សឿន សំណាង - La Reine Media

WHO ថា “អ្នកជំងឺCOVID-19នឹងកើនឡើងលើស10លាននាក់នៅសប្ដាហ៍ក្រោយ ខណបច្ចុប្បន្នមានជាង9.5លាននាក់បានឆ្លងវីរុស!

ពិភពលោកបានរកឃើញមនុស្សជាង9លានកន្លះបានឆ្លងវីរុស និងជិត484,000នាក់បានស្លាប់ដោយសារCOVID-19 ខណៈស្ថានភាពវិបត្តិសុខភាពនៅទ្វីបអាមេរិកនៅតែស្មុគស្មាញ។

ក្នុងរយៈពេល24ម៉ោងចុងក្រោយនេះ ពិភពលោកបានរកឃើញអ្នកជំងឺចំនួន169,476នាក់ និងអ្នកស្លាប់ចំនួន4,934នាក់ ធ្វើតួលេខអ្នកជំងឺសរុបកើនឡើងដល់9,504,208នាក់ និងអ្នកស្លាប់សរុបឡើងដល់483,681នាក់។ ចំណែកអ្នកដែលបានជាសះស្បើយពីCOVID-19 មានចំនួន5,161,054នាក់។

នៅទ្វីបអាមេរិកមានអ្នកជំងឺសរុប4,726,407នាក់ ទ្វីបអឺរ៉ុបមាន2,354,391នាក់ ទ្វីបអាស៊ីមាន2,025,200នាក់ និងទ្វីបអាហ្វ្រិកមានចំនួន330,003នាក់។

អង្គការសុខភាពពិភពលោក (WHO) បានព្យាករថា អ្នកជំងឺCOVID-19នឹងកើនឡើសលើស10លាននាក់នៅសប្ដាហ៍ក្រោយ។ WHO ថែមទាំងបានព្រមានថា COVID-19 មិនទាន់ឈានដល់កម្រិតកំពូលនៅឡើយសម្រាប់ទ្វីបអាមេរិក៕

ប្រភព៖ សារព័ត៌មានបរទេស

June 25, 2020

ប្រធានាធិបតីហុងដូរ៉ាសត្រូវដាក់អុកស៊ីសែន ក្រោយពីបានឆ្លងCOVID-19

វេជ្ជបណ្ឌិតយោធាបាននិយាយថា ប្រធានាធិបតីរបស់ប្រទេសហុងឌូរ៉ាស លោក Juan Orlando Hernandez ត្រូវដាក់អុកស៊ីសែន ក្រោយពីត្រូវបញ្ជូនចូលមន្ទីរពេទ្យកាលពីសប្ដាហ៍មុនដោយសារតែបានឆ្លងវីរុសCOVID-19។

លោក Juan Orlando Hernandez អាយុ51ឆ្នាំ កាលពីសប្ដាហ៍មុនបានចូលមន្ទីរពេទ្យយោធានៅទីក្រុង Tegucigalpa នៃប្រទេសហុងឌូរ៉ាស់ ដើម្បីព្យាបាលCOVID-19។ លោកវេជ្ជបណ្ឌិត Juan Diaz នៅមន្ទីរពេទ្យយោធានេះ កាលពីថ្ងៃទី23 បានឱ្យដឹងថា ប្រធានាធិបតីត្រូវដកដង្ហើមតាមបំពង់អុកស៊ីសែន ហើយព្រមានថា មេដឹកនាំរូបនេះកំពុងតែប្រឈមនឹងហានិភ័យនៃបញ្ហាសុខភាព និងត្រូវការបន្តការព្យាបាលដោយយកចិត្តទុកដាក់។

វេជ្ជបណ្ឌិត Juan Diaz បន្តថា ស្ថានភាពសុខភាពរបស់ប្រធានាធិបតីមិនទាន់មានបញ្ហាធ្ងន់ធ្ងរនៅឡើយ ប៉ុន្តែពេលខ្លះមានអាការក្ដៅខ្លួនខ្លាំងនិងពិបាកដកដង្ហើម។ លោកថ្លែងថា បន្ទាប់ពីមានអាការក្អ ក្ដៅខ្លួន និងពិបាកដកដង្ហើមជាដើម ក្រុមវេជ្ជបណ្ឌិតបានសម្រួលកម្រិតថ្នាំ និងដាក់អុកស៊ីសែន។ ប៉ុន្តែ មកដល់បច្ចុប្បន្ន គេនៅមិនទាន់បានដឹងថា នៅបន្តដកដង្ហើមតាមបំពង់អុកស៊ីសែនឬអត់នៅឡើយ។

អ្នកនាំពាក្យក្រសួងសុខាភិបាលហុងឌូរ៉ាស់ Francis Contreras កាលពីថ្ងៃទី17មិថុនាបានប្រកាសថា លោក Hernandez រួមនឹងភរិយា និងជំនួយការពីរនាក់បានឆ្លងវីរុសCOVID-19។

សូមរំឭកថា កន្លងមកមានថ្នាក់ដឹកនាំប្រទេសជាច្រើនបានឆ្លងវីរុសនេះ ក្នុងនោះមាននាយករដ្ឋមន្ត្រីអង់គ្លេស នាយករដ្ឋមន្ត្រីរុស្សី នាយករដ្ឋមន្ត្រីប្រទេសអាមេនី (Armenia) និងក្រុមមន្ត្រីជាន់ខ្ពស់ជាច្រើននៃប្រទេសផ្សេងៗទៀតផងដែរ៕

ប្រភព៖ សារព័ត៌មានបរទេស

June 24, 2020

ប្រជាជនថៃកំពុង “ប្រយុទ្ធ” ដណ្ដើមទីក្រុងពី “កណ្ដាប់ដៃ” ហ្វូងសត្វស្វា

នៅ Lopburi ដែលជាទីក្រុងស្វាដ៏ល្បីឈ្មោះនៅប្រទេសថៃ ប្រជាជនត្រូវធ្វើរបងការពារជុំវិញផ្ទះ និងមានទាំង “តំបន់ហាមឃាត់” សម្រាប់មនុស្សទៀតផង ដើម្បីការពារសុវត្ថិភាពពីការវាយប្រហាររបស់ហ្វូងស្វា។

