សឿន សំណាង - La Reine Media

ប៉ូលិសប៉ះទង្គិចជាមួយក្រុមបាតុករ ខណៈមានបាតុករនិងកុបករជាច្រើននាំគ្នាដុតអគារតុលាការ វាយកម្ទេចការិយាល័យប៉ូលិស និងបាញ់ប្រហារសមត្ថកិច្ច

ក្រុមបាតុករអាមេរិកាំងដែលចេញមកប្រឆាំងនឹងកម្លាំងសម្ងាត់ជាតិ បាននាំដុតរថយន្ត វាយបំផ្លាញការិយាល័យប៉ូលិស ឡោមព័ន្ធអគារតុលាការ និងវាយប្រហារទៅលើសមត្ថកិច្ច បណ្ដាលបាតុករជាច្រើននាក់ត្រូវបានចាប់ខ្លួន និងប៉ូលិសជាច្រើនរូបត្រូវរងរបួស ខណៈមានមនុស្សមួយចំនួនបានបាត់បង់ជីវិតនៅក្នុងបាតុកម្មហិង្សាជាច្រើនកាលពីចុងសប្ដាហ៍កកន្លងទៅ។

បាតុកម្មប្រឆាំងនឹងវត្តមានរបស់កងកម្លាំងប៉ូលិសនៅទីក្រុង Austin រដ្ឋ Texas កាលពីយប់ថ្ងៃទី25កក្កដា បានប្រែក្លាយទៅជាសោកនាដកម្មនៅពេលដែលមានមនុស្សម្នាក់បើករថយន្តសម្រុកចូលទៅក្នុងហ្វូងមនុស្ស និងបានបាញ់សម្លាប់បាតុករម្នាក់ដែលមានប្រដាប់អាវុធ។ នៅក្នុងវីដេអូដែលបានផ្សាយផ្ទាល់លើ Facebook គេឃើញមានរថយន្តមួយគ្រឿងបានស៊ីផ្លេជាសញ្ញា ខណៈមានសំឡេងកាំភ្លើងផ្ទុះឡើង នាំឱ្យក្រុមបាតុករចាប់ផ្ដើមនាំគ្នាស្រែក និងរត់ខ្ចាត់ខ្ចាយ។

ក្រុមប៉ូលិសបានឱ្យដឹងថា អ្នកបើកបររថយន្តម្នាក់នោះត្រូវបានចាប់ខ្លួនដើម្បីស៊ើបអង្កេតលើបញ្ហានេះ។ ក្រុមសមត្ថកិច្ចមិនទាន់កំណាត់បានអត្តសញ្ញាណរបស់បាតុករម្នាក់ដែលបានបាត់បង់ជីវិតនេះនៅឡើយ ប៉ុន្តែម្ដាយរបស់បុរសជាបាតុករនេះបានឱ្យដឹងថា កូនរបស់គាត់ឈ្មោះ Garrett Foster។

នៅតំបន់ជាយក្រុង Aurora ក្នុងរដ្ឋ Colorado បាតុករម្នាក់បានបាញ់សម្លាប់មនុស្សម្នាក់ និងបណ្ដាលឱ្យមនុស្សម្នាក់ផ្សេងទៀតរងរបួស។ ប៉ូលិសមិនបានបង្ហើបឱ្យដឹងលម្អិតអំពីហេតុការណ៍នេះទេ។ ក្រុមបាតុករនេះក៏បានបង្កការខូចខាតច្រើនដល់ទីក្រុង Aurora ផងដែរ។

នៅឯទីក្រុង Seattle កងកម្លាំងប៉ូលិសត្រូវបង្ខំចិត្តដកថយកាលពីព្រឹកថ្ងៃទី26កក្កដា បន្ទាប់ពីមានបាតុកម្មធំជាច្រើននៅក្នុងទីប្រជុំជន Capitol Hill។ បាតុករមួយចំនួនបានរក្សាវត្តមាននៅទីនោះ ប៉ុន្តែភាគច្រើនបានត្រលប់ទៅផ្ទះរៀងៗខ្លួន។

នៅក្នុងសន្និសីទសារព័ត៌មានកាលពីវេលាទៀបភ្លឺ ស្នងការប៉ូលិសក្រុង Seattle លោកស្រី Carmen Best បានអំពាវនាវឱ្យក្រុមបាតុកររក្សាភាពអហិង្សា ក្រោយពីពួកគេបានគប់ដុំថ្ម ដប បាញ់កាំជ្រួចពណ៌ ព្រមទាំងបានបាញ់ប្រហារទៅរកក្រុមប៉ូលិស។ ក្នុងហេតុការណ៍នេះ សមត្ថកិច្ចបានចាប់ខ្លួនមនុស្សយ៉ាងតិច45នាក់ ខណៈភាគីខាងប៉ូលិសមានមន្ត្រី21នាក់បានរងរបួស។

ចំណែកក្នុងទីក្រុង Portland នៃរដ្ឋ Oregon បាតុកររាប់ពាន់នាក់បានប្រមូលផ្ដុំគ្នាកាលពីយប់ថ្ងៃទី25កក្កដា ដើម្បីប្រឆាំងនឹងការប្រើហិង្សារបស់ប៉ូលិស និងវត្តមានរបស់កងកម្លាំងសម្ងាត់ដែលប្រធានាធិបតី Trump បានដាក់ពង្រាយនៅក្នុងទីក្រុងនេះ។ បាតុករជាច្រើនបាននាំគ្នាបំបែករបងជុំវិញតុលារការក្រុង ជាកន្លែងដែលកងកម្លាំងពិសេស និងកងកម្លាំងសម្ងាត់កំពុងមានមុខនៅទីនោះ។

ភាគីខាងប៉ូលិសបានប្រកាសថា នេះគឺជាកុបកម្ម និងបានស្នើឱ្យពួកគេចាកចេញពីតំបន់ជុំវិញតុលារការចាប់ពីវេលាទៀបភ្លឺក្នុងថ្ងៃទី26កក្កដា មិនដូច្នោះទេ នឹងត្រូវចាប់ខ្លួន។ ប្រហែល20នាទីក្រោយ កម្លាំងសម្ងាត់ និងប៉ូលិសបានប្រើផ្សែងបង្ហូរទឹកភ្នែក ដើម្បីបំបែកហ្វូងបាតុករ ក៏ប៉ុន្តែបាតុករនៅតែបង្ហាញវត្តមានក្រោយម៉ោង2និង30នាទី។ ការចាប់ខ្លួនជាច្រើនករណីត្រូវបានធ្វើឡើង ប៉ុន្តែមិនទាន់ដឹងថា បាតុករប៉ុន្មាននាក់ត្រូវចាប់ខ្លួននៅឡើយ។

