សឿន សំណាង - La Reine Media

អ្នកមានជាងគេនៅទ្វីបអាស៊ី មានឈ្មោះក្នុងបញ្ជីអ្នកមានបំផុតទាំង10ក្នុងពិភពលោក

មហាសេដ្ឋីឥណ្ឌា Mukesh Ambani គឺជាអ្នកតំណាងឱ្យទ្វីបអាស៊ីតែមួយគត់ដែលបានឡើងដល់ Top 10 នៃមហាសេដ្ឋីពិភពលោកនៅក្នុងបញ្ជីឈ្មោះ Bloomberg Billionaires Index។

ដោយមានទ្រព្យ64.5ពាន់លានដុល្លារ លោក Muskesh Ambini បានយកឈ្នះលើលោក Larry Ellison នៃក្រុមហ៊ុន Oracle និងលោកស្រី Francoise Bettencourt Meyers នៃប្រទេសបារាំង ហើយក្លាយជាអ្នកមានបំផុតលំដាប់ទី9ក្នុងពិភពលោក។ លោក Muskesh Ambbani កាន់កាប់ភាគហ៊ុនចំនួន42%នៅក្នុងក្រុងហ៊ុន Reliance Industries (ឥណ្ឌា)។ មូលបត្ររបស់ក្រុមហ៊ុននេះបានឡើងថ្លៃទ្វេដងរាប់ចាប់ពីខែមីនា2020។

បើទោះជាសេដ្ឋកិច្ចឥណ្ឌាកំពុងតែមានបញ្ហាដោយសារបម្រាមគោចរក្នុងការទប់ស្កាត់COVID-19 ប៉ុន្តែ “ក្រុមហ៊ុនបុត្រសម្ព័ន្ធនានារបស់លោក Muskesh ពិសេសគឺក្រុមហ៊ុនទូរគមនាគមន៍ Jio នៅតែរកចំណូលបានច្រើន ដែលនេះបានជួយឱ្យទ្រព្យរបស់លោកកើនឡើងយ៉ាងលឿន” នេះបើតាមមតិរបស់ Jayati Ghosh ដែលជានាយកមជ្ឈមណ្ឌលផែនការនិងស្រាវជ្រាវសេដ្ឋកិច្ចនៃសាកលវិទ្យាល័យ Jawaharlal Nehru។

ទោះជាតម្លៃប្រេងបានដាំក្បាលចុះដែលនាំឱ្យការលក់ភាគហ៊ុនរបស់ក្រុមហ៊ុន Reliance ក្នុងវិស័យគីមីប្រេងជួបការលំបាកយ៉ាងណាក៏ដោយ នៅក្នុងរយៈពេល2ខែចុងក្រោយនេះ ក្រុមហ៊ុន Jio របស់ Reliance Industries នៅតែទទួលបានខ្ទង់វិនិយោគចំនួន15ពាន់លានដុល្លារពីក្រុមអ្នកជំនួញ។ ខ្ទង់ប្រាក់នេះគឺស្មើនឹងជាងពាក់កណ្ដាលនៃខ្ទង់វិនិយោគទៅលើបណ្ដាក្រុមហ៊ុនទូរគមនាគមន៍នៅទូទាំងសកលលោកសម្រាប់ឆ្នាំនេះ។ ក្រុមហ៊ុន Facebook, General Atlantic, Silver Lake Partners, KKR & Co. រួមនឹងខ្ទង់វិនិយោគជាតិរបស់ប្រទេសអារ៉ាប់ប៊ីសាអូឌីត ក៏សុទ្ធតែបានទម្លាក់ខ្ទង់វិនិយោគទៅក្នុងក្រុមហ៊ុន Jio ដោយសង្ឃឹមថា នឹងទទួលបានផលចំណេញច្រើនពីទីផ្សារពាណិជ្ជកម្មអនឡាញដែលរីកចម្រើនខ្លាំងជាងគេមួយនៅក្នុងពិភពលោកនេះ។

របាយការណ៍ថ្មីមួយរបស់ Sanford C. Bernstein បានព្យាករថា ក្រុមហ៊ុន Jio នឹងកាន់កាប់48%នៃទីផ្សារទូរគមនាគមន៍ឥណ្ឌានៅឆ្នាំ2025។ មហិច្ឆតាក្នុងវិស័យពាណិជ្ជកម្មអេឡិចត្រនិចរបស់មហាសេដ្ឋី Mukesh Ambani ថ្មីៗនេះក៏បានបង្ហាញកាន់តែច្បាស់ នៅពេល Reliance បោះជំហានទៅកាន់តែជិតទៅនឹងការទិញភាគហ៊ុននៅក្នុងក្រុមហ៊ុន Future Group ដែលជាក្រុមហ៊ុនមួយកំពុងសហការជាមួយនឹងក្រុមហ៊ុន Amazon។

មហាសេដ្ឋីឥណ្ឌា Mukesh Ambani និងភរិយា លោកស្រី Nita

លោក Mukesh Ambani បានចូលរួមធ្វើការនៅក្នុងក្រុមហ៊ុនរបស់គ្រួសារគាត់តាំងពីដើមទសវត្សរ៍ទី80នៃសហស្សវត្សរ៍មុន។ Dhirubhai Ambani ដែលជាឪពុករបស់ Mukesh និងជាស្ថាបនិករបស់ក្រុមហ៊ុន Reliance បានហៅលោក Mukesh ឱ្យត្រលប់មកកាន់ប្រទេសឥណ្ឌាវិញដើម្បីជួយគ្រប់គ្រងការងារសាងសង់រោងចក្រផលិត polyester (Polyester គឺជាសរសៃដែលត្រូវបានបង្កើតឡើងពីធ្យូងថ្ម ខ្យល់ ទឹក និងប្រេង) របស់គ្រួសារនេះ។ លោក Mukesh Ambani កាលណោះទើបតែបានបញ្ចប់ការសិក្សានៅសាកលវិទ្យាល័យ Stanford បានមួយឆ្នាំ។ គ្រួសារត្រកូល Ambani បានទិញក្រុមហ៊ុនផ្គត់ផ្គង់ផលិតផល រួមនឹងរោងចក្រគីមីប្រេង និងចម្រាញ់ប្រេងជាច្រើនដើម្បីបង្កើតបានជាក្រុមហ៊ុនខ្នាតធំក្នុងវិស័យថាមពល វាយនភណ្ឌ និងផលិតអំបោះ។

Dhirubhai Ambani បានទទួលមរណភាពកាលពីឆ្នាំ2002 ដោយមិនបានបន្សល់ទុកបណ្ដាំមរតកនោះឡើយ ដែលនេះបានធ្វើឱ្យកូនៗរបស់គាត់ គឺលោក Mukesh Ambani និង Anil Ambani មានជម្លោះដោយសារការដណ្ដើមទ្រព្យ។ ចុងក្រោយ ម្ដាយរបស់ពួកគេក៏បានចេញមកធ្វើអន្តរាគមន៍ ដោយចែកទ្រព្យជាពីរចំណែកស្មើគ្នា។ Mukesh ត្រូវគ្រប់គ្រងផ្នែកចម្រាញ់ប្រេង ផលិតគីមីប្រេង ឧស្ម័នប្រេង និងវាយនភណ្ឌ។ ចំណែក Anil គ្រប់គ្រងផ្នែកទូរគមនាគមន៍ កម្សាន្ត ថាមពលអគ្គិសនី និងក្រុមហ៊ុនគ្រប់គ្រងទ្រព្យ។

ក្រោយមក ការធ្វើជំនួញរបស់ Anil បានជួបនឹងបញ្ហាច្រើន បណ្ដាលឱ្យក្រុមហ៊ុនបុត្រសម្ព័ន្ធនានាត្រូវធ្លាក់ទៅក្នុងវិបត្តិបំណុល និងក្ស័យធន។ ផ្ទុយទៅវិញ Mukesh កាន់តែទទួលបានជោគជ័យ និងបានលោតចូលប្រលូកក្នុងវិស័យទូរគមនាគមន៍ ពាណិជ្ជកម្មអេឡិចត្រូនិច ហើយក៏បានក្លាយជាមហាសេដ្ឋីលំដាប់ទីមួយនៅអាស៊ី៕

ប្រភព៖ Bloomberg

June 20, 2020

Samsung ត្រៀមរើខ្សែចង្វាក់ផលិតកម្មផ្ទាំងអេក្រង់ ចេញពីចិន មករោងចក្រនៅវៀតណាម ក្នុងឆ្នាំនេះ

ក្រុមហ៊ុន សាំស៊ុង អេឡិចត្រូនិក កំពុងរៀបផែនការរើខ្សែចង្វាក់ផលិតកម្មផ្ទាំងអេក្រង់បង្ហាញទិន្នន័យ មួយផ្នែកធំពីរោងចក្ររបស់ក្រុមហ៊ុននៅក្នុងប្រទេសចិន មករោងចក្រនៅក្នុងប្រទេសវៀតណាមនៅឆ្នាំនេះ។ នេះបើតាមការរាយការណ៍របស់ទីភ្នាក់ងារព័ត៌មានផ្លូវការរបស់វៀតណាម។

សាំស៊ុងជាអ្នកវិនិយោគទុនធំបំផុតនៅក្នុងប្រទេសវៀតណាម មានតម្លៃវិនិយោគសរុបទាំងអស់ 17,000លានដុល្លារ។