Kuljira Taechawattanawanna ជាពលរដ្ឋម្នាក់នៅក្នុងទីក្រុង Lopburi ដែលកំពុងតែជ្រោកក្រោមសំណាញ់នៃទីលានលើដំបូលផ្ទះ បានត្អូញត្អែរអំពីការគំរាមកំហែងរបស់ហ្វូងសត្វស្វានៅកណ្ដាលទីក្រុងនៃខេត្ត Lopburi ភាគកណ្ដាលប្រទេសថៃ។

“ពួកយើងរស់នៅក្នុងទ្រុង ចំណែកហ្វូងសត្វស្វាបែរជារស់នៅខាងក្រៅ”។ Taechawattanawanna និយាយបន្តថា “លាមករបស់ពួកវាមានគ្រប់កន្លែង ក្លិនស្អុយស្ទើរទ្រាំមិនបាន ពិសេសគឺពេលមានភ្លៀង។

ហ្វូងសត្វស្វាដែលមិនមានការភ័យខ្លាចអ្វីសោះ ហាក់កំពុង “គ្រប់គ្រង” ដងផ្លូវគ្រប់ទីកន្លែងក្នុងទីប្រជុំជននៅជុំវិញតំបន់ប្រាសាទ Prang Sam Yod នៅកណ្ដាលទីក្រុង Lopburi។ ពួកវាតែងនាំគ្នាតោងឡើងជញ្ជាំងខ្ពស់ៗ ដើម្បី “ត្រួតពិនិត្យ” ស្ថានការណ៍ ហើយសម្រុកចូលទៅហែកបន្ទះកៅស៊ូនៃទ្វាររថយន្តដែលនៅក្បែរនោះ។

សកម្មភាពប្លែកៗដែលគួរឱ្យចង់សើចរបស់ហ្វូងសត្វស្វា ត្រូវបានគេទទួលស្គាល់ជាទូទៅថាជាការទាក់ទាញចំណាប់អារម្មណ៍របស់អ្នកទេសចរណ៍នៅតំបន់ Lopburi។ នៅមុន COVID-19 មកដល់ ក្រុមអ្នកទេសចរណ៍មកកាន់ទីក្រុង Lopburi សុទ្ធតែផ្ដល់ចំណីឱ្យហ្វូងសត្វស្វា ហើយថតរូបជាមួយពួកវាយ៉ាងសប្បាយ។

ប៉ុន្តែ យុទ្ធនាការសម្អាតមេរោគពីសំណាក់អាជ្ញាធរទីក្រុង ដោយសារតែ COVID-19 ហាក់បានធ្វើឱ្យប៉ះពាល់ដល់អារម្មណ៍របស់ហ្វូងសត្វស្វាទាំងនោះ ធ្វើឱ្យឥរិយាបថរបស់ពួកវាប្ដូរផ្លាស់។ ម្យ៉ាងទៀត ការដែលមិនមានភ្ញៀវបរទេសមកកាន់ទីក្រុងនេះ គឺស្មើនឹងការបាត់បង់អាហារមួយភាគធំសម្រាប់ហ្វូងស្វា នាំឱ្យពួកវាក្លាយទៅជាសត្វសាហាវ។

ល្បឿននៃការកើនឡើងដ៏ឆាប់រហ័សក្នុងរយៈពេល3ឆ្នាំមកនេះ បាននាំឱ្យចំនួនសត្វស្វាកើនឡើងដល់ប្រមាណជា6,000ក្បាលនៅក្នុងទីក្រុង Lopburi។ ប្រការនេះបានធ្វើឱ្យបរិស្ថានប្រែទៅជាអាក្រក់សម្រាប់មនុស្ស ខណៈប្រជាជនមួយចំនួនមិនអាចទ្រាំនឹងស្ថានភាពនេះបាន។ តំបន់ជាច្រើននៅក្នុងទីក្រុង ថែមទាំង “សុំចុះចាញ់” ហ្វូងសត្វស្វាទាំងនេះទៀតផង។

រោងភាពយន្តមួយកន្លែងដែលត្រូវគេទុកចោល បានក្លាយជាទីដាក់សាកសព និងជាទីស្នាក់នៅរបស់ហ្វូងសត្វស្វា។ សត្វស្វាដែលបានងាប់ ត្រូវបានគ្នាវាដាក់នៅក្នុងបន្ទប់មួយរបស់រោងកុន ហើយនៅពេលមានមនុស្សណាម្នាក់ឈានជើងចូល គឺសុទ្ធតែត្រូវហ្វូងស្វាវាយប្រហារភ្លាមៗ។

នៅក្បែររោងកុនខាងលើ ម្ចាស់ហាងមួយកន្លែងក៏ត្រូវយកខ្លានិងក្រពើតុក្កតាមកតាំងដើម្បីបន្លាចហ្វូងស្វា ព្រោះតែពួកវាតែងតែនាំគ្នាមក “ឆក់ប្លន់” ទំនិញរបស់ហាងនេះ។

មនុស្សមួយចំនួននៅក្នុងទីក្រុង Lopburi យល់ថា មូលហេតុដែលនាំឱ្យហ្វូងស្វាមានឱកាសលុកចូល “គ្រប់គ្រង” ទីក្រុងនេះ អាចបណ្ដាលមកពីទីក្រុងចេះតែពង្រីកខ្លួនចូលទៅកាន់តំបន់ព្រៃដែលនៅមិនឆ្ងាយពីទីនោះ។

ប្រជាជនជាច្រើននៅទីក្រុង Lopburi តែងយកចំណីមកឱ្យហ្វូងស្វា ក្នុងបំណងកាត់បន្ថយ “ភាពតានតឹងនិងជម្លោះ” ដែលកើតឡើងដោយសារការ “ឆក់ប្លន់” អាហារនិងទ្រព្យរបស់អ្នកស្រុក ពីសំណាក់ហ្វូងសត្វស្វា។ ក៏ប៉ុន្តែមានអ្នកខ្លះជឿថា អាហារដែលមានផ្ទុកជាតិស្ករច្រើន ទឹកដែលមានហ្គាស និងធញ្ញជាតិ បានជំរុញឱ្យជីវភាពផ្លូវភេទរបស់ពួកវាកាន់តែល្អប្រសើរ។

Pramot Ketampai ដែលជាអ្នកគ្រប់គ្រងបណ្ដាប្រាសាទតូចៗនៅជុំវិញប្រាសាទ Prang Sam Yod បានឱ្យដឹងថា៖ “ពួកវាស៊ីកាន់តែច្រើន កាន់តែមានកម្លាំង ទើបពួកវាកើតកូនចៅកាន់តែច្រើន”។

