊ីល ក៏បានបញ្ជាក់ជាច្រើនលើកថា កូវីដ-19 មិនមែនជារឿងអាក្រក់ទេ។

លោក ម៉ាសៀ ខាស្ត្រូ សាស្ត្រាចារ្យផ្នែកសាធារណៈសុខាភិបាល នៅមហាវិទ្យាល័យ ហាវើដ បានបញ្ជាក់ថា វិធានការទប់ទល់របស់ប្រទេសប្រេស៊ីល មិនល្អឡើយ តែពេលនេះគោលបំណងនៃបទបញ្ជាពីមនុស្សលំដាប់អ្នកគ្រប់គ្រងប្រទេស ក៏ច្របូកច្របល់ និងមិនត្រូវគ្នា ខុសពីប្រទេសអាហ្សង់ទីន និងអ៊ុរុហ្កាយ ដែលល្មមអាចគ្រប់គ្រងស្ថានការណ៍បានខ្លះៗហើយ។

តែយ៉ាងណាក៏ដោយ ទោះជាប្រទេសប៉េរូ នឹងមានវិធានការបិទប្រទេសដ៏ម៉ឹងម៉ាត់តឹងរ៉ឹងបំផុតក្ដី តែតួលេខអ្នកឆ្លងមេរោគ និងអ្នកស្លាប់ ក៏នៅតែកើនឡើងខ្ពស់ជារឿយៗ និងមានបទបញ្ជាឱ្យពន្យារវិធានការបិទប្រទេសរហូតដល់ដំណាច់ខែនេះ។

ទោះជាប្រទេសឈីលី អាចពិនិត្យរកមេរោគពីប្រជាជនបានច្រើនជាងគេបំផុតក្នុងតំបន់ ដែលស្ថិតក្នុងចំនួនប្រមាណ 32នាក់ ក្នុងចំនួនប្រជាជន 1,000នាក់មែន តែការពិនិត្យរកមេរោគនៅក្នុងតំបន់នេះ ក៏នៅតែអាចរាប់បានថា តិចខ្លាំងណាស់ បើប្រៀបធៀបនឹងតំបន់ផ្សេងៗ ដូចជាប្រទេសមិកស៊ិក ដែលមានការពិនិត្យរកមេរោគ គិតទៅប្រមាណជា 2នាក់ ក្នុងចំនួនប្រជាជន 1,000នាក់ ធៀបនឹង 57នាក់ ក្នុងចំនួនប្រជាជន 1,000នាក់នៅក្នុងសហរដ្ឋអាមេរិក។

ការវិភាគស្រាវជ្រាវដោយមហាវិទ្យាល័យ សៅប៉ូឡូ បានវាយតម្លៃថា ប្រទេសប្រេស៊ីល អាចមានអ្នកឆ្លងមេរោគមែនទែនច្រើនជាងតួលេខផ្លូវការដល់ទៅ 15ដងឯណោះ តែយ៉ាងណាក៏ដោយ លោកប្រធានាធិបតី បូលសូណារ៉ូ ក៏នៅតែចង់ឱ្យប្រទេសប្រេស៊ីល ត្រឡប់មកស្ដារសេដ្ឋកិច្ចឡើងវិញឱ្យបានឆាប់រហ័ស កណ្ដាលក្ដីវិតក្កកង្វល់របស់ប្រទេសជិតខាងផ្សេងទៀត៕

ប្រភព៖ សារព័ត៌មានបរទេស

June 11, 2020

ឥណ្ឌូនេស៊ីបញ្ចុះបញ្ចូលក្រុមហ៊ុនអាមេរិកាំងឱ្យចាកចេញពីចិន មករកស៊ីក្នុងប្រទេសខ្លួន

ប្រទេសឥណ្ឌូនេស៊ីកំពុងតែបញ្ចុះបញ្ចូល និងពិភាក្សាជាមួយរដ្ឋាភិបាលសហរដ្ឋអាមេរិក អំពីការរើក្រុមហ៊ុននានារបស់សហរដ្ឋអាមេរិកដែលកំពុងរកស៊ីនៅប្រទេសចិន ឱ្យមកកាន់ឥណ្ឌូនេស៊ី។