វេបសាយសារព័ត៌មានអនឡាញរបស់រដ្ឋបាលវៀតណាមបានរាយការណ៍ថា “សាំស៊ុងសម្លឹងឃើញវៀតណាមជាច្រកទ្វារសំខាន់ ដែលបើកឆ្ពោះទៅកាន់ប្រទេសផ្សេងៗក្នុងភូមិភាគអាស៊ីភាគអាគ្នេយ៍ និងជាផ្នែកតភ្ជាប់នៅក្នុងខ្សែចង្វាក់ផ្គត់ផ្គង់ពិភពលោក។ ការផ្លាស់ប្ដូរនេះ នឹងធ្វើឱ្យវៀតណាមក្លាយជាអ្នកផលិតផ្ទាំងអេក្រង់បង្ហាញទិន្នន័យសាំស៊ុងលំដាប់ជួរមុខគេរបស់ពិភពលោក”

ព័ត៌មាននៃការផ្លាស់ប្ដូរខ្សែចង្វាក់ផលិតកម្មរបស់សាំស៊ុងនេះ កើតឡើងក្នុងខណៈដែលក្រុមហ៊ុនផ្សេងៗ កំពុងសម្លឹងរកមើលខ្សែចង្វាក់ផ្គត់ផ្គង់ដែលច្រើនសម្បូរបែបក្រៅពីប្រទេសចិន ក្រោយពីខ្សែចង្វាក់ផ្គត់ផ្គង់ត្រូវបានជាប់គាំងយ៉ាងទូលំទូលាយទូទាំងពិភពលោក នៅពេលដែលមេរោគវីរុសកូរ៉ូណាប្រភេទថ្មីកើតការឆ្លងរាលដាលលើកដំបូងនៅក្នុងប្រទេសចិនដែលជាមជ្ឈមណ្ឌលរោងចក្រផលិតកម្មរបស់ពិភពលោក។

ក្រុមហ៊ុនផ្នែកតិចណូឡូជីដ៏ធំសម្បើមរបស់កូរ៉េខាងត្បូងមួយនេះ មានខ្សែចង្វាក់ផលិតកម្មផ្ទាំងអេក្រង់បង្ហាញទិន្នន័យ នៅក្នុងប្រទេសវៀតណាមស្រាប់ហើយ ដោយក្រុមហ៊ុននេះមានរោងចក្រចំនួន 6កន្លែងនៅវៀតណាម ព្រមទាំងមជ្ឈមណ្ឌលស្រាវជ្រាវ និងអភិវឌ្ឍន៍ 2កន្លែងទៀត។

សេចក្ដីរាយការណ៍របស់វេបសាយតឿយជែ បានបញ្ជាក់បន្ថែមថា ផ្ទាំងអេក្រង់បង្ហាញទិន្នន័យ នឹងត្រូវផលិតនៅឯ សាំស៊ុង អេឡិចត្រូនិក ខំផ្លេក នៅក្នុងទីក្រុងហូជីមិញ៕

ប្រភព៖ សារព័ត៌មានបរទេស

June 20, 2020

“យុទ្ធសាស្ត្រឱកាសនិយម” បានជួយឱ្យម្ចាស់ហាងស៊ុបត្រីហឹរ ក្លាយជាមហាសេដ្ឋីក្នុងសម័យCOVID-19

តម្លៃមូលបត្ររបស់ក្រុមហ៊ុន Jiumaojiu International Holdings កើនឡើងទ្វេដងដោយសារបណ្ដាញភោជនីយដ្ឋានដែលមានលក់ស៊ុបត្រីហឹរ ដែលនេះបានជួយឱ្យទ្រព្យសម្បត្តិរបស់ប្រធានក្រុមហ៊ុននេះកើនឡើងលើសពី1ពាន់លានដុល្លារអាមេរិក។

Jiumaojiu International Holdings មានបណ្ដាញភោជនីយដ្ឋាន Tai Er ដែលមានឈ្មោះល្បីល្បាញដោយសារមុខម្ហូបស៊ុបត្រីហឹរបែបបុរាណរបស់ចិន។ ក្រុមហ៊ុននេះបានចូលប្រលូកក្នុងផ្សារហ៊ុន (IPO) ចាប់ពីពាក់កណ្ដាលខែមករា2020 នៅមុនគ្រាដែលចិនដាក់បម្រាមគោចរដើម្បីទប់ស្កាត់COVID-19។

ក៏ប៉ុន្តែ បម្រាមគោចរមិនបានប៉ះពាល់ដល់តម្លៃមូលបត្ររបស់ Jiumaojiu International Holdings នោះទេ។ តម្លៃមូលបត្រ Jiumaojiu បានឡើងថ្លៃទ្វេដងរាប់ចាប់ពីដើមខែកុម្ភៈ2020 ដែលនេះគឺជាលទ្ធផលនៃការបើកដំណើរការភោជនីយដ្ឋានមួយចំនួនឡើងវិញនៅពាក់កណ្ដាលខែមីនា។ Bloomberg Billionaires Index បានឱ្យដឹងថា ប្រការខាងលើនេះហើយដែលបានជួយឱ្យភាគហ៊ុនចំនួន44%របស់លោកប្រធាន Guan Yihong មានតម្លៃឡើងដល់1.1ពាន់លានដុល្លារ នាំឱ្យលោកក្លាយជាមហាសេដ្ឋីមួយរូបនៅក្នុងបញ្ជីឈ្មោះរបស់ Bloomberg។

Walter Woo ដែលជាអ្នកវិភាគម្នាក់មកពីក្រុមហ៊ុន CMB International បានថ្លែងថា៖ “ការរកស៊ីរបស់ក្រុមហ៊ុននេះមានភាពល្អប្រសើរជាងធម្យមភាគនៃទីផ្សារ និងបានងើបក្បាលឡើងយ៉ាងលឿនក្រោយពីបើកដំណើរការឡើងវិញ”។ Woo បកស្រាយថា ភោជនីយដ្ឋាននេះល្បីឈ្មោះក៏ដោយសារតម្លៃអាហារសមរម្យ និងមានអនាម័យខ្ពស់។

Guan Yihong ឆ្នាំនេះមានអាយុ50ឆ្នាំ។ លោកបានបើកហាងលក់មីដំបូងមួយកន្លែងនៅខេត្ត Hainan កាលពីឆ្នាំ1995 ដែលកាលណោះមានបុគ្គលិកតែ6នាក់ និងដាក់តុតែ6ប៉ុណ្ណោះ។ លោក Guan បានពង្រីកហាងទៅកាន់ខេត្ត Guangzhou នាឆ្នាំ2003 ហើយក្រោយមកក៏បានដាក់ការិយាល័យកណ្ដាលនៅទីនេះ។ ក្រុមហ៊ុន Jiumaojiu បច្ចុប្បន្នមានភោជនីយដ្ឋានសរុបជាង300កន្លែង ដោយមានពាណិជ្ជសញ្ញាចំនួន5 និងបម្រើសេវាកម្មអាហារជាច្រើនផ្សេងៗគ្នា ចាប់ពីអាហារពិសេសបែបអ្នកស្រុកSichuan រហូតដល់Shaanxi រួមទាំងអាហារបែបចិញ្ចើមផ្លូវផងដែរ។ Jiumaojiu ក៏បានផ្ដល់សិទ្ធិឱ្យក្រុមហ៊ុនផ្សេងៗប្រើប្រាស់យីយោនេះទៀតផង។

ឆ្នាំ2015 លោក Guan បានបង្កើតក្រុមហ៊ុន Tai Er ហើយមិនយូរប៉ុន្មានក៏ទទួលបានជោគជ័យ។ អតិថិជននាំគ្នាចូលមកញ៉ាំអាហារស៊ុបត្រីហឹរបុរាណរបស់ចិន។ នៅក្នុងរបាយការណ៍ចក្ខុវិស័យ Jiumaojiu បានឱ្យដឹងថា ពួកគេគឺជាបណ្ដាញភោជនីយដ្ឋានដែលលក់អាហារប្រភេទនេះដាច់ជាងគេបំផុតនៅប្រទេសចិន។

ប្រាក់ចំណូលរបស់Jiumaojiu បានកើន42% ដែលស្មើនឹង2.7ពាន់លានយន់ (381ដុល្លារអាមេរិក) កាលពីឆ្នាំ2019។ ប្រាក់ចំណូលចំនួន98%គឺបានមកពី Tai Er និង Jiu Mao Jiu។ ដោយឡែក ប្រាក់ចំណូលរបស់ Tai Er បានកើន136%។ បណ្ដាញភោជនីយដ្ឋាននេះបានព្យាករថា ទីផ្សារសម្រាប់ហាងលក់ស៊ុបត្រីហឹរនៅប្រទេសចិននឹងកើនឡើងក្នុងល្បឿន25%ជារៀងរាល់ឆ្នាំសម្រាប់ដំណាក់កាលឆ្នាំ2018-2024។

នៅពេលCOVID-19បានមកដល់ បម្រាមគោចរក៏ត្រូវបានដាក់ចេញ អាហារដ្ឋាននានាក៏បានផ្អាកដំណើរការ ហើយមនុស្សក៏លែងចេញទៅទទួលទានអាហារនៅខាងក្រៅ ប៉ុន្តែ Jiumaojiu ក៏បានបន្ថយសកម្មភាព ហើយងាកមកផ្ដល់សេវាកម្មតាមអនឡាញរហូតដល់បើកទ្វារហាងឡើងវិញដូចធម្មតា ប៉ុន្តែគម្រោងពង្រីកអាជីវកម្មរបស់ Tai Er នៅតែមិនប្ដូរផ្លាស់។ Guan ឱ្យដឹងថា Jiumaojiu មានគម្រោងបើកភោជនីយដ្ឋាន Tai Er ថ្មីឱ្យបាន80នៅក្នុងឆ្នាំនេះ និង100កន្លែងផ្សេងទៀតនៅឆ្នាំក្រោយ។