ហ្វូងបាតុករនៅក្នុងទីក្រុង Oakland រដ្ឋ California បានដុតអគារតុលាការ កម្ទេចការិយាល័យប៉ូលិស វាយបំបែកទ្វារ គូររូបភាព graffiti និងបាញ់ភ្លើងឡាសែរសំដៅរកក្រុមប៉ូលិស ក្រោយពីបាតុកម្មអហិង្សាកាលពីថ្ងៃទី25កក្កដាបានក្លាយជាកុបកម្ម។

ចំណែកឯទីក្រុង Richmond នៃរដ្ឋ Virginia វិញ រថយន្តដឹកទំនិញជាច្រើនគ្រឿងត្រូវបានដុតបំផ្លាញ ខណៈក្រុមបាតុកររាប់រយនាក់ និងកងកម្លាំងប៉ូលិសបានប្រឈមមុខដាក់គ្នាកាលពីថ្ងៃទី25កក្កដា។ បាតុករយ៉ាងតិច6នាក់ត្រូវបានចាប់ខ្លួន និងត្រូវជាប់ចោទពីបទប្រមូលផ្ដុំគ្នាដោយខុសច្បាប់។

នៅទីក្រុង Baltimore ក្នុងរដ្ឋ Maryland បាតុកររាប់រយនាក់បានបាញ់ថ្នាំពណ៌ទៅលើអគាររបស់ការិយាល័យប៉ូលិសដើម្បីជាការប្រឆាំងតវ៉ា។

សូមបញ្ជាក់ថា បាតុកម្មនានានៅសហរដ្ឋអាមេរិក ត្រូវបានបង្កើតឡើងក្រោយពីការស្លាប់របស់បុរសជនជាតិអាមេរិកាំងស្បែកខ្មៅម្នាក់ឈ្មោះ George Floyd កាលពីថ្ងៃទី25ឧសភា។ បាតុកម្មត្រូវបានធ្វើឡើងក្នុងបំណងប្រឆាំងនឹងការរើសអើងពូជសាសន៍ និងការប្រើហិង្សារបស់កម្លាំងប៉ូលិស។ George Floyd បានបាត់បង់ជីវិតបន្ទាប់ពីប៉ូលិសស្បែកសម្នាក់បានយកជង្គង់សង្កត់កក្នុងរយៈពេលជិត9នាទី បើទោះជាបុរសនេះបានស្រែកអង្វរករព្រោះតែមិនអាចដកដង្ហើមបានយ៉ាងណាក៏ដោយ៕

ប្រភព៖ Politico

July 27, 2020

មាសពិភពលោកឡើងថ្លៃជាង1,900ដុល្លារជាលើកដំបូងក្រោយរយៈពេល9ឆ្នាំ

ភាពតានតឹងរវាងអាមេរិកាំងនិងចិន បានរុញតម្លៃមាសឱ្យឡើងថ្លៃដល់1,905ដុល្លារក្នុង1អោន ដែលនេះជាតម្លៃខ្ពស់បំផុតរាប់ចាប់ពីឆ្នាំ2011។

បញ្ចប់ការជួញដូរក្នុងថ្ងៃទី24កក្កដា តម្លៃមាសលក់ប្រគល់ដល់ដៃបានឡើងថ្លៃបន្ថែម14ដុល្លារ ពោលគឺមានតម្លៃ1,901ដុល្លារក្នុង1អោន។ នេះគឺជាលើកដំបូងហើយដែលមាសឡើងថ្លៃដល់កម្រិតនេះ រាប់ចាប់ពីឆ្នាំ2011។ ក្នុងការជួញដូរ មានពេលខ្លះមាសបានឡើងថ្លៃដល់1,905ដុល្លារ ខ្ពស់បំផុតចាប់តាំងពីខែកញ្ញា ឆ្នាំ2011។

នៅក្នុងសប្ដាហ៍នេះ មាសបានឡើងថ្លៃបន្ថែម5% ខ្ពស់បំផុតរាប់ចាប់ពីខែមីនា2020។ តម្លៃមាសអនគតកាលពីម្សិលមិញក៏បានហក់ឡើងដល់1,900ដុល្លារផងដែរក្នុង1អោន។

មាសគឺជាទ្រព្យដែលពេញនិយមបំផុតនៅក្នុងកាលៈទេសៈដែលសេដ្ឋកិច្ច និងសង្គមប្រឈមមុខនឹងបញ្ហាអស្ថិរភាព។ តម្លៃមាសឡើងថ្លៃត្រូវបានគេមើលឃើញថា បណ្ដាលមកពីស្ថានការណ៍តានតឹងរវាងចិននិងអាមេរិកាំងដែលកំពុងតែកើនឡើងខ្លាំង ក្នុងគ្រាដែលសេដ្ឋកិច្ចពិភពលោកជួបបញ្ហាវិបត្តិដោយសារ COVID-19។

កាលពីថ្ងៃទី21កក្កដា សហរដ្ឋអាមេរិកបានបញ្ជាឱ្យបិទទ្វារស្ថានអគ្គកុងស៊ុលចិននៅទីក្រុង Houston ដោយទុកពេលឱ្យ72ម៉ោងដើម្បីចាកចេញ ក្រោមហេតុផលថា “ដើម្បីការពារកម្មសិទ្ធិបញ្ញា និងព័ត៌មានឯកជនរបស់ពលរដ្ឋអាមេរិកាំង”។

កាលពីថ្ងៃទី24កន្លងទៅ ក្រុមមន្ត្រីចិនក៏បានបញ្ជាឱ្យបិទទ្វារស្ថានអគ្គកុងស៊ុលអាមេរិកាំងនៅទីក្រុង Chengdu ក្នុងខេត្ត Sichuan ដើម្បីសងសឹកនឹងទង្វើរបស់សហរដ្ឋអាមេរិក។

ប្រការទាំងនេះហើយ នាំឱ្យពិភពលោកមានការព្រួយបារម្ភកាន់តែខ្លាំងអំពីអស្ថិរភាពសង្គម និងសេដ្ឋកិច្ច បណ្ដាលឱ្យអ្នកវិនិយោគមានការរារែកក្នុងការបណ្ដាក់ទុនទៅក្នុងទ្រព្យផ្សេងៗ លើកលែងតែមាស៕

ប្រភព៖ Reuters

July 25, 2020

ស្ថានអគ្គកុងស៊ុលចិននៅអាមេរិក ត្រូវបានមនុស្សមួយក្រុមសម្រុកចូលកាន់កាប់

បុរសមួយក្រុមដែលអាចជាសមត្ថកិច្ចរបស់សហរដ្ឋអាមេរិក បានទម្លុះទ្វារក្រោយរបស់ស្ថានអគ្គកុងស៊ុលចិននៅទីក្រុង Houston បន្ទាប់ពីអគារនេះបានបិទទ្វារកាលពីថ្ងៃទី24កក្កដាកន្លងទៅ។

