សឿន សំណាង - La Reine Media

តួលេខនៃវីរុស Covid-19 នៅទូទាំងសកលលោក និងអាស៊ីអាគ្នេយ៍ គិតត្រឹមព្រឹកថ្ងៃទី 16មីនា 2021

ពិភពលោកទាំងមូល បានរកឃើញអ្នកវិជ្ជមាននឹង Covid-19 សរុបចំនួន 120,745,285 នាក់ ក្នុងនោះមានអ្នកស្លាប់ចំនួន 2,671,178 នាក់, ជាសះស្បើយចំនួន 97,393,278 នាក់ និងកំពុងព្យាបាលចំនួន 20,680,829 នាក់ ខណៈជាង 88,000 នាក់ អាចបាត់បង់ជីវិត ដោយសារមានអាការធ្ងន់ធ្ងរ។

សហរដ្ឋអាមេរិក (វិជ្ជមានសរុប 30,135,055 នាក់, ស្លាប់សរុប 547,963 នាក់), ប្រេស៊ីល (វិជ្ជមានសរុប 11,519,609 នាក់, ស្លាប់សរុប 279,286 នាក់) និងឥណ្ឌា (វិជ្ជមានសរុប 11,409,524 នាក់, ស្លាប់សរុប 158,892 នាក់) គឺជាប្រទេសដែលរងគ្រោះដោយសារវីរុស Covid-19 ធ្ងន់ធ្ងរជាងគេបំផុតក្នុងពិភពលោក។

នៅតំបន់ ASEAN បច្ចុប្បន្ន អ្នកវិជ្ជមាននឹងវីរុសនេះ បានកើនឡើងដល់ជាង 2.610.500 នាក់ ក្នុងនោះមានករណីបានជាសះស្បើយចំនួនជាង 2.339.840 នាក់ និងអ្នកស្លាប់មានចំនួនជាង 55.980 នាក់។

ប្រទេសចំនួនបីដែលកំពុងជាសម្បុកវីរុស Covid-19 ធំជាងគេក្នុងតំបន់អាស៊ីអាគ្នេយ៍គឺ ឥណ្ឌូនេស៊ី, ហ្វីលីពីន និងម៉ាឡេស៊ី ខណៈកម្ពុជាស្ថិតក្នុងចំណាត់ថ្នាក់ទី8 ដដែល៕

ប្រភព៖ Worldometers
ដកស្រង់ និងប្រែសម្រួល៖ បុត្រា

March 16, 2021

វៀតណាមថា វ៉ាក់សាំង COVIVAC របស់ខ្លួន ទទួលបានការវាយតម្លៃខ្ពស់ពីសហរដ្ឋអាមេរិក និងឥណ្ឌា មុនការពិសោធលើមនុស្សដំណាក់កាលដំបូង

កាលពីម្សិលមិញ (15 មីនា 2021) វៀតណាមបានចាប់ផ្ដើមចាក់វ៉ាក់សាំង Covivac របស់ខ្លួនទៅឱ្យអ្នកស្ម័គ្រចិត្តចំនួន 6 នាក់ នៅក្នុងការពិសោធលើមនុស្សដំណាក់កាលដំបូង នៅឯសាកលវិទ្យាល័យវេជ្ជសាស្ត្រហាណូយ។

«នេះគឺជាប្រភេទវ៉ាក់សាំងដែលយើងខ្ញុំមានក្ដីសង្ឃឹមជាទីបំផុត ព្រោះថា វាទទួលបានការវាយតម្លៃខ្ពស់ពីឥណ្ឌា និងនៅសហរដ្ឋអាមេរិក។ ជាងនេះ លទ្ធផលនៃការត្រួតពិនិត្យនៅសាកលវិទ្យាល័យវេជ្ជសាស្ត្រ Icahn នៅ Mount Sinai ទីក្រុង New York សហរដ្ឋអាមេរិក កាលពីពេលថ្មីៗនេះ បង្ហាញថា វ៉ាក់សាំង Covivac មានប្រសិទ្ធភាពខ្ពស់ក្នុងការបង្ការវីរុសក្លាយពូជថ្មីនៅអង់គ្លេស និងនៅអាហ្វ្រិកខាងត្បូង។ល»

ខាងលើនេះគឺជាការចែករំលែកឱ្យដឹងកាលពីព្រឹកថ្ងៃទី 15 មីនា 2021 ពីសាស្ត្រាចារ្យវេជ្ជបណ្ឌិត Tran Van Thuan អនុរដ្ឋមន្ត្រីក្រសួងសុខាភិបាលវៀតណាម។

វ៉ាក់សាំង Covivac គឺជាផលិតផលសហការណ៍រវាងវិទ្យាស្ថានវ៉ាក់សាំងនិងជីវវេជ្ជសាស្ត្រ (IVAC) របស់វៀតណាម ជាមួយនឹងសាកលវិទ្យាល័យវេជ្ជសាស្ត្រ Icahn នៅ Mount Sinai ក្នុងទីក្រុង New York, សាកលវិទ្យាល័យ Texas នៅ Austin, អង្គការអាមេរិក PATH និងដៃគូផ្សេងៗមួយចំនួនទៀត។