“សង្គ្រាម” នានារវាងហ្វូងស្វា ថ្មីៗនេះបានបង្កការចាប់អារម្មណ៍ពីក្រុមមន្ត្រីនៅទីក្រុង Lopburi នាំឱ្យពួកគេសម្រេចចិត្តដំណើរការឡើងវីញនូវកម្មវិធីគ្រៀវសត្វស្វានៅក្នុងខែមីថុនានេះ ក្រោយពីបានផ្អាកតាំងតែពី3ឆ្នាំមុន។

ក្រុមបុគ្គលិកនៃការិយាល័យជំនាញផ្នែកសត្វព្រៃ បានយកផ្លែឈើទាក់ទាញហ្វូងស្វាឱ្យចូលទៅក្នុងទ្រុង ហើយនាំពួកវាទៅកាន់បន្ទប់ពិនិត្យសុខភាពដើម្បីចាក់ថ្នាំសណ្ដំនិងគ្រៀវ រួចហើយក៏ចាក់សាក់ជាសម្គាល់ មុននឹងលែងពួកវាទៅវិញ។

អាជ្ញាធរទីក្រុង Lopburi បានកំណត់គោលដៅក្នុងការគ្រៀវស្វាចំនួន500ក្បាលឱ្យបានមុនថ្ងៃទី26មិថុនាខាងមុខ។ ប៉ុន្តែ យុទ្ធនាការនេះនឹងមិនអាចគ្រប់គ្រងហ្វូងស្វាបានទាំងស្រុងទេ ដូច្នេះអាជ្ញាធរក៏បានរៀបផែនការបង្កើតតំបន់អភិរក្សសត្វស្វាមួយនៅក្នុងទីក្រុង៕

ប្រភព៖ សារព័ត៌មានបរទេស

June 24, 2020

ដំណើងល្អ! Elon Musk អញ្ជើញអ្នកគ្រប់គ្នាប្រើប្រាស់សាកល្បងសេវាកម្មអ៊ីនធើណិតពីផ្កាយរណប

ក្រុមហ៊ុន SpaceX របស់មហាសេដ្ឋី Elon Musk កំពុងតែស្វែងរកមនុស្សឱ្យចូលរួមប្រើប្រាស់សាកល្បងសេវាអ៊ីនធើណិតពីផ្កាយរណប Starlink របស់ខ្លួន។

គេហទំព័ររបស់ Starlink បានអនុញ្ញាតឱ្យមានការចុះឈ្មោះទទួលព័ត៌មានអំពីគម្រោងអ៊ីនធើណិតរបស់ក្រុមហ៊ុននេះ។ អ្នកដែលចង់ប្រើប្រាស់សាកល្បង ត្រូវបញ្ចូលអាសយដ្ឋានអ៊ីមេលនិងលេខសម្គាល់ប្រៃសណីយ៍។ ក្រោយមក Starlink នឹងផ្ញើសារជូនដំណឹងនៅពេលណាដែលមានកម្មវិធីប្រើប្រាស់សាកល្បងត្រូវបានធ្វើឡើងនៅក្នុងតំបន់ដែលអ្នកចង់ប្រើប្រាស់បានចុះឈ្មោះ ដោយយោងទៅតាមលេខកូដប្រៃសណីយ៍។

យោងតាមខ្លឹមសារដែលលោក Elon Musk បានសរសេរនៅលើទំព័រ Twitter កម្មវិធីសាកល្បងប្រើអ៊ីនធើណិតដំបូងគេនឹងត្រូវចាប់ផ្ដើមនៅក្នុងបណ្ដាតំបន់ដែលស្ថិតក្នុងរយៈទទឹងខ្ពស់ ដូចជាតំបន់ Seattle នៅសហរដ្ឋអាមេរិក និងនៅប្រទេសអាល្លឺម៉ង់ជាដើម។

បច្ចុប្បន្ន ផ្កាយរណបប្រមាណជា500របស់ក្រុមហ៊ុន SpaceX កំពុងហោះហើរជុំវិញផែនដី។ SpaceX មានបំណងប្រើប្រាស់ផ្កាយរណបរបស់ខ្លួនធ្វើជាស្ពានដើម្បីលុបបំបាត់ “ភាពអយុត្តិធម៌” នៅក្នុងការប្រើប្រាស់ព័ត៌មានវិទ្យានិងទូរគមនាគមន៍រវាងតំបន់នានាក្នុងពិភពលោក។ ពាក់កណ្ដាលនៃពិភពលោកនាបច្ចុប្បន្ន (ភាគច្រើនគឺនៅតំបន់ជនបទ និងអ្នកក្រីក្រ) នៅតែមិនអាចប្រើប្រាស់អ៊ីនធើណិត ឬត្រូវបង្ខំចិត្តប្រើប្រាស់សេវាអ៊ីនធើណិតកម្រិតខ្សោយតែតម្លៃខ្ពស់។

ដំណើរល្អ! Elon Musk អញ្ជើញអ្នកគ្រប់គ្នាឱ្យចូលរួមប្រើប្រាស់សាកល្បងអ៊ីនធើណិតពីផ្កាយរណប — គេហទំព័ររបស់ Starlink បានអនុញ្ញាតឱ្យមានការចុះឈ្មោះទទួលព័ត៌មានអំពីគម្រោងអ៊ីនធើណិតរបស់ក្រុមហ៊ុននេះ។

តាមគម្រោង ក្រុមហ៊ុននេះនឹងចាប់ផ្ដើមសាកល្បងសេវាអ៊ីនធើណិតផ្កាយរណបនៅក្នុងរដូវក្ដៅឆ្នាំនេះ ហើយនឹងធ្វើពាណិជ្ជកម្មនៅអាមេរិកខាងជើងចាប់ពីចុងឆ្នាំ2020។ គោលដៅចុងក្រោយរបស់លោក Elon Musk គឺការផ្គត់ផ្គង់អ៊ីនធើណិតនៅទូទាំងពិភពលោកនាឆ្នាំ2021។