លោក Luhut Panjaitan រដ្ឋមន្ត្រីក្រសួងកិច្ចការវិនិយោគនិងដែនសមុទ្ររបស់ឥណ្ឌូនេស៊ីបានឱ្យដឹងថា រដ្ឋាភិបាលប្រទេសនេះ កំពុងតែឧទ្ទេសនាមទីតាំងមួយចំនួនសម្រាប់អ្នកវិនិយោគមកពីសហរដ្ឋអាមេរិក ក្នុងនោះមានតំបន់ឧស្សាហកម្ម Kendal នៅខេត្តជ្វាកណ្ដាល (Central Java) ជាតំបន់សេដ្ឋកិច្ចពិសេសដែលទទួលបានអត្ថប្រយោជន៍ផ្នែកពន្ធគយ និងតំបន់ឧស្សាហកម្ម Brebes ដែលជាគម្រោងមួយក្នុងចំណោមគម្រោងអាទិភាពទាំង89របស់រដ្ឋ ដែលត្រូវបានជ្រើសរើសដោយប្រធានាធិបតី Joko Windodo។

លោក Panjaitan ថ្លែងថា ក្រុមហ៊ុនប្រមាណជា20 បានសម្ដែងការចាប់អារម្មណ៍ទៅលើការរើក្រុមហ៊ុនពីប្រទេសចិនមកកាន់ប្រទេសឥណ្ឌូនេស៊ី។

អ្នកនាំពាក្យរបស់ក្រសួងកិច្ចការវិនិយោគនិងដែនសមុទ្រឥណ្ឌូនេស៊ីបានឱ្យដឹងថា លោក Panjaitan ក៏បានជួបពិភាក្សាជាមួយប្រធានប្រតិបត្តិនៃក្រុមហ៊ុនហិរញ្ញវត្ថុអភិវឌ្ឍអន្តរជាតិសហរដ្ឋអាមេរិក និងស្ថាប័នរដ្ឋាភិបាលមួយ ក្រោយពីប្រធានាធិបតី Widodo បានទាក់ទងទៅកាន់ប្រធានាធិបតី Trump។

ឥណ្ឌូនេស៊ីជាប់ចំណាត់ថ្នាក់ល្អជាងកម្ពុជាបើនិយាយអំពីសន្ទស្សន៍ប្រកួតប្រជែកផ្នែកឧស្សាហកម្ម (CIP/Competitive Industrial Performance) ឆ្នាំ2018 នេះបើតាមរបាយការណ៍របស់ UNIDO របស់អង្គការសហប្រជាជាតិ។

ប៉ុន្តែ ឥណ្ឌូនេស៊ីនៅតែជួបការលំបាកក្នុងការទាក់ទាញវិនិយោគដោយផ្ទាល់ពីក្រៅប្រទេស។ ឆ្នាំ2018 ប្រទេសនេះបានទាក់ទាញការវិនិយោគផ្ទាល់ពីបរទេស (FDI/Foreign Direct Investment) ត្រឹមតែ1.8% ប៉ុណ្ណោះបើធៀបជាមួយនឹង GDP (Gross Domestic Product/ផលិតផលក្នុងស្រុកសរុប) ដែលនេះទាបជាងបណ្ដាប្រទេសក្នុងតំបន់ ដូចជាវៀតណាម ថៃ និងម៉ាឡេស៊ី។

ប្រធានាធិបតីឥណ្ឌូនេស៊ី លោក Joko Widodo និងលោក Trump

យោងតាមទំព័រ Nikkei Asian Review គិតត្រឹមខែតុលា2019 ក្នុងចំណោមក្រុមហ៊ុនចំនួន33ដែលបានរើចេញពីប្រទេសចិន មាន23ក្រុមហ៊ុនបានចូលមករកស៊ីនៅប្រទេសវៀតណាម ក្រៅពីនេះបានរើមកម៉ាឡេស៊ី ថៃ និងកម្ពុជា។ World Bank បានបញ្ចេញមតិថា “ក្រុមហ៊ុននានាដែលកំពុងចាកចេញពីប្រទេសចិន ប៉ុន្តែមិនបានមកកាន់ឥណ្ឌូនេស៊ីទេ ព្រោះប្រទេសជិតខាងរបស់ឥណ្ឌូនេស៊ីមានភាពទាក់ទាញខ្លាំងជាង”។