លោក Guan ថ្លែងថា ការកែសម្រួលរូបមន្តអាជិវកម្មឱ្យស្របទៅតាមទិន្នាការទីផ្សារបានជួយឱ្យ Jiumaojiu ទទួលបានជោគជ័យ។ ម្ចាស់ក្រុមហ៊ុនខាងលើឱ្យដឹងថា “ដំបូងឡើយ យើងគ្រាន់តែជាហាងមួយនៅតាមចិញ្ចើមផ្លូវតែប៉ុណ្ណោះ ប៉ុន្តែក្រោយមកក៏បានក្ដាប់យកឱកាសនៅពេលដែលមជ្ឈមណ្ឌលពាណិជ្ជកម្មបានរីកដុះដាលនៅប្រទេសចិន។ យើងបានពង្រីកបណ្ដាញភោជនីយដ្ឋានយ៉ាងលឿន និងស្ដង់ដា”។

បច្ចុប្បន្ន Jiumaojiu កំពុងប្រឈមមុខនឹងតម្រូវការថយចុះដោយសារតែវិបត្តិសុខភាពចាប់ផ្ដើមងើបឡើងវិញ។ ប៉ុន្តែ Jiumaojiu នៅតែស្វែងរកវិធីដើម្បីទប់ទល់ និងសម្របខ្លួនតាមស្ថានការណ៍។

កាលពីពេលថ្មីៗនេះ Jiumaojiu បានឱ្យដឹងថា ពួកគេនឹងផ្អាកដំណើរការភោជនីយដ្ឋានដែលមានអតិថិជនតិច រួមនឹងបណ្ដាភោជនីយដ្ឋាន Jiu Mao Jiu នៅរដ្ឋធានីប៉េកាំង និងទីក្រុងTianjin រួមនឹងទីក្រុងWuhan។ សកម្មភាពនេះនឹងជួយកាត់បន្ថយការចំណាយ និងបង្កើនចំណេញ។ តម្លៃមូលបត្រ Jiumaojiu កាលពីម្សិលមិញ (19មិថុនា) បានបន្តកើន5%បន្ថែមទៀតនៅលើផ្សារហ៊ុនហុងកុង៕

ប្រភព៖ Bloomberg

June 20, 2020

COVID-19! ជាង460,000នាក់ស្លាប់នៅទូទាំងពិភពលោក! អ្នកជំងឺនៅប្រេស៊ីលឡើងដល់ខ្ទង់លាននាក់

ពិភពលោកបានរកឃើញអ្នកផ្ទុកវីរុសCOVID-19 ជាង8.7លាននាក់ និងអ្នកស្លាប់ជាង460,000នាក់ ក្នុងគ្រាដែលស្ថានភាពវិបត្តិសុខភាពនៅក្នុងបណ្ដាប្រទេសក្នុងតំបន់អាមេរិកឡាទីននៅតែអាក្រក់ឡើងៗ។

ប្រទេសនិងដែនដីជាង221ក្នុងពិភពលោក បានរាយការណ៍ថា បានរកឃើញអ្នកផ្ទុកCOVID-19សរុប 8,735,990នាក់ និងអ្នកស្លាប់សរុប461,522នាក់ កើនជាបន្តបន្ទាប់គឺ 180,588នាក់ និង 6,322នាក់បើធៀបនឹងម្សិលមិញ។ ចំណែកអ្នកជំងឺដែលបានជាសះស្បើយមានចំនួន 4,617,507នាក់។

ទ្វីបអាមេរិកបានរកឃើញអ្នកជំងឺCOVID-19សរុប4,348,734នាក់ ខណៈទ្វីបអឺរ៉ុបរកឃើញ2,283,096នាក់ ទ្វីបអាស៊ី1,816,317នាក់ និងអាហ្វ្រិករកឃើញ288,812នាក់។

សហរដ្ឋអាមេរិកនៅតែជាសម្បុកមេរោគធំជាងគេបង្អស់ក្នុងពិភពលោក ដោយបានរកឃើញអ្នកជំងឺសរុប2,294,246នាក់ និងអ្នកស្លាប់សរុប121,379នាក់ ក្នុងនោះមានអ្នកជំងឺថ្មី34,257នាក់និងអ្នកស្លាប់ថ្មី836នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។

ស្ថានភាពឆ្លងវីរុសCOVID-19 នៅបណ្ដាប្រទេសក្នុងតំបន់អាមេរិកឡាទីនកំពុងតែកើនឡើងខ្លាំង ក្នុងនោះ ប្រទេស
ប្រេស៊ីលជាសម្បុកមេរោគCOVID-19ធំជាងគេលំដាប់ទីពីរបន្ទាប់់ពីសហរដ្ឋអាមេរិក។ ប្រទេសនេះរកឃើញអ្នកជំងឺសរុប1,038,568នាក់ និងអ្នកស្លាប់សរុប48,954នាក់។ អ្នកជំងឺថ្មីដែលទើបរកឃើញមានចំនួន49,554នាក់ និងអ្នកស្លាប់ថ្មី1,085នាក់។

ប្រទេសរុស្ស៊ីរកឃើញអ្នកជំងឺថ្មី 7,972នាក់ និងអ្នកស្លាប់ថ្មី181នាក់ នាំឱ្យតួលេខអ្នកជំងឺសរុបឡើងដល់569,063នាក់ និងអ្នកស្លាប់សរុបឡើងដល់324,406នាក់។

ឥណ្ឌាឈរលំដាប់ទី4នៅក្នុងចំណោមបណ្ដាប្រទេសដែលមានអ្នកជំងឺច្រើនជាងគេក្នុងពិភពលោក ដោយមានអ្នកជំងឺសរុប395,812នាក់ និងអ្នកស្លាប់សរុប12,970នាក់ ក្នុងនោះមានអ្នកជំងឺថ្មី14,721នាក់ និងអ្នកស្លាប់ថ្មីមានចំនួន366នាក់៕

June 20, 2020

ដំណឹងល្អ!! WHO ជឿជាក់ថា នឹងមានវ៉ាក់សាំងព្យាបាលកូវីដ-19 ប្រមាណជា 200លានដូស នៅចុងឆ្នាំនេះ

ទីភ្នាក់ងារព័ត៌មាន សៅថ៍ ឆាយណា ម៉រនីង ផូស្ត បានរាយការណ៍ថា អង្គការសុខភាពពិភពលោក(WHO) កាលពីថ្ងៃព្រហស្បតិ៍ ទី18 មិថុនាម្សិលមិញ បានថ្លែងថា ខ្លួនជឿជាក់ថា វ៉ាក់សាំងប្រឆាំងមេរោគកូវីដ-19 ប្រមាណជា 200លានដូស អាចនឹងត្រូវផលិតចេញមកក្នុងអំឡុងចុងឆ្នាំនេះ និងមានគោលដៅដំបូងគេគឺ ជួយដល់ក្រុមមនុស្សដែលទន់ខ្សោយចំពោះមេរោគវីរុសនេះខ្លាំងជាងគេបំផុតជាមុនសិន។

អង្គភាពសុខភាពសាធារណៈ នៃអង្គការសហប្រជាជាតិ បានឱ្យដឹងថា ពួកគេកំពុងធ្វើការងារក្រោមការប៉ាន់ប្រមាណដែលថា វ៉ាក់សាំងចំនួន 2,000លានដូស នឹងត្រូវផលិតឡើងនៅក្នុងអំឡុងចុងឆ្នាំ2021 ក្នុងខណៈដែលក្រុមហ៊ុនផលិតឱសថទាំងឡាយ កំពុងនាំគ្នាប្រញាប់រួសរាន់យ៉ាងពេញទំហឹង ក្នុងការព្យាយាមស្វែងរកវ៉ាក់សាំងផ្សេងៗទៀត ដែលអាចព្យាបាលអាការជំងឺដែលបណ្ដាលមកពីមេរោគវីរុសកូរ៉ូណាប្រភេទថ្មី យ៉ាងមានប្រសិទ្ធភាព។

លោកស្រីវេជ្ជបណ្ឌិត សូមៀ ស្វាមីណាថាន ប្រធានក្រុមអ្នកវិទ្យាសាស្ត្ររបស់អង្គការសុខភាពពិភពលោក បានថ្លែងថា ក្រុមអ្នកស្រាវជ្រាវទាំងឡាយកំពុងដំណើរការស្រាវជ្រាវវិភាគអនាគតវ៉ាក់សាំងផ្សេងៗច្រើនជាង 200ប្រភេទទូទាំងពិភពលោក ក្នុងនោះមានប្រមាណជា 10ប្រភេទដែលបានចូលទៅដល់ដំណាក់កាលនៃការសាកល្បងនៅលើមនុស្សហើយ។ លោកស្រីបានថ្លែងតាមរយៈវីដេអូថា “បើយើងសំណាងល្អខ្លាំងនោះ យើងនឹងមានអនាគតវ៉ាក់សាំងដែលទទួលបានជោគជ័យ 1 ឬ 2យ៉ាង មុនដំណាច់ឆ្នាំនេះ”។

ទាំងអស់នេះ លោកស្រីបានបញ្ជាក់អំពីក្រុមមនុស្ស 3ក្រុម ដែលត្រូវការវ៉ាក់សាំងឈុតដំបូងៗខ្លាំងជាងគេបំផុត ដែលមានដូចជា ទី1 មន្ត្រីដែលប្រតិបត្តិការនៅជួរមុខ ដែលប្រថុយក្នុងការឆ្លងមេរោគខ្ពស់បំផុត ដូចជា គ្រូពេទ្យ និងប៉ូលិស ជាដើម។ ទី2 ក្រុមបុគ្គលដែលទន់ខ្សោយចំពោះមេរោគវីរុសខ្លាំងបំផុត ដូចជា មនុស្សចាស់ជរា និងអ្នកជំងឺទឹកនោមផ្អែម និងទី3 ក្រុមបុគ្គលដែលរស់នៅក្នុងសភាពបរិស្ថានដែលមេរោគអាចសាយភាយបានដោយងាយ ដូចជា ទីប្រជុំជនអនាធិបតេយ្យ និងមណ្ឌលមើលថែទាំមនុស្សចាស់ជរា ជាដើម។