គោលដៅដំបូងរបស់ Starlink គឺការផ្គត់ផ្គង់សេវាកម្មសម្រាប់តំបន់ដែលមានសេវាអ៊ីនធើណិតខ្សោយ។ ប៉ុន្តែ លោក Musk ក៏បានរៀបចំគម្រោងសម្រាប់ផ្ដល់សេវាអ៊ីនធើណិតតម្លៃទាបនៅក្នុងតំបន់ទីក្រុងផងដែរ។ លោក Musk ឱ្យដឹងថា អ៊ីនធើណិតផ្កាយរណបនេះនឹងមានល្បឿន1Gb/វិនាទី ជាមួយនឹង latency (ភាពយឺតនៃល្បឿនអ៊ីនធើណិត) ប្រមាណជា30មីលីវិនាទី។ ល្បឿននេះគ្រប់គ្រាន់សម្រាប់ការលេងហ្គេមវីដេអូកម្រិតខ្ពស់ ដែលនេះអាចប្រកួតប្រជែងបានជាមួយនឹងថ្នាលអ៊ីនធើណិតបុរាណនាបច្ចុប្បន្ន។ ដើម្បីធ្វើការប្រៀបធៀប សូមពិនិត្យមើលទៅលើល្បឿនអ៊ីនធើណិតប្រភេទលឿន (broadband) នៅអង់គ្លេស៖ ជាមធ្យមវាមានល្បឿនត្រឹមតែ 64Mb/វិនាទីតែប៉ុណ្ណោះ។

គូប្រជែងជាច្រើនរបស់ SpaceX ក៏កំពុងតែមានគម្រោងបញ្ចេញប្រព័ន្ធផ្កាយរណបដែលហោះហើរលើគន្លងគោចរកម្រិតទាប ដូចជា OneWeb, Amazon, Facebook, Space Norway និង Telesat ជាដើម។ ជាងនេះ លោក Musk ថែមទាំងបានស្នើផ្ដល់សេវាកម្មបាញ់បង្ហោះផ្កាយរណបរបស់គូប្រជែងទាំងនេះ ឡើងទៅកាន់គន្លងគោចរទៀតផង៕

ប្រភព៖ សារព័ត៌មានបរទេស

June 24, 2020

(វីដេអូ) ហេតុអ្វីមនុស្សយើងតែងតែហៀរសម្បោរពេលហូបអាហារហឹរ?

អាហារដែលមានរសជាតិហឹរបង្កើតឱ្យមានប្រតិកម្មតបតពីភ្នាសនៅខាងក្នុងរន្ធច្រមុះ ធ្វើឱ្យភ្នាសនេះបញ្ចេញទឹកសម្បោរមកខាងក្រៅច្រើនជាងធម្មតាដើម្បីការពារកោសិកានានាពីសារជាតិក្ដៅហឹរទាំងនោះ។

ច្រមុះរបស់មនុស្សមានរោមតូចៗជាច្រើន និងមានធាតុរាវនិងស្អិតៗមួយប្រភេទដែលត្រូវបានហៅថាទឹករម្អិល។

“តើខ្ញុំអាចប្រើប្រាស់ធាតុរាវស្អិតនេះដើម្បីប៉ះភ្ជាប់ដបដែលប្រេះបែកបានដែរឬទេ?”…

“វាគួរឱ្យខ្ពើមរអើមណាស់! កុំធ្វើបែបនេះ។ សូមមេត្តាស្ដាប់បន្តទៀត!”…

នៅក្នុងពេលដកដង្ហើម រោមច្រមុះ និងទឹករម្អិលនេះ រួមដៃគ្នា “ចាប់យក” ធូលីនិងសារធាតុអាក្រក់ៗមិនឱ្យពួកវាចូលជ្រៅទៅក្នុងរាងកាយ។

អាហារដែលមានជាតិហឹរ មានដូចជាម្ទេស ម្រេច និងអាហារផ្សេងមួយចំនួនទៀត មានផ្ទុកសារជាតិ capsaicin និង allyl isothiocyanate។

នៅពេលហូបអាហារទាំងនេះ សារជាតិ capsaicin និង allyl isothiocyanate ក៏ធ្វើដំណើរឆ្លងកាត់បំពងក និងទៅដល់ច្រមុះ។ នៅទីនេះ សារជាតិ capsaicin និង allyl isothiocyanate រំញោចទៅលើកោសិកា receptor ដែលជាអ្នកទទួលនិងបញ្ជូនសញ្ញាទាក់ទិននឹងកម្ដៅឬហឹរ ធ្វើឱ្យភ្នាសក្នុងច្រមុះបញ្ចេញប្រតិកម្ម។

ដើម្បីការពារកោសិកាពីសារជាតិហឹរ ឬក្ដៅ ដែលបង្កឡើងដោយ capsaicin និង allyl isothiocyanate ភ្នាសក្នុងច្រមុះក៏បញ្ចេញទឹករម្អិលមកក្រៅច្រើនជាងធម្មតា ក្នុងបំណងបណ្ដេញឬលាងជម្រះសារជាតិអាក្រក់ទាំងនេះ៕

ប្រភព៖ សារព័ត៌មានបរទេស

June 24, 2020

លោក ត្រាំ ប្រកាសដាច់ខាត មិនអនុញ្ញាតឱ្យក្រុមបាតុករកាន់កាន់ទីក្រុង បង្កើត “តំបន់គ្រប់គ្រងខ្លួនឯង” ក្នុងក្រុងវ៉ាស៊ីនតោនឡើយ!

លោកប្រធានាធិបតី នៃសហរដ្ឋអាមេរិក ដូណាល់ ត្រាំ បានប្រកាសកាលពីថ្ងៃអង្គារ(ទី23 មិថុនា) ថា រឿងដែលកើតឡើងនៅស៊ីអ៊ែតថល នឹងគ្មានថ្ងៃកើតឡើងនៅក្នុងទីក្រុងចម្បងរបស់ប្រទេសមួយនេះឡើយ និងមិនអនុញ្ញាតឱ្យមាន “តំបន់គ្រប់គ្រងខ្លួនឯង” ឬតំបន់គ្មានប៉ូលិស នៅក្នុងវ៉ាស៊ីនតោន ឌីស៊ី ដូចករណីដែលក្រុមបាតុករនៅស៊ីអ៊ែតថល បានដណ្ដើមកាន់កាប់ផ្លូវកណ្ដាលក្រុង ធ្វើជាតំបន់គ្រប់គ្រងខ្លួនឯងនោះឡើយ។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន Fox news។