ការសិក្សាស្រាវជ្រាវក្នុងការអភិវឌ្ឍវ៉ាក់សាំងខាងលើ ត្រូវបានតាមដានជាលក្ខណឯករាជ្យដោយ Vietstar Biomedical Research ខណៈដែលទិន្នន័យត្រូវបានគ្រប់គ្រង និងវិភាគដោយមជ្ឈមណ្ឌល BIOPHICS នៃសាកលវិទ្យាល័យ Mahidol នៃប្រទេសថៃ។

ប្រភពព័ត៌មានឱ្យដឹងថា ការពិសោធលើមនុស្សដំណាក់កាលទីមួយនេះ មានអ្នកស្ម័គ្រចិត្តចំនួន 120 នាក់ ដែលចែកចេញជា 5 ក្រុម រួមមាន 3 ក្រុមត្រូវប្រើវ៉ាក់សាំង ដែលមិនមាន adjuvant (ជាសារធាតុ មានតួនាទីដាស់ប្រព័ន្ធសរីរាង្គការពារខ្លួនរបស់មនុស្សឱ្យមានភាពរឹងមាំ ទប់ជាមួយនឹងវីរុស), 1 ក្រុមត្រូវចាក់អង្គបដិប្រាណ S កម្រិត 1mcg ដែលមានបន្ថែមសារធាតុ adjuvant និង 1 ក្រុមទៀតដែលមានអ្នកស្ម័គ្រចិត្ត 20 នាក់ នឹងត្រូវបានចាក់វ៉ាក់សាំង placebo (ទឹកអំបិលដែលបានរំងាប់មេរោគ) ដើម្បីប្រៀបធៀបជាមួយនឹងក្រុមទាំងខាងលើ។

បន្ទាប់ពីមានរបាយការណ៍លទ្ធផលនៅពាក់កណ្ដាល និងចុងដំណាក់កាលទីមួយ ដែលគ្រោងនឹងធ្វើឡើងនៅក្នុងខែកក្កដា 2021 នោះក្រុមស្រាវជ្រាវនឹងដាក់សំណើសុំការអនុម័តពីក្រសួងសុខាភិបាលដើម្បីបន្តការពិសោធលើមនុស្សដំណាក់ទីពីរ បើសិនជាវ៉ាក់សាំងសម្រេចបានដូចស្ដង់ដាសុវត្ថិភាព និងមានសមត្ថភាពទប់ស្កាត់វីរុស៕

ប្រភព៖ CB
ប្រែសម្រួល៖ បុត្រា

March 16, 2021

ករណីអតីតព្រះនាង Meghan ទទួលបានប្រាក់ 7លានដុល្លារ ដើម្បីបរិហាកេរ្ដិ៍គ្រួសារខាងប្ដី លោក Trump ថា៖ «ឃើញទេ ខ្ញុំនិយាយហើយថា នាងមិនមែនមនុស្សល្អប៉ុន្មានទេ»

អតីតប្រធានាធបិតីសហរដ្ឋអាមេរិក លោក Donald Trump បានចាត់ទុកថា ខ្លួននិយាយត្រូវ នៅពេលទាយថា អតីតព្រះនាង Meghan ដែលជាព្រះរាជនត្តារបស់មហាក្សត្រីអង់គ្លេស គឺជាមនុស្ស «មិនល្អប៉ុន្មានឡើយ»។ សារព័ត៌មាន Business Insider បានចេញផ្សាយថា ទូរទស្សន៍ CBS ត្រូវចំណាយប្រាក់យ៉ាងហោចពី 7-9 លានដុល្លារអាមេរិក ដើម្បីទទួលបានសិទ្ធិផ្ដាច់មុខក្នុងការចាក់ផ្សាយកិច្ចសម្ភាសរវាងគ្រួសារ Meghan-Harry ជាមួយនឹង មហាសេដ្ឋិនី និងជាពិធីការិនី Oprah Winfrey កាលពីថ្ងៃទី 7 មីនាកន្លងទៅ។

យោងតាម Fox News ទីប្រឹក្សាជាន់ខ្ពស់របស់អតីតប្រធានាធិបតី Donald Trump ដែលស្ថិតនឹង Jasson Miller ថ្មីៗនេះ បានចូលរួមក្នុងកម្មវិធីផ្សាយផ្ទាល់មួយ។ ក្នុងនោះ លោក Miller បានបង្ហើបឱ្យដឹងអំពីការយល់ឃើញរបស់លោក Trump ចំពោះអតីតព្រះនាង Meghan បន្ទាប់ពីនាងបានសម្ភាសជាមួយពិធីការិនី Oprah Winfrey ដែលបានធ្វើឱ្យរាជវាំងអង់គ្លេសក្ដៅក្រហាយ។

«ឃើញទេ ខ្ញុំធ្លាប់បាននិយាយហើយថា នាងនោះមិនល្អប៉ុន្មានទេ ហើយពេលនេះ គ្រប់គ្នាបានឃើញច្បាស់ហើយ» លោក Miller ដកស្រង់សម្ដីរបស់លោក Donald Trump និយាយដូច្នេះ។

ប្រការដែលគួរឱ្យចាប់អារម្មណ៍ជាងគេ នោះគឺថា លោក Trump មិនហ៊ាននិយាយចេញជាសាធារណៈអំពីការយល់ឃើញរបស់ខ្លួនចំពោះអតីតព្រះនាង Meghan ព្រោះតែខ្លាចត្រូវរងសម្ពាធដូចករណីអ្នកដឹកនាំកម្មវិធី Piers Morgan របស់ទូរទស្សន៍ប្រទេសអង់គ្លេស។