លោកស្រីវេជ្ជបណ្ឌិត ស្វាមីណាថាន បានថ្លែងថា “អ្នកចាំបាច់ត្រូវចាប់ផ្ដើមដោយក្រុមមនុស្សដែលទន់ខ្សោយបំផុត ហើយបន្ទាប់ពីនោះ វ៉ាក់សាំងក៏នឹងតម្រង់ឆ្ពោះជាបណ្ដើរៗទៅរកក្រុមមនុស្សផ្សេងៗបន្ថែមទៀត…យើងកំពុងធ្វើការក្រោមចំណុចប៉ាន់ប្រមាណដែលថា យើងអាចនឹងមានវ៉ាក់សាំងចំនួន 200លានដូសនៅចុងឆ្នាំនេះ ព្រោះវាកំពុងមានការមើលឃើញបែបវិជ្ជមានច្រើនណាស់”

“យើងសង្ឃឹមថា ក្នុងឆ្នាំ2021 យើងនឹងមានវ៉ាក់សាំងដែលមានប្រសិទ្ធភាពក្នុងការព្យាបាលប្រមាណជា 1,000 ឬ 2,000 ឬក៏ 3,000លានដូស ចែកចាយទៅទូទាំងពិភពលោក តែក្នុងពេលនេះ ប្រហែលជាត្រូវនៅប្រើពាក្យថា “បើសិន” សិនហើយ ព្រោះថា យើងនៅមិនទាន់ទទួលបានវ៉ាក់សាំងណាមួយ ដែលទទួលបានការពិសោធរួចហើយនៅឡើយ”។ លោកស្រីបានបន្តទៀតថា “តែដោយសារតែគ្រប់ការវិនិយោគ កំពុងឆ្ពោះទៅរកការផលិតវ៉ាក់សាំង ទើបខ្ញុំចង់និយាយថា ក្នុងអំឡុងចុងឆ្នាំ2021 យើងប្រហែលជានឹងមានវ៉ាក់សាំងចំនួន 2,000លានដូសសម្រាប់ប្រជាជន ឬយ៉ាងតិចបំផុត ក៏មានសម្រាប់ចាក់ឱ្យពលរដ្ឋគោលដៅដែរ”។

ការយល់ឃើញនេះ ស៊ីចង្វាក់គ្នាជាមួយអ្នកគ្រប់គ្រងលំដាប់ខ្ពស់់របស់ក្រុមហ៊ុនផលិតថ្នាំពេទ្យទាំងឡាយ ដែលបានប្រាប់កាលពីខែកន្លងទៅថា ប្រហែលជានឹងមានការបង្ហាញខ្លួនវ៉ាក់សាំងប្រឆាំងកូវីដ-19 មួយ ឬក៏ច្រើនយ៉ាង មុននឹងចូលដល់ឆ្នាំ2021 តែសូមប្រាប់ជាមុនថា អាចចាំបាច់ត្រូវមានវ៉ាក់សាំងរួមគ្នាច្រើនដល់ទៅ 15,000លានដូសឯណោះ សម្រាប់យកឈ្នះមេរោគវីរុសប្រភេទនេះ៕

ប្រភព៖ សារព័ត៌មានបរទេស

June 19, 2020

ឥណ្ឌាបញ្ជូនអាវក្រោះទៅឱ្យទាហាននៅព្រំដែន ក្រោយហេតុការណ៍វាយតប់គ្នានឹងទាហានចិន

កងទ័ពនៃប្រទេសឥណ្ឌាបានបញ្ជូនអាវក្រោះប្រឆាំងកុបកម្មរាប់រយឈុតទៅឱ្យទាហានរបស់ខ្លួននៅក្នុងតំបន់ Ladakh ដើម្បីការពារពួកគេពីអាវុធមុតស្រួច និងដុំថ្មរបស់សត្រូវ។

ក្នុងដំណាក់កាលដំបូង ឈុបការពារខ្លួនចំនួន500ត្រូវបានដឹកជញ្ជូនតាមយន្តហោះពីទីក្រុង Mumbai ទៅកាន់ទីរួមស្រុក Leh ក្នុងតំបន់ Ladakh កាលពីម្សិលមិញដើម្បីបំពាក់ជូនទាហានដែលកំពុងបំពេញភារកិច្ចការពារព្រំដែននៅតាមបន្ទាត់គ្រប់គ្រងជាក់ស្ដែង LAC (Line of Actual Control)។ ក្នុងចំណោមឈុតការពារខ្លួននោះក៏មានបន្ទះpolycarbonate ដែលអាចការពារដែកស្រួច និងដុំថ្មផងដែរ។ នេះបើតាមប្រភពព័ត៌មានពីរដ្ឋាភិបាលឥណ្ឌា។

ឈុតការពារខ្លួនខាងលើ ត្រូវបានបំពាក់ជូនទាហានឥណ្ឌានៅតាមព្រំដែន ក្រោយពីមានហេតុការណ៍វាយតប់គ្នាជាមួយទាហានចិនកាលពីថ្ងៃទី15មិថុនាកន្លងទៅនៅត្រង់ចំណុចត្រួតពិនិត្យទី14 (PP-14) នៅតំបន់ជ្រលងភ្នំ Galwan។ ប្រភពព័ត៌មានបានឱ្យដឹងថា ក្នុងហេតុការណ៍វាយតប់គ្នា ទាហានចិនបានប្រើប្រាស់ដំបងដែកដែលមានផ្សារភ្ជាប់ដែកគោល និងដំបូងរុំខ្សែលួស ខណៈដែលទាហានឥណ្ឌាមានតែដៃទទេ។

ពលរដ្ឋឥណ្ឌាសម្ដែងការខឹងសម្បានឹងប្រទេសចិនដោយការដុតទង់ជីតចិន

ក្នុងហេតុការណ៍នោះ មានទាហានឥណ្ឌាយ៉ាងតិច20នាក់បានស្លាប់ ក្នុងនោះមាន3នាក់ស្លាប់នៅនឹងកន្លែងកើតហេតុ និង17នាក់ផ្សេងទៀតបានស្លាប់បន្ទាប់ពីហេតុការណ៍បានស្ងប់ស្ងាត់។

សារព័ត៌មានឥណ្ឌាបានចេញផ្សារដែរថា ទាហានចិនជាង40នាក់បានស្លាប់និងរងរបួសក្នុងហេតុការណ៍វាយតប់គ្នាខាងលើ។ ទីក្រុងប៉េកាំងបានទទួលស្គាល់ថា ទាហានមួយចំនួនរបស់ខ្លួនបានស្លាប់និងរងរបួស ប៉ុន្តែមិនបានបញ្ជាក់អំពីតួលេខច្បាស់លាស់នោះឡើយ។

សារព័ត៌មានឥណ្ឌារាយការណ៍ថា ទាហានឥណ្ឌាត្រូវបានទាហានចិនវាយប្រហារ និងសម្លាប់នៅនឹងកន្លែង នៅតំបន់ក្បែរចំណុចត្រួតពិនិត្យ PP-14។ ប៉ុន្តែ បញ្ជាការដ្ឋានភូមិភាគខាងលិចរបស់កងទ័ពរំដោះប្រជាជនចិន (PLA) និយាយថា ទាហានឥណ្ឌាបានឆ្លងកាត់បន្ទាត់ព្រំដែន LAC និង “មានចេតនាបញ្ឆេះកំហឹង” នាំឱ្យមានហេតុការណ៍វាយតប់គ្នាកើតឡើង។

ហេតុការណ៍ខាងលើនេះ គឺជាការប៉ះទង្គិចគ្នានាំឱ្យមានមនុស្សស្លាប់ដំបូងគេបង្អស់នៅតាមបន្ទាត់ព្រំដែនប្រវែង3,488គីឡូម៉ែត្ររវាងប្រទេសទាំងពីរ រាប់ចាប់តាំងពីការផ្ទុះអាវុធដាក់គ្នាដែលបានបណ្ដាលឱ្យទាហានឥណ្ឌា4នាក់ស្លាប់នៅ Tulung La ក្នុងតំបន់ Arunachal Pradesh កាលពីឆ្នាំ1975។

ចិននិងឥណ្ឌាកាលពីថ្ងៃទី17មិថុនាកន្លងទៅ បានព្យាយានបន្ធូរបន្ថយភាពតានតឹងនៅតំបន់ព្រំដែន។ រដ្ឋមន្ត្រីការបរទេសនៃប្រទេសទាំងពីរបានពិភាក្សាគ្នាតាមទូរស័ព្ទ និងបានយល់ព្រម “បន្ថយកម្ដៅស្ថានការណ៍” បើទោះជាប្រទេសទាំងពីរនៅតែចោទដាក់គ្នាលើហេតុការណ៍ដែលបានកើតឡើងក៏ដោយ៕

ប្រភព៖ សារព័ត៌មានបរទេស

June 19, 2020

អតីតទីប្រឹក្សាផ្នែកសន្តិសុខ និងក្មួយស្រីរបស់លោកត្រាំ សរសេរសៀវភៅ 2ក្បាល បកអាក្រាត និងបង្ហាញពីពុតត្បុតលោកត្រាំ