តាំងពីនៅក្នុងទីក្រុងជាច្រើនរបស់សហរដ្ឋអាមេរិក កើតហេតុការណ៍ពលរដ្ឋអាមេរិកាំង បាននាំគ្នាចេញមកប្រមូលផ្ដុំគ្នាតវ៉ាទាមទារ បង្ហាញការមិនពេញចិត្តចំពោះករណីការស្លាប់របស់បុរសស្បែកខ្មៅ ចច ហ្វ្លយដ៍ មកនោះ ទោះជាតំបន់ខ្លះ ស្ថានការណ៍ស្ទើរតែលែងឃើញមានហេតុការណ៍តវ៉ាបែបហិង្សាហើយក្ដី តែក៏នៅតែមានរបាយការណ៍នៅក្នុងទីក្រុងមួយចំនួន ដែលនៅតែមានក្រុមបាតុករប្រមូលផ្ដុំគ្នា និងអាជ្ញាធរក្នុងតំបន់នៅតែមិនអាចចូលទៅគ្រប់គ្រងស្ថានការណ៍បាននៅឡើយ។

កាលពីថ្ងៃចន្ទ (ទី22 មិថុនា) ក្រុមអ្នកតវ៉ា បានបិទឃាំងតំបន់មួយ ដែលពួកគេហៅថា “តំបន់គ្រប់គ្រងខ្លួនឯងវិមានខ្មៅ” ឬ “BHAZ” នៅក្បែរសេតវិមាន និងព្យាយាមផ្ដួលរំលំរូបសំណាកលោក អ៊ែនឌ្រូវ៍ ជែកសុន ប្រធានាធិបតី ទី7 នៃសហរដ្ឋអាមេរិក ដែលស្ថិតនៅក្នុងសួនច្បារសាធារណៈ ឡា ហ្វាយិតត៍។

អតីតប្រធានាធិបតី ជែកសុន ដែលមានរូបនៅលើប្រដាសប្រាក់ 20ដុល្លាររបស់សហរដ្ឋអាមេរិក បានក្លាយជាគោលដៅនៃការតវ៉ាទាមទារក្នុងគ្រានេះ ដោយសារតែមានគោលនយោបាយបំផ្លាស់ទីជនជាតិដើមអាមេរិកាំង ចេញពីដែនដីបុព្វបុរសរបស់ពួកគេ។

សកម្មភាពនេះ ស្រដៀងនឹងករណីនៅឯទីក្រុងស៊ីអ៊ែតថល ដែលមានក្រុមបាតុករ ចូលដណ្ដើមកាន់កាប់ទីតាំងសាលាក្រុង និងតំបន់ក្បែៗនោះ ដែលស្ថិតនៅកណ្ដាលទីក្រុង ដើម្បីធ្វើសកម្មភាពផ្សេងៗ និងបានប្រកាសខ្លួនជា តំបន់គ្រប់គ្រងខ្លួនឯង(Capitol Hill Autonomous Zone) ឬ CHAZ តាំងពីជាង2សប្ដាហ៍មុន។

យ៉ាងណាក្ដី អាជ្ញាធររបស់ទីក្រុង បានប្រកាសកាលពីថ្ងៃចន្ទ (ទី22មិថុនា) ថា នឹងប្រើវិធានការផ្សេងៗដើម្បីចូលទៅរុះរើទីតាំងគ្មានប៉ូលិសនេះចោល ក្រោយកើតហេតុការណ៍បាញ់សម្លាប់គ្នា និងអំពើហិង្សាផ្សេងៗជាច្រើនដងនៅក្នុងតំបន់នោះ។

លោកប្រធានាធិបតី ដូណាល់ ត្រាំ បានសរសេរនៅក្នុងធ្វីតធើរ នៅព្រឹកថ្ងៃអង្គារ(ទី23មិថុនា) ថា “នឹងគ្មានតំបន់គ្រប់គ្រងខ្លួនឯងនៅក្នុងវ៉ាស៊ីនតោន ឌីស៊ី ជាដាច់ខាត ដរាបណាដែលខ្ញុំនៅតែជាប្រធានាធិបតី! បើពួកគេនៅតែព្យាយាម ពួកគេនឹងត្រូវជួបនឹងការប្រើកម្លាំងយ៉ាងខ្លាំងក្លា!!”។

ទាំងអស់នេះ លោកត្រាំ នៅបានព្រមានទៅដល់ក្រុមបាតុករដែលកំពុងបង្កការខូចខាតដល់ទ្រព្យសម្បត្តិរបស់រដ្ឋថា នឹងត្រូវចាប់ខ្លួន ឬមិនទេក៏ជាប់គុក ព្រមទាំងបានរិះគន់ ពួកអភិបាលរដ្ឋផ្សេងៗថា មិនបានដំណើរការយ៉ាងធ្ងន់ធ្ងរគ្រប់គ្រាន់ ទៅលើពួកដែលមានចេតនាបំផ្លាញអនុស្សាវរីយ៍ខាងប្រវត្តិសាស្ត្រទាំងឡាយ ដោយលោកបាននិយាយថា “រដ្ឋជាច្រើនទន់ជ្រាយ មនុស្សជាច្រើនទន់ជ្រាយ ហើយពួកគេបណ្ដោយឱ្យវាកើតឡើង”

លោកត្រាំ ថែមទាំងបាននិយាយដល់ពួកដែលដើរប្រមាញ់ស្ដូបអនុស្សាវរីយ៍ទាំងឡាយ ដែលជាប្រធានបទក្នុងការជជែកគ្នាផ្សេងៗទាំងនោះថា “ពួកគេជាមនុស្សអាក្រក់ ពួកគេមិនស្រឡាញ់ប្រទេសរបស់យើងទេ”៕

ប្រភព៖ សារព័ត៌មានបរទេស

June 24, 2020

ក្នុងចំណោមមនុស្ស1លាននាក់គឺមាន1,200នាក់ត្រូវឆ្លងCOVID-19! អ្នកស្លាប់បានកើនដល់ជិតកន្លះលាននាក់

អត្រានៃការឆ្លងវីរុសCOVID-19បានកើនដល់1200នាក់ក្នុងចំណោមមនុស្ស1លាននាក់នៅទូទាំងពិភពលោក ខណៈដែលអ្នកជំងឺCOVID-19សរុប បានឡើងដល់ជាង9.3លាននាក់។