សូម្បីតែនៅក្នុងអំឡុងវិបត្តិសុខភាព COVID-19 ដែលនាំឱ្យមានការរើរោងចក្រចេញពីប្រទេស ប្រទេសឥណ្ឌូនេស៊ីនៅតែបាត់បង់ឱកាស នេះបើតាម Citigroup។

របាយការណ៍របស់ Citigroup បានឱ្យដឹងថា “បណ្ដាតំបន់សេដ្ឋកិច្ចដែលអាចទទួលបានប្រយោជន៍គឺជាភាគីដែលមានអត្រានាំចេញខ្ពស់ប្រហាក់ប្រហែលប្រទេសចិន និងមានបណ្ដាញផ្គត់ផ្គង់ស្រាប់”។ Citigroup យល់ថា ប្រទេសឥណ្ឌា វៀតណាម ម៉ាឡេស៊ី តៃវ៉ាន់ និងប្រទេសថៃ អាចជាទីតាំងដែលទទួលបានផលប្រយោជន៍ក្នុងរយៈពេលខ្លី។

លោក Sanny Iskandar ប្រធានសមាគមអចលនទ្រព្យឧស្សាហកម្មឥណ្ឌូនេស៊ីបានសរសើរថា ប្រទេសឥណ្ឌូនេស៊ីជា “កន្លែងល្អដើម្បីមកតាំងនៅជាថ្មី ព្រោះយើងជាទីផ្សារដែលមានសក្ដានុពល ដោយមានប្រជាជនច្រើនជាងគេបំផុតក្នុងតំបន់អាស៊ីអាគ្នេយ៍”។

ប៉ុន្តែ លោក Sanny Iskandar ក៏បានទទួលស្គាល់ថា ប្រទេសនេះត្រូវការកែលម្អប្រភពធនធានមនុស្ស និងបញ្ហាការិយាធិបតេយ្យ និងការកំណត់ផ្សេងៗទៀត។ លោកបន្តថា “កញ្ចប់កំណែទម្រង់សេដ្ឋកិច្ចដែលបានសន្យា ចុងក្រោយមិនទាន់បានចេញជាលទ្ធផលនៅឡើយ ដែលនេះបានបង្កការខកចិត្តដល់អ្នកវិនិយោគ ក៏ដូចជាអ្នកជំនួញ”៕

ប្រភព៖ សារព័ត៌មានបរទេស

June 10, 2020

Facebook ធ្វើទំនើបកម្ម chatbot ដើម្បីបង្កើនប្រសិទ្ធភាពថែទាំអតិថិជនរបស់អ្នកប្រើប្រាស់

ការកែលម្អថ្មីរបស់បណ្ដាញសង្គមខ្នាតយក្សនេះនឹងជួយឱ្យកម្មវិធី chatbot ដើរតួនាទីជាជំនួយការដ៏សំខាន់ និងមានប្រសិទ្ធភាពសម្រាប់បណ្ដាក្រុមហ៊ុនលក់រាយដែលប្រើប្រាស់ Facebook។

កាលពីសប្ដាហ៍មុន ក្រុមអ្នកបច្ចេកវិទ្យារបស់ Facebook បានប្រកាសអំពីការកែលម្អមុខងារ chatbo ដើម្បីជួយឱ្យអ្នកប្រើប្រាស់របស់ខ្លួនកាន់តែមានភាពងាយស្រួលក្នុងការទិញដូរតាមអនឡាញនៃបណ្ដាញសង្គមនេះ។

ជំនួយការស្រមោល chatbot ដែលត្រូវបាន Facebook អភិវឌ្ឍ មានលទ្ធភាពចាត់ការទៅលើរូបភាពដែលអ្នកប្រើប្រាស់ និង chatbot អាចមើលឃើញជាមួយគ្នាក្នុងពេលវេលាពិត។ ការអភិវឌ្ឍនេះ ជាមូលដ្ឋាន គឺអនុញ្ញាតឱ្យ chatbot ដឹងបានថា វាកំពុងតែមើលរូបភាពដូចគ្នាណាមួយជាមួយនឹងអ្នកប្រើប្រាស់ ហើយឆ្លើយតបនឹងសំណួរអំពីរូបភាពនោះ (ឧទាហរណ៍៖ ពណ៌របស់ស្បែកនោះជាពណ៌អ្វី?។ល។)។