នៅសល់តែ 4ខែទៀតប៉ុណ្ណោះ នឹងដល់ថ្ងៃបោះឆ្នោតជ្រើសតាំងប្រធានាធិបតីសហរដ្ឋអាមេរិកហើយ ហើយលោកដូណាល់ ត្រាំ ក៏កំពុងជឿជាក់យ៉ាងខ្លាំងថា លោកនឹងត្រូវតែទទួលបានការជ្រើសតាំងជាប្រធានាធិបតីនៃសហរដ្ឋអាមេរិក ជាលើកទី2 ដោយសារតែជាទំនៀមទម្លាប់ខាងនយោបាយ ដែលប្រធានាធិបតីរបស់សហរដ្ឋអាមេរិក ច្រើនតែនៅបាន 2អាណត្តិ និងដោយសារតែការមានប្រៀបច្រើនជាង លើផ្នែកការគ្រប់គ្រងការផ្សព្វផ្សាយព័ត៌មាន ដែលបង្ហាញតែលទ្ធផល និងស្នាដៃរបស់ប្រធានាធិបតី រួមទាំងការថ្លែងការណ៍ និងការសម្ភាសផ្សេងៗ ដែលគូប្រជែងមិនបានទទួលឱកាសបែបនោះឡើយ។

រឹតតែនៅពេលលោកដូណាល់ ត្រាំ ចូលមកទទួលតំណែងនៅក្នុងសេតវិមាន លោកបានជំរុញផែនការកាត់បន្ថយពន្ធភាស៊ីដ៏ធំមួយ ដែលធ្វើឱ្យត្រូវចិត្តបណ្ដាអ្នកជំនួញលំដាប់ធំៗ ដោយមានការទម្លាក់ពន្ធភាស៊ីសម្រាប់ពួកអ្នកមានៗ និងក្រុមហ៊ុនផ្សេងៗទៀតផង ដោយសារតែពួក Republican មានផ្នត់គំនិតមួយថា បើអ្នកធុរកិច្ច និងក្រុមហ៊ុនរបស់ពួកគេ បានទទួលការកាត់បន្ថយពន្ធភាស៊ី ពួកគេក៏នឹងមានប្រាក់នៅសល់ ដើម្បីទៅពង្រីកធុរកិច្ចថ្មី ជាការបន្ថែមឱកាសការងារកាន់តែច្រើនឡើងដល់ពលរដ្ឋ ដោយប្រាក់របស់ពួកអ្នកមានទាំងនោះ នឹងហូរហៀរទៅដល់ក្រុមកម្មករនិយោជិតដែលមានប្រាក់ចំណូលតិច តាមរយៈការបង្កើនឱកាសការងារហ្នឹងឯង។ វាជា Repple Effect ដែលប្រាក់ និងភាពមានបាន នឹងហូរចុះពីលើទៅក្រោម ដែលទោះជាផ្នត់គំនិតនេះ ត្រូវបានជំទាស់ដោយអ្នកជំនាញខាងសេដ្ឋកិច្ចលំដាប់រង្វាន់ណូបែលជាច្រើននាក់ របស់អាមេរិក ដូចជាលោក Paul Krugman និងលោក Joseph Stiglitz ដែលខំព្យាយាមពិសោធឱ្យឃើញថា វាមិនមែនដូច្នោះឡើយ និងវាថែមទាំងធ្វើឱ្យមានភាពមិនស្មើភាពគ្នាកាន់តែច្រើនឡើងក៏ដោយ។

សេដ្ឋកិច្ចដែលវាស់តាមរយៈ Index ផ្សារហ៊ុនដែលបំបែកស្ថិតិ ស្ទើរតែរៀងរាល់អាទិត្យកាលពីមុនពេលកើតមានវិបត្តិកូវីដ-19 រួមទាំង GDP ដែលពង្រីកខ្លួន(ទោះជាភាពមិនស្មើភាពគ្នា រឹតតែមានធ្ងន់ធ្ងរឡើងនៅក្នុងសហរដ្ឋអាមេរិក ប្រភេទដែលលោក Warren Buffet មហាសេដ្ឋីផ្សារហ៊ុន បានចេញមកបង្ហាញពីការអាណិតអាសូរ អ្នកដែលមានប្រាក់ចំណូលតិចថា លេខារបស់លោក ត្រូវបង់ពន្ធច្រើនជាងរូបលោកទៅទៀតក៏ដោយ) វាបានធ្វើឱ្យលោកត្រាំមានទំនុកចិត្តថា ពលរដ្ឋសហរដ្ឋអាមេរិក នឹងជ្រើសរើសយករូបលោកទៀត ក្នុងអាណត្តិទី2 នេះជាមិនខាន ព្រោះរាល់ពេលដែលលោកទៅជួបប្រាស្រ័យរកសំឡេងឆ្នោតជាមួយប្រជាជន លោកតែងតែគាស់យកមកបង្ហាញ តែរឿងតួលេខល្អៗខាងសេដ្ឋកិច្ច និងឱកាសការងារ មកបន្ថែមពិន្ទុនិយមឱ្យខ្លួនឯង ពេញមួយរយៈពេល 3ឆ្នាំកន្លងទៅនេះ។

តែ មហិទ្ធិឫទ្ធិ ដែលលោកដូណាល់ ត្រាំ ត្រូវប្រឈមយ៉ាងមិននឹកស្មានដល់នោះគឺ មេរោគកូវីដ-19 ដែលលោកមើលងាយថា វានឹងធ្វើស្អីសហរដ្ឋអាមេរិកមិនបាននោះ និងធ្វើឱ្យលោកចេញវិធានការទប់ទល់យឺតយ៉ាវដល់ទៅ 8អាទិត្យនោះ បានធ្វើឱ្យមេរោគរីករាលដាលឥតឈប់ និងសេដ្ឋកិច្ចរងគ្រោះជាបន្តបន្ទាប់ រួមទាំងការធ្វើបាតុកម្មតវ៉ាដ៏ធំ ទូទាំងសហរដ្ឋអាមេរិក រឿងប៉ូលិសប្រើអំពើហិង្សាដោយអគតិទៀតផង។

ដោយទាំង 3រឿង ដែលកំពុងទាញទម្លាក់សំឡេងឆ្នោតរបស់លោកត្រាំនេះ ធ្វើឱ្យរហូតមកដល់ពេលនេះ គូប្រជែងរបស់លោកត្រាំ គឺលោក ចូ បៃដេន កំពុងតែវ៉ាទៅមុខដាច់ ទាំងក្នុងផូលទូទាំងប្រទេស និងក្នុងរដ្ឋដែលធ្លាប់ជួយលោកត្រាំឱ្យបានទៅអង្គុយក្នុងសេតវិមានទៀតផង។

ពេលនេះលោកត្រាំ បានងាកមកប្រើកលយុទ្ធរកសំឡេងឆ្នោត 2រឿងគឺ រឿងដំបូង ម៉ៅឱ្យចិនក្លាយជាពពែរងគ្រោះ ក្នុងងរឿងមេរោគកូវីដ-19 និងរឿងចិនប្លន់ការងារធ្វើពីប្រជាជនអាមេរិក។

រឿងទី2 គឺ សរុបយកការតវ៉ាទាមទារយ៉ាងស្ងប់ស្ងាត់ទូទាំងសហរដ្ឋអាមេរិក ដើម្បីធ្វើការរៀបចំក្រុមអង្គភាពប៉ូលិសជាថ្មី និងកែសម្រួលគ្រោងសាងខាងសង្គម ឱ្យប្រាសចាកការអគតិ ចំពោះក្រុមជនជាតិភាគតិច គឺជនស្បែកខ្មៅ(អតីតទាសករ) និងពួកស្បែកក្រហម(គឺពួក Hispanics ហ្នឹងឯង) ដោយលោកត្រាំ បានងាកមកនិយាយសង្កត់ធ្ងន់ថា ត្រូវប្រើកម្លាំង(ទាហាន) ចូលទៅបង្ក្រាបក្រុមអ្នកតវ៉ាយ៉ាងស្ងប់ស្ងាត់ទាំងនោះ ដែលលោកបាននិយាយបង្វែងឱ្យក្លាយជាក្រុមជនអន្ធពាល កម្ទេចអ្វីៗសព្វបែបយ៉ាង យកភ្លើងដុតបំផ្លាញអគារ ឆក់ប្លន់ទំនិញរបស់ហាងនានា និងជាភេរវករ។

តែ ស្រាប់តែមានបណ្ដាឧត្ដមសេនីយ៍ធំៗ ទាំងពេលបច្ចុប្បន្ន(ដូចជា អគ្គមេបញ្ជាការ លោកឧត្ដមសេនីយ៍ឯក Mark Milley) និងចូលនិវត្តន៍ហើយ បាននាំគ្នាចេញមក ប្រកាសមិនឯកភាព ដែលលោកត្រាំចង់ប្រើកម្លាំងប្រចាំការ មកបង្ក្រាបអ្នកប្រឆាំងតវ៉ាយ៉ាងស្ងប់ស្ងាត់ និងចោទថា លោកត្រាំមិនស័ក្តិសមក្នុងការធ្វើជាប្រធានាធិបតីឡើយ។ ដល់ថ្នាក់លោក Colin Powell (អតីតឧត្ដមសេនីយ៍ឯក ប្រធានគណៈសេនាធិការយោធាចម្រុះ) ចេញមកប្រកាសថា នឹងមិនទៅបោះឆ្នោតជ្រើសរើសលោកដូណាល់ ត្រាំ នៅថ្ងៃទី3 ខែវិច្ឆិកាខាងមុខទៀតផង ព្រោះលោកត្រាំមិនស័ក្តិសមជាមេដឹកនាំសេតវិមានទៀតទេ និងភូតកុហកគ្រប់ពេលវេលា។