ប្រទេសនិងដែនដីចំនួន221ក្នុងសកលលោក បានរាយការណ៍ថា បានរកឃើញអ្នកផ្ទុកវីរុសCOVID-19 ចំនួន9,334,732នាក់ និងអ្នកស្លាប់សរុប478,747នាក់ ក្នុងនោះមានអ្នកជំងឺ163,819នាក់ និងអ្នកស្លាប់5,470នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ ចំណែកអ្នកជំងឺដែលបានជាសះស្បើយក៏បានកើនឡើងដល់5,014,146នាក់។

ប្រទេសដែលមានអ្នកជំងឺCOVID-19លើសពី 1,000,000នាក់ គឺមានសហរដ្ឋអាមេរិក និងប្រទេសប្រេស៊ីល។

គិតមកដល់បច្ចុប្បន្ន បើយោងតាមតួលេខខាងលើ រួមជាមួយនឹងចំនួនប្រជាជនសរុបរបស់ពិភពលោក គេឃើញថាអត្រានៃការឆ្លងវីរុសCOVID-19 បានកើនឡើងដល់1,200នាក់ ពោលគឺក្នុងចំណោមមនុស្ស1,000,000នាក់គឺមាន1,200នាក់ត្រូវឆ្លងមេរោគបង្កជំងឹរលាកសួតប្រភេទថ្មីនេះ។ ចំណែកអត្រានៃការស្លាប់ដោយសារCOVID-19 ក៏បានកើនដល់61នាក់នៅក្នុងចំណោមមនុស្ស1,000,000នាក់៕

ប្រភព៖ សារព័ត៌មានបរទេស

June 24, 2020

Kim Jong-un ចេញបទបញ្ជាដ៏គួរឱ្យភ្ញាក់ផ្អើល ខណៈកូរ៉េទាំងពីរកំពុងមានបញ្ហាតានតឹង

មេដឹកនាំកូរ៉េខាងជើង លោក Kim Jong-un បានដឹកនាំកិច្ចប្រជុំក្រុមប្រឹក្សាភិបាលយោធាកូរ៉េខាងជើង ហើយបានសម្រេចឱ្យផ្អាកផែនការធ្វើសកម្មភាពយោធាប្រឆាំងកូរ៉េខាងត្បូង។

ទីភ្នាក់ងារសារព័ត៌មាន KCNA បានឱ្យដឹងថា កិច្ចប្រជុំបឋមរបស់ក្រុមប្រឹក្សាភិបាលយោធាមជ្ឈឹមនៃបក្សពលករកូរ៉េខាងជើងត្រូវបានធ្វើឡើងកាលពីថ្ងៃទី23មិថុនាក្រោមរូបភាពអនឡាញ។ KCNA ចេញផ្សាយថា សេចក្ដីលម្អិតនឹងត្រូវបានសម្រេចនៅក្នុងកិច្ចប្រជុំមួយរបស់ក្រុមប្រឹក្សាភិបាលយោធាមជ្ឈិម “នាពេលដ៏ខ្លីខាងមុខ”។

“នៅក្នុងកិច្ចប្រជុំបឋម ក្រុមប្រឹក្សាភិបាលយោធាបក្សពលករកូរ៉េខាងជើង ក្ដាប់បានស្ថានករណ៍បច្ចុប្បន្ន និងបានផ្អាកផែនការធ្វើសកម្មភាពយោធាប្រឆាំងកូរ៉េខាងត្បូង” នេះបើតាម KCNA។

KCNA បន្តថា៖ “កិច្ចប្រជុំនេះបានពិនិត្យទៅលើរបៀបវារៈក្នុងគោលនយោបាយយោធាដែលត្រូវលើកឡើងនៅមុនកិច្ចប្រជុំលើកទី5របស់ក្រុមប្រឹក្សាភិបាលយោធាមជ្ឈិមនៃសម័យប្រជុំលើកទី7 រួមនឹងការពិនិត្យរបាយការណ៍និងសេចក្ដីសម្រេចនានាដែលនឹងត្រូវដាក់ជូនពិភាក្សានៅក្នុងកិច្ចប្រជុំលើកទី5 រួមទាំងពិនិត្យលើឯកសារមួយចំនួនស្ដីអំពីការលើកកម្ពស់ការកំញើញរបស់កូរ៉េខាងជើង”។

ព័ត៌មាននេះត្រូវបានលើកឡើងក្នុងគ្រាដែលទំនាក់ទំនងរវាងកូរ៉េខាងត្បូងនិងកូរ៉េខាងជើងកំពុងមានភាពតានតឹង។ បន្ទាប់ពីបានចោទប្រកាន់ថា កូរ៉ខាងត្បូងមិនបានហាមឃាត់ក្រុមមនុស្សរត់ចោលស្រុកពង្រាយខិត្តប័ណ្ណចូលទឹកដីកូរ៉េខាងជើង ទីក្រុងព្យុងយ៉ាងក៏បានប្រកាសកាត់ផ្ដាច់ទំនាក់ទំនងជាមួយទីក្រុងសេអ៊ូល។

កាលពីសប្ដាហ៍មុន កូរ៉េខាងជើងបានបំផ្ទុះគ្រាប់បែកកម្ទេចអគារការិយាល័យទំនាក់ទំនងរួមរវាងកូរ៉េខាងជើងនិងកូរ៉េខាងត្បូងនៅព្រំដែននៃប្រទេសទាំងពីរ និងបានបញ្ជូនទាហានមកកាន់តំបន់គ្មានយោធា។ កងទ័ពកូរ៉េខាងជើងក៏បានដាក់ពង្រាយប្រព័ន្ធបំពងសំឡេងឡើងវិញនៅក្បែរតំបន់គ្មានយោធា ព្រមទាំងបានប្រកាសអំពីផែនការបង្ហោះខិត្តប័ណ្ណចំនួន12លានសន្លឹកចូលទៅកាន់ទឹកដីកូរ៉េខាងត្បូងផងដែរ។