កិច្ចសម្ភាសរវាងគ្រួសារ Meghan-Harry ជាមួយនឹង មហាសេដ្ឋិនី និងជាពិធីការិនី Oprah Winfrey កាលពីថ្ងៃទី 7 មីនាកន្លងទៅ

លោក Morgan ថ្មីៗនេះ ត្រូវបានស្ថានីយទូរទស្សន៍ដកតំណែងចេញពីកម្មវិធីដ៏ល្បីឈ្មោះ “Good Morning Britain” ដោយសារតែពិធីករដ៏ល្បីឈ្មោះរូបនេះ បានរិះគន់ចំៗលើព្រះនាង Meghan ហើយក៏ត្រូវទស្សនិកជនប្រតិកម្ម។

លោក Morgan បានឱ្យដឹងថា ខ្លួនត្រូវបានបណ្ដេញពីការងារ ដោយសារមិនព្រមសុំទោស Meghan បន្ទាប់ពីកិច្ចសម្ភាសបរិហាកេរ្ដិ៍គ្រួសារខាងស្វាមី បង្កឱ្យមានផលប៉ះពាល់ដល់កិត្តិយសរាជវាំងអង់គ្លេស។

បើទោះជាមានការព្រួយបារម្ភ ប៉ុន្តែ អតីតប្រធានាធិបតីសហរដ្ឋអាមេរិក លោក Donald Trump នៅតែគាំទ្រលោក Piers Morgan ដដែល។

«ខ្ញុំនៅខាងលោក Morgan។ គាត់ជាមនុស្សពូកែ និងអស្ចារ្យ ប៉ុន្តែ ពួកគេបែរជាព្យាយាមបណ្ដេញគាត់ពីការងារព្រោះតែការរិះគន់ Meghan ទៅវិញ» ទីប្រឹក្សា Miller ថា អតីតប្រធានាធិបតី Trump ថ្លែងដូច្នេះ។

នេះមិនមែនជាលើកដំបូងនោះទេដែលលោក Trump បានរិះគន់ព្រះនាង Meghan។ អំឡុងឃោសនាបោះឆ្នោតប្រធានាធិបតី ឆ្នាំ 2016 ព្រះនាង Meghan កាលណោះគឺជាពលរដ្ឋអាមេរិកាំង បានប្រកាសថានឹងបោះឆ្នោតជូនបេក្ខភាព Hilary Clinton។ នាងឱ្យដឹងថា ខ្លួនបោះឆ្នោតនេះមិនមែនដោយសារលោកស្រី Hilary ជាស្ត្រីភេទនោះទេ តែដោយសារមិនចង់រស់នៅក្នុងស្ថានភាពដែលលោក Trump ជាអ្នកគូសវាស។

អតីតប្រធានាធិបតីសហរដ្ឋអាមេរិក លោកDonald Trump

ឆ្នាំ 2019 អតីតប្រធានាធិបតី Trump កាលណោះមានអារម្មណ៍ភ្ញាក់ផ្អើលខ្លាំងអំពីរឿងរ៉ាវខាងលើ នៅពេលត្រូវបានសារព័ត៌មាន The Sun របស់អង់គ្លេសសួរដល់បញ្ហានោះ។ «ខ្ញុំមិនបានដឹងអំពីរឿងរ៉ាវនោះ។ អាចនិយាយយ៉ាងណាទេ…ខ្ញុំមិននឹកស្មានថា នាងចិត្តអាក្រក់ដូច្នេះសោះ» លោក Trump ឆ្លើយនឹងសំណួររបស់ The Sun។

នៅក្នុងរដូវឃោសនារកសំឡេងឆ្នោតកាលពីឆ្នាំ 2020 ពេលត្រូវបានសួរអំពីគ្រួសាររបស់ Meghan លោក Trump ក៏បានទទួលស្គាល់ថា ខ្លួនមិនចូលចិត្តព្រះនាង Meghan ទាល់តែសោះ។

«ខ្ញុំមិនចូលចិត្តនាងនោះទាល់តែសោះ ហើយនាងក៏ប្រហែលជាដឹងអំពីប្រការនេះ។ ប៉ុន្តែ ខ្ញុំនៅតែចង់ជូនពរសំណាងល្អចំពោះព្រះអង្គម្ចាស់ Harry ព្រោះថា គាត់នឹងត្រូវការប្រការនោះក្នុងជីវិតអាពាហ៍ពិពាហ៍» លោក Trump បន្ថែម៕

ប្រភព៖ BI, BBC
ប្រែសម្រួល៖ បុត្រា

March 15, 2021

ប្រមុខរដ្ឋាភិបាលកម្ពុជា ណែនាំដល់អភិបាលរាជធានី-ខេត្ត ពិចារណាផ្អាកពិធីមង្គលការ និងពិធីបុណ្យផ្សេងៗ ដើម្បីបង្ការវីរុស Covid-19

ដើម្បីចៀសវាងការផ្ទុះរីករាលដាលជំងឺ Covid-19 បន្តទៀ សម្តេចតេជោ ហ៊ុន សែន បានស្នើទៅអភិបាលរាជធានី-ខេត្ត ផ្អាកការរៀបចំពិធីមង្គលការ និងពិធីផ្សេងៗដែលមានមនុស្សចូលរួមច្រើន។