ក្រុមបុរសនេះបានកិបសោទ្វារផ្នែកខាងមុខរបស់អគារស្ថានអគ្គកុងស៊ុលចិននៅទីក្រុង Houston ក្នុងរដ្ឋ Texas សហរដ្ឋអាមេរិក ក្រោយពីស្ថាប័នការទូតនេះបានបិទទ្វារកាលពីវេលាម៉ោង16ល្ងាចនៃថ្ងៃទី24កក្កដា (ម៉ោង4ព្រឹកនៃថ្ងៃទី25កក្កដានៅកម្ពុជា)។ បន្ទាប់មកទៀត ក្រុមមនុស្សនេះក៏បានបំផ្លាញទ្វារខាងក្រោយរបស់អគារ និងនាំគ្នាចូលទៅខាងក្នុង។ ពួកគេមិនបានឆ្លើយតប់អ្វីនោះទេ នៅពេលក្រុមយកព័ត៌មាននៅកន្លែងកើតហេតុ បានសួររកអត្តសញ្ញាណ។

នៅពេលក្រុមបុរសនោះចូលទៅខាងក្នុង គេឃើញមានមនុស្ស2នាក់ដែលស្លៀកពាក់ឯកសណ្ឋានជាបុគ្គលិកនៃនាយកដ្ឋានសន្តិសុខការបរទេសសហរដ្ឋអាមេរិក ក៏បានបង្ហាញខ្លួន ឈរយាមនៅខាងក្រៅទ្វារនៃអគារស្ថានអគ្គកុងស៊ុលចិន។ ក្រុមបុគ្គលិកនេះក៏មិនបានឆ្លើយតបនឹងសំណួររបស់ក្រុមអ្នកយកព័ត៌មាននោះដែរ។

ទាក់ទងនឹងករណីនេះ ស្ថានទូតចិននៅទីក្រុងវ៉ាស៊ីងតោន និងក្រសួងការបរទេសសហរដ្ឋអាមេរិក មិនទាន់បញ្ចេញប្រតិកម្មអ្វីនៅឡើយ។

សាក្សីម្នាក់បានប្រាប់ឱ្យដឹងថា បុគ្គលិករបស់ស្ថានអគ្គកុងស៊ុលចិន បានឡើងរថយន្តចាកចេញពីអគារនេះកាលពីវេលាម៉ោងប្រមាណជា16 នៅមុនពេលទ្វារក្រោយត្រូវបានគេបំផ្លាញ។

សូមរំឭកថា កាលពីថ្ងៃទី21កក្កដា សហរដ្ឋអាមេរិកបានបញ្ជាឱ្យបិទទ្វារស្ថានអគ្គកុងស៊ុលចិននៅទីក្រុង Houston ដោយទុកពេលឱ្យ72ម៉ោងដើម្បីចាកចេញ ក្រោមហេតុផលថា “ដើម្បីការពារកម្មសិទ្ធិបញ្ញា និងព័ត៌មានឯកជនរបស់ពលរដ្ឋអាមេរិកាំង”។

កាលពីថ្ងៃទី24កន្លងទៅ ក្រុមមន្ត្រីចិនក៏បានបញ្ជាឱ្យបិទទ្វារស្ថានអគ្គកុងស៊ុលអាមេរិកាំងនៅទីក្រុង Chengdu ក្នុងខេត្ត Sichuan ដើម្បីសងសឹកនឹងទង្វើរបស់សហរដ្ឋអាមេរិក។

ភាពតានតឹងរវាងចិននិងអាមេរិកាំងបានកើនឡើងជាបន្តបន្ទាប់ក្នុងរយៈពេលច្រើនឆ្នាំមកនេះ ទាក់ទិននឹងរឿងរ៉ាវជាច្រើន តាំងពីបញ្ហា COVID-19 បញ្ហាហុងកុង បញ្ហា Xinjiang សមុទ្រចិនខាងត្បូង និងតៃវ៉ាន់ជាដើម។ល។

July 25, 2020

រឿងរ៉ាវមួយចំនួនតូច ស្ដីអំពី “គ្រួសារត្រកូលចិន” នានា ដែលកំពុងគ្រប់គ្រងសេដ្ឋកិច្ចនៅតំបន់អាស៊ីអាគ្នេយ៍

បើទោះជាមានចំនួនមិនដល់10% ក្នុងចំណោមប្រជាជនប្រមាណជា650លាននាក់នៅតំបន់អាស៊ីអាគ្នេយ៍ ប៉ុន្តែគ្រួសារដើមកំណើតចិនជាច្រើនដែលនៅពីក្រោយក្រុមហ៊ុនយក្សនានា កំពុងតែគ្រប់គ្រងវិស័យសេដ្ឋកិច្ចជាច្រើននៅក្នុងតំបន់ដែលមានទំហំសេដ្ឋកិច្ចគិតជាទឹកប្រាក់ឡើងដល់3លានលានដុល្លារអាមេរិកនេះ។

ឆ្នាំ1919 Chia Ek Chor បានមករស់នៅក្នុងទីក្រុងបាងកកប្រទេសថៃ និងបានបើកហាងតូចមួយដើម្បីលក់គ្រាប់ពូជដែលនាំចូលពីស្រុកកំណើតនៅឯ Guangdong ប្រទេសចិន។ ក្រោយរយៈពេល2ជំនាន់ ក្រុមហ៊ុនរបស់ Chia Ek Chor ដែលមានឈ្មោះថា Charoen Pokphand (CP) Group បានក្លាយជាក្រុមហ៊ុនខ្នាតយក្សមួយនៅប្រទេសថៃ ដោយមានលក់ទំនិញស្ទើរគ្រប់ប្រភេទតាំងពីសាច់មាន់ សាច់ជ្រូក រហូតដល់រថយន្ត និងទូរស័ព្ទ។ ស្ថាបនិករបស់ក្រុមហ៊ុន ដែលបានទទួលមរណភាពកាលពីឆ្នាំ1983 បានប្ដូរត្រកូលទៅជាភាសាថៃ គឺ Chearavanont។ ប៉ុន្តែក្នុងចិត្តលោកនៅតែបាញ់ឆ្ពោះទៅស្រុកកំណើតរបស់ខ្លួន។ ឈ្មោះកូនប្រុសចំនួន4នាក់របស់លោក គឺ Zhengmin, Daimin, Zhongmin និង Guomin នៅពេលបកប្រែជាភាសាចិនកុកងឺ អក្សរដំបូងក្នុងឈ្មោះរបស់ពួកគេ សុទ្ធសឹងតែមានន័យថា “ចិនមហាអស្ចារ្យ និងរុងរឿង”។