ប្អូនស្រីរបស់មេដឹកនាំកូរ៉េខាងជើង លោកស្រី Kim Yo-jong ដែលជាអ្នកកាន់កាប់តំណែងជាន់ខ្ពស់ក្នុងបក្សពលករកូរ៉េខាងជើង បានព្រមានថា អាចនឹងមានការប្រឆាំងកូរ៉េខាងត្បូងដោយសកម្មភាពយោធា។ កងទ័ពកូរ៉េខាងជើង ក្រោយមកក៏បានប្រកាសថា កំពុងពិនិត្យទៅលើ “ផែនការសកម្មភាព” និងធ្វើឱ្យព្រំដែនជួរមុខក្លាយជា “បន្ទាយទាហាន”៕

ប្រភព៖ Reuters

June 24, 2020

អគារការិយាល័យទំនាក់ទំនងរវាងកូរ៉េទាំងពីរ “អាចមិនទាន់ដួលរលំ”

រូបភាពបានពីផ្កាយរណបបង្ហាញថា ការិយាល័យទំនាក់ទំនងរវាងប្រទេសកូរ៉េខាងជើងនិងកូរ៉េខាងត្បូងត្រូវរងការខូចខាត ប៉ុន្តែនៅតែឈរត្រង់នៅឡើយ ដែលនេះគឺខុសគ្នាដាច់ស្រលះទៅនឹងរូបភាពដែលបានមកពីកូរ៉េខាងជើង។

បណ្ដារូបភាពដែលបានមកពីផ្កាយរណបពាណិជ្ជកម្មដែលថតទៅលើតំបន់ការិយាល័យទំនាក់ទំនងរវាងកូរ៉េខាងខាងជើងនិងកូរ៉េខាងត្បូងនៅទីក្រុង Kaesong ក្នុងតំបន់ក្បែរព្រំដែនកូរ៉េខាងជើងកាលពីថ្ងៃទី22មិថុនាបានបង្ហាញថា អគារកម្ពស់4ជាន់នេះនៅឈរត្រង់ដូចដើម ប៉ុន្តែត្រូវរងការខូចខាតច្រើន។

កូរ៉េខាងជើង កាលពីសប្ដាហ៍មុនបានបញ្ចេញរូបភាពស្ដីអំពីគំនរបាក់បែកនៅកន្លែងកើតហេតុមួយដែលបង្ហាញថា អគារនេះត្រូវបានបំផ្លាញទាំងស្រុងដោយការបំផ្ទុះគ្រាប់បែក។

ក្រុមអ្នកវិភាគនៅ 38 North ជាកន្លែងតាមដានស្ថានការណ៍នៅកូរ៉េខាងជើង កាលពីសប្ដាហ៍កន្លងទៅបានបញ្ចេញមតិថា “ជាក់ស្ដែង នេះមិនមែនជាការបំផ្ទុះដែលមានការគ្រប់គ្រងនោះទេ ព្រោះថា អគារនេះមិនត្រូវបានធ្វើឱ្យដួលរលំរាបដល់ដី និងបង្កការខូចខាតដល់អគារនៅក្បែរខាង”។ នៅក្នុងរូបភាពដែលចេញផ្សាយដោយសារព័ត៌មានកូរ៉េខាងជើងក៏ឃើញមានអគារមជ្ឈមណ្ឌលគាំពារមួយដែលមានកម្ពស់ច្រើនជាន់នៅពីខាងក្រោយអគារការិយល័យទំនាក់ទំនង ត្រូវខូចខាតយ៉ាងធ្ងន់ធ្ងរផងដែរ។

កាលពីថ្ងៃទី16មិថុនាកន្លងទៅ ការិយាល័យទំនាក់ទំនងរួមរវាងកូរ៉េខាងជើងនិងកូរ៉េខាងត្បូងត្រូវបានបំផ្ទុះឱ្យដួលរលំ បន្ទាប់ពីកូរ៉េខាងជើងបានបន្ទោសជាច្រើនលើកទៅលើកូរ៉េខាងត្បូងថា មិនបានទប់ស្កាត់សកម្មភាពបាច់ខិត្តប័ណ្ណចូលទឹកដីកូរ៉េខាងជើង។ ក្រោយមក កូរ៉េខាងជើងក៏បានប្រកាសថា ការបំផ្លាញការិយាល័យនេះគឺគ្រាន់តែជា “ការចាប់ផ្ដើមប៉ុណ្ណោះ” ហើយភាពតានតឹងនឹងកើនឡើង “ហួសពីការស្មាន”។

ភាគីកូរ៉េខាងត្បូងបានឱ្យដឹងថា កូរ៉េខាងជើងបានចាប់ផ្ដើមដាក់ប្រដាប់បំពងសំឡេងនៅក្បែរតំបន់គ្មានយោធា (DMZ)។ ប្រព័ន្ធបំពងសំឡេងទាំងនេះធ្លាប់ត្រូវបានដកចេញរួចមកហើយបន្ទាប់ពីកូរ៉េទាំងពីរបានចុះកិច្ចព្រមព្រៀងកាលពីឆ្នាំ2018 ដើម្បីកាត់បន្ថយ “សកម្មភាពបង្កជម្លោះទាំងស្រុង”។

មន្ត្រីយោធាកូរ៉េខាងត្បូងម្នាក់បានថ្លែងថា “យើងក៏កំពុងតែពិចារណាទៅលើការដាក់ពង្រាយប្រដាប់បំពងសំឡេងរបស់យើង។ ប៉ុន្តែកូរ៉េខាងជើងមិនទាន់ចាប់ផ្ដើមឃោសនាតាមប្រព័ន្ធបំពងសំឡេងទាំងនោះនៅឡើយ។ ចំណែកយើងខ្ញុំវិញគឺបានត្រៀមរួចរាល់ហើយសម្រាប់ការឆ្លើយតប”។

អ្នកនាំពាក្យក្រសួងការបរទេសកូរ៉េខាងត្បូងមិនទាន់ញ្ចេញមតិជុំវិញសកម្មភាពរបស់កូរ៉េខាងជើងនៅឡើយដែរ ប៉ុន្តែបានរំឭកថា កូរ៉េខាងជើងនឹងទទួលរងផលអាក្រក់បើសិននៅតែបន្តសកម្មភាពខាងលើ ដោយមិនអើពើដល់កិច្ចប្រឹងប្រែងរួមក្នុងការជំរុញឱ្យមានសន្តិភាពពេញលេញ៕

ប្រភព៖ Reuters

June 23, 2020

កូរ៉េខាងជើង ប្រកាសផែនការសងសឹកកូរ៉េខាងត្បូង ដោយការរោយខិត្តប័ណ្ណឃោសនា 12លានសន្លឹក តាមរយៈប៉ោងប៉ោង 3ពាន់គ្រាប់