នៅរសៀលថ្ងៃទី 15 មីនានេះ ប្រមុខរដ្ឋាភិបាលកម្ពុជា តាមរយៈសារជាសំឡេង បានថ្លែងថា នាពេលកន្លងទៅសម្តេចបានផ្តល់សិទ្ធិ និងអំណាចដល់អភិបាលរាជធានី-ខេត្ត ក្នុងការសម្រេចបិទ ឬបើកសកម្មភាពនៃពិធីផ្សេងៗក្នុងសង្គម។ ក៏ប៉ុន្តែ សកម្មភាពនេះមិនទាន់ត្រូវបានចាត់វិធានការតឹងរ៉ឹងនៅឡើយ ខណៈដែលអ្នកទៅចូលរួមពិធីសង្គមផ្សេងៗមានបញ្ហាឆ្លងរាលដាលវីរុស។

«អ៊ីចឹងខ្ញុំសូមស្នើឱ្យអភិបាលខេត្ត អភិបាលរាជធានី ធ្វើការពិចារណាទាក់ទិនការចេញបទបញ្ជាផ្អាកជាបណ្តោះអាសន្ននូវពិធីមង្គលការ ឬពិធីផ្សេងៗនៅក្នុងខេត្ត» ប្រមុខរដ្ឋាភិបាលមានប្រសាសន៍ដូច្នេះ និងបានបន្តថា «សូមឯកឧត្តម លោកជំទាវ ពិនិត្យមើល ដើម្បីរៀបចំនូវលិខិតជូនដំណឹង ដើម្បីស្នើសុំការយោគយល់ពីសំណាក់ប្រជាពលរដ្ឋទៅលើការផ្អាកជាបណ្តោះអាសន្ននូវការរៀបមង្គលការជាដើម»។

នាយករដ្ឋមន្ត្រី ក៏បានស្នើឱ្យមានការយោគយល់ពីសំណាក់ប្រជាពលរដ្ឋផងដែរ ទាក់ទិននឹងបញ្ហាផ្អាកពិធីផ្សេងៗដែលរដ្ឋបាលមូលដ្ឋាននឹងធ្វើឡើងនាពេលខាងមុខ៕

ដកស្រង់ដោយ៖ បុត្រា

March 15, 2021

ក្រសួងសុខាភិបាលបញ្ជាក់ថា ការចាក់វ៉ាក់សាំងបង្ការ Covid-19 គឺជារឿងស្ម័គ្រចិត្ត

នៅក្នុងសន្និសីទសារព័ត៌មានមួយនាពេលថ្មីៗនេះ ក្រសួងសុខាភិបាលកម្ពុជាបានបញ្ជាក់យ៉ាងច្បាស់ថា «ការចាក់វ៉ាក់សាំងបង្ការ Covid-19 គឺជារឿងស្ម័គ្រចិត្ត ពុំមានបុគ្គលណាបង្ខិតបង្ខំឡើយ»។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាល បានបញ្ជាក់ដូចខាងលើនេះ ដើម្បីជាការឆ្លើយតបនឹងសំណួរដែលត្រូវបានគេលើកឡើងថា «ក្រោយចាក់វ៉ាក់សាំងបង្ការ Covid-19 រួចហើយ បើអ្នកទទួលការចាក់វ៉ាក់សាំងមានបញ្ហាប្រតិកម្ម តើស្ថាប័នណាជាអ្នកទទួលខុសត្រូវ?»។

ដោយឡែក ទាក់ទងនឹងបញ្ហាប្រាក់រាប់លានដុល្លារដែលទទួលបានពីសប្បុរសជន សម្រាប់ជួយដល់ការប្រយុទ្ធប្រឆាំងនឹង Covid-19 លោកជំទាវវេជ្ជបណ្ឌិត ក៏បានថ្លែងថា ខ្ទង់ប្រាក់ទាំងនោះនឹងត្រូវបានយកទៅទិញវ៉ាក់សាំងបង្ការវីរុសនេះបន្ថែមទៀត ដោយសារថា វ៉ាក់សាំង Sinopharm ដែលជាជំនួយរបស់ចិន និង វ៉ាក់សាំងរបស់កម្មវិធី Covax-Facility នឹងមិនគ្រប់គ្រាន់សម្រាប់ការប្រើប្រាស់នៅកម្ពុជា។

ព័ត៌មានបន្ថែម សូមស្ដាប់ប្រសាសន៍របស់លោកជំទាវវេជ្ជបណ្ឌិត ឱ វណ្ណឌីន ដូចខាងក្រោម៖

ប្រភព៖ ទទក
ដកស្រង់ដោយ៖ បុត្រា

March 15, 2021

មីយ៉ានម៉ា៖ រោងចក្រចិនច្រើនកន្លែងត្រូវបានដុតបំផ្លាញ ខណៈបាតុករភូមា 38នាក់ បានបាត់បង់ជីវិត

រោងចក្រមួយចំនួនដែលមានភាគហ៊ុនរបស់ចិន នៅតំបន់ឧស្សាហកម្មក្នុងទីក្រុង Yangon ត្រូវបានដុតបំផ្លាញ នាំឱ្យកងកម្លាំងប៉ូលិសបាញ់ប្រហារលើហ្វូងបាតុករ បណ្ដាលឱ្យមនុស្សរាប់សិបនាក់បាត់បង់ជីវិត។