ទំនាក់ទំនងស្អិតល្មួតរវាងគ្រួសារត្រកូល Chearavanont ជាមួយនឹងស្រុកចិន មិនត្រឹមតែជាមនោសញ្ចេតនានោះទេ ប៉ុន្តែគឺមានទាក់ទិននឹងសេដ្ឋកិច្ចដ៏មហិមាផងដែរ។ 2/5 ក្នុងចំណោមប្រាក់ចំណូល68ពាន់លានដុល្លារក្នុងមួយឆ្នាំៗរបស់ក្រុមហ៊ុន CP គឺបានមកពីសាខារាប់រយនៅប្រទេសចិន រួមមានបណ្ដារោងចក្រផលិតចំណីសត្វ ផ្សារទំនើប និងមុខជំនួញផ្សេងៗទៀត។ CP ក៏កាន់កាប់ភាគហ៊ុនមួយចំនួនធំនៅក្នុងក្រុមហ៊ុនធានារ៉ាប់រង Ping An របស់ប្រទេសចិនទៀតផង។ ក្រុមហ៊ុន CP ក៏ជាដៃគូជាទីចូលចិត្តរបស់បណ្ដាក្រុមហ៊ុនវិនិយោគចិននៅប្រទេសថៃ ក្នុងនោះមានដូចជា SAIC ដែលជាក្រុមហ៊ុនរថយន្តមួយដែលបានសហការជាមួយ CP ដើម្បីផលិតរថយន្តកីឡា និងរថយន្តប្រភេទ pickup។

អតីតកាលនិងបច្ចុប្បន្នកាលរបស់គ្រួសារត្រកូល Chearavanonts បាននិងកំពុងស្ដែងឱ្យឃើញអំពីរឿងរ៉ាវជាច្រើននៃបណ្ដាគ្រួសារដើមកំណើតចិនដែលមានទ្រព្យហូរហៀរផ្សេងទៀត ដែលកំពុង “ពើងទ្រូង” នៅគ្រប់ទីកន្លែងក្នុងតំបន់អាស៊ីអាគ្នេយ៍។ បើទោះជាមានចំនួនមិនដល់10% ក្នុងចំណោមប្រជាជនសរុបប្រមាណជា650លាននាក់នៅតំបន់នេះ ប៉ុន្តែបណ្ដាគ្រួសារត្រកូលចិនដែលឈរពីក្រោយក្រុមហ៊ុនធំៗជាច្រើន កំពុងតែគ្រប់គ្រងវិស័យសេដ្ឋកិច្ចជាច្រើនផ្នែកនៅក្នុងតំបន់ដែលមានទំហំសេដ្ឋកិច្ច 3លានលានដុល្លារអាមេរិកនេះ។

គ្រួសារត្រកូលចិននៅតំបន់អាស៊ីអាគ្នេយ៍ រកស៊ីមានបានក៏ដោយសារមានទំនាក់ទំនងជាមួយប្រទេសចិន ចំណែកគ្រួសារត្រកូលចិននៅប្រទេសចិនរកស៊ីមានបានក៏ដោយសារមានទំនាក់ទំនងជាមួយបណ្ដាជនជាតិ ឬប្រទេសជាច្រើននៅអាស៊ីអាគ្នេយ៍។ George Yeo ដែលជាអតីតរដ្ឋមន្ត្រីការបរទេសនៃប្រទេសសឹង្ហបុរីយល់ថា “ចិនបីបាច់ពួកគេ ហើយពួកគេក៏បីបាច់ចិន”។

លោក George Yeo អតីតរដ្ឋមន្ត្រីការបរទេសសឹង្ហបុរី

យោងតាមការវិភាគរបស់ The Economist ដោយយោងទៅលើទិន្នន័យពីទស្សនាវដ្ដី Forbes បានឱ្យដឹងថា កាលពីឆ្នាំមុនមានជាង 3/4 ក្នុងចំណោមទ្រព្យ 369ពាន់លានដុល្លាររបស់បណ្ដាសេដ្ឋីនៅតំបន់អាស៊ីអាគ្នេយ៍ គឺគ្រប់គ្រងដោយក្រុម huaren (huaren គឺសំដៅទៅលើពលរដ្ឋដែលមានដើមកំណើតចិន តែចូលសញ្ជាតិប្រទេសដទៃ)។ ក្រុមនេះ (huaren) ប្រមូលផ្ដុំគ្នាច្រើនជាងគេគឺនៅប្រទេសសឹង្ហបុរី ប៉ុន្តែពួកគេក៏មានវត្តមានជាច្រើននៅក្នុងប្រទេសផ្សេងៗនៃតំបន់អាស៊ីអាគ្នេយ៍ផងដែរ មានដូចជាឥណ្ឌូនេស៊ី ហ្វីលីពីន វៀតណាម។ល។

នៅម៉ាឡេស៊ី មហាសេដ្ឋី Robert Kuok កំពុងគ្រប់គ្រងវិស័យជាច្រើន តាំងពីស្ករស រហូតដល់បណ្ដាញសណ្ឋាគារ Shangri-La។ នៅឥណ្ឌូនេស៊ីវិញ ក្រុមហ៊ុន Lippo Group របស់គ្រួសារត្រកូល Riady កំពុងរកស៊ីយ៉ាងគគ្រឹកគគ្រេងក្នុងវិស័យធនាគារ អចលនទ្រព្យ និងសុខាភិបាល។ កាលពីឆ្នាំទៅ ស្ថិតិមួយបានបង្ហាញថា ក្នុងចំណោមមហាសេដ្ឋីហ្វីលីពីនចំនួន17នាក់ គឺមាន15នាក់ហើយដែលមានដើមកំណើតចិន។ ចំណែក SM Group របស់ហ្វីលីពីនដែលស្ថិតក្រោមការចាត់ចែងរបស់គ្រួសារត្រកូល Sy ក៏មានមជ្ឈមណ្ឌលពាណិជ្ជកម្មលំដាប់ខ្ពស់នៅពាសពេញទឹកដីចិន។

ប្រទេសមីយ៉ានម៉ារមិនទាន់មានមហាសេដ្ឋីដើមកំណើតចិន ប៉ុន្តែមានអ្នកជំនួញកំពូលៗជាច្រើនដែលមានដើមកំណើតចិន មានដូចជា Serge Pun (ម្ចាស់ក្រុមហ៊ុនអចលនទ្រព្យនិងធនាគារ Yoma) ឬ Aik Htun (ម្ចាស់ក្រុមហ៊ុន Shwe Taung ដែលរកស៊ីខាងសំណង់ហេដ្ឋារចនាសម្ព័ន្ធ និងអចលនទ្រព្យផ្សេងទៀត) ជាដើម។ល។