ហើយរឿងដែលគួរឱ្យភ្ញាក់ផ្អើលបំផុតនោះគឺ នៅថ្ងៃទី23 មិថុនាខាងមុខនេះ សៀវភៅរបស់លោក John Bolton អតីតទីប្រឹក្សាផ្នែកសន្តិសុខ(មនុស្សទី3 របស់លោកត្រាំ) កំពុងតែជិតដល់ពេលដាក់លក់នៅលើទីផ្សារជាផ្លូវការហើយ ដោយកាលពីពេលមុន មានកំណត់នឹងដាក់លក់ក្នុងអំឡុងខែកន្លងទៅ តែត្រូវអង្គភាពសន្តិសុខរបស់សេតវិមាន បានស្នើសុំឱ្យផ្ញើសេចក្ដីលម្អិតនៃខ្លឹមសារ ទៅឱ្យពួកគេពិនិត្យមើលសិន តែរហូតមកដល់ពេលនេះ លោក ចន បូលតុន បានបញ្ជូនសៀវភៅទាំងមូលដែលបោះពុម្ពរួចហើយ ទៅឱ្យបណ្ដាទីភ្នាក់ងារព័ត៌មានផ្សេងៗ ដើម្បីឱ្យនាំយកខ្លឹមសារមួយផ្នែកទៅផ្សព្វផ្សាយឱ្យប្រជាជនបានដឹង។

កាលពីដើម រឿងដែលធ្វើឱ្យលោក បូលតុន សម្រេចចិត្តសុំលាឈប់ពីមុខតំណែងនោះ គឺដោយសារតែលោក “ទ្រាំធំក្លិនស្អុយមិនបាន” ករណីដែលលោកត្រាំ បានពន្យារថវិកាជួយខាងយោធា ដែលសភាសហរដ្ឋអាមេរិក បានអនុម័តរួចរាល់ហើយ…ជាថវិកាជួយទៅដល់រដ្ឋាភិបាលប្រទេសយូក្រេន ដែលកងទ័ពរបស់ប្រទេសនេះ ត្រូវការយ៉ាងចាំបាច់ខ្លាំង សម្រាប់ទៅប្រយុទ្ធតស៊ូនឹងការរុករានឈ្លានពានរបស់កងទ័ពរុស្ស៊ី។

លោកត្រាំ បានគាបសង្កត់មេដឹកនាំប្រទេសយូក្រេន ថា លោកថវិកានេះនឹងទម្លាក់ទៅជួយយូក្រេន តែប្រធានាធិបតីថ្មីរបស់យូក្រេន ត្រូវតែលើករឿងមួយឡើងថា ពួកគេកំពុងពិនិត្យករណីលោក ចូ បៃដេន(គូប្រជែងរបស់លោកត្រាំ) ថា មានការទទួលបានផលប្រយោជន៍ពីកូនប្រុសរបស់លោក ចូ បៃដេន ដែលបានធ្វើជាប្រធានក្រុមហ៊ុនឧស្ម័នធំបំផុតរបស់យូក្រេន។

លោក ចន បូលតុន បានមិចភ្នែកដាក់កូនចៅរបស់លោក ឱ្យទៅប្រាប់អ្នកត្រួតពិនិត្យកិច្ចការរដ្ឋ អំពីរឿងដែលលោកត្រាំបានទូរស័ព្ទទៅតវ៉ាទាមទារផលប្រយោជន៍ ជាមួយប្រធានាធិបតីប្រទេសយូក្រេន…តែនៅទីបំផុត លោកបូលតុន ក៏លាលែងចេញពីតំណែង។

តែ នៅក្នុងសៀវភៅ 1ក្បាលនោះ ក្រៅពីមានសេចក្ដីលម្អិតដ៏គួរឱ្យភ្ញាក់ផ្អើលថា លោកបានស្ថិតនៅក្នុងហេតុការណ៍ ពេលលោកត្រាំទូរស័ព្ទ ទៅតវ៉ាជាមួយមេដឹកនាំយូក្រេន ក្នុងគ្រានោះហើយ…លោកបូលតុន ថែមទាំងបកអាក្រាតពីការដែលលោកត្រាំ បានតវ៉ាដោះដូរផលប្រយោជន៍ជាមួយលោកប្រធានាធិបតី ស៊ី ជីនភីង របស់ចិនទៀតផងកាលពីពេលជួបគ្នាក្នុងឆ្នាំកន្លងទៅ ទាំងរឿងដែលលោកប្រធានាធិបតី ស៊ី ព្យាយាមបញ្ចុះបញ្ចូល មិនឱ្យលោកត្រាំ វាយប្រហារលោកស៊ី រឿងជំរំ(ធ្វើទុក្ខបុកម្នេញ) អប់រំប្ដូរទស្សនគតិរបស់ជនភាគតិចអ៊ុយគូ នៅឯស៊ីនកៀង ដែលរដ្ឋបាលចិនបានចាប់ខ្លួនយកទៅដាក់នៅទីនោះជាង 1លាននាក់។ ដោយលោកត្រាំ បានប្រាប់ថា ឯកភាពចំពោះជំរំសម្ងាត់នេះ…និងរឿង 1ទៀតគឺ លោកត្រាំ បានសុំឱ្យលោកស៊ី ជួយទិញទំនិញកសិកម្មដែលជាមូលដ្ឋានសំឡេងឆ្នោតរបស់ខ្លួន(លោកត្រាំ) ដើម្បីឱ្យខ្លួនបានក្លាយជាប្រធានាធិបតីក្នុងអាណត្តិទី2 នេះទៀតផង។ លោក បូលតុន បានរៀបរាប់នៅក្នុងសៀវភៅនោះថា លោកត្រាំ បាននិយាយច្បាស់ៗតែម្ដងថា សុំឱ្យលោកស៊ី ជួយលោកឱ្យក្លាយជាប្រធានាធិបតីក្នុងអាណត្តិទី2។

នៅមានរឿងការចរចា រវាងលោកត្រាំ ជាមួយលោក វ៉្លាឌីមៀ ពូទីន ទៀតផង ដោយលោកបូលតុន បានលើកចំណុចសង្កេតថា វាក៏ដូចគ្នាដែរ គឺលោកត្រាំសុខចិត្តបន្ទន់ឥរិយាបថឱ្យលោកពូទីន ដើម្បីឱ្យប្រទេសរុស្ស៊ី ជួយក្នុងការបោះឆ្នោតរបស់លោក…។

លោកបូលតុន បានបញ្ជាក់តាំងពីដើមដំបូង របស់សៀវភៅរបស់លោកថា លោកត្រាំ នឹងធ្វើគ្រប់យ៉ាង ដើម្បីផលប្រយោជន៍របស់ខ្លួនឯងមុនគេក្នុងការបោះឆ្នោត និងយកផលប្រយោជន៍របស់ជាតិជារឿងបន្ទាប់។
សៀវភៅរបស់លោក បូលតុន ឈ្មោះថា “បន្ទប់ដែលមានហេតុការណ៍កើតឡើង” ឬ The Room Where it Happened នៅមានព័ត៌មានសម្ងាត់ជាច្រើនទៀត ដែលបានទាញកញ្ឆក់បើកស្រោមមុខរបស់លោកត្រាំ ឱ្យមើលឃើញពីភាពល្បិចកល និងគិតតែពីផលប្រយោជន៍របស់ខ្លួន មុនផលប្រយោជន៍ប្រទេសជាតិ។

សៀវភៅ 1ក្បាលទៀតរបស់ក្មួយស្រី របស់លោកត្រាំ ឈ្មោះ Mary Trump អាយុ 55ឆ្នាំ ដែលជាកូនស្រីរបស់បងប្រុសច្បងរបស់លោកត្រាំ(ដែលមានឈ្មោះថា Fred Trump JR)។ លោកស្រី បានសរសេរសៀវភៅ បានយ៉ាងឆ្ងាញ់ដៃសម្បើមណាស់ ក្នុងការបើកកកាយពុតត្បុតលោកពូ ដ៏សែនអាក្រក់របស់លោកស្រី ដែលមានចំណងជើងថា “ច្រើនប៉ុនណា ក៏មិនដែលគ្រប់…តើហេតុអីបានក្រុមគ្រួសាររបស់យើង ជួយគ្នាសាងបុរសម្នាក់ដែលមានគ្រោះថ្នាក់បំផុតរបស់ពិភពលោកឡើងកើត? ឬ Too Much and Never Enough…How My Family Created the Wold’s Most Dangerous Man?។ បោះពុម្ពដោយ Simon & Schuster ហើយបម្រុងនឹងដាក់លក់លើទីផ្សារ(ដោយបានគណនាយ៉ាងល្អិតល្អន់) នៅថ្ងៃទី28 កក្កដា ដែលជិតដល់ថ្ងៃបោះឆ្នោតធំ ដើម្បីចូលរួមចំណែកទាញកញ្ឆក់បើកស្រោមមុខ និងបកអាក្រាតលោកត្រាំ។

យកត្រឹមតែឧទាហរណ៍ខ្លីៗគឺ លោកស្រីបានរៀបរាប់ថា លោកពូត្រាំ បានកេងបន្លំកេរមរតកដែលលោកតា Fred Trump Sr.តាំងជាគំនរមរតកទុកឱ្យបណ្ដាទាយាទក្រោយៗទាំងអស់…លោកស្រីខ្លួនឯង និងប្អូនប្រុស ត្រូវបានកេងប្រវ័ញ្ច រហូតដល់លោកស្រីបានប្ដឹងលោកត្រាំ ក្នុងឆ្នាំ2000 និងត្រូវរងការធ្វើបាបផ្សេងៗជាច្រើន ហើយអ្វីដែលលោកត្រាំបានអួតក្អេងក្អាងថា លោកបានទទួលប្រាក់ពីឪពុកមកចាប់ផ្ដើមរកស៊ីតាំងខ្លួនតែ 1លានដុល្លារនោះ ការពិត បានទទួលប្រាក់ពីឪពុកដល់ទៅ 400លានដុល្លារឯណោះ និងកើតឡើងក្នុងអំឡុងពេលដែលឪពុក(Fred Trump Sr.) ចាប់ផ្ដើមភ្លេចភ្លាំង ដោយរោគអាល់សៃមើរ៍។ រួមទាំងរឿងរ៉ាវរបស់ឪពុក របស់លោកស្រី មែរី គឺលោក Fred Trump Jr. បានងាកមកញៀនសុរា ដោយសារតែលោកតា Fred បង្ខំឱ្យឪពុករបស់លោកស្រី មកធ្វើការរកស៊ីខាងអចលនទ្រព្យ ទាំងខ្លួនគាត់ ចង់ក្លាយជាអ្នកបើកយន្តហោះ…រហូតដល់ទីបំផុត ឪពុករបស់លោកស្រី ត្រូវស្លាប់តាំងពីអាយុត្រឹមតែ 42ឆ្នាំ ហើយលោកស្រីមែរី និងប្អូន ក៏ត្រូវមករស់នៅក្រោមការមើលថែ របស់លោកដូណាល់ ត្រាំ និងគំនរកេរមរតក ក៏ត្រូវបានកេងប្រវ័ញ្ចយកដោយលោកត្រាំទៀតផង។