សារព័ត៌មានក្នុងស្រុកបានឱ្យដឹងថា នៅពេលផ្សែងចាប់ផ្ដើមលេចឡើងចេញពីតំបន់ឧស្សាហកម្ម Hlaingthaya ជាយក្រុង Yangon កាលពីថ្ងៃទី 14 មីនា កងកម្លាំងសន្តិសុខក៏ចាប់ផ្ដើមបាញ់កាំភ្លើងសំដៅលើហ្វូងបាតុករ បណ្ដាលឱ្យមនុស្សយ៉ាងតិច 22 នាក់បានស្លាប់។

ទូរទស្សន៍ Myawaddy របស់កងទ័ពភូមា បានចេញផ្សាយថា ក្រុមប៉ូលិសប្រឆាំងបាតុកម្មបានផ្ទុះអាវុធនៅពេលរោងចក្រកាត់ដេរចំនួន 4 និងរោងចក្រផលិតជីចំនួន 1 កន្លែង បានចាប់ឆេះ។ ហ្វូងបាតុករប្រមាណ 2,000 នាក់ បានរារាំងរថយន្តពន្លត់អគ្គិភ័យធ្វើសកម្មភាព។

«ពិតជាសាហាវ។ គ្រប់គ្នាត្រូវបានបាញ់ប្រហារនៅចំពោះមុខខ្ញុំ។ ខ្ញុំនឹងមិនភ្លេចទិដ្ឋភាពនេះឡើយ» អ្នកយកព័ត៌មានម្នាក់នៅកន្លែងកើតហេតុរៀបរាប់។

ក្រៅពីតួលេខបាតុករដែលបានស្លាប់ខាងលើ ក៏មានមនុស្សចំនួន 16 នាក់ផ្សេងទៀតបានបាត់បង់ជិវិតនៅក្នុងតំបន់មួយចំនួន ក្នុងនោះមានដូចជា Mandalay និង Bago ជាដើម នាំឱ្យថ្ងៃទី 14 មីនា ក្លាយជាថ្ងៃបង្ហូរឈាមបំផុតរាប់ចាប់ពីក្រោយថ្ងៃរដ្ឋប្រហារយោធា។ ទូរទស្សន៍កងទ័ព MRRV បានផ្សាយថា ប៉ូលិសម្នាក់បានស្លាប់ដោយសាររបួសនៅត្រង់ដើមទ្រូង បន្ទាប់ពីមានការប៉ះទង្គិចជាមួយក្រុមបាតុករ។

ច្បាប់អាជ្ញាសឹកត្រូវបានអនុវត្តនៅក្នុងតំបន់ Hlaingthaya និងខណ្ឌមួយផ្សេងទៀតនៅទីក្រុង Yangon។ បច្ចុប្បន្ន មិនទាន់មានក្រុមណាមួយចេញមុខទទួលខុសត្រូវចំពោះការដុតបំផ្លាញរោងចក្រខាងលើនេះនៅឡើយ។

ភាគីកងទ័ពបានបដិសេធការអធិប្បាយអំពីហេតុការណ៍ខាងលើ ខណៈតំណាងរាស្ត្រ Sasa ដែលតំណាងឱ្យក្រុមតំណាងរាស្ត្រជាប់ឆ្នោតដែលត្រូវបានផ្ដួលរំលំដោយរដ្ឋប្រហារ បានបង្ហាញការគាំទ្រដល់ក្រុមបាតុករ។ លោក Sasa ថ្លែងថា៖ «ក្រុមជនល្មើស ជនដៃដល់ ដែលជាសត្រូវរបស់ប្រជាជនមីយ៉ានម៉ា SAC (ក្រុមប្រឹក្សាគ្រប់គ្រងរដ្ឋ) នឹងត្រូវទទួលខុសត្រូវចំពោះឈាមគ្រប់ដំណាក់ដែលបានស្រក់ចេញ»។

ចំណែកស្ថានទូតចិន បានអធិប្បាយថា ស្ថានភាពពិតជា «ធ្ងន់ធ្ងរ» ហើយថា បុគ្គលិកជនជាតិចិនជាច្រើននាក់បានរងរបួស និងជាប់គាំងក្នុងអគារ ព្រមទាំងបានស្នើឱ្យមីយ៉ានម៉ាការពារទ្រព្យសម្បត្តិ និងពលរដ្ឋចិនផងដែរ។

ប្រទេសមីយ៉ានម៉ា បានធ្លាក់ទៅក្នុងអំពីហិង្សា និងភាពវឹកវរ បន្ទាប់ពីកងទ័ពបានយកលេសដែលពួកគេបានចោទថាមានអំពើលួចបន្លំសន្លឹកឆ្នោតដើម្បីធ្វើរដ្ឋប្រហារ និងបានចាប់ខ្លួនទីប្រឹក្សារដ្ឋ លោកស្រី Aung San Suu Kyi រួមនឹងក្រុមមន្ត្រីរបស់បក្សសម្ព័ន្ធជាតិប្រជាធិបតេយ្យ (NLD)។ លោកស្រី Suu Kyi ដែលបច្ចុប្បន្នប្រឈមនឹងការចោទប្រកាន់ជាច្រើនករណី នឹងត្រូវបង្ហាញខ្លួននៅក្នុងតុលាការនាថ្ងៃនេះ៕