ចំណេញទាំងសងខាង

អ្នកជំនួញដើមកំណើតចិនទាំងនេះ បានធ្វើឱ្យអាស៊ីអាគ្នេយ៍យកឈ្នះសហភាពអឺរ៉ុបក្នុងការក្លាយជាដៃគូពាណិជ្ជកម្មធំជាងគេរបស់ប្រទេសចិននៅក្នុងឆ្នាំនេះ។ សេដ្ឋកិច្ចពិភពលោកកំពុងធ្លាក់ចុះ និងឥរិយាបថរារែកនៅចំពោះមុខប្រទេសចិនរបស់ក្រុមប្រទេសលោកខាងលិច ដែលកើតឡើងដោយសារបញ្ហា COVID-19 បញ្ហានយោបាយ និងបញ្ហាសង្គ្រាមពាណិជ្ជកម្មជាដើមជាដើម កំពុងផ្ដល់ឱកាសល្អកាន់តែច្រើនដល់ក្រុម huaren និងក្រុមជនជាតិចិននៅប្រទេសចិន ក្នុងការផ្សារភ្ជាប់ទំនាក់ទំនងខ្លាំងជាងមុន។

ក៏ប៉ុន្តែ ប្រការខាងលើនេះមិនងាយនឹងដំណើរការដោយរលូតនោះឡើយ។ ក្ដីស្រមៃក្នុងការកែប្រែស្ថានការណ៍ឱ្យវិលទៅរកភាពអស្ចារ្យនៃប្រទេសចិនរបស់លោក Xi Jinping គឺទាមទារឱ្យមានភក្ដីភាពច្រើនជាងបច្ចុប្បន្ន ខណៈដែលស្រុកកំណើតទីពីររបស់ក្រុម huaren កាន់តែសង្ស័យចំពោះមហាអំណាចមួយនេះ។ ដើម្បីធ្វើឱ្យមានតុល្យភាពទាំងសងខាង ក្រុម huaren ទាំងនេះ ត្រូវតែប្រើប្រាស់ជំនាញផ្នែកនយោបាយរបស់ខ្លួនឱ្យអស់ពីសមត្ថភាព។

ពលរដ្ឋចិនដំបូងដែលបានមកកាន់អាស៊ីអាគ្នេយ៍តាំងពីសតវត្សរ៍ទី15 ប៉ុន្តែមានក្រុមមនុស្សជាច្រើននៅក្នុងចំណោមក្រុម huaren កំពូលៗនាបច្ចុប្បន្ន បានមកកាន់តំបន់នេះដើម្បីគេចពីស្ថានភាពក្រីក្រ និងអំពើហិង្សាកាលពីដំណាក់ដំបូងៗនៃសតវត្សរ៍ទី19។

ភាគច្រើននៃពួកគេសុទ្ធសឹងតែបានប្ដូរត្រកូល។ ចំណែកភាពមានបានរបស់ពួកគេគឺកើតឡើងដោយសារការធ្វើជំនួញ ហើយក្រោយមក មានករណីជាច្រើនបានប្រើប្រាស់ទំនាក់ទំនងល្អជាមួយអ្នកនយោបាយដើម្បី “ងើបឡើង” យ៉ាងឆាប់រហ័ស។ ឧទាហរណ៍ដូចជា Liam Sioe Liong ដែលជាម្ចាស់ក្រុមហ៊ុន Salim Group ជាដើម បានប្រើប្រាស់ទំនាក់ទំនងជិតស្និទ្ធជាមួយអតីតប្រធានាធិបតីឥណ្ឌូនេស៊ី Suharto ហើយក៏ទទួលបាន “មូលដ្ឋាន” ផ្ដាច់មុខនៅក្នុងវិស័យជាច្រើននៃប្រទេសនេះ។

នៅពាសពេញទឹកដីអាស៊ីអាគ្នេយ៍ ទំនាក់ទំនងដូចខាងលើនេះ បានជួយឱ្យមហាសេដ្ឋីដើមកំណើតចិនជាច្រើន កសាងបានគ្រឹះយ៉ាងរឹងមាំចាប់តាំងពីយុគសម័យសេដ្ឋកិច្ចរីកចម្រើនខ្លាំងនៅអាស៊ីក្នុងបណ្ដាទសវត្សរ៍ឆ្នាំ1990 និងក្លាយជាក្រុមហ៊ុនយក្សនានារហូតដល់បច្ចុប្បន្ន។ ក្រុមពលរដ្ឋដែលត្រូវបានគេហៅថា huaren ទាំងនេះ កំពុងគ្រប់គ្រងវីស័យជាច្រើន រាប់ចាប់ពីកសិកម្ម រហូតដល់ហិរញ្ញវត្ថុ៕

ប្រភព៖ សារព័ត៌មានបរទេស

July 24, 2020

ចិនបញ្ជាឱ្យបិទស្ថានអគ្គកុងស៊ុលអាមេរិកាំង ដើម្បីឆ្លើយតបនឹងការបិទស្ថានអគ្គកុងស៊ុលចិននៅ Houston

មន្ត្រីរដ្ឋាភិបាលចិន បានស្នើឱ្យបិទស្ថានអគ្គកុងស៊ុលសហរដ្ឋអាមេរិកនៅ Chengdu ដែលជាទីក្រុងធំរបស់ខេត្ត Sichuan ដើម្បីឆ្លើយតបទៅនឹងការដែលសហរដ្ឋអាមេរិកបញ្ជាឱ្យបិទស្ថានអគ្គកុងស៊ុលចិននៅ Houston។

“ក្រសួងការបរទេសចិនបានប្រកាសជូនដំណឹងទៅកាន់ស្ថានទូតសហរដ្ឋអាមេរិកនៅប្រទេសចិនអំពីសេចក្ដីសម្រេចដកហូតលិខិតអនុញ្ញាតឱ្យបង្កើតនិងដំណើរការស្ថានអគ្គកុងស៊ុលអាមេរិកាំងនៅទីក្រុង Chengdu។ ក្រសួងក៏បានលើកឡើងអំពីការស្នើជាក់លាក់ផងដែរអំពីការបញ្ឈប់រាល់សកម្មភាពរបស់ស្ថានកុងស៊ុល” នេះបើតាមសេចក្ដីប្រកាសក្នុងថ្ងៃនេះរបស់ក្រសួងការបរទេសចិន។