ខណៈពេលនេះ លោកស្រី មែរី ដែលរៀនចប់បរិញ្ញាឯកផ្នែកចិត្តវិទ្យា បានបើកធុរកិច្ចផ្ដល់ការប្រឹក្សាដល់អ្នកដែលធ្លាក់ទឹកចិត្ត និងនៅក្នុងទំព័រវេបសាយរបស់លោកស្រី បានឆ្លុះបង្ហាញពីភាពសោកស្ដាយរបស់លោកស្រីយ៉ាងខ្លាំង នៅពេលដែលលោកដូណាល់ ត្រាំ ឈ្នះការបោះឆ្នោតឆ្នាំ2016 ហើយសៀវភៅ 1ក្បាលនេះ នឹងចេញមកដើម្បីទប់ស្កាត់ មិនឱ្យលោកត្រាំ បានដើរចូលសេតវិមានជាលើកទី2 ហ្នឹងឯង៕

ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា

June 19, 2020

មហាសេដ្ឋី7រូបដែលមានទ្រព្យច្រើនជាងមុនជាងពាក់កណ្ដាលនៅក្នុងសម័យCOVID-19

CEO របស់ Tesla លោក Elon Musk រកបានជាង13ពាន់លានដុល្លារបន្ថែមទៀតរាប់ចាប់ពីពាក់កណ្ដាលខែមីនា2020 ខណៈដែលស្ថាបនិករបស់ Facebook លោក Mark Zuckerberg រកចំណូលបានជិត29ពាន់លានដុល្លារ។

COVID-19 បានបណ្ដាលឱ្យមហាសេដ្ឋីជាច្រើនបាត់បង់ទ្រព្យសម្បត្តិដ៏ច្រើនសន្ធឹកនៅពេលផ្សារហ៊ុនអាមេរិកដាំក្បាលចុះកាលពីខែមីនាកន្លងទៅ ប៉ុន្តែល្បឿននៃការងើបឡើងវិញនៃផ្សារហ៊ុនបានជួយឱ្យអ្នកមានជាច្រើនស្រង់ដើមទុនបានមកវិញ ហើយក៏មានអ្នកជំនួញខ្លះថែមទាំងចំណេញយ៉ាងច្រើនផងដែរ។

ដោយប្រើប្រាស់ទិន្នន័យតាមពេលវេលាជាក់ស្ដែងរបស់ Forbes ក្រុមហ៊ុន GoBankingRates បានរកឃើញថា មហាសេដ្ឋី7រូបដែលស្ថិតក្នុងចំណោមអ្នកមានជាងគេទាំង50នាក់របស់ពិភពលោក មានទ្រព្យច្រើនជាងមុនជាងពាក់កណ្ដាលក្នុងដំណាក់កាលចាប់ពីថ្ងៃទី18មីនា ដល់ថ្ងៃទី4មិថុនា2020។ ថ្ងៃទី18 ខែមីនា គឺជារយៈពេលមួយសប្ដាហ៍បន្ទាប់ពី COVID-19 ត្រូវបានប្រកាសថាជារោគរាតត្បាតទូទាំងពិភពលោក ហើយ2ថ្ងៃក្រោយមក សន្ទស្សន៍ DJIA (Dow Jones Industrial Average) ត្រូវបានកត់សម្គាល់ឃើញថាជាថ្ងៃជួញដូរមូលបត្រមួយក្នុងចំណោមថ្ងៃជួញដូរដែលអាក្រក់ជាទីបំផុតក្នុងប្រវត្តិសាស្ត្រ។ ចំណែកថ្ងៃទី4មិថុនាវិញគឺជាថ្ងៃដែលរដ្ឋនានានៅសហរដ្ឋអាមេរិកចាប់ផ្ដើមដកបម្រាមគោចរ។

CEO របស់ក្រុមហ៊ុន Tesla និង SpaceX គឺលោក Elon Musk បានជាប់ឈ្មោះនៅក្នុងបញ្ជីនៃក្រុមមនុស្សដែលរកបានប្រាក់ចំណូលច្រើនជាងពាក់កណ្ដាលនៃទ្រព្យសរុបរបស់ខ្លួននៅក្នុងដំណាក់ចាប់ពីថ្ងៃទី18មីនា ដល់ថ្ងៃទី4មិថុនា2020។ ទ្រព្យរបស់លោក Elon Musk បានកើន55% ដែលជួយឱ្យលោកមានទ្រព្យជាង38ពាន់លានដុល្លារ។ ប្រការនេះបានកើតឡើងដោយសារតម្លៃមូលបត្ររបស់ក្រុមហ៊ុន Tesla ឡើងថ្លៃខ្ពស់។ បច្ចុប្បន្ន លោក Elon Musk កាន់កាប់មូលបត្រជិត39លានហ៊ុននៅក្នុងក្រុមហ៊ុនផលិតរថយន្តអគ្គិសនី ហើយលោកក៏ទើបតែទទួលបានប្រាក់រង្វាន់ដែលមានតម្លៃជាង700លានដុល្លារកាលពីខែឧសភាផងដែរ។

មហាសេដ្ឋីម្នាក់ផ្សេងទៀតដែលទទួលបានចំណេញច្រើនកប់ក្ដោងដែរនោះគឺម្ចាស់ Facebook លោក Mark Zuckerberg។ គិតត្រឹមដើមខែមិថុនានេះ លោក Zuckerberg មានទ្រព្យជាង83ពាន់លានដុល្លារ កើនជិត29ពាន់លានដុល្លារបើធៀបនឹងថ្ងៃទី18មីនា2020។ បច្ចុប្បន្ន ស្ថាបនិករបស់ Facebook មានភាគហ៊ុនប្រមាណជា400លានហ៊ុននៅក្នុងក្រុមហ៊ុន Facebook។

ខាងក្រោមនេះគឺជាបញ្ជីឈ្មោះមហាសេដ្ឋី7រូបដែលមានទ្រព្យកើនឡើងជាង50%នៅក្នុងសម័យ COVID-19៖

1. លោក Dieter Schwarz ម្ចាស់ក្រុមហ៊ុន Schwarz Group (អាល្លឺម៉ង់)

>ទ្រព្យសម្បត្តិនាថ្ងៃទី18/3/2020 ៖ 19.8ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 33.1ពាន់លានដុល្លារ
>កំណើននៃទ្រព្យ ៖ 67%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានរបាយការណ៍
>ទ្រព្យសម្បត្តិគិតត្រឹមថ្ងៃទី16/6/2020 ៖ 30.8ពាន់លានដុល្លារ

2. Mukesh Ambani – ប្រធានក្រុមហ៊ុន Reliance Industries (ឥណ្ឌា)

>ទ្រព្យសម្បត្តិនាថ្ងៃទី18/3/2020 ៖ 36.8ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 58ពាន់លានដុល្លារ
>កំណើននៃទ្រព្យ៖ 57.6%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ 68.3លានដុល្លារ
>ទ្រព្យសម្បត្តិគិតត្រឹមថ្ងៃទី16/6/2020 ៖ 59.4ពាន់លានដុល្លារ

3. លោក Elon Musk – CEO របស់ក្រុមហ៊ុនTelsa/SpaceX/The Boring Company (អាមេរិក)

>ទ្រព្យសម្បត្តិនាថ្ងៃទី18/3/2020 ៖ 24.6ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 38.2ពាន់លានដុល្លារ
>កំណើននៃទ្រព្យ៖ 55%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 42ពាន់លានដុល្លារ

4. លោក Alain Wertheimer – ម្ចាស់ក្រុមហ៊ុន Chanel (បារាំង)

>ទ្រព្យសម្បត្តិនាថ្ងៃទី18/3/2020 ៖ 17.1ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 26.3ពាន់លានដុល្លារ
>កំណើននៃទ្រព្យ៖ 53.8%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 24.7ពាន់លានដុល្លារ

5. លោក Gerard Wertheimer – ម្ចាស់ក្រុមហ៊ុន Chanel (បារាំង)

>ទ្រព្យសម្បត្តិនាថ្ងៃទី18/3/2020 ៖ 17.1ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 26.3ពាន់លានដុល្លារ
>កំណើននៃទ្រព្យ៖ 53.8%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 24.7ពាន់លានដុល្លារ

6. លោក Mark Zuckerberg – CEO របស់Facebook (អាមេរិក)

>ទ្រព្យសម្បត្តិនាថ្ងៃទី18/3/2020 ៖ 54.7ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 83.4ពាន់លានដុល្លារ
>កំណើននៃទ្រព្យ៖ 52.47%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ ជាង150លានដុល្លារ
>ទ្រព្យសម្បត្តិគិតត្រឹមថ្ងៃទី16/6/2020 ៖ 87.4ពាន់លានដុល្លារ