ប្រភព៖ Reuters
ប្រែសម្រួល៖ បុត្រា

March 15, 2021

ក្រពើយក្ស ឡើងជ្រញ់វះកាត់ ក្រោយពីភ្លេចខ្លួន ច្រឡំលេបស្បែកជើងបាតា ចូលពោះ

ល្បីល្បាញពេញបណ្ដាញសង្គម! រូបភាពសត្វក្រពើដ៏ធំសម្បើម 1ក្បាល ដេកយ៉ាងស្ងប់ស្ងៀមនៅលើគ្រែអ្នកជំងឺ រង់ចាំឱ្យក្រុមគ្រូពេទ្យធ្វើការវះកាត់ ដើម្បីយកស្បែកជើងបាតាម្ខាង ចេញពីក្នុងពោះរបស់វា ក្រោយពីវាភ្លេចខ្លួន ច្រឡំលេបចូលទៅ។

ក្លាយជាព័ត៌មានដ៏គួរឱ្យភ្ញាក់ផ្អើល និងគួរឱ្យអស់សំណើចមួយ នៅលើបណ្ដាញសង្គម នៅពេលដែលអ្នកលេងអ៊ីនធើណិតទាំងឡាយ បានឃើញរូបភាពសត្វក្រពើដ៏ធំ 1ក្បាល ដេកយ៉ាងស្ងៀមនៅលើគ្រែវះកាត់។ វាជាសត្វក្រពើ 1ក្បាល នៃទន្លេ នីល ដែលមានឈ្មោះថា Anuket មកពីកសិដ្ឋានចិញ្ចឹមក្រពើមួយកន្លែង នៅក្នុងរដ្ឋ ហ្វ្លរីដា ដែលមានប្រវែង 3.5ម៉ែត្រ និងទម្ងន់ខ្លួន 150គីឡូក្រាម។

មូលហេតុនៃរឿងរ៉ាវទាំងអស់នេះ គឺមកពី Anuket បានភ្លេចខ្លួន ច្រឡំលេបស្បែកជើងបាតាម្ខាងរបស់អ្នកទេសចរ ដែលបានធ្វើជ្រុះក្នុងអំឡុងពេលដើរតោងខ្សែកាប្លិ៍ ឆ្លងកាត់ស្រះដែលវារស់នៅ។ អ្នកមើលឃើញហេតុការណ៍នោះ បានរៀបរាប់ថា វាបានលេបស្បែកជើងនោះចូលទៅ រួចបានក្អែរចេញមកវិញ មុននឹងលេបចូលទៅវិញម្ដងទៀត។

ខាងកសិដ្ឋានចិញ្ចឹមក្រពើ បានព្យាយាមជួយគ្នា រិះរកវិធីយកស្បែកជើងនោះចេញពីពោះ Anuket មកវិញ ទាំងការធ្វើឱ្យវាក្អួត ធ្វើម៉ាស្សាពោះរបស់វា ដើម្បីឱ្យស្បែកជើងនោះរំកិលចេញមកវិញ ឬសូម្បីតែ យកដៃលូកចូលទៅក្នុងពោះរបស់វាទៀតផង តែវិធីទាំងអស់នោះ មិនទទួលបានលទ្ធផលឡើយ។ ហេតុការណ៍នេះ បានកើតឡើងតាំងពីអំឡុងខែធ្នូ ឆ្នាំកន្លងទៅ។

ពេលវេលា បានកន្លងទៅ 2ខែ ខាងក្រុមគ្រូពេទ្យមកពីមហាវិទ្យាល័យហ្វ្លរីដា បានទទួលការផ្ដល់ដំណឹងអំពីរឿងនេះ ក៏ចូលមកជួយចាត់ការ។ Anuket ត្រូវបានបញ្ជូនមកមន្ទីរពេទ្យសត្វ តាំងពីថ្ងៃទី5 ខែកុម្ភៈ ដោយខាងក្រុមពេទ្យសត្វ បានសាកល្បងប្រើវិធីផ្សេងៗ ដែលមិនមែនជាការវះកាត់ជាមុនសិន ដើម្បីជាការកាត់បន្ថយភាពប្រឈមចំពោះ Anuket តែ នៅតែមិនទទួលបានលទ្ធផលដូចគ្នា។

ទីបំផុត ក្រុមគ្រូពេទ្យសត្វទាំងនោះ ក៏សម្រេចចិត្ត ធ្វើការវះពោះរបស់ Anuket ដើម្បីចូលទៅដល់ក្រពះ និងវះយកស្បែកជើងនោះចេញ។ មិនយូរប៉ុន្មាន ក្រុមគ្រូពេទ្យ ក៏អាចយកស្បែកជើងកំពូលបញ្ហានោះ ចេញមកបាន…បន្ទាប់មកក៏ឱ្យ Anuket ដេកសម្រាកនៅក្នុងមន្ទីរពេទ្យបន្ត ហើយមិនប៉ុន្មានថ្ងៃក្រោយមក វាក៏បានទទួលការអនុញ្ញាតឱ្យត្រឡប់ទៅស្ដារស្ថានភាពរាងកាយឡើងវិញ នៅឯកសិដ្ឋានដែលវារស់នៅនោះវិញ។