ក្រសួងការបរទេសចិនបានឱ្យដឹងថា នេះគឺជាវិធានការឆ្លើយតបដ៏ចាំបាច់ចំពោះ “ទង្វើមិនសមហេតុផលរបស់សហរដ្ឋអាមេរិក និងសមស្របជាមួយនឹងច្បាប់អន្តរជាតិ បទដ្ឋានជាមូលដ្ឋាននានានៃទំនាក់ទំនងអន្តរជាតិ និងទម្លាប់ធម្មតានៃការទូត”។

សកម្មភាពនេះរបស់ចិន ត្រូវបានធ្វើឡើងក្រោយពីសហរដ្ឋអាមេរិក កាលពីថ្ងៃទី21កក្កដាបានស្នើឱ្យបិទស្ថានអគ្គកុងស៊ុលចិននៅទីក្រុង Houston ដោយទុកពេលឱ្យ72ម៉ោង ក្នុងអ្វីដែលសហរដ្ឋអាមេរិកយល់ថា ដើម្បី “ការពារកម្មសិទ្ធិបញ្ហា និងព័ត៌មានឯកជនរបស់ពលរដ្ឋអាមេរិកាំង” និងបានចោទស្ថានអគ្គកុងស៊ុលចិននេះថាជា “មជ្ឈមណ្ឌលចារកម្មរបស់កងទ័ពចិន”។

ស្ថានអគ្គកុងស៊ុលសហរដ្ឋអាមេរិកនៅទីក្រុង Chengdu ប្រទេសចិន

ស្ថានអគ្គកុងស៊ុលសហរដ្ឋអាមេរិកនៅទីក្រុង Chengdu បានបើកដំណើរការតាំងពីឆ្នាំ1985 និងមានសារសំខាន់ជាយុទ្ធសាស្ត្រ ព្រោះថាទទួលខុសត្រូវរាល់បេសកកម្មផ្នែកកុងស៊ុលនៅទូទាំងតំបន់ភាគនិរតីនៃប្រទេសចិន ដែលរួមមានខេត្ត Sichuan, Yunnan, Guizhou, Tibet និង Chongqing។ នេះក៏ជាមូលដ្ឋាននៃការបរទេសដែលមានសារសំខាន់របស់សហរដ្ឋអាមេរិក ដោយសារវាទាក់ទិននឹងតំបន់ Tibet។ ស្ថានអគ្គកុងស៊ុលសហរដ្ឋអាមេរិកនៅទីក្រុង Chengdu នៃប្រទេសចិន បច្ចុប្បន្នមានបុគ្គលិកប្រមាណជា200នាក់ ក្នុងនោះមានបុគ្គលិកជាជនជាតិចិនចំនួន150នាក់ផងដែរ។

ទំនាក់ទំនងរវាងចិននិងសហរដ្ឋអាមេរិកកំពុងតែស្ថិតក្នុងស្ថានភាពអាក្រក់បំផុតក្នុងអំឡុងច្រើនឆ្នាំមកនេះ។ ភាពតានតឹងបានកើតឡើងដោយសារបញ្ហាជាច្រើន មានដូចជា បញ្ហា COVID-19 បញ្ហាហុងកុង បញ្ហាតំបន់ Xinjiang និងសង្គ្រាមពាណិជ្ជកម្មជាដើម៕

ប្រភព៖ AFP/SCMP

July 24, 2020

អ្នកមានបំផុតនៅអាស៊ី បានជួយឱ្យទ្វីបនេះមានឈ្មោះក្នុង top 5 នៃអ្នកមានជាងគេក្នុងពិភពលោក

យោងតាមសារព័ត៌មាន Bloomberg មហាសេដ្ឋីឥណ្ឌា លោក Mukesh Ambani បច្ចុប្បន្នបានក្លាយជាអ្នកមានជាងគេលំដាប់ទី5ក្នុងពិភពលោក ដោយមានទ្រព្យសរុបចំនួន77.4ពាន់លានដុល្លារ ដែលនេះបានជួយឱ្យអាស៊ីបានវត្តមាននៅក្នុង top 5 អ្នកមានជាងគេជាលើកដំបូងបង្អស់ក្នុងប្រវត្តិសាស្ត្រ។

ច្រើនឆ្នាំមកនេះ ចំណាត់ថ្នាក់ក្នុង top 5 នៃអ្នកមានជាងគេបង្អស់ក្នុងពិភពលោក ត្រូវបានគ្រប់គ្រងដោយជនជាតិអាមេរិកាំង អឺរ៉ុប និងម៉ិកស៊ិក។ ប៉ុន្តែ ប្រការនេះបានផ្លាស់ប្ដូរហើយ ព្រោះថាបន្ទាប់ពីបញ្ចប់ការជួញដូរមូលបត្រកាលពីថ្ងៃទី24កក្កដា មហាសេដ្ឋីឥណ្ឌា លោក Mukesh Ambani បានលោតរំលង Steve Ballmer និងក្លាយជាអ្នកមានជាងគេលំដាប់ទី5ក្នុងពិភពលោក ជាមួយនឹងទ្រព្យសរុបចំនួន77.4ពាន់លានដុល្លារ។ នេះបើតាមស្ថិតិពី Bloomberg Billionaires Index។

នេះគឺជាកំណត់ត្រាថ្មីបំផុតសម្រាប់លោក Ambani។ ទ្រព្យសម្បត្តិរបស់លោក បានកើនជិត19ពាន់លានដុល្លារអាមេរិក រាប់ចាប់ពីដើមឆ្នាំ2020មកនេះ។

មហាសេដ្ឋី Ambani បច្ចុប្បន្នជាប្រធានក្រុមហ៊ុនពហុវិស័យ Reliance Industries។ ចំណាត់ថ្នាក់របស់លោកនៅក្នុងបញ្ជីឈ្មោះអ្នកមានជាងគេរបស់ Bloomberg បានកើនឡើងចំនួន9ថ្នាក់នៅក្នុងឆ្នាំនេះ ដោយសារតែមូលបត្ររបស់ក្រុមហ៊ុន Reliance Industries បានកើន135% ចាប់ពីក្រោយការធ្លាក់ចុះដល់បាតក្នុងខែមីនា។ បណ្ដាក្រុមហ៊ុនបុត្រសម្ព័ន្ធរបស់ Reliance ថ្មីៗនេះទទួលបានខ្ទង់វិនិយោគយ៉ាងច្រើនពីក្រុមហ៊ុនធំៗជាច្រើន មានដូចជា Facebook, Silver Lake និងក្រុមហ៊ុនប្រេង BP ជាដើម។ល។