ការកែលម្អខាងលើនេះនឹងជួយឱ្យ chatbot មានសមត្ថភាពក្នុងការពិភាក្សាបានរលូនជាងមុនអំពីលក្ខណៈ ឬស្ថានភាពរបស់ទំនិញ ហើយឆ្លើយតបនឹងសំណួរជាក់លាក់អំពីផលិតផលដែលអតិថិជនបានរំឭកដល់។ ប៉ុន្តែ មិនទាន់ដឹងថា Facebook នឹងដាក់ឱ្យដំណើរការកំណែថ្មីនេះនៅពេលណានៅឡើយ។ យ៉ាងនេះក្ដី ក្រុមអ្នកវិភាគវាយតម្លៃថា នេះគឺជាជំហានថ្មីមួយទៀតដែលបង្ហាញថា chatbot នឹងក្លាយជាកម្មវិធីដ៏មានប្រយោជន៍សម្រាប់អ្នកប្រើប្រាស់។

កម្មវិធី chatbot ទទួលបានការប្រើប្រាស់ពីក្រុមហ៊ុនចំនួន18%នៅក្នុងទីផ្សារសហរដ្ឋអាមេរិក នេះបើតាមស្ថិតិកាលពីខែមករា ឆ្នាំ2020 របស់ ZipWhip ដែលត្រូវបានដកស្រង់និងចុះផ្សាយដោយគេហទំព័រ eMarketer។

ការកែលម្អកម្មវិធី chatbot របស់ Facebook ត្រូវបានគេសង្ឃឹមច្រើន នៅពេលសំណួរដ៏ច្រើននឹងត្រូវបានដោះស្រាយក្នុងពេលតែមួយដោយបច្ចេកវិទ្យា។ ប្រការនេះក៏នឹងកាន់តែពង្រឹងមហិច្ឆតារបស់ Facebook ក្នុងការលោតចូលធ្វើពាណិជ្ជកម្មនៅលើបណ្ដាញសង្គមនេះផងដែរ។

កាលពីចុងខែមុន Facebook បានធ្វើឱ្យអ្នកប្រើប្រាស់មានការភ្ញាក់ផ្អើលខ្លាំង នៅពេលប្រកាសលោតចូលក្នុងវិស័យពាណិជ្ជកម្មអេឡិកត្រូនិក ដោយការឧទ្ទេសនាម Facebook Shop។ មុខងារនេះអនុញ្ញាតឱ្យក្រុមហ៊ុននានាបង្កើតតូបទំនិញអនឡាញ និងផ្សាយពាណិជ្ជកម្មផលិតផលជាក់លាក់តាមរយៈឆាណែលផ្ដាច់មុខរបស់ Facebook។

ការដាក់បញ្ចូលជំនួយការស្រមោល chatbot អាចជួយអតិថិជនសក្ដានុពល ស្វែងយល់អំពីផលិតផលបានយ៉ាងលម្អិត។ ប្រការនេះនឹងនាំមកនូវផលប្រយោជន៍ច្រើនដល់បណ្ដាក្រុមហ៊ុនដែលខ្វះបុគ្គលិកសម្រាប់ឆ្លើយនឹងសំណួរភ្លាមៗរបស់អតិថិជន។

ក្រៅពីនេះ ជំនួយការស្រមោល chatbot ក៏ជួយឱ្យ Facebook ប្រើប្រាស់អស់ពីលទ្ធភាពនៃទិន្នការទិញដូរតាមរយៈបណ្ដាញសង្គមដែលកាន់តែកើនឡើងពីមួយថ្ងៃទៅមួយថ្ងៃ។ ប្រាក់ចំណូលដែលបានមកពីការលក់រាយនៅលើបណ្ដាញសង្គម តាមការព្យាករ វានឹងកើនទ្វេដងក្នុងរយៈពេល5ឆ្នាំទៀត ដោយវានឹងឡើងដល់ 53.94ពាន់លានដុល្លារក្នុងឆ្នាំ2024។ នេះបើតាមការគន់គូរថ្មីបំផុតរបស់ Business Insider៕

ប្រភព៖ Business Insider

June 10, 2020

Author: សឿន សំណាង