ខាងកសិដ្ឋាន បានចេញមកថ្លែងថា បច្ចុប្បន្ន សុខភាពរបស់ Anuket កំពុងតែល្អប្រសើរឡើងវិញហើយ តែរាងកាយនៅមិនទាន់រឹងមាំ 100%នៅឡើយ អាចត្រូវការពេលវេលាសម្រាកមួយរយៈទៀត ទើបអាចចេញមកបង្ហាញខ្លួនឱ្យអ្នកទេសចរបានទស្សនាជាថ្មីម្ដងទៀត និងបានផ្ដាំផ្ញើជាឧទាហរណ៍ថា សូមកុំបណ្ដោយឱ្យសត្វក្រពើ លេបស្បែកជើងចូលពោះជាដាច់ខាត!៕

ប្រភព៖ www.india.com
ប្រែសម្រួលដោយ ទិទីតំតាតូ

March 15, 2021

Meghan ភរិយាអតីតព្រះអង្គម្ចាស់អង់គ្លេស នឹងឈរឈ្មោះជាបេក្ខភាពប្រធានធិបតីអាមេរិក នៅឆ្នាំ 2024 ក្រោយកិច្ចសម្ភាសចោទប្រកាន់រាជវាំង

សារព័ត៌មានអង់គ្លេស Daily Mail ដកស្រង់ប្រភពព័ត៌មានពីមន្ត្រីជាន់ខ្ពស់ម្នាក់នៅក្នុងគណបក្សការងារអង់គ្លេស (Labour Party) ដែលសុំមិនបញ្ចេញឈ្មោះ បានឱ្យដឹងថា Meghan Markle កំពុងតែរកវិធីប្រើប្រាស់ស្ថានការណ៍ក្រោយកិច្ចសម្ភាសដែលបានចោទប្រកាន់រាជវង្សអង់គ្លេសថា «រើសអើងពូជសាសន៍» ដើម្បីចាប់ផ្ដើមជីវិតនយោបាយរបស់ខ្លួន ដែលនេះអាចនាំនាងចូលកាន់កាប់សេតវិមាន។

Meghan Markle ត្រូវបានគេដឹងថា កំពុងតភ្ជាប់ទំនាក់ទំនងជាមួយនឹងក្រុមមន្ត្រីជាន់ខ្ពស់របស់បក្សប្រជាធិបតេយ្យអាមេរិក ដើម្បីផ្ដើមយុទ្ធនាការ និងរកវិធីប្រកួតប្រជែងក្នុងការឈរឈ្មោះបោះឆ្នោតប្រធានាធិបតី។ យោងតាម Daily Mail បណ្ដាញគាំទ្រអតីតនាយករដ្ឋមន្ត្រីអង់គ្លេស លោក Tony Blair និងបក្សប្រជាធិបតេយ្យ កំពុងតែពិភាក្សាគ្នាអំពីមហិច្ឆតានយោបាយរបស់ Meghan និងក្រុមអ្នកគាំទ្រប្រកបដោយសក្ដានុពលរបស់នាង។

ប្រភពព័ត៌មានសម្ងាត់របស់ Daily Mail សង្កត់ធ្ងន់ថា Meghan កំពុងពិចារណាអំពីការឈរឈ្មោះជាបេក្ខភាពប្រធានាធិបតីអាមេរិកសម្រាប់ឆ្នាំ 2024 នៅពេលដែលលោក Joe Biden មានអាយុ 82 ឆ្នាំ ដែលនឹងអាចប្រជែងឆ្នោតក្នុងអាណត្តិទីពីរ។

ព័ត៌មានខាងលើត្រូវបានលើកឡើង បន្ទាប់ពី Meghan និងស្វាមី Harry អតីតព្រះអង្គម្ចាស់អង់គ្លេសដែលជាព្រះរាជនត្តានៃមហាក្សត្រី Elizabeth ទីពីរ បានធ្វើបទសម្ភាសរយៈពេលជាង 2 ម៉ោង ជាមួយនឹងពិធីការិនី និងជាមហាសេដ្ឋិនី Oprah Winfrey ដែលបានចាក់ផ្សាយនៅលើទូរទស្សន៍អាមេរិក កាលពីថ្ងៃទី 7 មីនា។

ព្រះអង្គម្ចាស់ Harry (Henry Charles Albert David)

ក្នុងកិច្ចសម្ភាស នាង Meghan បានបង្ហើបឱ្យដឹងអំពីព័ត៌មានគួរឱ្យចាប់អារម្មណ៍ជាច្រើន ដូចជាថា នាងធ្លាប់មានបំណងធ្វើអត្តឃាតដោយសារទាល់ច្រក មិនទទួលបានចម្លើយ ឬជំនួយពីរាជវាំង ព្រមទាំងបានចោទប្រកាន់ថា រាជវង្សអង់គ្លេសមានការរើសអើងពូជសាសន៍នៅពេលនាងកំពុងមានគ័ភ៌, មិនចង់ផ្ដល់ឋានៈជាព្រះអង្គម្ចាស់ ឬព្រះនាងដល់កូនរបស់នាង និងថែមទាំងយកចិត្តទុកដាក់លើសម្បុរស្បែករបស់ទារកក្នុងផ្ទៃទៀតផង។ល។

ប្រភព៖ Daily Mail
ប្រែសម្រួល៖ បុត្រា

March 15, 2021

តួលេខវិជ្ជមាននឹង Covid-19 ថ្មីនៅកម្ពុជា សម្រាប់ព្រឹកថ្ងៃទី 15មីនា បានថយចុះច្រើនធៀបនឹងម្សិលមិញ