ឥណ្ឌាគឺជាចំណុចលេចធ្លោក្នុងទីផ្សារ M&A (ការទិញដូរក្រុមហ៊ុន/Mergers and acquisitions) នៅទូទាំងសកលលោកក្នុងឆ្នាំនេះ។ សារព័ត៌មានឥណ្ឌា ET Now បានចុះផ្សាយថា ក្រុមហ៊ុន Amazon កំពុងតែចរចាជាមួយភាគីក្រុមហ៊ុន Reliance របស់លោក Ambani ដើម្បីទិញភាគហ៊ុនក្នុងផ្នែកលក់រាយរបស់ក្រុមហ៊ុននេះ។

មហាសេដ្ឋី Ambani បានឡើងដល់ top 10 នៃបញ្ជីឈ្មោះអ្នកមានបំផុតក្នុងពិភពលោកកាលពីខែមិថុនាកន្លងទៅ។ កាលពី2សប្ដាហ៍មុន ទ្រព្យរបស់លោកបានកើនឡើងលើសពីទំហំទ្រព្យរបស់មហាសេដ្ឋី Warren Buffett ហើយប៉ុន្មានថ្ងៃក្រោយមកក៏បានលោតរំលង CEO របស់ Tesla លោក Elon Musk និងសហស្ថាបនិក2រូបរបស់ Google គឺលោក Sergey Brin និងលោក Larry Page។

អ្នកមានជាងគេលំដាប់ទី1ក្នុងពិភពលោក នៅតែជាម្ចាស់ក្រុមហ៊ុន Amazon គឺលោក Jeff Bezos។ ទ្រព្យសម្បត្តិរបស់លោក ក្នុងឆ្នាំនេះបានកើន62.7ពាន់លានដុល្លារ។ ឈរលំដាប់លេខ2 គឺលោក Bill Gates (118ពាន់លានដុល្លារ) និងទី3គឺលោក Bernard Arnault (93ពាន់លានដុល្លារ) ចំណែកទី4 គឺលោក Mark Zuckerberg (88ពាន់លានដុល្លារ)។

ចំណែកនៅអាស៊ី បច្ចុប្បន្នអ្នកមានជាងគេលំដាប់ទី2គឺលោក Pony Ma ដែលជាម្ចាស់ក្រុមហ៊ុន Tencent ដោយមានទ្រព្យសរុប55.6ពាន់លានដុល្លារអាមេរិក៕

ប្រភព៖ Bloomberg

July 24, 2020

ក្រសួងសុខាភិបាលរកឃើញអ្នកផ្ទុកវីរុសCOVID-19 ចំនួន4នាក់បន្ថែមទៀតហើយសម្រាប់ព្រឹកនេះ

ក្រសួងសុខាភិបាលកម្ពុជា នាព្រឹកថ្ងៃទី24កក្កដានេះ បានប្រកាសឱ្យដឹងថា បានរកឃើញអ្នកផ្ទុកវីរុសCOVID-19 ចំនួន4ករណីបន្ថែមទៀតកាលពីថ្ងៃទី23កក្កដា។ អ្នកជំងឺទាំង4នាក់នេះត្រូវបានរកឃើញបន្ទាប់ពីបានធ្វើតេស្តរកវីរុសក្នុងពេលធ្វើចត្តាឡីស័ក។

ក្រសួងបញ្ជាក់ថា អ្នកជំងឺថ្មីទាំងនេះគឺជាកងកម្លាំងមួកខៀវកម្ពុជាដែលបានចូលរួមក្នុងបេសកកម្មរបស់អង្គការសហប្រជាជាតិ។ ករណីថ្មីនេះ រួមមាន បុរសជនជាតិខ្មែរ3នាក់ និងស្ត្រីជនជាតិខ្មែរ1នាក់។

July 24, 2020

ពិភពលោកមានអ្នកស្លាប់635,413នាក់ដោយសារCOVID-19

ពិភពលោកទាំងមូលបានរកឃើញអ្នកផ្ទុកវីរុសCOVID-19 ជាង15.6លាននាក់ និងអ្នកស្លាប់ចំនួនជាង635,000នាក់ ខណៈអ្នកជំងឺបានជាសះស្បើយមានចំនួន9,523,464នាក់។

ប្រទេសនិងដែនដីចំនួន221ក្នុងពិភពលោកត្រូវបានរាយការណ៍ថា បានរកឃើញអ្នកឆ្លងវីរុសCOVID-19 ចំនួន15,632,711នាក់ និង635,413នាក់ស្លាប់ដោយសារវីរុសនេះ ក្នុងនោះមានអ្នកជំងឺថ្មីចំនួន307,505នាក់ និងអ្នកស្លាប់ថ្មីចំនួន10,680នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ អ្នកជំងឺដែលបានជាសះស្បើយមានចំនួន9,523,464នាក់។ នេះបើតាមស្ថិតិរបស់គេហទំព័រ Worldometers។

ប្រទេសចំនួន3ដែលបានរកឃើញអ្នកជំងឺច្រើនជាងបង្អស់គឺសហរដ្ឋអាមេរិក (អ្នកជំងឺ4,169,153) ប្រទេសប្រេស៊ីល (អ្នកជំងឺ2,289,951នាក់) និងប្រទេសឥណ្ឌ (អ្នកជំងឺ1,288,130នាក់)។

ចំណែកបណ្ដាប្រទេសដែលមានអ្នកស្លាប់ដោយសារវីរុសCOVID-19 ច្រើនជាង1ម៉ឺននាក់ មាន11ប្រទេស រួមមាន សហរដ្ឋអាមេរិក (147,297នាក់) ប្រេស៊ីល (84,207នាក់) អង់គ្លេស (45,554នាក់) ម៉ិកស៊ិក (41,190នាក់) អ៊ីតាលី (អ្នកស្លាប់35,092នាក់) ឥណ្ឌា (30,645នាក់) បារាំង (អ្នកស្លាប់30,182នាក់) អេស្ប៉ាញ (28,429នាក់) ប៉េរូ (17,654នាក់) អ៊ីរ៉ង់ (15,074នាក់) រុស្ស៊ី (12,892នាក់)៕

July 24, 2020

ចិនបាញ់បង្ហោះយានអវកាសទៅកាន់ផ្កាយព្រះអង្គារដោយជោគជ័យ

ប្រទេសចិនបានបាញ់បង្ហោះដោយជោគជ័យនូវយានអវកាស Tianwen-1 ដែលមានផ្ទុកយានអវកាសមួយគ្រឿង និងរ៉ូបូតស្វ័យប្រវត្តមួយគ្រឿង ទៅកាន់ពិភពព្រះអង្គារ។