7. លោក Tadashi Yanai – ម្ចាស់ក្រុមហ៊ុន Fast Retailing (ជប៉ុន)

>ទ្រព្យសម្បត្តិនាថ្ងៃទី18/3/2020 ៖ 19.7ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 29.6ពាន់លានដុល្លារ
>កំណើននៃទ្រព្យ៖ 50.2%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 29.7ពាន់លានដុល្លារ

ប្រភព៖ CNBC

June 19, 2020

ចិនដោះលែងទាហានឥណ្ឌាដែលត្រូវចាប់ខ្លួនក្នុងហេតុការណ៍វាយតប់គ្នានៅព្រំដែន ប៉ុន្តែនៅតែចោទប្រកាន់ ទម្លាក់កំហុស និងគំរាមដាក់គ្នាដដែល

ទាហានឥណ្ឌាចំនួន10នាក់ដែលត្រូវបានចិនចាប់ខ្លួននៅក្នុងហេតុការណ៍វាយតប់គ្នាទ្រង់ទ្រាយធំនៅព្រំដែនប្រទេសទាំងពីរ បន្ទាប់ពីមានកិច្ចចរចាថ្នាក់មេបញ្ជាការយោធារបស់ចិននិងឥណ្ឌា។

សារព័ត៌មាន Press Trust រួមនឹងសារព័ត៌មានរបស់ឥណ្ឌាជាច្រើនទៀតបានរាយការណ៍ថា ទាហានឥណ្ឌាចំនួន10នាក់ត្រូវបានប្រទេសចិនដោះលែងកាលពីយប់ថ្ងៃទៅ18មិថុនាកន្លងទៅ។ រដ្ឋាភិបាលឥណ្ឌាមិនបានបញ្ចេញមតិអ្វីនៅឡើយទាក់ទិននឹងបញ្ហានេះ ប៉ុន្តែភាគីកងទ័ពឥណ្ឌាបានចេញមកអះអាងថា “មិនមានទាហានឥណ្ឌាណាម្នាក់បានបាត់ខ្លួនក្នុងពេលបំពេញភារកិច្ច” នៅក្នុងហេតុការណ៍វាយតប់គ្នានៅជ្រលងភ្នំ Galwan នោះទេ។

សារព័ត៌មានឥណ្ឌាបានចេញផ្សាយថា កិច្ចព្រមព្រៀងដោះលែងទាហានខាងលើត្រូវបានធ្វើឡើងដោយជោគជ័យក្រោយពីមានកិច្ចប្រជុំថ្នាក់ឧត្តមសេនីយ៍រវាងប្រទេសចិននិងឥណ្ឌា។

សូមរំឭកថា ទាហានឥណ្ឌា និងទាហានចិន បានវាយតប់គ្នាជាក្រុមកាលពីយប់ថ្ងៃទី15មិថុនា2020 នៅជ្រលងភ្នំ Galwan នៃតំបន់ Ladakh។ កងទ័ពជើងគោកឥណ្ឌាបញ្ជាក់ថា ទាហានឥណ្ឌាចំនួន20នាក់បានបាត់បង់ជីវិត ក្នុងនោះមាននាយទាហាន Santosh Babu ដែលជាមេបញ្ជាការកងវរសេនាតូច Bihar 16 ខណៈទាហានចំនួន18នាក់ផ្សេងទៀតកំពុងទទួលការព្យាបាលដោយសារតែរងរបួសធ្ងន់។

សារព័ត៌មានឥណ្ឌាបានចេញផ្សារដែរថា ទាហានចិនជាង40នាក់បានស្លាប់និងរងរបួសក្នុងហេតុការណ៍វាយតប់គ្នាខាងលើ។ ទីក្រុងប៉េកាំងបានទទួលស្គាល់ថា ទាហានមួយចំនួនរបស់ខ្លួនបានស្លាប់និងរងរបួស ប៉ុន្តែមិនបានបញ្ជាក់អំពីតួលេខច្បាស់លាស់នោះឡើយ។

ប្រជាជនឥណ្ឌារាប់ពាន់នាក់ចូលរួមពិធីបុណ្យសពរបស់ទាហានដែលបានបាត់បង់ជីវិតនៅក្នុងហេតុការណ៍វាយតប់គ្នាជាមួយទាហានចិននៅព្រំដែន

ក្នុងពេលមានការអំពាវនាវឱ្យឈប់ប្រើប្រាស់ទំនិញចិន កាលពីម្សិលមិញ ជនជាតិឥណ្ឌារាប់ពាន់នាក់បានចូលរួមពិធីបុណ្យសពរបស់ទាហានឥណ្ឌាដែលបានស្លាប់នៅក្នុងហេតុការណ៍ការពារទឹកដីខាងលើ។ នៅក្នុងទីក្រុងមួយចំនួន គេឃើញប្រជាជនឥណ្ឌាជាច្រើនបាននាំគ្នាលើកបដាដែលមានសរសេរថា “ឈប់ប្រើផលិតផលចិន” ព្រមទាំងធ្វើការប្រឆាំងនឹងប្រធានាធិបតីចិន លោក ស៊ី ជីនភីងផងដែរ។

ក្រុមមន្ត្រីចិននិងឥណ្ឌាកំពុងប្រឹងប្រែងស្វែងរកវិធីដោះស្រាយភាពតានតឹងតាមរយៈការចរចាដើម្បីចៀសវាងការកើនឡើងកម្ដៅដែលអាចនាំឱ្យមានការផ្ទុះអាវុធតាមព្រំដែន ប៉ុន្តែពួកគេបានទម្លាក់កំហុសដាក់គ្នាអំពីហេតុការណ៍វាយតប់គ្នា និងបានធ្វើការព្រមានដាក់គ្នានៅក្នុងសេចក្ដីប្រកាសរៀងៗគ្នា។

“ឥណ្ឌាមិនគួរវាយតម្លៃទាបចំពោះការអត់ធ្មត់របស់ចិនក្នុងកិច្ចការពារបូរណភាពទឹកដីរបស់ខ្លួននោះទេ” ក្រសួងការបរទេសចិនចេញសេចក្ដីប្រកាសបែបនេះ ក្រោយពីកិច្ចពិភាក្សារវាងរដ្ឋមន្ត្រីការបរទេសចិន លោក Wang Yi និងសមភាគីឥណ្ឌា Subrahmanyam Jaishankar។

ចំណែករដ្ឋមន្ត្រីក្រសួងការបរទេសឥណ្ឌាវិញ ថ្លែងថា ចិនបានធ្វើការវាយប្រហារដោយមាន “ផែនការមុន” ហើយថាបញ្ហានេះនឹងជះឥទ្ធិពលធ្ងន់ធ្ងរដល់ទំនាក់ទំនងរវាងប្រទេសទាំងពីរ៕

ប្រភព៖ សារព័ត៌មានបរទេស

June 19, 2020

ប្រទេសចំនួន18ដែលបានរកឃើញអ្នកជំងឺCOVID-19 លើសពី100,000នាក់ ខណៈអ្នកជំងឺសរុបឡើងដល់ជិត8.6លាននាក់នៅទូទាំងសកលលោក

ពិភពលោកទាំងមូលត្រូវបានរាយការណ៍ថា មានអ្នកជំងឺ COVID-19 ជិត8.6លាននាក់ និងជាង455,000នាក់បានស្លាប់ ហើយបើគិតតាមចំនួនសរុបនៃប្រជាជនរបស់ពិភពលោក ក្នុងចំណោមមនុស្ស1000,000នាក់គឺមាន58.4នាក់ស្លាប់ដោយសារវីរុសនេះ។

ប្រទេសនិងដែនដីចំនួន221ក្នុងពិភពលោក បានរកឃើញអ្នកផ្ទុកវីរុសចំនួន8,555,402នាក់ និង455,200នាក់បានស្លាប់ដោយសារCOVID-19។ ក្នុងរយៈពេល24ម៉ោងកន្លងទៅនេះ អ្នកជំងឺCOVID-19 បានកើន165,793នាក់ និងអ្នកស្លាប់កើន4,803នាក់បើធៀបនឹងម្សិលមិញ។ ចំណែកអ្នកជំងឺដែលបានជាសះស្បើយមានចំនួន4,503,093នាក់។

ទ្វីបអាមេរិកបានរកឃើញអ្នកផ្ទុកវីរុសCOVID-19 សរុប4,235,439នាក់ ខណៈទ្វីបអឺរ៉ុបរកឃើញ2,268,136 ទ្វីបអាស៊ីរកឃើញ1,775,302នាក់ និងទ្វីបអាហ្វ្រិករកឃើញ278,677នាក់។

បណ្ដាប្រទេសដែលបានរកឃើញអ្នកជំងឺCOVID-19 លើសពី100,000នាក់ បានកើនដល់18ប្រទេស រួមមានសហរដ្ឋអាមេរិក ប្រេស៊ីល រុស្ស៊ី ឥណ្ឌា អង់គ្លេស អេស្ប៉ាញ ប៉េរូ អ៊ីតាលី ឈីលី អ៊ីរ៉ង់ អាល្លឺម៉ង់ ទួរគី បារាំង ម៉ិកស៊ិក ប៉ាគីស្ថាន អារ៉ាប់ប៊ីសាអូឌីត កាណាដា និងបង់ក្លាដែស។

បើគិតទៅតាមចំនួនប្រជាជនសរុបនៅទូទាំងពិភពលោក ក្នុងចំណោមមនុស្ស1000,000នាក់ គឺមាន1,099នាក់បានឆ្លងវីរុសCOVID-19 និងក្នុងចំណោមមនុស្ស1000,000នាក់គឺមាន58.4នាក់បានស្លាប់ដោយសារវីរុសនេះ៕

ប្រភព៖ សារព័ត៌មានបរទេស

June 19, 2020

Author: សឿន សំណាង