កម្ពុជារកឃើញអ្នកវិជ្ជមាននឹង Covid-19 ថ្មី ចំនួន 20 នាក់ទៀត គិតត្រឹមព្រឹកថ្ងៃទី 15 មីនា 2021 ទន្ទឹមនឹងនេះក៏មានអ្នកជាសះស្បើយថ្មីចំនួន 83 នាក់ផងដែរ។

អ្នកវិជ្ជមានថ្មីខាងលើ រួមមាន 1 នាក់ជាករណីនាំចូលដែលមិនមែនជាពលករខ្មែរត្រលប់មកពីប្រទេសថៃ និង 1 ករណីជាពលករខ្មែរមកពីប្រទេសថៃ ខណៈ 18 នាក់ជាករណីពាក់ព័ន្ធនឹង «ព្រឹត្តិការណ៍សហគម 20កុម្ភៈ»។

ចំណែកករណីជាសះស្បើយទាំង 83 នាក់ រួមមាន 11 ករណីជាអ្នកដំណើរមកពីបរទេស មិនមែនជាពលករខ្មែរមកពីថៃ, 72 នាក់ ជាករណីពាក់ព័ន្ធនឹងព្រឹត្តិការណ៍ 20កុម្ភៈ។

គិតមកដល់ព្រឹកថ្ងៃទី 15 មីនា 2021 នេះ កម្ពុជាមានអ្នកវិជ្ជមាននឹង Covid-19 សរុបចំនួន 1,325 នាក់ ក្នុងនោះមានអ្នកជាសះស្បើយចំនួន 730 នាក់ និងអ្នកកំពុងព្យាបាលចំនួន 592 នាក់៕

ប្រភព៖ ក្រសួងសុខាភិបាល
ដកស្រង់៖ បុត្រា

March 15, 2021

Covid-19 នៅ ASEAN គិតត្រឹមដំណាច់ថ្ងៃទី 14/មីនា៖ អ្នកឆ្លងថ្មីនៅហ្វីលីពីន កើនលើសឥណ្ឌូនេស៊ី

កាលពីថ្ងៃទី 14 មីនា បណ្ដាប្រទេសនៅក្នុងសមាគម ASEAN រកឃើញករណីវិជ្ជមានថ្មីជាង 11,200 នាក់ នាំឱ្យតួលេខអ្នកវិជ្ជមានសរុបឡើងជិតដល់ 2.6 លាននាក់ ក្នុងនោះ អ្នកវិជ្ជមានថ្មីនៅប្រទេសហ្វីលីពីន បានកើនលើសឥណ្ឌូនេស៊ី។

យោងតាមទំព័រ Worldometers គិតត្រឹមម៉ោង 23 និង 59 នាទី នៃថ្ងៃទី 14 មីនា បណ្ដាប្រទេសនៅក្នុងសមាគមប្រជាជាតិអាស៊ីអាគ្នេយ៍ (ASEAN) បានរកឃើញអ្នកវិជ្ជមាននឹង Covid-19 ថ្មី ចំនួន 11,203 ករណី និងអ្នកស្លាប់ចំនួន 164 ករណី។

ដូច្នេះ បណ្ដាប្រទេសក្នុងសមាគម ASEAN បច្ចុប្បន្ន មានអ្នកវិ្ជមាននឹង Covid-19 សរុបចំនួន 2,598,168 នាក់ ក្នុងនោះមាន 55,821 នាក់ បានស្លាប់ និង 2,330,813 នាក់បានជាសះស្បើយ។

ក្នុងថ្ងៃទី 14 មីនា តំបន់អាស៊ីអាគ្នេយ៍មានប្រទេសចំនួន 3 ដែលមានអ្នកស្លាប់ដោយសារ Covid-19 ក្នុងនោះ ឥណ្ឌូនេស៊ីមានរហូតដល់ 97 នាក់ ខណៈហ្វីលីពីន មាន 63 នាក់ និងម៉ាឡេស៊ីមាន 4 នាក់។

ឥណ្ឌូនេស៊ីបន្តជាសម្បុកវីរុស Covid-19 ធំជាងគេក្នុងតំបន់ ASEAN ដោយមានអ្នកជំងឺសរុប 1,419,455 នាក់ ក្នុងនោះមានអ្នកជំងឺថ្មីចំនួន 4,714 នាក់ និងអ្នកស្លាប់សរុប 38,426 នាក់។

ហ្វីលីពីនកំពុងដោះស្រាយបញ្ហាឆ្លងរាលដាលថ្មី ដោយមានករណីឆ្លងថ្មីច្រើនជាងឥណ្ឌូនេស៊ីទៅទៀត ដោយមានអ្នកវិជ្ជមានថ្មីចំនួន 4,899 នាក់ ក្នុងចំណោមអ្នកវិជ្ជមានសរុបចំនួន 621,498 នាក់ និងអ្នកស្លាប់សរុប 12,829 នាក់។ ចំណែកស្ថានការណ៍នៅប្រទេសម៉ាឡេស៊ី កំពុងប្រសើរឡើងជាងមុនបន្តិច ដោយមានអ្នកវិជ្ជមានថ្មីក្នុងថ្ងៃទី 14 មីនា ចំនួន 1,354 នាក់ នាំឱ្យតួលេខសរុបនៃអ្នកវិជ្ជមាន ឡើងដល់ 621,498 និងស្លាប់សរុប 12,829 នាក់៕

ប្រភព៖ Worldometers/THX
ប្រែសម្រួល៖ បុត្រា

March 15, 2021

Author: សឿន សំណាង