យោងតាមទីភ្នាក់ងារអវកាសចិន CNSA (China National Space Administration) យានអវកាស Tianwen-1 ត្រូវបានបញ្ជូនទៅកាន់ផ្កាយព្រះអង្គារដោយកាំជ្រួចរុញច្រាន Chang Zheng 5 (Long March 5) ចេញពីមូលដ្ឋាន Wenchang ដែលស្ថិតនៅលើកោះ Hainan កាលពីម៉ោង12និង41នាទី ថ្ងៃទី23កក្កដា។ Xinhua បានរាយការណ៍ថា មនុស្សរាប់រយនាក់បានតាមដាន និងអបអរជោគជ័យនៃការបាញ់បង្ហោះនេះ។

នេះគឺជាការហោះហើរលើកទី2ទៅកាន់ឋានព្រះអង្គារនៅក្នុងសប្ដាហ៍នេះ បន្ទាប់ពីយានគោចរជុំវិញភពក្រហម Hope របស់អារ៉ាប់រួម (UAE) បានធ្វើដំណើរពីកោះ Tanegashima របស់ជប៉ុនកាលពីថ្ងៃទី20កក្កដា។

ក្រោយការបាញ់បង្ហោះរបស់ UAE និងចិន សហរដ្ឋអាមេរិកក៏នឹងបញ្ជូនយាន Perseverance ទៅកាន់ភពព្រះអង្គារផងដែរនៅសប្ដាហ៍ក្រោយ។

នៅលើយានអវកាស Tianwen-1 របស់ចិន រួមមានយានអវកាសមួយគ្រឿងសម្រាប់ហោះលើគន្លងគោចរនៃភពព្រះអង្គារ រួមនឹងរ៉ូបូតដំណើរការដោយស្វ័យប្រវត្តមួយគ្រឿងដែលនឹងមានភារកិច្ចចុះចតនិងស្រាវជ្រាវលើដីភពក្រហម។ យានអវកាស Tianwen-1 នឹងត្រូវចំណាយពេល7ខែដើម្បីទៅដល់គោលដៅ។ បើសិនជាមិនមានបញ្ហាកើតឡើងនោះទេ យាននេះនឹងតាមរកប្រភពទឹកក្រោមដី និងភ័ស្ដុតាងបញ្ជាក់អំពីវត្តមានរបស់សភាវរស់នៅលើឋានមួយនេះ៕

ប្រភព៖ AP

July 23, 2020

ឆេះនាវាផ្ទុកយន្តហោះចម្បាំងរបស់សហរដ្ឋអាមេរិកមួយគ្រឿងទៀតហើយ!

នាវាផ្ទុកយន្តហោះចម្បាំងជំនាន់ថ្មី John F. Kennedy ត្រូវបានឆាប់ឆេះនៅពេលកំពុងសាងសង់ ប៉ុន្តែអណ្ដាតភ្លើងត្រូវបានពន្លត់ទាន់ពេល និងមិនបានបង្កគ្រោះថ្នាក់ដល់ជីវិត ឬការខូចខាតធ្ងន់ធ្ងរនោះទេ។

ក្រុមបុគ្គលិកនៅក្នុងរោងសាងសង់នាវា Newport News ក្នុងរដ្ឋ Virginia នៃសហរដ្ឋអាមេរិកកាលពីព្រឹកថ្ងៃទី20កក្កដា ទទួលបានព័ត៌មានអំពីករណីឆាប់ឆេះនៅលើនាវាផ្ទុកយន្តហោះចម្បាំង John F. Kennedy ដែលកំពុងស្ថិតនៅក្នុងដំណាក់កាលសាងសង់។ នេះបើតាម Duane Bourne អ្នកនាំពាក្យរបស់រោងសាងសង់នាវា ដែលបានឱ្យដឹងកាលពីថ្ងៃទី22កក្កដា។

កងកម្លាំងសង្គ្រោះបន្ទាន់ត្រូវបានបញ្ជូនទៅកាន់កន្លែងកើតហេតុដើម្បីពន្លត់អគ្គិភ័យ ខណៈបុគ្គលិកលើនាវាក៏ត្រូវបានជម្លៀសចេញជាបន្ទាន់ដោយសារមានផ្សែងច្រើនពេក។ ក្នុងហេតុការណ៍នេះមិនមានអ្នកណាម្នាក់រងគ្រោះថ្នាក់ដល់ជីវិតនោះទេ ប៉ុន្តែនាវានាបានរងការខូចខាតមួយចំនួននៅត្រង់ចំណុចមានភ្លើងឆេះ។

លោក Bourne បានឱ្យដឹងថា “សកម្មភាពសាងសង់ផ្សេងៗត្រូវបានពន្យារពេលដើម្បីស្រាវជ្រាវរកមូលហេតុ និងដើម្បីត្រួតពិនិត្យលើស្ថានភាពសន្តិសុខ សុវត្ថិភាព និងការត្រៀមវិធានការទប់ស្កាត់អគ្គិភ័យ។ កងទ័ពសហរដ្ឋអាមេរិក និងភាគីរោងសាងសង់នាវា Newport News នឹងដំណើរការសកម្មភាពសាងសង់នាវានេះឡើងវិញ ក្រោយពីការស្រាវជ្រាវបានបញ្ចប់ និងវិធានការកែលម្អត្រូវបានអនុវត្ត”។

ករណីអគ្គិភ័យនៅលើនាវាចម្បាំង USS Bonhomme Richard កាលពីថ្ងៃទី12កក្កដា

នេះគឺជាករណីឆាប់ឆេះនាវាចម្បាំងនៅក្នុងរោងចក្រទី3របស់កងទ័ពសហរដ្ឋអាមេរិកនៅក្នុងរយៈពេលតែ2សប្ដាហ៍ប៉ុណ្ណោះ ក្រោយពីមានករណីអគ្គិភ័យនៅលើនាវាចម្បាំង USS Bonhomme Richard កាលពីថ្ងៃទី12កក្កដា និងករណីឆេះមួយទៀតនៅលើនាវា USS Kearsarge កាលពីថ្ងៃទី17កក្កដា។

John F. Kennedy គឺជានាវាទី2ក្នុងប្រភេទ Ford ដែលជានាវាផ្ទុកយន្តហោះខ្នាតយក្សជំនាន់ថ្មីរបស់សហរដ្ឋអាមេរិក។ នាវានេះត្រូវបានចាប់ផ្ដើមសាងសង់កាលពីឆ្នាំ2015 និងបានដាក់ចូលទៅផែអណ្ដែតកាលពីចុងឆ្នាំ2019 ហើយបច្ចុប្បន្នកំពុងស្ថិតក្នុងដំណាក់កាលបំពាក់ឧបករណ៍ផ្សេង៕

ប្រភព៖ USNI

July 23, 2020

Author: សឿន សំណាង