សារព័ត៌មានផ្លូវការរបស់កូរ៉េខាងជើង បានប្រកាសព័ត៌មានថា ជិតដល់ពេលសងសឹកហើយ ដោយខ្លួននឹងត្រៀមបញ្ជូនខិត្តប័ណ្ណឃោសនា ទៅក្នុងប្រទេសកូរ៉េខាងត្បូងចំនួន 12លានសន្លឹក តាមរយៈប៉ោងប៉ោងចំនួន 3ពាន់ប៉ោងប៉ោង។

កូរ៉េខាងជើង បានអះអាងលើពាក្យគំរាមរបស់ខ្លួនដែលថា នឹងបញ្ជូនខិត្តប័ណ្ណឃោសនានយោបាយ ទៅក្នុងប្រទេសកូរ៉េខាងត្បូង ដើម្បីឆ្លើយតបនឹងអ្វីដែលខាងកូរ៉េខាងត្បូង មិនអាចរារាំងជនជាតិកូរ៉េខាងជើងដែលភៀសខ្លួនចូលទៅ និងសកម្មជននយោបាយមិនឱ្យបញ្ជូនខិត្តប័ណ្ណប្រឆាំងរបបក្រុងព្យុងយ៉ាងចូលទៅក្នុងប្រទេសរបស់ខ្លួនបាន ទាំងដែលរឿងទាំងនេះ ជាកិច្ចការហាមឃាត់នៅក្នុងកិច្ចព្រមព្រៀងក្នុងកិច្ចប្រជុំកំពូល នាឆ្នាំ2018។

ទីភ្នាក់ងារព័ត៌មានកូរ៉េខាងជើង(KCNA) បានរាយការណ៍ថា កូរ៉េខាងជើងនឹងបញ្ជូនខិត្តប័ណ្ណចំនួន 12លានសន្លឹក ដែលឆ្លុះបញ្ចាំងពីកំហឹង និងការស្អប់ខ្ពើមរបស់ប្រជាជនគ្រប់ភេទ គ្រប់វ័យ… “ឧបករណ៍ និងវិធីការបញ្ជូនខិត្តប័ណ្ណ ដែលរួមទាំងប៉ោងប៉ោងចំនួនជាង 3ពាន់គ្រប់ ច្រើនប្រភេទ ដែលអាចចែកចាយខិត្តប័ណ្ណចូលជ្រៅទៅក្នុងប្រទេសកូរ៉េខាងត្បូងនោះ បានត្រៀមរួចរាល់អស់ហើយ ចំណែកពេលវេលាកាត់ទោសសងសឹក ក៏កំពុងតែជិតចូលមកដល់ដែរ”។ តែរបាយការណ៍នោះ មិនបានបញ្ជាក់ថា កូរ៉េខាងជើងនឹងចាប់ផ្ដើមរោយខិត្តប័ណ្ណនៅពេលណាឡើយ តែអ្នកសង្កេតការណ៍ជឿថា ប្រហែលជាក្នុងអំឡុងពេលប៉ុន្មានថ្ងៃទៀត ឬអាចនឹងនៅថ្ងៃព្រហស្បតិ៍ ដែលជាថ្ងៃគម្រប់ខួប 70ឆ្នាំ នៃសង្គ្រាមកូរ៉េ។

កាលពីថ្ងៃសៅរ៍(ទី20មិថុនា) ក្រសួងរួបរួមជាតិកូរ៉េខាងត្បូង បានទាមទារឱ្យកូរ៉េខាងជើងបញ្ឈប់ផែនការបញ្ជូនខិត្តប័ណ្ណឃោសនានេះ ដោយបានបញ្ជាក់ថា វាជាការល្មើសកិច្ចព្រមព្រៀងក្នុងកិច្ចប្រជុំកំពូលកាលពី 2ឆ្នាំមុន តែ ទីស្នាក់ការរួបរួមកូរ៉េខាងជើង ដែលទទួលខុសត្រូវសម្ព័ន្ធភាពរវាងប្រទេសទាំង2 បានបដិសេធថា កិច្ចព្រមព្រៀងក្នុងកិច្ចប្រជុំកំពូលនោះ គឺជាឯកសារដែលលែងមានវិញ្ញាណបាត់ទៅហើយ និងសារព័ត៌មានផ្លូវការរបស់កូរ៉េខាងជើង ថែមទាំងបានបង្ហាញគំរូរបស់ខិត្តប័ណ្ណ ដែលបង្ហាញពីរូបភាពផ្ទៃមុខរបស់លោកប្រធានាធិបតី មូន ជេអ៊ីន ជាមួយនឹងពាក្យស្ដីបន្ទោស ចោទប្រកាន់ និងកម្ទេចបារីទៀតផង។

កូរ៉េខាងជើង បានត្រឡប់មកហៅកូរ៉េខាងត្បូងថា ជាសត្រូវវិញ និងកាត់ផ្ដាច់ទំនាក់ទំនងឆ្លងព្រំដែន ដោយសារតែមិនពេញចិត្តរឿងខិត្តប័ណ្ណ ហើយកាលសប្ដាហ៍កន្លងទៅ ក៏ទើបតែបំផ្ទុះទីស្នាក់ការទំនាក់ទំនងរួមនៅក្នុងទីក្រុង កែសុង ដែលបានបើកសម្ពោធប្រើប្រាស់បន្ទាប់ពីកិច្ចប្រជុំកំពូលកាលពី 2ឆ្នាំមុន ដែលទោះជារដ្ឋបាលកូរ៉េខាងត្បូងខំព្យាយាមជំរុញច្បាប់ហាមបញ្ជូនខិត្តប័ណ្ណចូលទៅក្នុងកូរ៉េខាងជើងទៀត និងបានប្ដឹងពីបទអាជ្ញាទៅលើក្រុមជនកូរ៉េខាងជើងដែលភៀសខ្លួនទៅនៅកូរ៉េខាងត្បូង 2ក្រុមដែលបានធ្វើកិច្ចការនេះក៏ដោយ តែក្រុងព្យុងយ៉ាង ប្រាប់ថា ហួសពេលហើយ…៕

ប្រភព៖ សារព័ត៌មានបរទេស

June 23, 2020

Author: សឿន សំណាង